ନନ୍ଦିଘୋଷ ବ୍ୟୁରୋ : ତୁହାକୁ ତୁହା ଭିଜୁଛି ଉପାନ୍ତରୁ ଉପକୂଳ । ପ୍ରାକ ମୌସୁମୀ ପ୍ରଭାବରେ ଜାରି ରହିଛି ବର୍ଷା । କାଲିଠୁ ୩୦ ତାରିଖ ଭିତରେ ରାଜ୍ୟରେ ପ୍ରବଳ ବର୍ଷା ଆକଳନ କରାଯାଇଛି । ମୌସୁମୀ କେରଳ ଛୁଇଁବା ପରେ ରାଜ୍ୟର ଅନେକ ସ୍ଥାନରେ ଝିପିଝିପି ବର୍ଷା ସାଙ୍ଗକୁ ପାଗରେ ପରିବର୍ତ୍ତନ ଦେଖିବାକୁ ମିଳିଛି । ଗରମ ଗୁଳୁଗୁଳିରୁ ଲୋକଙ୍କୁ ମିଳିଛି ଟିକେ ଆଶ୍ୱସ୍ତି । ଆଜି ପ୍ରବଳରୁ ଅତି ପ୍ରବଳ ବର୍ଷା ସମ୍ଭାବନା ଥିବା ବେଳେ କୋରାପୁଟ, ରାୟଗଡା, ଗଜପତି , କଳାହାଣ୍ଡି ,କନ୍ଧମାଳ, ନୂଆପଡା , ଖୋର୍ଦ୍ଧା , ପୁରୀ, କଟକ, ଜଗତସିଂହପୁର, ଯାଜପୁର,ଭଦ୍ରକ, କେନ୍ଦ୍ରାପଡା, ବାଲେଶ୍ୱର କେନ୍ଦୁଝର ଓ ମୟୂରଭଞ୍ଜ ଭଳି ୧୬ ଜିଲ୍ଲାକୁ ଅରେଞ୍ଜ ଓ୍ବାଣ୍ଣିଂ ଜାରି କରାଯାଇଛି । ଅବଶିଷ୍ଟ ୧୪ ଜିଲ୍ଲାକୁ ବିଜୁଳି ଘଡଘଡି ସହ ହାଲୁକାରୁ ମଧ୍ୟମ ଧରଣର ବର୍ଷା ନେଇ ୟେଲୋ ଓ୍ବାଣ୍ଣିଂ ଜାରି କରିଛି ପାଣିପାଗ ବିଭାଗ। କାଲି ବେଳକୁ ପଶ୍ଚିମ କେନ୍ଦ୍ରୀୟ ଓ ତାର ପାଶ୍ୱବର୍ତୀ ଉତ୍ତର ବଙ୍ଗୋପସାଗରରେ ଏକ ଲଘୁଚାପ କ୍ଷେତ୍ର ସୃଷ୍ଟି ହେବାର ସମ୍ଭାବନା ରହିଛି । ଲଘୁଚାପ ଘନୀଭୂତ ହୋଇ ରାଜ୍ୟରେ ପ୍ରବଳ ବର୍ଷା କରାଇବା ନେଇ ପୂର୍ବାନୁମାନ କରାଯାଇଛି । ଏହା ଓଡ଼ିଶାକୁ ମୌସୁମୀ ଅଗ୍ରସର ହେବାରେ ସହାୟକ ହେବ ।
ପାକିସ୍ତାନର ଗୋପନ ଯୋଜନା : ଚୀନ ସହଯୋଗରେ କରୁଛି ଆଣବିକ ଅସ୍ତ୍ରର ଆଧୁନିକୀକରଣ !
ନନ୍ଦିଘୋଷ ବ୍ୟୁରୋ : ଚୀନର ସହାୟତାରେ ଆଣବିକ ଅସ୍ତ୍ରଶସ୍ତ୍ରର ଆଧୁନିକୀକରଣ କରୁଛି ପାକିସ୍ତାନ। ଏକ୍ଷେତ୍ରରେ ପାକିସ୍ତାନକୁ ଚୀନ ସମସ୍ତ ପ୍ରକାର ଜ୍ଞାନ କୌଶଳ ଓ ଆର୍ଥିକ ସହାୟତା ଯୋଗାଉଛି ବୋଲି ଆମେରିକା ପ୍ରତିରକ୍ଷା ଗୁଇନ୍ଦା ସଂସ୍ଥା ପକ୍ଷରୁ ପ୍ରକାଶିତ ୱାର୍ଲଡ ଥ୍ରେଟ ଆସେସମେଣ୍ଟ ରିପୋର୍ଟରେ ଦର୍ଶାଯାଇଛି। ଆସନ୍ତା ବର୍ଷଗୁ଼ଡିକରେ ପଡ଼ୋଶୀ ରାଷ୍ଟ୍ରଗୁଡ଼ିକ ସହ ସୀମାପାର୍ ଉତ୍ତେଜନା ବୃଦ୍ଧି ଓ ଆଣବିକ ଅସ୍ତ୍ରଶସ୍ତ୍ରଗୁଡିକର ଆଧୁନିକୀକରଣକୁ ପାକିସ୍ତାନ ଅଗ୍ରାଧିକାର ଦେଉଥିବା ସୂଚନା ମିଳିଛି।
ରିପୋର୍ଟରେ କୁହାଯାଇଛି ଆଣବିକ ସାମଗ୍ରୀ ଓ ଆଣବିକ କମାଣ୍ଡକୁ ସୁରକ୍ଷିତ ରଖିବା ଲାଗି ପାକିସ୍ତାନ ଉଦ୍ୟମ ଜାରି ରଖିଛି। ସବୁଠାରୁ ବଡ଼ କଥା ହେଉଛି ଗଣବିଧ୍ବଂସୀ ଅସ୍ତ୍ରଶସ୍ତ୍ରର ବି ବିକାଶ କରୁଛି ପାକିସ୍ତାନ। ଏକ୍ଷେତ୍ରରେ ପାକିସ୍ତାନକୁ ଚୀନ ସମସ୍ତ ସହାୟତା ଦେଉଛି। ଏହି ଧରଣର ଅସ୍ତ୍ରଶସ୍ତ୍ର ହଂକଂ, ସିଙ୍ଗାପୁର, ତୁର୍କୀ ଓ ୟୁଏଇ ଦେଇ ପାକିସ୍ତାନକୁ ଚୀନ ପଠାଇଥିବା କୁହାଯାଇଛି।
