ନନ୍ଦିଘୋଷ ବ୍ୟୁରୋ : ରାଉରକେଲା ବିଶ୍ରା ଅଞ୍ଚଳରେ ପୋଲିସର ଡବଲ ଏନକାଉଣ୍ଟର । ପୋଲିସର ଗୁଳିମାଡରେ ଦୁଇ ଦୁର୍ବୃତ୍ତ ଆହତ ହୋଇଛନ୍ତି । ଢାବାରେ ଡକାୟତି କରିବା ପାଇଁ ଆସି ଢାବା ମାଲିକଙ୍କୁ ଗୁଳିମାଡ କରିଥିଲେ ଦୁର୍ବୃତ୍ତମାନେ । ସେମାନଙ୍କୁ ଧରିବା ପାଇଁ ପୋଲିସ ପକ୍ଷରୁ ଉଦ୍ୟମ ସମୟରେ ଦୁର୍ବୃତ୍ତମାନେ ପୋଲିସ ଉପରକୁ ଗୁଳିମାଡ କରିଥିଲେ । ପୋଲିସର ପାଲଟା ଗୁଳିମାଡ଼ରେ ଦୁଇ ଦୁର୍ବୃତ୍ତ ଆହତ ହୋଇଛନ୍ତି । ଆହତ ଢାବା ମାଲିକଙ୍କ ସହ ଦୁଇ ଦୁର୍ବୃତ୍ତଙ୍କୁ ରାଉରକେଲା ସରକାରୀ ଡାକ୍ତରଖାନାରେ ଚିକିତ୍ସା ପାଇଁ ଭର୍ତ୍ତି କରାଯାଇଛି । ଦୁଇ ଆହତ ଦୁର୍ବୃତ୍ତଙ୍କ ସହ ମୋଟ ତିନି ଜଣ ଦୁର୍ବୃତ୍ତ ପୋଲିସ କବଜାରେ ରହିଛନ୍ତି।
ଭାରତ-ପାକିସ୍ତାନକୁ ନେଇ ରାଜନୀତି, କୂଟନୀତି ଓ ସାମରିକ ସ୍ତରରେ ହଲଚଲ
ନନ୍ଦିଘୋଷ ବ୍ୟୁରୋ : ପହଲଗାଓଁ ହମଲା ମାମଲାରେ ଭାରତ-ପାକିସ୍ତାନ ଟକ୍କର। କୂଟନୈତିକ ସ୍ତରରେ ଘନୀଭୂତ ହୋଇଛି ଉତ୍ତେଜନା। ଆଜି ଜାମୁ ଓ କାଶ୍ମୀର ଗସ୍ତର ଯିବେ ସେନାମୁଖ୍ୟ । ସେପଟେ ଏହି ପ୍ରସଙ୍ଗକୁ ନେଇ ଯୁଦ୍ଧ ପରିସ୍ଥିତି ସୃଷ୍ଟି ହୋଇଛି। ପ୍ରକୃତ ନିୟନ୍ତ୍ରଣ ରେଖାରେ ପାକ୍ ସେନା ମୁତୟନ ହୋଇଥିବାବେଳେ ସୈନ୍ୟ ସଂଖ୍ୟା ବଢାଇଛି ପାକିସ୍ତାନ। ଏଲଓସି ଓ ଅନ୍ତର୍ଜାତୀୟ ସୀମାରେ ରହିଥିବା ବଙ୍କରରୁ ସର୍ଭେଲାନ୍ସ କରିବା ଲାଗି ନିର୍ଦ୍ଦେଶ ଦିଆଯାଇଛି। ସିଆଲକୋଟସ୍ଥିତ ଅନ୍ତର୍ଜାତୀୟ ସୀମାରେଖାରେ ପାକିସ୍ତାନ ସେନାକୁ ସତର୍କ ରଖାଯାଇଛି। ସେପଟେ ପହଲଗାଓଁ ଆକ୍ରମଣ ଘଟଣାରେ ଭାରତ ନେଇପାରେ ବଡ଼ ନିଷ୍ପତ୍ତି। ଏପରିକି ପାକିସ୍ତାନ ସହ ବାତିଲ କରିପାରେ ଅସ୍ତ୍ରବିରତି। ଅସ୍ତ୍ରବିରତି ପ୍ରସଙ୍ଗରେ ପାକିସ୍ତାନ ନିଜ ପ୍ରତିଶ୍ରୁତି ପାଳନ କରୁନାହିଁ ବୋଲି ଭାରତ ହୃଦବୋଧ କରିବା ପରେ ଏହି ନିଷ୍ପତ୍ତି ନିଆଯାଇପାରେ ବୋଲି ସୂଚନା ମିଳିଛି। ତେଣେ ପାକିସ୍ତାନ ପ୍ରଧାନମନ୍ତ୍ରୀ ଶେହବାଜ ସରିଫ କହିଛନ୍ତି- ସିନ୍ଧୁ ଜଳ ନେଇ ଭାରତ ଯେଉଁ ପଦକ୍ଷେପ ନେଇଛି ତାହା ପାକିସ୍ତାନ ୨୪ କୋଟି ଲୋକଙ୍କ ଜୀବନ ସହ ଖେଳ ପରି।
ଅନ୍ୟପଟେ ଭାରତ ପାକିସ୍ତାନ ଉତ୍ତେଜନା ଭିତରେ ପ୍ରସ୍ତୁତ ଭାରତୀୟ ବାୟୁସେନା। ଯୁଦ୍ଧାଭ୍ୟାସ ଆରମ୍ଭ କଲା ବାୟୁସେନାର ରାଫେଲ ଓ ସୁଖୋଇ ୩୦। ଭାରତୀୟ ବାୟୁସେନାର ସ୍ବତନ୍ତ୍ର ଯୁଦ୍ଧାଭ୍ୟାସ ଆକ୍ରମଣ ଆରମ୍ଭ। ଉତ୍ତେଜନାକୁ ଦୃଷ୍ଟିରେ ରଖି ବାୟୁସେନାର ଯୁଦ୍ଧାଭ୍ୟାସ। ହରିୟାଣା ଅମ୍ବାଲା ଓ ପଶ୍ଚିମବଙ୍ଗ ହସିମରା ଏୟାରବେସରୁ ସମରାଭ୍ୟାସ। ପୂର୍ବ ଭାଗରେ ଥିବା ଏୟାରବେସରୁ ବାୟୁସେନାକୁ ସ୍ଥାନାନ୍ତର ପ୍ରକ୍ରିୟା ଆରମ୍ଭ। ସ୍ଥଳଭାଗରେ ଆକ୍ରମଣ ପାଇଁ ହୋଇପାରେ ଫାଇଟର ଜେଟ୍ ବ୍ୟବହାର।
ହସ୍ପିଟାଲ ଲିଫ୍ଟରେ ଚାପି ହୋଇ ରୋଗୀଙ୍କ ମୃତ୍ୟୁ
ନନ୍ଦିଘୋଷ ବ୍ୟୁରୋ: ଭଦ୍ରକ ହସ୍ପିଟାଲରେ ଅଘଟଣ । ହସ୍ପିଟାଲ ଲିଫ୍ଟରେ ଚାପି ହୋଇ ଜଣେ ରୋଗୀଙ୍କ ମୃତ୍ୟୁ ଘଟିଛି । ମୃତକ ହେଲେ ନରସିଂହପୁର ଗାଁର ମିନତୀ ପରିଡ଼ା । ରୋଗୀ ମୃତ୍ୟୁକୁ ନେଇ ଭଦ୍ରକ ହସ୍ପିଟାଲରେ ଉତ୍ତେଜନା ଦେଖାଦେଇଥିଲା ।
ମିଳିଥିବା ସୂଚନା ଅନୁସାରେ, ମିନତୀଙ୍କୁ ସ୍ବାସ୍ଥ୍ୟ ଠିକ୍ ନଥିବାରୁ ଆମ୍ବୁଲାନ୍ସ ଯୋଗେ ମେଡିକାଲ ନିଆଯାଇଥିଲା । ସେଠାରେ ତାଙ୍କୁ କଟକ ସ୍ଥାନାନ୍ତର କରିବାକୁ ଡାକ୍ତର କହିଥିଲେ । ଏହାପରେ ପ୍ରାଥମିକ ଚିକିତ୍ସା ପରେ ମହିଳା ଓ୍ବାର୍ଡକୁ ତାଙ୍କୁ ନିଆଯାଉଥିଲା । ହେଲେ ଏହି ସମୟରେ ଲିଫ୍ଟର ସେନସର କାମ ନକରିବାକରୁ ତାହା ଉପରକୁ ଉଠି ଯାଇଥିଲା । ଫଳରେ ଲିଫ୍ଟରେ ଚାପି ହୋଇ ମିନତୀଙ୍କ ମୃତ୍ୟୁ ଘଟିଥିଲା ।
