ନବରଙ୍ଗପୁର: ଭିଜିଲାନ୍ସ ଜାଲରେ ଲାଞ୍ଚୁଆ ଆରଟିଓ । ନବରଂଗପୁର ଆରଟିଓ ଗଣେଶ୍ୱର କହଁରଙ୍କ ଘରେ ଭିଜିଲାନ୍ସ ଚଢ଼ାଉ । ଚାକିରି କରାଇଦେବା ନାଁରେ ଲକ୍ଷ୍ମୀ ହରିଜନ ନାମକ ଜଣେ ଯୁବକଙ୍କ ଠାରୁ ଲାଞ୍ଚ ନେଉଥିଲେ । ଲାଞ୍ଚ କାରବାର ପରେ ଟଙ୍କା ଫେରାଇବା ପାଇଁ ଯୁକ୍ତିତର୍କର ଏକ ଭିଡ଼ିଓ ଗତ ୨୧ ତାରିଖରେ ସୋସିଆଲ ମିଡ଼ିଆରେ ଭାଇରାଲ ହୋଇଥିଲା ।

ପରେ ୨୨ତାରିଖରେ ଆର୍‌ଟିଓ ଅଫିସର ଡାଟା ଏଣ୍ଟ୍ରି ଅପରେଟର୍‌  ଲକ୍ଷ୍ମୀ ହରିଜନ, ଆର୍‌ଟିଓଙ୍କ ବିରୋଧରେ ନବରଙ୍ଗରପୁର ଥାନାରେ ଏତଲା ଦେଇଥିଲେ । ବାସଭବନ, ଅଫିସ ଓ ଭଡ଼ାଘର ସହ ଏକକାଳୀନ ୬ ସ୍ଥାନରେ ରେଡ୍‌ କରୁଛି ଭିଜିଲାନ୍ସ ଟିମ୍‌ । କନ୍ଧମାଳ, ବୌଦ୍ଧ, ଭୁବନେଶ୍ୱର ଓ ଗଜପତିରେ ମଧ୍ୟ ରେଡ୍‌ ଚାଲିଛି । ଭିଜିଲାନ୍ସର ୩ ଜଣିଆ ଟିମ୍‌ ଏହି ଚଢାଉରେ ସାମିଲ ହୋଇଛନ୍ତି ।

ଭୁବନେଶ୍ୱର: ରାଜ୍ୟର ଗ୍ରାମାଞ୍ଚଳରେ କଚ୍ଚା ଘରେ ବାସ କରୁଥିବା ୨୫ ଲକ୍ଷ ପରିବାରଙ୍କୁ ଇତି ମଧ୍ୟରେ ପକ୍କାଘର ଯୋଗାଇ ଦେଇ ଉଲ୍ଲେଖନୀୟ ସଫଳତା ହାସଲ କରାଯାଇଛି । ରାଜ୍ୟସ୍ତରୀୟ ପଞ୍ଚାୟତିରାଜ ଦିବସ ପାଳନ ଅବସରରେ ଏହି ସଫଳତାକୁ ରାଜ୍ୟବାସୀଙ୍କ ଉଦ୍ଦେଶ୍ୟରେ ଉତ୍ସର୍ଗ କରି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କହିଛନ୍ତି,  ଗ୍ରାମାଞ୍ଚଳ ରହୁଥିବା ପ୍ରତ୍ୟେକ ନାଗରିକର ମୁଣ୍ଡ ଉପରେ ଖଣ୍ଡେ ଭଲ ଛାତ ଥାଉ ଏହା ଥିଲା ଜନନାୟକ ବିଜୁବାବୁଙ୍କ ଅଭିଳାଷ । ଏହାକୁ ପୂରଣ କରିବା ପାଇଁ ରାଜ୍ୟ ସରକାର ସର୍ବାଧିକ ପ୍ରାଥମିକତା ଦେଇ ରାଜ୍ୟକୁ କଚ୍ଚାଘର ମୁକ୍ତ କରିବା ଲକ୍ଷ୍ୟରେ ଉଦ୍ୟମ ଆରମ୍ଭ କରିଛନ୍ତି ।

ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଗ୍ରାମାଞ୍ଚଳର ଯୋଗ୍ୟ ୨୦ ଲକ୍ଷ ପରିବାରଙ୍କୁ ପକ୍କାଘର ଯୋଗ୍ୟତା କାର୍ଡ ଅଧିକାର ପତ୍ର ପ୍ରଦାନ କାର୍ଯ୍ୟକ୍ରମର ଶୁଭାରମ୍ଭ କରିଥିଲେ । ଯେଉଁମାନଙ୍କୁ ପ୍ରାଥମିକତା ଭିତ୍ତିରେ ପର୍ଯ୍ୟାୟକ୍ରମେ ପକ୍କାଘର ଯୋଗାଇ ଦିଆଯିବ । ଏହି ଅବସରରେ ମାନ୍ୟବର ମୁଖ୍ୟମନ୍ତ୍ରୀ ୯ ଜଣ ହିତାଧିକାରୀଙ୍କୁ ପକ୍କାଘର ଯୋଗ୍ୟତା କାର୍ଡ ଅଧିକାର ପତ୍ର ବଣ୍ଟନ କରିଥିଲେ ।

ଏହି ଅବସରରେ ରାଜ୍ୟ ସରକାରଙ୍କ ଦ୍ୱାରା ନିଆଯାଇଥିବା ୫-ଟି ପ୍ରୟାସ ଅନ୍ତର୍ଗତ ମୁଖ୍ୟମନ୍ତ୍ରୀ ପଞ୍ଚାୟତିରାଜ ଓ ପାନୀୟ ଜଳ ବିଭାଗ ଦ୍ୱାରା ପ୍ରସ୍ତୁତ କରାଯାଇଥିବା ଅନ୍‌ଲାଇନ୍‌ କେସ୍ ରେକର୍ଡ ପରିଚାଳନା ଏବଂ ଆମ ଘର ମୋବାଇଲ ଆପ୍‌ର ଶୁଭାରମ୍ଭ କରିଥିଲେ । ଏହି ଅନ୍‌ଲାଇନ୍‌ କେସ୍ ରେକର୍ଡ ପରିଚାଳନା ମାଧ୍ୟମରେ ହିତାଧିକାରୀମାନେ ବ୍ୟକ୍ତିଗତ ଭାବରେ ଗ୍ରାମୀଣ ବାସଗୃହ ଯୋଗାଣ ସମ୍ପର୍କିତ ସମସ୍ତ ତଥ୍ୟ ପାଇପାରିବେ । ପୁନଶ୍ଚ ଆମ ଘର ମୋବାଇଲ୍‌ ଆପ୍ ମାଧ୍ୟମରେ ଗୃହ ନିର୍ମାଣ ନିମନ୍ତେ ଥିବା ବିଭିନ୍ନ ଥିବା ବିଭିନ୍ନ କିସ୍ତି ଗୁଡ଼ିକର ପ୍ରକ୍ରିୟା ଏବଂ ଫଟୋ ଅପ୍‌ଲୋଡ୍‌  କରାଯାଇପାରିବ । ଆଜିର ଏହି ଉତ୍ସବ ପାଳନ ଅବସରରେ ଗ୍ରାମୀଣ ବାସଗୃହ ଯୋଜନାରେ ରାଜ୍ୟରେ ଉପକୃତ ହୋଇଥିବା ଯୋଗ୍ୟ ହିତାଧିକାରୀଙ୍କ ୨୧ଟି ଅନନ୍ୟ ସଫଳ କାହାଣୀକୁ ନେଇ ସଂକଳନ ହୋଇଥିବା A Coffe Table Book ମୁଖ୍ୟମନ୍ତ୍ରୀ ଉନ୍ମୋଚନ କରିଥିଲା ।

ସମାରୋହରେ ଯୋଗଦେଇଥିବା ମାନ୍ୟବର ଅର୍ଥମନ୍ତ୍ରୀ ନିରଞ୍ଜନ ପୂଜାରୀ ପଞ୍ଚାୟତିରାଜ ଅନୁଷ୍ଠାନଗୁଡ଼ିକ ସଶକ୍ତ କରିବା ପାଇଁ ରାଜ୍ୟ ସରକାରଙ୍କ ଦ୍ୱାରା ନିଆଯାଇଥିବା ବିଭିନ୍ନ ପଦକ୍ଷେପ ଉପରେ ଗୁରୁତ୍ୱ ଦେଇଥିଲେ ।

ଯୋଜନା ଓ ସମନ୍ୱୟ ବିଭାଗ ମନ୍ତ୍ରୀ ପଦ୍ମନାଭ ବେହେରା ସରକାରଙ୍କ ବିଭିନ୍ନ ବିଭାଗ ମଧ୍ୟରେ ସମନ୍ୱୟ ରକ୍ଷା କରି ଉତ୍ତମ ସେବା ପ୍ରଦାନ କରିବା ଉପରେ ଗୁରୁତ୍ୱ ଦେଇଥିଲେ । ପଞ୍ଚାୟତିରାଜ ବ୍ୟବସ୍ଥାକୁ ସଶକ୍ତ ନିମନ୍ତେ ରାଜ୍ୟ ସରକାର ୪ଟି ବିଭାଗ ଯଥା ବିଦ୍ୟାଳୟ ଓ ଗଣଶିକ୍ଷା, ସ୍ୱାସ୍ଥ୍ୟ ଓ ପରିବାର କଲ୍ୟାଣ, ମତ୍ସ୍ୟ ଓ ପ୍ରାଣୀସମ୍ପଦ ଚିକିତ୍ସାଳୟ, ଅଙ୍ଗନଓ୍ୱାଡି କେନ୍ଦ୍ରର ନିର୍ମାଣ ଓ ରକ୍ଷଣାବେକ୍ଷଣ କାର୍ଯ୍ୟ ଏଣିକି ତ୍ରିସ୍ତରୀୟ ପଞ୍ଚାୟତିରାଜ ଅନୁଷ୍ଠାନ ଦ୍ୱାରା କରାଯିବ । ଏଥିପାଇଁ ଆଜିର ପବିତ୍ର ଦିବସରେ ସମ୍ପୃକ୍ତ ବିଭାଗଗୁଡ଼ିକ ସହ ଆମ ବିଭାଗର ମଧ୍ୟରେ ଚୁକ୍ତିନାମା ସ୍ୱାକ୍ଷରିତ ହୋଇଥିଲା ।

ପଞ୍ଚାୟତିରାଜ ଓ ପାନୀୟଜଳ ବିଭାଗ ଦ୍ୱାରା ଲୋକସେବା ଭବନର ସମ୍ମିଳନୀ କକ୍ଷରେ ଆୟୋଜିତ ହୋଇଥିବା ଏହି ରାଜ୍ୟସ୍ତରୀୟ ପଞ୍ଚାୟତିରାଜ ଦିବସ ଉତ୍ସବରେ ମୁଖ୍ୟମନ୍ତ୍ରୀ, ବାଚସ୍ପତି, ଅର୍ଥମନ୍ତ୍ରୀ , ଯୋଜନା ଓ ସମନ୍ୱୟ ମନ୍ତ୍ରୀ, ରାଜ୍ୟ ମନ୍ତ୍ରିମଣ୍ଡଳର ଅନନ୍ୟ ସଦସ୍ୟ ବୃନ୍ଦ, ମାନ୍ୟବର ସାଂସଦ ବୃନ୍ଦ, ମାନ୍ୟବର ବିଧାୟକ ବୃନ୍ଦ, ମୁଖ୍ୟ ଶାସନ ସଚିବ, ବିଭାଗୀୟ ଶାସନ ସଚିବ ବୃନ୍ଦ ଏବଂ ଅନ୍ୟାନ୍ୟ ସରକାରୀ ପଦାଧିକାରୀ ଉପସ୍ଥିତ ଥିଲେ ।

ମୁଖ୍ୟ ଶାସନ ସଚିବ ଅସିତ୍‌ ତ୍ରିପାଠୀ ସମାରୋହରେ ସ୍ୱାଗତ ଅଭିଭାଷଣ ପ୍ରଦାନ କରିଥିବା ବେଳେ ପଞ୍ଚାୟତିରାଜ ଓ ପାନୀୟ ଜଳ ବିଭାଗର ପ୍ରମୁଖ ସଚିବ ଦେଓରଞ୍ଜନ କୁମାର ସିଂହ ସମାରୋହରେ ଉପସ୍ଥିତ ଥିବା ସମସ୍ତ ବରେଣ୍ୟ ଅତିଥିମାନଙ୍କୁ ଧନ୍ୟବାଦ ଅର୍ପଣ କରି କରିଥିଲେ ।

ଭୁବନେଶ୍ୱର: ବୟସ ୬୦ ଟପିଲାଣି । କିନ୍ତୁ ଏମାନେ ପୂରା ଫିଟ ।  ରାସ୍ତାରେ ଦୌଡିଲେ ଯୁବବର୍ଗଙ୍କୁ ବି ପଛରେ ପକାଇ ଦେଉଛନ୍ତି ଏମାନେ ।  ସତେ ଯେମିତି ଏମାନଙ୍କ ଉତ୍ସାହ ଆଗରେ ହାର ମାନିଛି ବୟସ । ପୂର୍ବତନ ମୁଖ୍ୟମନ୍ତ୍ରୀ ତଥା ପ୍ରବାଦ ପୁରୁଷ ବିଜୁ ପଟ୍ଟନାୟକଙ୍କ ଜୟନ୍ତୀ ଅବସରରେ ଅନୁଷ୍ଠିତ ବିଜୁ ମିନି ମାରାଥନରେ ଦେଖିବାକୁ ମିଳିଥିଲା

ଏଭଳି କିଛି ଧାବକ ଧାବିକାଙ୍କୁ ଯାହାଙ୍କର କାହାଣୀ ଭାରି ନିଆରା । ପଶ୍ଚିମବଙ୍ଗର  ବିଭିନ୍ନ ଗାଁରୁ ଆସିଛନ୍ତି ଏହି ଧାବକ ଧାବିକା ।  ପେଶାରେ ଏମାନେ ଚାଷୀ ।  କିନ୍ତୁ ପରିବାର ପୋଷିବା ପାଇଁ ଏମାନେ ସାଜିଛନ୍ତି ମାରାଥନର ।  ଧାନ ଅମଳରେ ଯେତିକି ମିଳେ ସେତିକିରେ ପରିବାର ଚଳିବା କଷ୍ଟ , ସେଥିପାଇଁ ଏଭଳି ମାରାଥନର ପୁରସ୍କାର ରାଶିକୁ ଚାହିଁ ବସିଥାନ୍ତି ଏହି ଧାବକ ।

ଧାନ ଚାଷ କରିବା ସହ ଘରେ ରୋଷେଇ କରିବାରେ ବ୍ୟସ୍ତ ଥାନ୍ତି ଏହି ମହିଳା ।  କିନ୍ତୁ ଅଧିକ ଟଙ୍କା ରୋଜଗାର କରିବା ପାଇଁ ଏମାନେ ବି ମାରାଥନକୁ ଟଙ୍କା ରୋଜଗାରର ବାଟ ବାଛିଲେ ।  ଏଥିପାଇଁ ବର୍ଷ ତମାମ୍‌ ଅଭ୍ୟାସ ବି କରୁଥାନ୍ତି । ମାରାଥନ ଆୟୋଜନର ଖବର ଶୁଣିଲେ ପହଞ୍ଚିଯାନ୍ତି ଭେନ୍ୟୁରେ ।  ରେଳଯାତ୍ରା ହେଉ ଅବା ବସ ଯାତ୍ରା ଯେତେ ସମସ୍ୟା ହେଉ ପଛେ ମାରାଥନରେ ଭାଗ ନେବା ଯେମିତି ନିଶା ପାଲଟିଯାଇଛି ।  ବିଭିନ୍ନ ବର୍ଗରେ ମାରାଥନର ଆୟୋଜନ ହୋଇଥିବାବେଳେ ବର୍ଷିୟାନ ମାରାଥନର ସଭିଙ୍କ ହୃଦୟ ଜିଣିଥିଲେ ।

