ପୁରୀ: ଶ୍ରୀମନ୍ଦିର ଚାରିପାଖରେ ୭୫ମିଟର ଉଚ୍ଛେଦ କାର୍ଯ୍ୟ ଜାରିରହିଛି । ଆଜି ପଶ୍ଚିମ ଦ୍ୱାର ସମ୍ମୁଖରେ ଥିବା ଗୋଟିଏ ବ୍ୟବସାୟିକ ପ୍ରତିଷ୍ଠାନକୁ ଭାଙ୍ଗି ଦିଆଯାଇଥିବା ବେଳେ ଅନ୍ୟ ପଟେ ଗଡନ୍ତି ଛକରେ ଥିବା ବ୍ୟକ୍ତିଗତ ଘର ଓ ବ୍ୟବସାୟିକ ପ୍ରତିଷ୍ଠାନକୁ ଉଚ୍ଛେଦ କରାଯାଉଛି । ଉଚ୍ଛେଦ ପରେ ଶ୍ରୀମନ୍ଦିର ସୌନ୍ଦର୍ଯ୍ୟରେ ଲାଗିଛି ଚାରଚାନ୍ଦ ।

ପୂର୍ବରୁ ଜବରଦଖଲରେ ଥିବା ବ୍ୟବସାୟିକ ପ୍ରତିଷ୍ଠାନ, ଉଠାଦୋକାନୀଙ୍କୁ ଆଉ ଦେଖିବାକୁ ମିଳୁନି । ଫଳରେ ପୂର୍ବର ଦୃଶ୍ୟ ଅପେକ୍ଷା ଶ୍ରୀମନ୍ଦିର ଅଧିକ ସୁନ୍ଦର ଦିଶୁଛି । ଦିନକୁ ଦିନ ଭକ୍ତଙ୍କ ଭିଡକୁ  ଦୃଷ୍ଟିରେ ରଖି  ଧାଡି ଦର୍ଶନ ପାଇଁ ଏଵେ  ଅତ୍ୟାଧୁନିକ ସେଡ୍ ନିର୍ମାଣ କରାଯାଉଛି । ତେବେ ଶ୍ରୀମନ୍ଦିର ସୌନ୍ଦର୍ଯ୍ୟକୁ ଆହୁରି ମନରୋମ କରିବା ସହ ପରିବେଶ ସୁରକ୍ଷାର ବାର୍ତ୍ତା ଦେବା ପାଇଁ ଗତକାଲି ରାତିଠାରୁ ଶ୍ରୀମନ୍ଦିର ସିଂହଦ୍ୱାର ଠାରେ ଗଛ ଲଗାଯାଇଛି  ।

ସମ୍ପୂର୍ଣ୍ଣ ସିଂହଦ୍ୱାର ଅଞ୍ଚଳକୁ ସବୁଜିମା କରିବା ପାଇଁ ଏଵେ ବିଭିନ୍ନ ଚାରା ଓ ଗଛ ପୁରୀକୁ ଆସିବାରେ ଲାଗିଛି । ଏଵେ ବଡ଼ବଡ଼ କୁଣ୍ଡରେ ଗଛ ଲଗାଯାଇଥିବା ବେଳେ ନୂଆ ସେଡ୍ ନିର୍ମାଣ କାର୍ଯ୍ୟ ଦ୍ରୁତ ଗତିରେ ଆଗେଇ ଚାଲିଛି |

ଭୁବନେଶ୍ୱର: ବାରବାଟୀ ମହାସମରକୁ ଆଉ ମାତ୍ର ୨ ଦିନ ବାକି । ଦିନିକିଆ ମ୍ୟାଚ୍‌କୁ ନେଇ କମ୍ପିବ ବାରବାଟୀ କ୍ରିକେଟ୍ ଗ୍ରାଉଣ୍ଡ । ଆଜି କାଉଣ୍ଟରରେ ଟିକେଟ୍ ବିକ୍ରି ଆରମ୍ଭ ହୋଇଛି । ଅନ୍ୟପଟେ ଅପରାହ୍ଣରେ ଆସୁଛନ୍ତି ଭାରତ, ୱେଷ୍ଟଇଣ୍ଡିଜ ଟିମର ଖେଳାଳି । ଏନେଇ କମିଶନରେଟ ପୋଲିସ ପକ୍ଷରୁ କଡ଼ା ସୁରକ୍ଷା ବ୍ୟବସ୍ଥା କରାଯାଇଛି । ଭୁବନେଶ୍ୱର ବିମାନବନ୍ଦର, ରୁଟ୍ ଲାଇନ ଓ ମେ ଫେୟାର ହୋଟେଲ ଯାଏଁ ପୋଲିସ ପଇଁତରା ମାରୁଛି ।

ସୁରକ୍ଷା ପାଇଁ ଭୁବନେଶ୍ୱରରେ ୨୧ ପ୍ଲାଟୁନ୍ ପୋଲିସ ଫୋର୍ସ ମୁତୟନ ହୋଇଛନ୍ତି । ଏହା ସହ ଡିଏସ୍‌ପି ରାଙ୍କର ୮, ଆଡିସନାଲ ଏସିପି ୪, ଆଇଆଇସି ୨୧ ଓ ଏସଆଇ ୯୨ ଜଣଙ୍କ ସମେତ କ୍ୟୁଆରଟି ଟିମ୍ ସଜାଗ ରହିଛନ୍ତି । ଗତକାଲି ଭୁବନେଶ୍ୱରର ବିମାନବନ୍ଦରରୁ ହୋଟେଲ ମେ ଫେୟାର ପର୍ଯ୍ୟନ୍ତ କାରକେଡ ରିହର୍ସଲ କରାଯାଇଥିଲା ।