ଆଜି ସାବିତ୍ରୀ ଅମାବାସ୍ୟା, ଘରେ ଘରେ ବ୍ରତ ପାଳୁଛନ୍ତି ମହିଳା
ନନ୍ଦିଘୋଷ ବ୍ୟୁରୋ : ଆଜି ସାବିତ୍ରୀ ଅମାବାସ୍ୟା । ସ୍ବାମୀଙ୍କ ମଙ୍ଗଳ ମନାସୀ ବ୍ରତ ପାଳୁଛନ୍ତି ସଧବା । ଯମରାଜଙ୍କ ପଛରେ ଯାଇ ସ୍ବାମୀ ସତ୍ୟବାନଙ୍କ ଜୀବନ ଫେରାଇ ଆଣିଥିଲେ ସାବିତ୍ରୀ । ହିନ୍ଦୁ ଶାସ୍ତ୍ରର ସେହି ପୌରାଣିକ କଥାକୁ ମନେ ପକାଇ ସ୍ବାମୀଙ୍କ ଦୀର୍ଘ ଜୀବନ କାମନା କରି ପୂଜା କରୁଛନ୍ତି ବିବାହିତା ମହିଳାମାନେ। ରାଜ୍ୟର ବିଭିନ୍ନ ପୀଠରେ ସକାଳୁ ସକାଳୁ ପୂଜା କରିବାକୁ ଲାଗିଛି ଶ୍ରଦ୍ଧାଳୁଙ୍କ ଭିଡ଼। ହାତରେ ଭୋଗ, ମନରେ ଉତ୍ସାହ ନେଇ ଦେବାଳୟକୁ ଯାଇଛନ୍ତି ସଧବା । ନୂଆ ଶାଢୀ, ସଙ୍ଖା, ସିନ୍ଦୁର ଓ ଅଳତା ନେଇ ପୂଜାର୍ଚ୍ଚନା କରୁଛନ୍ତି । ଘରେ ଘରେ ବି ସାବିତ୍ରୀଙ୍କ ପ୍ରତିମା ଗଢି ବ୍ରତ କଥା ଗାଇ ପୂଜା କରୁଛନ୍ତି ସଧବା ନାରୀ । ବିଶେଷ କରି ଆମ୍ବ, ପଣସ, ନଡିଆ, ଫୁଟି କାକୁଡି, ତାଳ, ଖଜୁରୀ ଆଦି ଦେଶୀ ଫଳରେ ପୂଜା କରୁଛନ୍ତି।
ମଣିପୁର ଅଶାନ୍ତ: ଇମ୍ଫାଲରେ ନିରାପତ୍ତାରକ୍ଷୀ ଓ ଆନ୍ଦୋଳନକାରୀ ଧସ୍ତାଧସ୍ତି
ନନ୍ଦିଘୋଷ ବ୍ୟୁରୋ: ପୁଣି ଅଶାନ୍ତ ମଣିପୁର । ଇମ୍ଫାଲରେ ନିରାପତ୍ତାରକ୍ଷୀ ଓ ଆନ୍ଦୋଳନକାରୀ ଧସ୍ତାଧସ୍ତି । ରାଜଭବନ ଅଭିମୁଖେ ଆନ୍ଦୋଳନକାରୀ ଯିବାବେଳେ ଧସ୍ତାଧସ୍ତି । ଆନ୍ଦୋଳନକାରୀଙ୍କୁ ଘଉଡାଇବା ଲାଗି ପୋଲିସ ପ୍ରୟୋଗ କରିଛି ଲୁହବୁହା ଗ୍ୟାସ ।
ରାଜ୍ୟପାଳ ଅଜୟ କୁମାର ଭଲ୍ଲାଙ୍କ ଏକ ବିବୃତିକୁ ବିରୋଧ କରି ତାତିଛନ୍ତି ମେତେଇ । ଏପରିକି ରାଜ୍ୟପାଳ କ୍ଷମା ମାଗନ୍ତୁ ବୋଲି ଦାବି କରିଛନ୍ତି ମେତେଇ । ଏହି ପ୍ରସଙ୍ଗରେ କେନ୍ଦ୍ର ଗୃହ ମନ୍ତ୍ରାଳୟ ସହ ଆଲୋଚନା ଲାଗି ମେତେଇଙ୍କ ଟିମ ନୂଆଦିଲ୍ଲୀ ଯିବେ । ଆସନ୍ତା ୨୭ରେ ଏ ପ୍ରସଙ୍ଗରେ ଆଲୋଚନା ହେବ ବୋଲି ସୂଚନା ମିଳିଛି ।
