ଭୁବନେଶ୍ୱର: ଆସନ୍ତା ଜୁନ୍‌ ୧୭ ତାରିଖରେ ରାଜ୍ୟରେ ଖୋଲିବନି ସ୍କୁଲ । କେନ୍ଦ୍ରର ଗାଇଡଲାଇନ୍‌ ପରେ ରାଜ୍ୟ ସରକାର ଏ ନିଷ୍ପତ୍ତି ନେଇଛନ୍ତି । ଜୁଲାଇରେ ସ୍ଥିତି ଅନୁଧ୍ୟାନ ପରେ ସ୍କୁଲ ଖୋଲିବା ପ୍ରସଙ୍ଗରେ ନିଷ୍ପତ୍ତି ନିଆଯିବ । ସ୍କୁଲ ଓ ଗଣଶିକ୍ଷା ମନ୍ତ୍ରୀ ସମୀର ଦାଶ ଏହି ସୂଚନା ଦେଇଛନ୍ତି ।

ସେହିପରି ଜୁଲାଇ ପହିଲାରୁ ବାକି ଥିବା ପରୀକ୍ଷା ଆରମ୍ଭ ହେବ । କାଲିଠୁ ଯୁକ୍ତ ୨ ଅନଲାଇନ୍‌ ଓ ୮ରୁ ଅଫଲାଇନ୍‌ ଖାତାଦେଖା ଆରମ୍ଭ ହେବ । ୨୭ଟି କେନ୍ଦ୍ରରେ ଯୁକ୍ତ ୨ ଖାତାଦେଖା ବ୍ୟବସ୍ଥା କରାଯାଇଥିବା ସ୍କୁଲ ଓ ଗଣଶିକ୍ଷା ମନ୍ତ୍ରୀ ସୂଚନା ଦେଇଛନ୍ତି ।

ଭଦ୍ରକ: ପୁଣି ଭଦ୍ରକରେ ସାମ୍ନକୁ ଆସିଲା ଧଳ ଜହର କାରବାର । ଜବତ ହେଲା ୮୧ ଗ୍ରାମ୍‌ର‌ ବ୍ରାଉନ୍‌ ସୁଗର । କେନ୍ଦ୍ରୀୟ ଅବକାରୀ ଗୁଇନ୍ଦା ବିଭାଗର ସ୍ୱତନ୍ତ୍ର ଟିମ୍‌ ଏହି ଧଳା ଜହର ରାକେଟ୍‌ର ପର୍ଦ୍ଦାଫାସ୍‌ କରିଛି । ଘଟଣାରେ ଦୁଇ ଜଣଙ୍କୁ ପୋଲିସ ଗିରଫ ମଧ୍ୟ କରିଛି ।

ଭଦ୍ରକରେ ଦିନକୁ ଦିନ ବ୍ରାଉନ୍‌ ସୁଗର କାରବାର ବୃଦ୍ଧି ପାଉଥିବା ବାରମ୍ବାର ଅଭିଯୋଗ ହେଉଛି । ତେବେ ଏହି ରାକେଟ୍‌କୁ ଧରିବା ପାଇଁ ଅବକାରୀ ଗୁଇନ୍ଦା ବିଭାଗ ପକ୍ଷରୁ ଏକ ସ୍ୱତନ୍ତ୍ର ଟିମ୍ ଅନେକ ଦିନ ଧରି ବେପାରୀଙ୍କ ଉପରେ ନଜର ରଖିଥିଲା । ଆଜି ଏଥିରେ ସଫଳ ହୋଇଛି ।

ଦୁଇ ଜଣ ବ୍ରାଉନ ସୁଗର ବେପାରୀ ଏକ ବାଇକ ଯୋଗେ ଯାଉଥିବା ବେଳେ ଚରମ୍ପା ଓଭର ବ୍ରିଜ୍‌ ନିକଟରେ ଅବକାରୀ ଗୁଇନ୍ଦା ବିଭାଗ ହାବୁଡ଼ରେ ପଡ଼ିଥିଲେ । ଯାଞ୍ଚ କରିବା ପରେ ସେମାନଙ୍କଠାରୁ ୮୧ ଗ୍ରାମ୍‌ର ବ୍ରାଉନ ସୁଗର ଜବତ କରାଯାଇଛି । ଏହାସହ ବାଇକକୁ ମଧ୍ୟ ଅବକାରୀ ବିଭାଗ ଜବତ କରିଛି । ଜବତ ବ୍ରାଉନ ସୁଗର ଆନୁମାନିକ ମୂଲ୍ୟ ୮ ଲକ୍ଷରୁ ଉର୍ଦ୍ଧ୍ୱ ହେବ ବୋଲି ସୂଚନା ମିଳିଛି । ଗିରଫ ଅଭିଯୁକ୍ତମାନେ ଦୋଳସାହିର ବୋଲି ଜଣାପଡିଛି ।

