ଜୟପୁର: ମୁଣ୍ଡ ଝାଳ ତୁଣ୍ଡରେ ମାରି ଚାଷୀ ଚାଷ କରିଥିଲା । କରୋନା ସମୟରେ କିଛି ରୋଜଗାର ହୋଇଥିଲେ ଦୁଇ ଓଳି ଦୁଇ ମୁଠା ଖାଇବାକୁ ମିଳିଥାନ୍ତା । କିନ୍ତୁ ଏବେ ସବୁ ଉଜୁଡ଼ି ଗଲା । କେନାଲ ପାଣି ସବୁ ବୁଡ଼େଇ ଦେଲା । ଯେଉଁ କେନାଲକୁ ଚାଷ ପାଇଁ ବରଦାନ ଭାବିଥିଲେ ଚାଷୀ ସେହି କେନାଲ ଏବେ ଅଭିଶାପ ପାଲଟିଲା । ହଠାତ ସବୁକିଛି ବଦଳିଗଲା । ଚାଷକୁ ନେଇ ସଜ ସଜ ଭାବନାକୁ ଧୋଇନେଲା କେନାଲର ପାଣି । ମୁହୂର୍ତ୍ତକେ ଭାଙ୍ଗିଲା କେନାଲର ବନ୍ଧ । ଶହ ଶହ ହେକ୍ଟର ଚାଷ ଜମି ହେଲା ବାଲିଚର । କୋରାପୁଟ ଜିଲ୍ଲା ଜୟପୁର କଙ୍ଗା ପଞ୍ଚାୟତ ଡୁମୁରାଗୁଡାରେ କୋଲାବ ମୁଖ୍ୟ କେନାଲର ବନ୍ଧ ଭାଙ୍ଗିଯିବାରୁ ଜଳମଗ୍ନ ହୋଇଛି ଚାଷଜମି । ମରାମତି ଅଭାବରୁ ତଥା ବିଭାଗୀୟ ଅଧିକାରୀଙ୍କ ଖାମଖିଆଲି ନୀତି ଯୋଗୁ ବନ୍ଧ ଭାଙ୍ଗିଥିବା ଚାଷୀ ଅଭିଯୋଗ କରିଛନ୍ତି  ।

ସୂଚନା ଅନୁଯାୟୀ, ଚାଷ କାର୍ଯ୍ୟ ପାଇଁ ଫଷଲ ଜମି ପାଖରେ ଯାଇଥିଲା କେନାଲ । ତେବେ କେନାଲ ବନ୍ଧ ବହୁ ପୁରୁଣା ହୋଇପଡ଼ିଥିଲା । ସେଥିପାଇଁ କେନାଲ ବନ୍ଧର ମରାମତି ପାଇଁ ବାରମ୍ବାର କୁହାଯାଇଥିଲା । କିନ୍ତୁ ଏଥିପ୍ରତି କେହି ଧ୍ୟାନ ଦେଇନଥିଲେ । ଯାହା ଫଳରେ କେନାଲରେ ପାଣି ଅଧିକ ହେବାରୁ କେନାଲଟି ଭାଙ୍ଗିଯାଇଥିଲା । ସେପଟେ ମରାମତି ଅଭାବରୁ କୋଲାବ କେନାଲର ବନ୍ଧ ଭାଙ୍ଗିପଡ଼ିଛି ବୋଲି ଚାଷୀ ଅଭିଯୋଗ କରିଛନ୍ତି  । ୧୫ ଫୁଟ୍‌ ଉଚ୍ଚର ବନ୍ଧ ଭାଙ୍ଗିବାରୁ ଜଳମଗ୍ନ ହୋଇଛି ୫ଶହ ହେକ୍ଟରୁ ଅଧିକ ଚାଷଜମି ।

ଯାହାଫଳରେ ହେକ୍ଟର ହେକ୍ଟ ଚାଷଜମି ଏବେ ନଷ୍ଟ ହୋଇଯାଇଚି ।  ନଷ୍ଟ ହୋଇଛି ବ୍ୟାପକ ଫସଲ  । ମୁଣ୍ଡରେ ହାତ ଦେଇ ବସିଛି ଚାଷୀ । ଆଉ ଏବେ ଚିନ୍ତାରେ ପଡ଼ିଛନ୍ତି  ଚାଷୀ  । ଏ ବିଷୟରେ  ବିଭାଗୀୟ କର୍ତ୍ତୃପକ୍ଷଙ୍କ ପାଖେ ସମସ୍ତ ସୂଚନା ଥିଲେ ମଧ୍ୟ ଅନୁଦାନ ଅଭାବରୁ କେନାଲ ବନ୍ଧ ମରାମତି କରିପାରିନଥିବା ସଫେଇ ଦେଇଛନ୍ତି ବିଭାଗୀୟ ଅଧିକାରୀ  । ଏଭଳି ସ୍ଥିତିରେ କ୍ଷତିଗ୍ରସ୍ତ ଚାଷୀ ଋଣ ଶୁଝିବା ଚିନ୍ତା ପଡ଼ିଛନ୍ତି  ।

