ଆଜି ଝାଡ଼ଖଣ୍ଡ ବିଧାନସଭା ନିର୍ବାଚନର ଅନ୍ତିମ ପର୍ଯ୍ୟାୟ
ଝାଡ଼ଖଣ୍ଡ: ଆଜି ଝାଡ଼ଖଣ୍ଡ ବିଧାନସଭା ନିର୍ବାଚନର ପଞ୍ଚମ ତଥା ଅନ୍ତିମ ପର୍ଯ୍ୟାୟ । ୧୬ଟି ବିଧାନସଭା ଆସନ ପାଇଁ ସକାଳ ୭ଟାରୁ ମତଦାନ ଆରମ୍ଭ ହୋଇଯାଇଛି । ସନ୍ଧ୍ୟା ୫ଟା ଯାଏଁ ମତଦାନ ପ୍ରକ୍ରିୟା ଚାଲିବ । ଏହି ପର୍ଯ୍ୟାୟରେ ମତଦାନରେ ୨୩୭ଜଣ ପ୍ରାର୍ଥୀଙ୍କ ଭାଗ୍ୟ ନିର୍ଦ୍ଧାରଣ କରାଯିବ । ଶେଷ ପର୍ଯ୍ୟାୟରେ ୪୦ଲକ୍ଷ୫ହଜାର୨୮୭ ମତଦାତା ନିଜର ମତ ଅଧିକାର ସାବ୍ୟସ୍ତ କରିବେ । ୧୬ଟି ଆସନରୁ ୭ଟି ଆସନ ଅନୁସୂଚିତ ଜନଜାତିଙ୍କ ପାଇଁ ସଂରକ୍ଷିତ ରହିଛି । ମତଦାନ ପାଇଁ ସୁରକ୍ଷା ବ୍ୟବସ୍ଥା କଡ଼ାକଡ଼ି କରାଯାଇଛି । ମତଦାନ କେନ୍ଦ୍ର ଗୁଡିକରେ ପୋଲିସ ମୁତୟନ ହୋଇଛନ୍ତି । ବିଶେଷ କରି ନକ୍ସଲ ପ୍ରଭାବିତ କେନ୍ଦ୍ରରେ ସୁରକ୍ଷା ବ୍ୟବସ୍ଥା କଡାକଡି କରାଯାଇଛି । ଏବଂ ଡିସେମ୍ବର ୨୩ରେ ମତଦାନର ଫଳାଫଳ ପ୍ରକାଶ ପାଇବ ।
ଖେଳାଳିଙ୍କ ପାଇଁ ଆସିଲା ଖାଇବା ତାଲିକା, ଜାଣନ୍ତୁ ହୋଟେଲ ତରଫରୁ କ’ଣ ଅଛି ମେନୁରେ
ଭୁବନେଶ୍ୱର: ଆସନ୍ତା ୨୨ ତାରିଖରେ ବାରବାଟୀରେ ବହୁ ପ୍ରତୀକ୍ଷିତ ଦିନିକିଆ। ଏଥିପାଇଁ ଭାରତ ଓ ୱେଷ୍ଟଇଣ୍ଡିଜ୍ ଦଳ ରାଜଧାନୀ ଭୁବନେଶ୍ୱରରେ ପହଞ୍ଚି ସାରିଛନ୍ତି । ଭୁବନେଶ୍ୱର ମେ ଫେୟାର ହୋଟେଲରେ ଗୁରୁବାର ଠାରୁ ସୋମବାର ପର୍ଯ୍ୟନ୍ତ ଦୀର୍ଘ ୫ ଦିନ ଧରି ରହିବେ ୨ ଦେଶର ଖେଳାଳି । ତେଣୁ, ଖେଳାଳିଙ୍କ ଖାଦ୍ୟପେୟ ଉପରେ ହୋଟେଲ୍ ପକ୍ଷରୁ ବିଶେଷ ଦୃଷ୍ଟି ଦିଆଯାଇଛି ।
ହୋଟେଲର ମୁଖ୍ୟ ସେଫଙ୍କ ସୂଚନା ଅନୁସାରେ ୱେଷ୍ଟଇଣ୍ଡିଜ ଦଳର ଖେଳାଳିଙ୍କ ମେନ୍ୟୁରେ ରହିବ ଅଧିକାଂଶ ନନଭେଜ୍ ଖାଦ୍ୟ । ଅନ୍ୟପଟେ ଭାରତୀୟ ଖେଳାଳିଙ୍କ ମେନ୍ୟୁରେ ନନଭେଜ୍ ସହ ଭେଜ୍ ଖାଦ୍ୟ ରହିବ । ଉଭୟ ଦେଶର ଖେଳାଳିଙ୍କୁ ସ୍ୱତନ୍ତ୍ର ଭାବେ କିଛି ଓଡ଼ିଆ ଖାଦ୍ୟ ପରଷାଯିବ । ସେପଟେ ସମସ୍ତ ଖାଦ୍ୟ କମ୍ ମସଲା ଓ କମ ତେଲରେ ତିଆରି ହେବ । ହୋଟେଲ୍ ସେଫଙ୍କ ଅନୁସାରେ ଉଭୟ ଦେଶର ଖେଳାଳିଙ୍କ ମେନୁରେ ରୋଷ୍ଟ ଚିକେନ, ଦେଶୀ ଚିକେନ ଝୋଳ, ମଟନ କରି, ଚିଙ୍ଗୁଡ଼ି ଓ ପାମ୍ପ୍ଲେଟ୍ ମାଛ ଭଳି ଆମିଷ ଖାଦ୍ୟ ରହିବ । ସେହପିରି ନିରାମିଷରେ ଡାଲମା, ବଟର ପନିର, ବଡ଼ିଚୁରା, ଛତୁ ବେସର ଓ ଶାଗ ସ୍ୱତନ୍ତ୍ର ଭାବେ ପରଷାଯିବ ।
ଏଥିସହ ଓଡ଼ିଶାର ପାରମ୍ପରିକ କଂସା ଓ ପିତ୍ତଳ ଥାଳି, ଗ୍ଲାସ ସାଙ୍ଗକୁ ଚାମଚରେ ଖାଦ୍ୟ ପରଷା ଯିବାର ବ୍ୟବସ୍ଥା କରାଯାଇଛି । ଖେଳାଳିଙ୍କ ପାଇଁ ସ୍ୱତନ୍ତ୍ର ମେନୁ ଆସି ସାରିଛି ଯାହକୁ ନେଇ ହୋଟେଲ ପକ୍ଷରୁ ଖାଦ୍ୟ ପ୍ରସ୍ତୁତି କରାଯାଉଛି।
ବ୍ରେକ୍ଫାଷ୍ଟ: ଟୋଷ୍ଟେଡ୍ ବ୍ରେଡ, ଡ୍ରାଏ ଫ୍ରୁଟ୍ସ, କଟ୍ ଫ୍ରୁଟ୍ସ, କ୍ଷୀର, ଦହି, ଜୁସ୍, ପଇଡ଼ ପାଣି, ସୁଗାର ଫ୍ରି ଜାମ୍, ଇଡ୍ଲି, ଦୋସା, ସମ୍ବର, ଚଟଣି, ଚା’, କଫି, ଅମ୍ଲେଟ, ଅଳ୍ପ ତେଲ ଓ ମସଲାଯୁକ୍ତ ଚିକେନ୍ ତରକାରୀ ପ୍ରସ୍ତୁତ ରହିବ ।
ଡିନର୍: ୩ ପ୍ରକାରର ଚାଉଳର ଭାତ, ରୁଟି, ଗ୍ରୀନ୍ ସାଲାଡ, ସିଝା ଅଣ୍ଡା, ଗ୍ରୀଲ୍ଡ ଚିକେନ, ଦେଶୀ କୁକୁଡ଼ା ଝୋଳ, ତନ୍ଦୁରୀ ଚିକେନ୍, ଗ୍ରୀଲ୍ଡ ମାଛ, ମଟନ କରି, ଚିଙ୍ଗୁଡ଼ି ଓ ପାମ୍ପ୍ଲେଟ୍ ମାଛ, ଡାଲି, ତଡ଼କା, ପନିର, ଦିୱାନି ଦମ୍ କି ହାଣ୍ଡି, ସମ୍ବର, ପାମ୍ପଡ଼, ଆମ୍ବ ଆଚାର, ଦହି, ରାଇତା ଖାଇବା ପାଇଁ ତାଲିକା ଆସିଛି ।
ଆଜିର ରାଶିଫଳ (୨୦/୧୨/୨୦୧୯)
ଆଜି ୨୦୧୯ ରିଖ ଡିସେମ୍ବର୨୦ ତାରିଖ, ଶୁକ୍ରବାର ପୌଷ କୃଷ୍ଣପକ୍ଷ, ସୌରମାସ ଧନୁ ଦି୫ନ, ନବମୀତିଥି, ହସ୍ତା ନକ୍ଷତ୍ର, କନ୍ୟା ଚନ୍ଦ୍ର ସୌଭାଗ୍ୟଯୋଗ, ତୈତିଳ କରଣ
ଚନ୍ଦ୍ରଶୁଦ୍ଧ- ମେଷ,ମିଥୁନ, କର୍କଟ, କନ୍ୟା, ତୁଳା, ବିଛା, ଧନୁ, ମୀନ, ରାଶିର ।
ଘାତବାର- ବିଛା, ଧନୁ ଓ ମୀନରାଶିର ।
ଘାତଚନ୍ଦ୍ର- ବୃଷ ରାଶିର
ରାହୁକାଳ- ଦିବା୧୦/୨୩ମି. ରୁ ଦିବା ୧୧/୩୪ମି.
କାଳବେଳା- ଦିବା ୧୦/୨୩ମି ରୁ ଦିବା ୧୧/୩୪ମି.
ଶୁଭବେଳା- ପ୍ରାତଃ ୭/୪୬ମି. ରୁ ଦିବା ୯/୦୨ମି.
