ଭୁବନେଶ୍ୱର: ଆହୁରି ୩ଦିନ ଯାଏଁ ରାଜ୍ୟର ବିଭିନ୍ନ ସ୍ଥାନରେ ବର୍ଷା ହେବ ବୋଲି ପାଣିପାଗ କେନ୍ଦ୍ର ପୂର୍ବାନୁମାନ କରିଛି । ଏନେଇ ରାଜ୍ୟ ଅଧିକାଂଶ ଜିଲ୍ଲାକୁ ୟେଲୋ ଓ୍ୱାର୍ଣ୍ଣିଂ ଜାରି କରିଛି ଆଞ୍ଚଳିକ ପାଣିପାଗ କେନ୍ଦ୍ର । କାରଣ ଏହି ସବୁ ଅଞ୍ଚଳରେ ୩୦ରୁ ୪୦ ମିଲିମିଟର ଯାଏଁ ବର୍ଷା ହେବା ସହ ୩୦ରୁ ୪୦ କିଲୋମିଟର ବେଗରେ ପବନ ହେବାର ସମ୍ଭାବନା ରହିଛି । ଏନେଇ ଚାଷୀ ମାନଙ୍କୁ ଧାନ ବସ୍ତା ଗୁଡ଼ିକୁ ସୁକ୍ଷୀତ ସ୍ଥାନକୁ ନେଇଯିବା ପାଇଁ କୁହାଯାଇଛି ।

ଜାଣନ୍ତୁ ଆସନ୍ତା ୩ ଦିନ ମଧ୍ୟରେ କେଉଁ କେଉଁ ସ୍ଥାନରେ ବର୍ଷା ହେବାର ସମ୍ବାବନା ରହିଛି

୬/୦୨/୨୦- କଳାହାଣ୍ଡି, ମୟୂରଭଞ୍ଜ, ଢ଼େଙ୍କାନାଳ, କେନ୍ଦୁଝର, କନ୍ଧମାଳ, ନବରଙ୍ଗପୁର ରେ ବର୍ଷା ହେବାର ସମ୍ବାବନା ରହିଛି ବୋଲି ଆଞ୍ଚଳିକ ପାଣିପାଗ କେନ୍ଦ୍ର ପୂର୍ବାରନୁମାନ କରିଛି ।

୦୭/୦୨/୨୦- ସୁନ୍ଦରଗଡ଼, ଝାରସୁଗୁଡ଼ା, ସମ୍ବଲପୁର, ବରଗଡ଼, ନୂଆପଡ଼ା, ସୋନପୁର, ଦେଓଗଡ଼, କେନ୍ଦୁଝର , ମୟୂରଭଞ୍ଜ, ଗଞ୍ଜାମ, ଗଜପତି, ରାୟଗଡ଼ାରେ ଘଡ଼ଘଡ଼ି ସହ ବର୍ଷା ହେବାର ସମ୍ଭାବନା ରହିଛି ।

୦୮/୦୨/୨୦- ଦେଓଗଡ଼, ସମ୍ବଲପୁର, ଅନୁଗୁଳ, ସୋନପୁର, ବୌଦ୍ଧରେ ଖାଲି ବର୍ଷା ହେବା ସହ କଟକ, କେନ୍ଦ୍ରାପଡ଼ା, ଜଗତସିଂହପୁର, ଖୋର୍ଦ୍ଧା, ପୁରୀ, ନୟାଗଡ଼ରେ ଘଡ଼ଘଡ଼ି ସହ ବର୍ଷା ଏବଂ ୩୦ରୁ ୪୦ କିଲୋମିଟର ବେଗରେ ପବନ ବହିବ ବୋଲି ପାଣିପାଗ  କେନ୍ଦ୍ର ପୂର୍ବାନୁମାନ କରିଛି ।

୦୯/୦୨/୨୦- ଯାଜପୁର, ଭଦ୍ରକ, କେନ୍ଦ୍ରାପଡ଼ା, ପୁରୀ, ଗଞ୍ଜାମ, ଗଜପତି, ରାୟଗଡ଼ା, କୋରାପୁଟ, କନ୍ଧମାଳ, କଳାହାଣ୍ଡିରେ ଘଡ଼ଘଡ଼ି ସହ ବର୍ଷା ଏବଂ ୩୦ରୁ ୪୦ କିଲୋମିଟର ବେଗରେ ପବନ ବହିବ ବୋଲି ପାଣିପାଗ କେନ୍ଦ୍ର ପୂର୍ବାନୁମାନ କରିଛି ।