ଅଭିଯୋଗ ଅନୁସାରେ ଶିରୁଇ ଲିଲି ଉତ୍ସବର ଖବର ପ୍ରସାରଣ ଲାଗି ଏକ ବସରେ କିଛି ସାମ୍ବାଦିକ ଉଖରୁଲକୁ ଯାଉଥିଲେ । ତେବେ ସେହି ବସରେ ଲେଖାଥିବା ମଣିପୁର ଷ୍ଟେଟ ଟ୍ରାନ୍ସପୋର୍ଟକୁ ଲୁଚାଇ ଦେବା ଲାଗି ନିରାପତ୍ତାରକ୍ଷୀ ପରାମର୍ଶ ଦେଇଥିଲେ । ମେତେଇ ଅଭିଯୋଗ ହେଲା ଯେ, ଏହି ନିର୍ଦ୍ଦେଶ ମଣିପୁରର ପରିଚୟ, ସ୍ବାଭିମାନ ଓ ଆତ୍ମମର୍ଯ୍ୟାଦା ଉପରେ ଆଘାତ ଆଣିଛି । ଉତ୍ତ୍ୟକ୍ତ ଲୋକମାନେ ରାଜଭବନ ଅଭିମୁଖେ ଯିବାବେଳେ ପୋଲିସ ସେମାନଙ୍କୁ ଅଟକାଇଥିଲା । ଶିରୁଇ ଉତ୍ସବରେ ସାମିଲ ହୋଇଥିବା ମେତେଇଙ୍କୁ କୁକୀ ନେତା ଧମକ ଦେବା ପରେ ତାଙ୍କ ନାଁରେ ଏତଲା ଦାୟର ହୋଇଛି । ପୋଲିସ ଓ ଆନ୍ଦୋଳନକାରୀଙ୍କ ଧସ୍ତାଧସ୍ତିରେ ୫ ଜଣ ଆହତ ହୋଇଛନ୍ତି । ଗତ ଶନିବାର ମଣିପୁର ଛାତ୍ର ସଂଗଠନ ପକ୍ଷରୁ ଆୟୋଜିତ ହୋଇଥିଲା ମାନବ ଶୃଙ୍ଖଳ।
ଶାହାଜାହାନପୁର ମେଡିକାଲ କଲେଜରେ ଗ୍ୟାସ ଲିକ୍, ଜଣେ ମୃତ
ନନ୍ଦିଘୋଷ ବ୍ୟୁରୋ: ଉତ୍ତରପ୍ରଦେଶ ଶାହାଜାହାନପୁରରେ ଗ୍ୟାସ ଲିକ୍ । ଶାହାଜାହାନପୁର ମେଡିକାଲ କଲେଜରେ ଗ୍ୟାସ ଲିକ୍ ଯୋଗୁଁ ଜଣଙ୍କର ମୃତ୍ୟୁ ଘଟିଛି । ଘଟଣାରେ କିଛି ଲୋକ ଅସୁସ୍ଥ ହୋଇଛନ୍ତି । ଘଟଣାସ୍ଥଳରେ ଉଦ୍ଧାର କାର୍ଯ୍ୟ ଜାରି ରହିଛି । ଗ୍ୟାସ ଲିକକୁ ନେଇ ହସ୍ପିଟାଲରେ ଦଳାଚକଟା ପରିସ୍ଥିତି ସୃଷ୍ଟି ହୋଇଥିଲା । ରୋଗୀଙ୍କୁ ତୁରନ୍ତ ମେଡିକାଲରୁ ବାହାର କରାଯାଇଥିଲା ।
ମେଡିକାଲ ପରିସରରେ ଫାୟାର ବ୍ରିଗେଡ୍ ମୁତୟନ ହୋଇଥିବାବେଳେ ଘଟଣାସ୍ଥଳରେ ଜିଲ୍ଲାପାଳ ଉପସ୍ଥିତ ରହି ସ୍ଥିତି ଅନୁଧ୍ୟାନ କରୁଛନ୍ତି । ଅପରେସନ ଥିଏଟରରୁ ଗ୍ୟାସ ଲିକ୍ ହୋଇଥିବା ସୂଚନା ମିଳିଛି । ଘଟଣାର ତଦନ୍ତ ଜାରି ରହିଛି । ହଠାତ୍ ଗ୍ୟାସ୍ ଲିକ ହେବାରୁ ଲୋକେ ଆତଙ୍କରେ ଦୌଡ଼ିବାରୁ ସେଠାରେ ଦଳାଚକଟା ସ୍ଥିତି ଉପୁଜିଥିଲା । ଘଟଣାସ୍ଥଳରେ ପୋଲିସ ଓ ଅଗ୍ନିଶମ ବାହିନୀ ଉପସ୍ଥିତ ରହି ଉଦ୍ଧାର କାର୍ଯ୍ୟ ଚଳାଇଛନ୍ତି ।
ଆତତାୟୀଙ୍କ ଗୁଳିରେ ଶିରୋମଣି ଅକାଳୀ ଦଳ ନେତା ହରିଜିନ୍ଦର ସିଂ ନିହତ
ନନ୍ଦିଘୋଷ ବ୍ୟୁରୋ: ପଞ୍ଜାବ ଅମୃତସରରେ ଆତତାୟୀଙ୍କ ଗୁଳିରେ ଶିରୋମଣି ଅକାଳୀ ଦଳ ନେତା ତଥା କାଉନସିଲର ହରିଜିନ୍ଦର ସିଂ ନିହତ । ଜାନ୍ଦିଆଲା ଗୁରୁ ବିଧାନସଭା ନିର୍ବାଚନ ମଣ୍ଡଳୀ ଅଞ୍ଚଳରେ ତାଙ୍କୁ ଗୁଳି ମାରି ହତ୍ୟା କରାଯାଇଛି ।
ଆତତାୟୀ ବାଇକରେ ଆସି ହରିଜିନ୍ଦରଙ୍କୁ ଗୁଳି ମାରିଥିଲେ । ହରିଜିନ୍ଦରଙ୍କ ଉପରକୁ ୫ରୁ ୬ ରାଉଣ୍ଡ ଗୁଳିମାଡ଼ ହୋଇଥିବା ସୂଚନା । ଏକ ଉତ୍ସବରେ ଯୋଗ ଦେବାକୁ ଯାଉଥିବା ବେଳେ ଏହି ହତ୍ୟାକାଣ୍ଡ ଘଟିଛି । ଘଟଣାସ୍ଥଳରେ ଏଡିସିପି ହରପାଲ ସିଂ ରାନ୍ଧୱା ପହଞ୍ଚି ଘଟଣାର ତଦନ୍ତ ଚଲାଇଛନ୍ତି ।
୨୭ରୁ ୩୦ ତାରିଖ ଯାଏଁ ରାଜ୍ୟରେ ଭାରି ବର୍ଷାର ସମ୍ଭାବନା
