ବ୍ରହ୍ମପୁର: କ୍ୱାରେଣ୍ଟାଇନ୍ ସେଣ୍ଟରରେ ପ୍ରବାସୀ ଓଡ଼ିଆଙ୍କ ମୃତ୍ୟୁ । ଗଞ୍ଜାମ ଜିଲ୍ଲା ପୋଲସରା ମାଟିଆସାହି କ୍ୱାରେଣ୍ଟାଇନ୍‌ ସେଣ୍ଟରରେ ୪୦ ବର୍ଷୀୟ ଜନୈକ ବ୍ୟକ୍ତିଙ୍କ ମୃତ୍ୟୁ । ସେ ସୁରତ୍‌ରୁ ଆସିଥିବା ସ୍ୱତନ୍ତ୍ର ଶ୍ରମିକ ସ୍ପେଶାଲ ଟ୍ରେନ୍‌ରେ ଗତ ୬ ତାରିଖରେ ଓଡ଼ିଶାକୁ ଫେରିଥିଲେ । ସେହି ଦିନ ସନ୍ଧ୍ୟାଠାରୁ ସେ କ୍ୱାରେଣ୍ଟାଇନ୍‌ ସେଣ୍ଟରରେ ରହିଆସୁଥିଲେ । ମୃତ୍ୟୁର କାରଣ ଜଣାପଡ଼ିନଥିବା ବେଳେ ତାଙ୍କୁ ଜ୍ୱର ହୋଇଥିବା ନେଇ ସୂଚନା ରହିଛି ।

ମୃତକ ଜଣଙ୍କ ମଧୁପଲ୍ଲୀ ଗ୍ରାମର ପ୍ରଫୁଲ୍ଲ ବେହେରା । ତାଙ୍କ ସହ କ୍ୱାରେଣ୍ଟାଇନ୍‌ ସେଣ୍ଟରରେ ମୋଟ ୬୯ଜଣ ସୁରଟ ଫେରନ୍ତା ରହୁଥିଲେ । ମଧ୍ୟାହ୍ନ ଭୋଜନ ଖାଉଥିବାବେଳେ ହଠାତ୍‌ ସେ ଟଳି ପଡିଥିଲେ। ଘଟଣାସ୍ଥଳରେ ତାଙ୍କର ମୃତ୍ୟୁ ହୋଇଥିଲା। ପ୍ରଫୁଲ୍ଲଙ୍କ ସ୍ତ୍ରୀଙ୍କ କହିବା ଅନୁଯାୟୀ, ମୃତ୍ୟୁର କିଛି ସମୟ ପୂର୍ବରୁ ସେ ଫୋନରେ ତାଙ୍କ ସହ କଥା ହୋଇଥିଲେ। ଏହାର କିଛି ସମୟ ପରେ ଖବର ପାଇଲି ସ୍ୱାମୀ ମୃତ୍ୟୁବରଣ କରିଛନ୍ତି। ଖବର ପାଇ ପୋଲସରା ବିଧାୟକ ଶ୍ରୀକାନ୍ତ ସାହୁ, ବିଡ଼ିଓ ଶମ୍ଭୁନାଥ ନନ୍ଦି, ତହସିଲଦାର ସୁକାନ୍ତ ଚନ୍ଦ୍ର ମିଶ୍ର, ଥାନାଧିକାରୀ ଜିତେନ୍ଦ୍ର ମଲ୍ଲିକ ଘଟଣାସ୍ଥଳରେ ପହଞ୍ଚତ୍ ଅନୁଧ୍ୟାନ କରିଥିଲେ। ସ୍ୱାସ୍ଥ୍ୟ ବିଭାଗ କର୍ମଚାରୀମାନେ ଆସି ମୃତକଙ୍କ ସ୍ୱାବ୍‌ ସଂଗ୍ରହ କରିଛନ୍ତି।

