ନନ୍ଦିଘୋଷ ବ୍ୟୁରୋ : ଆଜିଠାରୁ ଓଭାଲରେ ଆରମ୍ଭ ହେଉଛି ଇଂଲଣ୍ଡ-ଭାରତ ଟେଷ୍ଟ ସିରିଜର ପଞ୍ଚମ ତଥା ଶେଷ ଟେଷ୍ଟ। ଭାରତ ପାଇଁ ଏହି ମ୍ୟାଚ ଅଗ୍ନି ପରୀକ୍ଷା। କାରଣ ଏବେ ଇଂଲଣ୍ଡ ୨-୧ ରେ ସିରିଜ ଲିଡ୍ କରୁଛି। ଟ୍ରଫି ରଖିବାକୁ ହେଲେ ଭାରତକୁ ଏହି ମ୍ୟାଚ ଜିତି ସିରିଡ ଡ୍ର ରଖିବାକୁ ପଡ଼ିବ। ତେବେ ଏହା ଭାରତ ପାଇଁ ଏତେ ସହଜ ହେବ ନାହିଁ । କାରଣ ଆହତ ସମସ୍ୟା ଯୋଗୁଁ ଅନେକ କ୍ରିକେଟର୍ ଖେଳିନପାରନ୍ତି। ଭାରତ ପାଇଁ ଡେବ୍ୟୁ କରିପାରନ୍ତି ଅର୍ଶଦୀପ ସିଂହ। କମ୍ବୋଜଙ୍କ ସ୍ଥାନରେ ସେ ଖେଳିପାରନ୍ତି। ସେହିପରି ଚୂଡ଼ାନ୍ତ ଏକାଦଶରେ ରବୀନ୍ଦ୍ର ଜାଡେଜା ଓ ୱାଶିଂଟନ ସୁନ୍ଦର ଦୁଇ ପ୍ରମୁଖ ସ୍ପିନର ଭାବେ ରହିବେ ବୋଲି ଗିଲ ନିଶ୍ଚିତ କରିଛନ୍ତି। ଏହାର ଅର୍ଥ କୁଲଦୀପ ଯାଦବ ବାକି ୪ ମ୍ୟାଚ୍ ଭଳି ଏହି ମ୍ୟାଚରେ ବେଞ୍ଚରେ ରହିବେ। ଯଶପ୍ରୀତ ବୁମରା ମଧ୍ୟ ଖେଳିବେ କି ନାହିଁ ସନ୍ଦେହ। ତାହା ଆଜି ହିଁ ସ୍ପଷ୍ଟ ହେବ। ଇଂଲଣ୍ଡ ମଧ୍ୟ ଆହତ ସମସ୍ୟାରେ ଅଛି। କ୍ୟାପେଟନ ବେନ୍ ଷ୍ଟୋକ୍ସ ଓ ଜୋଫ୍ରା ଆର୍ଚର ପ୍ଲେଇଂ ଇଲେଭେନରୁ ବାଦ ପଡ଼ିଛନ୍ତି । ପୋପ୍ କ୍ୟାପେଟନସିପ୍ କରିବେ।
ପାଖେଇ ଆସିଲାଣି ବିହାର ବିଧାନସଭା ନିର୍ବାଚନ, ଏନଡିଏ ଲାଗି ଚିନ୍ତା ବଢ଼ାଇଲେଣି ଚିରାଗ ପାଶ୍ବାନ
ନନ୍ଦିଘୋଷ ବ୍ୟୁରୋ : ବିହାର ନିର୍ବାଚନ ଯେତିକି ପାଖଉଛି ଚିରାଗ ପାଶ୍ବାନ ଫାକ୍ଟର ଏନଡିଏ ମେଣ୍ଟ ଲାଗି ସେତିକି ସମସ୍ୟା ସୃଷ୍ଟି କରୁଛି । ବିହାରରେ ହତ୍ୟାକାଣ୍ଡ, ଲୁଟ, ଡକାୟତି, ଅପହରଣ, ଦୁଷ୍କର୍ମ ଆଦି ଘଟଣା ମୁଖ୍ୟ ସମସ୍ୟା ପାଲଟିଥିବାବେଳେ ପୋଲିସ ଓ ପ୍ରଶାସନ ଅପରାଧୀଙ୍କ ନିକଟରେ ଆତ୍ମସମର୍ପଣ କରିବା କଥା କହିଚାଲିଛନ୍ତି ଏଲଜେପି ରାମବିଳାସ ଦଳର ନେତା ଚିରାଗ । ଏହା ସହ ଏହି ସବୁ ଘଟଣାର ବୋଝ ସହଭାଗୀ ଦଳମାନେ ବି ବୋହି ଚାଲିଛନ୍ତି ବୋଲି ସେ କହିଛନ୍ତି । ରାଜ୍ୟରେ ନୀତୀଶ କୁମାର ନେତୃତ୍ବାଧୀନ ଏନଡିଏ ସରକାର ଚାଲିଥିବାବେଳେ ଚିରାଗ କେନ୍ଦ୍ରମନ୍ତ୍ରୀ ଅଛନ୍ତି । ତଥାପି ଏନଡିଏ ସରକାରକୁ ଖୋଲାଖୋଲି ସମାଲୋଚନା ବିହାର ରାଜନୀତିରେ ଚର୍ଚ୍ଚାର କାରଣ ପାଲିଟିଛି । ବିହାରର ୪୦ ଲୋକସଭା ଆସନ ମଧ୍ୟରୁ ଜେଡିୟୁ ୧୨, ବିଜେପି ୧୨, ଏଲଜେପି- ୫, ଆରଜେଡି ୪,କଂଗ୍ରେସ ୪, ସିପିଆଇଏମଏଲ ୨ ଆସନ ପାଇଛନ୍ତି । ଚିରାଗଙ୍କ କ୍ଷୋଭ ବିଶେଷ କରି ଜେଡିୟୁ ପ୍ରତି ଉଦ୍ଦିଷ୍ଟ ବୋଲି ଜଣାଯାଉଛି । ସେପଟେ ଚିରାଗଙ୍କ ମନ୍ତବ୍ୟକୁ ବିଜେପି ନା ସମର୍ଥନ କରୁଛି ନା ବିରୋଧ କରୁଛି । ଗତ ବିଧାନସଭା ନିର୍ବାଚନରେ ଏଲଜେପି ୧୩୫ ଆସନରେ ଲଢିଥିଲା ଯାହା ଫଳରେ ଜେଡିୟୁ ମାତ୍ର ୪୫ ଆସନ ଲାଭ କରିଥିଲା । ବିଜେପି ହାସଲ କରିଥିଲା ୮୦ ଆସନ ।
ଏହି କାରଣରୁ ଜେଡିୟୁ ଓ ଏଲଜେପି ମଧ୍ୟରେ ତିକ୍ତ ସମ୍ପର୍କ ରହିଛି । ସାରା ରାଜ୍ୟରେ ବ୍ୟାପକ ଅରାଜକତା ଜାରି ରହିଥିବାବେଳେ ଚିରାଗଙ୍କ ଆକ୍ରମଣ ନୀତୀଶ କୁମାରଙ୍କ ଲାଗି ସଙ୍କଟ ସୃଷ୍ଟି କରିଛି । ନୀତୀଶଙ୍କ ନିକଟରେ ଗୃହ ବିଭାଗ ଥିବାରୁ ଚିରାଗଙ୍କ ଟାର୍ଗେଟ ଅଧିକ ସମସ୍ୟା ସୃଷ୍ଟି କରୁଛି । ଚିରାଗଙ୍କ ସମାଲୋଚନା କାରଣରୁ ନୀତୀଶଙ୍କ ଗୁରୁତ୍ବ ବିଜେପି ନିକଟରେ ହ୍ରାସ ପାଇବାରେ ଲାଗିଛି । ଚିରାଗଙ୍କ ମନ୍ତବ୍ୟକୁ ଜେଡିୟୁ ଏବଂ ଜିତନ ରାମ ମାନଝୀଙ୍କ ହାମ(ଏସ) ବିରୋଧ କରୁଥିଲେ ବି ବିଜେପି ନୀରବ ରହିବା ନାନା ଆଭାସ ପ୍ରଦାନ କରୁଛି । ତେଣେ ଚିରାଗଙ୍କ ବିବୃତିକୁ ନେଇ ଏନଡିଏ ଉପରେ ଶାଣିତ ଟାର୍ଗେଟ କରୁଛନ୍ତି ଆରଜେଡି ନେତା ତେଜସ୍ବୀ ଯାଦବ ।
ଭାରତକୁ ପ୍ରତାରଣା : ଅଗଷ୍ଟ ୧ରୁ ୨୫% ଟାରିଫ ଲଗାଇବ ଆମେରିକା
ନନ୍ଦିଘୋଷ ବ୍ୟୁରୋ : ବନ୍ଧୁ ବନ୍ଧୁ କହି ଠିକ୍ ସମୟରେ ଭାରତକୁ ପ୍ରତାରଣା କଲେ ଆମେରିକା ରାଷ୍ଟ୍ରପତି ଡୋନାଲଡ ଟ୍ରମ୍ପ। ଭାରତରୁ ଆମଦାନୀ ଉପରେ ୨୫ ପ୍ରତିଶତ ଟାରିଫ ଲଗାଇଛନ୍ତି ଟ୍ରମ୍ପ। ଆସନ୍ତା ଅଗଷ୍ଟ ୧ରୁ ନୂଆ ଟାରିଫ ଲାଗୁ ହେବ। ରୁଷରୁ ଭାରତର ତୈଳ ଆମଦାନୀ ଏବଂ ଦୀର୍ଘ ଦିନ ଧରି ରହିଥିବା ବାଣିଜ୍ୟିକ ପ୍ରତିବନ୍ଧକକୁ ଦୃଷ୍ଟିରେ ରଖି ଏହି ପଦକ୍ଷେପ ନେଇଛନ୍ତି ଟ୍ରମ୍ପ। ନିଜର ଟ୍ରୁଥ ସୋସିଆଲରେ ସେ କହିଛନ୍ତି- ଭାରତକୁ ଆମେରିକାର ବନ୍ଧୁ ରାଷ୍ଟ୍ର ଭାବେ ଗ୍ରହଣ କରାଯାଉଥିଲେ ସୁଦ୍ଧା ଦୁଇ ଦେଶ ମଧ୍ୟରେ ବାଣିଜ୍ୟ ସମ୍ପର୍କ ସୀମିତ ରହିଛି। ଭାରତ ଏକ ବନ୍ଧୁ ରାଷ୍ଟ୍ର ହୋଇଥିଲେ ବି ଭାରତ ସହ ଆମେରିକା କମ ବାଣିଜ୍ୟ କରିଛି। କାରଣ ଭାରତର ଟାରିଫ ଅଧିକ ରହିଆସିଛି। ଏହା ସହ ରୁଷ ସହିତ ଭାରତର ପ୍ରତିରକ୍ଷା ଓ ଶକ୍ତି ସମ୍ପର୍କ ବି ଏହି ଟାରିଫ ବୃଦ୍ଧିର ଅନ୍ୟ ଏକ କାରଣ ହୋଇଛି। ଗତ ଏପ୍ରିଲରେ ଭାରତର ସାମଗ୍ରୀ ଉପରେ ୨୭ ପ୍ରତିଶତ ଟାରିଫ ଲାଗୁ କରିବାକୁ ସୂଚନା ଦେଇଥିଲେ। ସେବଠାରୁ ଦୁଇ ଦେଶ ମଧ୍ୟରେ ବାଣିଜ୍ୟ ପ୍ରସଙ୍ଗରେ ଆଲୋଚନା ଜାରି ରହିଥିଲା।
ବହୁଚର୍ଚ୍ଚିତ ୨୦୦୮ ମାଲେଗାଓଁ ବିସ୍ଫୋରଣ ମାମଲାର ଆଜି ପ୍ରକାଶ ପାଇବ ରାୟ
ନନ୍ଦିଘୋଷ ବ୍ୟୁରୋ : ବହୁଚର୍ଚ୍ଚିତ ୨୦୦୮ ମାଲେଗାଓଁ ବିସ୍ଫୋରଣ ମାମଲା । ଆଜି ରାୟ ପ୍ରକାଶ କରିବେ ମୁମ୍ବାଇର ସ୍ବତନ୍ତ୍ର କୋର୍ଟ । ଏହି ମାମଲାରେ ଅଭିଯୁକ୍ତ ଅଛନ୍ତି ପୂର୍ବତନ ବିଜେପି ସାଂସଦ ପ୍ରଜ୍ଞା ସିଂ ଠାକୁର ଓ ପୂର୍ବତନ ଲେଫ୍ଟନାଣ୍ଟ କର୍ଣ୍ଣେଲ ପ୍ରସାଦ ପୁରୋହିତ । ଅଭିଯୁକ୍ତ ଥିବା ୭ ଜଣଙ୍କ ବିରୋଧରେ ଆଇପିସିର ବିଭିନ୍ନ ଧାରା, ଆତଙ୍କବାଦ ବିରୋଧୀ ଆଇନ, ବେଆଇନ କାର୍ଯ୍ୟକଳାପ ନିରାକରଣ ଆଇନ ଅନୁସାରେ ମାମଲା ଚାଲୁ ରହିଥିଲା । ୨୦୦୮ ସେପ୍ଟେମ୍ବର ୨୯ରେ ରମଜାନ ବେଳେ ମହାରାଷ୍ଟ୍ର ନାସିକଠାରୁ ୧୦୦ କିଲୋମିଟର ଦୂର ତଥା ପାଓ୍ବାରଲୁମ ଶିଳ୍ପବହୁଳ ମାଲେଗାଓଁରେ ଘଟିଥିଲା ବୋମା ବିସ୍ଫୋରଣ । ମୁସଲିମବହୁଳ ଅଞ୍ଚଳରେ ଘଟିଥିବା ଏହି ବିସ୍ଫୋରଣରେ ପ୍ରାଣ ହରାଇଥିଲେ ୬ ଜଣ, ଆହତ ହୋଇଥିଲେ ୧୦୦ରୁ ଅଧିକ । ଏକ ଏଲଏମଏଲ ଫ୍ରିଡମ ବାଇକରେ ଖଞ୍ଜାଯାଇଥିବା ଆଇଇଡି ବିସ୍ଫୋରଣ ଘଟିଥିଲା । ଏହାର ତଦନ୍ତ କରୁଥିଲା ମହାରାଷ୍ଟ୍ର ଏଟିଏସ । ରମଜାନ ଓ ନବରାତ୍ରୀକୁ ଦୃଷ୍ଟିରେ ରଖିବା ସହ ସାମ୍ପ୍ରଦାୟିକ ହିଂସାକାଣ୍ଡ ଘଟାଇବା ଏହାର ମୁଖ୍ୟ ଉଦ୍ଦେଶ୍ୟ ଥିଲା । ଗାଡିରେ ଲାଗିଥିବା ନମ୍ବର ପ୍ଲେଟ MH-15-P-4572 ଫେକ୍ ଥିଲା । ତେବେ ଏହି ଗାଡିର ମାଲିକ ପ୍ରଜ୍ଞା ସିଂ ଠାକୁର ଓରଫ ସାଧ୍ବୀ ପୂର୍ଣ୍ଣଚେତନାନ୍ଦ ଗିରିଙ୍କ ମାଲିକାନାରେ ଏହି ଗାଡ଼ିଥିଲା । ୨୦୦୮ ଅକ୍ଟୋବର ୨୩ରେ ପ୍ରଜ୍ଞାଙ୍କୁ ଗିରଫ କରିଥିଲା ଏଟିଏସ । ଏହି ଘଟଣାରେ କର୍ଣ୍ଣେଲ ପୁରୋହିତ, ଅବସରପ୍ରାପ୍ତ ମେଜର ରମେଶ ଉପାଧ୍ୟାୟଙ୍କ ସମେତ ୧୧ ଜଣଙ୍କୁ ଗିରଫ କରାଯାଇଥିଲା । ନଭେମ୍ବର ୨୦୦୮ ରେ ସେମାନଙ୍କ ବିରୋଧରେ ମହାରାଷ୍ଟ୍ର ଅପରାଧିକ ନିୟନ୍ତ୍ରଣ ଆଇନ ବା ମକୋକା ଲାଗୁ କରାଯାଇଥିଲା । ଅଭିନବ ଭାରତ ନାମକ ଏକ ସଂଗଠନ ଜରିଆରେ ସେମାନେ ଏହି କାଣ୍ଡ ଘଟାଇଥିଲେ । ଏହି ମାମଲାର ଚାର୍ଜସିଟ ଦାଖଲ ହୋଇଥିଲା ୨୦୦୯ ଜାନୁଆରୀ ୨୦ରେ । ଏକ ହିନ୍ଦୁରାଷ୍ଟ୍ର ବା ଆର୍ଯ୍ୟାବର୍ତ୍ତ ଗଠନ ଦିଗରେ ସେମାନେ କାମ କରୁଥିବା ସୂଚନା ମିଳିଥିଲା । ଏହାର ଏକ ସ୍ବତନ୍ତ୍ର ସମ୍ବିଧାନ ଓ ପତାକା ବି ପ୍ରସ୍ତୁତ ହୋଇଥିଲା । ଏହି ବିସ୍ଫୋରଣ ଲାଗି ବହୁ ଆଗରୁ ଯୋଜନା ହୋଇଥିଲା ଏବଂ ଫରିଦାବାଦ, ଭୋପାଳ ଓ ନାସିକରେ ବୈଠକ ହୋଇଥିଲା । ଏଥିଲାଗି ପାଣ୍ଠି ଯୋଗାଡିଥିଲେ ପ୍ରଜ୍ଞା । ସେତେବେଳେ ଜାମ୍ମୁ ଓ କାଶ୍ମୀରରେ ଥିବା ପୁରୋହିତଙ୍କ ଜରିଆରେ ଆରଡିଏକ୍ସ ସଂଗ୍ରହ ହୋଇଥିଲା । ସୁଧାକର ଚତୁର୍ବେଦୀ ନାମକ ଜଣେ ବ୍ୟକ୍ତିଙ୍କ ଘରେ ବୋମା ପ୍ରସ୍ତୁତ ହୋଇଥିଲା । ଏହି ବୋମାକୁ ବାଇକରେ ଖଞ୍ଜିଥିଲେ ସୁଧାକର ଓ ରାମଚନ୍ଦ୍ର କଳସଙ୍ଗ୍ରା । ୨୦୧୧ରେ ମାମଲାକୁ ଏନଆଇଏକୁ ହସ୍ତାନ୍ତର କରାଯାଇଥିଲା ।
ସୌନ୍ଦର୍ଯ୍ୟ ଭରା ପରିବେଶ ସହ ପାହାଡର ମଧ୍ୟ ଭାଗରେ ପୂଜା ପାଉଛନ୍ତି ବାବା ଭୋଳାନାଥ
ନନ୍ଦିଘୋଷ ବ୍ୟୁରୋ: ଶ୍ରାବଣରେ ଚଳଚଞ୍ଚଳ ରାଜ୍ଯର ସମସ୍ତ ଶୈବପୀଠ । ଏହାରି ଭିତରେ କଣ୍ଟାମାଳ ବ୍ଲକର ବିରାମୁଣ୍ଡା ମନ୍ଦିରରେ ଲାଗୁଛି ଭକ୍ତଙ୍କ ଗହଳି । ପାହାଡରେ ହେଉଛି ଭକ୍ତ ଓ ଭଗବାନଙ୍କ ଅପୂର୍ବ ମିଳନ । ବାବା ବିଶ୍ଵେଶର ମହାଦେବଙ୍କୁ ଦର୍ଶନ କରି କରୁଣା ଲାଭ କରୁଛନ୍ତି ଭକ୍ତ ।
ବିସ୍ତିର୍ଣ୍ଣ ଜଙ୍ଗଲ । ସୌନ୍ଦର୍ଯ୍ଯ ଭରା ପରିବେଶ ସହ ପାହାଡର ମଧ୍ଯ ଭାଗରେ ପୂଜା ପାଉଛନ୍ତି ବାବା ଭୋଳା ନାଥ । ବୌଦ୍ଧ ଜିଲ୍ଲା କଣ୍ଟାମାଳ ବ୍ଲକ ଲମ୍ବସ୍ୱରୀ ପଂଚାୟତର ବିରାମୁଣ୍ଡା ମନ୍ଦିରରେ ପୂଜା ପାଉଛନ୍ତି ବାବା ବିଶ୍ୱେଶର । ଏହି ମନ୍ଦିରକୁ ପ୍ରତିଦିନ ଶହ ଶହ ଲୋକଙ୍କ ସୁଅ ଛୁଟେ । ବିଶେଷ କରି ଶ୍ରାବଣ ମାସରେ ହଜାର ହଜାର ସଂଖ୍ଯାରେ ଭକ୍ତଙ୍କ ଭିଡ ଜମେ । ବାବାଙ୍କ ଦର୍ଶନ କରି କରୁଣା ଲାଭ କରନ୍ତି ଭକ୍ତ ।
ବିରାମୁଣ୍ଡା ମନ୍ଦିର ଆଗରେ ଅଛି ଗୁପ୍ତ ଗଙ୍ଗା । ଯେଉଁଥିରୁ ବର୍ଷ ସାରା ପାଣି ଝରୁଥାଏ । ସେହି ପାଣିରେ ବିଶ୍ୱେଶର ବାବାଙ୍କ ପୂଜା କରାଯାଇ ଥାଏ I ମନ୍ଦିର ନିର୍ମାଣକୁ ୨୫ ବର୍ଷରୁ ଉର୍ଦ୍ଧ୍ଵ ସମୟ ହେଲାଣି । ଭକ୍ତଙ୍କ ଅନୁଦାନ ସହ ସରକାରୀ ଅନୁଦାନରେ ମନ୍ଦିରର କିଛି କାମ ହୋଇଛି । କିନ୍ତୁ ଆଜିବି ମନ୍ଦିରକୁ ଯିବାକୁ ଭଲ ରାସ୍ତା ଓ ପିଇବା ପାଣି, ବିଜୁଳି ଭଳି ଅନେକ ସମସ୍ୟା ରହିଛି l ସରକାର ଏଥିପ୍ରତି ଧ୍ଯାନ ଦେଲେ ମନ୍ଦିରରେ ଆହୁରି ଭକ୍ତଙ୍କ ସମାଗମ ହୁଅନ୍ତା ।