ନନ୍ଦିଘୋଷ ବ୍ୟୁରୋ: କାଳବୈଶାଖୀ ସହ ପ୍ରାକ ମୌସୁମୀ ବର୍ଷାରେ ଭିଜିବ ଓଡ଼ିଶା l ଆସନ୍ତା ୭ ଦିନ ପର୍ଯ୍ୟନ୍ତ ବର୍ଷା ଲାଗି ରହିବ l ୨୭ ତାରିଖରୁ ୩୦ ତାରିଖ ଯାଏଁ ରାଜ୍ୟରେ ଭାରି ବର୍ଷାର ସମ୍ଭାବନା ରହିଛି । ଏହି ବର୍ଷା ମୌସୁମୀକୁ ଅଗ୍ରସର ହେବାକୁ ବାଟ ଫିଟାଇବ । ସଅଳ ମୌସୁମୀ ଆସିବାକୁ ବି ସହାୟକ ହେବ ଲଘୁଚାପ ବୋଲି ପୂର୍ବାନୁମାନ କରିଛି ପାଣିପାଗ କେନ୍ଦ୍ର ।
ପ୍ରାକ ମୌସୁମୀ ପ୍ରଭାବରେ ଜାରି ରହିଛି ତୁହାକୁ ତୁହା ବର୍ଷା । ପୁଣି ୨୭ ତାରିଖରୁ ୩୦ ତାରିଖ ଭିତରେ ରାଜ୍ୟରେ ପ୍ରବଳ ବର୍ଷା ଆକଳନ କରାଯାଇଛି l ମୌସୁମୀ କେରଳ ଛୁଇଁବା ପରେ ରାଜ୍ୟର ଅନେକ ସ୍ଥାନରେ ଝିପିଝିପି ବର୍ଷା ସାଙ୍ଗକୁ ପାଗରେ ପରିବର୍ତ୍ତନ ଦେଖିବାକୁ ମିଳିଛି l ଗରମ ଗୁଳୁଗୁଳିରୁ ଲୋକଙ୍କୁ ଟିକେ ଆଶ୍ୱସ୍ତି ମିଳିଛି l ଆସନ୍ତା ୨୪ ଘଣ୍ଟାରେ ପ୍ରବଳରୁ ଅତି ପ୍ରବଳ ବର୍ଷା ସମ୍ଭାବନା ନେଇ ଅନେକ ଜିଲ୍ଲା ପାଇଁ ସତର୍କତା ଜାରି କରିଛି ପାଣିପାଗ କେନ୍ଦ୍ର l ଆସନ୍ତା ୨୭ ତାରିଖ ବେଳକୁ ପଶ୍ଚିମ କେନ୍ଦ୍ରୀୟ ଓ ତା’ର ପାଶ୍ୱବର୍ତୀ ଉତ୍ତର ବଙ୍ଗୋପସାଗରରେ ଏକ ଲଘୁଚାପ କ୍ଷେତ୍ର ସୃଷ୍ଟି ହେବାର ସମ୍ଭାବନା ରହିଛି । ଲଘୁଚାପ ଘନୀଭୂତ ହୋଇ ରାଜ୍ୟରେ ପ୍ରବଳ ବର୍ଷା କରାଇବା ନେଇ ପୂର୍ବାନୁମାନ କରାଯାଇଛି । ଏହା ଓଡ଼ିଶାକୁ ମୌସୁମୀ ଅଗ୍ରସର ହେବାରେ ସହାୟକ ହେବ ବୋଲି ପାଣିପାଗ ବିଭାଗ ନିର୍ଦ୍ଦେଶକ ମନୋରମା ମହାନ୍ତି କହିଛନ୍ତି ।
ଆସନ୍ତା ୨୪ ଘଣ୍ଟାରେ ପ୍ରବଳରୁ ଅତି ପ୍ରବଳ ବର୍ଷା ସମ୍ଭାବନା ଥିବା ବେଳେ କୋରାପୁଟ, ରାୟଗଡା, ଗଜପତି, କଳାହାଣ୍ଡି, କନ୍ଧମାଳ, ନୂଆପଡା, ଖୋର୍ଦ୍ଧା, ପୁରୀ, କଟକ, ଜଗତସିଂହପୁର, ଯାଜପୁର, ଭଦ୍ରକ, କେନ୍ଦ୍ରାପଡା, ବାଲେଶ୍ୱର କେନ୍ଦୁଝର ଓ ମୟୂରଭଞ୍ଜ ଭଳି ୧୬ ଜିଲ୍ଲାକୁ ଅରେଞ୍ଜ ଓ୍ବାର୍ଣ୍ଣିଂ ଜାରି କରାଯାଇଛି । ଅବଶିଷ୍ଟ ୧୪ ଜିଲ୍ଲାକୁ ବିଜୁଳି ଘଡଘଡି ସହ ହାଲୁକାରୁ ମଧ୍ୟମ ଧରଣର ବର୍ଷା ନେଇ ୟେଲୋ ଓ୍ବାର୍ଣ୍ଣିଂ ଜାରି କରିଛି ପାଣିପାଗ ବିଭାଗ । ସେପଟେ ୨୮ ଓ ୨୯ ତାରିଖରେ ମୌସୁମି ଓଡ଼ିଶା ଛୁଇଁବା ନେଇ ପୂର୍ବାନୁମାନ କରିଛନ୍ତି ପାଣିପାଗ ବିଶେଷଜ୍ଞ ।
ମୌସୁମୀ ଆଗମନ ନେଇ ପାଗ ଅନୁକୂଳ ଥିବା ବେଳେ ମାସ ଶେଷ ବେଳକୁ ଓଡିଶାକୁ ମୌସୁମୀ ପ୍ରବେଶ କରିସାରିଥିବ ବୋଲି ପୂର୍ବାନୁମାନ କରିଛି ପାଣିପାଗ କେନ୍ଦ୍ର ।
