ପୁରୀ: ମୋବାଇଲ ଟର୍ଚ୍ଚ ଲାଇଟରେ ଚାଲିଛି ଥାନା। ପୁରୀ ଜିଲ୍ଲା କାକଟପୁର ଥାନାରେ ଏ ଅଭାବନୀୟ ଦୃଶ୍ୟ। ବିଦ୍ୟୁତ କାଟ ହେଲେ ଥାନାରେ ବିକଳ୍ପ ବ୍ୟବସ୍ଥା ନାହିଁ। ଲଣ୍ଠନ କିମ୍ବା ମହମବତୀ ଟିଏ ମଧ୍ୟ ନାହିଁ। ପୋଲିସ ବାବୁ ନିଜ ପକେଟରୁ ମୋବାଇଲ ବାହାର କରି ଥାନା କାମ କରୁଛନ୍ତି। ସରକାର  ଥାନାରେ ରାତିରେ ବିକଳ୍ପ ଆଲୋକ ବ୍ୟବସ୍ଥା କରିପାରିନାହାନ୍ତି। କାକଟପୁର ଥାନା ଚାଲିଛି ମୋବାଇଲ ଟର୍ଚ୍ଚ ଲାଇଟରେ। ବ୍ୟବସ୍ଥା ସରକାରଙ୍କ ପାରିବା ପଣିଆକୁ ପଦାରେ ପକାଇଛି। ଥାନାରେ ଭିତ୍ତିଭୂମି ସଠିକ ନଥିବାରୁ ବିଦ୍ୟୁତ କଟିଗଲେ କର୍ମଚାରୀ କିମ୍ବା ଥାନାକୁ ଆସୁଥିବା ଜନସାଧାରଣ ମୋବାଇଲ ଟର୍ଚ୍ଚ ମାରି ବସୁଛନ୍ତି।ଅନ୍ଧାର ସୁଯୋଗ ନେଇ କେତେବେଳେ କିଛି ଅଘଟଣ ମଧ୍ୟ  ଘଟିପାରେ। ବିଦ୍ୟୁତ କଟିଯିବାରୁ ପୋଲିସ କର୍ମୀ ଓ ଥାନାକୁ ଆସିଥିବା ଲୋକେ  ଦୀର୍ଘ ସମୟ ଅନ୍ଧାରରେ ବସି ରହିଥିଲେ।ବିଦ୍ୟୁତ ନଥିବାରୁ ଦୀର୍ଘ ସମୟଧରି  ଥାନା କାର୍ଯ୍ୟ ବାଧାପ୍ରାପ୍ତ ହୋଇଥିଲା।ଅଭିଯୋଗକାରୀ ମୋବାଇଲ ଟର୍ଚ୍ଚ ଲାଇଟରେ ଅଭିଯୋଗ ଲେଖୁଛନ୍ତି। ବିଦ୍ୟୁତ ନ ଥିବାରୁ ସିସିଟିଭି ମଧ୍ୟ ଚାଲୁନାହିଁ।ଘଟଣାକୁ ଦୃଷ୍ଟିରେ ରଖି ତୁରନ୍ତ ୨୪ଘଣ୍ଟିଆ ଆଲୋକୀକରଣ ବ୍ୟବସ୍ଥା କରିବାକୁ ଦାବି ହୋଇଛି…

ଭଦ୍ରକ: ଭଦ୍ରକ ତିହିଡ଼ି ଅଂଚଳରେ ଗୋଷ୍ଠୀ ସଂଘର୍ଷରୁ ବୋମାମାଡ଼। କାଁପଡ଼ା ଗାଁରେ ଗୋଷ୍ଠୀ ସଙ୍ଘର୍ଷରୁ ବୋମାମାଡ଼ ହୋଇଥିବା ସୂଚନା। ଗୋଷ୍ଠୀ ସଙ୍ଘର୍ଷ ଉଗ୍ର ରୂପ ନେବା ପରେ ବୋମା ମାଡ଼ କରିଥିଲେ ଦୁର୍ବୃତ୍ତ। ଗତକାଲି ରାତିରେ ରାଜନୈତିକ ହିଂସାକାଣ୍ଡରୁ ବୋମା ମାଡ଼ କରାଯାଇଥିବା ଅଭିଯୋଗ ହୋଇଛି। ଏଥିରେ ୯ ଜଣ ଗୁରୁତର ହୋଇଛନ୍ତି। ଭଦ୍ରକ ମୁଖ୍ୟ ଚିକିତ୍ସାଳୟରେ ୪ ଜଣ ଚିକିତ୍ସା ହେଉଥିବାବେଳେ ତିହିଡି ମେଡିକାଳରେ ୫ ଜଣ ଚିକିତ୍ସିତ ହେଉଛନ୍ତି। ଗତକାଲି ରାତିରେ ୨୦ରୁ ୨୫ ଜଣ ଦୁର୍ବୃତ୍ତ ବାଇକ୍‌ରେ ଆସି ଗାଁ ଦାଣ୍ଡରେ ବୋମାମାଡ଼  କରିଥିବା ଅଭିଯୋଗ ହୋଇଛି। ଗାଁ ଦାଣ୍ଡରେ ବସିଥିବା କେତେଜଣଙ୍କୁ ଲକ୍ଷ କରି ତିନୋଟି ବୋମା ଫିଙ୍ଗିଥିଲେ। ବାରଣ୍ଡାରେ ବସିଥିବା ଲୋକଙ୍କ ନିକଟରେ ବୋମା ଫୁଟିଥିଲା। ତିହିଡ଼ି ପୋଲିସ୍ ଘଟଣାର ତଦନ୍ତ କରୁଥିବା ବେଳେ ଗାଁରେ ଫୋର୍ସ ମୁତୟନ କରାଯାଇଛି।

