ଗଞ୍ଜାମ: ଗଞ୍ଜାମ ଜିଲ୍ଲା କବିସୂର୍ଯ୍ୟନଗର ଥାନା ଗୋବିନ୍ଦପୁରରେ ଅଭାବନୀୟ ଘଟଣା l ସ୍ତ୍ରୀର ଛୁରାମାଡରେ ସ୍ବାମୀ ମୃତ । ମୃତ ସ୍ବାମୀ ଜଣକ ହେଲେ ୩୫ ବର୍ଷୀୟ କାଳିଆ ସେଠୀ l ପରକ୍ରିୟା ପ୍ରୀତିରେ ପଡ଼ି ସ୍ତ୍ରୀ ନିଜ ସ୍ବାମୀକୁ ହତ୍ୟା କରିଥିବା ନେଇ ପରିବାର ପକ୍ଷରୁ ଅଭିଯୋଗ ହୋଇଛି l କାଳିଆ ସେଠୀ ଦୀର୍ଘ ୧୫ ବର୍ଷ ପୂର୍ବେ ପୋଲସରା ଡିମ୍ୱିରିଆ ଗ୍ରାମର ପୂଜା ସେଠୀକୁ ଭଲପାଇ ପ୍ରେମ ବିବାହ କରିଥିଲେ l କିଛି ଦିନ ହେଲା ପୂଜା ମୋବାଇଲରେ ଅନ୍ୟ କାହା ସହ କଥା ହେଉଥିବା ନେଇ ସ୍ବାମୀ ଜଣଙ୍କ ସନ୍ଦେହ କରିଥିଲେ । ଏହି ଘଟଣାକୁ ନେଇ ପ୍ରତ୍ୟେକ ଦିନ ଉଭୟ ସ୍ବାମୀ ଓ ସ୍ତ୍ରୀ ମଧ୍ୟରେ ଝଗଡା ଲାଗି ରହୁଥିଲା l ତେବେ ଗତକାଲି ରାତିରେ କାଳିଆ ଘରେ ଶୋଇଥିବା ବେଳେ ପୂଜା ତାଙ୍କୁ ଛୁରାମାଡ଼ କରି ହତ୍ୟା କରିଥିବା ନେଇ ପରିବାର ଲୋକେ ଅଭିଯୋଗ କରିଛନ୍ତି l ଘଟଣାସ୍ଥଳରେ କବିସୂର୍ଯ୍ୟନଗର ପୋଲିସ ପହଞ୍ଚି ଶବକୁ ଜବତ କରିବା ସହ ଘଟଣାର ତଦନ୍ତ କରୁଛି l…
ଡିଜିଟାଲ କାରବାର ସତ୍ତ୍ୱେ ବହୁଳ ଭାବେ ବ୍ୟବହାର ହେଉଛି ନଗଦ ଟଙ୍କା, ଦେଖନ୍ତୁ ରିପୋର୍ଟ
ନୂଆଦିଲ୍ଲୀ: ଭାରତ ଡିଜିଟାଲ୍ ଦୁନିଆ ଆଡ଼କୁ ଦ୍ରୁତ ଗତିରେ ଆଗକୁ ବଢ଼ୁଛି । UPI ମାଧ୍ୟମରେ ପ୍ରତିଦିନ ୬୦ କୋଟି କାରବାର ହେଉଛି । କିନ୍ତୁ ଆଶ୍ଚର୍ଯ୍ୟର କଥା ହେଉଛି ଏହା ସତ୍ତ୍ୱେ, ନଗଦ ଟଙ୍କା ବହୁଳ ଭାବରେ ବ୍ୟବହୃତ ହେଉଛି। ମେ ମାସରେ, UPI ମାଧ୍ୟମରେ ରେକର୍ଡ ୧୮୬୮ କୋଟି କାରବାର ହୋଇଥିଲା। ସେମାନଙ୍କର ମୋଟ ମୂଲ୍ୟ ୨୫.୧ ଲକ୍ଷ କୋଟି ଟଙ୍କା ଥିଲା। ଏପ୍ରିଲରେ ଏହି ସଂଖ୍ୟା ୧୭୮୯ କୋଟି ଟଙ୍କା (୨୩.୯ ଲକ୍ଷ କୋଟି ଟଙ୍କା) ଥିଲା। ଏହାର ଅର୍ଥ ହେଉଛି UPI ମାଧ୍ୟମରେ କାରବାର ନିରନ୍ତର ବୃଦ୍ଧି ପାଉଛି। କିନ୍ତୁ ମାର୍ଚ୍ଚ ଶେଷ ସୁଦ୍ଧା ଦେଶରେ ମୋଟ ୩୬.୮୬ ଲକ୍ଷ କୋଟି ଟଙ୍କାର ମୁଦ୍ରା ଥିଲା। ଏହା ଏକ ରେକର୍ଡ।
୫୦୦ ଟଙ୍କାର ନୋଟ୍ ସବୁଠାରୁ ଅଧିକ ବ୍ୟବହୃତ ନୋଟ୍ ପାଲଟିଛି। ମୋଟ ନୋଟର ୪୧% ହେଉଛି ୫୦୦ ଟଙ୍କିଆ ନୋଟ। ଯଦି ଆମେ ମୂଲ୍ୟ ବିଷୟରେ କଥା ହେବା, ତେବେ ଏହା 86%। ଏହାର ଅର୍ଥ ହେଉଛି ଅଧିକାଂଶ ଲୋକ ୫୦୦ ଟଙ୍କାର ନୋଟ୍ ବ୍ୟବହାର କରୁଛନ୍ତି। ଅନ୍ୟପକ୍ଷରେ, ୨୦, ୫୦, ୧୦୦ ଏବଂ ୨୦୦ ଟଙ୍କା ଭଳି ଛୋଟ ନୋଟ୍ କମ୍ ବ୍ୟବହୃତ ହେଉଛି। ସେମାନଙ୍କର ସଂଖ୍ୟା ୩୫.୬% ଏବଂ ମୂଲ୍ୟ ୧୦.୯%।
