ଭଞ୍ଜନଗର ରାଜ୍ୟ ରାଜପଥ ସାକେଣୀ ଗାଁ ନିକଟରେ ଆତଙ୍କ ଖେଳାଇଲେ ଦୁର୍ବୃତ୍ତ। କଳା ସ୍କର୍ପିଓରେ ଆସି ପଥଚାରୀଙ୍କୁ ବ୍ଲେଡ଼ରେ ଆକ୍ରମଣ କରି ଲୁଟିଲେ ୮ ଦୁର୍ବୃତ୍ତ। ବାଇକ୍ ଅଟକାଇ ମାରଣାସ୍ତ୍ରରେ ଆକ୍ରମଣ କରିବା ସହ ପଥଚାରୀଙ୍କ ବାଇକ୍ ପୋଡିଦେଲେ ଦୁର୍ବୃତ୍ତ । ରକ୍ତ ଜୁଡୁବୁଡୁ ଅବସ୍ଥାରେ ସ୍ଥାନୀୟ ଲୋକେ ତାଙ୍କୁ ଉଦ୍ଧାର କରି ଦଶପଲ୍ଲା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରିଛନ୍ତି। ଆହତ ଦଶପଲ୍ଲା ଥାନା ଖଣ୍ଡପଡ଼ା ଗାଁର ଜଟିଆ ବେହେରା ବୋଲି ଜଣା ପଡିଛି l ସେ କୌଣସି କାମରେ ଭଞ୍ଜନଗର ଯାଉଥିବା ବେଳେ ଦୃର୍ବୁତ୍ତଙ୍କ ଆକ୍ରମଣର ଶିକାର ହୋଇଛନ୍ତି l ଏନେଇ ଦଶପଲ୍ଲା ଥାନାରେ ଅଭିଯୋଗ ପରେ ପୋଲିସ ଘଟଣା ସ୍ଥଳରେ ପହଂଚି ତଦନ୍ତ ଆରମ୍ଭ କରିଛି।
ପାକିସ୍ତାନକୁ ଭାରତର କେଉଁ ଗୁପ୍ତ ତଥ୍ୟ ଦେଇଛି ଜ୍ୟୋତି ମାଲହୋତ୍ରା,ବିଭିନ୍ନ ଦିଗକୁ ନେଇ ଏନଆଇଏ କରୁଛି ଜେରା
ନନ୍ଦିଘୋଷ ବ୍ୟୁରୋ: ୟୁଟ୍ୟୁବର ଜ୍ୟୋତି ମାଲହୋତ୍ରାଙ୍କ ଖୋଲୁଛି ଗୁପ୍ତଚର ଗୁମର । ଗତକାଲି ବିଳମ୍ବିତ ରାତିରେ ଜ୍ୟୋତିଙ୍କ ଘରେ ଛାନବିନ୍ କରିଛି ଏନଆଇଏ। ଚଢ଼ାଉ ବେଳେ ଜ୍ୟୋତିଙ୍କ ଘରୁ ବହୁ ଗୁରୁତ୍ବପୂର୍ଣ୍ଣ କାଗଜପତ୍ର ଜବତ କରାଯାଇଛି । ଜାମ୍ମୁ କାଶ୍ମୀରର ପହଲଗାଓଁରେ ଆତଙ୍କବାଦୀ ଆକ୍ରମଣର ତିନି ମାସ ପୂର୍ବରୁ ସେଠାକୁ ଯାଇଥିଲେ ଜ୍ୟୋତି। ଜ୍ୟୋତି ମଲହୋତ୍ରାଙ୍କୁ ପାକିସ୍ତାନୀ ହାଇ କମିଶନର ଦାନିଶ ନାମକ ଜଣେ କର୍ମଚାରୀ ହନିଟ୍ରାପ୍ କରିଥିଲେ । ଦାନିଶ ପାକିସ୍ତାନର ଇଣ୍ଟର ସର୍ଭିସେସ୍ ଇଣ୍ଟେଲିଜେନ୍ସ ISI ସହିତ ଜଡିତ ବୋଲି ଜଣାପଡିଛି। ଜ୍ୟୋତିଙ୍କୁ ISIକୁ ଗୁରୁତ୍ଵପୂର୍ଣ୍ଣ ତଥ୍ୟ ପ୍ରଦାନ କରିବା ଅଭିଯୋଗରେ ଗିରଫ କରାଯାଇଛି । ଜ୍ୟୋତି ଦିଲ୍ଲୀ ପାକିସ୍ତାନ ହାଇକମିଶନରେ କାର୍ଯ୍ୟରତ ଜଣେ ପାକିସ୍ତାନୀ କର୍ମଚାରୀଙ୍କ ସହ ମଧ୍ୟ ଯୋଗାଯୋଗରେ ଥିଲେ ବୋଲି ଅଭିଯୋଗ ହୋଇଛି । ଗତ ୧୩ ତାରିଖରେ ଗୁପ୍ତଚର କାର୍ଯ୍ୟରେ ଲିପ୍ତ ଥିବା ଅଭିଯୋଗରେ ସେହି ପାକିସ୍ତାନୀ ଅଧିକାରୀଙ୍କୁ ବହିଷ୍କାର କରିଥିଲା ଭାରତ । ଅପରେସନ ସିନ୍ଦୂର ଆରମ୍ଭ ହେବା ପରଠାରୁ ଭାରତରେ ଗୁପ୍ତଚର ଏବଂ ପାକିସ୍ତାନର ଆଇଏସଆଇକୁ ସୂଚନା ଯୋଗାଇବା ଅଭିଯୋଗରେ ଜ୍ୟୋତିଙ୍କ ସହିତ ଅନ୍ୟ ପାଞ୍ଚ ଜଣଙ୍କୁ ମଧ୍ୟ ଗିରଫ କରାଯାଇଛି ।
ଶେଷ ହୋଇପାରେ ରୁଷ -ୟୁକ୍ରେନ ଯୁଦ୍ଧ,ଅଢ଼େଇ ଘଣ୍ଟା କଥା ହେଲେ ଆମେରିକା ଓ ରୁଷ ରାଷ୍ଟ୍ରପତି
