ସମ୍ବଲପୁର କୁଚିଣ୍ଡାରେ ଧରାପଡ଼ିଲେ ବଣ୍ଟି ବବଲି। ସର୍ଭେ ବାହାନାରେ ଲୁଟୁଥିଲେ ଟଙ୍କା ଓ ସୁନା। ୨ ଲୁଟେରାଙ୍କୁ ଧରିଛି ପୋଲିସ। ସମ୍ବଲପୁର ଜିଲ୍ଲା ମହୁଲପାଲି ଥାନା ଅଞ୍ଚଳରେ ସରକାରୀ ଘର ସର୍ଭେ ବାହାନାରେ କରୁଥିଲେ ଲୁଟପାଟ। ଜଣେ ବ୍ୟକ୍ତିଙ୍କ ଘରୁ ନଗଦ ଟଙ୍କା ଓ ସୁନା ଅଳଙ୍କାର ଲୁଟ ଅଭିଯୋଗରେ ମହୁଲପାଲି ପୋଲିସ ଜଣେ ପୁରୁଷ ଓ ଜଣେ ମହିଳାଙ୍କୁ ଗିରଫ କରିଛି। ସିସିଟିଭି ଭିଡିଓ ଯାଞ୍ଚ କରି ଉଭୟଙ୍କୁ ଧରିଛି ପୋଲିସ। ଗିରଫ ହେଲେ ସୁନ୍ଦରଗଡ଼ ଜିଲ୍ଲା ତଳସରା ଥାନା ସବଡେଗା ଗାଁର ସମୀର ସାହୁ ଓ କିଞ୍ଜିରକେଲା ଥାନା କରମଡିହି ମନ୍ଦିରପଡା ଗାଁର ସଞ୍ଜୁଲା ଖାଲକୋ। ସେମାନଙ୍କ ଠାରୁ ବାଇକ, ସୁନା ହାର, ସୁନା କାନଫୁଲ,୨ଟି ରୂପା ଚେନ,୨ଟି ମୋବାଇଲ ଓ ବ୍ୟାଙ୍କ ପାସ ବୁକ ଜବତ ହୋଇଛି। ସନ୍ତୋଷ କୁମାର ନାଏକଙ୍କ ଏତଲା ଆଧାରରେ ପୋଲିସ ମହୁଲପାଲି ଥାନାରେ ଏକ ମାମଲା ରୁଜୁ କରି ୨ଜଣଙ୍କୁ କୋର୍ଟ ଚାଲାଣ କରିଛିା ଜାମିନ ନାମଞ୍ଜୁର ହେବାରୁ ଉଭୟଙ୍କୁ ଜେଲକୁ ପଠାଯାଇଛି। ଏ ନେଇ ସାମ୍ୱାଦିକ ସମ୍ମିଳନୀରେ କୁଚିଣ୍ଡା ଏସଡିପିଓ ପ୍ରଦୀପ କୁମାର ଦାସ ସୂଚନା ଦେଇଛନ୍ତି।
ଅହମ୍ମଦାବାଦ ବିମାନ ଦୁର୍ଘଟଣାରେ ମୃତ୍ୟୁ ସଂଖ୍ୟା ବୃଦ୍ଧି ପାଇବାରେ ଲାଗିଛି ।
ଅହମ୍ମଦାବାଦ ବିମାନ ଦୁର୍ଘଟଣାରେ ମୃତ୍ୟୁ ସଂଖ୍ୟା ବୃଦ୍ଧି ପାଇବାରେ ଲାଗିଛି । ଶନିବାର ସୁଦ୍ଧା ଏହି ବିମାନ ଦୁର୍ଘଟଣାରେ ୨୭୪ ଜଣଙ୍କ ମୃତ୍ୟୁ ନିଶ୍ଚିତ ହୋଇଛି। ଏଥିରେ ବିମାନରେ ଥିବା ଯାତ୍ରୀ, ପାଇଲଟ୍, କ୍ୟାବିନ କ୍ରୁ, ମେଡିକାଲ ହଷ୍ଟେଲରେ ଉପସ୍ଥିତ ଲୋକମାନେ ସାମିଲ ଅଛନ୍ତି ।ବିମାନରେ ଥିବା ୨୪୨ ଜଣଙ୍କ ମଧ୍ୟରୁ ୨୪୧ ଜଣଙ୍କ ମୃତ୍ୟୁ ନିଶ୍ଚିତ ହୋଇସାରିଛି। ବିମାନଟି ସର୍ଦ୍ଦାର ବଲ୍ଲଭଭାଇ ପଟେଲଙ୍କ ମେଡିକାଲ ହଷ୍ଟେଲ ଧକ୍କା ହୋଇଥିଲା। ସେଠାରେ ପ୍ରାୟ ୫୦ ରୁ ୬୦ ଜଣ ଉପସ୍ଥିତ ଥିଲେ। କେତେ ଲୋକଙ୍କ ମୃତ୍ୟୁ ହୋଇଛି ସେ ବିଷୟରେ କୌଣସି ସଠିକ ସୂଚନା ନାହିଁ। ମୃତ୍ୟୁ ସଂଖ୍ୟା ବଡିବାରେ ଲାଗିଛି ।