ନନ୍ଦିଘୋଷ ବ୍ୟୁରୋ : ବିଧିର ବିଧାନ ବିଚିତ୍ର । ସାତ ଜନମର ସାଥୀ ହୋଇ ବଞ୍ଚିଥିଲେ । ଇହଧାମ ତ୍ୟାଗ ପରେ ବି ସେମାନେ ହୋଇଗଲେ ସାତ ଜନମର ସାଥୀ । ଏହି ଆଶ୍ଚର୍ଯ୍ୟଜନକ ଘଟଣା ଘଟିଛି ଅହମ୍ମଦାବାଦ ସିଭିଲ ହସ୍ପିଟାଲରେ । ବିମାନ ଦୁର୍ଘଟଣା ପରେ ସେଠାର ଚାଲିଛି ଡିଏନଏ ମେଳ ପ୍ରକ୍ରିୟା । ବିମାନ ଦୁର୍ଘଟଣାରେ ପ୍ରାଣ ହରାଇଥିଲେ ଅଶୋକଭାଇ ପଟେଲ ଓ ଶୋଭନାବେନ ପଟେଲ । ଏହି ଦମ୍ପତିଙ୍କ ମୂଳ ରାଜ୍ୟ ଗୁଜରାଟ । ସେମାନେ ୧୯୭୮ରୁ ବ୍ରିଟେନରେ ରହିଆସୁଥିଲେ । ତେବେ ଗତ ଜୁନ ୧୨ ପ୍ଲେନକ୍ରାସରେ ସେମାନେ ଆରପାରିକୁ ଚାଲିଯାଇଥିଲେ । ମରଶରୀରଗୁଡିକୁ ଚିହ୍ନଟ ସକାଶେ ଡିଏନଏ ନମୁନା ଲାଗି ଲଣ୍ଡନରେ ରହୁଥିବା ପୁଅ ମିତେନ ପଟେଲଙ୍କୁ ହସ୍ପିଟାଲ କର୍ତ୍ତୃପକ୍ଷ ଡାକିଥିଲେ । ଡକରା ପାଇବା ପରେ ମିତେନ ଓ ଭାଇ ହେମେନ ହସ୍ପିଟାଲକୁ ଆସିଥିଲେ । ଲଣ୍ଡନରେ ଥିବା ପୁଅଙ୍କୁ ଗତ ଜୁନ ୧୫ରେ ଅର୍ଥାତ ପିତୃଦିବସରେ ଯାଇଥିଲା ଫୋନ । ସେମାନେ ଫେରିବା ପରେ ଡିଏନଏ ଟେଷ୍ଟ କରାଯାଇଥିଲା । ବାପା ଅଶୋକଭାଇଙ୍କ ଡିଏନଏ ମେଳ ଖାଇବାରୁ ତାଙ୍କ ମରଶରୀର ନେବା ଲାଗି ପୁଅଙ୍କୁ ଅନୁମତି ମିଳିଥିଲା । ଉଭୟ ବାପା, ମାଙ୍କ ମରଶରୀର ଲଣ୍ଡନ ନେବା ଲାଗି ଦୁଇ ପୁଅ ଯୋଜନା କରିଥିଲେ । ତେବେ ମାଆଙ୍କ ମରଶରୀରକୁ ପାଇବା ଏକ ବଡ଼ ପ୍ରଶ୍ନ ଥିଲା । ମାଆଙ୍କ ମରଶରୀର ନ ପାଇ ସେମାନେ ବାପାଙ୍କ ମରଶରୀର ଧରି ଫେରିବା ଲାଗି ନିଷ୍ପତ୍ତି ନେଇଥିଲେ । ତେବେ ସେମାନେ ଦେଖିଥିଲେ ବର୍ତ୍ତମାନ ସୁଦ୍ଧା ୯୮ଟି ମରଶରୀରକୁ ଚିହ୍ନଟ କରାଯାଇଛି । 98ତମ ଚିହ୍ନଟ ନମୁନା ହେଉଛି ତାଙ୍କ ବାପାଙ୍କର । ଡିଏନଏ ଚିହ୍ନଟ ଏକ ବିଳମ୍ବିତ ପ୍ରକ୍ରିୟା ହୋଇଥିବାରୁ ସେମାନେ କେବଳ ବାପାଙ୍କ ଦେହାବଶେଷ ଧରି ଫେରୁଥିଲେ । ବାପାଙ୍କ ମରଶରୀର ଧରି ଫେରୁଥିବାବେଳେ ହଠାତ୍ ହସ୍ପିଟାଲରୁ ଆସିଥିଲା ଫୋନ । ଡିଏନଏ ମେଳଖାଇଥିବା ୯୯ତମ ବ୍ୟକ୍ତି ଥିଲେ ଶୋଭନାବେନ । ଦୁଇ ଭାଇ ଏହା ଶୁଣି ହତବାକ ହୋଇଯାଇଥିଲେ । ସେମାନେ ତୁରନ୍ତ ହସ୍ପିଟାଲ ଯାଇ ବୁଲେଟିନ ବୋର୍ଡରେ ୯୯ତମ ମୃତକଙ୍କ ନାମ ତାଙ୍କ ମା ବୋଲି ଜାଣିଲେ । ବଞ୍ଚିଥିବାବେଳେ ବାପା-ମା ହୋଇଥିଲେ ସାତ ଜନମର ସାଥୀ । ମଲାପରେ ବି ସେମାନେ ସାଜିଥିଲେ ସାତ ଜନମର ସାଥୀ ।