ନନ୍ଦିଘୋଷ ବ୍ୟୁରୋ : ପୋପ୍ ଲିଓଙ୍କ ଶପଥ ଗ୍ରହଣ ଅବସରରେ ରବିବାର ୟୁକ୍ରେନ ରାଷ୍ଟ୍ରପତି ଭୋଲୋଡିମିର ଜେଲେନସ୍କି ଆମେରିକାର ଉପରାଷ୍ଟ୍ରପତି ଜେଡି ଭାନ୍ସ ଏବଂ ବୈଦେଶିକ ସଚିବ ମାର୍କୋ ରୁବିଓଙ୍କୁ ଭେଟିଥିଲେ। ସୋମବାର ଦିନ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ରୁଷ ସହିତ ଯୁଦ୍ଧ ସମାପ୍ତ କରିବା ପାଇଁ ଫୋନ୍ କଲ୍ ପାଇଁ ପ୍ରସ୍ତୁତି ପାଇଁ ଏହି ବୈଠକ କରାଯାଇଥିଲା। ଟ୍ରମ୍ପ ଏବଂ ଜେଲେନସ୍କିଙ୍କ ମଧ୍ୟରେ ପ୍ରବଳ ବିତର୍କ ପରେ ଏହା ଭାନ୍ସଙ୍କ ସହ ଜେଲେନସ୍କିଙ୍କର ପ୍ରଥମ ସାକ୍ଷାତ। ଏହି ବର୍ଷ ଫେବୃଆରୀରେ ୟୁକ୍ରେନୀୟ ରାଷ୍ଟ୍ରପତି ହ୍ୱାଇଟ୍ ହାଉସ୍ ଗସ୍ତ କରିବା ସମୟରେ ଏହି ଉଷ୍ମ ବିତର୍କ ହୋଇଥିଲା।
ଟ୍ରମ୍ପ ଏବଂ ଆମେରିକା ଚାହାଁନ୍ତି ଯେ ରୁଷ ଏହି ଯୁଦ୍ଧ ବନ୍ଦ କରୁ କିନ୍ତୁ ଏପର୍ଯ୍ୟନ୍ତ ଏହାର ସମାଧାନ ହୋଇନାହିଁ। ଟ୍ରମ୍ପ ଉଭୟ ଦେଶର ନେତା ହେବାକୁ ଚେଷ୍ଟା କରୁଥିବା ସମୟରେ ସୀମା ପାର ହୋଇଯାଇଥିଲା କିନ୍ତୁ ଏପର୍ଯ୍ୟନ୍ତ କୌଣସି ଠୋସ୍ ଫଳାଫଳ ବାହାରି ନାହିଁ। ଏହା ଭିନ୍ନ କଥା ଯେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ସୋମବାର ଦିନ ଘୋଷଣା କରିଥିଲେ ଯେ ରୁଷ ଏବଂ ୟୁକ୍ରେନ ଖୁବ୍ ଶୀଘ୍ର ଯୁଦ୍ଧବିରତି ଏବଂ ଶାନ୍ତି ପାଇଁ ଆଲୋଚନା ଆରମ୍ଭ କରିବେ।
ରୁଷ ରାଷ୍ଟ୍ରପତି ଭ୍ଲାଦିମିର ପୁଟିନଙ୍କ ସହ ତାଙ୍କର ଦୁଇ ଘଣ୍ଟାର ଫୋନ୍ କଲ୍ ପରେ ଏହି ବିବୃତ୍ତି ଆସିଛି। ଟ୍ରମ୍ପ ତାଙ୍କ ସୋସିଆଲ ମିଡିଆ ସାଇଟ୍ ଟ୍ରୁଥ୍ ସୋସିଆଲରେ ଲେଖିଛନ୍ତି ଯେ ପୁଟିନଙ୍କ ସହ ଆଲୋଚନା “ବହୁତ ଭଲ ହୋଇଥିଲା” ଏବଂ ଏବେ ଯୁଦ୍ଧ ସମାପ୍ତ କରିବା ପାଇଁ ଦୁଇ ଦେଶ ମଧ୍ୟରେ ଆଲୋଚନା ଆରମ୍ଭ ହେବ।
ଟ୍ରମ୍ପ କହିଛନ୍ତି ଯେ ସେ ୟୁକ୍ରେନ ରାଷ୍ଟ୍ରପତି ଭୋଲୋଡିମିର ଜେଲେନ୍ସକି ଏବଂ ୟୁରୋପୀୟ ସଂଘ, ଫ୍ରାନ୍ସ, ଜର୍ମାନୀ, ଇଟାଲୀ ଏବଂ ଫିନଲ୍ୟାଣ୍ଡର ନେତାମାନଙ୍କ ସହ ମଧ୍ୟ କଥା ହେବା ସହ ସେମାନଙ୍କୁ ଏହି ଯୋଜନା ବିଷୟରେ ଅବଗତ କରାଇଛନ୍ତି। ସେ ପ୍ରସ୍ତାବ ଦେଇଥିଲେ ଯେ ଭାଟିକାନ ଏହି ଆଲୋଚନା ଆୟୋଜନ କରିପାରିବ। ଟ୍ରମ୍ପଙ୍କ ଅନୁଯାୟୀ, ଭାଟିକାନ ଏହାକୁ ଆୟୋଜନ କରିବାକୁ ଆଗ୍ରହ ଦେଖାଇଛି । ଅନ୍ୟପକ୍ଷରେ, ଆମେରିକାର ଉପରାଷ୍ଟ୍ରପତି ଜେଡି ଭାନ୍ସ ଚେତାବନୀ ଦେଇଛନ୍ତି ଯେ ଯଦି ପୁଟିନ ଶାନ୍ତି ଆଲୋଚନା ପ୍ରତି ଗମ୍ଭୀର ଦେଖାନଯାଆନ୍ତି, ତେବେ ଟ୍ରମ୍ପ ତାଙ୍କର କୂଟନୈତିକ ପ୍ରୟାସ ବନ୍ଦ କରିପାରନ୍ତି। “ଆମେ ସମୟ ନଷ୍ଟ କରିବୁ ନାହିଁ। ଆମେ ଠୋସ୍ ଫଳାଫଳ ଚାହୁଁ, ବୋଲି ଭାନ୍ସ କହିଛନ୍ତି ।