ପର୍ବପର୍ବାଣୀ- ଅନ୍ତରାଷ୍ଟ୍ରିୟ ମାନବ ଏକତା ଦିବସ
ଆଜିର ରାଶିଫଳ
ମେଷ– ଶରୀର ସୁସ୍ଥ ରହିବ । କର୍ମ କ୍ଷେତ୍ରରେ ସଫଳତା ଅର୍ଜନ କରିବେ । ବିଭିନ୍ନ ସୂତ୍ରରୁ ଆୟ ହେବ । ପାରିବାରିକ ଜୀବନ ସୁଖ ଶାନ୍ତିରେ କଟିବ ।
ବୃଷ– ମାନସିକ ଅସ୍ଥିରତା ଦେଖା ଦେବ । ବନ୍ଧୁମାନେ ଶତ୍ରୁ ପରି ବ୍ୟବହାର କରିବେ । ଆୟ ଠାରୁ ବ୍ୟୟ ମାତ୍ରା ବୃଦ୍ଧି ପାଇବ । ମାନସିକ ଶାନ୍ତି ଅବ୍ୟାହତ ରହିବ। ମଧ୍ୟାହ୍ନ ପରେ ଧନପ୍ରାପ୍ତି ଯୋଗ ।
ମିଥୁନ– ପାରିବାରିକ ଜୀବନ ସୁଖ ଶାନ୍ତିରେ କଟିବ । କର୍ମକ୍ଷେତ୍ରରେ ଯଶଖ୍ୟାତି ବୃଦ୍ଧି ପାଇବ । ମାନସିକ ଶାନ୍ତି ଅବ୍ୟାହତ ରହିବ । ମଧ୍ୟାହ୍ନ ପରେ ଧନପ୍ରାପ୍ତି ଯୋଗ ।
କର୍କଟ– ମାନସିକ ଶାନ୍ତି ଅବ୍ୟାହତ ରହିବ । ପାରିବାରିକ ଜୀବନ ସୁଖମୟ ହେବ । କର୍ମକ୍ଷେତ୍ର ପ୍ରତିଷ୍ଠିତ ହେବେ । ବନ୍ଧୁବର୍ଗଙ୍କ ସହଯୋଗ ପ୍ରାପ୍ତି ହେବେ ।
ସିଂହ– ମାନସିକ ସ୍ଥିତି ଅଶାନ୍ତି ରହିବ । ଅପବ୍ୟୟର ମାତ୍ରା ବୃଦ୍ଧି ହେବ । କର୍ମକ୍ଷେତ୍ରରେ ଆଳସ୍ୟ ବୃଦ୍ଧି ପାଇବ । ପାରିବାରିକ ଜୀବନରେ ଅଶାନ୍ତ ରହିବ ।
କନ୍ୟା– କର୍ମକ୍ଷେତ୍ରରେ ନିଜର ଦକ୍ଷତା ପ୍ରତିପାଦନ କରି ପ୍ରଶଂସାର ପାତ୍ର ହେବେ । ସହକର୍ମୀମାନଙ୍କ ସହଯୋଗ ପ୍ରାପ୍ତି ହେବେ । ବିଭିନ୍ନ ସତ୍ରର ଅର୍ଥାଗମନ ଯୋଗ ରହୁଛି । ପାରିବାରିକ ଜୀବନ ସୁଖ ଶାନ୍ତିରେ କଟିବ ।
ତୁଳା– ପାରିବାରିକ ଜୀବନ ସୁଖମୟ ହେବ । ସାମାଜିକ ସ୍ଥରରେ ଯଶ ଖ୍ୟାତି ସଂପନ୍ନ ହେବେ । ସନ୍ତାନବର୍ଗଙ୍କ ଭବିଷ୍ୟତକୁ ନେଇ ନୂତନ ଯୋଜନା ପ୍ରସ୍ତୁତ କରିବେ । କର୍ମମୟ ଜୀବନରେ ସଫଳତା ଅର୍ଜନ କରିବେ ।
ବିଛା– ବିବାଦୀୟ ପରିସ୍ଥିତିର ସମାଧାନ ହେବ । ଶତ୍ରୁମାନଙ୍କର ବଳୟରୁ ମୁକ୍ତ ହେବେ । କର୍ମ କ୍ଷେତ୍ରରେ ଆଶାଜନକ ସଫଳତା ମିଳିବ । ପାରିବାରିକ ଜୀବନ ସୁଖମୟ ହେବ ।
ଧନୁ– ବିଭିନ୍ନ ସୂତ୍ରରୁ ଅର୍ଥାଗମର ଯୋଗ ରହିଛି । ସାମାନ୍ୟ ସ୍ୱାସ୍ଥ୍ୟଜନିତ ସମସ୍ୟା ଦେଖାଦେଇପାରେ । ମାନସିକ ସ୍ଥିତି ପ୍ରାୟତଃ ଅସ୍ଥିର ରହିବ । ପାରିବାରିକ ଜିନ ସୁଖ ଶାନ୍ତିରେ କଟିବ ।
ମକର– ସ୍ୱାସ୍ଥ୍ୟଗତ ସମସ୍ୟା ଦେଖାଦେବ । ମିତ୍ରମାନେ ହଠାତ୍ ଶତ୍ରୁବତ୍ ବ୍ୟବହାର କରିବେ । ଋଣଗ୍ରସ୍ତ ହୋଇପାରନ୍ତି । ଆୟ ଅପେକ୍ଷା ବ୍ୟୟ ଅଧିକ ହେବ । ଗୃହସ୍ଥ ଜୀବନରେ ବିଶାଜିତ ହେବେ ।