ରାଉରକେଲା: ସାମାନ୍ୟ କଳହକୁ ନେଇ ଏସିଡ୍‌ ମାଡ଼ । ପଡ଼ୋଶୀଙ୍କ ଏସିଡ୍‌ ମାଡ଼ରେ ଗୋଟିଏ ପରିବାରର ୪ଜଣ  ଗୁରୁତର ହୋଇଛନ୍ତି । ଏଭଳି ଘଟଣା ଘଟିଛି ରାଉରକେଲା ବନ୍ଧମୁଣ୍ଡା ଅଞ୍ଚଳରେ ।

ଏସିଡ୍‌ ମାଡ଼ କରିଥିବା ଅଭିଯୁକ୍ତ ସନ୍ତୋଷ କୁମାର ବର୍ମା ଓରଫ୍‌ ସୋନିଙ୍କୁ ଅଟକ ରଖି ପଚରାଉଚରା କରୁଛି ପୋଲିସ । ସମସ୍ତ ଗୁରୁତରଙ୍କୁ ପ୍ରଥମେ ବନ୍ଧମୁଣ୍ଡା ରେଲଓ୍ୱେ ହସ୍ପିଟାଲରେ ଓ ପରେ ଇସ୍ଵାତ ଜେନେରାଲ ହସ୍ପିଟାଲରେ ଭର୍ତ୍ତି କରାଯାଇଛି ।

ତେବେ ଏସିଡ୍‌ ମାଡ଼ ପଛରେ କଳହ ନା ଆଉ କିଛି କାରଣ ରହିଛି ? ତାର ତଦନ୍ତ କରୁଛି ପୋଲିସ ।

ପିପିଲି: ପୂର୍ବ ଶତ୍ରୁତାକୁ ନେଇ ହତ୍ୟା । ପ୍ରଥମେ ଖୁଣ୍ଟରେ ବାନ୍ଧି ପିଟିଲେ । ମୁଣ୍ଡରେ ଆଘାତ ଲାଗିବାରୁ ଘଟଣାସ୍ଥଳରେ ଯୁବକଙ୍କର ମୃତ୍ୟୁ ।  ପୁରୀ କଣାସ ଥାନା ବେଣଗାଁରେ ଘଟିଛି ଏଭଳି ହତ୍ୟାକାଣ୍ଡ ।

ଗାଁର ଗୋପୀନାଥ ମହାନ୍ତିଙ୍କ ପୁଅ ରଘୁନାଥ ମହାନ୍ତିଙ୍କୁ ନିର୍ମମ ହତ୍ୟା କରିଛନ୍ତି ଦୁର୍ବୃତ୍ତ । ସଂଘବଦ୍ଧ ହୋଇ କିଛି ଯୁବକ ରଘୁନାଥଙ୍କୁ ପ୍ରଥମେ ଖୁଣ୍ଟରେ ବାନ୍ଧି ମାଡ଼ ମାରିଥିଲେ ।

ତା ପରେ ମୁଣ୍ଡରେ ଗଭୀର ଆଘାତ ଲାଗିବାରୁ ତାଙ୍କର ଘଟଣାସ୍ଥଳରେ ହିଁ ମୃତ୍ୟୁ ହୋଇଛି । ପରିବାରଲୋକ ପହଞ୍ଚିବା ବେଳକୁ ରଘୁନାଥଙ୍କ ରକ୍ତ ଜୁଡ଼ୁବୁଡ଼ୁ ମୃତଦେହ ପଡ଼ିଥିଲା ।

ହତ୍ୟାକାଣ୍ଡକୁ ନେଇ କଣାସ ଥାନାରେ ଅଭିଯୋଗ କରିଛନ୍ତି ମୃତ ରଘୁନାଥଙ୍କ ସ୍ତ୍ରୀ । ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି ପୋଲିସ ।

ଭୁବନେଶ୍ୱର: ବଦଳୁଛି ପାଗର ମିଜାଜ । ଆଉ ପାଣିପାଗର ଏଭଳି ମିଜାଜ ରାଜ୍ୟବାସୀଙ୍କ ଚିନ୍ତା ବଢାଇ ଦେଇଛି । କୋହଲା ପାଗ ଯୋଗୁଁ ଲୋକେ ଅନେକ ଅସୁବିଧାର ସମ୍ମୁଖୀନ ହେଉଥିବା ବେଳେ ଅଦିନିଆ ବର୍ଷା ଚାଷୀଙ୍କ ଚିନ୍ତା ବଢାଇ ଦେଇଛି । ଫସଲ ସହ ମଣ୍ଡିରେ ଥିବା ଧାନ ନଷ୍ଟ ହେବାର ଭୟ ଘାରିଛି ଚାଷୀଙ୍କୁ ।