ସରକାର ଚାହୁଁଛନ୍ତି ଯେ ଲୋକମାନେ ଛୋଟ ନୋଟ୍ ବ୍ୟବହାର କରନ୍ତୁ ଏବଂ ଡିଜିଟାଲ ପେମେଣ୍ଟ କରନ୍ତୁ। କିନ୍ତୁ ଏହା ହେଉନାହିଁ। ଅର୍ଥମନ୍ତ୍ରୀ କହିଥିଲେ ଯେ ସରକାର ଛୋଟ ନୋଟ୍ ଏବଂ ଡିଜିଟାଲ୍ ପେମେଣ୍ଟକୁ ପ୍ରୋତ୍ସାହିତ କରିବା ପାଇଁ କାମ କରୁଛନ୍ତି। ସେ କହିଛନ୍ତି ଯେ ସରକାର ଛୋଟ ନୋଟ୍ ଅଧିକ ବ୍ୟବହାର ହେଉ ।
ବାଂଲାଦେଶ ନୋଟରୁ ହଟିଲା ଶେଖ ମୁଜିବୁର ରହମାନଙ୍କ ଫଟୋ
ନନ୍ଦିଘୋଷ ବ୍ୟୁରୋ: ବାଂଲାଦେଶ କେନ୍ଦ୍ରୀୟ ବ୍ୟାଙ୍କ ରବିବାର ଦିନ ଏକ ନୂଆ ଡିଜାଇନ୍ ସହିତ ନୋଟ୍ ଜାରି କରିଛି। ଏହି ନୂଆ ନୋଟଗୁଡ଼ିକରୁ ବହିଷ୍କୃତ ପ୍ରଧାନମନ୍ତ୍ରୀ ଶେଖ ହାସିନାଙ୍କ ପିତା ଏବଂ ବାଂଲାଦେଶର ପ୍ରତିଷ୍ଠାତା ଶେଖ ମୁଜିବୁର ରହମାନଙ୍କ ଫଟୋ ହଟାଇ ଦିଆଯାଇଛି। ଶେଖ ମୁଜିବୁର ରହମାନଙ୍କ ଫଟୋ ବଦଳରେ, ନୂତନ ନୋଟଗୁଡ଼ିକରେ ବାଂଲାଦେଶର ପ୍ରସିଦ୍ଧ ପର୍ଯ୍ୟଟନ ସ୍ଥଳ, ପ୍ରାକୃତିକ ଦୃଶ୍ୟ ଏବଂ ପାରମ୍ପରିକ ସ୍ଥାନଗୁଡ଼ିକୁ ଚିତ୍ରଣ କରାଯାଇଛି। ଏପର୍ଯ୍ୟନ୍ତ ବାଂଲାଦେଶର ସମସ୍ତ ନୋଟରେ ଶେଖ ମୁଜିବୁର ରହମାନଙ୍କ ଫଟୋ ଥିଲା, ଯିଏ ୧୯୭୧ ମସିହାରେ ବାଂଲାଦେଶକୁ ପାକିସ୍ତାନଠାରୁ ସ୍ୱାଧୀନତା ଦେଇଥିଲେ କିନ୍ତୁ ଚାରି ବର୍ଷ ପରେ ଏକ ସାମରିକ ବିଦ୍ରୋହରେ ତାଙ୍କୁ ହତ୍ୟା କରାଯାଇଥିଲା।
ବାଂଲାଦେଶର କେନ୍ଦ୍ରୀୟ ବ୍ୟାଙ୍କ କହିଛି ଯେ ନୂତନ ନୋଟ ସହିତ, ଶେଖ ମୁଜିବୁର ରହମାନଙ୍କ ଫଟୋ ଥିବା ପୂର୍ବରୁ ଥିବା ନୋଟ୍ ଏବଂ ମୁଦ୍ରା ପ୍ରଚଳନରେ ରହିବ। ବାଂଲାଦେଶ କେନ୍ଦ୍ରୀୟ ବ୍ୟାଙ୍କର ମୁଖପାତ୍ର ଆରିଫ୍ ହୁସେନ୍ ଖାନ ନ୍ୟୁଜ୍ ଏଜେନ୍ସି ଏଏଫ୍ପିକୁ କହିଛନ୍ତି, “ନୂଆ ସିରିଜ୍ ଏବଂ ଡିଜାଇନ୍ ଅନୁଯାୟୀ, ନୋଟଗୁଡ଼ିକରେ କୌଣସି ମାନବ ଚିତ୍ର ରହିବ ନାହିଁ କିନ୍ତୁ ପ୍ରାକୃତିକ ଦୃଶ୍ୟ ଏବଂ ପାରମ୍ପରିକ ସ୍ଥାନଗୁଡ଼ିକୁ ଚିତ୍ରଣ କରାଯିବ।” ବାଂଲାଦେଶ ବ୍ୟାଙ୍କ ଦ୍ୱାରା ଜାରି କରାଯାଇଥିବା ନୂଆ ନୋଟରେ ହିନ୍ଦୁ ଏବଂ ବୌଦ୍ଧ ମନ୍ଦିର ସହିତ ଐତିହାସିକ ପ୍ରାସାଦର ଚିତ୍ର ରହିବ। ଏଥିରେ ବ୍ରିଟିଶ ଉପନିବେଶବାଦୀ ଶାସନ ସମୟରେ ବଙ୍ଗ ଦୁର୍ଭିକ୍ଷକୁ ଚିତ୍ରଣ କରୁଥିବା ସ୍ୱର୍ଗତ ଚିତ୍ରଶିଳ୍ପୀ ଜୈନୁଲ ଆବେଦିନଙ୍କ କଳାକୃତି ମଧ୍ୟ ଅନ୍ତର୍ଭୁକ୍ତ ହେବ।
