ପୁରୀ: ଆଜି ଶ୍ରୀଜିଉମାନଙ୍କ ରାଜପ୍ରାସାଦ ବିଜେ ନୀତି । ଦ୍ଵାଦଶୀ ତିଥି ଅବସରରେ ଏହି ନୀତି ସମାପନ କରିବେ ସେବାୟତ । ସକାଳ ଧୂପ ସରିବା ପରେ ଜୟବିଜୟ ଦ୍ଵାର ବନ୍ଦ କରାଯାଇ ବେହରଣ ଦ୍ଵାର ଫିଟାଇବା ସହ ଶ୍ରୀମନ୍ଦିରରୁ ଶ୍ରୀନହରକୁ ରାଜପ୍ରସାଦ ବିଜେ କରାଯିବ । ଗତକାଲି ଏକାଦଶୀ ତିଥିରେ ମହାପ୍ରଭୁଙ୍କୁ ଖଳି ଲାଗି ଓ ରକ୍ତ ବସ୍ତ୍ର ଲାଗି କରାଯାଇଥିଲା ।

ଏହାସହ ଶ୍ରୀଜିଉଙ୍କୁ ଶ୍ରୀ ବୈଦ୍ୟଙ୍କ ଦ୍ଵାରା ପ୍ରସ୍ତୁତ ଦଶମୂଳ ଔଷଧ ମଧ୍ୟ ଲାଗି କରାଯାଇଥିଲା । ଔଷଧ ଲାଗି ପରେ ମହାପ୍ରଭୁ ସୁସ୍ଥ ହୋଇଛନ୍ତି । ଏହି ଖବର ଗଜପତି ମହାରାଜାଙ୍କୁ ସୂଚିତ କରାଇବା ସହ ଶ୍ରୀଜିଉଙ୍କ ଅନବସର ପ୍ରସାଦ ରୂପେ କରାଳ, ଚନ୍ଦନ, ପାଟବସ୍ତ୍ରକୁ ନେଇ ଶ୍ରୀମନ୍ଦିରରୁ ଶ୍ରୀନହରକୁ ବିଜେ କରାଯିବ । ପରେ ପହୁଡ ଆଳତୀ ନୀତି ହେବା ପରେ ଦଇତାପତି ମାନେ ଘଣା ଲାଗି ନୀତି କରିବେ ।

ଭୁବନେଶ୍ୱର: ଆଜି ଦୁବାଇରୁ ଓଡିଆ ପ୍ରବାସୀଙ୍କୁ ନେଇ ଏକ ସ୍ୱତନ୍ତ୍ର ବିମାନ ଭୁବନେଶ୍ୱରରେ ପହଞ୍ଚିବ । ସକାଳ ୧୧ ସୁଦ୍ଧା ଏହି ବିମାନ ପହଞ୍ଚିବ ବୋଲି ସୂଚନା ମିଳିଛି । ୨୧୦ ସିଟ୍‌ ବିଶିଷ୍ଟ ଏହି ଚାର୍ଟାଡ ବିମାନ ଓଡିଆ ପ୍ରବାସୀଙ୍କୁ ନେଇ ଆସୁଛି । ଆବୁଧାବିରେ ଥିବା ଓଡିଆ ସମାଜ ଏହି ପ୍ରବାସୀଙ୍କ ଟିକେଟ ଖର୍ଚ୍ଚ ବହନ କରୁଛି ।

ପୂର୍ବରୁ ୨୧୬ ଜଣ ଯାତ୍ରୀଙ୍କୁ ନେଇ ଏକ ଚାର୍ଟାଡ ପ୍ଲେନ୍‌ ଦୁବାଇରୁ ଆସିଥିଲା । ଦୁବାଇରେ ଥିବା ପ୍ରବାସୀ ମାନେ କରୋନା କଟକଣା ଯୋଗୁଁ ଅଟକି ରହିଥିଲେ । ସେମାନଙ୍କୁ ସ୍ୱଦେଶ ଫେରାଇବାକୁ ଅଣ୍ଟା ଭିଡିଥିଲା ଆବୁଧାବି ଓଡିଆ ସମାଜ । ପ୍ରଥମ ପର୍ଯ୍ୟାୟରେ ୨୧୬ ଯାତ୍ରୀଙ୍କୁ ଓଡିଶା ପଠାଇ ସାରିଥିବା ବେଳେ ଆଜି ୨୧୦ ଜଣଙ୍କୁ ନେଇ ଓଡିଶା ଫେରୁଛି ସ୍ୱତନ୍ତ୍ର ବିମାନ । ବନ୍ଦେ ଭାରତ ଯୋଜନାରେ ବିଦେଶରେ ଫସିଥିବା ପ୍ରବାସୀମାନେ ଓଡିଶା ଫେରୁଛନ୍ତି।