ଭୁବନେଶ୍ବର: ପ୍ରବାଦ ପୁରୁଷ ବିଜୁ ପଟ୍ଟନାୟକଙ୍କ ଶ୍ରାଦ୍ଧ ଦିବସ ଅବସରରେ ତିଳତର୍ପଣ କାର୍ଯ୍ୟକ୍ରମ। ଭୁବନେଶ୍ୱର ବିନ୍ଦୁସାଗର କୂଳରେ ବିଜେଡି ପକ୍ଷରୁ ଆୟୋଜିତ ତିଳତର୍ପଣ କାର୍ଯ୍ୟକ୍ରମରେ ବିଜେଡିର ପ୍ରମୁଖ ନେତା, କାର୍ଯ୍ୟକର୍ତ୍ତାଙ୍କ ସମେତ ସାଧାରଣ ଲୋକେ ମଧ୍ୟ ସାମିଲ ହୋଇଥିଲେ। ରଘୁପତି ରାଘବ ରାଜରାମ ଧ୍ୱନିରେ ବିନ୍ଦୁସାଗର କୂଳରେ ବିଜୁ ବାବୁଙ୍କ ସ୍ମୃତିଚାରଣ କରାଯାଇଛି।

ବିଜୁ  ପଟ୍ଟନାୟକଙ୍କ ଫଟୋଚିତ୍ରରେ ମାଲ୍ୟାର୍ପଣ କରାଯିବା ସହ ତାଙ୍କ ଅବଦାନକୁ ସ୍ମରଣ କରାଯାଇଛି। ବରିଷ୍ଠ ବିଜେଡି ନେତା ଦେବୀ ପ୍ରସାଦ ମିଶ୍ରଙ୍କ ସମେତ ପୂର୍ବତନ ମନ୍ତ୍ରୀ ଅଶୋକ ପଣ୍ଡା, ବିଏମସି ମେୟର ସୁଲୋଚନା ଦାସ, ଭୁବନେଶ୍ୱର ଉତ୍ତର ବିଧାୟକ ସୁଶାନ୍ତ ରାଉତ, ଭୁବନେଶ୍ୱର ମଧ୍ୟ ବିଧାୟକ ଅନନ୍ତ ନାରାୟଣ ଜେନା ଓ ଅନ୍ୟ ଉପସ୍ଥିତ ନେତା, କାର୍ଯ୍ୟକର୍ତ୍ତା ଓ ଲୋକେ ରୀତିନୀତି ଅନୁଯାୟୀ ବିନ୍ଦୁସାଗରରେ ତିଳତର୍ପଣ କରିଛନ୍ତି। ବିଜୁ ବାବୁଙ୍କୁ ରାଜନୀତିରୁ ଉର୍ଧ୍ୱକୁ ନେଇ ତାଙ୍କ ଅବଦାନକୁ ସମସ୍ତେ ଆଜି ସ୍ମରଣ କରୁଛନ୍ତି।

କଟକ: କଟକରେ ଡବଲ ଏନକାଉଣ୍ଟର। ଚୈାଦ୍ୱର ପୋଲିସ ଓ ସ୍ପେଶାଲ ସ୍କ୍ୱାଡର ଡବଲ ଏନକାଉଣ୍ଟର। ଏନକାଉଣ୍ଟରରେ ଦୁଇଜଣ ଦୁର୍ବୁତ୍ତ ଆହତ ହୋଇଛନ୍ତି। ଦୁଇଜଣ ଦୁର୍ବୁତ୍ତ ହେଲେ କଟାସ ରାଉତ ଏବଂ ଶୁଭ୍ରାଂଶୁ ପରିଡା। ଉଭୟ ପୋଲିସ ଗୁଳିରେ ଆହତ ହୋଇ ଏସିସିବିରେ ଭର୍ତ୍ତି ହୋଇଛନ୍ତି। ପୋଲିସ ଉଭୟଙ୍କୁ ଆଜି ଧରିବାକୁ ଯାଇଥିବାବେଳେ ପୋଲିସ ଉପରକୁ ଗୁଳି ଚଳାଇଥିଲେ ଦୁର୍ଵୁତ୍ତ। ଏହାପରେ ପୋଲିସର ପାଲଟା ଜବାବରେ ଦୁଇଜଣ ଆହତ ହୋଇଛନ୍ତି। ସେମାନଙ୍କ ନିକଟରୁ ଵନ୍ଧୁକ ଓ ଗୁଳି ଜବତ କରିଛି ପୋଲିସ।

