ମାଲକାନଗିରି:  କୁହାଯାଏ ମଶାଣି ହେଉଛି ସମସ୍ତଙ୍କ ଶେଷ ଲକ୍ଷ୍ୟସ୍ଥଳୀ । ମଣିଷ ଯେତେ ଯାହା କରୁନା କାହିଁକି ଶେଷରେ ସେ ମଶାଣିରେ ନିଜର ଅନ୍ତିମ ଯାତ୍ରାରେ ବିରାମ ଲଗାଇଥାଏ । ଜଣେ ଜୀବିତ ମଣିଷ କେବେବି ମଶାଣିରେ ରହିବା କଥା ଭାବେନା ବରଂ ଅଧିକାଂଶଙ୍କ ମନରେ ଏହି ନାମ ଶୁଣିବା ମାତ୍ରେ ଭୟ ସୃଷ୍ଟି ହୁଏ । କିନ୍ତୁ ଏସବୁର ବିପରୀତ ଭାବେ ମାଲକାନଗିରି ଜିଲ୍ଲାରେ ଏମିତି ଏକ ମଶାଣି ଅଛି ଯେଉଁଠାକୁ ଲୋକେ ଯିବା ପାଇଁ ଭୟ ବଦଳରେ ଆଗ୍ରହ ପ୍ରକାଶ କରୁଛନ୍ତି । ମଶାଣିଟିକୁ ଜଣେ ବ୍ୟକ୍ତି ବର୍ତମାନ ଅବର୍ଜନାର ସଦୁପଯୋଗ କରି ଏଭଳି ସୁନ୍ଦର କରିବାରେ ଲାଗିଛନ୍ତି ଯେ ତାହା ବର୍ତମାନ ଲୋକଙ୍କ ମନରେ ଏକ ଉଦ୍ୟାନର ଭ୍ରମ ସୃଷ୍ଟି କରୁଛି । କେବଳ ସେତିକି ନୁହେ ସେ ନିଜେ ମଶାଣିରେ ରହିବା ସହ ମଶାଣିର ପରିବେଶକୁ ସ୍ଵଚ୍ଛ କରିବାରେ ଲାଗିଛନ୍ତି । ତେବେ ଏମିତି ଏକ ମସାଣି ବନ୍ଧୁ ହେଉଛନ୍ତି ମାଲକାନଗିରି ଜିଲ୍ଲା ମାଥିଲି ବ୍ଲକର ବନ୍ଧୁ ନାଏକ ।

ବନ୍ଧୁ ନାଏକ ସାଜିଛନ୍ତି ଜଣେ ମଶାଣି ବନ୍ଧୁ । ମଶାଣିକୁ ଦେଇଛନ୍ତି ଉଦ୍ୟାନର ରୂପ, ସଜାଇ ହୋଇଛି ସାରା ପରିବେଶ । ଲୋକଙ୍କ ଆବର୍ଜନାକୁ ବ୍ୟବହାର କରି ସୁସଜ୍ଜିତ କରିବାରେ ଲାଗିପଡିଛନ୍ତି । କେଉଁଠି ପଲିଥିନ ବାନ୍ଧି ତ ପୁଣି କେଉଁଠି ପ୍ଲାଷ୍ଟିକ ବୋତଲ ବ୍ୟବହାର କରି ନିର୍ମାଣ କରାଯାଇଛି ଅନେକ କଳାକୃତି । ଲୋକଙ୍କ ମନରେ ଏହା ଏବେ ସୃଷ୍ଟି କରିଛି ଉଦ୍ୟାନର ଭ୍ରମ । ଏହି ମଶାଣି ରହିଛି ମାଲକାନଗିରି ଜିଲ୍ଲା ମାଥିଲି ବ୍ଲକରେ, ଆଉ ଏହାକୁ ଏଭଳି ରୂପ ଦେଇଥିବା କାରିଗର ହେଉଛନ୍ତି ଏହି ଅଞ୍ଚଳର ବନ୍ଧୁ ନାଏକ ।