ଶନିବାର ସୁଦ୍ଧା ମୋଟ ମୃତ୍ୟୁ ସଂଖ୍ୟା ୨୭୪ରେ ପହଞ୍ଚିଛି। ଏମାନଙ୍କ ମଧ୍ୟରୁ ୨୪୧ ଜଣ ବିମାନରେ ଥିଲେ ଏବଂ ବାକି ୩୩ ଜଣ ବିମାନ ଦୁର୍ଘଟଣା ସମୟରେ ନିକଟରେ ଉପସ୍ଥିତ ଥିଲେ।
ବିମାନ ଦୁର୍ଘଟଣାରେ ମୃତକଙ୍କ ପରିଚୟ ପାଇଁ ଡିଏନଏ ପରୀକ୍ଷା କରାଯାଉଛି। ଏପର୍ଯ୍ୟନ୍ତ ଅହମ୍ମଦାବାଦ ସିଭିଲ୍ ହସ୍ପିଟାଲରେ ୨୭୦ ରୁ ଅଧିକ ମୃତଦେହର ପୋଷ୍ଟମର୍ଟମ୍ କରାଯାଇଛି। ଏହା ବ୍ୟତୀତ ୨୦୦ ରୁ ଅଧିକ ଲୋକଙ୍କ ଡିଏନଏ ପରୀକ୍ଷା ମଧ୍ୟ କରାଯାଇଛି। ମୃତଦେହଗୁଡ଼ିକୁ ଚିହ୍ନଟ କରାଯାଇ ସେମାନଙ୍କ ପରିବାରକୁ ହସ୍ତାନ୍ତର କରାଯାଉଛି।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଶୁକ୍ରବାର ଦିନ ଆହତମାନଙ୍କୁ ଭେଟିବା ପାଇଁ ଅହମ୍ମଦାବାଦର ଦୁର୍ଘଟଣାସ୍ଥଳରେ ପହଞ୍ଚିଥିଲେ। ସେ ଦୁର୍ଘଟଣାରୁ ବଞ୍ଚିଯାଇଥିବା ଏକମାତ୍ର ବ୍ୟକ୍ତି କୁମାର ବିଶ୍ୱାସଙ୍କୁ ହସ୍ପିଟାଲରେ ଭେଟିଥିଲେ। ଆହତମାନଙ୍କ ଶୀଘ୍ର ଆରୋଗ୍ୟ କାମନା ମଧ୍ୟ କରିଥିଲେ। ସୋସିଆଲ ମିଡିଆରେ ଦୁଃଖ ପ୍ରକାଶ କରି ସେ ଲେଖିଛନ୍ତି ଯେ ଧ୍ୱଂସର ଦୃଶ୍ୟ ଦୁଃଖଦ। ଏହି ଅକଳ୍ପନୀୟ ଦୁର୍ଘଟଣାରେ ଯେଉଁମାନେ ନିଜ ପ୍ରିୟଜନଙ୍କୁ ହରାଇଛନ୍ତି ସେମାନଙ୍କ ସହିତ ଆମର ସମବେଦନା ଅଛି ।
ଅହମ୍ମଦାବାଦ ବିମାନ ଦୁର୍ଘଟଣାରେ ଆହତ ହୋଇଥିବା ଲୋକଙ୍କ ପ୍ରତି ସମବେଦନା ପ୍ରକାଶ କରି ଟାଟା ସନ୍ସର ଅଧ୍ୟକ୍ଷ ଏନ ଚନ୍ଦ୍ରଶେଖରନ ସୋସିଆଲ ମିଡିଆରେ ଲେଖିଛନ୍ତି ଯେ ଯେଉଁମାନେ ନିଜ ପ୍ରିୟଜନଙ୍କୁ ହରାଇଛନ୍ତି ସେମାନଙ୍କ ଯନ୍ତ୍ରଣା କଳ୍ପନା କରିବା କଷ୍ଟକର। ସେ ଆହୁରି ଲେଖିଛନ୍ତି ଯେ ଟାଟା ସନ୍ସ ଦୁର୍ଘଟଣାରେ ପରିବାର ସଦସ୍ୟଙ୍କୁ ହରାଇଥିବା ପ୍ରତ୍ୟେକଙ୍କୁ ୧ କୋଟି ଟଙ୍କା କ୍ଷତିପୂରଣ ଦେବ।
