ଜାଣନ୍ତୁ ସେହି ଅଲ୍ ଫଲାହ ଟ୍ରଷ୍ଟ୍ ବାବଦରେ ଯାହାର କିଛି ଡାକ୍ତରଙ୍କୁ ଦିଲ୍ଲୀ ବିସ୍ଫୋରଣ ମାମଲାରେ କରାଯାଇଛି ଗିରଫ
୧୦/୧୧ ଦିଲ୍ଲୀ ବିସ୍ଫୋରଣ ଏବଂ ଆତଙ୍କବାଦୀ ନେଟୱର୍କକୁ ନେଇ ଅଲ୍-ଫଲାହ ୟୁନିଭର୍ସିଟି, ବିଶେଷକରି ଅଲ୍-ଫଲାହ ସ୍କୁଲ୍ ଅଫ୍ ମେଡିକାଲ୍ ସାଇନ୍ସ ଏବଂ ରିସର୍ଚ୍ ସେଣ୍ଟର୍ ଚର୍ଚ୍ଚାରେ ଅଛି। ଦିଲ୍ଲୀ ବିସ୍ଫୋରଣର ଠିକ୍ ପୂର୍ବରୁ ଚାଲିଥିବା କାର୍ଯ୍ୟାନୁଷ୍ଠାନରେ ଏଠାରେ ପଢ଼ାଉଥିବା ଡାକ୍ତର ଡା. ଶାହିନ୍, ଡା. ଉମର ଏବଂ ଡା. ମୁଜମ୍ମିଲ୍ ଙ୍କ ନାମ ସାମ୍ନାକୁ ଆସିଛି। ତେବେ ପ୍ରଶ୍ନ ହେଲା ଏହି ସନ୍ଦିଗ୍ଧ ଆତଙ୍କବାଦୀଙ୍କୁ ନିଜ ସଂସ୍ଥାରେ ସ୍ଥାନ ଦେଇଥିବା ଅଲ୍-ଫଲାହ ସାମ୍ରାଜ୍ୟକୁ କିଏ ଚଳାଉଛି?
ଫଲାହ ଏକ ଆରବୀ ଶବ୍ଦ, ଏହାର ଅର୍ଥ ହେଉଛି ସଫଳତା, ସମୃଦ୍ଧି ଏବଂ ମୁକ୍ତି, ଅଲ୍-ଫଲାହର ଅର୍ଥ ସଫଳତା ଆଡ଼କୁ ଯିବା, ସମୃଦ୍ଧି ଆଡ଼କୁ ବଢ଼ିବା କିମ୍ବା ମୁକ୍ତିର ପଥରେ ବଢ଼ିବା। ଭାରତ ସହିତ ଦୁନିଆର ଅନେକ ଦେଶରେ ଏହି ନାମରେ ଟ୍ରଷ୍ଟ୍, ଶିକ୍ଷା ସଂସ୍ଥାନ ଏବଂ କମ୍ପାନୀଗୁଡ଼ିକ ଗଢ଼ା ହୋଇଛି। ୧୦/୧୧ ଦିଲ୍ଲୀ ଧମାକାରେ ପୁଲୱାମାର ଡା. ଉମରର ନାମ ସାମ୍ନାକୁ ଆସିଛି। ଏହା ଛଡ଼ା ଅଲ୍-ଫଲାହ ମେଡିକାଲ୍ କଲେଜର ଆଉ ଦୁଇ ଡାକ୍ତରଙ୍କୁ ଗିରଫ କରାଯାଇଛି। କାରଣ, ସେମାନଙ୍କ ପାଖରୁ ଆମୋନିଅମ୍ ନାଇଟ୍ରେଟ୍ ଏବଂ ଏକେ-୪୭ ଭଳି ଘାତକ ଅସ୍ତ୍ର ମିଳିଛି।
ବର୍ତ୍ତମାନ, ଦିଲ୍ଲୀ ବିସ୍ଫୋରଣ ଏବଂ ବିସ୍ଫୋଟକ ଓ ଅସ୍ତ୍ରଶସ୍ତ୍ରର ଜବତ ଦୁଇ ଅଲଗା ଘଟଣା। କିନ୍ତୁ, ଯେତେବେଳେ ଘଟଣାଗୁଡ଼ିକର ତାର ଯୋଡ଼ା ଯାଉଛି, ସନ୍ଦେହ ଅଲ୍ ଫଲାହ ୟୁନିଭର୍ସିଟି ଆଡ଼କୁ ଯାଉଛି। ସର୍ବପ୍ରଥମେ ଧୌଜ ସ୍ଥିତ ଅଲ୍ ଫଲାହ ୟୁନିଭର୍ସିଟିର ଡା. ମୁଅଜ୍ଜମ ଶକିଲଙ୍କୁ ଗିରଫ କରାଯାଇଥିଲା। ତାଙ୍କ ହଷ୍ଟେଲ୍ ରୁମ୍ରୁ ଏକ ଏକେ-୪୭ ରାଇଫଲ୍, ଆମୋନିଅମ୍ ନାଇଟ୍ରେଟ୍ ଏବଂ ଗୋଲା-ବାରୁଦ ଜବତ ହୋଇଥିଲା। ଏହା ପରେ ତଦନ୍ତରେ ଡାକ୍ତର ଡା. ଶାହିନ୍ ଏବଂ ଡା. ଉମରର ନାମ ସାମ୍ନାକୁ ଆସିଥିଲା। ଯଦିଓ, ଫରିଦାବାଦରେ ହୋଇଥିବା କାର୍ଯ୍ୟାନୁଷ୍ଠାନର କିଛି ଘଣ୍ଟା ପରେ ଦିଲ୍ଲୀରେ ବିସ୍ଫୋରଣ ହୋଇଥିଲା ଏବଂ ଡା. ଉମରଙ୍କ ନାମ ସାମ୍ନାକୁ ଆସୁଛି। ଏବେ ପ୍ରଶ୍ନ ଏହା ଯେ ଏହି ୟୁନିଭର୍ସିଟି କିଏ ଚଳାଉଛି ଏବଂ ଏହାର ତାର କେଉଁ ପର୍ଯ୍ୟନ୍ତ ଲମ୍ବିଛି ?
କାଗଜରେ ଟ୍ରଷ୍ଟ୍, ଅସଲରେ ଶିକ୍ଷା-ସାମ୍ରାଜ୍ୟ
ଅଲ୍ ଫଲାହ ୟୁନିଭର୍ସିଟିକୁ ଅଲ୍-ଫଲାହ ଚେରିଟେବଲ୍ ଟ୍ରଷ୍ଟ୍ ପକ୍ଷରୁ ଚଳାଯାଉଛି। ଏନଜିଓ ଦର୍ପଣ ପୋର୍ଟାଲରେ ଏହାର ଚେୟାରମ୍ୟାନ୍ ଏବଂ ଟ୍ରଷ୍ଟି ଭାବେ ଜବ୍ୱାଦ ଅହମଦ ସିଦ୍ଦିକୀ, ଉସ୍ମା ଅଖତର ଏବଂ ଆଲିୟା ସିଦ୍ଦିକୀ ଅନ୍ତର୍ଭୁକ୍ତ। ୧୯୯୭ରୁ ଟ୍ରଷ୍ଟ୍ ଇଞ୍ଜିନିୟରିଂ, ଏଜୁକେସନ୍, ମେଡିକାଲ୍ ଏବଂ ଟେକ୍ନୋଲୋଜି କଲେଜଗୁଡ଼ିକର ନିଅଁ ରଖିଥିଲା। ୨୦୧୪ରେ ହରିୟାଣା ବିଧାନସଭା ଏହାକୁ “ଅଲ୍ ଫଲାହ ୟୁନିଭର୍ସିଟି” ଭାବେ ଅପଗ୍ରେଡ୍ କରିଥିଲା। କିନ୍ତୁ, ଏହା ସେହି ନାମ ଯାହା ୨୦୦୦ ଦଶକରେ “ଇସଲାମିକ୍ ଇନ୍ଭେଷ୍ଟମେଣ୍ଟ୍ ଫ୍ରଡ୍” ମାମଲାଗୁଡ଼ିକରେ ମଧ୍ୟ ଉଭା ହୋଇଥିଲା।
‘ଅଲ୍ ଫଲାହ ଗ୍ରୁପ୍’ ଏବଂ ‘ଅଲ୍ ଫହଦ ସ୍କିମ୍’