ଅନ୍ୟପକ୍ଷରେ ମୃତକଙ୍କ ପରିବାର ଲୋକଙ୍କ ପାଇଁ ୮ ଲକ୍ଷ ଟଙ୍କାର ଆର୍ଥିକ ସହାୟତା ଘୋଷଣା କରାଯାଇଛି । ଜିଲ୍ଲାପାଳ ଦିଲ୍ଲୀପ ରାଉତରାୟ ଏହି ସାହାୟତା ରାଶି ଘୋଷଣା କରିଛନ୍ତି । ସରକାରୀ ଓ ବେସରକାରୀ ସ୍ତରରୁ ଏହି ରାଶି ଦିଆଯିବ । ଘଟଣାର ଯେପରି ପୁନରାବୃତ୍ତି ନହେବ ସେନେଇ ଧ୍ୟାନ ଦେବାକୁ ଜିଲ୍ଲାପାଳ କହିଛନ୍ତି । ଏକ ଟିମ ଗଠନ କାରାଯାଇ ଘଟଣାର ତଦନ୍ତ କରାଯିବା ସହ ଦୋଷୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯିବ ବୋଲି ଜିଲ୍ଲାପାଳ କହିଛନ୍ତି ।
ହଜାରେରୁ ଅଧିକ ମାଓବାଦୀଙ୍କୁ ଘେରି ରହିଛନ୍ତି ସୁରକ୍ଷାକର୍ମୀ, ୫ ମୃତ
ନନ୍ଦିଘୋଷ ବ୍ୟୁରୋ: ସୁରକ୍ଷାକର୍ମୀଙ୍କ ଘେରା ବନ୍ଦୀରେ ହଜାରେରୁ ଅଧିକ ମାଆବାଦୀ । ୫ ଜଣଙ୍କ ମୃତ୍ୟୁ ଘଟି ସାରିଥିବା ବେଳେ ଚାଲିଛି ଗୁଳି ବିନିମୟ । ଏମିତି ଖବର ଆସିଛି ଛତିଶଗଡ଼ର ବିଜାପୁରରେ । ମାଓବାଦୀ ନେତା ହିଡମାଙ୍କୁ ଧରିବାକୁ ଅପରେସନ୍ ଚାଲିଥିବା ସୂଚନା ।
ବିଜାପୁରରେ ଚାଲିଛଇ ମାଓବାଦୀ ଓ ଯବାନଙ୍କ ମଧ୍ୟରେ ଗୁଳି ବିନିମୟ । ବର୍ତ୍ତମାନ ସୁଦ୍ଧା ୫ ଜଣ ମାଓବାଦୀଙ୍କ ମୃତ୍ୟୁ ଘଟିଥିବା ସୂଚନା ମିଳିଛି । ଛତିଶଗଡ଼ ତେଲେଙ୍ଗାନା ସୀମା କାରେଗୁଟ୍ଟା ଜଙ୍ଗରେ ଚାଲିଛି ଏହି ଏନକାଉଣ୍ଟର । ହଜାରେରୁ ଅଧିକ ମାଓବାଦୀଙ୍କୁ ଚାରିପଟୁ ଘେରି ରହିଛନ୍ତି ଯବାନ ।
ଶୋକାକୁଳ ପରିବେଶରେ ପ୍ରଶାନ୍ତଙ୍କ ଶେଷକୃତ୍ୟ ସମ୍ପନ୍ନ
ନନ୍ଦିଘୋଷ ବ୍ୟୁରୋ: ଶୋକାକୁଳ ପରିବେଶରେ ଜନ୍ମମାଟି ଇସାରୀର ମଶାଣୀରେ ସମ୍ପନ୍ନ ହେଲା ପ୍ରଶାନ୍ତ ଶତପଥୀଙ୍କ ଶେଷକୃତ୍ୟ । ପହଲଗାଓଁ ଆତଙ୍କାବଦୀ ଆକ୍ରମଣରେ ମୃତ୍ୟୁବରଣ କରିଥିଲେ । ପୂରା ଅଞ୍ଚଳ ପ୍ରଶାନ୍ତୁ ଅଶ୍ରୁଳ ବିଦାୟ ଦେଇଛନ୍ତି । ପ୍ରଶାନ୍ତଙ୍କ ଶେଷ ଯାତ୍ରାରେ ହଜାର ହଜାର ଲୋକ ସାମିଲ ହୋଇଥିଲେ । ଘରଠାରୁ ମଶାଣୀ ପର୍ଯ୍ୟନ୍ତ ଲାଗିଥିଲା ଲୋକଙ୍କ ଲମ୍ବା ଲାଇନ୍ ।
ଶ୍ରୀନଗରରୁ ସ୍ବତନ୍ତ୍ର ବିମାନରେ ପ୍ରଶାନ୍ତଙ୍କ ମୃତଦେହ ଭୁବନେଶ୍ବର ବିମାନ ବନ୍ଦରରେ ପହଞ୍ଚି ଥିଲା । ଏହାପରେ ବାଲେଶ୍ବର ଜିଲ୍ଲା ଇସାଣୀ ଗାଁକୁ ପ୍ରଶାନ୍ତଙ୍କ ମର ଶରୀର ନିଆଯାଇଥିଲା । ପ୍ରଶାନ୍ତଙ୍କ ମରଶରୀର ଗାଁରେ ପହଞ୍ଚିବା ପରେ ଶୋକାକୁଳ ପରିବେଶ ସୃଷ୍ଟି ହୋଇଥିଲା । କାନ୍ଦ ବୋବାଳିରେ ଗାଁ ଦାଣ୍ଡ ଫାଟି ପଡ଼ିଥିଲା । ଶେଷରେ ଗାଁ ମଶାରୀରେ ପ୍ରଶାନ୍ତଙ୍କ ଶେଷକୃତ୍ୟ କରାଯାଇଛି ।
ତିନିଦିନ ପୁର୍ବ ପତ୍ନୀ ଏବଂ ପୁଅକୁ ନେଇ ପ୍ରଶାନ୍ତ ଜମ୍ମୁ ଓ କାଶ୍ମୀର ବୁଲିବାକୁ ଯାଇଥିଲେ । ପହଲଗାଓଁ ହୋଇଥିବା ଆତଙ୍କବାଦୀ ଆକ୍ରମଣରେ ପ୍ରଶାନ୍ତଙ୍କ ମୃତ୍ୟୁ ଘଟିଥିଲା । ସେପଟେ ରାଜ୍ୟ ସରକାରଙ୍କ ପକ୍ଷରୁ ପ୍ରଶାନ୍ତଙ୍କ ପରିବାର ପାଇଁ ଆର୍ଥିକ ସହାୟତା ଘୋଷଣା କରାଯାଇଛି । ମୁଖ୍ୟମନ୍ତ୍ରୀ ଇସାରୀ ଗାଁରେ ପହଞ୍ଚି ପ୍ରଶାନ୍ତଙ୍କୁ ଶ୍ରଦ୍ଧାଞ୍ଜଳି ଜଣାଇଛନ୍ତି । ଏହାସହ ରାଜ୍ୟ ସରକାରଙ୍କ ପକ୍ଷରୁ ପ୍ରଶାନ୍ତଙ୍କ ପରିବାର ପାଇଁ ୨୦ ଲକ୍ଷ ଟଙ୍କାର ଆର୍ଥିକ ସହାୟତା ଘୋଷଣା କରାଯାଇଛି । ଏହାସହ ପତ୍ନୀଙ୍କୁ ଚାକିରି ଓ ପୁଅର ପାଠପଢ଼ା ସହ ଅନ୍ୟାନ୍ୟ ସୁବିଧା ଯୋଗାଇ ଦେବାକୁ ସରକାର ପ୍ରତିଶ୍ରୁତି ଦେଇଛନ୍ତି ।
ଭାରତରେ ବନ୍ଦ ହେଲା ପାକିସ୍ତାନ ସରକାରଙ୍କ ଏକ୍ସ ଆକାଉଣ୍ଟ