ଭାରତ ବିରୋଧରେ ପୁଣି କହିଲେ ପାକିସ୍ତାନ ଆର୍ମି ଚିଫ ଅସୀମ ମୁନୀର
ନନ୍ଦିଘୋଷ ବ୍ୟୁରୋ : ଭାରତ ବିରୋଧରେ ପୁଣି କହିଲେ ପାକିସ୍ତାନ ଆର୍ମିଚିଫ ଅସୀମ ମୁନୀର । ଓ୍ବାଶିଂଟନ ଗସ୍ତରେ ଥିବା ମୁନୀର ଖୋଲାଖୋଲି ଇରାନ ସହ ରହିଥିବା କହିବା ସହ ଖୁବ୍ ଶୀଘ୍ର ଇସ୍ରାଏଲ-ଇରାନ ଉତ୍ତେଜନା ଥମିବ ବୋଲି କହିଛନ୍ତି । ଆମେରିକୀୟ ପାକିସ୍ତାନୀଙ୍କୁ ଉଦବୋଧନ ଦେଇ ମୁନୀର କହିଛନ୍ତି- ଭାରତ ବିରୋଧରେ ପାକିସ୍ତାନର ବିଜୟ ହୋଇଛି । ନିଜ ଅଭିଭାଷଣରେ ସେ ନିମ୍ନମାନର କୂଟନୀତିକୁ ସମାଲୋଚନା କରିବା ସହ ବିଶ୍ବ ସମୁଦାୟଙ୍କୁ ପ୍ରଭାବିତ କରିବାରେ ଭାରତ ସଫଳ ହୋଇଥିବାବେଳେ ପାକିସ୍ତାନ ବିଫଳ ହୋଇଛି ବୋଲି କହିଥିଲେ । ପାକିସ୍ତାନରେ ରାଜନୈତିକ ଓ ସାମରିକ ନେତୃତ୍ବର ଏକତାକୁ ସେ ପ୍ରାଧାନ୍ୟ ଦେବା ସହ ଉଭୟକୁ ଶରୀର ଓ ଆତ୍ମା ବୋଲି ତୁଳନା କରିଥିଲେ । ପାକିସ୍ତାନର ସହାୟତା ପାଉଥିବା ବିଷୟକୁ ଖୋଲାଖୋଲି ସ୍ବୀକାର କରିବା ସହ ସେ ଦେଶର ଅର୍ଥନୀତିକୁ ଶକ୍ତ କରିବା ଲାଗି ପାକିସ୍ତାନ ନିକଟରେ ସମ୍ବଳ ରହିଛି ବୋଲି କହିଥିଲେ । ସେପଟେ ମୁନୀର ଓ୍ବାଶିଂଟନର ଏକ ହୋଟେଲରେ ପହଞ୍ଚିବା ମାତ୍ରେ କିଛି ଲୋକ ତାଙ୍କୁ ଗଣହତ୍ୟାକାରୀ ବୋଲି କହିବା ସହ ତାଙ୍କୁ ବିରୋଧ କରିଥିଲେ । ନିଜର କହିବାର ଅଧିକାର ରହିଛି ବୋଲି ଆନ୍ଦୋଳନକାରୀ ମତ ଦେଇଥିଲେ । ଆମେରିକା ଓ ପାକିସ୍ତାନ ମଧ୍ୟରେ ସାମରିକ ଓ କୌଶଳଗତ ସମ୍ପର୍କକୁ ମଜଭୁତ କରିବା ଉଦ୍ଦେଶ୍ୟରେ ପାଞ୍ଚ ଦିନିଆ ଆମେରିକା ଗସ୍ତରେ ଅଛନ୍ତି ମୁନୀର । ତେବେ ଆମେରିକା ସେନାର ୨୫୦ ବର୍ଷ ପୂର୍ତ୍ତି ଉତ୍ସବରେ ସେ ସାମିଲ ହୋଇନଥିବା ଜଣାଯାଇଛି । ସେପଟେ ଆଜି ଆମେରିକା ରାଷ୍ଟ୍ରପତି ଡୋନାଲଡ ଟ୍ରମ୍ପ, ବୈଦେଶିକ ସଚିବ ମାର୍କୋ ରୁବିଓ, ପ୍ରତିରକ୍ଷା ସଚିବ ପିଟି ହେଗସେଥଙ୍କ ସହ ମୁନୀର ସାକ୍ଷାତ କରିବା କାର୍ଯ୍ୟକ୍ରମ ରହିଛି ।