ଦିଲ୍ଲୀର ଓଖଲାରୁ ୨୦୦୨–୦୩ ଆଖପାଖରେ ଚାଲିଥିବା ଏକ କମ୍ପାନୀ ଥିଲା ଅଲ୍-ଫଲାହ ଇନଭେଷ୍ଟମେଣ୍ଟ୍ ଏହାର ପ୍ରତିଶ୍ରୁତି ଥିଲା “ଇସଲାମିକ୍ ପ୍ରଫିଟ୍ ସ୍କିମ୍”, ୩୫–୪୦% ରିଟର୍ଣ୍ଣ ଏବଂ ହଜ୍ ଯାତ୍ରୀଙ୍କ ପାଇଁ “ହଲାଲ୍ ଫାଇନାନ୍ସିଂ” ଯୋଜନା। କିନ୍ତୁ ଶୀଘ୍ର ଏହି ଯୋଜନା ଧ୍ୱଂସ ହୋଇଗଲା, ଏବଂ ଶହ ଶହ ନିବେଶକ ନିଜର ଜମା ପୁଞ୍ଜି ହରାଇଲେ। ଦି ମିଲ୍ଲି ଗେଜେଟର ଏକ ରିପୋର୍ଟ ଅନୁଯାୟୀ, ଅଲ୍ ଫଲାହ ଗ୍ରୁପ୍ର ଚେୟାରମ୍ୟାନ୍ ଜବ୍ୱାଦ ଅହମଦ ସିଦ୍ଦିକୀ ଏବଂ ତାଙ୍କ ଦୁଇ ଭାଇଙ୍କୁ ନିବେଶକଙ୍କଠାରୁ ଶହ ଶହ କୋଟି ଟଙ୍କାର ଠକେଇ ଅଭିଯୋଗରେ ଗିରଫ କରାଯାଇଥିଲା। ସେମାନଙ୍କ କମ୍ପାନୀ ଉପରେ ଆରବିଆଇ କାର୍ଯ୍ୟାନୁଷ୍ଠାନ ନେଇ ଏନବିଏଫସି ରେଜିଷ୍ଟ୍ରେସନ୍ ମଧ୍ୟ ରଦ୍ଦ କରିଥିଲା। ଏହି ରିପୋର୍ଟ କହୁଛି ଯେ ଏହି ନେଟୱର୍କ ସହ ଜଡ଼ିତ ଅଲ୍-ଫହଦ ଇନଭେଷ୍ଟମେଣ୍ଟ୍ ଗ୍ରୁପ୍ ଥିଲା, ଯାହାର ଚେୟାରମ୍ୟାନ୍ ମହମୁଦ ଅହମଦ ସିଦ୍ଦିକୀ ଥିଲେ, ଯେଉଁମାନେ “ହଲାଲ୍ ଇନଭେଷ୍ଟମେଣ୍ଟ୍” ନାମରେ ବଡ଼ ରକମ ସଂଗ୍ରହ କରିଥିଲେ ଏବଂ ପରେ ହଠାତ୍ ଅଫିସ୍ ବନ୍ଦ କରି ଫରାର ହୋଇଯାଇଥିଲେ। ଏହା ଓଖଲାର ସେହି ଅଞ୍ଚଳ ଥିଲା, ଯେଉଁଠାରୁ ଅଲ୍-ଫଲାହ ଚେରିଟେବଲ୍ ଟ୍ରଷ୍ଟ୍ ବର୍ତ୍ତମାନ ପଞ୍ଜୀକୃତ।
ପୁରୁଣା ନେଟୱର୍କ ଉପରେ ନୂଆ ତଦନ୍ତର ଛାୟା
ଏବେ ଯେତେବେଳେ ଅଲ୍ ଫଲାହ ୟୁନିଭର୍ସିଟିର ନାମ ଏକ ଆତଙ୍କବାଦୀ ଷଡ଼ଯନ୍ତ୍ରର ତଦନ୍ତରେ ଆସିଛି, ତେତେବେଳେ ପୁରୁଣା ଟ୍ରଷ୍ଟ୍ ଏବଂ ଇନଭେଷ୍ଟମେଣ୍ଟ୍ ଠକେଇ ପୁନର୍ବାର ଚର୍ଚ୍ଚାରେ ଅଛି। ଟ୍ରଷ୍ଟ୍ର ପୁରୁଣା ମାମଲାଗୁଡ଼ିକର ଫାଇଲ୍ଗୁଡ଼ିକ ଏବେ ତଦନ୍ତ ଏଜେନ୍ସିଗୁଡ଼ିକ ପାଖରେ ପୁନର୍ବାର ଖୋଲାଯାଇପାରେ, ବିଶେଷକରି ସେଗୁଡ଼ିକ ଯେଉଁଠାରେ “ଧାର୍ମିକ ଚେରିଟି” ନାମରେ ଟଙ୍କାର ଦୁରୁପଯୋଗ ହୋଇଥିଲା।
ଅନେକ ରାଜ୍ୟ ପର୍ଯ୍ୟନ୍ତ ବିସ୍ତୃତ ନେଟୱର୍କ ?