ଆହୁରି ଶକ୍ତିଶାଳୀ ହେଲା ଋଷ, ପ୍ରଥମ ଥର ପାଇଁ AI ଟେକ୍ନୋଲୋଜିରେ ଉଡାଇଲା ସୁଖୋଇ
ନନ୍ଦିଘୋଷ ବ୍ୟୁରୋ : ଇତିହାସ ରଚିଲା ଋଷ । ପ୍ରଥମ ଥର ପାଇଁ AI ଟେକ୍ନୋଲୋଜି ମାଧ୍ୟମରେ ସୁଖୋଇ Su-57M ଯୁଦ୍ଧ ବିମାନ ଉଡ଼ାଇଛି । ଏହି ବିମାନଟି ମେ ୧୫ ତାରିଖରେ AI ସହିତ ପ୍ରଥମ ଉଡ଼ାଣ କରିଥିଲା। Su-57 କୁ ରୁଷିଆର ୟୁନାଇଟେଡ୍ ଏୟାରକ୍ରାଫ୍ଟ କର୍ପୋରେସନ UAC ଏବଂ ସୁଖୋଇ ଡିଜାଇନ୍ ବ୍ୟୁରୋ ମିଳିତ ଭାବରେ ବିକଶିତ କରିଛନ୍ତି । ଏହା ଏକ ପଞ୍ଚମ ପିଢ଼ିର ଗୁପ୍ତ ଯୁଦ୍ଧ ବିମାନ । ଯାହାକୁ ରୁଷ ଆକାଶ ପଥ ଯୁଦ୍ଧ କ୍ଷେତ୍ରରେ ବ୍ୟବହାର କରିବ । ଆକାଶ, ସ୍ଥଳ, ଜଳ ପଥରେ ଆକ୍ରମଣ ପାଇଁ ଏହି ଏଆଇ ଯୁଦ୍ଧ ବିମାନ ଏକ ମାଇଲ୍ ଖୁଣ୍ଟ ପାଲଟିବ ବୋଲି କହିଛନ୍ତି ପରୀକ୍ଷଣ ପାଇଲଟ୍ ସେରଗେଇ ବୋଗଡାନ୍। ଦୂରଗାମୀ ରାଡାରରେ ସଜ୍ଜିତ, Su-57M ଏକ ଆଧୁନିକ ଯୁଦ୍ଧ ବିମାନର ପ୍ରଯୁକ୍ତିବିଦ୍ୟା ମାନଦଣ୍ଡକୁ ଉଚ୍ଚତର କରିବାକୁ ଲକ୍ଷ୍ୟ ରଖିଛି। ଏହା ଋଷକୁ ଆହୁରି ଶକ୍ତିଶାଳୀ କରିବ ବୋଲି ମତ ପ୍ରକାଶ ପାଇଁଛି ।
ଏକା ସାଙ୍ଗରେ ଆସୁଛି ଦୁଇଟି ଲଘୁଚାପ , ଭିଜିବ ପୁରା ଓଡିଶା
ନନ୍ଦିଘୋଷ ବ୍ୟୁରୋ : ଏକା ସାଙ୍ଗରେ ଆସୁଛି ଦୁଇଟି ଲଘୁଚାପ । ମେ’ ଶେଷ ସପ୍ତାହରେ ବଙ୍ଗୋପସାଗର ଏବଂ ଆରବସାଗରରେ ଲଘୁଚାପ ସମ୍ଭାବନା ରହିଛି । କାଲି ବେଳକୁ ଆରବସାଗରର କର୍ଣ୍ଣାଟକ ଉପକୂଳରେ ଘୁର୍ଣ୍ଣିବଳୟ ସମ୍ଭାବନା ରହିଛି । ୨୨ ମେ’ ବେଳକୁ ଏହା ଲଘୁଚାପର ରୂପ ନେବ । ଏହି ଲଘୁଚାପ ଅଧିକ ଘନୀଭୂତ ହେଇ ଉତ୍ତରକୁ ଗତି କରିପାରେ । ୨୭ ମେ’ ବେଳକୁ ପୂର୍ବ କେନ୍ଦ୍ରୀୟ ବଙ୍ଗୋପସାଗର ତଥା ଏହାର ସଂଲଗ୍ନ ଅଞ୍ଚଳରେ ଆଉ ଏକ ଘୁର୍ଣ୍ଣିବଳୟ ସୃଷ୍ଟି ହେଇପାରେ ବୋଲି ଅନୁମାନ କରିଛି ପାଣିପାଗ ବିଭାଗ। ପରବର୍ତ୍ତୀ ସମୟରେ ଏହା ଅଧିକ ଘନୀଭୂତ ହେଇ ଲଘୁଚାପର ରୂପ ନେବ । ରାଜ୍ୟରେ ବର୍ତ୍ତମାନ ଗରମ ଗୁଳୁଗୁଳି ଜାରି ରହିଛି । ଉପକୂଳବର୍ତ୍ତି ଜିଲ୍ଲା ବାଲେଶ୍ୱର,ଭଦ୍ରକ,କେନ୍ଦ୍ରାପଡ଼ା, ଜଗତସିଂହପୁର, ଯାଜପୁର, କଟକ, ପୁରୀ, ଖୋର୍ଦ୍ଧା, ନୟାଗଡ଼, କଟକ, ଗଞ୍ଜାମ, ଗଜପତିରେ ଗରମ ଗୁଳୁଗୁଳିକୁ ନେଇ ୟେଲୋ ଆଲର୍ଟ ଜାରି କରିଛି ପାଣିପାଗ ବିଭାଗ । ଆଗାମୀ ୩ ଦିନ ପାଇଁ କାଳବୈଶାଖୀ ବର୍ଷା ନେଇ ଅରେଞ୍ଜ ଆଲର୍ଟ ଜାରି କରାଯାଇଛି । ଅନ୍ୟପଟେ ମେ ୨୩ ପର୍ଯ୍ୟନ୍ତ ରାଜ୍ୟର କିଛି ଜିଲ୍ଲାରେ ଲାଗିରହିବ କାଳବୈଶାଖୀ ବର୍ଷା ।