କମ୍ବିଂ ଅପରେସନ ବେଳେ IED ବିସ୍ଫୋରଣରେ ଯବାନ ସହିଦ
କମ୍ବିଂ ଅପରେସନ ବେଳେ IED ବିସ୍ଫୋରଣରେ ଯବାନ ସହିଦ । ଓଡିଶା-ଝାରଖଣ୍ଡ ସୀମା ସଂଲଗ୍ନ ବାଙ୍କୋ ସିଲିକୁଟା ନିକଟରେ ଆଇଇଡି ବିସ୍ଫୋରଣ ଘଟିଛି I ଓଡିଶା-ଝାଡ଼ଖଣ୍ଡ ସୀମାନ୍ତରେ ଓଡିଶା ଓ ଝାଡ଼ଖଣ୍ଡ ପୋଲିସ ପକ୍ଷରୁ ସର୍ଚ୍ଚ ଅପରେସନ ଚାଲିଥିଲା । ସର୍ଚ୍ଚ ଅପରେସନ ବେଳେ IED ବିସ୍ଫୋରଣ ଘଟିଥିଲା । ବିସ୍ଫୋରଣରେ ଜଣେ ଯବାନ ଗୁରୁତର ଆହତ ହୋଇ ସହିଦ ହୋଇଛନ୍ତି । ଯବାନଙ୍କ ମରଶରୀରକୁ ହେଲିକପ୍ଟରରେ ରାଞ୍ଚି ନିଆଯାଉଛି। ସେଠାରୁ ଉତ୍ତରପ୍ରଦେଶ ନିଆଯିବ। ସହିଦ ଯବାବ ଜଣକ ହେଲେ ସିଆରପିଏଫ ଏଏସ ଆଇ ସତ୍ୟଵାନ କୁମାର ସିଂ। ଗୁରୁତର ଆହତ ଅବସ୍ଥାରେ ରାଉରକେଲା ଆପୋଲୋ ହସ୍ପିଟାଲରେ ଚିକିତ୍ସା ପାଇଁ ଅଣାଯାଇଥିଲା। ଚିକିତ୍ସାଧୀନ ଅବସ୍ଥାରେ ମୃତ୍ୟୁ ହୋଇଛି। ରାଉରକେଲା ଏସପି ଓ ପଶ୍ଚିମାଞ୍ଚଳ ଡିଆଇଜି ହସ୍ପିଟାଲରେ ପହଞ୍ଚି ଚିକିତ୍ସା ସୁବିଧା ଅନୁଧ୍ୟାନ କରିଥିଲେ।
ଦୁର୍ଘଟଣା ପରେ ହଷ୍ଟେଲ ଛାଡିଥିବା ଛାତ୍ରଛାତ୍ରୀମାନେ ହଷ୍ଟେଲରେ ପହଞ୍ଚୁଛନ୍ତି
ଅହମ୍ମଦାବାଦ ଏୟାର ଇଣ୍ଡିଆ ବିମାନ ଦୁର୍ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛନ୍ତି ବିଭିନ୍ନ ତଦନ୍ତକାରୀ ଟିମ। ବ୍ରିଟିଶ ଏୟାରକ୍ରାଫ୍ଟ ଦୁର୍ଘଟଣା ସଂକ୍ରାନ୍ତ ତଦନ୍ତକାରୀ ଟିମର ୪ ସଦସ୍ୟ ଓ ଏୟାରକ୍ରାଫ୍ଟ ଆକ୍ସିଡେଣ୍ଟ ଇନଭେଷ୍ଟିଗେସନ ବ୍ୟୁରୋ ବା AAIBର ଏକ ଟିମ ବି ପହଞ୍ଚି ତଦନ୍ତ ଚଳାଇଛନ୍ତି। ସେପଟେ ଦୁର୍ଘଟଣା ପରେ ହଷ୍ଟେଲ ଛାଡିଥିବା ଛାତ୍ରଛାତ୍ରୀମାନେ ହଷ୍ଟେଲରେ ପହଞ୍ଚୁଛନ୍ତି। ତେଣେ ଘଟଣାସ୍ଥଳରେ ଜାରି ରହିଛି ଶୋକାକୁଳ ପରିବେଶ। ମୃତକଙ୍କ ସମ୍ପର୍କୀୟମାନେ ସେଠାରେ ସମବେତ ହୋଇଛନ୍ତି। ଗୁଜରାଟ ଗୃହମନ୍ତ୍ରୀ ହର୍ଷ ସାଂଗଭି ଡିଏନଏ ଟେଷ୍ଟିଂ ପ୍ରକ୍ରିୟା ଅନୁଧ୍ୟାନ କରିଛନ୍ତି।