ସମ୍ବଲପୁରରେ ଚାଷୀ ଧାନ ବିକି ପାରୁନି, ବର୍ଷାରେ ଭିଜୁଛି ଧାନ
ସମ୍ବଲପୁର : ସମ୍ବଲପୁର ଜିଲ୍ଲାର ଚାଷୀଙ୍କୁ ଠକି ଦେଲେ ରାଜ୍ୟ ସରକାର। ସମ୍ବଲପୁର ଜିଲ୍ଲାରେ ଗତକାଲିଠୁ ବର୍ଷା ଲାଗିରହିଥିବା ବେଳେ ଲଗାଣ ବର୍ଷାରେ ଭିଜୁଛି ଚାଷୀର ଧାନ। ଉପଯୁକ୍ତ ସମୟରେ ଚାଷୀ ଧାନ ବିକ୍ରି ପାଇଁ ଟାର୍ଗେଟ ଆସୁନଥିବାରୁ ଧାନ ବିକ୍ରି କରିନପାରି ଏବେ ବର୍ଷାରେ ଭିଜୁଚି। ସମ୍ବଲପୁର ଜିଲ୍ଲାରେ ଟାର୍ଗେଟ ପାଇଁ ବାରମ୍ବାର ଦାବି ହେଉଥିବା ବେଳେ ସରକାର ପ୍ରତିଶ୍ରୁତି ଦେବାପରେ ମଧ୍ୟ ଟାର୍ଗେଟ ଆସି ପାରିଲା ନାହିଁ। ଖାଦ୍ୟ ଓ ଯୋଗାଣ ମନ୍ତ୍ରୀ ଆସିଲେ କଥା ଦେଲେ ତାପରେ ବି ଚାଷୀ ଧାନ ବିକି ପାରୁନି।
ଯାଜପୁରରେ ହଇଜାରେ ଆଉ ୨ ଜଣଙ୍କ ମୃତ୍ୟୁ
ଯାଜପୁର : ଯାଜପୁରରେ ହଇଜାରେ ଆଉ ୨ ଜଣଙ୍କ ମୃତ୍ୟୁ। ଏହା ସହିତ ମୃତ୍ୟୁ ସଂଖ୍ୟା ୧୮କୁ ବୃଦ୍ଧି ପାଇଛି। ଏବେ ବି ୨୧୦ ଆକ୍ରାନ୍ତ ଚିକିତ୍ସିତ ହେଉଛନ୍ତି। ଯାଜପୁର ଜିଲ୍ଲା ମୁଖ୍ୟ ଚିକିତ୍ସାଳୟରେ ୮୦ ଜଣ ଆକ୍ରାନ୍ତ ଚିକିତ୍ସିତ ହେଉଥିବା ବେଳେ ବ୍ୟାସନଗର ଯାଜପୁର ରୋଡ଼ ଅର୍ବାନ ସି ଏଚ ସିରେ ଦୁଇ ଜଣଙ୍କର ମୃତ୍ୟୁ ଘଟିଛି। ମୃତକ ହେଲେ ବର୍ଷକର ଶିଶୁ କନ୍ୟା ସୁଧୀନି ମୁର୍ମୁ ଓ ୨୫ ବର୍ଷର ପୂଜା ସାମାଡ଼। ଉଭୟେ ବ୍ୟାସନଗର ଚୂନଭାଟି ଅଞ୍ଚଳର। ଗୁରୁତର ଅବସ୍ଥାରେ ବ୍ୟାସନଗର ମେଡ଼ିକାଲରେ ଭର୍ତ୍ତି ହୋଇଥିଲେ ପୂଜା ସାମାଡ଼। ଚିକିତ୍ସା ଧୀନ ଅବସ୍ଥାରେ ତାଙ୍କର ମୃତ୍ୟୁ ଘଟିଛି।
ଲାଲବାହିନୀକୁ ବଡ଼ ଝଟକା, ଏନକାଉଣ୍ଟରରେ ଟଳିଲେ ୩ ହାର୍ଡକୋର ନକ୍ସଲ
ନନ୍ଦିଘୋଷ ବ୍ୟୁରୋ : ଲାଲବାହିନୀକୁ ବଡ଼ ଝଟକା। ଆନ୍ଧ୍ରରେ ଏନକାଉଣ୍ଟର, ଟଳିଲେ ୩ ହାର୍ଡକୋର ନକ୍ସଲ। ନିହତଙ୍କ ମଧ୍ୟରେ ଅଛନ୍ତି ସେଣ୍ଟ୍ରାଲ କମିଟି ମେମ୍ଵର ଗାଜେର୍ଲା ଉଦୟ।। ସେହିପରି ଆନ୍ଧ୍ର ଓଡିଶା ସ୍ପେସିଆଲ ଜୋନାଲ କମିଟି ମେମ୍ବର ଅରୁଣା ବି ନିହତ ହୋଇଛନ୍ତି। ସେ ଟପ୍ ମାଓନେତା ଚଲାପତିଙ୍କ ସ୍ତ୍ରୀ। ଆଗରୁ ଚଲାପତି ବି ସୁରକ୍ଷାକର୍ମୀଙ୍କ ଗୁଳିରେ ନିହତ ହୋଇଥିଲେ। ଏହା ସହିତ ଆନ୍ଧ୍ର ଓଡ଼ିଶା ଜୋନାଲ କମିଟି ସଦସ୍ୟ ଅଞ୍ଜୁ ମଧ୍ୟ ଏହି ଏନକାଉଣ୍ଟରରେ ନିହତ ହୋଇଛନ୍ତି। ଆନ୍ଧ୍ର ଆଲ୍ଲୁର ସୀତାରାମ ରାଜୁ ଜିଲ୍ଲାର କଣ୍ଡାମଦୁଲୁ ଦେବୀ ପାଟଣା ନିକଟ ଜଙ୍ଗଲରେ ସୁରକ୍ଷାକର୍ମୀଙ୍କ ଗୁଳିରେ ୩ ଟପ୍ ନକ୍ସଲ ନିହତ ହୋଇଛନ୍ତି। ଘଟଣାସ୍ଥଳରୁ ଦୁଇଟି ଏକେ ୪୭ ରାଇଫଲ ଓ ବହୁ ମାଓ ସାମଗ୍ରୀ ଜବତ ହୋଇଛନ୍ତି। ମାଓନେତା ଉଦୟ ନାଁରେ ୪୦ ଲକ୍ଷ ଟଙ୍କାର ପୁରସ୍କାର ଥିଲା। ସେହିପରି ଅରୁଣା ନାଁରେ ଥିଲା ୨୦ ଲକ୍ଷ ଟଙ୍କାର ପୁରସ୍କାର।
ତୀବ୍ର ହେବାରେ ଲାଗିଛି ମଧ୍ୟପ୍ରାଚ୍ୟ ସଙ୍କଟ, କେମିତି ଆସିବେ ଭାରତୀୟ?
ନନ୍ଦିଘୋଷ ବ୍ୟୁରୋ : ତୀବ୍ର ହେବାରେ ଲାଗିଛି ମଧ୍ୟପ୍ରାଚ୍ୟ ସଙ୍କଟ। ଇସ୍ରାଏଲ-ଇରାନ ମଧ୍ୟରେ ବଢୁଛି ଉତ୍ତେଜନା। ସେପଟେ ଇରାନରେ ଥିବା ୧୦ ହଜାର ଭାରତୀୟ ଛାତ୍ର, କର୍ମଚାରୀଙ୍କୁ ଭାରତ ଆଣିବା ଲାଗି ବଢିଲା ଚିନ୍ତା। ଭୌଗଳିକ କାରଣ ସମେତ ଏୟାରସ୍ପେସ କଟକଣା, କୂଟନୈତିକ ତିକ୍ତତା କାରଣରୁ ସେମାନଙ୍କୁ ଉଦ୍ଧାର କରିବା କଷ୍ଟସାଧ୍ୟ ହୋଇପାରେ। ଏହି ୧୦ ହଜାର ଭାରତୀୟଙ୍କ ମଧ୍ୟରୁ ପ୍ରାୟ ୨ ହଜାର ହେଉଛନ୍ତି ଛାତ୍ର। ୬ ହଜାର ହେଉଛନ୍ତି କର୍ମଚାରୀ। ଏହା ସହ ବହୁ ସଂଖ୍ୟକ ଭାରତୀୟ ନାବିକ ବି ରହୁଛନ୍ତି। ରୁଷ-ୟୁକ୍ରେନ ଯୁଦ୍ଧ ସମୟରେ ଯେପରି ଭାରତୀୟ ଛାତ୍ରଙ୍କୁ ଆଣିବା ଲାଗି ଅପରେସନ ଗଙ୍ଗା ହୋଇଥିଲା ଠିକ୍ ସେପରି ଇରାନ କ୍ଷେତ୍ରରେ ଘଟିବା ଆଶା କରାଯାଉଛି। ଭାରତୀୟଙ୍କୁ ପାକିସ୍ତାନ ଓ ଆଫଗାନିସ୍ତାନ ଦେଇ ବିମାନରେ ଆଣିବା ଠିକ୍ ହୋଇ ନପାରେ। କାରଣ ଭାରତ ଲାଗି ଏୟାର ସ୍ପେସ୍ ବନ୍ଦ କରିଛି ପାକିସ୍ତାନ। ଇରାନ ଉପରେ ଇସ୍ରାଏଲ ବିଭିନ୍ନ ଦିଗରୁ ଆକାଶମାର୍ଗରୁ ଆକ୍ରମଣ କରୁଥିବାରୁ ଭାରତୀୟ ବିମାନ ଲାଗି ଅସୁବିଧା ଆସିପାରେ। ୟୁକ୍ରେନ କ୍ଷେତ୍ରରେ ରେଳ, ରୋଡର ଆଦିର ସୁବିଧା ଥିଲା। ମାତ୍ର ଇରାନ କ୍ଷେତ୍ରରେ ତାହା ସମ୍ଭବ ନୁହେଁ। ତେହରାନ ଛାଡ଼ିବା ଲାଗି ଭାରତୀୟ ଦୂତାବାସ ପକ୍ଷରୁ ଭାରତୀୟମାନଙ୍କୁ ବି କୁହାଯାଇଛି। ବର୍ତ୍ତମାନ ସୁଦ୍ଧା ୧୧୦ ଜଣଙ୍କୁ ଆର୍ମେନିଆ ଦେଇ ଭାରତ ଅଣାଯାଉଛି। ପ୍ରାୟ ୭୦୦ ଲୋକ କେନ୍ଦ୍ରୀୟ ଇରାନରୁ ନିରାପଦ କୁହାଯାଉଥିବା କୋମ୍ ସହରକୁ ଚାଲିଗଲେଣି। ଆର୍ମେନିଆ, ଆଜରବୈଜାନ, ତୁର୍କମେନିସ୍ତାନ, ଆଫଗାନିସ୍ତାନ ଓ ପାକିସ୍ତାନକୁ ଲାଗି ରହିଛି ଇରାନ। ଅପରେସନ ସିନ୍ଦୂରକୁ କେନ୍ଦ୍ର କରି ଭାରତ ଲାଗି ଏୟାର ସ୍ପେସ ବନ୍ଦ କରିଛି ପାକିସ୍ତାନ।
ସୁଧୁରିଲା ଭାରତ-କାନାଡ଼ା ସଂପର୍କ, ଦୁଇ ଦେଶ ପୁଣି ଥରେ ରାଷ୍ଟ୍ରଦୂତ ନିଯୁକ୍ତ କରିବାକୁ ରାଜି
ନନ୍ଦିଘୋଷ ବ୍ୟୁରୋ : ସୁଧୁରିଲା ଭାରତ-କାନାଡ଼ା ସଂପର୍କ। ଦୁଇ ଦେଶ ପୁଣି ଥରେ ରାଷ୍ଟ୍ରଦୂତ ନିଯୁକ୍ତ କରିବାକୁ ରାଜି ହୋଇଛନ୍ତି। ମୋଦିଙ୍କ କାନାଡ଼ା ଗସ୍ତରେ ସେଠାକାର ପ୍ରଧାନମନ୍ତ୍ରୀ ମାର୍କ କାର୍ନିଙ୍କ ସହ ଆଲୋଚନା ପରେ ଏହି ନିଷ୍ପତ୍ତି ନିଆଯାଇଛି। ଏକ ଗୁରୁତ୍ୱପୂର୍ଣ୍ଣ କୂଟନୈତିକ ନିଷ୍ପତ୍ତି ଭାବେ ଭାରତ ଏବଂ କାନାଡା ପରସ୍ପରର ରାଜଧାନୀରେ ହାଇକମିଶନରଙ୍କୁ ପୁନଃସ୍ଥାପିତ କରିବାକୁ ରାଜି ହୋଇଛନ୍ତି। ଏ ସଂପର୍କରେ ସୂଚନା ଦେଇଛନ୍ତି ବୈଦେଶିକ ସଚିବ ବିକ୍ରମ ମିଶ୍ରି। ଅନ୍ୟାନ୍ୟ କୂଟନୈତିକ ପଦକ୍ଷେପ ଯଥାଶୀଘ୍ର ଗ୍ରହଣ କରାଯିବ। ଗତ ବର୍ଷ ଜଷ୍ଟିନ୍ ଟ୍ରୁଡୋଙ୍କ ପ୍ରଧାନମନ୍ତ୍ରୀତ୍ୱ ସମୟରେ , ବ୍ରିଟିଶ୍ କଲମ୍ବିଆରେ ଖଲିସ୍ତାନୀ ଆତଙ୍କବାଦୀ ହରଦୀପ ସିଂହ ନିଜ୍ଜରଙ୍କ ହତ୍ୟାକୁ ନେଇ ଦୁଇ ଦେଶର ସଂପର୍କରେ ତିକ୍ତତା ଆସିଥିଲା। ନିର୍ଜରଙ୍କ ହତ୍ୟା ପାଇଁ ଭାରତକୁ ଦାୟୀ କରିଥିଲେ ଜଷ୍ଟିନ। ବିବାଦ ଏମିତି ହୋଇଥିଲା ଯେ, ଉଭୟ ଦେଶ ପରସ୍ପରର ହାଇକମିଶନର ଓ କୂଟନୀତିଜ୍ଞଙ୍କୁ ବହିଷ୍କାର କରିଥିଲେ।
ଘନେଇଲା ଇରାନ-ଇସ୍ରାଏଲ ଯୁଦ୍ଧ, ହାଇପରସୋନିକ ମିସାଇଲ ମାଡ଼ କଲା ଇରାନ
ନନ୍ଦିଘୋଷ ବ୍ୟୁରୋ : ଆହୁରି ଘନେଇଲା ମଧ୍ଯପ୍ରାଚ୍ୟ ସଙ୍କଟ। ଇରାନ ଓ ଇସ୍ରାଏଲ ମଧ୍ୟରେ ଘମାଘୋଟ ଯୁଦ୍ଧ। ଇସ୍ରାଏଲ ଉପରେ ହାଇପରସୋନିକ ମିସାଇଲ ମାଡ଼ କରିଛି ଇରାନ। ରାଜଧାନୀ ତେଲ ଅଭିଭକୁ ଟାର୍ଗେଟ କରି ଏହି ମିସାଇଲ ମାଡ଼ କରାଯାଇଛି। ପ୍ରଥମ ଥର ପାଇଁ ଏପରି ଅତ୍ୟାଧୁନିକ ହାଇପରସୋନିକ ମିସାଇଲ ମାଡ଼ କରିଛି