ନନ୍ଦିଘୋଷ ବ୍ୟୁରୋ: ବାକି ଟଙ୍କା ମାଗିବାରୁ ମର୍ଡର। ପାନ ଦୋକାନୀଙ୍କ ମାଡରେ ଯୁବକଙ୍କ ମୃତ୍ୟୁ ହୋଇଛି । ବାଲେଶ୍ୱର ଜିଲ୍ଲା ଖଇରା ବଜାରରେ ଘଟିଛି ଏଭଳି ଘଟଣା। ମୃତକ ହେଲେ ଖଇରା ପଂଚାୟତ ପୁରୁଷୋତ୍ତମପୁର ଗାଁର ଜୟକୃଷ୍ଣ ସାହୁ।। ଅଭିଯୁକ୍ତ ଦୋକାନୀ ବସନ୍ତ ବେହେରା ଓ ସେଠାରେ ଥିବା ଅନ୍ୟ ଜଣେ ସହଯୋଗୀଙ୍କୁ ଥାନାରେ ଅଟକ ରଖି ପଚରା ଉଚରା ଚଳାଇଛି ଖଇରା ପୋଲିସ। କିଛି ଦିନ ତଳେ ଜୟକୃଷ୍ଣଙ୍କ ଠାରୁ ବସନ୍ତ କିଛି ଟଙ୍କା ଧାର ସୂତ୍ରରେ ଆଣିଥିଲେ l ଉକ୍ତ ଟଙ୍କା ମାଗିବାକୁ ବସନ୍ତଙ୍କ ଦୋକାନକୁ ଯାଇଥିଲେ ଜୟକୃଷ୍ଣ। ସେଠାରେ ବାକି ଟଙ୍କା ନେଇ ଉଭୟଙ୍କ ମଧ୍ୟରେ ବଚସା ଓ ଗଣ୍ଡଗୋଳ ହୋଇଥିଲା। ପରେ ଜୟକୃଷ୍ଣକୁ ମାଡ଼ ମାରି ତଳେ ପକାଇଦେଇଥିଲେ ଦୋକାନୀ। ସ୍ଥାନୀୟ ଲୋକେ ସଙ୍ଗେ ସଙ୍ଗେ ଜୟକୃଷ୍ଣଙ୍କୁ ଖଇରା ମେଡିକାଲକୁ ନେଇଥିଲେ। ହେଲେ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ।
ହିମାଚଳ ପ୍ରଦେଶରେ ପ୍ରକୃତିର ତାଣ୍ଡବ : ଭାସିଗଲେ ୨୦ରୁ ଅଧିକ ଶ୍ରମିକ
ନନ୍ଦିଘୋଷ ବ୍ୟୁରୋ: ହିମାଚଳ ପ୍ରଦେଶରେ ପ୍ରକୃତିର ତାଣ୍ଡବ। ବାଦଲ ଫଟା ବର୍ଷାରୁ ବନ୍ୟାସ୍ଥିତି। କାଙ୍ଗଡା ଜିଲ୍ଲା ଖାନିଆରା ଅଂଚଳରେ ପାଣିର ସୁଅରେ ଭାସିଗଲେ ୨୦ରୁ ଅଧିକ ଶ୍ରମିକ। ପ୍ରବଳ ବର୍ଷା ଯୋଗୁଁ ପାଣି ଆସି ଦୁଇ ଜଣଙ୍କର ମୃତ୍ୟୁ ହୋଇଥିବା ବେଳେ ପ୍ରାୟ ୨୦ ଜଣ ଭାସି ଯାଇଥିବା ଆଶଙ୍କା କରାଯାଉଛି।