ପିଲାଙ୍କ ମଧ୍ୟରେ ମଧୁମେହ ବଢାଇଛି ଚିନ୍ତା
ନନ୍ଦିଘୋଷ ବ୍ୟୁରୋ: ଦିନକୁ ଦିନ ବଢିଚାଲିଛି ମଧୁମେହ ଚିନ୍ତା।ଖାସ କରି ପିଲାମାନଙ୍କ ଭିତରେ ଏହାର ଲକ୍ଷଣ ଦେଖିବାକୁ ମିଳୁଛି। ସଚେତନତା ଅଭାବରୁ ପିଲାମାନେ ଜଙ୍କ ଫୁଡ୍ ଖାଇବା ସହ ଆଉ ଖେଳକୁଦ ପ୍ରତି ଧ୍ୟାନ ଦେଉ ନଥିବାରୁ ଏପରି ପରିସ୍ଥିତି ସୃଷ୍ଟି ହୋଇଛି।ଏଣିକି ସ୍କୁଲସ୍ତରରୁ ପିଲାମାନଙ୍କୁ ସଚେତନ କରିବାକୁ ଯୋଜନା ପ୍ରସ୍ତୁତ କରିଛି ସିବିଏସଇ।ପିଲାଙ୍କ ମଧ୍ୟରେ ମଧୁମେହ ରୋକିବାକୁ ସିବିଏସଇ ପକ୍ଷରୁ ସ୍କୁଲରେ ଗଠନ ହେବ ସୁଗାର ବୋର୍ଡ। ଏହାକୁ କାର୍ଯ୍ୟକାରୀ କରିବା ପାଇଁ ସିବିଏସଇ ପକ୍ଷରୁ ସମସ୍ତ ସ୍କୁଲକୁ ଚିଠି କରାଯାଇଛି।
ଜୀବନଶୈଳୀ ବଦଳିବା ସହ ରୋଗଗ୍ରସ୍ତ ହେଉଛନ୍ତି ଲୋକେ। ପୂର୍ବରୁ କାଁଭାଁ ପିଲାଙ୍କ ଭିତରେ ମଧୁମେହ ଦେଖାଯାଉଥିଲା। ଏବେ ପ୍ରାୟ ୬୦% ପିଲାଙ୍କ ଭିତରେ ଟାଇପ୍-୨ ମଧୁମେହର ଲକ୍ଷଣ ଉଦବେଗଜନକ ସ୍ଥିତି ସୃଷ୍ଟି କରିଛି। ଏଥିପାଇଁ କେନ୍ଦ୍ରୀୟ ମାଧ୍ୟମିକ ଶିକ୍ଷା ବୋର୍ଡ CBSE ପକ୍ଷରୁ ପ୍ରତିଟି CBSE ପରିଚାଳିତ ସ୍କୁଲରେ ସୁଗାର ବୋର୍ଡ ଗଠନ ଲାଗି ନିର୍ଦ୍ଦେଶ ଦିଆଯାଇଛି।ଏହି ବୋର୍ଡ ପିଲାଙ୍କ ରକ୍ତ ଶର୍କରା ନିୟନ୍ତ୍ରଣ ଲାଗି ପଦକ୍ଷେପ ନେବା ସହ ନିୟମିତ ଯାଞ୍ଚ କରିବ। ଅଧିକ ଶର୍କରାଯୁକ୍ତ ସ୍ନାକ୍ସ, ମୃଦୁ ପାନୀୟ, ପ୍ରକ୍ରିୟାକୃତ ଖାଦ୍ୟ, ଫାଷ୍ଟଫୁଡ୍ ମାତ୍ରାଧିକ ଖାଇବା ଯୋଗୁ ମଧୁମେହ ହେଉଛି। ଶର୍କରା ଯୁକ୍ତ ଖାଦ୍ୟ ପିଲାଙ୍କ ମଧ୍ୟରେ ମେଦବହୁଳତା ଅନ୍ୟ ଏକ କାରଣ।ଦାନ୍ତ ସମସ୍ୟା, ଖାଦ୍ୟ ହଜମ ନହେବା ଭଳି ଲକ୍ଷଣ ଦେଖାଦେଉଛି। ସମସ୍ୟା ଲାଗି ରହିଲେ ଶିକ୍ଷାରେ ନୈରାଶ୍ୟଜନକ ପ୍ରଦର୍ଶନ ହୋଇପାରେ। ସୁଗାର ବୋର୍ଡରେ ପିଲାଙ୍କୁ ଶର୍କରାଯୁକ୍ତ ଖାଦ୍ୟରୁ ଦୂରେଇ ରହିବା ପାଇଁ ଶିକ୍ଷା ସହ ସଚେତନ କରାଯିବ। କେଉଁ ପ୍ରକାର ଖାଦ୍ୟ ପିଲାଙ୍କ ପାଇଁ ସ୍ବାସ୍ଥ୍ୟକର ଏହାକୁ ନେଇ ସଚେତନ କରାଯିବ। ସ୍କୁଲର ଶିକ୍ଷକ, ଅଭିଭାବକ ଓ ଡାକ୍ତରଙ୍କୁ ନେଇ ସ୍କୁଲରେ ସୁଗାର ବୋର୍ଡ ଗଠନ କରାଯିବ।