ଯାଜପୁରରେ ଲୋକଙ୍କ ହିତରେ ଲାଗୁନି ବିନ୍ଧାଣ ଆଦର୍ଶ ମାର୍କେଟ କମ୍ପ୍ଲେକ୍ସ
ନନ୍ଦିଘୋଷ ବ୍ୟୁରୋ: ଯାଜପୁରରେ ବ୍ଯବସାୟୀଙ୍କ କାମରେ ଆସୁନି ବିନ୍ଧାଣ ଆଦର୍ଶ ମାର୍କେଟ କମ୍ପ୍ଲେକ୍ସ । ବନ୍ଦ ହୋଇପଡିଛି ଲକ୍ଷାଧିକ ଟଙ୍କାରେ ନିର୍ମିତ ଭିତ୍ତିଭୂମି । ଆମିଷ ବ୍ୟବସାୟୀ ଓ ପନିପରିବା ବ୍ୟବସାୟୀଙ୍କ ଉଦ୍ଦେଶ୍ଯରେ ନିର୍ମିତ ସ୍ଥାନ ହୋଇପାରୁନି ଆବଣ୍ଟିତ । ଫଳରେ ହଇରାଣ ହରକତ ହେଉଛନ୍ତି ବ୍ଯବସାୟୀ ।
ଲୋକଙ୍କ ହିତରେ ଲାଗୁନି RMC ମାର୍କେଟ । ବନ୍ଦ ହୋଇପଡିଛି ଲକ୍ଷାଧିକ ଟଙ୍କାରେ ନିର୍ମିତ ଭିତ୍ତିଭୂମି । ଯାଜପୁର ଆରଏମସି ବା ନିୟନ୍ତ୍ରିତ ବଜାର କମିଟି ପକ୍ଷରୁ ଗତ ବର୍ଷ ସେପ୍ଟେମ୍ବର ମାସରୁ ଉଦଘାଟିତ ହୋଇଛି ବିନ୍ଧାଣ ଆଦର୍ଶ ମାର୍କେଟ କମ୍ପ୍ଲେକ୍ସ । ଆମିଷ ବ୍ୟବସାୟୀ ଓ ପନିପରିବା ବ୍ୟବସାୟୀଙ୍କ ଉଦ୍ଦେଶ୍ଯରେ ନିର୍ମିତ ଏହି ସ୍ଥାନ ଠିକ ଭାବେ ବଣ୍ଟନ ହୋଇ ନଥିବାରୁ ଜାଗା ଖାଲି ପଡୁଛି । ଫଳରେ ମାଛ ବ୍ଯବସାୟୀ ବାହାରେ ମାଛ ବେପାର କରୁଥିବା ବେଳେ ପରିବା ବ୍ଯବସାୟୀ ତଳେ ବସି ବେପାର କରୁଛନ୍ତି । ସେହିଭଳି ଏଠାକୁ ପ୍ରତିଦିନ ଶତାଧିକ ଲୋକ ଆସୁଥିବାରୁ ସ୍ଥାନୀୟ ଅଞ୍ଚଳ ଅଳିଆ ଆବର୍ଜନାରେ ଭର୍ତ୍ତି ହୋଇଗଲାଣି । ସାମାନ୍ୟ ବର୍ଷା ହେଲେ ଏହି ଜାଗା କାଦୁଅରେ ଭର୍ତ୍ତି ହୋଇଯାଉଥିବାରୁ ଗ୍ରାହକ ଆସୁନାହାନ୍ତି । ମାର୍କେଟରୁ ଆରଏମସି ଟିକସ ସଂଗ୍ରହ କରୁଥିଲେ ମଧ୍ୟ କୌଣସି ସଠିକ ପଦକ୍ଷେପ ଗ୍ରହଣ କରୁ ନଥିବା ଅଭିଯୋଗ କରିଛନ୍ତି ବ୍ୟବସାୟୀ ।
ଯାଜପୁର ନିୟନ୍ତ୍ରିତ ବଜାର କମିଟି ପକ୍ଷରୁ ପ୍ରଥମେ ଆଙ୍କୁଲା ଠାରେ ଏକ ମାର୍କେଟ କମ୍ପ୍ଲେସ ପ୍ରତିଷ୍ଠା କରାଯାଇଥିଲା । କିନ୍ତୁ ଯାଜପୁର ମେଡିକାଲ କଲେଜ ପ୍ରତିଷ୍ଠା ଯୋଗୁଁ ସେହି କମ୍ପ୍ଲେକ୍ସକୁ ଉଚ୍ଛେଦ କରାଯାଇ ବିନ୍ଧାଣରେ ପ୍ରତିଷ୍ଠା କରାଯାଇଛି । କିନ୍ତୁ ଅଦ୍ୟାବଧି ଆଙ୍କୁଲାରେ ଥିବା ବ୍ୟବସାୟୀ ମାନଙ୍କୁ ଆଜି ପର୍ଯ୍ୟନ୍ତ ଥଇଥାନ କରାଯାଇନାହିଁ । ଅନ୍ଯପଟେ ମାର୍କେଟ କମ୍ପ୍ଲେକ୍ସର ଅବ୍ଯବସ୍ଥା ନେଇ ଆରଏମସି ଅବଗତ ଅଛି ଏବଂ ଶୀଘ୍ର ସମସ୍ଯାର ସମାଧାନ କରାଯିବ ବୋଲି ନିୟନ୍ତ୍ରିତ ବଜାର କମିଟିର ଅଧ୍ୟକ୍ଷ କହିଛନ୍ତି । ଆରଏମସି ଶୀଘ୍ର ବ୍ଯବସାୟୀଙ୍କ ସମସ୍ଯାର ସମାଧାନ କରିବାକୁ ଦାବି ଜୋର ଧରିଛି ।