ଦିନେକି ମାସେ ନୁହେ, ଏହି ମଶାଣିକୁ ନିଜର ଘର ଭାବି ବନ୍ଧୁ ନାଏକ ଦୀର୍ଘବର୍ଷ ଧରି ଏଠାରେ ରହି ଆସୁଛନ୍ତି । ପୂର୍ବରୁ ଜଣେ କାଠ କାରିଗର ଭାବେ କାମ କରୁଥିବା ବନ୍ଧୁ ନାଏକ ବର୍ତ୍ତମାନ ମାନସିକ ରୋଗରେ ପୀଡିତ ଥାଇବି ନିଜର କଳାକୃତିକୁ ଭୁଲି ନାହାନ୍ତି । ଦିନେ ଶୁଷ୍କ କାଠରେ ଜୀବନ ଭରିଦେଉଥିବା ବନ୍ଧୁ ନାଏକ ମଶାଣିରେ ରହିବା ସହ ନିଜ ପରିଶ୍ରମ ବଳରେ ମଶାଣିର ପରିବେଶକୁ ଅତି ସୁନ୍ଦର ଭାବରେ ସଜାଇଛନ୍ତି । ଯାହାକି ବର୍ତମାନ ଏଠାକାର ଲୋକଙ୍କୁ ଆକୃଷ୍ଟ କରିବାରେ ଲାଗିଛି ।

ମାଥିଲି ଅଞ୍ଚଳର ବେଶ ଜଣାଶୁଣା କାଠ କାରିଗର ନିଜେ ପରିଶ୍ରମ କରିବା ସହ ନିଜର ପରିବାର ପ୍ରତିପୋଷଣ କରୁଥିଲେ ବନ୍ଧୁ ନାଏକ । କିନ୍ତୁ ସମୟ ସୁଅରେ ବଦଳିଥିଲା ବନ୍ଧୁ ନାଏକଙ୍କ ଜୀବନ ଶୈଳୀ । ନିଜ ସ୍ତ୍ରୀ ଓ ପୁଅଙ୍କ ମୃତ୍ୟୁ ପରେ ମାନସିକ ଚାପରେ ସେ ଘର ଛାଡି ମଶାଣିକୁ ନିଜର ଘର କରି ନେଇଥିଲେ । ମଶାଣିରେ ରହି ରହି କ୍ରମଶଃ ନିଜ ପରିବାରର ବିୟୋଗରେ ସେ ମାନସିକ ବିକାର ଗ୍ରସ୍ତ ମଧ୍ୟ ହୋଇଥିଲେ । ତେବେ ମାନସିକ ବିକୃତ ବନ୍ଧୁ ନାଏକ କିନ୍ତୁ ଭୁଲି ନଥିଲେ ନିଜର କଳାକୃତିକୁ ।

ତାଙ୍କ ପାଇଁ ସରକାରୀ ସ୍ତରରେ କୌଣସି ସୁବିଧା ଯୋଗାଇ ଦିଆଯାଉନାହିଁ  କିମ୍ବା ତାଙ୍କୁ ସୁସ୍ଥ କରିବା ପାଇଁ ମଧ୍ୟ କେହି ପଦକ୍ଷେପ ନେଉନାହାନ୍ତି । ମାଥିଲି ସରପଞ୍ଚଙ୍କୁ ପଚାରିବାରୁ ସେ ବନ୍ଧୁ ନାଏକଙ୍କ ସମସ୍ୟାର ସମାଧାନ କରିବା ପାଇଁ ପଦକ୍ଷେପ ନେବେ ବୋଲି ମତ ରଖିଛନ୍ତି ।

ସେ ହାରି ନାହାନ୍ତି… । ସମାଜର ବାଛ ବିଚାରକୁ ଡରିଯାଇ ପଛକୁ ଫେରି ନାହାନ୍ତି… । ସାହାସ ଜୁଟାଇଛନ୍ତି ଆଉ ବଢ଼ି ଚାଲିଛନ୍ତି ଆଗକୁ ଆଗକୁ । ଯାହାର ପରିଣାମରେ ଗାଁର ପ୍ରଥମ ମହିଳା ଇଲେକ୍ଟ୍ରିସିଆନ ହୋଇପାରିଛନ୍ତି ସେ । ସେ ହେଉଛନ୍ତି ଓଡ଼ିଶା ସୋରଣ ଗାଁର ସୀତା ବେହେରା ।