କୁମ୍ଭ– ମାନସିକ ଶାନ୍ତି ବ୍ୟାହତ ହେବ । ଭାବପ୍ରବଣତାର ବଶବର୍ତ୍ତୀ ହୋଇ ଠକାମୀର ଶିକାର ହେବେ । କୌଣସି କାରଣରୁ ଦାମ୍ପତ୍ୟକଳହ ଦେଖାଦେବ । ଗୃହସ୍ଥ ଜୀବନ ଅଶାନ୍ତ ରହିବ ।
ମୀନ– କର୍ମକ୍ଷେତ୍ରରେ ସଫଳତା ଅର୍ଜନ କରିବେ । କଳା, ସାହିତ୍ୟ ସହ ସଂଗୀତ ପ୍ରତି ରୁଚି ବଢ଼ିବ । ଆର୍ଥିକ ସ୍ଥରରେ ଅଭିବୃଦ୍ଧି ଘଟିବ । ପାରିବାରିକ ଜୀବନ ସୁଖମୟ ହେବ ।
ଜାତୀୟ ବ୍ୟାଘ୍ର ସଂରକ୍ଷଣ କର୍ତ୍ତୃପକ୍ଷଙ୍କ ସୂଚନା, ଓଡ଼ିଶା ଛାଡ଼ିବ ବାଘୁଣୀ ସୁନ୍ଦରୀ । ମହାବୀରକୁ ଶିକାରୀ ମାରିଥିବା ଅଭିଯୋଗ
ଭୁବନେଶ୍ୱର : ଓଡ଼ିଶାର ଜଂଗଲ ଓ ପାଣିପାଗ ସହ ନିଜକୁ ଖାପ ଖୁଆଇ ପାରିଲାନି ସୁନ୍ଦରୀ । ଜାତୀୟ ବ୍ୟାଘ୍ର ସଂରକ୍ଷଣ କର୍ତ୍ତୃପକ୍ଷଙ୍କ ନିର୍ଦ୍ଦେଶନାମା ଅନୁସାରେ ବାଘୁଣୀ ସୁନ୍ଦରୀକୁ ମଧ୍ୟ ରଖାଗଲା ନାହିଁ । ଏବେ ନିଷ୍ପତ୍ତି ହୋଇଛି ଯେ, ଯେଉଁଠୁ ଆସିଥିଲା ବାଘୁଣୀ ସୁନ୍ଦରୀ, ସେଇଠିକୁ ଅର୍ଥାତ୍ ମଧ୍ୟପ୍ରଦେଶର କାହ୍ନା ବ୍ୟାଘ୍ର ପ୍ରକଳ୍ପକୁ ସେ ଫେରିଯିବ ।
ଦେଶର ପ୍ରଥମ ଅନ୍ତଃରାଜ୍ୟ ବ୍ୟାଘ୍ର ସ୍ଥାନାନ୍ତରଣ ପ୍ରକଳ୍ପକୁ ବାତିଲ୍ କରିବାକୁ NCTA ଚିନ୍ତା କରୁଥିବା ଜଣାପଡ଼ିଛି । ଏ ନେଇ ଏକ ଚିଠି ମଧ୍ୟ ଓଡ଼ିଶାର ମୁଖ୍ୟ ଶାସନ ସଚିବଙ୍କୁ NCTA ପକ୍ଷରୁ ଲେଖାଯାଇଛି । ଏଥିରେ ଉଲ୍ଲେଖ ଅଛି ଯେ, ସାତକୋଶିଆ ବ୍ୟାଘ୍ର ପ୍ରକଳ୍ପରେ ବାଘଙ୍କ ସଂଖ୍ୟା ବୃଦ୍ଧି କରିବାକୁ ୨୦୧୭ ସେପ୍ଟେମ୍ୱର ୧ ତାରିଖରେ NCTA ବୈଠକରେ ନିଷ୍ପତ୍ତି ହୋଇଥିଲା । ଏହାର ପରବର୍ତ୍ତୀ ବୈଠକ ସେହିବର୍ଷ ନଭେମ୍ୱର ୨୨ ତାରିଖରେ ଅନୁଷ୍ଠିତ ହୋଇଥିଲା । ଏଥିରେ ମଧ୍ୟପ୍ରଦେଶର କାହ୍ନା ଅଭୟାରଣ୍ୟରୁ ୨ଟି ବାଘଙ୍କୁ ସାତକୋଶିଆ ଆଣିବାକୁ ନିଷ୍ପତ୍ତି ହୋଇଥିଲା । ସେହି ଅନୁସାରେ ୨୦୧୮ ଜୁଲାଇ ୬ ତାରିଖରେ ୩ ବର୍ଷର ମହାବୀର ନାମକ ଏକ ବାଘକୁ ଓଡ଼ିଶାର ସାତକୋଶିଆଙ୍କୁ ଅଣାଯାଇଥିଲା ।
ଏହାପରେ ମଧ୍ୟପ୍ରଦେଶର ବାନ୍ଧବଗଡ଼ରୁ ୨୦୧୮ ଅଗଷ୍ଟ ୧୭ ତାରିଖରେ ବାଘୁଣୀ ସୁନ୍ଦରୀକୁ ଓଡ଼ିଶା ଅଣାଗଲା । କିଛିଦିନ ଏନକ୍ଲୋଜରରେ ରଖିବା ପରେ ବାଘୁଣୀ ସୁନ୍ଦରୀକୁ ସାତକୋଶିଆରେ ଛାଡ଼ିଦିଆଯାଇଥିଲା । ଏହାପରେ ଗାଁ ଲୋକଙ୍କୁ ଆକ୍ରମଣ କରିବା ଅଭିଯୋଗରେ ନଭେମ୍ବର ୬ ତାରିଖରେ ବାଘୁଣୀକୁ ଜଂଗଲରୁ ଏନକ୍ଲୋଜରକୁ ଅଣାଗଲା । ବାଘୁଣୀ ସୁନ୍ଦରୀ ଧରା ହେବାର ୮ ଦିନ ନଯାଉଣୁ ନଭେମ୍ବର ୧୪ ତାରିଖରେ ମହାବୀରର ମୃତଦେହ ମିଳିଲା । NCTAର ପ୍ରାଥମିକ ତଦନ୍ତରୁ ବାଘକୁ ହତ୍ୟା କରାଯାଇଥିବା ସୂଚନା ମିଳିଲା । ତେବେ ବାଘୁଣୀକୁ ଛୋଟ ଏନକ୍ଲୋଜରରେ ରଖିବା ନେଇ NCTA ଆପତ୍ତି ପ୍ରକାଶ କରିଥିଲା ।