ଗଜପତିରେ ଫେଲ୍ ମାରିଛି ଶିଶୁ ବିକାଶ ଯୋଜନା
ନନ୍ଦିଘୋଷ ବ୍ୟୁରୋ: ଫେଲ ମାରିଛି ଶିଶୁ ବିକାଶ ଯୋଜନା । ବିଫଳ ହେଉଛି ପୋଷଣ କାର୍ଯ୍ୟକ୍ରମ । ମହିଳା ଓ ଶିଶୁଙ୍କ ସ୍ବାସ୍ଥ୍ୟର ବିକାଶ ପାଇଁ କାର୍ଯ୍ୟ କରୁଛି ସମନ୍ୱିତ ଶିଶୁ ବିକାଶ ପ୍ରକଳ୍ପ । ଏହି ପ୍ରକଳ୍ପ ମାଧ୍ୟମରେ ଶିଶୁ ଓ ମହିଳା ସହ କିଶୋରୀ ବାଳିକାମାନଙ୍କ ଶିକ୍ଷା ଓ ସ୍ବାସ୍ଥ୍ୟର ଯତ୍ନ ନେବା ବ୍ୟବସ୍ଥା ରହିଛି। ହେଲେ ଗଜପତିରେ ଏହାର ଲକ୍ଷ୍ଯ ସମ୍ପୂର୍ଣ୍ଣ ଭ୍ରଷ୍ଟ ହୋଇଥିବା ଦେଖିବାକୁ ମିଳିଛି ।
ଗଜପତିରେ ଫେଲ ମାରିଛି ଶିଶୁ ବିକାଶ ଯୋଜନା । ମହିଳା, ଶିଶୁ ଓ କିଶୋରୀଙ୍କୁ ସଠିକ ଭାବେ ଦିଆଯାଉନି ପୋଷଣ । ପୁଷ୍ଟିକର ଖାଦ୍ଯ ଅଭାବରୁ ଅନେକ ଏବେ ଅପପୁଷ୍ଟିର ଶିକାର । ପ୍ରତି ଗାଁରେ ମହିଳା ଓ ଶିଶୁଙ୍କ ସ୍ବାସ୍ଥ୍ୟର ବିକାଶ ପାଇଁ କାର୍ଯ୍ୟ କରୁଛି ସମନ୍ୱିତ ଶିଶୁ ବିକାଶ ପ୍ରକଳ୍ପ । ଏହି ପ୍ରକଳ୍ପ ଜରିଆରେ ଶିଶୁ, କିଶୋରୀ ଗର୍ଭବତୀ ଓ ପ୍ରସୂତିଙ୍କୁ ଅଣ୍ଡା, ଛତୁଆ, ବାଦାମ ମିଶ୍ରିତ ଲଡୁ, ରନ୍ଧାଖାଦ୍ୟ ଯୋଗାଇ ଦିଆଯାଉଛି । ହେଲେ ଜିଲ୍ଲାରେ କେଉଁଠି ଅଙ୍ଗନବାଡ଼ି କୋଠା ନାହିଁ ତ କେଉଁଠି କର୍ମଚାରୀଙ୍କ ଖାମଖିଆଲ ମନୋଭାବ ଯୋଗୁଁ ସରକାରୀ ଯୋଜନାରୁ ବଞ୍ଚିତ ହେଉଛନ୍ତି ଅନେକ ହିତାଧିକାରୀ । ରାୟଗଡ ବ୍ଳକ ସାନତୁଣ୍ଡି ପଞ୍ଚାୟତ ଚେରୁ ସାହିରେ ଦୀର୍ଘ ବର୍ଷ ହେଲା ଅଙ୍ଗନବାଡ଼ି କେନ୍ଦ୍ର ଚାଲୁ ନଥିବା ବେଳେ କୋଠାଟି ଅର୍ଦ୍ଧନିର୍ମିତ ଅବସ୍ଥାରେ ପଡିରହିଛି । ଅନ୍ୟ ଏକ ଗାଁରୁ ଅଙ୍ଗନବାଡ଼ି କର୍ମୀ, ମାସ ମାସ ବ୍ୟବଧାନରେ ଥରେ ଓଳିଏ ଆସି ଚାଲି ଯାଉଥିବା ଅଭିଯୋଗ ହୋଇଛି । ଫଳରେ ଏଠାରେ ଶିଶୁମାନଙ୍କର ସମସ୍ତ ଅଧିକାର କ୍ଷୁଣ୍ଣ ହେଉଛି । ସେହିଭଳି ନୂଆଗଡ ବ୍ଲକ ଖଜୁରୀପଦା ଗାଁରେ ଏକ ଭଡା ଘରେ ଚାଲିଛି ଅଙ୍ଗନବାଡି କେନ୍ଦ୍ର । ଉପଯୁକ୍ତ କୋଠା ଓ ଭିତ୍ତିଭୂମି ନଥିବାରୁ ବିଭିନ୍ନ କାର୍ଯ୍ୟକ୍ରମ କରିବାରେ ସମସ୍ୟା ସୃଷ୍ଟି ହେଉଥିବା କହିଛନ୍ତି ଅଙ୍ଗନବାଡ଼ି କର୍ମୀ।