ତେହେରାନ। ଦୁଇ ଦେଶ ମଧ୍ୟରେ ଯୁଦ୍ଧ ଷଷ୍ଠ ଦିନରେ ପହଞ୍ଚିଛି। ଉଭୟ ତେହେରାନ ଓ ତେଲ ଅଭିଭରେ ଶୁଭିଛି ବିସ୍ଫୋରଣ ଶବ୍ଦ। ସେପଟେ ଇରାନର ସାମରିକ ସଂସ୍ଥା ଉପରେ ଆକ୍ରମଣ କରିଛି ଇସ୍ରାଏଲ। ଉତ୍ତେଜନା ହ୍ରାସ ପାଇଁ ବାରମ୍ବାର ଅନ୍ତର୍ଜାତୀୟ ଆହ୍ୱାନ ସତ୍ତ୍ୱେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଇରାନକୁ କଡ଼ା ଚେତାବନୀ ଦେବାରୁ ଉତ୍ତେଜନା ବୃଦ୍ଧି ପାଇଛି। ନିସର୍ତ୍ତ ଆତ୍ମସମର୍ପଣ ପାଇଁ ଇରାନକୁ ଚେତାବନୀ ଦେଇଛି ଆମେରିକା। ଏପରି କୁହାଯାଉଛି ଇସ୍ରାଏଲ ସହିତ ଆକ୍ରମଣରେ ଆମେରିକା ମଧ୍ୟ ଯୋଗ ଦେବ। ଆମେରିକା ଅଧିକ ଲଢୁଆ ବିମାନ ମଧ୍ୟ ପଠାଇଥିବାର ସୂଚନା ମିଳିଛି।
ବିବାହର ୧୦ ଦିନ ପରେ ସ୍ତ୍ରୀକୁ ପ୍ରେମିକ ହାତରେ ଟେକିଦେଲେ ସ୍ବାମୀ
ନନ୍ଦିଘୋଷ ବ୍ୟୁରୋ : ମେରଠର ସୌରଭ ରାଜପୁତ ହତ୍ୟା ମାମଲା ହେଉ କିମ୍ବା ଇନ୍ଦୋରର ରାଜା ରଘୁବଂଶୀ ହତ୍ୟା ମାମଲା। ଏହି ଦୁଇଟି ମାମଲା ସାମ୍ନାକୁ ଆସିବା ପରେ ସ୍ୱାମୀମାନଙ୍କ ମଧ୍ୟରେ ଏକ ଅଜବ ଭୟ ସୃଷ୍ଟି ହୋଇଛି। କୌଣସି ସ୍ଥାନରେ ସ୍ୱାମୀମାନେ ଭୟ କରୁଛନ୍ତି ଯେ ସେମାନଙ୍କ ସ୍ତ୍ରୀମାନେ ସେମାନଙ୍କ ସହିତ ସମାନ ବ୍ୟବହାର କରିପାରନ୍ତି। ଉତ୍ତର ପ୍ରଦେଶର ଚନ୍ଦୌଲିରେ, ଜଣେ ସ୍ୱାମୀ ବିବାହର ମାତ୍ର ୧୦ ଦିନ ପରେ ଚୁପଚାପ୍ ତାଙ୍କ ସ୍ତ୍ରୀଙ୍କୁ ତାଙ୍କ ପ୍ରେମିକଙ୍କୁ ହସ୍ତାନ୍ତର କରିଦେଲେ। ସେ କହିଲେ – ମୁଁ ନା ରାଜା ରଘୁବଂଶୀ ହେବାକୁ ଚାହୁଁଛି ନା ସୌରଭ ରାଜପୁତ। ପ୍ରକୃତରେ, ବିବାହ ବାହାର ସମ୍ପର୍କ ଯୋଗୁଁ ଉଭୟଙ୍କୁ ସେମାନଙ୍କ ସ୍ତ୍ରୀମାନେ ହତ୍ୟା କରିଥିଲେ।
ଘଟଣାଟି ମୁଗଲସରାଇ କୋତୱାଲି ଅଞ୍ଚଳର ସୈଦପୁରା ଗାଁର। ଏଠାରେ ରହୁଥିବା ଯୁବକ ଶମଶେର ଜୁନ୍ ୪ ତାରିଖରେ ମୱାଇ ଖୁର୍ଦର ଝିଅ ଖୁସିଙ୍କୁ ବିବାହ କରିଥିଲେ। ବିବାହ ପରେ, ଯେତେବେଳେ ଅତିଥିମାନେ ଘରୁ ବାହାରିଗଲେ, ନବବିବାହିତା କନ୍ୟା ତାଙ୍କ ସ୍ୱାମୀଙ୍କ ପାଖରେ ବାହାରେ ରହିବାକୁ ଇଚ୍ଛା କଲେ। ଏହା ପରେ, ଜୁନ୍ ୧୪ ତାରିଖରେ ଦୁହେଁ ମୁଗଲସରାଇ ଆସିଥିଲେ। ସେଠାରେ ଚାଟ ଖାଇବା ସମୟରେ ହତାଠ ମହିଳା ଜଣଙ୍କ ନିଖୋଜ ହୋଇଗଲେ । ବହୁ ଖୋଜାଖୋଜି କରିବା ପରେ ତାଙ୍କୁ ପାଇଲେ ନାହିଁ । ଘରକୁ ଫେରିଆସିଲେ ।