ଆଗାମୀ ଦଶଦିନ ପର୍ଯ୍ୟନ୍ତ ରାଜ୍ୟରେ ନାହିଁ ବର୍ଷା
ଭୁବନେଶ୍ବର: ଦଶଦିନ ପର୍ଯ୍ୟନ୍ତ ରାଜ୍ୟରେ ନାହିଁ ବର୍ଷା । ରାଜ୍ୟକୁ ସଅଳ ମୌସୁମୀ ଆସିବା ପରେ ବି ଆଗାମୀ ୧୦ ଦିନ ପର୍ଯ୍ୟନ୍ତ ରାଜ୍ୟରେ ବଡ ବର୍ଷା ନାହିଁ ବୋଲି ପୂର୍ବାନୁମାନ କରିଛନ୍ତି ପାଣିପାଗ ବିଶେଷଜ୍ଞ । କେବଳ ରାଜ୍ୟରେ ନୁହେଁ ଦେଶର ଅଧିକାଂଶ ସ୍ଥାନରେ ବି ମୌସୁମୀ ନିଷ୍କ୍ରିୟ ରହିବ । ବର୍ତ୍ତମାନ ରାଜ୍ୟକୁ ପଶ୍ଚିମା ପବନ ବହିବା ଫଳରେ ମୌସୁମୀ ଜନିତ ବର୍ଷାରେ ବ୍ରେକ୍ ଲାଗୁଛି । ତେବେ ବର୍ଷା ବଦଳରେ ଆଗାମୀ ୧୦ ଦିନ ପାଇଁ ରାଜ୍ୟରେ ଗରମ ଗୁଳୁଗୁଳିରେ ଲୋକେ ହନ୍ତସନ୍ତ ହେବେ । ଆସନ୍ତା ୫ ତାରିଖ ପର୍ଯ୍ୟନ୍ତ ରାଜ୍ୟରେ ଉପକୁଳ ଓ ଆଭ୍ୟନ୍ତରୀଣ ଓଡ଼ିଶାର ଅନେକ ସ୍ଥାନ ମାନଙ୍କରେ ୩୫ରୁ
୩୯ ଡିଗ୍ରୀ ପର୍ଯ୍ୟନ୍ତ ତାପମାତ୍ରା ବଢ଼ିପାରେ ବୋଲି ପୂର୍ବାନୁମାନ କରିଛନ୍ତି ପାଣିପାଗ ବିଶେଷଜ୍ଞ l ଆଜି ସକାଳ ସାଢେ ୧୧ ସୁଦ୍ଧା ଭୁବନେଶ୍ଵର ତାପମାତ୍ରା ୩୭ ଡିଗ୍ରୀ ପାର କରିଛି।ଗତକାଲି ଏହି ସମୟରେ ତାପମାତ୍ରା ୩୬.୪ ଡ଼ିଗ୍ରୀ ରେକର୍ଡ ହୋଇଥିଲା। ଉପକୂଳ ଓଡ଼ିଶାର କିଛି ସ୍ଥାନରେ ତାପମାତ୍ରା ରେକର୍ଡ କରାଯାଇଛି । ପୁରୀରେ ୩୪.୮ ରେକର୍ଡ କରାଯାଇଥିବା ବେଳେ ପାରାଦ୍ୱୀପରେ ୩୩.୬, ବାଲେଶ୍ୱର: ୩୩.୬, ଚାନ୍ଦବାଲିରେ ୩୩.୪,ଭୁବନେଶ୍ୱରରେ ୩୩ ଓ ଗୋପାଳପୁରରେ ୩୨.୬ ଡିଗ୍ରୀ ରେକର୍ଡ କରାଯାଇଛି ।
ନବରଙ୍ଗପୁରରେ ବିଜେଡିର ଶକ୍ତି ବୃଦ୍ଧି
ଭୁବନେଶ୍ବର : ନବରଙ୍ଗପୁରରେ ବିଜେଡିର ଶକ୍ତି ବୃଦ୍ଧି । କଂଗ୍ରେସର ବିଧାୟକ ପ୍ରାର୍ଥ ଦିଲ୍ଲୀପ ପ୍ରଧାନୀ ଆଜି କଂଗ୍ରେସ ଛାଡି ବିଜେଡିରେ ସାମିଲ ହୋଇଛନ୍ତି । ତାଙ୍କ ସହ ନିର୍ବାଚନମଣ୍ଡଳିର ୪ ଜଣ ସରପଞ୍ଚ ଓ ୪ ଜଣ ସମିତି ସଭ୍ୟଙ୍କ ସହ ଅନେକ କର୍ମକର୍ତ୍ତା ବିଜେଡିରେ ଯୋଗ ଦେଇଛନ୍ତି । ତେବେ ଏହି ମିଶ୍ରଣ ଦ୍ୱାରା ଦଳ ଆହୁରି ସୁଦୃଢ ହେବ ବୋଲି ବିଜେଡି ରାଜ୍ୟସଭା ସାଂସଦ ମୁନା ଖାଁ କହିଛନ୍ତି । ଏପଟେ ଦିଲ୍ଲୀପ ପ୍ରଧାନୀ କହିଛନ୍ତି, ନବୀନ ବାବୁ ସରକାରରେ ଥିବା ସମୟରେ ଅନେକ ଉନ୍ନତି କରିଛନ୍ତି । ତେଣୁ ତାଙ୍କ ନୀତି ଆଦର୍ଶରେ ଅନୁପ୍ରାଣିତ ହୋଇ ମୁଁ ଓ ମୋର ସମର୍ଥକମାନେ ବିଜେଡିରେ ସାମିଲ ହୋଇଛନ୍ତି ।