ଜଙ୍କ ଫୁଡ୍ ଖାଇବା ସହ ପିଲାମାନଙ୍କ ଭିତରେ ବ୍ୟାୟାମର ଅଭାବ ରହୁଛି। ଖୋଳକୁଦ ବଦଳରେ ମୋବାଇଲ ଫୋନ୍, କମ୍ପ୍ୟୁଟର ଓ ଟିଭି ଆଗରେ ଦିନ କାଟୁଛନ୍ତି। କୋଭିଡ ପରେ ସତେ ଯେପରି ଖେଳକୁଦ ଉଭାନ ହୋଇଯାଇଛି। ଟାଇପ୍ -୨ ମଧୁମେହ ଯୋଗୁ ଶରୀରରେ ଇନସୁଲିନ କମିଯାଇଥାଏ। ଇନସୁଲିନ୍ ଯୋଗୁ ଶରୀରରେ ଗ୍ଲୁକୋଜ ସୃଷ୍ଟି ହୋଇଥାଏ। ଯାହା ରକ୍ତସଂଚାଳନକୁ ନିୟନ୍ତ୍ରଣରେ ରଖେ। ଅଧିକ ଶୋଷ, ପରିସ୍ରା, ଓଜନ ହ୍ରାସ, ଦୃଷ୍ଟି ଶକ୍ତିରେ କ୍ଷୟ, ସଂକ୍ରମଣ ଟାଇପ- ୨ ମଧୁମେହର ଲକ୍ଷଣ। ଏପରି ସ୍ଥିତି ଉପୁଜିଲେ ତୁରନ୍ତ ଡାକ୍ତରଙ୍କ ପରାମର୍ଶ ନେବାକୁ ପଡ଼ିବ ।
କାମ ଦେଉନି ମୁଖ୍ୟମନ୍ତ୍ରୀଙ୍କ ଅଭିଯୋଗ ଶୁଣାଣି, ନିର୍ଦ୍ଦେଶ ପରେ ବି ସମସ୍ୟାର ହେଉନି ସମାଧାନ
ନନ୍ଦିଘୋଷ ବ୍ୟୁରୋ: ଆଉ ଦୁଇ ସପ୍ତାହ ପରେ ରାଜ୍ଯ ସରକାର ବର୍ଷ ପୂର୍ତ୍ତି ଉତ୍ସବ ପାଳିବାକୁ ଯାଉଛନ୍ତି। ବର୍ଷ ପୂର୍ତ୍ତି ଉତ୍ସବରେ ବର୍ଷକ ମଧ୍ଯରେ ସରକାର ଗ୍ରହଣ କରିଥିବା ସବୁ ବିକାଶମୂଳକ କାମର ତାଲିକା ଦେବେ। ଏଥିପାଇଁ ଜୋରସୋରରେ ପ୍ରସ୍ତୁତି ଚାଲିଛି। ହେଲେ ବହୁ ଆଶା ନେଇ ମୁଖ୍ଯମନ୍ତ୍ରୀଙ୍କ ଅଭିଯୋଗ ଶୁଣାଣୀକୁ ଆସୁଥିବା ଲୋକଙ୍କ ମଧ୍ଯରୁ ବହୁ ଲୋକଙ୍କ ସମସ୍ଯାର ସମାଧାନ ହେଉନଥିବା ଅଭିଯୋଗ ହେଉଛି। ବାରମ୍ବାର ଆସୁଛନ୍ତି, ହେଲେ ଫଳ ଶୂନ। ମୁଖ୍ଯମନ୍ତ୍ରୀ ଦେଉଥିବା ନିର୍ଦ୍ଦେଶକୁ ତଳ ସ୍ତରରେ ଅଫିସର ମାନୁନଥିବା ଅଭିଯୋଗ ହେଉଛି।
ମୁଖ୍ଯମନ୍ତ୍ରୀଙ୍କ ନିର୍ଦ୍ଦେଶ ପରେ ବି ଲୋକଙ୍କ ସମସ୍ଯାର ହେଉନି ସମାଧାନ । ଅଭିଯୋଗ ଶୁଣାଣୀକୁ ଆସିଥିବା କିଛି ସଂଗଠନ ଓ ସାଧାରଣ ଲୋକ ଏଭଳି ଅଭିଯୋଗ କରିଛନ୍ତି… ଅଭିଯୋଗ ଶୁଣାଣି କାର୍ଯ୍ୟକ୍ରମକୁ ଯାଇ ଅନେକ ହେଉଛନ୍ତି ନିରାଶ । ରାଜେଶ କୁମାର ବେହେରା। ଅନୁକମ୍ପାମୂଳକ ଥଇଥାନ ଆଶାୟୀ ଭାବେ ରାଜେଶଙ୍କ ସହ ଅନେକ ପିଲା ମୁଖ୍ୟମନ୍ତ୍ରୀଙ୍କ ଅଭିଯୋଗ ପ୍ରକୋଷ୍ଠ ଦୌଡ଼ି ଦୌଡ଼ି ନୟାନ୍ତ ହୋଇଛନ୍ତି । ସମ୍ବଲପୁରରେ ଅଭିଯୋଗ ଶୁଣାଣି ବେଳେ ମୁଖ୍ୟମନ୍ତ୍ରୀଙ୍କୁ ଭେଟିଥିଲେ । ସମସ୍ତଙ୍କ ପାଇଁ କିଛି କରାଯିବ ବୋଲି କହିଥିଲେ ମୁଖ୍ଯମନ୍ତ୍ରୀ । ହେଲେ ଆଜିର ଶୁଣାଣି ବେଳେ ପ୍ରତିଶ୍ରୁତି ପାଲଟିଛି ପାଣି ଫୋଟକା । ନିରାଶ ହୋଇ ଚରମ ନିଷ୍ପତ୍ତି ନେବାକୁ ଚିନ୍ତା କରୁଛନ୍ତି ସମସ୍ତେ । ସେହିଭଳି କଂହ୍ନେଇପୁରର ସରୋଜିନୀ ମୁଦୁଲି ମୁଖ୍ୟମନ୍ତ୍ରୀଙ୍କୁ ଦୁଇଥର ଭେଟିଲେଣି। ଘର ଭାଙ୍ଗି ଯିବା ନେଇ ମୁଖ୍ୟମନ୍ତ୍ରୀଙ୍କ ଅଭିଯୋଗ ପ୍ରକୋଷ୍ଠରେ ବାରମ୍ବାର ସାକ୍ଷାତ ପରେ ବି ଫଳ ଶୂନ। ଏଥର ସମସ୍ୟା ନଶୁଣିଲେ ଭରସା ତୁଟିଯିବ ବୋଲି ସେ କହିଛନ୍ତି।