ନନ୍ଦିଘୋଷ ବ୍ୟୁରୋ: ପହଲଗାଓଁ ଆତଙ୍କବାଦୀ ଆକ୍ରମଣ ପରେ ଭାରତ ଗୋଟିଏ ପରେ ଗୋଟିଏ ଆକ୍ସନ ନେବାରେ ଲାଗିଛି । ସଦ୍ୟ ରିପୋର୍ଟ ଅନୁସାରେ, ପାକିସ୍ତାନ ଉପରେ ସୋସିଆଲ ମିଡ଼ିଆ ଆଟାକ କରିଛି ଭାରତ । ଭାରତରେ ବନ୍ଦ ହେଲା ପାକିସ୍ତାନ ସରକାରଙ୍କ ଏକ୍ସ ଆକାଉଣ୍ଟ । ଏକ୍ସ ପକ୍ଷରୁ କୁହାଯାଇଛି, ଭାରତରେ ପାକିସ୍ତାନ ସରକାରଙ୍କ ଆକାଉଣ୍ଟକୁ ବନ୍ଦ କରି ଦିଆଯାଇଛି । ଏକ୍ସ କର୍ତ୍ତୃପକ୍ଷ ଏକ ସ୍କ୍ରିନ୍ ସର୍ଟ ସେୟାର କରି ଉଲ୍ଲେଖ କରିଛନ୍ତି, ଭାରତ ସରକାରଙ୍କ ଆଇନଗତ ଦାବି ପରେ ପାକିସ୍ତାନ ସରକାରଙ୍କ ଆକାଉଣ୍ଟକୁ ବନ୍ଦ କରି ଦିଆଯାଇଛି ।
ଏହା ପୂର୍ବରୁ ଭାରତ ପାକିସ୍ତାନ ଉପରେ କିଛି ବଡ଼ ଆକ୍ସନ ନେଇଛି । ଅଟାରୀ ସୀମାକୁ ବନ୍ଦ କରି ଦିଆଯାଇଛି । ସିନ୍ଧୁ ନଦୀ ଚୁକ୍ତିନାମାକୁ ଭାରତ ରଦ୍ଦ କରି ଦେଇଛି । ଏହାସହ ଭାରତରେ ଥିବା ପାକିସ୍ତାନ ଦୂତାବାସର କର୍ମଚାରୀଙ୍କ ସଂଖ୍ୟା ୫୫ରୁ କମାଇ ୩୦ କରିଦିଆଯାଇଛି । ଏତିକି ନୁହେଁ, ୪୮ ଘଣ୍ଟା ମଧ୍ୟରେ ପାକିସ୍ତାନୀ ନାଗରିକଙ୍କୁ ଭାରତ ଛାଡ଼ି ଚାଲିଯିବାକୁ କୁହାଯାଇଛି । ପାକିସ୍ତାନଙ୍କୁ ଭାରତୀୟ ଭିସା ଦେବା ଉପରେ ମଧ୍ୟ ରୋକ ଲଗାଇ ଦିଆଯାଇଛି ।
ସୂଚନାଯୋଗ୍ୟ, ୨୨ ତାରିଖରେ ଜମ୍ମୁ ଓ କାଶ୍ମୀରର ପହଲଗାଓଁରେ ପାକିସ୍ତାନୀ ପ୍ରୟୋଜିତ ଆତଙ୍କବାଦୀ ନରସଂହାର କରିଥିଲେ । ଧର୍ମ ପଚାରି ଜଣଙ୍କ ପରେ ଜଣେ କରି ୨୮ ଜଣ ପର୍ଯ୍ୟଟକଙ୍କୁ ହତ୍ୟା କରିଥିଲେ ଏହି ଆତଙ୍କବାଦୀ ।
ଉଦ୍ଧମପୁରରେ ସୁରକ୍ଷାକର୍ମୀ-ଆତଙ୍କବାଦୀ ମୁହାଁମୁହିଁ, ଜଣେ ଯବାନ ସହିଦ
ନନ୍ଦିଘୋଷ ବ୍ୟୁରୋ: ପହଲଗାଓଁରେ ଆତଙ୍କବାଦୀଙ୍କ ନରସଂହାର ସାରା ବିଶ୍ବକୁ ସ୍ତବ୍ଧ କରି ଦେଇଥିବେ ବଳେ ଜମ୍ମୁ ଓ କଶ୍ମୀରରେ ପୁଣି ଏକ ସ୍ଥାନରେ ଆତଙ୍କବାଦୀ ଲୁଚି ରହିଥିବା ସୂଚନା । ଘାଟି ରାଜ୍ୟର ଉଦ୍ଧମପୁରରେ ଆତଙ୍କବାଦୀଙ୍କ ସହ ମୁହାଁମୁହିଁ ହୋଇଛନ୍ତି ସୁରକ୍ଷାକର୍ମୀ । ଏଥିରେ ଜଣେ ଯବାନ ସହିଦ ହୋଇଥିବା ଜଣାପଡ଼ିଛି ।
ଉଦ୍ଧମପୁରର ଡୁଡୁ-ବସନ୍ତଗଡ଼ ଅଞ୍ଚଳରେ ଆତଙ୍କବାଦୀ ଓ ଯବାନ ମୁହାଁମୁହିଁ ହୋଇଛନ୍ତି । ପହଲଗାଓଁ ଆତଙ୍କବାଦୀ ଆକ୍ରମଣ ପରେ ସୁକ୍ଷାକର୍ମୀ ସର୍ଚ୍ଚ ଅପରେସନ ଚଲାଇଛନ୍ତି । ଡୁଡୁ-ବସନ୍ତଗଡ଼ ଅଞ୍ଚଳରେ ସର୍ଚ୍ଚ ଅପରେସନ ବେଳେ ଆତଙ୍କବାଦୀ ଯବାନଙ୍କ ଉପରୁକୁ ଗୁଳିମାଡ଼ କରିଥିଲେ । ଯାହାର ଜବାବ ଦେଉଛନ୍ତି ଭାରତୀୟ ଯବାନ । ଏଠାରେ ଦୁରୁ ତିନି ଜଣ ଆତଙ୍କବାଦୀଙ୍କୁ ସେନା ଘେରି ରହିଛି ।
ଦୁର୍ଦ୍ଦାନ୍ତ ଅପରାଧି ହୁଣ୍ଡଙ୍କୁ ଢେଙ୍କାନାଳ ପୋଲିସର ଏନକାଉଣ୍ଟର
ଢେଙ୍କାନାଳ: ଢେଙ୍କାନାଳରେ ଦୁର୍ଦ୍ଦାନ୍ତ ଅପରାଧି ଦେବାଶିଷ ବେହେରାଙ୍କୁ ଏନକାଉଛନ୍ତି । ହୁଣ୍ଡର ଗୋଡ଼କୁ ଗୁଳି ମାରିଲା ପୋଲିସ । ଏନକାଉଣ୍ଟର ପରେ ଚିକିତ୍ସା ପାଇଁ ହୁଣ୍ଡଙ୍କୁ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି । ସେଠାରେ ତାଙ୍କ ସ୍ବାସ୍ଥ୍ୟାବସ୍ଥା ଗୁରୁତର ରହିଛି । ଶୀଘ୍ର କଟକ ସ୍ଥାନାନ୍ତର କରାଯିବ ବୋଲିସ ଜଣାପଡ଼ିଛି ।
ଆଜି ଭୋର୍ ସମୟରେ ଢେଙ୍କାନାଳ ସଦର ଥାନା ଅନ୍ତର୍ଗତ ମଙ୍ଗଳପୁର ନିକଟରେ ପୋଲିସ ଓ ଅପରାଧି ମଧ୍ୟରେ ଗୁଳି ବିନିମୟ ହୋଇଥିଲା । ଗୁଳିବିନିମୟରେ କାମାକ୍ଷାନଗର ଅଂଚଳରେ ଅପରାଧ କରି ଆତଙ୍କ ସୃଷ୍ଟି କରିଥିବା କିଙ୍ଗ ଅଫ ଫରେଷ୍ଟ ଗ୍ୟାଙ୍ଗର ଫେରାର ସଦସ୍ୟ ହୁଣ୍ଡ ଆହତ ହୋଇଛି । ଗତରାତିରେ ସହଯୋଗୀ ଲିପୁନ ସହ ମିଶି ଜଣେ ବ୍ୟକ୍ତିଙ୍କୁ ଆକ୍ରମଣ ପାଇଁ ଯୋଜନା ପ୍ରସ୍ତୁତ କରୁଥିଲଲେ ହୁଣ୍ଡ । ଖବରପାଇ ସଦର ଥାନା ପୋଲିସ ଉଭୟଙ୍କୁ କାଙ୍କଡ଼ପାଳରୁ ମଙ୍ଗଳପୁର ପର୍ଯ୍ୟନ୍ତ ଗୋଡ଼ାଇଥିଲା । ଏହି ସମୟରେ ପୋଲିସ୍ ଉପରକୁ ଦୁଇ ରାଉଣ୍ଡ ଗୁଳି