କାଙ୍ଗଡ଼ା ଜିଲ୍ଲାର ମାନୁନି ଖାଡ୍ରୁ ଦୁଇଟି ମୃତଦେହ ଉଦ୍ଧାର କରାଯାଇଛି। ଖାନିଆରା ମାନୁନି ଖାଡ୍ରେ ଜଳସ୍ତର ବୃଦ୍ଧି ପାଇବା ପରେ ଇନ୍ଦିରା ପ୍ରିୟଦର୍ଶିନୀ ଜଳବିଦ୍ୟୁତ୍ ପ୍ରକଳ୍ପ ନିକଟ ଏକ ଶ୍ରମିକ କଲୋନୀରେ ନିୟୋଜିତ ପ୍ରାୟ ୧୫ରୁ ୨୦ ଜଣ ଶ୍ରମିକ ଭାସି ଯାଇଥିବା ଆଶଙ୍କା କରାଯାଉଛି। ବର୍ଷା ଯୋଗୁଁ ପ୍ରକଳ୍ପ କାର୍ଯ୍ୟ ସ୍ଥଗିତ ରଖାଯାଇଥିଲା। ଶ୍ରମିକମାନେ ଏକ ଅସ୍ଥାୟୀ ଆଶ୍ରୟସ୍ଥଳରେ ବିଶ୍ରାମ ନେଉଥିଲେ। ସେତେବେଳେ ମାନୁନି ଖାଡ ଏବଂ ନିକଟସ୍ଥ ଡ୍ରେନରୁ ବନ୍ୟା ଜଳ ଶ୍ରମିକ କଲୋନୀ ଆଡ଼କୁ ମୁହାଁଇ ଶ୍ରମିକଙ୍କୁ ଭସାଇ ନେଇଥିଲା।
ଶ୍ରମିକ ଭାସିଯିବା ପରେ ଉଦ୍ଧାରକାର୍ଯ୍ୟ ଜୋରସୋରରେ ଚାଲିଛି।ରାଜ୍ୟ ବିପର୍ଯ୍ୟୟ ପ୍ରଶମନ, ସ୍ଥାନୀୟ ପ୍ରଶାସନ, ଗ୍ରାମ ପଞ୍ଚାୟତ ଏବଂ ରାଜସ୍ୱ ବିଭାଗ ପକ୍ଷରୁ ରେସକ୍ୟୁ ଅପରେସନ ଚାଲିଛି। କିଛି ସ୍ଥାନୀୟ ଶ୍ରମିକ ସୁରକ୍ଷିତ ଥିବା ଜଣାପଡିଛି। ଏହି ବନ୍ୟାରେ ଅନେକ ଘର, ସ୍କୁଲ କୋଠା, ଦୋକାନ, ସଂଯୋଗକାରୀ ରାସ୍ତା ଏବଂ ଛୋଟ ପୋଲ କ୍ଷତିଗ୍ରସ୍ତ ହୋଇଛି। ମନାଲି ନିକଟରେ ମନାଲି-ଚଣ୍ଡିଗଡ଼ ଜାତୀୟ ରାଜପଥ ଆଂଶିକ କ୍ଷତିଗ୍ରସ୍ତ ହୋଇଛି। ବଞ୍ଜାର ଉପଖଣ୍ଡ ହୋର୍ନାଗଡ ଅଞ୍ଚଳରେ ବନ୍ୟା ଯୋଗୁଁ ଏକ ପୋଲ ଭାସିଯାଇଛି। ଏକ ସରକାରୀ ସ୍କୁଲ ପରିସରରେ ପାଣି ପଶିବା ସହ ଚାଷ ଜମି ବ୍ଯାପକ କ୍ଷତି ଘଟିଛି। ଆସନ୍ତା ୨୯ ପର୍ଯ୍ୟନ୍ତ ଚାରି ଦିନ ମଧ୍ୟରେ ଚାରି ରୁ ସାତଟି ଜିଲ୍ଲାର ପୃଥକ ସ୍ଥାନରେ ପ୍ରବଳ ବର୍ଷା ହେବା ନେଇ ଅରେଂଜ ଆଲର୍ଟ ଜାରି କରିଛି ପାଣିପାଗ ବିଭାଗ ।
ରିଙ୍କୁ ସିଂଙ୍କୁ ମିଳିଲା ସରକାର ଚାକିରୀ, ଏଣିକି..