ଏବେ ଏ ପ୍ରକଳ୍ପକୁ ବାତିଲ୍ କରି ବାଘୁଣୀ ସୁନ୍ଦରୀରୁ ଫେରାଇ ନେବାକୁ NCTA ନିଷ୍ପତ୍ତି ନେଇଛି । ତେବେ ୨୦୧୪ ଅପେକ୍ଷା ୨୦୧୮ରେ ଜାତୀୟ ସ୍ତରରେ ବ୍ୟାଘ୍ର ସଂଖ୍ୟା ୨୨୨୬ରୁ ୨୯୬୭କୁ ବୃଦ୍ଧି ପାଇଥିବା ବେଳେ ଓଡ଼ିଶାରେ ଯାହା ଥିଲା ସେଇଆ ହିଁ ରହିଛି । ତେବେ ୨୦୦୨ରେ ୧୩୨ ବାଘଙ୍କ ତୁଳନାରେ ଓଡ଼ିଶାରେ ଗତ ୧୬ ବର୍ଷରେ ଏ ସଂଖ୍ୟା ୧୦୪ ଖସି ଏବେ ମାତ୍ର ୨୮ରେ ପହଞ୍ଚିଛି ।
ଅହିଂସା ବିଶ୍ୱକୁ ଭାରତର ସବୁଠାରୁ ଶକ୍ତିଶାଳୀ ବାର୍ତ୍ତା : ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ
ନୂଆଦିଲ୍ଲୀ : ରାଷ୍ଟ୍ରପତି ଭବନରେ ଆୟୋଜିତ ଗାନ୍ଧିଜୀଙ୍କ ୧୫୦ତମ ଜୟନ୍ତୀ ପାଳନ ନିମନ୍ତେ ଗଠିତ ଜାତୀୟ କମିଟିର ଦ୍ୱିତୀୟ ବୈଠକରେ ଯୋଗଦେଇ ନିଜର କଥା ରଖିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଅହିଂସାକୁ ସେ ବାରମ୍ବାର ଗୁରୁତ୍ୱ ଦେବା ସହ ଗାନ୍ଧିଜୀଙ୍କର ଏ ଶବ୍ଦ ଆଜି ସାରା ବିଶ୍ୱରେ କିଭଳି ପରିଚିତି ଲାଭ କରିଛି ସେ ସଂପର୍କରେ ଉଲ୍ଲେଖ କରିଥିଲେ । ମୁଖ୍ୟମନ୍ତ୍ରୀ କହିଥିଲେ ଯେ, ଅହିଂସା ବିଶ୍ୱକୁ ଭାରତର ସବୁଠାରୁ ଶକ୍ତିଶାଳୀ ବାର୍ତ୍ତା । ଅହିଂସା ହିଁ ଆମ ସ୍ୱାଧିନତା ସଂଗ୍ରାମକୁ ବିଶ୍ୱର ସବୁ ସଂଗ୍ରାମଠାରୁ ନିଆରା କରିଛି ।
ଅହିଂସା ହିଁ ଶାନ୍ତି, ବିକାଶ ଓ ସାମ୍ୟତାର ମାର୍ଗ ତେଣୁ ବିକାଶ ଲାଗି ଗାନ୍ଧିଜୀଙ୍କ ଅହିଂସା ମାର୍ଗକୁ ହିଁ ଯୁବ ସମାଜ ଆପଣେଇବା ପାଇଁ ମୁଖ୍ୟମନ୍ତ୍ରୀ ମବୀନ ପଟ୍ଟନାୟକ ଆହ୍ୱାନ ଜଣାଇଛନ୍ତି । ଯୁବ ସମାଜ ମଧ୍ୟରେ ଅହିଂସା ଆଦର୍ଶର ବିକାଶ ଆମର ମହାନ ସଂଗ୍ରାମ ଏବଂ ମହାତ୍ମାଙ୍କୁ ଯୁଗ ଯୁଗ ପାଇଁ ପ୍ରେରଣାର ଉତ୍ସ କରି ରଖିବ ବୋଲି ସେ କହିଛନ୍ତି ।
ମୁଖ୍ୟମନ୍ତ୍ରୀ କହିଥିଲେ ଯେ, ମହାତ୍ମା ଗାନ୍ଧିଙ୍କ ଅହିଂସା ତତ୍ତ୍ୱର ସବୁଠୁ ଗୁରୁତ୍ୱପୂର୍ଣ୍ଣ ନୀତି ହେଉଛି ଯେ, ଦାରିଦ୍ର୍ୟ ଓ ସାମାଜିକ ଅବିଚାର ସବୁଠାରୁ ବଡ଼ ହିଂସା । ଗାନ୍ଧିଜୀଙ୍କ ମତରେ ଯେପର୍ଯ୍ୟନ୍ତ ଦାରିଦ୍ର୍ୟ ରହିଥିବ ସ୍ୱାଧିନତାର ମୁଲ୍ୟ ଅର୍ଥହୀନ । ବିନା ଅହିଂସାରେ ଗରିବୀ ଦୂର କରାଯାଇପାରିବ ନାହିଁ ବୋଲି ମତ ଦେଇ ଜାତି, ଧର୍ମ, ବର୍ଣ୍ଣ ଭିତ୍ତିରେ ସମାଜକୁ ବିଭକ୍ତ କରୁଥିବା ଶକ୍ତିର ପରାଯୟରେ ହିଁ ପ୍ରଗତି ହାସଲ କରାଯାଇ ପାରିବ ବୋଲି ମୁଖ୍ୟମନ୍ତ୍ରୀ କହିଥିଲେ ।