ଯାଜପୁରରେ ଝାଡ଼ାବାନ୍ତି ବ୍ୟାପିବା ଘଟଣା। ଯାଜପୁର ପୌରପାଳିକା ପକ୍ଷରୁ ସହରରେ ଥିବା ସମସ୍ତ ହୋଟେଲ ଉପରେ ଚଢାଉ। ମେଡ଼ିକାଲ ଛକ ରୁଚିକା ହୋଟେଲ ଉପରେ ଚଢାଉ କରିଛି ଖାଦ୍ୟ ନିରାପତ୍ତା ଟିମ୍। ଏହି ଟିମ୍ ରେ ପୌର କାର୍ଯ୍ୟ ନିର୍ବାହୀ ଅଧିକାରୀ, ସ୍ଵାସ୍ଥ୍ୟ ନିରୀକ୍ଷକ, ଖାଦ୍ୟ ନିରାପତ୍ତା ଅଧିକାରୀଙ୍କ ସହ ଅନ୍ୟାନ୍ୟ କର୍ମଚାରୀ ସାମିଲ ଅଛନ୍ତି। ଏଠାରେ ପ୍ରସ୍ତୁତ ହୋଇଥିବା ରନ୍ଧା ଚିକେନ, ମଟନ୍ ଓ ମାଛ ଆଦି ବାସିଖାଦ୍ୟ ଚିହ୍ନଟ ହେବ ପରେ ସେଗୁଡ଼ିକୁ ଜବତ କରାଯାଇ ବିଭିନ୍ନ ସ୍ଥାନରେ ଗାତ କରି ପୋତାଯାଉଛି। ରୁଚିକା ହୋଟେଲକୁ ସିଲ କରିଛି ପୌର ପ୍ରଶାସନ। ଏହି ହୋଟେଲରେ ବାସି ଖାଦ୍ୟ ବିକ୍ରି ହେଉଥିବା ନେଇ ଅଭିଯୋଗ ହୋଇ ଆସୁଥିଲା।
ଯାଜପୁରରେ ଝାଡ଼ାବାନ୍ତି ଆତଙ୍କ । ଜିଲ୍ଲାରେ କଲେରା ରୋଗୀ ଚିହ୍ନଟ ହେବା ପରେ ଗୁରୁତ୍ବପୂର୍ଣ୍ଣ ପରାମର୍ଶ ଦେଇଛି ଯାଜପୁର ଜିଲ୍ଲା ପ୍ରଶାସନ ।
ଯାଜପୁରରେ ଝାଡ଼ାବାନ୍ତି ଆତଙ୍କ । ଜିଲ୍ଲାରେ କଲେରା ରୋଗୀ ଚିହ୍ନଟ ହେବା ପରେ ଗୁରୁତ୍ବପୂର୍ଣ୍ଣ ପରାମର୍ଶ ଦେଇଛି ଯାଜପୁର ଜିଲ୍ଲା ପ୍ରଶାସନ । ବାହାରର ଅସ୍ବାସ୍ଥ୍ୟକର ଖାଦ୍ୟ ପାନୀୟ ନପିଇବାକୁ ପରାମର୍ଶ ଦିଆଯାଇଛି । ଏହାସହ ରଜପର୍ବ ପାଳନ ବେଳେ ସାମୁହିକ ଭୋଜି ଉପରେ ମଧ୍ୟ କଟକଣା ଲଗାଯାଇଛି । ଘରେ ରନ୍ଧା ଯାଇଥିବା ଗରମ ଖାଦ୍ୟ, ଫୁଟା ପାଣି ପିଇବାକୁ କୁହାଯାଇଛି । ପାଣିରେ ହାଲଜେନ ବଟିକା ପକାଇ ପିଇବାକୁ ପରାମର୍ଶ ଦିଆଯାଇଛି । ନଦୀ, ନାଳ, ପୋଖରୀରେ ନିତ୍ୟ ବ୍ୟବହାର୍ଯ୍ୟ କାର୍ଯ୍ୟ ନକରିବକୁ ପରାମର୍ଶ ଦିଆଯାଇଛି । ଖୋଲା ସ୍ଥାନରେ ମଳତ୍ୟାଗ ନକରି ଶୌଚାଳୟ ବ୍ୟବହାର କରିବାକୁ କୁହାଯାଇଛି । ନିଜ ଘର ଓ ପରିବେଶକୁ ପରିସ୍କାର ରଖିବାକୁ ପରାମର୍ଶ ଦିଆଯାଇଛି । ସେହିଭଳି ଡାଇରିଆ ଲକ୍ଷଣ ଦେଖାଗଲେ ଆଶା କିମ୍ବା ଅଙ୍ଗନବାଡି କର୍ମୀଙ୍କ ସହାୟତା ନେବାକୁ ପରାମର୍ଶ ଦିଆଯାଇଛି । ଜିଲ୍ଲାରେ ୧୧ କଲେରା ରୋଗୀ ଚିହ୍ନଟ ହୋଇଛନ୍ତିି । ୨୮ଟି ସାମ୍ପୁଲରେ ୧୧ ଟି କଲେରା ରୋଗୀ ଚିହ୍ନଟ ନେଇ ସୂଚନା ଦେଇଛନ୍ତି ଯାଜପୁର ଜିଲ୍ଲା ମୁଖ୍ୟଚିକିତ୍ସା ଅଧିକାରୀଏବେ ସୁଦ୍ଧା ଜ଼ିଲ୍ଲାର ବିଭିନ୍ନ ସ୍ବାସ୍ୟକେନ୍ଦ୍ରରେ ମୋଟ ୧୭୨ ଜଣ ଝାଡାବାନ୍ତିରେ ଆକ୍ରାନ୍ତ ହୋଇ ଭର୍ତ୍ତି ହୋଇଛନ୍ତି। ୧୨ ଜଣଙ୍କୁ କଟକ ସ୍ଥାନାନ୍ତର କରାଯାଇଛି। ଭୟଭୀତ ନହୋଇ ସମସ୍ତ ନିୟମକୁ ମାନିବାକୁ ପରାମର୍ଶ ଦେଇଛନ୍ତି ସିଡିଏମଓ।
ଇସ୍ରାଏଲର ଅପରେସନ ‘ରାଇଜିଂ ଲାୟନ୍’ ବନାମ ଇରାନର ‘ଅପରେସନ୍ ଟ୍ରୁ ପ୍ରମିଜ୍’, କାହାର ଅପରେସନ ଅଧିକ ଶକ୍ତିଶାଳୀ ଥିଲା?
ଇସ୍ରାଏଲ ଏବଂ ଇରାନ ପରସ୍ପର ବିରୁଦ୍ଧରେ ବଡ଼ ସାମରିକ କାର୍ଯ୍ୟାନୁଷ୍ଠାନ ପରେ ଉତ୍ତେଜନା ଶୀର୍ଷରେ ପହଞ୍ଚିଛି। ଯେତେବେଳେ ଇସ୍ରାଏଲ ଅପରେସନ ରାଇଜିଂ ଲାୟନ ଆରମ୍ଭ କରିଥିଲା, ଇରାନ ‘ଅପରେସନ୍ ଟ୍ରୁ ପ୍ରମିଜ୍ ୩’ ମାଧ୍ୟମରେ ଏହାର ଜବାବ ଦେଇଥିଲା। ଉଭୟ ଦେଶ ପରସ୍ପରକୁ ଭାରୀ କ୍ଷତି ପହଞ୍ଚାଇବାକୁ ଚେଷ୍ଟା କରିଥିଲେ । ଆସନ୍ତୁ ଜାଣିବା କାହାର ଅପରେସନ ଅଧିକ ଶକ୍ତିଶାଳୀ ଥିଲା।
ଶୁକ୍ରବାର ଇସ୍ରାଏଲ ଇରାନର ସାମରିକ ଓ ପରମାଣୁ ଆଡା ଉପରେ ଆକ୍ରମଣ କରିଥିଲା। ଲଢ଼ୁଆ ବିମାନଗୁଡ଼ିକ ଇରାନର ରାଡାର, କ୍ଷେପଣାସ୍ତ୍ର କାରଖାନା ଏବଂ ପରମାଣୁ ଆଡା ଗୁଡ଼ିକୁ ଟାର୍ଗେଟ କରିଥିଲା। ଏହି ଆକ୍ରମଣରେ IRGC ମୁଖ୍ୟ ହୋସେନ୍ ସଲାମି ଏବଂ ସଶସ୍ତ୍ର ବାହିନୀ ମୁଖ୍ୟ ମହମ୍ମଦ ବାଘେରିଙ୍କ ଭଳି ଉଚ୍ଚ ଇରାନୀ ସାମରିକ ଅଧିକାରୀମାନେ ପ୍ରାଣ ହରାଇଥିଲେ। ଇସ୍ରାଏଲ କହିଛି ଯେ ଏହି ଆକ୍ରମଣ ଇରାନର ପରମାଣୁ ବିପଦକୁ ରୋକିବା ପାଇଁ କରାଯାଇଥିଲା।