ତା’ପରେ ସ୍ୱାମୀ ମୁଗଲସରାଇ ଥାନାରେ ତାଙ୍କ ସ୍ତ୍ରୀଙ୍କ ନିଖୋଜ ରିପୋର୍ଟ ଦାଖଲ କରିଥିଲେ। ଅଭିଯୋଗ ଆଧାରରେ, ପୋଲିସ ଏକ ନିଖୋଜ ରିପୋର୍ଟ ରୁଜୁ କରି ମାମଲାର ତଦନ୍ତ ଆରମ୍ଭ କରିଥିଲା। ମଙ୍ଗଳବାର ଦିନ, ପୋଲିସ ବିବାହିତ ମହିଳାଙ୍କୁ ତାଙ୍କ ପ୍ରେମିକଙ୍କ ସହ ବାରାଣସୀରୁ ଉଦ୍ଧାର କରିଥିଲା। ଏହା ପରେ ତାଙ୍କ ସ୍ୱାମୀଙ୍କୁ ସୂଚନା ଦିଆଯାଇଥିଲା। ସୂଚନା ପାଇ ସ୍ୱାମୀ ଶମଶେର ତାଙ୍କ ପରିବାର ସହିତ ମୁଗଲସରାଇ ଥାନାରେ ପହଞ୍ଚିଥିଲେ। ସେଠାରେ ଆଲୋଚନା ଚାଲିଲା । ଏହା ପରେ ମହିଳା ଜଣଙ୍କ ତାଙ୍କ ପ୍ରେମିକ ସହ ଯିବାକୁ ଜିଦ କରିଥିଲେ । ଏହା ପରେ ସମ୍ମତି କ୍ରମେ ପ୍ରେମିକ ପାଖକୁ ପଠାଇଥିଲା ପୋଲିସ ।
ଦ୍ବିତୀୟ ସ୍ବାମୀ କଥାରେ ଛୁଆର ଗଳା କାଟିଲା ମାଆ
ନନ୍ଦିଘୋଷ ବ୍ୟୁରୋ : ଉତ୍ତର ପ୍ରଦେଶର ଜୌନପୁରରେ ଜଣେ ମାଆ ତାର ପିଲାକୁ ଗଳାକାଟି ହତ୍ୟା କରିଛି । କାରଣ ମହିଳାଙ୍କ ଦ୍ୱିତୀୟ ସ୍ୱାମୀ ତାଙ୍କ ପିଲାକୁ ତାଙ୍କ ପାଖରେ ରଖିବାକୁ ଚାହୁଁ ନଥିଲେ। ତେଣୁ ମହିଳା ଜଣକ ତାଙ୍କ ଦ୍ୱିତୀୟ ସ୍ୱାମୀଙ୍କ ସହିତ ରହିବା ପାଇଁ ନିଜ ୪ ବର୍ଷର ନିର୍ଦ୍ଦୋଷ ଶିଶୁକୁ ହତ୍ୟା କଲେ।
ଜୌନପୁରର ମିରଗଞ୍ଜ ଥାନା ଅଞ୍ଚଳର ଗୋଧନାରୁ ଏହି ମାମଲା ସାମ୍ନାକୁ ଆସିଛି। ମିରଗଞ୍ଜର ବାରଭାନରେ ରହୁଥିବା ରେଶମା ୫ ବର୍ଷ ପୂର୍ବେ ୱାହିଦ ଅଲି ନାମକ ଜଣେ ବ୍ୟକ୍ତିଙ୍କୁ ବିବାହ କରିଥିଲେ। କିନ୍ତୁ ସେମାନଙ୍କ ସମ୍ପର୍କ ଅଧିକ ଦିନ ତିଷ୍ଠି ପାରିଲା ନାହିଁ ଓ ସେମାନେ ଅଲଗା ହୋଇଗଲେ। ସେମାନଙ୍କର ଏକ ୪ ବର୍ଷର ନିର୍ଦ୍ଦୋଷ ପୁଅ ଇଲିଆସ୍ ଥିଲା, ଯାହାକୁ ରେଶମା ତାଙ୍କ ଦ୍ୱିତୀୟ ସ୍ୱାମୀଙ୍କ ସହିତ ମିଶି ହତ୍ୟା କରିଥିଲେ।
