ମାଲକାନାଗିରି: ପୁଣି ଜନନୀ ଯନ୍ତ୍ରଣାରେ ଛଟପଟ ହେଲେ ପ୍ରସୂତି ମହିଳା । ୪ କିମି ଖଟିଆରେ ବୁହାହେଲେ ପ୍ରସୂତି । ଏଥର ପୁରୁଷ ନୁହଁ ମହିଳା ମାନେ ଖଟିଆରେ ବୋହିନେଲେ ମହିଳାଙ୍କୁ । ଅଧାବାଟରେ ଶିଶୁ କନ୍ୟାକୁ ଜନ୍ମ ଦେଲେ ପ୍ରସୂତି ମହିଳା । ଏଭଳି ଏକ ଦୃଶ୍ୟ ଦେଖିବାକୁ ମିଳିଛି ମାଲକାନଗିରି ଜିଲ୍ଲା ଖଇରପୁଟ ବ୍ଲକ୍‌ ରସବେଡ଼ା ପଞ୍ଚାୟତର ଗୁଟାଗୁଡ଼ା ଗାଁରେ ।

ସୂଚନା ଅନୁଯାୟୀ, ସେହି ଗାଁର ଲକ୍ଷ୍ମଣ ଗଲୋରୀଙ୍କ ସ୍ତ୍ରୀଙ୍କର ଆଜି ପ୍ରସବ ଯନ୍ତ୍ରଣା ହୋଇଥିଲା । ଏନେଇ ପରିବାର ଲୋକେ ଆମ୍ବୁଲାନ୍ସକୁ ଖବର ଦେଇଥିଲେ ମଧ୍ୟ ଆମ୍ବୁଲାନ୍ସଟି ରାସ୍ତା ଖରାପ ଯୋଗୁଁ  ଅଧା ରାସ୍ତାରେ ଅଟକି ରହିଥିଲା ।

କିନ୍ତୁ ଆଉ କାହାକୁ ଅପେକ୍ଷା ନକରି ଜଣେ ଆଶାକର୍ମୀଙ୍କ ସମେତ ଗ୍ରାମର କିଛି ମହିଳା ୪ କିଲୋମିଟର ଆମ୍ବୁଲାନ୍ସ ପର୍ଯ୍ୟନ୍ତ ବୋହିନେଇଥିଲେ । ପ୍ରସୂତି ଆମ୍ବୁଲାନ୍ସ ପାଖରେ ପହଞ୍ଚିବା ପରେ ମଧ୍ୟ ଆମ୍ବୁଲାନ୍ସଟି ମାଟିରେ ଦବିଯାଇଥିବାରୁ ବାହାରକୁ ବାହାରି ପାରିନଥିଲା ।

ବହୁ କଷ୍ଟରେ ଆମ୍ବୁଲାନ୍ସ ବାହାରିବା ପରେ ପ୍ରସୂତିଙ୍କୁ ମେଡିକାଲକୁ ନିଆଯାଇଥିଲା । କିନ୍ତୁ ଡ଼ାକ୍ତରଖାନାକୁ ଆଣିବା ବାଟରେହିଁ  ଶିଶୁ କନ୍ୟାକୁ ଜନ୍ମ ଦେଇଥିଲେ ପ୍ରସୂତି । ଉଭୟ ମାଆ ଛୁଆଙ୍କୁ ମାଲକାନଗିରି ଜିଲ୍ଲା ଚିକିତ୍ସାଳୟରେ ଚିକିତ୍ସିତ ହେଉଛନ୍ତି।

ଭୁବନେଶ୍ୱର: ନୀତି ଆୟୋଗର ରିପୋର୍ଟ । ଅନ୍ୟ ରାଜ୍ୟଙ୍କୁ ପଛରେ ପକାଇଲା ଓଡ଼ିଶା । ନିରନ୍ତର ବିକାଶ ଲକ୍ଷ୍ୟ ବା ଏସଡିଜିରେ ଓଡ଼ିଶା ଦ୍ରୁତ ବିକାଶଶୀଳ ରାଜ୍ୟ । ଏହି ତାଲିକାରେ ୧୦ ତାଲିକା ଉପରକୁ ଡେଇଁଛି ଓଡ଼ିଶା । ୨୫ ନମ୍ବରରୁ ୧୫ ନମ୍ବରକୁ ଉଠିଛି ଓଡ଼ିଶା । ଜାତିସଂଘ ଓ ନୀତି ଆୟୋଗର ଏସଡିଜି ଇଣ୍ଡିଆ ସୂଚକାଙ୍କ ରିପୋର୍ଟରୁ ଏହି ସୂଚନା ମିଳିଛି । ରିପୋର୍ଟ ଅନୁସାରେ ୨୦୧୮ରେ ଓଡ଼ିଶା ଏସଡିଜି ରାଙ୍କରେ ୫୧ ନମ୍ବର ସ୍କୋର କରି ୨୫ ନମ୍ବର ସ୍ଥାନରେ ରହିଥିଲା ।

ତେବେ ୨୦୧୯ରେ ୭ ପଏଣ୍ଟ ବଢ଼ି ୫୮ ପଏଣ୍ଟ ସହ ୧୫ ନମ୍ବର ସ୍ଥାନରେ ରହିଛି ଓଡ଼ିଶା । ଯଦି ପଏଣ୍ଟକୁ ଦେଖିବା ଶିଳ୍ପ, ଭିତ୍ତିଭୂମି ମାନଦଣ୍ଡରେ ୪୦ ପଏଣ୍ଟ ବଢ଼ିଛି । ସେହିପରି ବିଶୁଦ୍ଧ ଜଳ ଓ ପରିମଣ ସ୍କୋର ୮୫ ଛୁଇଁଛି । ତେବେ ଦ୍ରୁତ ବିକାଶଶୀଳ ରାଜ୍ୟ ହୋଇଥିଲେ ବି ଓଡ଼ିଶାକୁ ପରଫର୍ମର ମାନ୍ୟତା ମିଳିଛି । ସୂଚକାଙ୍କରେ ଓଡ଼ିଶା ଦ୍ୱିତୀୟ ଶ୍ରେଷ୍ଠ ପ୍ରଦର୍ଶନକାରୀର ମାନ୍ୟତା ପାଇଛି । ଏସଡିଜିର ୯, ୬ ଓ ୭ ନମ୍ବର ଲକ୍ଷ୍ୟ ମାନଦଣ୍ଡର ପ୍ରଦର୍ଶନରେ ଓଡ଼ିଶା ସର୍ବାଧିକ ସୁଧାର କରିଛି । ଶିଳ୍ପ, ସୃଜନଶୀଳତା ଓ ଭିତ୍ତିଭୂମି ବିକାଶରେ ଓଡ଼ିଶାର ସ୍କୋର ୪୦ ପଏଣ୍ଟ ବଢ଼ି ୭୨ ହୋଇଛି । ସେହିପରି ବିଶୁଦ୍ଧ ଜଳଯୋଗାଣ ଓ ପରିମଳରେ ବି ଗତବର୍ଷ ତୁଳନାରେ ଆଖିଦୃଶିୟା ପ୍ରଦର୍ଶନ କରିଛି । ୨୦୧୮ରେ ୪୬ ପଏଣ୍ଟ ତୁଳନାରେ ୩୯ ପଏଣ୍ଟ ବଢ଼ି ୮୫ ହୋଇଛି । ଶସ୍ତା ତଥା ସ୍ୱଚ୍ଛ ଇନ୍ଧନ ମାନଦଣ୍ଡରେ ୨୭ ପଏଣ୍ଟ ବୃଦ୍ଧି ହୋଇ ଓଡ଼ିଶାର ସ୍କୋର ୫୦ରେ ପହଞ୍ଚିଛି ।

ଭୁବନେଶ୍ୱର: ମାତ୍ର ୨ ଘଣ୍ଟାରେ ଆପଣ ପହଞ୍ଚିବେ ସୁରଟ । କାରଣ ଆଜିଠୁ ଆରମ୍ଭ ହୋଇଛି ଭୁବନେଶ୍ୱରରୁ ସୁରଟକୁ ସିଧାସଳଖ ବିମାନ ସେବା । ବିଜୁ ପଟ୍ଟନାୟକ ବିମାନବନ୍ଦରରୁ ସକାଳ ୮ଟା ୪୦ରେ ଉଡ଼ାଣ ଭରିଛି ଏୟାର ଇଣ୍ଡିଆ ବିମାନ । ସୋମବାର ଓ ଗୁରୁବାର ଭୁବନେଶ୍ୱରରୁ ସୁରଟକୁ ବିମାନ ଉଡ଼ିବ । ସେହିଭଳି ସୁରତରୁ ଭୁବନେଶ୍ୱରକୁ ଶୁକ୍ରବାର ଓ ରବିବାର ଦିନ ବିମାନ ଚଳାଚଳ କରିବ ।

ଏଥିପାଇଁ ଯାତ୍ରୀଙ୍କୁ ୫ ହଜାର ୫୫୩ ଟଙ୍କା ଦେବାକୁ ପଡ଼ିବ । ଏହି ବିମାନରେ ଥରକେ ୧୮୦ ଜଣ ଯାତ୍ରା କରିପାରିବେ । ଓଡ଼ିଶାରୁ ସୁରତକୁ ସିଧାସଳଖ ବିମାନ ଉଡ଼ାଣ ନେଇ ବହୁଦିନରୁ ଦାବି ହୋଇଆସୁଥିଲା । ୨୦୧୮ରେ କେନ୍ଦ୍ର ବେସାମରିକ ମନ୍ତ୍ରଣାଳୟକୁ ଏନେଇ ଚିଠି ଲେଖିଥିଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ।

ପରେ ଭୁବନେଶ୍ୱର ସାଂସଦ ଅପରାଜିତା ଷଡ଼ଙ୍ଗୀ ଗତ ଜୁଲାଇ ୨୨ରେ କେନ୍ଦ୍ର ବେସାମରିକ ବିମାନ ଚଳାଚଳ ମନ୍ତ୍ରୀ ହରଦିପ ପୁରୀଙ୍କୁ ଭେଟି ଦାବି ଜଣାଇଥିଲେ ।

ଏହାପରେ ଏହି ଅନୁରୋଧକୁ ସ୍ୱୀକୃତି ଦେଇଥିଲେ କେନ୍ଦ୍ରମନ୍ତ୍ରୀ । ଓଡ଼ିଶାରୁ ସିଧାସଳଖ ସୁରତକୁ ବିମାନ ଚଳାଚଳକୁ ମଞ୍ଜୁରି ମିଳିବା ପରେ ମୁଖ୍ୟମନ୍ତ୍ରୀ ଟ୍ୱିଟ୍‌ କରି କେନ୍ଦ୍ରମନ୍ତ୍ରୀ ହରଦୀପ ପୁରୀଙ୍କୁ ଧନ୍ୟବାଦ ଜଣାଇଥିଲେ ।