ଭୁବନେଶ୍ୱର: ଉଭୟ BSE ଓ CHSE ବୋର୍ଡକୁ ନେଇ ଶିକ୍ଷାମନ୍ତ୍ରୀଙ୍କ ବୈଠକ ।  ଲୋକସେବା ଭବନରେ ମନ୍ତ୍ରୀଙ୍କ ପ୍ରକୋଷ୍ଠରେ ବସିଥିଲା ଗୁରୁତ୍ୱପୂର୍ଣ ବୈଠକ । ପରୀକ୍ଷା କିଭଳି ନିର୍ଭୁଲ ଭାବେ ହେବ ସେ ନେଇ ବୈଠକରେ ଆଲୋଚନା ହୋଇଥିଲା । ଯୁକ୍ତ ଦୁଇ ପରୀକ୍ଷା ନେଇ ଅସନ୍ତା ୨୭ ତାରିଖରେ ପରୀକ୍ଷା ତାରିଖ ନିର୍ଦ୍ଧାରଣ ହେବ ।

ଯୁକ୍ତ ଦୁଇରେ ୩ ଲକ୍ଷ ୫୨ ହଜାର ଛାତ୍ରଛାତ୍ରୀ ପରୀକ୍ଷା ଦେଉଥିବାବେଳେ ମ୍ୟାଟ୍ରିକରେ ୫ ଲକ୍ଷ ୪୭ ହଜାର ପରୀକ୍ଷାର୍ଥୀ ପରୀକ୍ଷା ଦେବେ । ମାଟ୍ରିକରେ ୨୭୬୭ଟି ସେଣ୍ଟରରେ ପରୀକ୍ଷା ହେବା ନେଇ ତାଲିକା ହୋଇଥିଲା । ତେବେ ଗତଥର ଖୋଲାଖୋଲି କପି ହୋଇଥିବା ୭ଟି ମାଟ୍ରିକ ପରୀକ୍ଷା କେନ୍ଦ୍ରକୁ ଏଥିରୁ ବାତିଲ କରାଯାଇଛି । ସେହିପରି ଯୁକ୍ତ ଦୁଇର ପାଞ୍ଚଟି ସେଣ୍ଟରକୁ ବାତିଲ କରାଯାଇଛି ।

ଚଳିତଥର ପ୍ରଥମ ଥର ପାଇଁ ଯୁକ୍ତ ଦୁଇ ପରୀକ୍ଷାକୁ ସିଧାସଳଖ ମନିଟର କରିବେ ଶିକ୍ଷା ବିଭାଗର ବରିଷ୍ଠ ଅଧିକାରୀ  । ପ୍ରତ୍ୟେକ ଜିଲ୍ଲା ପାଇଁ ଜଣେ ଅଧିକାରୀ ନିଯୁକ୍ତ ହେବେ । ମାଟ୍ରିକ ପରୀକ୍ଷାରେ ୩ ଶହ ନୋଡାଲ ସେଣ୍ଟର ସହ ୭ ଶହ ସେଣ୍ଟରରେ ସିସିଟିଭି ଲାଗିବା ନେଇ ନିଷ୍ପତି ହୋଇଛି । ଯେଉଁ ସ୍କୁଲରେ କପି ହେବା ନେଇ ପୂର୍ବ ବର୍ଷ ଗୁଡିକରେ ଅଭିଯୋଗ ହୋଇଥିଲା ସେଠି ସିସିଟିଭି ଲାଗିବ ।  ଆସନ୍ତାବର୍ଷ ଠାରୁ ବର୍ଷ ଆରମ୍ଭରୁ ସମସ୍ତ କାର୍ଯ୍ୟସୂଚୀ ସ୍ଥିର ହେବ । ବର୍ଷ ଆରମ୍ଭରୁ ପରୀକ୍ଷା ସ୍ଥିର ହେବ  ।