ଭଦ୍ରକ: ମା’କୁ ପିଟିପିଟି ମାରିଲା ପୁଅ । ଏଭଳି ଏକ ଅମାନୁଷିକ ଘଟଣା ସାମ୍ନାକୁ ଆସିଛି ଭଦ୍ରକ ଜିଲ୍ଲାରୁ । ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚି ପୁଅକୁ ଅଟକ ରଖିଛି ।

ପାରିବାରିକ କଳହକୁ ନେଇ ଏଭଳି ଏକ ଅଭାବନୀୟ କାଣ୍ଡ ଘଟିଛି । ସାନ ପୁଅ ନିରଞ୍ଜନ ଜେନା ତାର ମା’ ମାତାଜୀ ଜେନାକୁ ପିଟିପିଟି ମାରିଥିବା ନେଇ ବାପା ଭଦ୍ରକ ଜିଲ୍ଲା ଧୂସୁରି ଥାନାରେ ଅଭିଯୋଗ କରିଛନ୍ତି । ବାପାର ଅଭିଯୋଗ ପରେ ଧୂଷୁରୀ ପୋଲିସ ନିରଞ୍ଜନକୁ ଗିରଫ କରିଛି । ଏହାସହ ବିଲ ମଝିରେ ପଡ଼ିଥିବା ମାତାଜୀଙ୍କ ମୃତଦେହକୁ ମଧ୍ୟ ପୋଲିସ ଉଦ୍ଧାର କରିଛି । ପରେ ବ୍ୟବଚ୍ଛେଦ ପାଇଁ ପଠାଇଛି ।

ଅଭିଯୋଗ ଅନୁଯାୟୀ, ସାନ ପୁଅ ନିରଞ୍ଜନ ବାଙ୍ଗାଲୋରରେ ଏକ ଘରୋଇ କମ୍ପାନୀରେ କାମ କରେ । ହେଲେ କିଛି ଦିନ ହେବ ସେ ଗାଁକୁ ଫେରିଥିଲା । ତେବେ ଗାଁରେ ରହୁଥିବା ବେଳେ ତା’ର ମା ମାତାଜୀ ଜେନା ସହ କୌଣସି କାରଣରୁ ବଚସା ହୋଇଥିଲା । ଆଉ ସେବେଠାରୁ ମା’ ପୁଅ ମଧ୍ୟରେ ତିକ୍ତତା ରହିଥିଲା । ତେବେ ଗତ ୨୯ ତାରିଖ ଦିନ ମାତାଜୀ ନିଜ ବାପ ଘରକୁ ଯାଉଥିବା ବେଳେ ବିଲରେ ନିରଞ୍ଜନଙ୍କ ହାବୁଡ଼ରେ ପଡ଼ିଥିଲେ । ସେଠାରେ ମା’ ପୁଅଙ୍କ ମଧ୍ୟରେ ପୁଣି ଯୁକ୍ତି ତର୍କ ହୋଇଥିଲା । ଆଉ ଏଥିରେ ଉତ୍‌କ୍ଷିପ୍ତ ହୋଇ ନିରଞ୍ଜନ ମା’ର ବେକକୁ ଲୁଗା କାନିରେ ଗୁଡ଼ାଇ ମାରିବାକୁ ଚେଷ୍ଟା କରିଥିଲା । ପରେ ଏକ ଠେଙ୍ଗାରେ ମୁଣ୍ଡକୁ ବାରମ୍ବାର ପିଟିଥିଲା । ଫଳରେ ମାତାଜୀଙ୍କ ମୁଣ୍ଡରେ ଗଭୀର ଆଘାତ ଲାଗିଥିଲା । ଆଉ ସେ ତଳେ ପଡ଼ିଯାଇଥିଲେ ଓ ମୃତ୍ୟୁ ବରଣ କରିଥିଲେ । ସେଠାରେ ମାତାଜୀଙ୍କୁ ଛାଡ଼ି ନିରଞ୍ଜନ ଚାଲି ଆସିଥିଲା । ଅଭିଯୋଗ ପରେ ପୋଲିସ ନିରଞ୍ଜନକୁ ଗିରଫ କରିଛି ।