ସରକାରୀ ତଥ୍ୟ ଅନୁସାରେ, ବର୍ତ୍ତମାନ ଜିଲ୍ଲାରେ ୩୯୬ ଜଣ ଶିଶୁ ଅପପୁଷ୍ଟିର ଶିକାର ହୋଇଥିବା ଚିହ୍ନଟ ହୋଇଛନ୍ତି । ଅପପୁଷ୍ଟି ହାର ନିୟନ୍ତ୍ରଣ ପାଇଁ ସମସ୍ତ ଅଙ୍ଗନବାଡ଼ି କେନ୍ଦ୍ର ମାଧ୍ୟମରେ ପୁଷ୍ଟିସାର ମିଶ୍ରିତ ରନ୍ଧାଖାଦ୍ୟ ସହ ଗୋଟିଏ ଶିଶୁ ପିଛା ମାସିକ ୨ କିଲୋ ୨୦୦ ଗ୍ରାମ ଛତୁଆ , ୧୨ଟି ଅଣ୍ଡା, ୧ କିଲୋ ୩୦୦ ଗ୍ରାମ ସୁଜି ଯୋଗାଇ ଦିଆଯାଉଛି । ସେହପରି ଗର୍ଭବତୀ ଓ ପ୍ରସୂତିଙ୍କୁ ୩ କିଲୋ ୬୦୦ଗ୍ରାମ ଛତୁଆ , ୧୨ ଟି ଅଣ୍ଡା, ୨୫ ଟି ବାଦାମ ଲଡୁ ଦିଆଯିବା ସହ କିଶୋରୀ ବାଳିକା ପାଇଁ ଅଧିକ ୪ ଟି ଅଣ୍ଡା ଦେବାକୁ ବ୍ୟବସ୍ଥା ରହିଛି । ଜିଲ୍ଲାରେ ୨ ହଜାର ୪୪୩ଟି ଅଙ୍ଗନବାଡି କେନ୍ଦ୍ରରେ ୫୩ ହଜାର ୩୫୫ ଶିଶୁ , ୧୧ ହଜାର ୩୮୬ କିଶୋରୀ, ୪୨୭୮ ଗର୍ଭବତୀ ଏବଂ ୩୩୭୮ ପ୍ରସୂତି ହିତାଧିକାରୀ ପଞ୍ଜିକୃତ ଅଛନ୍ତି । ହେଲେ ୨୪୪୩ କେନ୍ଦ୍ର ମଧ୍ୟରୁ ମାତ୍ର ୧୫୯୯ଟି କେନ୍ଦ୍ର ପରିଚାଳନା ହେଉଛି । କିନ୍ତୁ ବଳକା ୮୪୪ଟି କେନ୍ଦ୍ରରେ କୋଠା ନିର୍ମାଣ ହୋଇନାହିଁ । ଫଳରେ ଯୋଜନାର ସୁଫଳ ପାଇବାରୁ ବଞ୍ଚିତ ହେଉଛନ୍ତି ଜିଲ୍ଲାର ୩୫ ଭାଗ ଶିଶୁ କିଶୋରୀ ଓ ମହିଳା।
ପ୍ରଶାସନର ଅବହେଳାରୁ ଚାଲୁ ନାହଁ କେନ୍ଦ୍ର, ଠିକ୍ ସେ ବିତରଣ ହେଉନାହିଁ ପୋଷଣ ଖାଦ୍ୟ । ଯାହାର ସିଧା ପ୍ରଭାବ କୋମଳ ମତି ଶିଶୁ, ମହିଳା ଓ କିଶୋରୀ ବାଳିକାମାନଙ୍କ ଉପରେ ପଡୁଛି ।
ଲଗାଣ ବର୍ଷାରେ ଭୁଶୁଡ଼ିଲା ସ୍କୁଲ ଶ୍ରେଣୀ ଘର
ନନ୍ଦିଘୋଷ ବ୍ୟୁରୋ: ଲଗାଣ ବର୍ଷାରେ ଭୁଷୁଡ଼ିଲା ସ୍କୁଲ ଶ୍ରେଣୀ ଘର । ଏବେ ବିପଦ ସଂକୁଳ ଅବସ୍ଥାରେ ଥିବା ଅତିରିକ୍ତ ଶ୍ରେଣୀ ଗୃହରେ ଚାଲିଛି ପିଲାଙ୍କ ପାଠପଢା । କନ୍ଧମାଳ ଜିଲ୍ଲା ବାଲିଗୁଡ଼ା ବ୍ଲକ ଅନ୍ତର୍ଗତ ବାରଖମା ପଞ୍ଚାୟତର ନାଡ଼ାପାଟାଙ୍ଗ ପ୍ରକଳ୍ପ ଉଚ୍ଚ ପ୍ରାଥମିକ ବିଦ୍ୟାଳୟରେ ଦେଖିବାକୁ ମିଳିଛି ଏଭଳି ଅବସ୍ଥା । ବର୍ଷା କାରଣରୁ ଶ୍ରେଣୀ ଗୃହ ଭୁଶୁଡିପଡିଥିବାରୁ ବର୍ତ୍ତମାନ ଭଙ୍ଗା ଆଜବେଷ୍ଟସ ଘରେ ପାଠ ପଢୁଛନ୍ତି ୭୭ ଜଣ ଛାତ୍ରଛାତ୍ରୀ । ସ୍କୁଲର ଅବସ୍ଥା ଶୋଚନୀୟ ଥିବାରୁ ଏବେ ପିଲାଙ୍କୁ ବିଦ୍ଯାଳୟକୁ ଛାଡିବାକୁ ଅସୁରକ୍ଷିତ ମଣୁଛନ୍ତି ଅଭିଭାବକ । ପୂର୍ବରୁ ବିଦ୍ଯାଳୟର ଶ୍ରେଣୀ ଗୃହ ନିର୍ମାଣ ସହ ଆନୁଷଙ୍ଗିକ ସୁରକ୍ଷା ପ୍ରତି ବିଦ୍ଯାଳୟର ପ୍ରଧାନ ଶିକ୍ଷକ ଓ ଗ୍ରାମବାସୀ ପ୍ରଶାସନ ଓ ବିଭାଗୀୟ ଅଧିକାରୀଙ୍କୁ ଜଣାଇଥିଲେ । ହେଲେ କେହି ଦୃଷ୍ଟି ଦେଉନଥିବା ଅଭିଯୋଗ ହୋଇଛି । ବର୍ତ୍ତମାନ ଛାତ୍ରଛାତ୍ରୀଙ୍କ ଭବିଷ୍ଯତକୁ ଗୁରୁତ୍ଵ ଦେଇ ପ୍ରଶାସନ ଏଥିପ୍ରତି ଦୃଷ୍ଟି ଦେବାକୁ ଦାବି କରିଛନ୍ତି ଗ୍ରାମବାସୀ । ଅନ୍ୟପଟେ ବିଦ୍ୟାଳୟର ଶ୍ରେଣୀଗୃହ ବର୍ଷାରେ ଭୁଷୁଡ଼ିବା ଖବର ମୁଁ ପାଇଛି, ଏନେଇ ମୁଁ ଉପରିସ୍ଥ ଅଧିକାରୀଙ୍କୁ ଜଣାଇ ଖୁବ୍ ଶୀଘ୍ର ସମସ୍ୟାର ସମାଧାନ ପାଇଁ ପଦକ୍ଷେପ ନେବି ବୋଲି କହିଛନ୍ତି ବାଲିଗୁଡ଼ା ବ୍ଲକ୍ ଗୋଷ୍ଠୀ ଶିକ୍ଷା ଅଧିକାରୀ ।
ପ୍ରଖର ସ୍ରୋତରେ ଭାସିଗଲେ ଦୁଇ ଯୁବକ
ନନ୍ଦିଘୋଷ ବ୍ୟୁରୋ: ସୁନ୍ଦରଗଡ଼ ଇବ ନଦୀ କନାକୁଣ୍ଡ ଠାରେ ପୁଣି ଭାସିଗଲେ ଦୁଇ ଯୁବକ । ଗାଧୋଇବାକୁ ଯାଇ ପ୍ରଖର ସ୍ରୋତରେ ଭାସି ଯାଇ ନିଖୋଜ ହୋଇଛନ୍ତି । ସମ୍ବଲପୁର ଜିଲ୍ଲା ଗୋବିନ୍ଦପୁର ଥାନା ଅଞ୍ଚଳର ତିନି ଜଣ ସାଙ୍ଗ ବୁଲିବାକୁ ଆସିଥିଲେ । ଗାଧୋଇବା ବେଳେ ତିନି ଜଣ ଭାସି ଯାଇଥିଲେ । ଜଣେ ପହଁରା ଜାଣିଥିବାରୁ ବାହାରି ଆସିଥିଲେ ।ହେଲେ ଅନ୍ୟ ୨ ସାଙ୍ଗ ରୋଶନ ପାଶୱାନ ଏବଂ ଜୟନାରାୟଣ ପାତ୍ର ଭାସି ଯାଇ ନିଖୋଜ ଥିବା ସୂଚନା ମିଳିଛି । ଘଟଣାସ୍ଥଳରେ ସ୍ଥାନୀୟଲୋକେ, ପୁଲିସ ଓ ଅଗ୍ନିଶମ ବିଭାଗ ଖୋଜାଖୋଜି ଜାରି ରଖିଛନ୍ତି । ପୂର୍ବରୁ ମଧ୍ୟ ସେଠାର ପାଣିରେ ଭାସି ୬ ଜଣଙ୍କ ମୃତ୍ୟୁ ହୋଇଛି ।
ମାଛଗାଁ କେନାଲରେ ୧୦ ଫୁଟର ଘାଇ
ନନ୍ଦିଘୋଷ ବ୍ୟୁରୋ: ମାଛଗାଁ କେନାଲରେ ୧୦ ଫୁଟର ଘାଇ । ଜଗତସିଂହପୁର କଟକ ରାସ୍ତାର ତରିକୁନ୍ଦ ଠାରେ ମାଛଙ୍ଗା କେନାଲରେ ୧୦ ଫୁଟର ଘାଇ ହୋଇଛି । ଏନେଇ ତରିକୁନ୍ଦ ପଞ୍ଚାୟତବାସୀ ଆତଙ୍କିତ ହୋଇ ପଡିଛନ୍ତି । ତରିକୁନ୍ଦ ନୂଆଦା ଠାରେ ଘାଇ ସୃଷ୍ଟି ହୋଇଯାଇଛି । ବର୍ତ୍ତମାନ ମାଛଙ୍ଗା କେନାଲ ନିକଟରେ ତରିକୁନ୍ଦ ଫାଣ୍ଡି ପୋଲିସ କର୍ମଚାରୀମାନେ ଲୋକଙ୍କୁ ଘାଇ ପାଖକୁ ନ ଯିବା ପାଇଁ ବାରଣ କରିଛନ୍ତି । ଯୁଦ୍ଧକାଳୀନ ଭିତରେ ପାଣିକୁ ରୋକା ନଗଲେ ରାସ୍ତାରେ ପାଣି ଚାଲିବ ବୋଲି ଗ୍ରାମବାସୀ କହିଛନ୍ତି ।