ଝାଞ୍ଜେରୀବେରେଣୀ ଗାଁକୁ ନାହିଁ ନିତିଦିନିଆ ରାସ୍ତା, ଖାଲଖମା ରାସ୍ତାରେ ଯାତାୟାତ କରୁଛନ୍ତି ଲୋକେ
କାମାକ୍ଷାନଗର : ଢେଙ୍କାନାଳ ଜିଲ୍ଲା କଙ୍କଡାହାଡ଼ ବ୍ଲକ କେରଜୁଳି ପଞ୍ଚାୟତର ଝାଞ୍ଜେରିବେରେଣୀ ଗାଁକୁ ନାହିଁ ନିତିଦିନିଆ ରାସ୍ତା । ସଦର ମହକୁମାର ମାତ୍ର ୭ କିଲୋମିଟର ଦୂର ଝାଞ୍ଜେରୀବେରେଣୀ ଗାଁ ରହିଛି । ରାସ୍ତା ନଥିବାରୁ ଲୋକେ ୧୫ କିଲୋମିଟର ଦୂର ଅତିକ୍ରମ କରି କଙ୍କଡାହାଡ଼ରେ ପହଞ୍ଚୁଛନ୍ତି । ଗାଁରେ ୪ ଶହରୁ ଅଧିକ ଲୋକ ବସବାସ କରୁଥିବା ବେଳେ ସ୍ଥାୟୀ ରାସ୍ତା ନଥିବାରୁ ଜଙ୍ଗଲ, ପାହାଡ଼ ଘେରା ରାସ୍ତାରେ ଯାତାୟାତ କରୁଛନ୍ତି । ଯେଉଁ ରାସ୍ତା ଦେଇ ଗ୍ରାମବାସୀ ଯିବାଆସିବା କରୁଛନ୍ତି ତାହା ଖାଲ ଖମାରେ ବିପଦପୂର୍ଣ୍ଣ ହୋଇଛି । ଗାଁରେ କେହି ଅସୁସ୍ଥ ହେଲେ ଆମ୍ବୁଲାନ୍ସ ପହଞ୍ଚିବା ମଧ୍ୟ ବହୁତ କଷ୍ଟକର ହୋଇପଡ଼େ । ଏପରିକି ଅଗ୍ନିକାଣ୍ଡ ଘଟିଲେ ମଧ୍ୟ ଅଗ୍ନିଶମ ଗାଡ଼ି ପହଞ୍ଚି ନିଆଁକୁ ଆୟତ କରିବା ଅସମ୍ଭବ ହୋଇପଡ଼େ । ସ୍ଥାୟୀ ରାସ୍ତା ନିର୍ମାଣ ପାଇଁ ଗ୍ରାମବାସୀମାନେ ଜିଲ୍ଲାପାଳଙ୍କ ଠାରୁ ଆରମ୍ଭ କରି ବ୍ଲକ ପ୍ରଶାସନ ନିକଟରେ ବାରମ୍ବାର ଦାବି କରି ଆସୁଛନ୍ତି । ପ୍ରଶାସନ ତରଫରୁ ରାସ୍ତା ନିର୍ମାଣ ପାଇଁ ପ୍ରତିଶୃତି ଦିଆଯାଉଥିଲେ ମଧ୍ୟ ଆଜି ପର୍ଯ୍ୟନ୍ତ କୌଣସି ସମାଧାନ ହୋଇପାରିଲା ନାହିଁ । ଆଗକୁ ବର୍ଷା ଦିନ ଆସୁଥିବା ବେଳେ ସେମାନେ କିପରି ଯିବାଆସିବା କରିବେ ସେ ନେଇ ଚିନ୍ତାରେ ଗ୍ରାମବାସୀ ।ତୁରନ୍ତ ଗାଁକୁ ନିତିଦିନିଆ ରାସ୍ତା ନିର୍ମାଣ କରିବାପାଇଁ ଗ୍ରାମବାସୀ ପ୍ରଶାସନ ନିକଟରେ ଦାବି କରିଛନ୍ତି ।
ଲାଞ୍ଚ ନେବାବେଳେ ସିବିଆଇ ହାତରେ ଧରାପଡ଼ିଲେ ଭାରତୀୟ ରାଜସ୍ବ ସେବା ଅଧିକାରୀ