ଗୋପାଳପୁର: ସଂସ୍କୃତି, ପରମ୍ପରା, ଲୋକକଳା ଓ ପର୍ଯ୍ୟଟନର ବାର୍ତ୍ତା ବହନ କରୁଥିବା ବହୁ ପ୍ରତିକ୍ଷିତ ଗୋପାଳପୁର ବେଳାଭୂମି ମହୋତ୍ସବ ଆଜି ଉଦଘାଟିତ ହୋଇଯାଇଛି । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଅପରାହ୍ନ ୪ଟା ବେଳେ ମହୋତ୍ସବକୁ ଆନୁଷ୍ଠାନିକ ଭାବେ ଉଦଘାଟନ କରିବା ସହ ଜାତୀୟ ସ୍ତରୀୟ ହର୍ବାଲ୍ ମେଳା, ପଲ୍ଲିଶ୍ରୀ ମେଳାକୁ ମଧ୍ୟ ଉଦଘାଟନ କରିଛନ୍ତି ।

ବହୁ ପ୍ରତିକ୍ଷିତ ଗୋପାଳପୁର ବେଳାଭୂମି ମହୋତ୍ସବକୁ ଆଜି ମୁଖ୍ୟମନ୍ତ୍ରୀ ନବୀନ ପଟନାୟକ ଉଦଘାଟନ କରିଛନ୍ତି । କଳା ଓ ସଂସ୍କୃତିରେ ଭରପୁର ଗଂଜାମ ଜିଲ୍ଲାକୁ ଆହୁରି ସମୃଦ୍ଧ କରିବାକୁ ସମସ୍ତ ପ୍ରକାର କାର୍ଯ୍ୟ ହାତକୁ ନେବାପାଇଁ ପ୍ରତିଶୃତି ଦେଇଛନ୍ତି । ପର୍ଯ୍ୟଟନ ଓ ବେଳାଭୂମିର ସର୍ବାଙ୍ଗୀନ ଉନ୍ନତି ପାଇଁ ସମସ୍ତ ସହାୟତା ଯୋଗାଇଦେବା ପାଇଁ ମୁଖ୍ୟମନ୍ତ୍ରୀ ପ୍ରତିଶ୍ରୁତି ଦେଇଥିଲେ । ଜାତୀୟ ସ୍ତରୀୟ ହର୍ବାଲ ମେଳା ଆଉ ପଲ୍ଲୀଶ୍ରୀ ମେଳାକୁ ମୁଖ୍ୟମନ୍ତ୍ରୀ ଉଦ୍ଘାଟନ କରିବା ସହ ମହିଳା ସକ୍ତିକରଣର ମିଶନ ଶକ୍ତିର ମହିଳା ସ୍ୱୟଂ ସହାୟକ ଗୋଷ୍ଠୀର ବିଭିନ୍ନ ଷ୍ଟଲ୍ ଗୁଡିକ ବୁଲି ଦେଖିଥିଲେ। ଏଥିସହ ମୋ ଗେଲ୍ଲା ଝିଅ ଓ ନିର୍ଭୟା ଯୋଜନାରେ ଅନ୍ତର୍ଭୁକ୍ତ ବିଭିନ୍ନ ଶିଶୁମାନଙ୍କୁ ଉପହାର ଦେବା ସହ ମହିଳାଙ୍କୁ ପୁରଷ୍କୃତ କରିଥିଲେ।