ବେକ ପର୍ଯ୍ୟନ୍ତ ଦୁର୍ନୀତିରେ ବୁଡ଼ିଛି ଅବକାରୀ ବିଭାଗ: ଲାଞ୍ଚ ନ ଦେବାରୁ ହର୍ବାଲ ମଦ କମ୍ପାନୀକୁ ତାଲିକାରୁ ହଟାଇ ଦିଆଗଲା
ନନ୍ଦିଘୋଷ ବ୍ୟୁରୋ: ରାଜ୍ୟରେ ହର୍ବାଲ ମଦ ପ୍ରସ୍ତୁତ ଓ ବିକ୍ରି କରିବାକୁ ଆସିଥିବା ଗୋଟିଏ କମ୍ପାନୀକୁ ଅଯଥାରେ ହଇରାଣ କରୁଛନ୍ତି ବିଭାଗୀୟ ଅଧିକାରୀ । ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶକୁ ବି ଖାତିର କରୁନାହାନ୍ତି । ଏଭଳି ଅଭିଯୋଗ କରିଛନ୍ତି ଜୁନିୟର ଅଭିଷେକ ହର୍ବାଲ କମ୍ପାନୀର ମାଲିକ ଅନିରୁଦ୍ଧ କପାଲେ । ଏମାନଙ୍କ ନିର୍ଯାତନାର ଶିକାର ହୋଇ କମ୍ପାନୀ ମାଲିକ ଆତ୍ମହତ୍ୟା କରିବାକୁ ଖୋଲା ଚେତାବନୀ ଦେଇଛନ୍ତି । ଜୁନ୍ ୨୪ରେ ସିଏ ଆତ୍ମହତ୍ୟା କରିବାକୁ ଯାଉଥିବା କହିଛନ୍ତି ।
ରାଜ୍ୟ ସରକାରଙ୍କ ଅବକାରୀ ବିଭାଗରେ ଭ୍ରଷ୍ଟାଚାର ସୀମା ଟପିଛି । ଏଭଳି ଅଭିଯୋଗ କରିଛନ୍ତି ଜୁନିୟର ଅଭିଷେକ ହର୍ବାଲ କମ୍ପାନୀର ସିଏମଡି ଅନିରୁଦ୍ଧ କପାଲେ । ରାଜ୍ୟ ଅବକାରୀ ବିଭାଗ, ଏହାର ଅଧିକାରୀ ଓ ଅଧୀନରେ ଥିବା ରାଜ୍ୟ ପାନୀୟ ନିଗମ ବିରୋଧରେ ବର୍ଷିଛନ୍ତି ଅନିରୁଦ୍ଧ । ୫ ଲକ୍ଷ ଟଙ୍କା ଲାଞ୍ଚ ଦେଲେ ନାହିଁ ବୋଲି ତାଙ୍କ କମ୍ପାନୀକୁ ଅବକାରୀ ବିଭାଗ ତାଲିକାରୁ ହଟାଇ ଦେଇଛି । ଏଭଳି ଅନ୍ୟାୟ ବିରୋଧରେ କାର୍ଯ୍ୟନୁଷ୍ଠାନ ନ ହେଲେ ଜୁନ୍ ୨୪ ତାରିଖରେ ଅନିରୁଦ୍ଧ ଆତ୍ମହତ୍ୟା କରିବେ ବୋଲି ଖୋଲାଖୋଲି କହିଛନ୍ତି ।
ଅନିରୁଦ୍ଧଙ୍କ କହିବା ଅନୁସାରେ, ଦେଶରେ ପ୍ରଥମ ଥର ପାଇଁ ଜଡିବୁଟି ମିଶ୍ରଣରେ ହର୍ବାଲ ମଦ ପ୍ରସ୍ତୁତ କରିବାକୁ ଗବେଷଣା କରିବା ପରେ କମ୍ପାନୀ ବଜାର ପ୍ରବେଶ ପାଇଁ ଓଡ଼ିଶାକୁ ବାଛିଥିଲା । ମାତ୍ର ଓଡ଼ିଶାରେ କିଛି ଦୁର୍ନୀତିଖୋର ଅଧିକାରୀ ଜାଣିଶୁଣି ହଇରାଣ କରିବା ସହ ଲାଞ୍ଚ ଦେବା ପାଇଁ ବାଧ୍ୟ କରୁଛନ୍ତି । ଲାଞ୍ଚ ନ ଦେବାରୁ ପ୍ରତିଦ୍ବନ୍ଦ୍ବୀ କମ୍ପାନୀ ସହ ଅଧିକାରୀଙ୍କ ସଲାସୁତୁରାରେ ତାଙ୍କୁ ତାଲିକାରୁ ବାଦ୍ ଦେଇଛନ୍ତି ।
ଆଇଏଏସ୍, ଆଇପିଏସ୍ ଓ ଓଏଏସ୍ ଅଧିକାରୀଙ୍କ ବିରୋଧରେ ଅଭିଯୋଗ କରିଛନ୍ତି ଅନିରୁଦ୍ଧ । ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶ କାର୍ଯ୍ୟକାରୀ ହେଉ ନଥିବାରୁ ମଧ୍ୟ ସେ କ୍ଷୋଭ ପ୍ରକାଶ କରିଛନ୍ତି । ବିଭାଗ ସହ ବାର୍ତ୍ତାଳପ ହୋଇଥିବା ବିଭିନ୍ନ ଚିଠି ମଧ୍ୟ ଦେଖାଇଛନ୍ତି । ଏପରିକି ବିଭାଗର ଅନୁସଚିବ ଓ ଯୁଗ୍ମ ସଚିବ ଅନିରୁଦ୍ଧଙ୍କ ଅଭିଯୋଗ ଉପରେ ତଦନ୍ତ କରିବାକୁ ଅବକାରୀ କମିଶନରଙ୍କୁ ଲେଖିଥିବା ଚିଠି ବି ହସ୍ତଗତ ହୋଇଛି । ଏଭଳି ଗୁରୁତର ଅଭିଯୋଗ ଉପରେ ଅବକାରୀ ମନ୍ତ୍ରୀ ପ୍ରତିକ୍ରିୟା ରଖିଛନ୍ତି । ମନ୍ତ୍ରୀ ତାଙ୍କ ଉତ୍ତରରେ କହିଛନ୍ତି ସେଭଳି କୌଣସି ତଥ୍ୟ ବିଭାଗ ପାଖରେ ନାହିଁ । ଯେଉଁ ଅଭିଯୋଗ ଆସୁଛି, ତାର ସତ୍ୟତା କେତେ ତଦନ୍ତ କଲେ ହିଁ ଜଣାପଡ଼ିବ ।
ମହାରାଷ୍ଟ୍ର ନାଗପୁରରେ ରହୁଥିବା ଜଣେ ଉଦ୍ୟୋଗୀଙ୍କ ଏଭଳି ଅଭିଯୋଗ ଆସିବା ପରେ ଏହାକୁ ନେଇ ଚର୍ଚ୍ଚା ଆରମ୍ଭ ହୋଇଛି । ଅନିରୁଦ୍ଧ କପାଲେଙ୍କ ଅଭିଯୋଗରେ କେତେ ସତ୍ୟତା ଅଛି, ବିଭାଗୀୟ ବାର୍ତ୍ତାଳପ ହୋଇଛି କି ନାହିଁ ତାହା ତଦନ୍ତ ହେଲେ ସ୍ପଷ୍ଟ ହେବ । ହେଲେ ରାଜ୍ୟ ବାହାରର ଜଣେ ଉଦ୍ୟୋଗୀଙ୍କ ଅଭିଯୋଗ ଅବକାରୀ ବିଭାଗର ସ୍ବଚ୍ଛତା ଉପରେ ପ୍ରଶ୍ନ ଉଠାଇଛି ।
ଏସସି-ଏସଟିଙ୍କୁ ନିଃସ୍ଵ କରିବାକୁ ସରକାରଙ୍କ ଭୟଙ୍କର ଷଡ଼ଯନ୍ତ୍ର
ନନ୍ଦିଘୋଷ ବ୍ୟୁରୋ: ଆଦିବାସୀଙ୍କ ଜମି ସରକାର କିଣିବା ବିବାଦ ଧୀରେ ଧୀରେ ତେଜିବାରେ ଲାଗିଛି । ଏ ପ୍ରସଙ୍ଗରେ ରାଜ୍ୟ ସରକାରଙ୍କୁ କଡ଼ା ସମାଲୋଚନା କରିଛନ୍ତି ବିରୋଧୀ । ଅଭିଯୋଗ କରିଛନ୍ତି, ଆଦିବାସୀଙ୍କୁ ନିଃସ୍ଵ କରିବା ପାଇଁ ଷଡ଼ଯନ୍ତ୍ର କରିଛନ୍ତି ସରକାର । ଶିଳ୍ପପତିଙ୍କ ହାତରେ ମୂଲ୍ୟବାନ ଖଣିଜ ସମ୍ପଦ ଟେକି ଦେବାରେ ଆଦିବାସୀମାନେ ଯେଉଁ ବାଧା ସାଜିଛନ୍ତି, ସେଥିପାଇଁ ସରକାର ଆଦିବାସୀଙ୍କ ଜମି କିଣି ସହଜରେ କର୍ପୋରେଟ ହାତକୁ ଟେକି ଦେବାକୁ ଚକ୍ରାନ୍ତ କରିଛନ୍ତି । ପୂର୍ବତନ କେନ୍ଦ୍ରମନ୍ତ୍ରୀ ତଥା ବରିଷ୍ଠ କଂଗ୍ରେସ ନେତା ଶ୍ରୀକାନ୍ତ ଜେନା ଦାବି କରିଛନ୍ତି, ସରକାର ତୁରନ୍ତ ଏହି ନିଷ୍ପତ୍ତିରୁ ଓହରି ଯାଆନ୍ତୁ । ବିଜେଡି ଓ ବାମଦଳ ବି ରାଜ୍ୟ ସରକାରଙ୍କୁ ଟାର୍ଗେଟ କରିଛନ୍ତି ।
ରାଜ୍ୟ ସରକାର ଏସସି ଏସଟି ଜମି କିଣିବା ନିଷ୍ପତ୍ତି ବହୁତ ଭୟଙ୍କର । ଏହାଦ୍ଵାରା ଆଦିବାସୀ ଓ ଗରିବଙ୍କ ଅବସ୍ଥା ଆହୁରି ଖରାପ ହେବ । ସେମାନଙ୍କୁ ନିଃସ୍ଵ କରିବାକୁ ଏହା ରାଜ୍ୟ ସରକାରଙ୍କ ଷଡ଼ଯନ୍ତ୍ର । ଏପରି କଡ଼ା ଭାଷାରେ ରାଜ୍ୟର ବିଜେପି ସରକାରଙ୍କୁ ଟାର୍ଗେଟ କରିଛନ୍ତି ବରିଷ୍ଠ କଂଗ୍ରେସ ନେତା ଶ୍ରୀକାନ୍ତ ଜେନା । ଏକ ସାମ୍ଵାଦିକ ସମ୍ମିଳନୀରେ କହିଛନ୍ତି, ଶିଳ୍ପସଂସ୍ଥା ଓ ଶିଳ୍ପପତିଙ୍କ ସ୍ଵାର୍ଥ ପାଇଁ ରଚାଯାଇଛି ଏହି ଷଡ଼ଯନ୍ତ୍ର । ଏଥିରୁ ଓହରି ଯିବାକୁ ଦାବି କରିଛନ୍ତି ଶ୍ରୀକାନ୍ତ । ଏହାସହ ପ୍ରସ୍ତାବ ଦେଇ କହିଛନ୍ତି, ଏସସି ଏସଟିଙ୍କ ପାଇଁ ରାଜ୍ୟ ସରକାର ଏକ କର୍ପସ ଫଣ୍ଡ ଗଠନ କରନ୍ତୁ । ଏହି ଫଣ୍ଡ ସେମାନଙ୍କ ସ୍ୱାସ୍ଥ୍ୟ ଓ ସାମାଜିକ କାର୍ଯ୍ୟରେ ଲଗାଯାଉ । ସରପଞ୍ଚଙ୍କୁ ଦାୟିତ୍ୱ ଦିଆଯାଉ ଏହାକୁ ଗ୍ରାଣ୍ଟ ଆକାରରେ ଗରିବ ଲୋକଙ୍କୁ ଦିଆଯିବ । ଏସସି ଏସଟିଙ୍କ ଜମି କିଣିବା ନିଷ୍ପତ୍ତିରୁ ରାଜ୍ୟ ସରକାର ନ ଓହରିଲେ ଆଗାମୀ ଦିନରେ ଭୟଙ୍କର ସ୍ଥିତି ହେବ ବୋଲି ଚେତାଇ ଦେଇଛନ୍ତି ଶ୍ରୀକାନ୍ତ ।
ବିଜେଡି ମଧ୍ୟ ରାଜ୍ୟ ସରକାରଙ୍କ ଏହି ନିଷ୍ପତ୍ତିକୁ କଡ଼ା ସମାଲୋଚନା କରିଛି । ଜୁନ ୧୨ରେ ରାଜ୍ୟର ବିଜେପି ସରକାରକୁ ବର୍ଷେ ପୂରିବ । ଏହି ବର୍ଷେ ଭିତରେ ବିଜେପି କ’ଣ ଗୋଟିଏ କାମ କରି ଦେଖାଇଲେଣି କି ବୋଲି ପ୍ରଶ୍ନ କରିଛନ୍ତି ବରିଷ୍ଠ ବିଜେଡି ନେତା ଉମା ସାମନ୍ତରାୟ । ଏସସି ଏସଟି ସରଳ ନିରୀହ ଲୋକ । ସେମାନଙ୍କ ଅର୍ଥନୈତିକ ଉନ୍ନତି ପାଇଁ ପୂର୍ବର ନବୀନ ସରକାର ସବୁ ବେଳେ କାମ କରୁଥିଲେ । କିନ୍ତୁ ବର୍ତ୍ତମାନର ସରକାର କେବଳ ଭାଷଣ ମାରୁଛନ୍ତି । ଏମାନେ କର୍ପୋରେଟ ଏଜେଣ୍ଟ । ଜମି ନେଇ କର୍ପୋରେଟ ସଂସ୍ଥାକୁ ବିକିବା ପାଇଁ ବାଟ ତିଆରି କରିଛନ୍ତି ସରକାର । ଏହା ସରକାରଙ୍କ ଏକ ବଡ଼ ମସୁଧା ।
ସିପିଆଇଏମଏଲ୍ କହିଛି, ଏହା ହେଉଛି ସରକାରଙ୍କର ଏକ ଚାଲ୍ । ଖଣିଜ ପଦାର୍ଥକୁ ଲୁଟ କରିବାକୁ ଜମି ଅଧିଗ୍ରହଣ ଯେଉଁ ବିଳମ୍ବ ହେଉଛି, ବିରୋଧ ହେଉଛି, ତାକୁ ଏଡାଇବାକୁ ଏହି ଷଡ଼ଯନ୍ତ୍ର । କମ୍ପାନୀଙ୍କୁ ସରକାରଙ୍କ ଦ୍ୱାରା ଜମି ଦେବା ପାଇଁ ଏଭଳି ଚକ୍ରାନ୍ତ କରାଯାଉଛି । ଦେଓମାଳିଠୁ ଗନ୍ଧମାର୍ଦ୍ଧନ ଯାଏ ହେଉଛି ସିଡ୍ୟୁଲ ଅଞ୍ଚଳ । ଏହି ଅଞ୍ଚଳରେ ଜମି ନେବାକୁ ହେଲେ ଗ୍ରାମସଭାର ଅନୁମତି ଆବଶ୍ୟକ । ଏସବୁରୁ ମୁକୁଳିବା ପାଇଁ ଏହା ସରକାରଙ୍କ ଲୁକ୍କାୟିତ ଏଜେଣ୍ଡା ରହିଛି । ମୁଖ୍ୟମନ୍ତ୍ରୀ ନିଜେ ଆଦିବାସୀ ହୋଇଥିବା ବେଳେ ଆଦିବାସୀଙ୍କ ବିରୋଧରେ ଏଭଳି ଚକ୍ରାନ୍ତକୁ ନିନ୍ଦା କରାଯାଉଛି ।
ରାଜ୍ୟରେ ମହିଳା ବିରୋଧୀ ହିଂସା, ଅପରାଧ ବଢ଼ି ଚାଲିଥିବା ବେଳେ ତାକୁ ରୋକିବା ପାଇଁ ପଦକ୍ଷେପ ନେବାକୁ ମଧ୍ୟ ଦାବି କରାଯାଇଛି । ତୁରନ୍ତ ମହିଳା କମିଶନ ଗଠନ କରିବାକୁ ଦାବି ହୋଇଛି ।