ଭୁବନେଶ୍ୱର: କୋଭିଡ ସଂକଟ ଭିତରେ ଆଜି ବସିବାକୁ ଯାଉଛି ରାଜ୍ୟ କ୍ୟାବିନେଟର ଗୁରୁତ୍ୱପୂର୍ଣ୍ଣ ବୈଠକ । ମୁଖ୍ୟମନ୍ତ୍ରୀଙ୍କ ଅଧ୍ୟକ୍ଷତାରେ ଆଜି ସନ୍ଧ୍ୟା । ୭.୪୫ରେ ବସିବ ଏହି ବୈଠକ । ଏଥିରେ ୫ଟି ଗୁରୁତ୍ୱପୂର୍ଣ୍ଣ ପ୍ରସ୍ତାବ ଉପରେ ନିଷ୍ପତ୍ତି ନେବାର ସୂଚନା ରହିଛି । ରାଜସ୍ୱ ବିଭାଗର ଦୁଇଟି ପ୍ରସ୍ତାବ ଉପରେ ବାଜିପାରେ ମୋହର । ଗ୍ରାମ୍ୟ ଉନ୍ନୟନ, ଜଙ୍ଗଲ ଓ କୃଷି ବିଭାଗର ଗୋଟିଏ ଲେଖାଏଁ ପ୍ରସ୍ତାବ ରହିଛି । ଏହାସହ କରୋନା ସ୍ଥିତି ଦେଖି କିଛି ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନେଇପାରନ୍ତି ରାଜ୍ୟ ସରକାର ।

କେନ୍ଦ୍ରାପଡ଼ା: କରୋନା ପାଇଁ ବନ୍ଦ ହେଲା  ତୁଳସୀ କ୍ଷେତ୍ରରେ ବଳଦେବଜୀଉଙ୍କ ଘୋଷଯାତ୍ରା । କେନ୍ଦ୍ରାପଡ଼ାରେ ରଥଯାତ୍ରା ବନ୍ଦ କରିବା ନେଇ ଜିଲ୍ଲା ପ୍ରଶାସନ ନିଷ୍ପତ୍ତି ନେଇଛି । ରଥଯାତ୍ରାରେ ଏକାଧିକ ବ୍ୟକ୍ତିଙ୍କ ସମାଗମ ହେଉଥିବାରୁ ସାମାଜିକ ଦୂରତା ରକ୍ଷା ନହେବା ନେଇ ଆଶଙ୍କା ରହିଛି । ତେଣୁ ରଥଯାତ୍ରା ଉପରେ ରୋକ ଲାଗିଯାଇଛି ।

ସେହିପରି ବଳଦେବଜୀଉଙ୍କ ରଥ ଦଉଡି ପୁରୀ ଶ୍ରୀଜଗନ୍ନାଥଙ୍କ ଅପେକ୍ଷା ଛୋଟ ଥିବାରୁ ଏଠାରେ ସାମାଜିକ ଦୂରତା ରକ୍ଷା ସମ୍ଭବ ନୁହେଁ। ଏନେଇ ଜିଲ୍ଲାପାଳ, ଉପଜିଲ୍ଲାପାଳ, ସେବାୟତଙ୍କ ବୈଠକରେ ଆଲୋଚନା ହୋଇଥିଲା। ଆସନ୍ତାକାଲି ମନ୍ଦିର ସେବକମାନେ ରାଜ ପୁରୋହିତଙ୍କ ନିକଟକୁ ଯାଇ ମନ୍ଦିର ଭିତରେ ରଥଯାତ୍ରା ସମାପନ କରିବା ନେଇ ଆଲୋଚନା କରିବେ। ଏହାପରେ ଚଳିତ ବର୍ଷ ରଥଯାତ୍ରାର ବିକଳ୍ପ ବାଟ ବାହାରିବ ବୋଲି ଦେବୋତ୍ତର ବିଭାଗ ମୁଖ୍ୟ କହିଛନ୍ତି ।

ପୁରୀ: ମହାପ୍ରଭୁଙ୍କ ଘୋଷଯାତ୍ରା ନେଇ ଆଜି ଆସିବ ସୁପ୍ରିମକୋର୍ଟର ରାୟ । ରଥଯାତ୍ରା ବନ୍ଦ ପାଇଁ ଓଡିଶା ବିକାଶ ପରିଷଦର ସଭାପତି ସୁଶାନ୍ତ କୁମାର ପାଢୀ ଗତ ୧୧ ତାରିଖରେ ସୁପ୍ରିମକୋର୍ଟର ଆଇନଜୀବୀ ରଞ୍ଜିତା ରୋହତଗୀଙ୍କ ଜରିଆରେ ପିଟିସନ ଦାଖଲ କରିଥିଲେ ।

କରୋନା ସ୍ଥିତିକୁ ଦେଖି ଘୋଷଯାତ୍ରା ବନ୍ଦ ପାଇଁ ଆବେଦନ କରିଥିଲା ପରିଷଦ । ସୁପ୍ରିମକୋର୍ଟ ପ୍ରଧାନ ବିଚାରପତି ଦ୍ଵାରା ଗଠିତ ୩ ଜଣିଆ ଖଣ୍ଡପୀଠ ଆଜି ଏହାର ରାୟ ଶୁଣାଇବେ । ଓଡିଶା ବିକାଶ ପରିଷଦ ଦ୍ଵାରା ଦାଖଲ କରାଯାଇଥିବା ପିଟିସନରେ ପକ୍ଷଭୁକ୍ତ ହେବା ପାଇଁ ଜୟନ୍ତ କୁମାର ବଳଙ୍କ ଦ୍ଵାରା ଦାଖଲ କ୍ୟାଭେଟ୍‌ ଆବେଦନର ମଧ୍ୟ ଆଜି ଶୁଣାଣି ହେବ ।