ସେପଟେ ମସସ୍ତଙ୍କୁ ଆଶ୍ଚର୍ଯ୍ୟ କରିଛି ଜଣେ ଉଚ୍ଚ ଶିକ୍ଷିତା ମହିଳା ଅର୍ଚ୍ଚନା କାନୁନଗଙ୍କ କଥା । ଅଭିଯୋଗ ପ୍ରକୋଷ୍ଠରେ ସମସ୍ୟାର ସମାଧାନ ନେଇ ତାଙ୍କୁ ମୁଖ୍ୟମନ୍ତ୍ରୀ ପ୍ରତିଶୃତି ଦେଇଥିଲେ । ଅର୍ଚ୍ଚନାଙ୍କ ଆଗରେ ତୁରନ୍ତ ଅଭିଯୋଗର ସମାଧାନ ପାଇଁ ଅଧିକାରୀଙ୍କୁ ନିର୍ଦ୍ଦେଶ ମଧ୍ୟ ଦେଇଥିଲେ । ଏହି ଘଟଣାକୁ ପୁରିଲାଣି ଦୁଇ ମାସ । ହେଲେ ଆଜି ପର୍ଯ୍ୟନ୍ତ ତାଙ୍କ ସମସ୍ଯାର ସମାଧାନ ହୋଇପାରୁନି । ସେହିଭଳି ଜିଆଇଏ ଦାବି ନେଇ ବାରମ୍ବାର ଅଭିଯୋଗ ପ୍ରକୋଷ୍ଠ ଆସିଛନ୍ତି ଶିକ୍ଷକ ଅଧ୍ୟାପକ ସଂଘ। ପୂର୍ବରୁ ହାଇଲେବଲ କମିଟି ଗଠନ କଥା କହିଥିଲେ। ଶହେ ଦିନରେ ଦାବି ପୂରଣ ହେବ ବୋଲି କହିଥିଲେ ସରକାର, ଶହେ ବଦଳରେ ୩୬୫ ଦିନ ହେଲାଣି କିନ୍ତୁ କିଛି ହେଉନି ବୋଲି ଅଭିଯୋଗ ହୋଇଛି। ସେପଟେ ଏବେ ସୁଦ୍ଧା ଅଭିଯୋଗର ୮୫ ପ୍ରତିଶତ ସମସ୍ୟାର ସମାଧାନ ହୋଇ ପାରିଛି ବୋଲି ସୂଚନା ଦେଇଛନ୍ତି ମୁଖ୍ୟମନ୍ତ୍ରୀ ମୋହନ ମାଝୀ। ଅଭିଯୋଗ ପରେ ଅଭିଯୋଗ ଶୁଣା ଚାଲିଛି କିନ୍ତୁ ଫଳ ଶୁନ। ବାରମ୍ବାର ମୁଖ୍ୟମନ୍ତ୍ରୀଙ୍କ ଅଭିଯୋଗ ପ୍ରକୋଷ୍ଠକୁ ଦୌଡ଼ି ଦୌଡ଼ି ଏବେ ନିରାଶ ଜନତା ।
କଲେଜରେ ମୌଳିକ ସୁବିଧା ନଥିବାରୁ ମରଣମୁହଁରେ ଛାତ୍ରଛାତ୍ରୀ
ନନ୍ଦିଘୋଷ ବ୍ୟୁରୋ: ଘରୋଇ କଲେଜରେ ମୌଳିକ ସୁବିଧା ନଥିବାରୁ ମରଣମୁହଁରେ ପଡ଼ୁଛନ୍ତି ଛାତ୍ରଛାତ୍ରୀ । ଯାଇଛି ୨ ଜଣଙ୍କ ଜୀବନ । ଏଭଳି ଅଭିଯୋଗ ଆସିଛି ଢେଙ୍କାନାଳରୁ । ଯାହାକୁ ନେଇ ଅଭିଭାବକ ମହଲରେ ତୀବ୍ର ଅସନ୍ତୋଷ । ସ୍ଥାନୀୟ ଅଞ୍ଚଳରେ ଜନଅସନ୍ତୋଷ ତୀବ୍ର ହେବାରୁ ପ୍ରଶାସନର ନିଦ ଭାଙ୍ଗିଛି । ଏ ନେଇ ଏତଲା ଆଧାରରେ ତଦନ୍ତ କରୁଛି ପୋଲିସ ।
ବୈଷୟିକ କଲେଜ ଖୋଲି ଛାତ୍ରଛାତ୍ରୀଙ୍କଠୁ ମୋଟା ଅଙ୍କ ଟାଣୁଛନ୍ତି । ହେଲେ ଛାତ୍ରଛାତ୍ରୀଙ୍କ ପାଇଁ ଯୋଗାଉନାହନ୍ତି ମୌଳିକ ସୁବିଧା । ହଷ୍ଟେଲ ଅଛି ହେଲେ ସେଥିରେ ପାଣି ଆସୁନି । କଲେଜରେ ପାଣି ଅଭାବରୁ ପିଲାମାନେ ପୋଖରୀକୁ ଗାଧୋଇବାକୁ ଯାଇ ପ୍ରାଣ ହରାଇଛନ୍ତି । ଏଭଳି ଅଭିଯୋଗ ଆସିଛି ଢେଙ୍କାନାଳର ଘରୋଇ ଶିକ୍ଷାନୁଷ୍ଠାନ ବିରୋଧରେ । ଗତ ମାର୍ଚ୍ଚ ୨ ତାରିଖରେ ଏକ ଘରୋଇ ଆଇଟିଆଇ କଲେଜର ଜଣେ ଛାତ୍ର ହଷ୍ଟେଲରେ ପାଣି ନଥିବାରୁ ପୋଖରୀକୁ ଗାଧୋଇବାକୁ ଯାଇ ବୁଡ଼ିଗଲେ । ଘଟଣାସ୍ଥଳରେ ତାଙ୍କର ପ୍ରାଣହାନୀ ଘଟିଥିଲା । ତା’ପୂର୍ବରୁ ଫେବୃଆରୀ ୬ ତାରିଖରେ ଆଉ ଏକ ଘରୋଇ କଲେଜରେ ଜଣେ ଛାତ୍ରୀଙ୍କ ଝୁଲନ୍ତା ମୃତଦେହ ଦେଖିବାକୁ ମିଳିଥିଲା । ଯାହାକୁ ନେଇ ପରିବାର ଲୋକେ ଆତ୍ମହତ୍ୟା ଅଭିଯୋଗ ଆଣିଥିଲେ ।