ଦିଲ୍ଲୀ, ହରିୟାଣା, କେରଳ (କାସରଗୋଡ୍), ଏବଂ ଚେନ୍ନାଇ ପର୍ଯ୍ୟନ୍ତ “ଅଲ୍-ଫଲାହ” କିମ୍ବା “ମଜଲିସ୍ ଅଲ୍-ଫଲାହ” ନାମରେ ଅନେକ ଏନଜିଓ ଏକା ନାମ-ସଂରଚନା ଏବଂ ପାରିବାରିକ ଟ୍ରଷ୍ଟ୍ ଅଧୀନରେ ପଞ୍ଜୀକୃତ।
ଶିକ୍ଷା ନାମରେ କୌଣସି ବଡ଼ ନେଟୱର୍କ ?
“ଅଲ୍ ଫଲାହ ଚେରିଟେବଲ୍ ଟ୍ରଷ୍ଟ୍” ଅଧୀନରେ ଚାଲୁଥିବା ସଂସ୍ଥାଗୁଡ଼ିକରେ ଆତଙ୍କବାଦୀ ଫଣ୍ଡିଂ କିମ୍ବା ଭର୍ତ୍ତି ସହ ଜଡ଼ିତ କୌଣସି ଲିଙ୍କ୍ ଅଛି କି ନାହିଁ ଏହା ତଥାପି ନିଶ୍ଚିତ ନୁହେଁ। ସମ୍ଭବ ଯେ ତଦନ୍ତ ଏଜେନ୍ସିଗୁଡ଼ିକ ଏହାର ମୁଳ ପର୍ଯ୍ୟନ୍ତ ଯିବେ। ଯାହାହେଉ, ୟୁନିଭର୍ସିଟି କିମ୍ବା ଟ୍ରଷ୍ଟ୍ ପକ୍ଷରୁ ଆତଙ୍କ ସହ ଜଡ଼ିତ ସନ୍ଦିଗ୍ଧମାନଙ୍କର ନିଜ ସଂସ୍ଥାଗୁଡ଼ିକ ସହ ଜଡ଼ିତ ଥିବା ଅଭିଯୋଗ ଉପରେ ଏପର୍ଯ୍ୟନ୍ତ କୌଣସି ଆଧିକାରିକ ବୟାନ ଜାରି ହୋଇନାହିଁ।
ମଜହବୀ ତାଲିମ ଉପରେ ଜୋର
ଯଦିଓ ଅଲ୍ ଫଲାହ ସହ ଜଡ଼ିତ ସମସ୍ତ ଶିକ୍ଷା ସଂସ୍ଥାଗୁଡ଼ିକ ଆଧୁନିକ ଶିକ୍ଷା ଦେବାର ଦାବି କରନ୍ତି, କିନ୍ତୁ ୟୁଜିସି ରେକର୍ଡ ଅନୁଯାୟୀ ଟ୍ରଷ୍ଟ୍ ସହ ଜଡ଼ିତ ସଂସ୍ଥାଗୁଡ଼ିକର ରିପୋର୍ଟ “ଆମେ ଆଲ୍ଲାହଙ୍କ ନାମରେ ଆରମ୍ଭ କରୁ,…” ଭଳି ଧାର୍ମିକ ଉଦ୍ଧୃତିରୁ ଆରମ୍ଭ ହୋଇଥାଏ।
ଏକାଧିକ କମ୍ପାନୀ ଏବଂ ଟ୍ରଷ୍ଟର ଜାଲ
ଅଲ୍ ଫଲାହ ଟ୍ରଷ୍ଟ୍ର ଚେୟାରମ୍ୟାନ୍ ଜବ୍ୱାଦ ଅହମଦ ସିଦ୍ଦିକୀ କେବଳ ଶୈକ୍ଷଣିକ କିମ୍ବା ଧାର୍ମିକ ସଂସ୍ଥାଗୁଡ଼ିକ ପର୍ଯ୍ୟନ୍ତ ସୀମିତ ନୁହନ୍ତି, ବରଂ ତାଙ୍କ ନାମରେ ୧୫ରୁ ଅଧିକ କମ୍ପାନୀର ଏକ ଜଟିଳ କର୍ପୋରେଟ୍ ନେଟୱର୍କ ପଞ୍ଜୀକୃତ। ମିନିଷ୍ଟ୍ରି ଅଫ୍ କର୍ପୋରେଟ୍ ଆଫେୟାର୍ସର ରେକର୍ଡ ଅନୁଯାୟୀ, ସେ ନିବେଶ, ଶିକ୍ଷା, ସଫ୍ଟୱେର୍, ଏନର୍ଜି, ଏକ୍ସପୋର୍ଟ୍ ଏବଂ କନ୍ସଲଟେନ୍ସି ଭଳି କ୍ଷେତ୍ରଗୁଡ଼ିକରେ ଡଜନ ଡଜନ କମ୍ପାନୀର ଡାଇରେକ୍ଟର କିମ୍ବା ପାର୍ଟନର ରହିଛନ୍ତି।
ଏଗୁଡ଼ିକ ମଧ୍ୟରେ ଅଲ୍-ଫଲାହ ଇନଭେଷ୍ଟମେଣ୍ଟ୍ସ ଲିମିଟେଡ୍, ଅଲ୍-ଫଲାହ ସଫ୍ଟୱେର୍ ପ୍ରାଇଭେଟ୍ ଲିମିଟେଡ୍, ଅଲ୍-ଫଲାହ ଏନର୍ଜିଜ୍ ଲିମିଟେଡ୍, ତର୍ବିଆ ଏଜୁକେସନ୍ ଫାଉଣ୍ଡେସନ୍ ଏବଂ ନିକଟରେ ଗଠିତ ଅଲ୍-ଫଲାହ ଏଜୁକେସନ୍ ସର୍ଭିସ୍ ଏଲ୍ଏଲ୍ପି ପ୍ରମୁଖ। ଅଧିକାଂଶ କମ୍ପାନୀର ପଞ୍ଜୀକୃତ ଠିକଣା ଏକା ଅଟେ ୨୭୪-ଏ, ଅଲ୍-ଫଲାହ ହାଉସ୍, ଜାମିଆ ନଗର, ଓଖଲା, ନ୍ୟୁ ଦିଲ୍ଲୀ। ଅର୍ଥାତ୍ ସେହି ଭବନ ଯେଉଁଠାରୁ ଅଲ୍-ଫଲାହ ଚେରିଟେବଲ୍ ଟ୍ରଷ୍ଟ୍ ଏବଂ ୟୁନିଭର୍ସିଟି ଚାଲୁଥାଏ। ତଦନ୍ତ ଏଜେନ୍ସିଗୁଡ଼ିକ ଅନୁଯାୟୀ, ଏହି ପ୍ୟାଟର୍ଣ୍ଣ ଏକ “ଲେୟାର୍ଡ୍ କର୍ପୋରେଟ୍ ଷ୍ଟ୍ରକ୍ଚର୍” ଆଡ଼କୁ ଇଙ୍ଗିତ କରୁଛି, ଯେଉଁଠାରେ ଶିକ୍ଷା, ନିବେଶ ଏବଂ ପରୋପକାର ନାମରେ ଏକ ମଲ୍ଟିଲେୟାର୍ଡ୍ ଅର୍ଥନୈତିକ ନେଟୱର୍କ ଗଢ଼ା ହୋଇଛି।
ଜବ୍ୱାଦ ଅହମଦ ସିଦ୍ଦିକୀ କିଏ ?