ଚଳାଇଥିଲେ ହୁଣ୍ଡ । ପୋଲିସର ପାଲଟା ଗୁଳିରେ ହୁଣ୍ଡ ବାଇକରୁ ଖସି ପଡ଼ିଥିବା ବେଳେ ସହଯୋଗୀ ଲିପୁନ ବାଇକ ସହ ଫେରାର ହୋଇଯାଇଛି । ଘଟଣାସ୍ଥଳରୁ ଏକ ବନ୍ଧୁକ ଜବତ କରିଛି ପୋଲିସ । ହୁଣ୍ଡ ନାଁରେ ଜିଲ୍ଲାର ବିଭିନ୍ନ ଥାନାରେ ପ୍ରାୟ ୧୮ ଟି ଅପହରଣ, ଲୁଟ, ଦାଦାବାଟି ଆଦାୟ, ଗୁଳିମାଡ଼ ଭଳି ମାମଲା ରହିଛି ।
ପହଲଗାଓଁ ଆକ୍ରମଣକୁ ନିନ୍ଦା କରିବାରୁ ଗୌତମ ଗମ୍ଭୀରଙ୍କୁ ହତ୍ୟା ଧମକ
ନନ୍ଦିଘୋଷ ବ୍ୟୁରୋ: ଭାରତୀୟ କ୍ରିକେଟ ଟିମ୍ର ମୁଖ୍ୟ କୋଚ୍ ଗୌତମ ଗମ୍ଭରୀଙ୍କୁ ହତ୍ୟା ଧମକ । ଇ-ମେଲ ଜରିଆରେ ଗମ୍ଭୀରଙ୍କୁ ଏହି ଧମକ ଦିଆଯାଇଛି । ଯେଉଁଥିରେ ମାତ୍ର ତିନୋଟି ଶବ୍ଦ ଲେଖା ଯାଇଛି ‘I Kill You’ । ଏନେଇ ଗମ୍ଭୀର ପୋଲିସକୁ ଜଣାଇବା ସହ ଏତଲା ଦେଇଛନ୍ତି । ଅଭିଯୋଗ ପାଇବା ପରେ ଦିଲ୍ଲୀ ପୋଲିସ ଆକ୍ଟିଭ ହୋଇଯାଇଛି । ପ୍ରାଥମିକ ତଦନ୍ତରୁ ଆତଙ୍କବାଦୀ ସଙ୍ଗଠନ ISIS କଶ୍ମୀର ପକ୍ଷରୁ ଏହି ଧମକ ଦିଆଯାଇଥିବା ଜଣାପଡ଼ିଛି ।
ପୋଲିସ ସୂତ୍ରରୁ ପ୍ରକାଶ, ମେଲ୍ ପଠାଇଥିବା ବ୍ୟକ୍ତିଙ୍କୁ ଚିହ୍ନଟ କରିବାକୁ ଚେଷ୍ଟା କରାଯାଉଛି । ସାଇବର ସେଲର ଟିମ୍ ଇ-ମେଲକୁ ଟ୍ରାକ କରିବାକୁ ଚେଷ୍ଟା କରୁଛନ୍ତି । ମେଲ୍ କେଉଁଠୁ ଆସିଛି ଓ କିଏ କରିଛି ତାହା ବର୍ତ୍ତମାନ ପର୍ଯ୍ୟନ୍ତ ସ୍ପଷ୍ଟ ହୋଇନି । ରାଜେନ୍ଦର ନଗର ପୋଲିସ ଷ୍ଟେସନରେ ମାମଲା ହୋଇଛି । ଗମ୍ଭୀରଙ୍କ କାର୍ଯ୍ୟାଳୟ ପକ୍ଷରୁ ପୋଲିସକୁ ସୂଚନା ଦିଆଯାଇଥିଲା । ବୁଧବାର ଏତଲା ଦେବା ସହ ନିଜ ପରିବାର ସୁରକ୍ଷା ବଢ଼ାଇବାକୁ ଅନୁରୋଧ କରିଛନ୍ତି ଗମ୍ଭୀର ।