ନନ୍ଦିଘୋଷ ବ୍ୟୁରୋ: ଟିମ ଇଣ୍ଡିଆର ଷ୍ଟାର ବ୍ୟାଟ୍ସମ୍ୟାନ ରିଙ୍କୁ ସିଂଙ୍କ କ୍ୟାରିୟର ଅଳ୍ପଦିନର । କିନ୍ତୁ ତାଙ୍କର ରେକର୍ଡ ଅନେକ ଗୁଡ଼ିଏ ରହିଛି । ୧୯୯୭ ମସିହା ଆଲିଗଡ଼ରେ ଏକ ସାଧାରଣ ପରିବାରରେ ତାଙ୍କ ଜନ୍ମ । ବେଶ ସଂଘର୍ଷମୟ ଜୀବନ ଦେଇ ଗତି କରିଥିବା ରିଙ୍କୁ ଏବେ ବିଳାସମୟ ଜୀବନ ବିତାଉଛନ୍ତି । ଏବେ ତାଙ୍କୁ ସରକାରୀ ଚାକିରୀ ଦେଇଛନ୍ତି ଉତ୍ତରପ୍ରଦେଶ ସରକାର ।
ରିଙ୍କୁ ସିଂହଙ୍କୁ ମୌଳିକ ଶିକ୍ଷା ଅଧିକାରୀ ପଦବୀରେ ନିଯୁକ୍ତି ଦିଆଯାଇଛି। ଏହି ନିଯୁକ୍ତି ପ୍ରତ୍ୟକ୍ଷ ନିଯୁକ୍ତି ନିୟମ ଅନୁଯାୟୀ କରାଯାଇଛି, ଯାହା ତାଙ୍କ ପାଇଁ ଏକ ବଡ଼ ସଫଳତା। ଭାରତୀୟ କ୍ରିକେଟ୍ ଦଳ ପାଇଁ ଟି-୨୦ ଅନ୍ତର୍ଜାତୀୟ ମ୍ୟାଚ୍ରେ ଚମତ୍କାର ପ୍ରଦର୍ଶନ କରିଥିବା ରିଙ୍କୁ ସିଂହ ଏବେ ଶିକ୍ଷା କ୍ଷେତ୍ରରେ ସେବା କରିବେ। ଏ ସମ୍ପର୍କରେ ମୌଳିକ ଶିକ୍ଷା ନିର୍ଦ୍ଦେଶକ (ମୌଳିକ)ଙ୍କ ପକ୍ଷରୁ ଏକ ଚିଠି ଜାରି କରାଯାଇଛି। ଆପଣଙ୍କୁ ଜଣାଇ ଦେଉଛୁ ଯେ, ସେ ଟିମ୍ ଇଣ୍ଡିଆର ପ୍ରଥମ ଖେଳାଳି ନୁହଁନ୍ତି, ଏହା ପୂର୍ବରୁ ମଧ୍ୟ ଅନେକ କ୍ରିକେଟର ସରକାରୀ ଚାକିରି ପାଇସାରିଛନ୍ତି।
ରାଜଧାନୀରେ ଦୁର୍ଘଟଣା : ଜଣେ ମୃତ
ନନ୍ଦିଘୋଷ ବ୍ୟୁରୋ: ଭୁବନେଶ୍ବର ସିଆରପି ଓଭରବ୍ରିଜ ଉପରେ ସଡକ ଦୁର୍ଘଟଣା । ଦୁର୍ଘଟଣାରେ ଜଣଙ୍କର ମୃତ୍ୟୁ ହୋଇଛି । ମୃତକ ଜଣଙ୍କ ଜଣେ ଓଲା ଡ୍ରାଇଭର ବୋଲି ଜଣାପଡିଛି । ନିଜ ବାଇକ ଯୋଗ ଯାଉଥିବା ବେଳେ ଧକ୍କା ଦେଇଛି ଅଜଣା ଟ୍ରକ । ଦୁର୍ଘଟଣାରେ ମୃତ୍ୟୁକୁ ନେଇ ଘଟଣାସ୍ଥଳରେ ପ୍ରବଳ ଉତ୍ତେଜନା ଦେଖାଦେଇଥିଲା। ଘଟଣାସ୍ଥଳରେ ପୋଲିସ ପହଞ୍ଚି ଉତ୍ତ୍ୟକ୍ତ ଲୋକଙ୍କୁ ବୁଝାସୁଝା କରିଥିଲା। ମୃତକଙ୍କ ପରିଚୟ ଓ ଦୁର୍ଘଟଣା ଘଟାଇଥିବା ଗାଡି ଓ ଡ୍ରାଇଭରଙ୍କ ସମ୍ପର୍କରେ ଚାଲିଛି ଖୋଳତାଡ଼ ।