ଇରାନର ଚାରୋଟି ପରମାଣୁ ଆଡା କ୍ଷତିଗ୍ରସ୍ତ ହୋଇଥିଲ । ଏହା ବ୍ୟତୀତ ଇରାନର ଲୟାର ଡିଫେନ୍ସକୁ ପୂର୍ବରୁ ଇସ୍ରାଏଲ ଧ୍ବସଂ କରିସାରିଥିଲା । ଯେଉଁ କାରଣାରୁ ଇରାନ ତାର ଆକ୍ରମଣକୁ ରୋକି ପାରିନଥିଲା । ଇସ୍ରାଏଲର ଏହି ଅପରେସନ ଅତ୍ୟନ୍ତ ସଠିକ ଓ ଶକ୍ତିଶାଳୀ ଥିଲା। ଏହା ଇରାନର ସାମରିକ ଶକ୍ତିକୁ ଦୁର୍ବଳ କରିବା ସହ ଏହାର ପରମାଣୁ ଆଡାକୁ ଏକ ଶକ୍ତ ଆଘାତ ଦେଇଥିଲା। କିନ୍ତୁ ଏହି ଆକ୍ରମଣ ଇରାନକୁ କ୍ରୋଧିତ କରିଥିଲା, ଯାହା ଇରାନକୁ ପ୍ରତିଶୋଧ ନେବାକୁ ବାଧ୍ୟ କରିଥିଲା।
ଶୁକ୍ରବାର ରାତିରେ ଇରାନ ପ୍ରତିଶୋଧ ସ୍ୱରୂପ ଇସ୍ରାଏଲ ଉପରେ ୧୫୦ଟି ବାଲିଷ୍ଟିକ୍ ମିସାଇଲ୍ ଏବଂ ୧୦୦ରୁ ଅଧିକ ଡ୍ରୋନ୍ ଆକ୍ରମଣ କରିଥିଲା। ଏହି ଆକ୍ରମଣ ତେଲ ଅଭିଭ ସମେତ ଇସ୍ରାଏଲର ସାମରିକ ଠିକଣା ଓ ସହରମାନଙ୍କ ଉପରେ ଥିଲା। ଇରାନ ଏହାକୁ ନିଜର ସାମରିକ ନେତାମାନଙ୍କ ହତ୍ୟାର ପ୍ରତିଶୋଧ ବୋଲି କହିଥିଲା। ଯଦିଓ, ଇସ୍ରାଏଲର ଆୟର୍ନ ଡୋମ୍ ସିଷ୍ଟମ୍ ଅଧିକାଂଶ ମିସାଇଲକୁ ଆକାଶରେ ହିଁ ଧ୍ୱଂସ କରି ଦେଇଥିଲା।
ଇରାନ ତୁରନ୍ତ ପ୍ରତିକ୍ରିୟା ଦେଇ ନିଜର ଶକ୍ତି ପ୍ରଦର୍ଶନ କଲା, କିନ୍ତୁ ତା’ର ଆକ୍ରମଣ ଅଧିକ କ୍ଷତି କରିପାରିଲା ନାହିଁ। ଇସ୍ରାଏଲର ସହରଗୁଡ଼ିକରେ ଆତଙ୍କ ଖେଳିଗଲା, କିନ୍ତୁ ବଡ଼ ଧ୍ୱଂସ ହେଲା ନାହିଁ। ଇରାନ ଦେଖାଇ ଦେଇଛି ଯେ ସେ ଇସ୍ରାଏଲର ଆୟର୍ନ ଡୋମ ପ୍ରତିରକ୍ଷାକୁ ମଧ୍ୟ ଭେଦ କରିପାରେ।
ରାଜଧାନୀରେ ପୁଣି ବୁଲିଲା ଖଣ୍ଡା ଭୁଜାଲି ।
ରାଜଧାନୀରେ ପୁଣି ବୁଲିଲା ଖଣ୍ଡା ଭୁଜାଲି । ଭୁବନେଶ୍ବର ଧଉଳି ଥାନା ଅନ୍ତର୍ଗତ ଲିଙ୍ଗପୁର ଛକରେ ଅପରାଧିଙ୍କ ଉନ୍ମତ୍ତ କାଣ୍ଡ । ଘର ଆଗରୁ ବାଇକ ବାହାର କରିବାକୁ କହିବାରୁ ଆକ୍ରମଣ । ଅଭିଯୁକ୍ତଙ୍କ ଆକ୍ରମଣରେ ଶିବ ପ୍ରସାଦ ସେଠୀ ଓ ଶ୍ବପ୍ନେସ୍ବର ପାଣିଗ୍ରାହୀ ଆହତ ହୋଇଛନ୍ତି। ହାପି ଭୋଇ , ଉତ୍ତମ ମହାପାତ୍ରଙ୍କ ସମେତ ୮ ରୁ ୧୦ ଜଣ ଯୁବକ ଆକ୍ରମଣ କରିଥିବା ସୂଚନା। ଆକ୍ରମଣକାରୀ ଗତ କିଛିଦିନ ତଳେ ଜେଲରୁ ଜାମିନରେ ବାହାରିଥିଲେ । ଅଭିଯୁକ୍ତ ମାନେ ଏକ କାରକୁ ଭାଙ୍ଗିବା