ବ୍ରହ୍ମପୁର: ଗଞ୍ଜାମ ଜିଲ୍ଲାରେ ବଢ଼ିବାରେ ଲାଗିଛି କରୋନା ଆକ୍ରାନ୍ତଙ୍କ ସଂଖ୍ୟା । ଆଉ ୨୪ କରୋନା ଆକ୍ରାନ୍ତ ଚିହ୍ନଟ । ଏଥିସହିତ ଗଞ୍ଜାମ ଜିଲ୍ଲା ମୋଟ ଆକ୍ରାନ୍ତଙ୍କ ସଂଖ୍ୟା ୭୧ରେ ପହଞ୍ଚିଛି । ଏଥିସହିତ ଖୋର୍ଦ୍ଦା ଜିଲ୍ଲାରୁ ମଧ୍ୟ ଜଣେ କରୋନା ରୋଗୀ ଚିହ୍ନଟ ହୋଇଛନ୍ତି । ରାଜ୍ୟରେ ମୋଟ ଆକ୍ରାନ୍ତଙ୍କ ସଂଖ୍ୟା ୨୭୧ରେ ପହଞ୍ଚିଛି । ଏମାନଙ୍କ ମଧ୍ୟରୁ ୬୩ ଜଣ ସୁସ୍ଥ ହୋଇଥିବା ବେଳେ ୨ ଜଣଙ୍କ ମୃତ୍ୟୁ ହୋଇଛି । ଅପରପକ୍ଷରେ ରାଜ୍ୟର ମୋଟ ୨୦୬ କରୋନା ରୋଗୀ ରାଜ୍ୟର ବିଭିନ୍ନ କୋଭିଡ ହସ୍ପିଟାଲରେ ଚିକିତ୍ସିତ ହେଉଛନ୍ତି ।

ଗଞ୍ଜାମ ଜିଲ୍ଲାରୁ ମୋଟ ୭୧ ଜଣ ଆକ୍ରାନ୍ତ ଚିହ୍ନଟ ହେବା ପରେ ଯାଜପୁରକୁ ପଛରେ ପକାଇଛି ଗଞ୍ଜାମ । ଯାଜପୁରରୁ ଏଯାବତ୍‌ ୫୫ ଓ ଖୋର୍ଦ୍ଧାରୁ ୫୧ ଜଣ ଆକ୍ରାନ୍ତ ଚିହ୍ନଟ ହୋଇଛନ୍ତି ।

ତେବେ ମିଳିଥିବା ସୂଚନା ଅନୁଯାୟୀ ଚିହ୍ନଟ ହୋଇଥିବା ସମସ୍ତ ସଂକ୍ରମିତ ପ୍ରବାସୀ ଓଡ଼ିଆ ଏବଂ ସେମାନେ କ୍ୱାରେଣ୍ଟାଇନ୍‌ ସେଣ୍ଟରରେ ରହୁଥିଲେ । ଏଣୁ ଜିଲ୍ଲାବାସୀ ଭୟଭୀତ ହେବାର କୌଣସି କାରଣ ନାହିଁ  । ସୂଚନା ଯୋଗ୍ୟ ଯେ, ଗଞ୍ଜାମରେ କରୋନା ପରିସ୍ଥିତର ମୁକାବିଲା ନେଇ ୩ ଆଇଏଏସ୍‌ ଅଫିସରଙ୍କୁ ରାଜ୍ୟ ସରକାର ଦାୟିତ୍ୱ ଦେଇଛନ୍ତି । ସେମାନେ ଗଞ୍ଜାମ ଜିଲ୍ଲା ପ୍ରଶାସନକୁ କରୋନା ମୁକାବିଲା ଦିଗରେ କାର୍ଯ୍ୟ କରିବେ ।

ଭୁବନେଶ୍ୱର: କ୍ୱାରେଣ୍ଟାଇନ୍‌ ଅବଧିକୁ ବଢ଼ାଇଲେ ରାଜ୍ୟ ସରକାର । ଏଣିକି ୨୮ ଦିନିଆ କ୍ୱାରେଣ୍ଟାଇନ୍‌ରେ ରହିବେ ପ୍ରବାସୀ ଓଡ଼ିଆ ଏବଂ ସନ୍ଦିଗ୍ଧ ବ୍ୟକ୍ତି । ୨୧ ଦିନ ସରକାରୀ କ୍ୱାରେଣ୍ଟାଇନ୍‌ ବା ସରକାରଙ୍କ ଅନୁମୋଦିତ କ୍ୱାରେଣ୍ଟାଇନ୍‌ରେ ରହିବା ପରେ ଅନ୍ୟ ୭ ଦିନ ଘରେ କ୍ୱାରେଣ୍ଟାଇନ୍‌ରେ ରହିବେ । ବୈଜ୍ଞାନିକଙ୍କ ଠାରୁ ସଦ୍ୟ ପ୍ରାପ୍ତ ତଥ୍ୟ ଅନୁଯାୟୀ ଶରୀରରେ କୋଭିଡ-୧୯ ରୋଗର ପରିପ୍ରକାଶ ହେବା ପାଇଁ ୨୮ ଦିନ ସମୟ ଲାଗୁଛି । ଯାହା ପୂର୍ବରୁ ୧୪ ଦିନ ସମୟ ଲାଗୁଥିବା କୁହାଯାଉଥିଲା । ଏଣୁ ସଦ୍ୟ ପ୍ରାପ୍ତ ତଥ୍ୟ ଅନୁଯାୟୀ କ୍ୱାରେଣ୍ଟାଇନ ଅବଧିକୁ ବୃଦ୍ଧି କରାଯାଇଛି ।