ଆସନ୍ତା ୨୮ ତାରିଖରୁ ଆରମ୍ଭ ହେବ ରତ୍ନଭଣ୍ଡାର ମରାମତି କାର୍ଯ୍ୟ
ନନ୍ଦିଘୋଷ ବ୍ୟୁରୋ: ଆସନ୍ତା ୨୮ ତାରିଖରୁ ଆରମ୍ଭ ହେବ ରତ୍ନଭଣ୍ଡାର ମରାମତି କାର୍ଯ୍ୟ। ଶ୍ରୀମନ୍ଦିର ମୁଖ୍ୟ ପ୍ରଶାସକଙ୍କ ଅଧ୍ୟକ୍ଷତାରେ ଅନୁଷ୍ଠିତ ବୈଠକରେ ଏନେଇ ଚୂଡାନ୍ତ ହୋଇଛି। ଶ୍ରୀମନ୍ଦିର କାର୍ଯ୍ୟାଳୟରେ ଏଏସଆଇ ଅଧିକାରୀ ଓ ଭଣ୍ଡାର ମରାମତିକୁ ନେଇ ସମ୍ପୃକ୍ତ ସେବାୟତଙ୍କ ସହ ଆଲୋଚନା କରାଯାଇଛି। ମହାପ୍ରଭୁଙ୍କ ରଥଯାତ୍ରା ସମୟରେ ରତ୍ନଭଣ୍ଡାରର ବାକି ଥିବା ମରାମତି କାର୍ଯ୍ୟ କରାଯିବା ନେଇ ପୂର୍ବରୁ ନିଷ୍ପତି ହୋଇଥିଲା। ନୀଳାଦ୍ରି ବିଜେ ପୂର୍ବରୁ ମରାମତି କାର୍ଯ୍ୟ ଶେଷ କରିବାକୁ ଲକ୍ଷ୍ୟ ରଖାଯାଇଛି।
ଆଜି ମହାକାଶ ଇତିହାସ ଲାଗି ଗୁରୁତ୍ବପୂର୍ଣ୍ଣ ଦିନ, ଅପରାହଣ ୪.୩୦ରେ ଅନ୍ତର୍ଜାତୀୟ ମହାକାଶ ଷ୍ଟେସନରେ ଡକିଂ କରିବ ସ୍ପେସକ୍ରାଫ୍ଟ
ନନ୍ଦିଘୋଷ ବ୍ୟୁରୋ: ଆଜି ମହାକାଶ ଇତିହାସ ଲାଗି ଗୁରୁତ୍ବପୂର୍ଣ୍ଣ ଦିନ। ପୃଥିବୀର ପ୍ରାୟ ୪୦୦ କିଲୋମିଟର ଉପରେ କକ୍ଷପଥରେ ଆଜି ଅପରାହଣ ୪.୩୦ରେ ଅନ୍ତର୍ଜାତୀୟ ମହାକାଶ ଷ୍ଟେସନରେ ଡକିଂ କରିବ ସ୍ପେସକ୍ରାଫ୍ଟ। ସ୍ବାଧୀନ ଭାବେ ଉଡାଣ ଓ ଡକିଂ କ୍ଷମତା ରହିଛି ଡ୍ରାଗନ ସ୍ପେସକ୍ରାଫ୍ଟର। ଗତକାଲି ଫ୍ଲୋରିଡାର କେନେଡି ସ୍ପେସ ସେଣ୍ଟରରୁ ଆରମ୍ଭ ହୋଇଥିଲା ଆକ୍ସିଅମ ୪ ମିଶନ। ଏହି ମିଶନରେ ସାମିଲ ଅଛନ୍ତି ଭାରତୀୟ ଆଷ୍ଟ୍ରୋନଟ ଶୁଭାଂଶୁ ଶୁକ୍ଲା, ହଙ୍ଗେରୀର ତିବୋର କାପୁ, ନାସାର ପୂର୍ବତନ ଆଷ୍ଟ୍ରୋନଟ ପେଗି ହୁଇଟସନ, ପୋଲାଣ୍ଡ ତଥା ୟୁରୋପିଆନ ସ୍ପେସ ଏଜେନ୍ସିର ସ୍ଲାଓଜ ଉଜନସ୍କି ଉଇସନିସ୍କି। ଚାରି ମହାକାଶଚାରୀ ଆଇଏସଏସରେ ୧୪ ଦିନ ରହିବେ। ସେଠାରେ ସେମାନେ ୩୦ଟି ଦେଶର ବୈଜ୍ଞାନକଙ୍କ ସହ ଯୋଗାଯୋଗରେ ରହିବେ। ଆଇଏସଏସରେ କରାଯିବ ପ୍ରାୟ ୬୦ଟି ଗବେଷଣା। ମିଶନରେ ସାମିଲ ଅଛନ୍ତି ଆକ୍ସିୟମ ସ୍ପେସ, ନାସା, ସ୍ପେସ ଏକ୍ସ ଓ ଇସ୍ରୋ। ୪୧ ବର୍ଷ ପରେ ଦ୍ବିତୀୟ ଥର ଲାଗି ଆଇଏସଏସକୁ ଯାଇଛନ୍ତି ଭାରତର ଦ୍ବିତୀୟ ମହାକାଶଚାରୀ। ଆସନ୍ତା ୨୦୨୭ ଗଗନଯାନ ମିଶନ ଲାଗି ବି ବାଟ ଖୋଲିଦେଇଛନ୍ତି ଶୁଭାଂଶୁ। ଗଗନଯାନ ଅଭିଯାନ ଲାଗି ବି ଶୁଭାଂଶୁ ରହିବେ କ୍ରିଉ ମେମ୍ବର।
ମା ତାରିଣୀ ବସ୍ତ୍ରାଳୟର ଗୋଦାମରେ ନିଆଁ, ପୋଡ଼ିଗଲା ଲକ୍ଷାଧିକ ଟଙ୍କାର କପଡା
ନନ୍ଦିଘୋଷ ବ୍ୟୁରୋ: ବିଳମ୍ବିତ ରାତିରେ କପଡ଼ା ଗୋଦାମରେ ଲାଗିଲା ନିଆଁ । ଲକ୍ଷାଧିକ ଟଙ୍କାର କପଡା ଜଳିପୋଡ଼ି ପାଉଁଶ ହୋଇଛି । ଭୁବନେଶ୍ୱର କଳ୍ପନା ଛକରେ ଥିବା ମା ତାରିଣୀ ବସ୍ତ୍ରାଳୟର ଗୋଦାମରେ ଲାଗିଥିଲା ନିଆଁ । ଜଣେ କର୍ମଚାରୀଙ୍କୁ ଶ୍ୱାସରୁଦ୍ଧ ଅବସ୍ଥାରେ ଉଦ୍ଧାର କରିଛି ଅଗ୍ନିଶମ ବିଭାଗ । ୪ଟି ଦମକଳ ବାହିନୀର ବହୁ ଉଦ୍ୟମ କରି ନିଆ ଓ ଧୂଆଁ କୁ ଆୟତ କରିଥିଲେ। । ତାରିଣୀ ବସ୍ତ୍ରାଳୟର ପଛପଟେ ଥିବା କପଡା ଗୋଦାମରେ କୌଣସି କାରଣରୁ ନିଆ ଲାଗିଯାଇଥିଲା । ପରେ ଅଧିକ ଧୂଆଁ ସହ ନିଆ ଦେଖାଯିବାରୁ ସ୍ଥାନୀୟ ଲୋକ ଅଗ୍ନିଶମ ବାହିନୀକୁ ସୂଚନା ଦେଇଥିଲେ । ତେବେ ଏହି ଅଗ୍ନିକାଣ୍ଡରେ ଲକ୍ଷାଧିକ ଟଙ୍କାର କପଡା ପୋଡିଯାଇଥିବା ଅନୁମାନ କରାଯାଉଛି ।