ଜବ୍ୱାଦ ସିଦ୍ଦିକୀଙ୍କ ନାମରେ ଥିବା ଏକ ଲିଙ୍କଡ୍ଇନ୍ ପ୍ରୋଫାଇଲ୍ ଅନୁଯାୟୀ ସିଦ୍ଦିକୀ ଇନ୍ଦୋରର ଦେବୀ ଅହିଲ୍ୟା ବିଶ୍ୱବିଦ୍ୟାଳୟରୁ ବିଟେକ୍ ପଢ଼ିଛନ୍ତି। ଏହା ସହ କୁହାଯାଇଛି ଯେ ସିଦ୍ଦିକୀ ଅଲ୍ ଫଲାହ ଚେରିଟେବଲ୍ ଟ୍ରଷ୍ଟ୍ର ମ୍ୟାନେଜିଂ ଟ୍ରଷ୍ଟି।
ଏହି ନାମଗୁଡ଼ିକ ମଧ୍ୟ ଅନ୍ତର୍ଭୁକ୍ତ
ଟ୍ରଷ୍ଟ୍ ଏବଂ କମ୍ପାନୀଗୁଡ଼ିକର ଜାଲରେ ଉସ୍ମା ଅଖତରଙ୍କ ନାମ ମଧ୍ୟ ଅଛି, ଯିଏ ଅଲ୍-ଫଲାହ ସ୍କୁଲ୍ ଅଫ୍ ଇଞ୍ଜିନିୟରିଂର ଗଭର୍ଣ୍ଣିଂ ବଡିର ଅଂଶ ରହିଛନ୍ତି। ତାଙ୍କ ଲିଙ୍କଡ୍ଇନ୍ ପ୍ରୋଫାଇଲ୍ ଅନୁଯାୟୀ, ସେ ବର୍ତ୍ତମାନ ସଂଯୁକ୍ତ ଆରବ ଏମିରେଟ୍ସ (ୟୁଏଇ)ରେ ରହୁଛନ୍ତି ଏବଂ ସେଠାରେ ଅନେକ ବ୍ୟବସାୟ ସହ ଜଡ଼ିତ। ଏହା ଛଡ଼ା ଉସ୍ମା ଅଖତରଙ୍କ ନାମ ମଧ୍ୟ ଅଲ୍-ଫଲାହ ଏଜୁକେସନ୍ ସର୍ଭିସ୍ ଏଲ୍ଏଲ୍ପି ଏବଂ ଏମ୍ଜେଏଚ୍ ଡେଭେଲପର୍ସ ପ୍ରାଇଭେଟ୍ ଲିମିଟେଡ୍ ଭଳି କମ୍ପାନୀଗୁଡ଼ିକରେ ନିଦେଶକ ଭାବେ ପଞ୍ଜୀକୃତ। ଟ୍ରଷ୍ଟିଗଣଙ୍କ ତାଲିକାରେ ଆଲିୟା ସିଦ୍ଦିକୀଙ୍କ ନାମ ମଧ୍ୟ ଅଛି।
୩୭୫୦ ଟଙ୍କାରେ ଜନ୍ନତରେ ଘର ଦେଉଛି ଟ୍ରଷ୍ଟ୍ !
ରୋଚକ କଥା ଏହା ଯେ ଅଲ୍ ଫଲାହ ଚେରିଟେବଲ୍ ଟ୍ରଷ୍ଟ୍ର ଓ୍ୱେବସାଇଟରେ କୁହାଯାଇଛି ଯେ ମସଜିଦ ନିର୍ମାଣ ପାଇଁ ୩୭୫୦ ଟଙ୍କା ଦାନ କଲେ ଜନ୍ନତରେ ଘର ମିଳିବ। ଟ୍ରଷ୍ଟ୍ର ଓ୍ୱେବସାଇଟରେ ଦିଆଯାଇଥିବା ସୂଚନା ଅନୁଯାୟୀ ଟ୍ରଷ୍ଟ୍ର ମୁଖ୍ୟ କାମ ମସଜିଦ ଏବଂ ମଦରସାଗୁଡ଼ିକ ପାଇଁ ଫଣ୍ଡ ସଂଗ୍ରହ କରିବା।