ସୀତା ବେହେରା ଯେବେ ଛୁଟି ସମୟରେ ନିଜ ଗାଁକୁ ଯାଆନ୍ତି, ଲୋକମାନଙ୍କର ଥଟ୍ଟା ପର ପାତ୍ର ହୋଇଥାନ୍ତି । ପୁଅ ମାନେ ମିଶି ତାଙ୍କୁ ତାତ୍ସଲ୍ୟ କରନ୍ତି । ସୀତା ନିଜ କଲେଜ ୟୁନିଫର୍ମ ସାର୍ଟ ପ୍ୟାଣ୍ଟ ପିନ୍ଧି ଗାଁକୁ ଗଲେ ଘର ପଡ଼ିଶା ଲୋକ ତାଙ୍କୁ ଥଟ୍ଟା କରିଥାନ୍ତି । ଝିଅଟିଏ ହୋଇ ଇଞ୍ଜିନିୟରିଂ ପାଠ ପଢ଼ିବାକୁ ସୀତା ଘରୁ ପାଦ କାଢ଼ିଥିଲେ, ତାହା ହଜମ ହେଉନଥିଲା ଗାଁ ଲୋକଙ୍କ ଦେହରେ । ଇଞ୍ଜିନିୟରିଂ ଭଳି ପାଠ କେବଳ ପୁଅ ପିଲା ପଢ଼ନ୍ତି ବୋଲି ଲୋକେ ଭାବିଥାନ୍ତି ।

ଏବେ କିନ୍ତୁ ସୀତା ହେଉଛନ୍ତି ସୋରଣ ଗାଁର ମର୍ଯାଦା । ସୋରଣ ଗାଁର ପରିଚୟ ତିଆରି କରିଛନ୍ତି ସୀତା । କାରଣ ସେ ଏବେ ସେହି ଗାଁର ପ୍ରଥମ ମହିଳା ଇଲେକ୍ଟ୍ରିସିଆନ  । ତାହା ପୁଣି ରାଜ୍ୟ ସରକାରଙ୍କ ଦ୍ୱାରା ପରିଚାଳିତ ଓଡ଼ିଶା ଟ୍ରାନ୍ସମିଶନ କର୍ପୋରେସନ ଲିମିଟେଡ(OPTCL) ରେ ଚାକିରି କରିପାରିଛନ୍ତି । ଖାଲି ସେତିକି ନୁହେଁ ସୀତାଙ୍କୁ ଏବେ ଓଡ଼ିଶା ସ୍କିଲ ଡେଭଲପମେଣ୍ଟ ର ଚେୟାରମ୍ୟାନ ସୁବ୍ରୋତୋ ବାଗଚି କୁଇନ ଅଫ ଦି ଟ୍ରାନ୍ସମିଶନ ଟାଓ୍ୱାର ସମ୍ମାନରେ ସମ୍ମାନିତ କରିଛନ୍ତି । ସୀତା କୁହନ୍ତି, ସେ ଯେତେବେଳେ ୩୦ ଫୁଟିଆ ଇଲେକ୍ଟ୍ରି ଟାଓ୍ୱାର ଉପରେ ଚଢ଼ି କାମ କରନ୍ତି ସେତେବେଳେ ତାଙ୍କୁ ବହୁତ ଖୁସିଲାଗିଥାଏ ।