ନନ୍ଦିଘୋଷ ବ୍ୟୁରୋ : ୨୫ ଲକ୍ଷ ଟଙ୍କା ଲାଞ୍ଚ ନେବାବେଳେ ସିବିଆଇ ହାତରେ ଧରାପଡ଼ିଲେ ଭାରତୀୟ ରାଜସ୍ବ ସେବା ଅଧିକାରୀ ଅମିତ କୁମାର ସିଂ । ଦିଲ୍ଲୀ ଆୟକରଦାତା ସେବାର ଅତିରିକ୍ତ ମହାନିର୍ଦ୍ଦେଶକ ଥିବା ଅମିତ କୁମାର ସିଂ ଓ ତାଙ୍କ ବେସରକାରୀ ସହଯୋଗୀ ହର୍ଷ କୋଟାକଙ୍କୁ ଲାଞ୍ଚ ନେବା ଅଭିଯୋଗରେ ସିବିଆଇ ଗିରଫ କରିଛି । ସିବିଆଇ ସୂଚନା ମୁତାବକ ଜଣେ ଆୟକରଦାତାଙ୍କ ଆୟକର ରିଟର୍ଣ୍ଣ ଅନିୟମିତତା ହୋଇଥିବା ଦର୍ଶାଇ ତାଙ୍କ ଉପରେ ଜରିମାନା ବସାଇବାକୁ ଅମିତ ଓ ତାଙ୍କ ସହଯୋଗୀ ହର୍ଷ ଧମକାଉଥିଲେ । ଏପରିକି ଲାଞ୍ଚ ଦେଲେ ତାଙ୍କ ମାମଲାଟିକୁ ରଫାଦଫା କରିବାକୁ ଦେଇଥିଲେ ପ୍ରସ୍ତାବ । ଏଥିପାଇଁ ୪୫ ଲକ୍ଷ ଟଙ୍କା ଲାଞ୍ଚ ଦେବା ନେଇ ଡିଲ୍ ହୋଇଥିଲା । ଅଗ୍ରୀମ ଆକାରରେ ୨୫ ଲକ୍ଷ ଟଙ୍କା ଦେବାକୁ ସ୍ଥିର ହୋଇଥିଲା । ଏ ନେଇ ଅଭିଯୋଗ ପାଇବା ପରେ ଉଭୟଙ୍କୁ ରେଡ୍ ହ୍ୟାଣ୍ଡ ଧରିବାକୁ ଜାଲ ବିଛାଇଥିଲା ସିବିଆଇ । ଗତକାଲି ପଞ୍ଜାବର ମୋହାଲିରେ ଅଗ୍ରୀମ ଟଙ୍କା ପ୍ରଦାନ ବେଳେ ଦୁଇଜଣଙ୍କୁ ମାଡ଼ିବସିଲା ସିବିଆଇ । ଏ ନେଇ କେନ୍ଦ୍ରୀୟ ତଦନ୍ତ ବ୍ୟୁରୋ ଏକ ମାମଲା ଋଜୁ କରି ତଦନ୍ତ ଚଳାଇଛି । ସୂଚନା ମୁତାବକ ଦୁର୍ନୀତିର ମୂଳ ପର୍ଯ୍ୟନ୍ତ ଖୋଜି ବାହାର କରିବା ପାଇଁ ଦିଲ୍ଲୀ, ପଞ୍ଜାବ ଓ ମୁମ୍ବାଇରେ ଉଭୟ ଅଭିଯୁକ୍ତଙ୍କର ଲିଙ୍କକୁ ଅଧିକ ଖୋଳତାଡ଼ କରୁଛି ତଦନ୍ତକାରୀ ସଂସ୍ଥା ।
ବାଂଲାଦେଶ ହିଂସା ପଛରେ ହାଫିଜ୍ ସଇଦ ସଂଗଠନ, ଶେଖ ହସିନାଙ୍କୁ ଛାଡିବାକୁ ପଡିଲା ପଦ
ନନ୍ଦିଘୋଷ ବ୍ୟୁରୋ : ଏପର୍ଯ୍ୟନ୍ତ ଶେଖ ହାସିନାଙ୍କ ବିଦ୍ରୋହ ପଛରେ କେବଳ ଆମେରିକାର ହାତ ଥିବା ବିଶ୍ୱାସ କରାଯାଉଥିଲା। କିନ୍ତୁ ଏବେ ଧୀରେ ଧୀରେ ଏହା ସାମ୍ନାକୁ ଆସୁଛି ଯେ ଏଥିରେ ପାକିସ୍ତାନର ଆତଙ୍କବାଦୀ ସଂଗଠନଗୁଡ଼ିକ ମଧ୍ୟ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଛନ୍ତି। ହାଫିଜ୍ ସଇଦର ନିଷିଦ୍ଧ ସଂଗଠନ ଜମାତ-ଉଦ୍-ଦାୱାର ନେତାମାନେ ଦାବି କରିଛନ୍ତି, ସେମାନେ ଗତ ବର୍ଷ ବାଂଲାଦେଶରେ ହୋଇଥିବା ବିରୋଧ ପ୍ରଦର୍ଶନରେ ପ୍ରମୁଖ ଭୂମିକା ଗ୍ରହଣ କରିଥିଲେ ଏବଂ ପ୍ରଧାନମନ୍ତ୍ରୀ ଶେଖ ହାସିନାଙ୍କୁ କ୍ଷମତା ଛାଡିବାକୁ ବାଧ୍ୟ କରିଥିଲେ। ଜାତିସଂଘ ଦ୍ୱାରା ଆତଙ୍କବାଦୀ ଘୋଷିତ ଜେୟୁଡି ନେତା ସୈଫୁଲ୍ଲା କସୁରୀ ଓ ମୁଜାମ୍ମିଲ ହାଶମୀ ସେମାନଙ୍କ ଭାଷଣରେ ଏହା କହିଛନ୍ତି।