ଢେଙ୍କାନାଳର ଗଳିକନ୍ଦିରେ ଗଢ଼ି ଉଠୁଛି ଛୋଟବଡ ଘରୋଇ କଲେଜ । ଦଲାଲ ମାଧ୍ୟମରେ ଅଭିଭାବକଙ୍କୁ ପ୍ରଲୋଭିତ କରି ବିଭିନ୍ନ ଜିଲ୍ଲାରୁ ପିଲାଙ୍କୁ ଆଣି ଭର୍ତ୍ତି କରାଯାଉଛି । କିନ୍ତୁ ଛାତ୍ରାବାସଗୁଡ଼ିକରେ କଲେଜ କର୍ତ୍ତୃପକ୍ଷ ମୌଳିକ ସୁବିଧା ଉପଲବ୍ଧ କରୁନଥିବା ଅଭିଯୋଗ ହୋଇଛି। ଖାଲି ସେତିକି ନୁହେଁ ଅଗ୍ନିନିରାପତ୍ତା ବ୍ୟବସ୍ଥା ମଧ୍ୟ ନଥିବା ଅଭିଯୋଗ ହୋଇଛି ।
ପୁନରୁଦ୍ଧାର ହୋଇପାରୁନି ବଲାଙ୍ଗୀର କ୍ଷୁଦ୍ର ଜଳସେଚନ ପ୍ରକଳ୍ପ ଗଡ଼ିଆଜୋର
ନନ୍ଦିଘୋଷ ବ୍ୟୁରୋ: ପୁନରୁଦ୍ଧାର ହୋଇପାରୁନି ବଲାଙ୍ଗୀର କ୍ଷୁଦ୍ର ଜଳସେଚନ ପ୍ରକଳ୍ପ ଗଡ଼ିଆଜୋର । ଦୀର୍ଘ ବର୍ଷ ଧରି ମାଟି, ପଙ୍କ କଢ଼ାନଯିବାରୁ ପାଣି ଦୂଷିତ ହେବା ସହ ବ୍ୟବହାର ଉପଯୋଗୀ ହେଉନି । ସ୍ଥାନୀୟ ଅଞ୍ଚଳର ଲୋକେ ଏହି ପାଣି ବ୍ୟବହାର କରିବା ଯୋଗୁ ବିଭିନ୍ନ ଚର୍ମ ରୋଗରେ ପଡ଼ୁଛନ୍ତି । ଏ ବର୍ଷ ଗ୍ରୀଷ୍ମ ଦିନରେ ଗୋଟିଏ ପରେ ଗୋଟିଏ ଜିଲ୍ଲାରେ ଉତ୍କଟ ଜଳ ସଂକଟ ଦେଖାଦେଲାଣି । ଖୋଦ ମୁଖ୍ୟମନ୍ତ୍ରୀ ଜଳସମ୍ପଦ ବିଭାଗ ଦାୟିତ୍ବରେ ଥାଇ ତ୍ବରିତ ପଦକ୍ଷେପ ନେଇନାହାନ୍ତି । ଜିଲ୍ଲା ପ୍ରଶାସନ ସବୁ ଜାଣି ନୀରବଦ୍ରଷ୍ଟା ସାଜୁଛି ।
କେଉଁଠି ନଈ ପୋଖରୀ ଶୁଖିଲା । ଆଉ କୋଉଠି ନଳକୂଅ ଓ ପାଣି ଟାଙ୍କି ଥିଲେ ବି ପାଣି ଆସୁନି । ପୋଖରୀ, ନଈ, ନାଳ ପୁନରୁଦ୍ଧାର ବି ହେଉନି । ଗ୍ରୀଷ୍ମ ଦାଉରେ ପାଣି ପାଇଁ ଲୋକେ ଡହଳବିକଳ । ସ୍ଥିତି ଏମିତି ଗୋଟିଏ ପରେ ଗୋଟିଏ ଜିଲ୍ଲାରେ ଉତ୍କଟ ଜଳସଂକଟ । ବଲାଙ୍ଗୀର ଗଡ଼ିଆଜୋର କ୍ଷୁଦ୍ର ଜଳସେଚନ ପ୍ରକଳ୍ପ ପୁନରୁଦ୍ଧାର ନ ହେବାରୁ ଲୋକେ ନାହିଁ ନଥିବା ଦଶା ଭୋଗୁଛନ୍ତି । ପଙ୍କ ଓ ମାଟିରେ ପୋତି ହେଲାଣି ଗଡ଼ିଆଜୋର । ଜଳସମ୍ପଦ ବିଭାଗର ଉଦାସୀନତା ଯୋଗୁ ଲୋକେ ଗୋଳିଆ ପାଣି ବ୍ୟବହାର କରିବାକୁ ବାଧ୍ୟ ହେଉଛନ୍ତି । ଫଳରେ ନାନାଦି ଚର୍ମରୋଗରେ ପୀଡ଼ିତ ହୋଇଛନ୍ତି ଏହି ଜୋର ଉପରେ ନିର୍ଭର କରୁଥିବା ୭ରୁ ଅଧିକ ଗାଁ ଲୋକେ । ଖୋଦ ମୁଖ୍ୟମନ୍ତ୍ରୀ ଜଳ ସମ୍ପଦ ବିଭାଗ ଦାୟିତ୍ବରେ । ତଥାପି ତାଙ୍କ ବିଭାଗର ଅଧିକାରୀଙ୍କ ଅବହେଳା ଯେପରି ତାଙ୍କ ଆଖିକୁ ଦେଖାଯାଉନି ।