ଗୋପାଳପୁର ବେଳାଭୂମିର ଆଜି ପ୍ରଥମ ଦିନରେ ଗଂଜାମର ବିଭିନ୍ନ ଲୋକକଳା ଓ ନୃତ୍ୟର ଆସର ଉପସ୍ଥିତ ଦର୍ଶକଙ୍କ ମନ ମୋହିଥିଲା । ବେଳାଭୂମି ମହୋତ୍ସବକୁ ଉପଭୋଗ କରିବା ପାଇଁ ଗଂଜାମ ଜିଲ୍ଲା ଓ ଜିଲ୍ଲା ବାହାରୁ ଲକ୍ଷ ଲକ୍ଷ ଲୋକଙ୍କ ଜନ ସମାଗମ ଦେଖିବାକୁ ମିଳିଛି । ଆଜିର ସଂଧ୍ୟାରେ ମୁଖ୍ୟ ଆକର୍ଷଣ ବଲିଉଡର ପ୍ରଖ୍ୟାତ ଗାୟକ ସୋନୁ ନିଗମ ଆସୁଛନ୍ତି ଦର୍ଶକଙ୍କ ମନୋରଂଜନ ପାଇଁ । ଏହି ଅବସରରେ ଜିଲ୍ଲାର ବିଭିନ୍ନ ଓଡ଼ିଶୀ ଓ ମଡର୍ଣ୍ଣ ଡ୍ୟାନ୍ସ ଏକାଡେମୀର କଳାକାରମାନଙ୍କ କଳା ଓ ନୃତ୍ୟ ପରିବେଷଣ କରିବାର ପ୍ରୟାସ ଜାରି ରଖିଛି ଜିଲ୍ଲା ପ୍ରଶାସନ ଓ ମହୋତ୍ସବ କମିଟିର ଆୟୋଜକ।

ଗଂଜାମ ଜିଲ୍ଲାର ସମସ୍ତ ମନ୍ତ୍ରୀ, ବିଧାୟକ ଓ ସାଂସଦ ମାନେ ଆଜିର ଏହି ଉଦ୍ଘାଟନ ମହୋତ୍ସବରେ ଯୋଗଦାନ ଦେଇଥିଲେ। ପ୍ରବଳ ଜନା ସମାଗମକୁ ଦୃଷ୍ଟିରେ ରଖି ପୋଲସ ପକ୍ଷରୁ ବ୍ୟାପକ ବ୍ୟବସ୍ଥା ଗ୍ରହଣ ଏବଂ ବେଳାଭୂମି ଠାରୁ ବ୍ରହ୍ମପୁର ବାଇପାସ୍ ପର୍ଯ୍ୟନ୍ତ ପ୍ରାୟ ୩୦ପ୍ଲାଟୁନ ଫୋର୍ସ ମୁତୟନ କରିବା ସହ ସିସି ଟିଭି କ୍ୟାମେରା ଦ୍ୱାରା ସମସ୍ତ ଗତିବିଧି ଉପରେ ନଜର ରଖାଯାଇଛି ।

ସମ୍ବଲପୁର: ପଦ୍ମପୁର ଉପଖଣ୍ଡ ପାଇକମାଲ ଥାନା ଟେମରୀମାଲ ଗ୍ରାମ ନିକଟସ୍ଥ ଜଙ୍ଗଲରେ ସେହି ଗ୍ରାମର ଜଣେ ଯୁବତୀଙ୍କ କ୍ଷତବିକ୍ଷତ ମୃତ ଶରୀର ଉଦ୍ଧାର ହୋଇଛି । ଶବଟି ଅର୍ଦ୍ଧ ନଗ୍ନ ଅବସ୍ଥାରେ ପଡି ରହିଥିବାବେଳେ ପାରିପାର୍ଶ୍ୱିକ ସ୍ଥିତିରୁ ତାଙ୍କୁ ଦୁଷ୍କର୍ମ ପରେ ହତ୍ୟା କରାଯାଇଥିବା ସନ୍ଦେହ କରାଯାଉଛି । ପାଇକମାଲ ପୋଲିସ ଘଟଣା ସ୍ଥଳରେ ପହଞ୍ଚି ଯାଞ୍ଚ ଆରମ୍ଭ କରିଛି ।