ଅଭିଯୋଗ ପରେ ଗମ୍ଭୀର ଓ ତାଙ୍କ ପରିବାରର ସୁରକ୍ଷା ପାଇଁ ପଦକ୍ଷେପ ନିଆଯାଉଥିବା ପୋଲିସ ପକ୍ଷରୁ କୁହାଯାଇଛି । ମିଳିଥିବା ସୂଚନା ଅନୁସାରେ ୨୨ ଏପ୍ରିଲରେ ଇ-ମେଲ୍ ଜରିଆରେ ଗମ୍ଭୀରଙ୍କୁ ଦୁଇ ଥର ଧମକ ଦିଆଯାଇଛି । ଗୋଟିଏ ଧମକପୂର୍ଣ୍ଣ ମେଲ୍ ଅପରାହ୍ନରେ ଆସିଥିବା ବେଳେ ଦ୍ବିତୀୟ ମେଲଟି ସନ୍ଧ୍ୟାରେ ଆସିଥିଲା । ତେବେ ଗମ୍ଭୀରଙ୍କୁ ଏପରି ଧମକ ଘଟଣା ପ୍ରଥମ ନୁହେଁ । ପୂର୍ବରୁ ୨୦୨୧ ନଭେମ୍ବରରେ ସେ ସଂସଦ ଥିବା ବେଳେ ଏମିତି ଧମକ ମିଳିଥାନ୍ତା ।
ସୂଚନାଯୋଗ୍ୟ, ପହଲଗାଓଁ ଆକ୍ରମଣକୁ ଗୌତମ ଗମ୍ଭୀର ନିନ୍ଦା କରିଥିଲେ । ନିଜ ସୋସିଆଊ ମିଡ଼ିଆ ଏକ୍ସରେ ପୋଷ୍ଟ କରି ଆତଙ୍କବାଦୀଙ୍କ ନରସଂହାରକୁ ନିନ୍ଦା କରିଥିଲେ । ଏଥିରେ ସେ ଉଲ୍ଲେଖ କରିଥିଲେ । ମୃତକଙ୍କ ପରିବାର ପାଇଁ ପ୍ରାର୍ଥନା କରୁଛି । ଯେଉଁମାନେ ଏଥିପାଇଁ ଦାୟୀ ସେମାନଙ୍କୁ ଏହାର ମୂଲ୍ୟ ଦେବାକୁ ପଡ଼ିବ । ଭାରତ ଏହାର ଉତ୍ତର ଦେବ ।
ଅନ୍ତିମ ଯାତ୍ରାରେ ପହଲଗାଓଁ ଆତଙ୍କବାଦୀ ଆକ୍ରମଣରେ ମୃତ ପ୍ରଶାନ୍ତ ଶତପଥୀ
ନନ୍ଦିଘୋଷ ବ୍ୟୁରୋ: ପହଲଗାଓଁ ନରସଂହାରରେ ମୃତ୍ୟୁବରଣ କରିଥିବା ଓଡ଼ିଶାର ପ୍ରଶାନ୍ତ ଶତପଥୀଙ୍କ ଅନ୍ତିମ ଯାତ୍ରା । ଗାଁ ମଶାଣୀକୁ ଗଲେ ପ୍ରଶାନ୍ତ । ବାପାଙ୍କ ଅନ୍ତିମ ଯାତ୍ରାରେ ପୁଅ ଖଇ କଉଡି ପକାଇ ପକାଇ ଯାଇଥିଲେ । ଗାଁ ମଶାଣୀରେ ହେବ ଶେଷକୃତ୍ୟ ।
ଶ୍ରୀନଗରରୁ ସ୍ବତନ୍ତ୍ର ବିମାନରେ ପ୍ରଶାନ୍ତଙ୍କ ମର ଶରୀର ଭୁବନେଶ୍ବର ବିମାନ ବନ୍ଦରରେ ପହଞ୍ଚି ଥିଲା । ସେଠାରୁ ତାଙ୍କୁ ଜନ୍ମମାଟି ବାଲେଶ୍ବର ଇସାଣୀ ଗାଁକୁ ନିଆଯାଇଥିଲା । ତିନିଦିନ ପୂର୍ବେ ପ୍ରଶାନ୍ତ ପତ୍ନୀ ଓ ପୁଅ ସହ ପହଲଗାଓଁ ବୁଲିବାକୁ ଯାଇଥିଲେ । ସେଠାରେ ହୋଇଥିବା ଆତଙ୍କବାଦୀ ଆକ୍ରମଣର ଶିକାର ହୋଇଥିଲେ । ଏହି ଆକ୍ରମଣରେ ପ୍ରଶାନ୍ତଙ୍କ ସମେତ ୨୮ ଜଣ ପର୍ଯ୍ୟଟକଙ୍କ ମୃତ୍ୟୁ ଘଟିଛି ।