ନବରଙ୍ଗପୁର: ଆଷାଢ ଯାଇ ଶ୍ରାବଣ ଶେଷ ହେବାକୁ ବସିଲାଣି, ହେଲେ ବର୍ଷାର ଦେଖାନାହିଁ  । ଚଳିତ ବର୍ଷ ପ୍ରଥମରୁ ବର୍ଷା ଦେଖି ଭଲ ଅମଳର ଆଶା ରଖିଥିଲେ ଚାଷୀ । ହେଲେ ଏବେ ଜୁନ୍ ଜୁଲାଇରେ ବର୍ଷା ଉଭେଇ ଯାଇଛି । ଆଉ ଚାଷ ଆରମ୍ଭ କରିଥିବା ଚାଷୀ ପାଣି ନପାଇ ବର୍ଷାକୁ ଚାତକ ଭଳି ଅନାଇ ରହିଛନ୍ତି  । ମୌସୁମୀ ଆସିଲା ସତ, ହେଲେ ଉଭେଇ ଯାଇଛି ବର୍ଷା  । ବର୍ଷା ଅଭାବରୁ ଚାଷ କାର୍ଯ୍ୟ ବାଧାପ୍ରାପ୍ତ ହୋଇଥିବା ବେଳେ ହାତବାନ୍ଧି ବସିଛି ଚାଷୀ ।

ଶ୍ରାବଣ ମାସରେ ବର୍ଷାର ଦେଖାନାହିଁ  । ଯିଏ ଯେମିତି ପାଣି ମଡ଼ାଇ ଚାଷ କରିଥିବା ବେଳେ ଏବେ ଜଳସେଚନ ଅଭାବରୁ ଧାନତଳି ପୋଡ଼ି ଗଲାଣି । ନବରଙ୍ଗପୁର ଅଞ୍ଚଳରେ ହେକ୍ଟ ହେକ୍ଟର ଜମିରେ ରୁଆ କାମ ଶେଷ ହୋଇଥିବା ବେଳେ ପାଣି ଅଭାବରୁ ତଳି ଶୁଖି ଗଲାଣି । ଏଭଳି ସ୍ଥିତି ଆଗକୁ ଲାଗିରହିଲେ ମରୁଡି ଆଶଙ୍କା ରହିଛି । ଏନେଇ ଆମେ କୃଷି ଅଧିକାରୀଙ୍କ ସହିତ ଯୋଗାଯୋଗ କରିଥିବା ବେଳେ, ଆଗାମୀ କିଛି ଦିନ ସମାନ ସମସ୍ୟା ରହିଲେ କ୍ଷୟକ୍ଷତି ଆକଳନ କରି ରିପୋର୍ଟ ସରକାରଙ୍କୁ ଦିଆଯିବ ବୋଲି ଜଣାଇଛନ୍ତି  ।

ସେପଟେ ଯାଜପୁର ବଡ଼ଚଣା ବ୍ଲକ ଅଣକା ପଞ୍ଚାୟତରେ ବି ସମାନ ସମସ୍ୟା ଦେଖାଦାଇଛି । ବର୍ଷା ଅଭାବ ଯୋଗୁ ଚାଷ ଜମି ଫାଟି ଆଁ କରିଥିବା ବେଳେ ପାଣି ନପାଇ ତଳି ନଷ୍ଟ ହେଲାଣି । ଚାଷ କାମ ଅଧାରେ ରହିବା ଯୋଗୁ ଚାଷୀଙ୍କ ଚିନ୍ତା ବଢିଛି । ଧାର କରଜ କରି ଚାଷ ଆରମ୍ଭ କରିଥିବା ଚାଷୀ ମୁଣ୍ଡରେ ଏବେ ଚଡକ ପଡିଛି  । ଆଉ କିଛି ଦିନ ବର୍ଷା ନହେଲେ ଆଗକୁ ମରୁଡି ଡର ରହିଛି । ଏଦିଗରେ ପ୍ରଶାସନ ପକ୍ଷରୁ ପଦକ୍ଷେପ ନେବା ଜରୁରୀ ହୋଇପଡିଛି ।