ସୂଚନା ଅନୁଯାୟୀ ଟେମରୀମାଲ ଗାଁର ଜଣେ  ଯୁବତୀ ଶୁକ୍ରବାର ଦିନ ସନ୍ଧ୍ୟାରେ ଶୌଚ ହେବା ପାଇଁ ଯାଇଥିଲେ ହେଲେ ଆଉ ଘରକୁ ଫେରି ନଥିଲେ। ଏ ନେଇ ତାଙ୍କ ଘର ଲୋକ ପାଇକମାଲ ଥାନାରେ ଗତ ସୋମବାର ଦିନ ଅଭିଯୋଗ କରିଥିଲେ।

ଆଜି ସକାଳୁ ଗାଁର କିଛି ଲୋକ ସେଇ ରାସ୍ତା ଦେଇ ଶୌଚ ହେବା ପାଇଁ ଯାଉଥିବାବେଳେ ଯୁବତୀଙ୍କ ମୃତଦେହ ପଡ଼ିଥିବାର ଦେଖିଥିଲେ । ପରେ ଗାଁ ଲୋକଙ୍କୁ ଜଣାଇବା ସହ ପୋଲିସକୁ ଖବର ଦେଇଥିଲେ ଗ୍ରାମବାସୀ ।

ଆସନ୍ତା ଡିସେମ୍ବର ୨୬ରେ ସୂର୍ଯ୍ୟପରାଗ ପାଇଁ ରାଜ୍ୟର ସମସ୍ତ ଶିକ୍ଷାନୁଷ୍ଠାନକୁ ଛୁଟି ଘୋଷଣା କରାଯାଇଥିଲା । ଏବେ ରାଜ୍ୟ ସରକାର ସମସ୍ତ ସରକାରୀ କାର୍ଯ୍ୟାଳୟକୁ ଛୁଟି ଘୋଷଣା କରିଛନ୍ତି । ଏ ନେଇ ରାଜସ୍ୱ ବିଭାଗ ପକ୍ଷରୁ ଏକ ବିଜ୍ଞପ୍ତି ଜାରି  କରାଯାଇଛି ।

୨୫ରେ ବଡ଼ ଦିନ ପଡୁଥିବାରୁ ସେଦିନ ସରକାରୀ ଛୁଟି ରହିଥିବା ବେଳେ ଏବେ ୨୬ରେ ସୂର୍ଯ୍ୟ ପରାଗ ପାଇଁ ଛୁଟି ଘୋଷଣା ହେବା ପରେ ସରକାରୀ କର୍ମଚାରୀ ଏବେ ଦୁଇଦିନ ଛୁଟି ପାଇଛନ୍ତି ।

ସୂଚନା ଅନୁସାରେ, ୨୬ତାରିଖ ସକାଳେ ବିରଳ ସୂର୍ଯ୍ୟପରାଗ ସଂଘଠିତ ହେବାକୁ ଯାଉଛି। ଏହା ଦକ୍ଷିଣ-ଭାରତର କେତେକ ଅଞ୍ଚଳରେ ପୂର୍ଣ୍ଣ ଭାବେ ଦେଖାଯିବାକୁ ଥିବାବେଳେ ଓଡ଼ିଶାରେ ଆଂଶିକ ଭାବେ ଦେଖାଯିବ। ଓଡ଼ିଶାରେ ଏହା ସକାଳ ୮ଟା ୨୦ମିନିଟରୁ ଆରମ୍ଭ ହୋଇ ପୂର୍ବାହ୍ନ ୧୧ଟା ୨୮ମିନିଟରେ ଶେଷ ହେବ। ସକାଳ ୯ଟା ୪୬ ମିନିଟରେ ସର୍ବାଧିକ ପରାଗ ଦେଖାଯିବ। ଉକ୍ତ ସମୟରେ ଚନ୍ଦ୍ର ସୂର୍ଯ୍ୟଙ୍କୁ ପ୍ରାୟ ୫୫-୬୫% ଘୋଡ଼ାଇଦେବ ଏବଂ ସୂର୍ଯ୍ୟର ଆଲୋକ ମଳିନ ପଡ଼ିବା ସହ ଏହା ଅଧାଖଣ୍ଡିଆ ଦେଖାଯିବ।