ତେଣୁ ଗାନ୍ଧିଜୀଙ୍କ ଜୟନ୍ତୀ ଅବସରରେ ଅହିଂସା ଶବ୍ଦ ଭାରତୀୟ ସମ୍ବିଧାନର ମୁଖବନ୍ଧରେ ସ୍ଥାନିତ ହେଲେ ତାହା ମହାତ୍ମାଙ୍କ ପ୍ରତି ଶ୍ରେଷ୍ଠ ଶ୍ରଦ୍ଧାଞ୍ଜଳୀ ହେବ ବୋଲି ମୁଖ୍ୟମନ୍ତ୍ରୀ ତାଙ୍କ ମତକୁ ପୁଣି ଥରେ ଦୋହରାଇଥିଲେ । ଏହା ଭାରତ ତଥା ବିଶ୍ୱର ଉତ୍ତର ପୀଢିକୁ ଗାନ୍ଧିଜୀଙ୍କ ଏହି ଉକ୍ତିର ଦୃଢ ସତ୍ୟତା ସବୁ ଦିନ ସ୍ମରଣ କରାଇଦେଉଥିବ ବୋଲି ମୁଖ୍ୟମନ୍ତ୍ରୀ କହିଥିଲେ ।
ଏହି ବୈଠକରେ ରାଷ୍ଟ୍ରପତି ରାମନାଥ କୋବିନ୍ଦ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, ଗୃହମନ୍ତ୍ରୀ ଅମିତ ଶାହା, ସବୁ ରାଜ୍ୟର ମୁଖ୍ୟମନ୍ତ୍ରୀ ଓ ଜାତୀୟ କମିଟିର ସଦସ୍ୟମାନେ ଉପସ୍ଥିତ ଥିଲେ । କର୍ତ୍ତବ୍ୟ ଓ ଅଧିକାର ଉପରେ ଗୁରୁତ୍ୱାରୋପ କରିଥିଲେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଏହାସହିତ ନାଗରିକଙ୍କ କର୍ମ ସଂପର୍କରେ ମଧ୍ୟ ଆଲୋକପାତ କରାଯାଇଥିଲା । ଏହି ଅବସରରେ ମହାତ୍ମା ଗାନ୍ଧୀଙ୍କ ବିଚାରଧାରାକୁ ନେଇ ଏକ ପୁସ୍ତକ ଲୋକାର୍ପିତ ହୋଇଥିଲା ।
ଦିଲ୍ଲୀର କିଛି ସ୍ଥାନରେ ୧୪୪ ଧାରା ଜାରି, ୧୯ ମେଟ୍ରୋ ଷ୍ଟେସନ ବନ୍ଦ, ୧୯ ବିମାନ ଉଡ଼ାଣ ବାତିଲ୍
ନୂଆଦିଲ୍ଲୀ : ନାଗରିକତା ସଂଶୋଧନ ଆଇନକୁ ବିରୋଧ କରି ସାରା ଦେଶରେ ନିଆଁ ଜଳୁଛି । ଉତ୍ତର ପୂର୍ବ ପରେ ଏବେ ଉତ୍ତର ଭାରତରେ ପ୍ରବଳ ହିଂସା ଦେଖିବାକୁ ମିଳିଛି । ଲକ୍ଷ୍ନୌ ଓ ଦିଲ୍ଲୀରେ ବିକ୍ଷୋଭକାରୀମାନେ ହିଂସ୍ର ହୋଇଛନ୍ତି । ୪୦ରୁ ଅଧିକ ଗାଡ଼ିରେ ନିଆଁ ଲଗାଯାଇଥିବା ବେଳେ, ଜନ୍ତର ମନ୍ତରରେ ହଜାର ହଜାର ଲୋକ ବିକ୍ଷୋଭ ପ୍ରଦର୍ଶନ କରିଛନ୍ତି । ଦିଲ୍ଲୀରେ ମୋବାଇଲ୍ ସେବାକୁ କିଛି ସ୍ଥାନରେ ବନ୍ଦ କରାଯିବା ସହ ମେଟ୍ରୋ ଓ ଫ୍ଲାଇଟ୍ ସେବା ମଧ୍ୟ ବାଧାପ୍ରାପ୍ତ ହୋଇଛି । ଗୁଜବରେ ବିଶ୍ୱାସ ନକରିବାକୁ ପୋଲିସ କମିଶନର ସୂଚନା ଦେଇଛନ୍ତି ।
. ନାଗରିକତା ସଂଶୋଧନ ଆଇନକୁ ନେଇ ଦେଶବ୍ୟାପି ବିକ୍ଷୋଭ ଜାରି ।
. ଲକ୍ଷ୍ନୌରେ ବ୍ୟାପକ ହିଂସା । ସମ୍ଭଲରରେ ପୋଲିସ ଗାଡ଼ି ସମେତ ୪୦ରୁ ଅଧିକ ଗାଡ଼ିରେ ନିଆଁ ଲଗାଇଲେ ପ୍ରଦର୍ଶନକାରୀ ।
. ଦିଲ୍ଲୀରେ ୧୯ଟି ମେଟ୍ରୋ ଷ୍ଟେସନ ବନ୍ଦ ସହ ୧୯ଟି ଫ୍ଲାଇଟର ଉଡ଼ାଣ ବାତିଲ୍ କଲା ଇଣ୍ଡିଗୋ ।