କସୁରୀ କହିଥିଲେ, ୧୯୭୧ ମସିହାରେ ପାକିସ୍ତାନ ବିଭାଜନ ହେବା ସମୟରେ ମୁଁ ଚାରି ବର୍ଷ ବୟସର ଥିଲି। ତତ୍କାଳୀନ ଭାରତୀୟ ପ୍ରଧାନମନ୍ତ୍ରୀ ଇନ୍ଦିରା ଗାନ୍ଧୀ ଘୋଷଣା କରିଥିଲେ ଯେ ସେ ଦୁଇ ରାଷ୍ଟ୍ର ତତ୍ତ୍ୱକୁ ଖଲିଜରେ ବୁଡ଼ାଇ ଦେଇଛନ୍ତି। ମେ ୧୦ ତାରିଖରେ ମୁଁ କହିଥିଲି, ଆମେ ୧୯୭୧ର ପ୍ରତିଶୋଧ ନେଇଛୁ।
ମୁରିଦକେରେ ତାଙ୍କ ଭାଷଣରେ, କସୁରୀ ଭାରତୀୟ ବାୟୁସେନାର ଆକ୍ରମଣ ବିଷୟରେ ମଧ୍ୟ ଉଲ୍ଲେଖ କରିଥିଲେ ଯେଉଁଥିରେ ଭାରତୀୟ ସେନା ତାଙ୍କ ସହଯୋଗୀ ମୁଦାସରଙ୍କୁ ହତ୍ୟା କରିଥିଲା। ସେ ଦାବି କରିଥିଲେ ଯେ ତାଙ୍କୁ ମୁଦାସରଙ୍କ ଅନ୍ତିମ ସଂସ୍କାରରେ ଯୋଗଦେବାକୁ ଅନୁମତି ଦିଆଯାଇ ନଥିଲା। ତଥାପି, ମୁଦାସର ଏବଂ ଅନ୍ୟ ଦୁଇ ଜଣ ଜେୟୁଡି ସଦସ୍ୟଙ୍କ ଅନ୍ତିମ ସଂସ୍କାରରେ ପଞ୍ଜାବର ସାମରିକ ଏବଂ ପୋଲିସ ଅଧିକାରୀମାନେ ଯୋଗ ଦେଇଥିଲେ। କସୁରୀ କହିଥିଲେ, ଆମେ ପରବର୍ତ୍ତୀ ପିଢ଼ିକୁ ଜିହାଦ ପାଇଁ ପ୍ରସ୍ତୁତ କରୁଛୁ । ଆମେ ମରିବାକୁ ଭୟ କରୁନାହୁଁ। କସୁରୀଙ୍କ ଏହି ବୟାନ ପରେ ଭାରତୀୟ ସୁରକ୍ଷା ଏଜେନ୍ସିଗୁଡ଼ିକର ଚିନ୍ତା ବଢ଼ିପାରେ।
ମୁଜାମ୍ମିଲ ହାଶମି ଗୁଜରାନୱାଲାରେ ତାଙ୍କ ଭାଷଣରେ କହିଥିଲେ, ଗତ ବର୍ଷ ବାଂଲାଦେଶରେ ଆମେ ତୁମକୁ ପରାସ୍ତ କରିଥିଲୁ । ସେ ୫ ଅଗଷ୍ଟରେ ହସିନାଙ୍କ ଇସ୍ତଫା ଓ ତାଙ୍କ ଭାରତ ପଳାଇବା ଘଟଣା ସମ୍ପର୍କରେ ଏହା କହିଥିଲେ। ହସିନାଙ୍କ ପରେ ମହମ୍ମଦ ୟୁନୁସ୍ ମଧ୍ୟବର୍ତ୍ତୀକାଳୀନ ସରକାରର ନେତୃତ୍ୱ ନେଇଥିଲେ ଓ ବାଂଲାଦେଶ-ପାକିସ୍ତାନ ସମ୍ପର୍କରେ ସୁଧାର ଆସିଛି।
ଏହି ଭାଷଣଗୁଡ଼ିକ ଉପରେ ପ୍ରତିକ୍ରିୟା ଦେଇ ପୂର୍ବତନ ପାକିସ୍ତାନୀ କୂଟନୀତିଜ୍ଞ ହୁସେନ ହକ୍କାନି କହିଛନ୍ତି, ଏପରି ବୟାନ ବିଶ୍ୱକୁ ପାକିସ୍ତାନର ଏହି ଦାବି ଉପରେ ସନ୍ଦେହ ସୃଷ୍ଟି କରେ ଯେ ଏହା ଆତଙ୍କବାଦକୁ ପ୍ରୋତ୍ସାହିତ କରେ ନାହିଁ। ଜେୟୁଡି ମୁଖ୍ୟ ହାଫିଜ୍ ସଇଦକୁ ୨୦୦୮ ମୁମ୍ବାଇ ଆକ୍ରମଣର ମାଷ୍ଟରମାଇଣ୍ଡ ବୋଲି କୁହାଯାଉଛି ଓ ଭାରତ ତାକୁ ଆତଙ୍କବାଦୀ ବୋଲି ବିବେଚନା କରେ।
ଓଡ଼ିଶାରେ ପ୍ରଥମ କୋଭିଡ ମୃତ୍ୟୁ ଖବର ହଜାଇଲା ନିଦ !
ଭୁବନେଶ୍ବର : ରାଜ୍ୟରେ ୧୨ରେ ପହଞ୍ଚିଲା କୋଭିଡ ଆକ୍ରାନ୍ତଙ୍କ ସଂଖ୍ୟା । ଆଜି ପୁଣି ୩ ନୂଆ ମାମଲା ଚିହ୍ନଟ ହୋଇଥିବା ବେଳେ ଗତକାଲି ଜଣଙ୍କ ମୃତ୍ୟୁ ଖବର ସ୍ବାସ୍ଥ୍ୟ ବିଭାଗର ଚିନ୍ତା ବଢାଇ ଦେଇଛି । କୋଭିଡ ରୋଗୀଙ୍କ ମୃତ୍ୟୁକୁ ନେଇ ଖୋଜଖବର ପାଉନି ସ୍ବାସ୍ଥ୍ୟ ବିଭାଗ । ଗଣମାଧ୍ୟମରୁ ଜାଣିବା ପରେ ଘରୋଇ ମେଡିକାଲଠୁ ଆରମ୍ଭ କରି ସରକାରୀ ହସ୍ପିଟାଲ ଯାଏ ଟିମ୍ ପଠାଇ ସ୍ବାସ୍ଥ୍ୟ ବିଭାଗ କରିଛି ତନାଘନା । ହେଲେ କେଉଁଠାରୁ କୋଭିଡ ରୋଗୀଙ୍କ ମୃତ୍ୟୁ ନେଇ ସୂଚନା ମିଳୁନି । ସଂପୃକ୍ତ ବ୍ୟକ୍ତି ନିଜ ଆଡ଼ୁ ଘରୋଇ ହସପିଟାଲରେ ପରୀକ୍ଷା କରିବା ପରେ ତଥ୍ୟ ଚପାଇ ଦେଇଥିବା ନେଇ ସନ୍ଦେହ କରୁଛି ସ୍ବାସ୍ଥ୍ୟ ବିଭାଗ । କୋଭିଡ ପଜିଟିଭ ରୋଗୀଙ୍କ ତଥ୍ୟ ଲୁଚା ଯାଉଥିବାରୁ ଘରୋଇ ଓ ସରକାରୀ ହସ୍ପିଟାଲକୁ ଜନସ୍ବାସ୍ଥ୍ୟ ନିର୍ଦ୍ଦେଶକଙ୍କ ପକ୍ଷରୁ ତାଗିଦ କରାଯାଇଛି । ନୂଆ ରୋଗ କି ରୋଗୀ ନେଇ IDSP ସେଲକୁ ଆବଗତ କରାଇବେ ମଡିକାଲ କର୍ତ୍ତୃପକ୍ଷ । ଏହି ସେଲ ଡାଟା ସଂଗ୍ରହ କରି ସରକାରଙ୍କୁ ଅବଗତ କରିବ ।
ସେପଟେ ପ୍ରତି ଜିନମ ସିକୁଏନସିଂ ସହ ଓମିକ୍ରନର ନୂଆ ନୂଆ ସବ-ଭ୍ୟାରିଆଣ୍ଟ ଚିହ୍ନଟ ହେବାରେ ଲାଗୁଛି । ପ୍ରଥମ ରୋଗୀଙ୍କ ଠାରେ ଓମିକ୍ରନର ସବ ଭ୍ୟାରିଆଣ୍ଟ ଜେଏନ ଡଟ୍୧ ବାହାରିଥିବା ସ୍ପଷ୍ଟ ହୋଇଥିଲା । ହେଲେ ଆହୁରି ୫ଟି ଜିନମ ସିକୁଏନସିଂରୁ ଆଉ ଦୁଇଟି ଭିନ୍ନ ସବ-ଭାରିଆଣ୍ଟ ବାହାରିଛି । ଦୁଇଟି ମାମଲାରେ ଓମିକ୍ରନର ସବ ଭ୍ୟାଇରାଣ୍ଟ LF.9 ଓ ତିନୋଟି ମାମଲାରେ XFG ଚିହ୍ନଟ କରାଯାଇଛି । ପୂର୍ବରୁ ଚିହ୍ନଟ ହୋଇଥିବା ସବ-ଭାରିଆଣ୍ଟ ପରି ଏହି ଦୁଇଟିର ବି ଲକ୍ଷଣ ରହିଛି । ଏ ନେଇ ବହୁବିଧ ରୋଗୀ ଓ ବୟସ୍କ ରୋଗୀଙ୍କୁ ବିଶେଷ ସତର୍କତା ଅବଲମ୍ବନ କରିବାକୁ ପରାମର୍ଶ ଦିଆଯାଇଛି । ଗତ ଏକ ସପ୍ତାହ ମଧ୍ୟରେ ଭାରତରେ କୋଭିଡ ଆକ୍ରାନ୍ତଙ୍କ ସଂଖ୍ୟା ୧୨୦୦ % ରୁ ଅଧିକ ବୃଦ୍ଧି ପାଇଛି । ବର୍ତ୍ତମାନ ଦେଶରେ ଆକ୍ରାନ୍ତଙ୍କ ସଂଖ୍ୟା ୩ ହଜାର ୭୫୮ ଥିବା ବେଳେ, ଦିନକରେ ବଢିଛନ୍ତି ୩୬୩ ଜଣ ପଜିଟିଭ । କେରଳ, ମହାରାଷ୍ଟ୍ର ଓ ଦିଲ୍ଲୀ ସବୁଠାରୁ ଅଧିକ ପ୍ରଭାବିତ ରାଜ୍ୟ। କେରଳରେ ଆକ୍ରାନ୍ତଙ୍କ ସଂଖ୍ୟା ୧୪୦୦ ଟପିଥିବା ବେଳେ, ମହାରାଷ୍ଟ୍ରରେ ୪୮୫, ଦିଲ୍ଲୀ ୪୩୬, ଗୁଜରାଟ ୩୨୦, ତାମିଲନାଡୁ ୧୯୯, ପଶ୍ଚିମବଙ୍ଗରେ ୨୮୭, କର୍ଣ୍ଣାଟକରେ ୨୩୮ ଆକ୍ରାନ୍ତ ଚିହ୍ନଟ ହୋଇଛନ୍ତି ।