ସେପଟେ ଆହୁରି ଦୁଇଦିନ ଯାଏଁ ରାଜ୍ୟର ବିଭିନ୍ନ ସ୍ଥାନରେ ବର୍ଷା ହେବ ବୋଲି ପାଣିପାଗ କେନ୍ଦ୍ର ପୂର୍ବାନୁମାନ କରିଛି । ଏନେଇ ରାଜ୍ୟ ଅଧିକାଂଶ ଜିଲ୍ଲାକୁ ୟେଲୋ ଓ୍ୱାର୍ଣ୍ଣିଂ ଜାରି କରିଛି ଆଞ୍ଚଳିକ ପାଣିପାଗ କେନ୍ଦ୍ର । ଆଜି କନ୍ଧମାଳ, ମୟୂରଭଞ୍ଜ, ଢ଼େଙ୍କାନାଳ, କେନ୍ଦୁଝର, କଳାହାଣ୍ଡି ଏବଂ ନବରଙ୍ଗପୁର ପାଇଁ ୟେଲୋ ଓ୍ୱାର୍ଣ୍ଣିଂ ରହିଛି । କାରଣ ଏହି ସବୁ ଅଞ୍ଚଳରେ ୩୦ରୁ ୪୦ ମିଲିମିଟର ଯାଏଁ ବର୍ଷା ହେବାର ସମ୍ଭାବନା ରହିଛି । ଚାଷୀ ମାନଙ୍କୁ ଧାନ ସବୁକୁ ସୁକ୍ଷୀତ ସ୍ଥାନକୁ ନେଇଯିବା ପାଇଁ କୁହାଯାଇଛି ।

ଅପରପକ୍ଷେ ଆଗାମୀ ଦିନରେ ପାଣିପାଗ ପୁଣି ବଦଳିବ ଏବଂ ତାପମାତ୍ରା କ୍ରମେ ବୃଦ୍ଧି ପାଇବ ବୋଲି ପାଣିପାଗ ବିଭାଗ ପୂର୍ବାନୁମାନ କରିଛି । ଗତକାଲି ରାତିରେ ରାଜ୍ୟର ଭିବିନ୍ନ ସ୍ଥାନରେ ଘନ କୁହୁଡ଼ିର ଆସ୍ତରଣ ଦେଖିବାକୁ ମିଳିଥିଲା । ରାତି ପ୍ରାୟ ୯ଟାରୁ କୁହୁଡ଼ି କାରଣରୁ ୨୦ରୁ ୩୦ ମିଟର ପର୍ଯ୍ୟନ୍ତ ରାସ୍ତା ଦେଖା ଯାଉନଥିଲା । ଆଜି ସକାଳୁ ମଧ୍ୟ କୁହୁଡ଼ିର ଚାଦର ତଳେ ରାଜ୍ୟର କିଛି ସ୍ଥାନ ଘୋଡ଼ାଇ ହୋଇ ରହିଥିଲା ।

ଭଞ୍ଜନଗର: ଘାଟିରେ ଝୁଲିଲା ବସ୍‌ । ବଡ଼ ଦୁର୍ଘଟଣାରୁ ଅଳ୍ପକେ ବର୍ତ୍ତିଲେ ଯାତ୍ରୀ । ଗଞ୍ଜାମ, କନ୍ଧମାଳ ସୀମାନ୍ତ ଦାରିଙ୍ଗିବାଡ଼ି ଘାଟିରେ ଟୁରିଷ୍ଟ ବସ ଦୁର୍ଘଟଣାଗ୍ରସ୍ତ ହୋଇଛି। ଭୁବନେଶ୍ୱରର ଏକ ଘରୋଇ କଲେଜ ଛାତ୍ରଛାତ୍ରୀ ପିକ୍‌ନିକ୍‌ ପାଇଁ ଦାରିଙ୍ଗବାଡ଼ି ଯାଇଥିଲେ ।

ତେବେ ଫେରୁଥିବା ସମୟକେ ଗାଡ଼ିର ଟାୟାର ଫାଟି ଯିବାରୁ ଏହା ରାସ୍ତା କଡ଼କୁ ଯାଇଥିଲା । ତେବେ ଗାଡ଼ିଟି ଘାଟି ତଳକୁ ନଖସି ଝୁଲି ରହିଥିଲା। ଗାଡ଼ିର ଜରୁରୀକାଳୀନ ଡୋର ଦେଇ ସମସ୍ତ ଛାତ୍ରଛାତ୍ରୀଙ୍କୁ ବାହାର କରାଯାଇଥିଲା ।

ସୋରଡ଼ା ପୋଲିସ ଓ ଅଗ୍ନିଶମ ବିଭାଗ ଘଟଣାସ୍ଥଳରେ ପହଞ୍ଚି ସମସ୍ତ ଯାତ୍ରୀଙ୍କୁ ଉଦ୍ଧାର କରିଥିଲେ । ଏହାପରେ ସେମାନଙ୍କୁ ଏକ ବସ୍‌ ଯୋଗେ ସୋରଡ଼ା ପହଞ୍ଚା ଯାଇଥିଲା ।