ନନ୍ଦିଘୋଷ ବ୍ୟୁରୋ: ସୁଜଳା, ସୁଫଳା, ସ୍ବର୍ଣ୍ଣପ୍ରସୂ ଓଡ଼ିଶା। ମାଟିର ମୂର୍ତ୍ତିକାର, ପ୍ରବାଦ ପୁରୁଷ ବିଜୁ ପଟ୍ଟନାୟକଙ୍କ ସ୍ବପ୍ନର ରାଇଜ। ବୀର ପ୍ରସବିନୀ ଓଡ଼ିଶାର ସୁଯୋଗ୍ୟ ସନ୍ତାନ ବିଜୁବାବୁ। ଯେଉଁଠି କଳା, ସଂସ୍କୃତିର ଗରିମା ସେଠାରେ ବିଜୁଙ୍କ ପରି ଦୁର୍ଦ୍ଧର୍ଷ ସଂଗ୍ରାମୀଙ୍କ ଝଲକ। ପୂର୍ବ ଗୌରବ ଫେରାଇ ଆଣିବା ଲାଗି ସାରା ଜୀବନ ତ୍ୟାଗ କରିଥିବା ମହାନ ନେତା ବିଜୁବାବୁଙ୍କ ଆଜି ତିରୋଧାନ ଦିବସ। ସେ ଏପରି ଏକ ବ୍ୟକ୍ତିତ୍ବ ଯାହା ଭିତରେ ଥିଲା ନୂଆ ସମ୍ଭାବନା। ସେ ଏପରି ଏକ ପୁରୁଷ ଯାହା ନିକଟରେ ଭରି ରହିଥିଲା କୋଟି କୋଟି ଯୁବକଙ୍କୁ ଜାତୀୟ ସ୍ରୋତରେ ପ୍ରବାହିତ କରିବାର ପ୍ରେରଣା।

ସେ ଥିଲେ ନୂଆ ଓଡ଼ିଶାର ବିନ୍ଧାଣୀ। ଶିକ୍ଷା, ଶିଳ୍ପ, ଭିତ୍ତିଭୂମି, ଜଳସେଚନ, ଜିଲ୍ଲା ଗଠନ ଆଦି ସବୁକ୍ଷେତ୍ରରେ ଥିଲା ବିଜୁବାବୁଙ୍କ ଅନନ୍ୟ ଅବଦାନ। ତ୍ରିସ୍ତରୀୟ ପଞ୍ଚାୟତିରାଜ ବ୍ୟବସ୍ଥାକୁ ଲୋକାଭିମୁଖୀ କରିବାରେ ବିଜୁ ପଟ୍ଟନାୟକଙ୍କ ଅବଦାନ ଅଗ୍ରଗଣ୍ୟ। ମହିଳାଙ୍କୁ ୩୩ ପ୍ରତିଶତ ସଂରକ୍ଷଣ ଦେଇ ସେ ପ୍ରତିଷ୍ଠା କରିଥିଲେ ରେକର୍ଡ। ବିଜୁଙ୍କୁ ବିବ୍ରତ କରିଥିଲା ଓଡ଼ିଶାରେ ଭୋକର ଭୂଗୋଳ । ଏଥିଲାଗି ରାଜ୍ୟରୁ ଦାରିଦ୍ର୍ୟ ହଟାଇବାରେ ସେ ନେଇଥିଲେ ପ୍ରମୁଖ ଭୂମିକା। କଳିଙ୍ଗପୁତ୍ର ଭାବେ ନିଜକୁ ଗର୍ବିତ ଅନୁଭବ କରୁଥିଲେ ବିଜୁ ବାବୁ। ସମ୍ବୃଦ୍ଧ ଓଡ଼ିଶା ଗଠନକୁ ନେଇ ସେ ଥିଲେ ପ୍ରତିଜ୍ଞାବଦ୍ଧ । ୧୯୬୧ରୁ ୧୯୬୩ ଓ ୧୯୯୦ରୁ ୧୯୯୫ ମୁଖ୍ୟମନ୍ତ୍ରୀ ଥିବା ବିଜୁ ପଟ୍ଟନାୟକ ବଦଳାଇଥିଲେ ଓଡ଼ିଶାର ଭାଗ୍। ଓଡ଼ିଶାରେ ୧୩ ଜିଲ୍ଲାକୁ ୩୦ ଜିଲ୍ଲାରେ ପରିଣତ କରିବା ସହ ପାରାଦୀପ ବନ୍ଦର, ରାଉରକେଲା ଇସ୍ପାତ କାରଖାନା, ହୀରାକୁଦ ବନ୍ଧ ବିଜୁଙ୍କ ଦୂର ଦୃଷ୍ଟିର ପ୍ରତୀକ। ୫ ମାର୍ଚ୍ଚ ୧୯୧୬ରେ ଭୂମିଷ୍ଠ ଝଡ଼ର ଇଗଲଙ୍କ ମହାପ୍ରୟାଣ ଘଟିଥିଲା ୧୭ ଏପ୍ରିଲ ୧୯୯୭ରେ ।