ସହିତ କୋଲଡ୍ରିଙ୍କସ୍ ବୋତଲରେ ଆକ୍ରମଣ କରିଥିଲେ। ଶୁକ୍ରବାର ମଧ୍ୟ ରାତ୍ରିରେ ଘଟିଛି ଘଟଣା । ଶିବପ୍ରସାଦ କାର ବାହାର କରିବା ସମୟରେ ଘର ଆଗ ରାସ୍ତାରେ ବାଇକ ଥିବା ଦେଖି ହର୍ଣ୍ଣ ବଜାଇଥିଲେ। ଏଥିରେ ଅଭିଯୁକ୍ତ ମାନେ ଉତ୍ତ୍ୟକ୍ତ ହୋଇ ଆକ୍ରମଣ କରିଥିବା ସୂଚନା ମିଳିଛି।
ଠେଙ୍ଗାରେ ଆକ୍ରମଣ କରି ଓ ଗୁଳି ଫୁଟାଇ ସୁନା ଗହଣା ଲୁଟ୍
ଠେଙ୍ଗାରେ ଆକ୍ରମଣ କରି ଓ ଗୁଳି ଫୁଟାଇ ସୁନା ଗହଣା ଲୁଟ୍। ନବରଙ୍ଗପୁର ଜିଲ୍ଲା ରାଇଘର କୋଦଭଟାରେ ବାପା ମାକୁ ଠେଙ୍ଗାରେ ଆକ୍ରମଣ କରି ପୁଅ ଉପରେ ଗୁଳିମାଡ଼ କରି ଲୁଟ୍ ହୋଇଥିବା ଅଭିଯୋଗ ହୋଇଛି।ବନ୍ଧୁକ ଫୁଟାଇ ସୁନା ଅଳଙ୍କାର ଲୁଟ୍ କରିନେଲେ ଦୃର୍ବୁତ୍ତ। କୋଦଭଟା ଗାଁରେ ସନ୍ତୋଷୀ ଜୁଏଲାରୀ ମାଲିକ ରାମ ଡାକୁଆ ଦୋକାନ ବନ୍ଦ କରି ରାତିରେ ଘରକୁ ଫେରିଥଲେ। ଘର ପାଚେରୀ ଭିତରେ ପଶିବା ସମୟରେ ସ୍ତ୍ରୀ ସଙ୍ଗୀତା ଡାକୁଆ ବାହାରକୁ ଆସିଥିଲେ। ଏହି ସମୟରେ ପୂର୍ବରୁ କିଛି ଦୁର୍ବୃତ୍ତ ପାଚେରୀ ପାଖରେ ଲୁଚି ରହିଥିଲେ। ରାମ ଡାକୁଆ ଓ ତାଙ୍କ ସ୍ତ୍ରୀ ଘର ଭିତରେ ପଶିବା ସମୟରେ ଦୃର୍ବୃତ୍ତମାନେ ତାଙ୍କ ଉପରକୁ ଠେଙ୍ଗାରେ ଆକ୍ରମଣ କରିଥିଲେ।ବାପାକୁ ଆକ୍ରମଣ ହେଉଥିବା ଦେଖି ତାଙ୍କ ପୁଅ ସେମାନଙ୍କ ଉପରେ ଢେଲା ମାଡ଼ କରିଥିଲେ। ଏହା ପରେ ୧୨ ବର୍ଷର ପୁଅ କ୍ରିଷ୍ଣା ଡାକୁଆ ଉପରକୁ ଗୁଳି ଚାଳନା କରିଥିଲେ ଦୁର୍ବୃତ୍ତ। କିନ୍ତୁ କ୍ରିଷ୍ଣା କୌଣସି ମତେ ସେଠାରୁ ଖସି ଚାଲି ଯାଇଥିଲେ। ଦୃର୍ବୁତ୍ତ ଗହଣା ଭର୍ତ୍ତି ଥିବା ଦୁଇଟି ବ୍ୟାଗ ଛଡ଼ାଇ ନେଇଥିଲେ। ଦୃର୍ବୁତ୍ତଙ୍କ ଆକ୍ରମଣରେ ରାମ ଡାକୁଆଙ୍କ ମୁଣ୍ଡରେ ଆଘାତ ହୋଇଥିବାବେଳେ ସଙ୍ଗୀତାଙ୍କ ବେକରେ ଆଘାତ ଲାଗିଛି। ଉଭୟଙ୍କୁ ରାଇଘର ମେଡିକାଲରେ ଭର୍ତ୍ତି କରାଯାଇଛି। ପୁଅ କ୍ରିଷ୍ଣାକୁ ଗୁଳି ବାଜି ନଥବାବେଳେ ଘଟଣାସ୍ଥଳରେ ଖୋକା ପଡ଼ିଛି। ରାଇଘର ଥାନାରୁ ଅଧା କିଲୋ ମିଟର ଦୂରରେ ଘଟିଛି ଏହି ଘଟଣା ଘଟିଛି। ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି।ରାଇଘରକୁ ସଂଯୋଗ କରୁଥିବା ସମସ୍ତ ରାସ୍ତାକୁ ପୋଲିସ ସିଲ କରି ଗାଡ଼ିଗୁଡିକୁ ଯାଞ୍ଚ କରୁଛି। ଲୁଟ ଅଳଙ୍କାରର ମୂଲ୍ୟ କେତେ ହେବ ତାହା ସ୍ଵଷ୍ଟ ହୋଇ ନାହିଁ।
ତଦନ୍ତ ଲାଗି ବେସାମରିକ ବିମାନ ଚଳାଚଳ ମନ୍ତ୍ରାଳୟ ପକ୍ଷରୁ ଗଠନ ହେଲା କମିଟି
ଅହମ୍ମଦାବାଦ ଏୟାର ଇଣ୍ଡିଆ ବିମାନ ଦୁର୍ଘଟଣା। ତଦନ୍ତ ଲାଗି ବେସାମରିକ ବିମାନ ଚଳାଚଳ ମନ୍ତ୍ରାଳୟ ପକ୍ଷରୁ ଗଠନ ହେଲା କମିଟି। ମନ୍ତ୍ରାଳୟ ପକ୍ଷରୁ ଗଠିତ କମିଟି ଘଟଣାର ତଦନ୍ତ କରିବ। ସେପଟେ ଦୁର୍ଘଟଣାର ସତ କହିବ ବ୍ଲାକବକ୍ସ। କେମିତି ଘଟିଲା ଦୁର୍ଘଟଣା ? କାହାର ଅବହେଳା ନା ଥିଲା ଯାନ୍ତ୍ରିକ ତୃଟି। ବିଭିନ୍ନ ଦିଗକୁ ନେଇ ଏୟାର ଇଣ୍ଡିଆ ବିମାନ ଦୁର୍ଘଟଣାର କାରଣ ଖୋଜୁଛି ତଦନ୍ତକାରୀ ଟିମ୍ । ଗତକାଲି ବିମାନର ବ୍ଲାକବକ୍ସ ମିଳିଥିବା ସୂଚନା ଦେଇଥିଲା ବେସାମରିକ ବିମାନ ଚଳାଚଳ ମନ୍ତ୍ରାଳୟ। ବିମାନର ଶେଷ ଭାଗରେ ବ୍କାକବକ୍ସ ମିଳିଥିବା କୁହାଯାଇଛି। ଏଥିରୁ ବିମାନ ଦୁର୍ଘଟଣାର କାରଣ ସମ୍ପର୍କରେ ଜଣାପଡିବ। ବ୍ଲାକବକ୍ସ ଉଦ୍ଧାର ଲାଗି ସର୍ଚ୍ଚ ଅପରେସନ ଟିମରେ ସାମିଲ ହୋଇଥିଲେ ୪୦ଜଣ ଗୁଜରାଟ ସରକାରୀ କର୍ମଚାରୀ। ଏହାକୁ ଉଦ୍ଧାର କରିଥିଲେ ଏୟାରକ୍ରାଫ୍ଟ ଆକ୍ସିଡେଣ୍ଟ ଇନଭେଷ୍ଟିଗେସନ ବ୍ୟୁରୋ ବା AAIB। ସେପଟେ ଦୁର୍ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି ଏନଆଇଏ ଟିମ। ତେଣେ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛନ୍ତି ବ୍ରିଟିଶ ଏୟାରକ୍ରାଫ୍ଟ ଦୁର୍ଘଟଣା ସଂକ୍ରାନ୍ତ ତଦନ୍ତକାରୀ ଟିମର ୪ ସଦସ୍ୟ। ଏହା ସହ ଏୟାରକ୍ରାଫ୍ଟ ଆକ୍ସିଡେଣ୍ଟ ଇନଭେଷ୍ଟିଗେସନ ବ୍ୟୁରୋ ବା AAIBର ଏକ ଟିମ ବି ପହଞ୍ଚି ତଦନ୍ତ ଚଳାଇଛନ୍ତି।