ଭୁବନେଶ୍ୱର: A decent roof over the head of every citizen of my state. ଅର୍ଥାତ ସମସ୍ତଙ୍କ ପାଇଁ ପକ୍କା ଘର ଥିଲା ବିଜୁ ବାବୁଙ୍କ ସ୍ୱପ୍ନ ଥିଲା ।  ଆଉ ଏହି ଦିଗରେ ଅନେକ ବାଟ ଆଗେଇଛି ରାଜ୍ୟ । ଏ ପର୍ଯ୍ୟନ୍ତ ୨୫ ଲକ୍ଷ ହତିାଧିକାରୀଙ୍କୁ ପକ୍କା ଘର ଦିଆଯାଇଛି । ଆଗାମୀ ୪ ବର୍ଷ ଭିତରେ ଆଉ ୨୦ ଲକ୍ଷ ପକ୍କା ଘର ଯୋଗାଇ ଦେବା ପାଇଁ ଲକ୍ଷ୍ୟ ରଖାଯାଇଥିବା କହିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଏଥିସହିତ ବିଜୁ ବାବୁଙ୍କ ଜୟନ୍ତୀ ଅବସରରେ ୨୦ ଲକ୍ଷ ପକ୍କା ଘର ପାଇଁ ହିତାଧିକାରୀଙ୍କୁ ପକ୍କା ଘର ଯୋଗ୍ୟତା କାର୍ଡ ବଣ୍ଟନ କାର୍ଯ୍ୟ ଆରମ୍ଭ କରି ଖୁସି ବ୍ୟକ୍ତ କରିଛନ୍ତି ମୁଖ୍ୟମନ୍ତ୍ରୀ ।

ସେ ଆହୁରି କହିଛନ୍ତି, ମୋ ସରକାର କଥାରେ ନୁହେଁ, କାମରେ ବିଶ୍ୱାସ କରେ । ପକ୍କା ଘର ଯୋଗ୍ୟତା କାର୍ଡ ପାଇଁ ସମସ୍ତଙ୍କୁ ମୋର ଶୁଭେଚ୍ଛା । ମୋର ବିଶ୍ୱାସ , ଆପଣମାନେ ଠିକ୍ ସମୟରେ ଘର ତିଆରି କରିବେ ଏବଂ ଓଡ଼ିଶାର ସବୁ କଚ୍ଛା ଘରକୁ ପକ୍କା କରିବା ପାଇଁ ସରକାରଙ୍କ ଉଦ୍ୟମରେ ସହଯୋଗ କରିବେ ।

ପଞ୍ଚାୟତିରାଜ ବ୍ୟବସ୍ଥାକୁ ଶକ୍ତିଶାଳୀ କରିବା ପାଇଁ ମୋ ସରକାର ବିଭିନ୍ନ ପଦକ୍ଷେପ ନେଇଛି । ଗଣତନ୍ତ୍ରରେ ଲୋକ ହିଁ ଶ୍ରେଷ୍ଠ । ସାଧାରଣ ଲୋକ ହିଁ ମାଲିକ । ବିଜୁ ବାବୁ ସବୁବେଳେ ସାଧାରଣ ଲୋକର ହକ୍‌କୁ ଗୁରୁତ୍ୱ ଦେଉଥିବା କହିଛନ୍ତି ମୁଖ୍ୟମନ୍ତ୍ରୀ । ଏଥିସହିତ ମାର୍ଚ୍ଚ ୫ ତାରିଖକୁ ପଞ୍ଚାୟତିରାଜ ଓ ଲୋକସେବା ଦିବସଭାବରେ ପାଳନ କରାଯିବ ବୋଲି ଘୋଷଣା କରିଛନ୍ତି ।