ବଲାଙ୍ଗୀର ଜିଲ୍ଲା ବଙ୍ଗୋମୁଣ୍ଡା ବ୍ଲକ କନାବିରା ଗାଁରେ ୧୯୯୫ ମସିହାରେ ଜଳ ସମ୍ପଦ ବିଭାଗ ପକ୍ଷରୁ ଆରମ୍ଭ ହୋଇଥିଲା ଗଡିଆଜୋର କ୍ଷୁଦ୍ର ଜଳସେଚନ ପ୍ରକଳ୍ପ । ୪୬୫ ହେକ୍ଟରରେ ବିରାଟକାୟ ଗଡିଆଜୋର ପ୍ରକଳ୍ପ ନିର୍ମାଣ ହୋଇଥିଲା । ୭ରୁ ଅଧିକ ଗାଁ ଲୋକେ ଉପକୃତ ହେବା ସହ ଖରିଫ ଓ ରବି ଋତୁରେ ଚାଷ କରୁଥିଲେ । ହେଲେ ଏବେ ପ୍ରକଳ୍ପଟି କାଦୁଅରେ ପୋତିହୋଇ ନଷ୍ଟ ହେବାକୁ ବସିଲାଣି । ବାରମ୍ବାର ଏ ନେଇ ସ୍ଥାନୀୟ ଲୋକେ ନେତା, ମନ୍ତ୍ରୀ ଓ ବିଭାଗୀୟ ଅଧିକାରୀଙ୍କୁ ଜଣାଇଥିଲେ ବି କିଛି ଫରକ ପଡ଼ିନି । ନନ୍ଦିଘୋଷ ଟିଭିର ଏ ନେଇ ଅନୁଧ୍ୟାନ କରିବା ପରେ ଖୁବଶୀଘ୍ର ପ୍ରକଳ୍ପର ପୁନରୁଦ୍ଧାର କରାଯିବା ବୋଲି କହିଛନ୍ତି ଜିଲ୍ଲାପାଳ ।
ସମ୍ପତ୍ତି ପାଇଁ ହତ୍ୟା : ବଡ଼ ଭଉଣୀ ସାନ ଭାଇ ମିଶି ମଝିଆଁ ଭଉଣୀକୁ ମାରିଦେଲେ..
ନନ୍ଦିଘୋଷ ବ୍ୟୁରୋ: ସମ୍ବଲପୁର ଜିଲ୍ଲା ବାମରା ବ୍ଲକ ଗୋବିନ୍ଦପୁର ଥାନା ମଝି ପଡ଼ାରେ ରକ୍ତ ସମ୍ପର୍କରେ ରକ୍ତ ଛିଟା । ସମ୍ପତ୍ତି ଓ ଜମି ବାଡ଼ି ଭାଗ ବଣ୍ଟାକୁ କେନ୍ଦ୍ର କରି ନିଜର ମଝିଆ ଭଉଣୀକୁ ହତ୍ୟା । ବଡ଼ ଭଉଣୀ ଓ ସାନ ଭାଇ ମିଶି ହତ୍ୟା କରିଥିବା ଅଭିଯୋଗ । ଗୋବିନ୍ଦପୁର ନିବାସୀ ବିନୋଦ ବିହାରୀ ସାହୁଙ୍କ ମଝିଆ ଝିଅ ଲିନା ସାହୁ ବିବାହ ପରେ ଗତ କିଛି ବର୍ଷ ହେବ ପରିବାର ସହ ନ ରହି ସମ୍ବଲପୁର ଅଞ୍ଚଳରେ ଏକୁଟିଆ ରହି କାମଧନ୍ଦା କରି ଚଳୁଥିଲେ । ଏହା ମଧ୍ୟରେ ପୈତୃକ ସମ୍ପତ୍ତି ଓ ଜମିବାଡ଼ି ଭାଗ ବଣ୍ଟାକୁ ନେଇ ପରିବାର ଭିତରେ ତିକ୍ତତା ବଢ଼ି ଚାଲିଥିଲା ।
ଗତକାଲି ନିଜର ସମ୍ପର୍କୀୟ ବଡ଼ ବାପାଙ୍କ ଅନ୍ତେଷ୍ଟି କ୍ରିୟାରେ ଯୋଗଦେବାକୁ ଆସିଥିଲେ । ସମ୍ପର୍କୀୟ ଭାଇ ଘରେ ବିଶ୍ବାରାମ କରୁଥିବା ବେଳେ ତାଙ୍କ ଅବିବାହିତା ବଡ଼ ଭଉଣୀ ପୁଷ୍ପାଞ୍ଜଳୀ ସାହୁ ଓ ସାନ ଭାଇ ଗୋଲକ ସାହୁ ଲିନାକୁ ଗାଳିଗୁଳଜ କରିଥିଲେ । ବଚସା ପରେ ଛୁରୀରେ ଲିନାକୁ ଅତର୍କିତ ଆକ୍ରମଣ କରିଥିଲେ । ଲିନାଙ୍କୁ ଗୁରୁତର ଅବସ୍ଥାରେ ଗୋବିନ୍ଦପୁର ଡାକ୍ତରଖାନାରେ ଭର୍ତ୍ତି କରାଯାଇଥିଲା । ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ଏ ନେଇ ଗୋବିନ୍ଦପୁର ପୋଲିସଅଭିଯୁକ୍ତ ବଡ଼ ଭଉଣୀ ଓ ସାନ ଭାଇକୁ ପୋଲିସ ଗିରଫ କରି କୋର୍ଟ ଚାଲାଣ କରିଛି । ଘଟଣାସ୍ଥଳରେ ସାଇଣ୍ଟିଫିକ୍ ଟିମ୍ ରକ୍ତ ନମୁନା ସଂଗ୍ରହ କରିଛି । ଶବ ବ୍ୟବଚ୍ଛେଦ ପରେ ମୃତଦେହ ପରିବାର ଲୋକଙ୍କୁ ହସ୍ତାନ୍ତର କରାଯାଇଥିବା କହିଛନ୍ତି କୁଚିଣ୍ଡା ଏସଡିପିଓ ପ୍ରଦୀପ କୁମାର ଦାସ ।