ସରଣ୍ଡା ଜଙ୍ଗଲରେ କମ୍ବିଂ ଓ ସର୍ଚ୍ଚ ଅପରେସନ୍ ଜୋରଦାର
ରାଉରକେଲା : ମାଓ ଗଡ଼ରେ ମାଓବାଦୀଙ୍କୁ ଖୋଜୁଛନ୍ତି ସୁରକ୍ଷାବାହିନୀ । ସରଣ୍ଡା ଜଙ୍ଗଲରେ କମ୍ବିଂ ଓ ସର୍ଚ୍ଚଅପରେସନ୍ ଜୋରଦାର । ଓଡିଶା ଓ ଝାଡଖଣ୍ଡ ପୋଲିସ ସହ SOG, COBRA, CRPF ଓ ଝାଡ଼ଖଣ୍ଡ ଜାଗୁଆର ପକ୍ଷରୁ ଚପ୍ପା ଚପ୍ପା ଚାଲିଛି ଯାଞ୍ଚ । ମାଓବାଦୀମାନେ ସରଣ୍ଡା ଜଙ୍ଗଲର ବିଭିନ୍ନ ସ୍ଥାନରେ ଲ୍ୟାଣ୍ଡମାଇନ ବିଛାଇ ଥିବାରୁ ଏହାକୁ ନଷ୍ଟ କରିବା ପାଇଁ ପୋଲିସ ପକ୍ଷରୁ ଉଦ୍ୟମ ଜାରି ରହିଛି। ଝାରଖଣ୍ଡ ବାଜିନାଡେରା ନିକଟରେ ଶନିବାର ଲ୍ୟାଣ୍ଡ ମାଇନ ବିସ୍ଫୋରଣରେ ଗୁରୁତର ଆହତ ହୋଇଥିଲେ ନିକଟ ଅଞ୍ଚଳର ସାହୁ ବାର୍ଜୋ । ତାଙ୍କୁ ଅଧିକ ଚିକିତ୍ସା ପାଇଁ ରାଉରକେଲା ସରକାରୀ ଡାକ୍ତରଖାନାରୁ ଆଜି ଵୁର୍ଲା ସ୍ଥାନାନ୍ତରିତ କରାଯାଇଛି । ଗତକାଲି ମଧ୍ୟାହ୍ନରେ ସରଣ୍ଡା ଜଙ୍ଗଲକୁ ପତ୍ର ତୋଳିବା ପାଇଁ ଯାଇଥିବା ସାହୁ ଵାର୍ଜୋ ଲ୍ୟାଣ୍ଡମାଇନ ବିସ୍ଫୋରଣରେ ଗୁରୁତର ଆହତ ହୋଇଥିବା ଅଭିଯୋଗ ହୋଇଥିଲା । ସରଣ୍ଡା ଜଙ୍ଗଲରେ ମାଓବାଦୀମାନେ ରହିଥିବାରୁ ଜଙ୍ଗଲ ଭିତରକୁ ଯିବାକୁ ଭୟ ଲାଗୁଥିବା ଆହତ ଯୁବକଙ୍କ ସମ୍ପର୍କୀୟ ସୂଚନା ଦେଇଛନ୍ତି।…..
ବାଙ୍କୋ ପଥର ଖଣି ନିକଟରୁ ୫ ହଜାର କେଜି ଓଜନର ବିସ୍ଫୋରକ ଲୁଟ ଘଟଣାର ତଦନ୍ତ ମଧ୍ୟ ଜାରି ରହିଛି। ଆଡିସନାଲ ଏସପିଙ୍କ ନେତୃତ୍ବରେ ୫ ଜଣିଆ SIT ଟିମ ତଦନ୍ତକୁ ଜୋରଦାର କରିଛନ୍ତି। ବିସ୍ପୋରକ ସାମଗ୍ରୀ ଯାଇଥିବା ଗୋଦାମ ମାଲିକ, କର୍ମଚାରୀ, ପଥର ଖଣି କର୍ମଚାରୀଙ୍କୁ ଆଜି ବି ପୋଲିସ ପକ୍ଷରୁ ପଚରାଉଚରା କରାଯାଉଛି । ବିସ୍ଫୋରକ ସାମଗ୍ରୀ ପଥର ଖଣିକୁ ଯାଉଥିବା ମାଓବାଦୀମାନେ କିପରି ସୂଚନା ପାଇଲେ ? ମାଓବାଦୀଙ୍କ ସହ କାହାର ଲିଙ୍କ୍ ରହିଛି ? ସେନେଇ ତଦନ୍ତ କରାଯାଉଛି। ଝାଡ଼ଖଣ୍ଡ ରାଜ୍ୟ ଅଧିନରେ ଥିବା ସରଣ୍ଡା ଜଙ୍ଗଲରେ ଵହୁ ସଂଖ୍ୟାରେ ମାଓବାଦୀ ରହିଥିବା ସୂଚନା ମିଳିବା ପରେ ଝାଡ଼ଖଣ୍ଡ ଓଡିଶା ସୀମାନ୍ତ ବର୍ତ୍ତି ଅଞ୍ଚଳରେ ସୁରକ୍ଷା ବ୍ୟବସ୍ଥା ଓ ଯାଞ୍ଚ ବ୍ୟବସ୍ଥା ମଧ୍ୟ କଡାକଡି କରାଯାଇଛି ।