ସୀତାଙ୍କ ପିଲାବେଳ ବହୁ ସଂଘର୍ଷପୂର୍ଣ୍ଣ ଥିଲା । କାରଣ ସୀତା ତାଙ୍କ ପରିବାର ମଧ୍ୟରେ ସବୁଠାରୁ ସାନ ଥିଲେ ଏବଂ ତାଙ୍କ ଉପରେ ଆହୁରି ଜଣେ ଭାଇ ଓ ଦୁଇ ଭଉଣୀ ଥିଲେ । ଦିନକୁ ଦି ଓଳି ଖାଇବାକୁ ମିଳୁ ନ ଥିବା ସୀତାଙ୍କ ପରିବାର ଲୋକଙ୍କ ପାଇଁ ସୀତାଙ୍କୁ ପାଠ ପଢ଼ାଇବା ସମ୍ଭବ ହେଉ ନ ଥିଲା। ତଥାପି ସୀତା କୁହନ୍ତି, ତାଙ୍କ ଭାଇ ତାଙ୍କୁ ପାଠ ପଢ଼ିବାରେ ବହୁତ ସାହାଯ୍ୟ କରିଛନ୍ତି । ନିଜେ ଅସୁବିଧାରେ ରହି ତାଙ୍କୁ ପାଠ ପଢ଼ାଇଛନ୍ତି ।

ସୀତା ବେହେରାଙ୍କର ଏହି ସଙ୍ଘର୍ଷ ପୂର୍ଣ୍ଣ କାହାଣୀ ପଛୁଆ ଆଦିବାସୀ ବର୍ଗର ଝିଅ ମାନଙ୍କ ପାଇଁ ଏକ ଉଲ୍ଲେଖନୀୟ ଅବଦାନ । ତାଙ୍କର ଏହି ଅବଦାନ ଅତୀତରେ ଏବଂ ଭବିଷ୍ୟତର ସବୁ ଛାତ୍ର ମାନଙ୍କ ପାଉଁ ଏକ ଉଦାହରଣ ହୋଇ ରହିବ  ।

ଗଞ୍ଜାମ: ମୋବାଇଲ ଫୋନ ବ୍ୟାଟେରି ଫାଟି ଦୁଇ ନାବାଳକ ଗୁରୁତର । ବ୍ୟାଟେରିକୁ ନେଇ ଘରେ ଖେଳୁଥିବା ବେଳେ ଫୁଟିଥିବା ସୂଚନା । ଏଭଳି ଘଟଣା ଦେଖିବାକୁ ମିଳିଛି ଗଂଜାମ ଜିଲ୍ଲା ଖଲ୍ଲିକୋଟ ବ୍ଲକ ଅନ୍ତର୍ଗତ ନାଇକାଣୀପଲ୍ଲୀ ଗାଁରେ ।

ସୂଚନା ଅନୁଯାୟୀ, ନାଇକାଣୀପଲ୍ଲୀ ଗ୍ରାମର ବସନ୍ତ ସ୍ୱାଇଁଙ୍କ ବଡ଼ ପୁଅ ରାଜେଶ ସ୍ୱାଇଁ (୧୩) ଓ ସାନ ପୁଅ ଆକାଶ ସ୍ୱାଇଁ (୧୦) ମୋବାଇଲ ବ୍ୟାଟେରି ସହ ଘରେ ଖେଳୁଥିଲେ । କୌଣସି ଅସାବଧାନତା ଯୋଗୁଁ ବ୍ୟାଟେରି ଟି ଜୋରେ ଶବ୍ଦ କରି ଫାଟି ଯାଇଥିଲା । ଫଳରେ ଦୁଇ ପିଲାଙ୍କ ହାତ, ଗୋଡ ଓ ଶରୀରର ବିଭିନ୍ନ ସ୍ଥାନରେ ଗଭିର କ୍ଷତ ସୃଷ୍ଟି ହୋଇଥିଲା । ଦୁହିଁଙ୍କୁ ପ୍ରଥମେ ଖଲ୍ଲିକୋଟ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ର ଓ ପରେ ଦୁହିଁଙ୍କୁ ବ୍ରହ୍ମପୁର ଏମକେସିଜି ମେଡିକାଲକୁ ସ୍ଥାନାନ୍ତର କରାଯାଇଛି ।

ପୂର୍ବରୁ ରଣପୁର ଏବଂ ଲଇକିରାରେ ଏଭଳି ମୋବାଇଲ ବ୍ୟାଟେରି ଫାଟି ଏକାଧିକ ବ୍ୟକ୍ତି ମୃତାହତ ହୋଇଛନ୍ତି ।