ପୁରୀ: ଜୁନ୍‌ 23ରେ ରଥଯାତ୍ରା । ବଡ଼ ଦାଣ୍ଡରେ ଜୋରସୋରରେ ଚାଲିଛି ରଥ ନିର୍ମାଣ କାମ । ଭଉଁରୀ ତିଥିରେ ରଥଖଳାରେ ୩ ରଥର ଚକାଡେରା ନୀତି ସମ୍ପନ୍ନ ହୋଇଛି । ପରମ୍ପରା ଅନୁସାରେ ତିନି ରଥର ଏକ ଯ଼ୋଡ଼ା ଚକ ସହ ଅଖ ସଂଯ଼ୋଗ ନୀତି ସମ୍ପନ୍ନ ହୋଇଛି । ଗତ ଶୁକ୍ରବାର ଚକ ଉପରେ ପଂକ୍ତି ଭୋଗ ପରେ ବିଧି ମୁତାବକ ୩୬ଟି ଚକରେ ୧୮ ଅଖକୁ ସଂଯ଼ୋଗ କରାଯାଇଛି । ଭୋଇ ସେବକ ମାନେ ଏହି ନୀତି ସମ୍ପନ୍ନ କରିଛନ୍ତି । ୩ ରଥର ଦଣ୍ଡା ଓ ଗରଗରା ନିର୍ମାଣ ଶେଷ ହୋଇଥିବାବେଳେ ଏହାକୁ ଚକ ଉପରେ ପକାଇ ଗୟଳ ମୋଡ଼ କରାଯିବା ବାକି ରହିଛି । ସେପଟେ ସ୍ନ।ନଯାତ୍ରାରୁ ନୀଳାଦ୍ରି ବିଜେ ପର୍ଯ୍ୟନ୍ତ ଖୋଲିବନି ଶ୍ରୀମନ୍ଦିର ବୋଲି ନିଷ୍ପତ୍ତି ହୋଇଛି ।

ସେ ଭକ୍ତଙ୍କୁ ବଡ଼ ଦାଣ୍ଡ ମନା ଥିବା ବେଳେ ସମସ୍ତେ ଟେଲିଭିଜନ୍‌ରେ ଶ୍ରୀଜିଉଙ୍କୁ ଦର୍ଶନ କରିବେ ବୋଲି କୁହାଯାଇଛି । ଚଳିତବର୍ଷ ରାଜ୍ୟ ସରକାରଙ୍କ ସୂଚନା ଓ ଲୋକସମ୍ପର୍କ ବିଭାଗ ପକ୍ଷରୁ ଶ୍ରୀଜିଉଙ୍କ ସ୍ନ।ନଯାତ୍ରାର ସିଧା ପ୍ରସାରଣ କରାଯିବ । ମହାପ୍ରଭୁଙ୍କ ସେବା ସମୟରେ ସେବାୟତମାନେ ସାମାଜିକ ଦୂରତା ରଖିବା ସହ ମାସ୍କ ପିନ୍ଧିବେ । ଶ୍ରୀମନ୍ଦିର ପରିଚାଳନା କମିଟିର ନିଷ୍ପତ୍ତି ଅନୁଯାୟୀ ଶ୍ରୀଜିଉଙ୍କ ସେବା କରିବାକୁ ସେବାୟତମାନେ ସମ୍ମତି ପ୍ରକାଶ କରିଛନ୍ତି । ସ୍ନ।ନଯାତ୍ରା, ଅଣସର ସେବା, ରଥଯାତ୍ରା, ବାହୁଡ଼ା, ଅଧରପଣା ଏବଂ ନୀଳାଦ୍ରି ବିଜେରେ କେବଳ ଜରୁରି ଥିବା ସେବାୟତ ସାମିଲ ହେବେ । ତେବେ ରଥଯାତ୍ରା ପାଇଁ ପୁରୀରୁ ଗଡିବନି ଟ୍ରେନ୍‌ । ଜୁନ୍‌ ପହିଲାରୁ ଚାଲିବାକୁ ଥିବା ପୁରୁଷୋତ୍ତମ ଏକ୍ସପ୍ରେସ୍‌ ପୁରୀରୁ ଛାଡ଼ିବନି । ପୁରୀ ବଦଳରେ ଭୁବନେଶ୍ୱରରୁ ଯାତ୍ରା କରିବ ପୁରୁଷୋତ୍ତମ ଏକ୍ସପ୍ରେସ୍‌ । ସିଆଲଦା-ପୁରୀ ଏକ୍ସପ୍ରେସ୍‌ ମଧ୍ୟ ପୁରୀ ଷ୍ଟେସନ ଯିବନି । ରାଜ୍ୟ ସରକାରଙ୍କ ଅନୁରୋଧ କ୍ରମେ ଏହି ନିଷ୍ପତ୍ତି ନେଇଛି ରେଳ ବିଭାଗ ।