ଦିବ୍ୟାଙ୍ଗ ନାବାଳିକାଙ୍କୁ ଦୁଷ୍କର୍ମ ଅଭିଯୋଗ, ଘରଠୁ ୨୦ କିମି ଦୂର କାଜୁ ଜଙ୍ଗଲରୁ ଉଦ୍ଧାର
ନନ୍ଦିଘୋଷ ବ୍ୟୁରୋ: ଜଳେଶ୍ଵର ଅଞ୍ଚଳରେ ପୁଣି ଲଜ୍ଜା । ଦିବ୍ୟାଙ୍ଗ ନାବାଳିକାଙ୍କୁ ଦୁଷ୍କର୍ମ ଅଭିଯୋଗ । ଘରଠାରୁ ୨୦ କି.ମି. ଦୂର କାଜୁ ଜଙ୍ଗଲରେ ନାବାଳିକାଙ୍କୁ ଦୁଷ୍କର୍ମ କରାଯାଇଛି । ମୁମୂର୍ଷୁ ଅବସ୍ଥାରେ ଉଦ୍ଧାର କରିଥିଲେ ସ୍ଥାନୀୟ ଲୋକେ । ପରିବାର ଲୋକଙ୍କ ଅଭିଯୋଗ ପରେ ଅଭିଯୁକ୍ତକୁ ଗିରଫ କରି କୋର୍ଟ ଚାଲାଣ କଲା ପୋଲିସ ।
୨୦୨୫ ମେ’ ୨୨ ତାରିଖ । ବାଲେଶ୍ଵର ଭୋଗରାଇ ଅଞ୍ଚଳରେ ନାବାଳିକାଙ୍କୁ ଦୁଷ୍କର୍ମ ପରେ ହତ୍ୟା ଅଭିଯୋଗ । ଘଟଣାର ୩ ଦିନ ପୂରିନି, ଜଳେଶ୍ଵର ଅଞ୍ଚଳରେ ଆଉ ଜଣେ ନାବାଳିକା ଦୁଷ୍କର୍ମର ଶିକାର । ତା’ ପୁଣି ଜଣେ ଦିବ୍ୟାଙ୍ଗ ମାନସିକ ବିକାରଗ୍ରସ୍ତ ନାବାଳିକା । ଶୌଚ ପାଇଁ ନାବାଳିକା ଜଣକ ଘରୁ ବାହାରିଥିଲେ । ହେଲେ ଆଉ ନଫେରିବାରୁ ପରିବାର ଲୋକେ ଖୋଜାଖୋଜି କରିଥିଲେ । ବହୁ ଖୋଜାଖୋଜି ପରେ ଗୋବରଘଟା ସ୍ଥିତ ସିଟ୍ ଛକରୁ ନାବାଳିକାଙ୍କୁ ଅଚେତ ଅବସ୍ଥାରେ ଉଦ୍ଧାର କରାଯାଇଥିଲା । ପରେ ହାତୀଗଡ଼ ହସ୍ପିଟାଲରେ ଡାକ୍ତରୀ ମାଇନା ପରେ ନାବାଳିକା ଦୁଷ୍କର୍ମ ଶିକାର ହୋଇଥିବା ଜଣାପଡିଛି । ଏନେଇ ଥାନାରେ ଅଭିଯୋଗ କରିଛନ୍ତି ପୀଡ଼ିତାଙ୍କ ପରିବାର । ତଦନ୍ତ ପରେ ଅଭିଯୁକ୍ତ ସଞ୍ଜୀବ ଘୋଷ ନାମକ ଯୁବକକୁ ଗିରଫ କରିଛି ରାଇିବଣିଆ ପୋଲିସ ।
ଜଳେଶ୍ଵର ଅଞ୍ଚଳରେ ବାରମ୍ବାର ମହିଳା ନିର୍ଯାତନା, ନାବାଳିକା ଦୁଷ୍କର୍ମ ନେଇ ଘଟଣା ସାମନାକୁ ଆସୁଛି । ଏହାକୁ ନେଇ ସ୍ଥାନୀୟ ଅଞ୍ଚଳରେ ଜନ ଅସନ୍ତୋଷ ଦାନା ବାନ୍ଧିଲାଣି । ଅଭିଯୋଗ କରିଛନ୍ତି, ଜିଲ୍ଲାରେ ଆଉ ସୁରକ୍ଷିତ ମଣୁନାହାନ୍ତି ମହିଳା ଓ ଶିଶୁ । ପ୍ରଶାସନ ଓ ପୋଲିସର ଅପାରଗତା ଯୋଗୁଁ ଅପରାଧ ବଢି ଚାଲିଛି । ବାରମ୍ବାର ଦୁଷ୍କର୍ମ ଘଟଣା ସାମ୍ନାକୁ ଆସୁଥିବାରୁ ଘରର ଝିଅ ବୋହୂ ବାହାରକୁ ବାହାରିବାକୁ ଭୟ କରୁଛନ୍ତି । ଏବର ରାଜ୍ୟ ସରକାରଙ୍କ ସମୟରେ ଆଇନଶୃଙ୍ଖଳା ବିଗିଡିଥିବା ବେଳେ ପୋଲିସର ସ୍ଥାଣୁତାକୁ ଦାୟୀ କରିଛନ୍ତି ଲୋକେ ।
ପରିବାର ଲୋକଙ୍କ ଅଭିଯୋଗ ଆଧାରରେ ଅଭିଯୁକ୍ତକୁ ଗିରଫ କରି କୋର୍ଟ ଚାଲାଣ କରିଛି ଜଳେଶ୍ଵର ପୋଲିସ । ସେପଟେ ଗତ ୨୨ ତାରିଖ ନାବାଳିକା ଦୁଷ୍କର୍ମ ଓ ହତ୍ୟା ଘଟଣାରେ ଜଣେ ଅଭିଯୁକ୍ତକୁ ଗିରଫ କରି ତଦନ୍ତ ଜାରି ରଖିଛି ପୋଲିସ ।