ୱାହିଦଙ୍କଠାରୁ ଅଲଗା ହେବା ପରେ, ରେଶମା ଜଗଦୀଶପୁରର ବାସିନ୍ଦା ଶକିଲଙ୍କୁ ବିବାହ କରିଥିଲେ ଓ ୱାହିଦ ମଧ୍ୟ ଅନ୍ୟ କାହାକୁ ବିବାହ କରିଥିଲେ। ଶିଶୁ ଇଲିଆସ୍ ତାଙ୍କ ମାଆଙ୍କ ସହିତ ରହୁଥିଲେ। କିନ୍ତୁ ଶକିଲ୍, ଅର୍ଥାତ୍ ରେଶମାଙ୍କ ଦ୍ୱିତୀୟ ସ୍ୱାମୀ, ଏହାକୁ ପସନ୍ଦ କରିନଥିଲେ। ସେ ରେଶମାଙ୍କ ପ୍ରଥମ ସ୍ୱାମୀଙ୍କ ସନ୍ତାନକୁ ନିଜ ପାଖରେ ରଖିବାକୁ ଚାହୁଁ ନଥିଲେ। ତେଣୁ, ଦୁହେଁ ଇଲିଆସଙ୍କ ହତ୍ୟା କରିବାର ଯୋଜନା କରିଥିଲେ ଓ ନିର୍ଦ୍ଦୋଷ ଶିଶୁଟିକୁ ଗଳାକାଟି ହତ୍ୟା କରିଥିଲେ।
ରେଶମା ଶକୀଲଙ୍କ ସହିତ ଗୋଧନାରେ ଏକ ଭଡା ଘରେ ରହୁଥିଲେ। ୱାହିଦ ରେଶମାଙ୍କୁ ଇଲିଆସ୍ ପାଇଁ ଅନୁରୋଧ କରିଥିଲେ। କିନ୍ତୁ ସେ ପିଲାଟିକୁ ୱାହିଦକୁ ଦେବାକୁ ଚାହୁଁ ନଥିଲେ। ଇଲିଆସଙ୍କୁ ହତ୍ୟା କରିବା ପରେ, ରେଶମା-ଶକୀଲଙ୍କ ସହ ମୃତଦେହକୁ ତାଙ୍କ ମାଆ ଘରକୁ ନେଇଗଲେ । ଯେତେବେଳେ ୱାହିଦ ସେଠାକୁ ଦେଖିବାକୁ ଆସିଲେ । ସେ ଶକୀଲ୍ ଓ ରେଶମା ଶିଶୁଟିକୁ ହତ୍ୟା କରିଥିବା ଅଭିଯୋଗ କଲେ। କାରଣ ପିଲାଟିର ବେକରେ ଚିହ୍ନ ଥିଲା। ୱାହିଦ୍ ମିରଗଞ୍ଜ ଥାନାରେ ଉଭୟଙ୍କ ବିରୁଦ୍ଧରେ ମାମଲା ଦାୟର କରିଥିଲେ।
ଏହା ପରେ, ମୀରଗଞ୍ଜ ଥାନାଅଧିକରୀ ବିନୋଦ ଘଟଣାସ୍ଥଳ ପହଞ୍ଚି ମୃତଦେହକୁ ପୋଷ୍ଟମର୍ଟମ ପାଇଁ ପଠାଯାଇଥିଲେ । ରେଶମା ଓ ଶକିଲଙ୍କୁ ପଚରାଉଚରା ପାଇଁ ନେଇଥିଲେ । ଯେଉଁଠାରେ ଉଭୟେ ସେମାନଙ୍କର ଅପରାଧ ସ୍ୱୀକାର କରିଥିଲେ। ରେଶମା କହିଥିଲେ ଯେ ତାଙ୍କ ଦ୍ୱିତୀୟ ସ୍ୱାମୀ ସନ୍ତାନ ପାଇବାକୁ ଚାହୁଁ ନଥିଲେ। ତେଣୁ ଉଭୟ ଷଡ଼ଯନ୍ତ୍ର କରି ତାଙ୍କୁ ଗାମୁଛା ସାହାଯ୍ୟରେ ଗଳା କାଟି ହତ୍ୟା କରିଥିଲେ। ଏହା ପରେ, ପୋଲିସ ଗାମୁଛା ଉଦ୍ଧାର କରିବା ପାଇଁ ଶକିଲଙ୍କୁ ନେଇଥିଲା।
ରେଶମା ଓ ଶକିଲ ଗୋଧନାରେ ଏକ ଭଡା ଘରେ ରହୁଥିଲେ। ସେଠାରେ ଉଭୟେ ପିଲାଟିକୁ ହତ୍ୟା କରିବାର ଅପରାଧ କରିଥିଲେ। ଯେତେବେଳେ ପୋଲିସ ଶକିଲଙ୍କୁ ଗାମୁଛା ଆଣିବାକୁ ନେଉଥିଲା, ସେତେବେଳେ ସେ ଏସଆଇଙ୍କଠାରୁ ବନ୍ଧୁକ ଛଡ଼ାଇ ନେଇ ଗୁଳି ଚଳାଇଲା। ପୋଲିସ ପାଲଟା ଆକ୍ରମଣ କରିବାରୁ ଶକିଲଙ୍କ ଗୋଡରେ ଗୁଳି ବାଜିଥିଲା, ଯାହା ପରେ ତାଙ୍କୁ ଚିକିତ୍ସା ପାଇଁ ଆହତ ଅବସ୍ଥାରେ ହସ୍ପିଟାଲରେ ଭର୍ତ୍ତି କରାଯାଇଛି ।