ଆଜି ଶ୍ରୀଜିଉଙ୍କ ନବଯୌବନ ଦର୍ଶନ
ନନ୍ଦିଘୋଷ ବ୍ୟୁରୋ: ଆଜି ଶ୍ରୀଜିଉଙ୍କ ନବଯୌବନ ଦର୍ଶନ। ୧୫ ଦିନ ପରେ ଭକ୍ତ ଦେଖିବେ କଳା ଶ୍ରୀମୁଖ । ସକାଳ ୮ଟାରୁ ୯ଟା ପାରିମାଣିକ ଟିକେଟ୍ ଦର୍ଶନ ଓ ୯ଟାରୁ ୧୦ଟା ୩୦ ପର୍ଯ୍ୟନ୍ତ ସର୍ବସାଧାରଣ ଦର୍ଶନ ବ୍ୟବସ୍ଥା ହୋଇଛି । ଦକ୍ଷିଣ ଦ୍ଵାର ଦେଇ ଟିକେଟଧାରୀ ଭକ୍ତ ପ୍ରବେଶ କରିବେ। ପରିମାଣିକ ଦର୍ଶନ ପାଇଁ ୩ହଜାର ଟିକେଟ୍ ବନ୍ଦୋବସ୍ତ କରାଯାଇଛି । ଦିନ ୧୨ଟାରେ ନେତ୍ରୋତ୍ସବ। ଅପରାହ୍ନ ୪ଟା ୧୦ରେ ରଥରେ ଆଜ୍ଞାମାଳ ବିଜେ ପରେ ସିଂହଦ୍ୱାରକୁ ଆସିବ ତିନି ରଥ ।ରଥଯାତ୍ରା ପାଇଁ ସବୁ ବିଭାଗର ଚୂଡ଼ାନ୍ତ ପ୍ରସ୍ତୁତି ଶେଷ ହୋଇଛି । ଆଜିଠାରୁ ଲାଗୁ ହେବ ଟ୍ରାଫିକ ନିୟମାବଳୀ । ବ୍ରହ୍ମଗିରି, କୋଣାର୍କ ଓ ଭୁବନେଶ୍ବର ଆଡୁ ଆସୁଥିବା ଦୁଇ ଚକିଆ ଓ ଚାରି ଚକିଆ ଯାନ ପାଇଁ ଚିହ୍ନିତ ପାର୍କିଂ ସ୍ଥାନରେ ପାର୍କିଂ କରାଯାଇପାରିବ । ଚାଟବୋଟ ଆପ୍ ଦ୍ୱାରା ସୂଚନା ପାଇବେ ଶ୍ରଦ୍ଧାଳୁ।
ସେପଟେ ଆସନ୍ତାକାଲି ବିଶ୍ୱପ୍ରସିଦ୍ଧ ଘୋଷଯାତ୍ରା । ରତ୍ନବେଦୀରୁ ଜନ୍ମବେଦୀକୁ ଯାତ୍ରା କରି ଲୀଳାଖେଳା କରିବେ ମହାପ୍ରଭୁ | ବଡଦାଣ୍ଡରେ ମାନବୀୟଲୀଳାରେ ସାମିଲ ହେବେ ଅଗଣିତ ଭକ୍ତ | ଚଳିତ ରଥଯାତ୍ରାରେ ପ୍ରବଳ ଭକ୍ତଙ୍କ ସମାଗମକୁ ଲକ୍ଷ୍ୟ କରି ପୋଲିସ ଓ ପ୍ରଶାସନ ପକ୍ଷରୁ ବ୍ୟାପକ ବ୍ୟବସ୍ଥା ହୋଇଛି। ରଥ ଟଣାକୁ ଶୃଙ୍ଖଳିତ କରିବା ନେଇ ପ୍ରଶାସନ ପକ୍ଷରୁ ରିଜର୍ଭ ପୋଲିସ ଲାଇନ ପଡିଆରେ ସମ୍ପୁର୍ଣ୍ଣ ରଥଟଣାର ମକଡ୍ରିଲ ଓ ଅଭ୍ୟାସ କରାଯାଇଛି | ଚଳିତ ବର୍ଷ ରଥଯାତ୍ରାରେ ସର୍ବାଧିକ ୨୦୦ ପ୍ଲାଟୁନ ପୋଲିସ ଫୋର୍ସ ମୁତୟନ କରାଯିବ | ବମ ସ୍କ୍ୱାଡ଼, ଡ଼ଗ ସ୍କ୍ୱାଡ଼ ସହ ସିସିଟିଭି ସର୍ଭେଲାନ୍ସର ବ୍ୟବସ୍ଥା କରାଯାଇଛି। ସମୁଦ୍ର ପଥ ସୁରକ୍ଷାକୁ ନେଇ ସବୁ ବ୍ୟବସ୍ଥା କରାଯାଇଥିବାବେଳେ ଇଣ୍ଟିଗ୍ରେଟେଡ କମାଣ୍ଡ କଣ୍ଟ୍ରୋଲ ରୁମ୍ କରାଯାଇଛି। ଭୁବନେଶ୍ଵର ପୁରୀ, ପୁରୀ କୋଣାର୍କ ରାସ୍ତା ସହିତ ପୁରୀ ସହର ରେ ୨୭୫ଟି ଏଆଇ କ୍ୟାମେରା ଲଗାଯାଇଛି।
ହିମାଚଳ ପ୍ରଦେଶ କୁଲୁରେ ବାଦଲ ଫଟା ବର୍ଷା
ନନ୍ଦିଘୋଷ ବ୍ୟୁରୋ: ହିମାଚଳ ପ୍ରଦେଶ କୁଲୁରେ ପ୍ରବଳ ବର୍ଷା ଜାରି। ବିଭିନ୍ନ ସ୍ଥାନରେ ବାଦଲ ଫଟା ବର୍ଷା ହୋଇଛି। ଫଳରେ ଭୂସ୍ଖଳନ ହେବା ସହ ବହୁ ରାସ୍ତା ଭାସିଯାଇଛି। ରାଜ୍ୟର ପ୍ରାୟ ୧୦ଟି ଜିଲ୍ଲାରେ ପ୍ରବଳ ବର୍ଷା ସହ ଭୂସ୍ଖଳନ ହୋଇଥିବା ସୂଚନା ମିଳିଛି। ଅନେକ ନଦୀର ଜଳସ୍ତର ବୃଦ୍ଧି ପାଇଛି। ବିଳାସପୁର, ସାମ୍ବା, ହମିରପୁର, କାଙ୍ଗ୍ରା, ସିର୍ମଉର, ସୋଲାନ, ଉନାରେ ତାଣ୍ଡବ ବର୍ଷା ରଚିଛି। ଏହି ସବୁ ଜିଲ୍ଲାରେ ଅରେଞ୍ଜ ଆଲର୍ଟ ଜାରି କରାଯାଇଥିବାବେଳେ କୁଲ୍ଲୁ, ମଣ୍ଡି, ସିମଳାରେ ୟେଲୋ ଆଲର୍ଟ ଜାରି କରାଯାଇଛି।
ଆସନ୍ତା ଜୁଲାଇ ୧ ଯାଏ ରାଜ୍ୟରେ ପ୍ରବଳ ବର୍ଷା ଜାରି ରହିବ ବୋଲି ଆଇଏମଡି କହିଛି। ସିମଳାରେ ଦୃଶ୍ୟମାନ ଦୂରତା ୨୫ ମିଟରକୁ ହ୍ରାସ ପାଇଛି। ପାର୍ବତ୍ୟାଞ୍ଚଳରେ ସତର୍କତା ଅବଲମ୍ବନ ଲାଗି ପରାମର୍ଶ ଦିଆଯାଇଛି। ମଣ୍ଡି ନିକଟସ୍ଥ ବିୟସ ନଦୀରେ ଜଣେ ପ୍ରାଣ ହରାଇଛନ୍ତି। ମୌସୁମୀଜନିତ ବର୍ଷା ଯୋଗୁ ରାଜ୍ୟରେ ଯାନବାହନ ଚଳାଚଳ ପ୍ରଭାବିତ ହୋଇଛି। ଧର୍ମଶାଳା, ମଣ୍ଡି, ସାମ୍ବା ଆଦି ଜିଲ୍ଲାରେ ତାପମାତ୍ରା ହ୍ରାସ ପାଇଛି।