୧. ରାଜଧାନୀ ଦିଲ୍ଲୀରେ ୧୯ଟି ମେଟ୍ରୋ ଷ୍ଟେସନ ବନ୍ଦ କରିଦିଆଯାଇଛି । ସେଥି ମଧ୍ୟରୁ ସବୁଠାରୁ ବ୍ୟସ୍ତ ବହୁଳ ସ୍ଥାନ ରାଜୀବ ଚୌକକୁ ମଧ୍ୟ ୩ ଘଣ୍ଟା ପାଇଁ ବନ୍ଦ କରାଯାଇଥିଲା । ଏହା ଦ୍ୱାରା ନିତିଦିନ ଯିବା ଆସିବା କରୁଥିବା ହଜାର ହଜାର ଯାତ୍ରୀ ଫସି ରହିଥିଲେ । ବିଶେଷ କରି ପୂର୍ବ ଦିଲ୍ଲୀର ବହୁ ମେଟ୍ରୋର ଏଣ୍ଟ୍ରି ଓ ଏକଜିଟ୍ ବନ୍ଦ କରାଯାଇଥିଲା ।
୨. ଦିଲ୍ଲୀରେ ଲାଲକିଲ୍ଲା, ମଣ୍ଡି ହାଉସ ସମେତ ଅନ୍ୟ ଅଞ୍ଚଳରେ ପ୍ରଦର୍ଶନକାରୀଙ୍କ ଦ୍ୱାର ଉଗ୍ର ପ୍ରଦର୍ଶନ କରାଯାଇଥିଲା । ତେଣୁ ସୁରକ୍ଷାକୁ ଆଖି ଆଗରେ ରଖି ସେହି ଅଞ୍ଚଳ ଗୁଡ଼ିକରେ ମୋବାଇଲ, ଇଣ୍ଟରନେଟ ସେବା, କଲିଂ, ଏସଏମଏସ୍ ଆଦି ଉପରେ ରୋକ ଲଗାଇ ଦିଆଯାଇଛି । ରିଲାଏନ୍ସ ଜିଓ, ଭୋଡ଼ାଫୋନ୍, ଏୟାରଟେଲ ପ୍ରଭୃତି କଂପାନୀ ସାମୟିକ ଭାବେ କିଛି ସ୍ଥାନରେ ସେବା ବନ୍ଦ କରିଥିଲା ।
୩. ରାଜଧାନୀ ଦିଲ୍ଲୀରେ ବିକ୍ଷୋଭ ସମୟରେ ଯୋଗେନ୍ଦ୍ର ଯାଦବ, ସନ୍ଦୀପ ଦୀକ୍ଷିତ, ଉମର ଖାଲିଦ, ପ୍ରଶାନ୍ତ ଭୂଷଣ ସମେତ ଅନ୍ୟ ନେତାଙ୍କୁ ପୋଲିସ ନିଜ ହେପାଜତକୁ ନେଇଥିଲେ ।
୪. ଇଣ୍ଡିଗୋର ୧୯ଟି ବିମାନର ଉଡ଼ାଣ ବନ୍ଦ ହୋଇଥିବା ବେଳେ ୧୬ଟି ବିମାନର ଉଡ଼ାଣ ବିଳମ୍ବରେ ହୋଇଛି ।
୫. ବନ୍ଦେ ମାତରମ ଏବଂ ସ୍ୱାଭିମାନର ନାରା ଦେଇ ବିଭିନ୍ନ ସ୍ଥାନରେ ବିକ୍ଷୋଭ ପ୍ରଦର୍ଶନ ଉଗ୍ର ରୂପ ନେଇଛି ।
CAAକୁ ଲକ୍ଷ୍ନୌରେ ଉଗ୍ର ବିରୋଧ, ପୋଲିସ ପୋଷ୍ଟ ଧ୍ୱଂସ, ବିଭିନ୍ନ ସ୍ଥାନରେ ବ୍ୟାପକ ହିଂସା
ଲକ୍ଷ୍ନୌ : ନାଗରିକତା ସଂଶୋଧନ ଆଇନକୁ ନେଇ ସାରା ଦେଶରେ ବିରୋଧ ପ୍ରଦର୍ଶନ ଜାରି ରହିଥିବା ବେଳେ, ଉତ୍ତର ପ୍ରଦେଶର ରାଜଧାନୀ ଲକ୍ଷ୍ନୌରେ ପ୍ରବଳ ହିଂସା ଦେଖିବାକୁ ମିଳିଛି । ଆଇନକୁ ବିରୋଧ କରି ପ୍ରଦର୍ଶନ କରୁଥିବା ବ୍ୟକ୍ତି ଉଗ୍ର ଆଚରଣ କରିଛନ୍ତି । ଓଲ୍ଡ ସିଟି ଅଞ୍ଚଳରେ ଆଇନ ଶୃଙ୍ଖଳା ପରିସ୍ଥିତି ଦେଖିବାକୁ ମିଳିଛି । କୋନେଶ୍ୱର ଏବଂ ହୋସେନଗଞ୍ଜ ମଧ୍ୟରେ ପୋଲିସ ସହ ଆନ୍ଦୋଳନକାରୀ ମୁହାଁମୁହିଁ ହୋଇଛନ୍ତି । ପୋଲିସ ପୋଷ୍ଟ ଧ୍ୱଂସ କରିବା ସହ ସୁରକ୍ଷାକର୍ମୀଙ୍କ ଉପରକୁ ଢେଲା ପଥର ମାଡ଼ ହୋଇଛି । ପୋଲିସ ଗାଡ଼ି ଏବଂ ସାଧାରଣ ଲୋକଙ୍କ ଗାଡ଼ି ଜାଳି ଦେଇଛନ୍ତି ଆନ୍ଦୋଳନକାରୀ । ଏବେବି ବିଭିନ୍ନ ସ୍ଥାନରେ ଚାପା ଉତ୍ତେନା ଲାଗି ରହିଛି ।