ଏଥି ସହିତ କ୍ୱାରେଣ୍ଟାଇନ ସେଣ୍ଟରରେ ଲୋକେ ଯେଭଳି ସୁରୁଖୁରୁରେ ରହିପାରିବେ ସେ ନେଇ ଗୁରତ୍ୱ ଦେଇଛନ୍ତି ରାଜ୍ୟ ସରକାର । ଏଣୁ ଇଚ୍ଛୁକ ବ୍ୟକ୍ତିଙ୍କୁ ୧୦ ଦିନ କାମ ଯୋଗାଇଦେବେ ରାଜ୍ୟ ସରକାର । ଚୁନ ମାରିବା, ପରିସ୍କାର ପରିଚ୍ଛନ୍ନ କରିବା ଭଳି କାମ କରିପାରିବେ ଅନ୍ତେବାସୀ । ଏଥିଲାଗି ଦୈନିକ ୧୫୦ ଟଙ୍କା ଦେବେ ରାଜ୍ୟ ସରକାର । ପୂର୍ବରୁ ଘୋଷିତ ୨୦୦୦ ଟଙ୍କା ବ୍ୟତୀତ ଏହି ଟଙ୍କା ଯୋଗାଇଦିଆଯିବ । କ୍ୱାରେଣ୍ଟାଇନ୍‌ ସେଣ୍ଟର ଦାୟିତ୍ୱରେ ଥିବା ବ୍ୟକ୍ତିଙ୍କ ବ୍ୟତୀତ ଅନ୍ୟ ଲୋକଙ୍କୁ କ୍ୱାରେଣ୍ଟାଇନ୍‌ ସେଣ୍ଟରକୁ ଯିବାକୁ ବାରଣ କରାଯାଇଛି  । ଏଥି ସହିତ ସୁରକ୍ଷା ଦୃଷ୍ଟିରୁ ସଙ୍ଗରୋଧ କେନ୍ଦ୍ର ଆଖପାଖ ଅଞ୍ଚଳରେ ୧୪୪ ଧାରା ଲାଗୁ କରାଯିବ ।

ଭଦ୍ରକ: ଭଦ୍ରକରୁ ଆଉ ଜଣେ କରୋନା ପଜିଟିଭ୍‌ ଚିହ୍ନଟ ହୋଇଛନ୍ତି । ଏଥିସହ ଭଦ୍ରକରେ ପଜିଟିଭଙ୍କ ସଂଖ୍ୟା ୨୪କୁ ବୃଦ୍ଧି ପାଇଛି । ଚିହ୍ନଟ ହୋଇଥିବା ଆକ୍ରାନ୍ତଙ୍କ ବୟସ ୩୩ ବର୍ଷ ।  ଆଜି ସକାଳୁ ଭଦ୍ରକରୁ ଦୁଇଜଣ କରୋନା ପଜିଟିଭ ଚିହ୍ନଟ ହୋଇଥିଲେ ।

ସେହି ଦୁଇଜଣଙ୍କ ମଧ୍ୟରୁ ଜଣକୁ ୨୦ ବର୍ଷ ଏବଂ ଅନ୍ୟ ଜଣଙ୍କୁ ୪୧ ବର୍ଷ । ଜଣେ ଧାମନଗର ବ୍ଲକର ହୋଇଥିବା ବେଳେ ଅନ୍ୟ ଜଣେ ବାସୁଦେବପୁର ମ୍ୟୁନିସିପାଲଟିର ବୋଲି ଜଣାପଡ଼ିଛି । ଏହା ସହ ରାଜ୍ୟରେ କରୋନା ପଜିଟିଭଙ୍କ ସଂଖ୍ୟା ୨୪୬କୁ ବୃଦ୍ଧି ପାଇଛି । ଏବେ ରାଜ୍ୟରେ ୧୮୧ ଜଣ କରୋନା ସଂକ୍ରମଣରେ ସକ୍ରିୟ ରହିଥିବା ବେଳେ ୬୩ ଜଣ ସୁସ୍ଥ ହୋଇଛନ୍ତି ।

ଗଞ୍ଜାମରୁ ପୁଣି ୧୯‌, କେନ୍ଦ୍ରାପଡ଼ାରେ ଆଉ ୫ ପଜିଟିଭ୍