ସେପଟେ ଗୁଜରାଟରେ ବି ଜାରି ରହିଛି ବର୍ଷା ବିତ୍ପାତ। ସୁରଟରେ ଜନଜୀବନ ପ୍ରଭାବିତ ହୋଇଛି ।
ପଞ୍ଜାବର ପୂର୍ବତନ ମନ୍ତ୍ରୀ ତଥା ଶିରୋମଣି ଅକାଳୀ ଦଳ ନେତା ବିକ୍ରମ ମାଜିଥିଆ ଗିରଫ
ନନ୍ଦିଘୋଷ ବ୍ୟୁରୋ: ପଞ୍ଜାବର ପୂର୍ବତନ ମନ୍ତ୍ରୀ ତଥା ଶିରୋମଣି ଅକାଳୀ ଦଳ ନେତା ବିକ୍ରମ ମାଜିଥିଆ ଗିରଫ। ପଞ୍ଜାବ ଭିଜିଲାନ୍ସ ପକ୍ଷରୁ ତାଙ୍କର ଅମୃତସରସ୍ଥିତ ବାସଭବନ ରେଡ ପରେ ବିକ୍ରମ ହୋଇଛନ୍ତି ଗିରଫ। ବିକ୍ରମଙ୍କ ବିରୋଧରେ ୨୦୨୧ର ଏକ ଡ୍ରଗ୍ସ ମାମଲାରେ ଜାରି ରହିଥିଲା ଏସଆଇଟି ତଦନ୍ତ। ଏହି ଘଟଣାରେ ଅମୃତସରର ୯ଟି ସ୍ଥାନ ସହ ପଞ୍ଜାବର ୨୫ଟି ସ୍ଥାନରେ ଏସଆଇଟି କରିଥିଲା ରେଡ।
ବିକ୍ରମ ହେଉଛନ୍ତି, ଶିରୋମଣି ଅକାଳୀ ଦଳ ମୁଖ୍ୟ ସୁଖବୀର ସିଂ ବାଦଲଙ୍କ ଶାଳକ। ବିକ୍ରମଙ୍କ ଜରିଆରେ ବିପୁଳ ପରିମାଣର ଅର୍ଥ କାରବାର ହୋଇଛି ବୋଲି ପଞ୍ଜାବ ରାଜ୍ୟ ଅପରାଧ ଓ ଭିଜିଲାନ୍ସ ବ୍ୟୁରୋ ପକ୍ଷରୁ କୁହାଯାଇଛି। ତଦନ୍ତରୁ ଜଣାଯାଇଛି, ପ୍ରାୟ ୧୬୧ କୋଟି ବେନାମୀ ଅର୍ଥ ସମେତ ପ୍ରାୟ ୫୪୦ କୋଟି ଟଙ୍କାର ଡ୍ରଗ୍ସ ସମ୍ପର୍କିତ ଅର୍ଥ ବିକ୍ରମଙ୍କ ଦ୍ବାରା ନିୟନ୍ତ୍ରିତ ବିଭିନ୍ନ କମ୍ପାନୀର ବ୍ୟାଙ୍କ ଆକାଉଣ୍ଟରେ ଜମା ହୋଇଛି। ୧୪୧ କୋଟି ଟଙ୍କା ବିଭିନ୍ନ ବିଦେଶୀ କମ୍ପାନୀ ଜରିଆରେ ଡିପୋଜିଟ ହୋଇଥିବାବେଳେ ୨୩୬ କୋଟି ଟଙ୍କା ବିନା କୌଣସି ସ୍ପଷ୍ଟ ଉତ୍ସ ଦର୍ଶାଇ ଜମା କରାଯାଇଛି। ସେପଟେ ଭିଜିଲାନ୍ସ ଟିମ ଅମୃତସରସ୍ଥିତ ଗ୍ରୀନ ଆଭେନ୍ୟୁରେ ଜବରଦସ୍ତ ପ୍ରବେଶ କରିଛନ୍ତି ବୋଲି ଅଭିଯୋଗ କରିଛନ୍ତି ବିକ୍ରମ ଓ ତାଙ୍କ ପତ୍ନୀ।