ହୋସିନାବାଦ, ଦାଲିଗଞ୍ଜ, ତୀଲ ଓ୍ୱାଲି ମସଜିଦ ଏବଂ ଛୋଟା ଇମାମ୍ବରା ପ୍ରଭୃତି ଅଞ୍ଚଳରେ ପୋଲିସ ସହ ସଂଘର୍ଷ ହୋଇଛି । ଶତାଧିକ ଆନ୍ଦୋଳନକାରୀଙ୍କୁ ଅଟକ ରଖିଛି ଉତ୍ତର ପ୍ରଦେଶ ପୋଲିସ । ହିଂସା ଏଭଳି ରୂପ ଧାରଣ କରିଛି ଯେ, ପୋଲିସକୁ ଭିଡ଼ ନିୟନ୍ତ୍ରଣ ପାଇଁ ଲୁହ ବୁହା ଗ୍ୟାସ୍ ଓ ପାଣି ମାଡ଼ କରିବାକୁ ପଡ଼ିଛି । ଲକ୍ଷ୍ନୌରେ ବିଭିନ୍ନ ସ୍ଥାନରେ ନିଆଁ ଲଗାଇ ହିଂସା ପ୍ରଦର୍ଶନ କରାଯାଉଥିବା ବେଳେ ପ୍ରଦର୍ଶନୀକାରୀ ମାନେ ବ୍ୟାପକ ଭଙ୍ଗାରୁଜା କରିଛନ୍ତି । ଭିଡ଼କୁ ନିୟନ୍ତ୍ରଣ କରିବା ପାଇଁ ପୋଲିସ କିଛି ସ୍ଥାନରେ ଲାଠିଚାର୍ଜ କରିଛି ।
ଆନ୍ଦୋଳନକାରୀ ପ୍ରଥମେ ପୋଲିସ ଉପରକୁ ଢ଼େଲା ପଥର ମାଡ଼ କରିବା ପରେ, ପୋଲିସ ଆନ୍ଦୋଳନକାରୀଙ୍କୁ ଅଟକାଇବାକୁ ଲାଠିମାଡ଼ କରିବା ସହ ଲୁହବୁହା ଗ୍ୟାସ ପ୍ରୟୋଗ କରିଥିଲା । ଏହାପରେ ଉତ୍ତର ପ୍ରଦେଶ ପୋଲିସ ଡିଜିପି ଓପି ସିଂହ ହଜରତଗଞ୍ଜ ପରିଦର୍ଶନ କରିଥିଲେ ।
ସାହାଯ୍ୟ କରିବ ସେନସର…କମ୍ପନ କଢ଼ାଇ ନେବ ବାଟ…
ଯାଜପୁର: ଅନ୍ଧ ଆଉ ବଧିରଙ୍କୁ ବିପଦରୁ ରକ୍ଷା କରିବ ଚଷମା । ଏହି ଚଷମା ହେବ ଅନ୍ଧର ଲଉଡ଼ି ମାନେ ଆଗରେ ଥିବା ବାଧାବିଘ୍ନ ଜଣାଇଦେବ। ଖାଲି ଅନ୍ଧ ନୁହେଁ ବଧିରଙ୍କ ପାଇଁ ମଧ୍ୟ କମ୍ପନ ଜରିଆରେ ବିପଦର ଇସାରା ଦେବ । ଏହା ସିନେମା କିମ୍ବା କମିକ୍ସର ଯାଦୁ ଚଷମା ନୁହେଁ, ଏଭଳି ଖାସ୍ ଚଷମା ତିଆରି କରିଛନ୍ତି ଜଣେ କୁନି ବୈଜ୍ଞାନିକ । ସେ ହେଉଛନ୍ତି ଯାଜପୁର ପିସିସି ହାଇସ୍କୁଲର ଅଷ୍ଟମ ଶ୍ରେଣୀର ଛାତ୍ର ପ୍ରିୟବ୍ରତ ସାହୁ ।
ପ୍ରିୟବ୍ରତଙ୍କ କହିବା ମୁତାବକ, ୧୦୦ ସେଣ୍ଟିମିଟର ଭିତରେ କିଛି ବି ପ୍ରତିବନ୍ଧକ ଆସିଲେ, ଏହାର ବଜର ବାଜି ଉଠିବ । ତେଣୁ ଅନ୍ଧ ଲୋକଟି ସତର୍କ ହୋଇ ବାଟ ବଦଳାଇ ପାରିବ । ସେହିପରି ଯଦି ଜଣେ ବଧିର ଏହାକୁ ପିନ୍ଧୁଛନ୍ତି, ତେବେ କିଛି ବି ବିପଦ ପୂର୍ବରୁ ଏଥିରେ କମ୍ପନ ବା ଭାଇବ୍ରେସନ ସୃଷ୍ଟି ହେବ ।
ଆପଣମାନେ ଭାବୁଥିବେ ପ୍ରିୟବ୍ରତ କାହିଁକି ଏମିତି ଚଷମା ତିଆରି କରିବାକୁ ଇଚ୍ଛା ପ୍ରକାଶ କଲେ? ଏହାର କାରଣ କ’ଣ ? ଥରେ ଜଣେ ଅନ୍ଧଙ୍କୁ ଅସୁବିଧାରେ ପଡ଼ିଥିବାର ଦେଖି ସେମାନଙ୍କ ସୁବିଧା ଅସୁବିଧା ବୁଝିଥିଲେ ଏବଂ ସେମାନଙ୍କ ପାଇଁ କିଛି କରିବାର ଇଚ୍ଛା ତାଙ୍କୁ ଜଣେ କୁନି ବୈଜ୍ଞାନିକ କରିଦେଇଛି । ସେବେଠାରୁ ଥିବା ଇଚ୍ଛାକୁ ଆଜି ସେ ସାକାର କରିଛନ୍ତି । ଏଥିରେ ସହଯୋଗ କରିଛି ସ୍କୁଲରେ ଥିବା ବିଜ୍ଞାନ ଗବେଷଣା କେନ୍ଦ୍ର । ନିଜର ଚେଷ୍ଟା ଓ ଶିକ୍ଷକଙ୍କ ସହାୟତାରେ ପ୍ରିୟଙ୍କୁ ମିଳିଛି ଏହି ସେନସର ସ୍ପେକ୍ଟ । ଯାହା ଏବେ ଦିବ୍ୟାଙ୍ଗଙ୍କ ପାଇଁ ଏକ ପ୍ରକାର ବରଦାନ ସଦୃଶ ହୋଇଛି ।