ନୂଆଦିଲ୍ଲୀ: ପ୍ରବଳ ବର୍ଷାରେ ବେହାଲ ଦେଶର ରାଜଧାନୀ ଦିଲ୍ଲୀ। ଗତ ରାତିରେ ପ୍ରବଳ ଝଡ଼ ତୋଫାନ ହୋଇଥିଲା। ମୂଷଳ ଧାରାରେ ବର୍ଷା ସାଙ୍ଗକୁ ଅଣଚାଷ ପବନ ବହିଛି। ଏଥିରେ ୪ ଜଣଙ୍କ ମୃତ୍ୟୁ ହୋଇଛି। ଏନେଇ ରେଡ୍ ଆଲର୍ଟ ଜାରି କରିଛି ପାଣିପାଗ ବିଭାଗ। ଆଜି ସକାଳୁ ମଧ୍ୟ ପ୍ରବଳ ବର୍ଷା ହୋଇଛି। ଏଥିରେ ସାଧାରଣ ଜୀବନ ଯାତ୍ରା ବ୍ୟାହତ ହୋଇଛି। ଲୋକେ ଘରୁ ବାହାରି ପାରି ନାହାନ୍ତି। ସ୍କୁଲ ଯିବାକୁ ମଧ୍ୟ ପିଲାମାନେ ବହୁ ଅସୁବିଧାର ସମ୍ମୁଖୀନ ହୋଇଥିଲେ। କେତେକ ସ୍ଥାନରେ ପାଣ ମଧ୍ଯ ଜମି ରହିଛି। ରାସ୍ତାରେ ଚାଲୁଛି ଆଣ୍ଠୁଏ ପାଣି। ପ୍ରବଳ ବର୍ଷା ପବନ ଯୋଗୁଁ ବିମାନ ଚଳାଚଳ ବାଧାପ୍ରାପ୍ତ ହୋଇଛି। ଶତାଧିକ ଫ୍ଲାଇଟ୍ ଡେରି ହୋଇଥିବା ବେଳେ ଅନେକ ଫ୍ଲାଇଟକୁ ବାତିଲ କରାଯାଇଛି।
ବାପାକୁ ପିଟିପିଟି ହତ୍ୟା କଲା ପୁଅ
କଟକ: ବାପାକୁ ପିଟିପିଟି ହତ୍ୟା କଲା ପୁଅ। ବାଲିପାଟଣା ଥାନା ତିହୁରୀ ଗ୍ରାମରେ ହତ୍ୟାକାଣ୍ଡ । ନାବାଳକ ପୁଅର ରଡ୍ ମାଡରେ ବାପାର ମୃତ୍ୟୁ ହୋଇଛି । ମୃତକ ତିହୁରୀ ଗ୍ରାମର ଗଜରାଜ ଭୋଇ । ଗତକାଲି ରାତିରେ ମଦ ପିଇ ଗଜରାଜ ଘରେ ଗଣ୍ଡଗୋଳ କରିଥିଲେ । ଘଟଣାକୁ ନେଇ ବାପା-ପୁଅ ମଧ୍ୟରେ ମାରପିଟ୍ ହୋଇଥିଲା। ଏଥିରେ ଉତକ୍ଷିପ୍ତ ହୋଇ ବାପାକୁ ରଡରେ ଆକ୍ରମଣ କରିଥିଲା ପୁଅ। ଗୁରୁତର ଅବସ୍ଥାରେ ଗଜରାଜଙ୍କୁ ଅଡଶପୁର ମେଡ଼ିକାଲରେ ଭର୍ତ୍ତି କରାଯାଇଥିଲା । ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଛନ୍ତି । ଘଟଣାସ୍ଥଳରେ ବାଲିପାଟଣା ପୋଲିସ ପହଞ୍ଚି ତଦନ୍ତ ଆରମ୍ଭ କରିଛି।
ରୋଗୀଣା ମାକୁ ଜଙ୍ଗଲରେ ଛାଡିଦେଲା ଜନ୍ମ କଲା ପୁଅ
ଅନୁଗୁଳ: ବୃଦ୍ଧା ମାଆକୁ ଜଙ୍ଗଲରେ ଛାଡିଦେଲା ଜନ୍ମ କଲା । ତିନି ଦିନ ଧରି ଅଖିଆ ଅପିଆ ଅବସ୍ଥାରେ ଜଙ୍ଗଲରେ ପଡ଼ି ରହିବା ପରେ ସ୍ଥାନୀୟ ଲୋକେ ବୃଦ୍ଧାଙ୍କୁ ଉଦ୍ଧାର କରିଛନ୍ତି। ଏହି ଅଭାବନୀୟ ଘଟଣା ଘଟିଛି ଅନୁଗୋଳ ଜିଲ୍ଲା କଣିହାଁରେ। ଏନଟିପିସି ଥାନା ଟୋଲୋକ ବଡ଼ା ବିଷ୍ଣୁ ମନ୍ଦିର ନିକଟ ଜଙ୍ଗଲରୁ ବୃଦ୍ଧାଙ୍କୁ ଉଦ୍ଧାର କରାଯାଇଛି।
ସୂଚନା ଅନୁଯାୟୀ, କିଆଝାର ଗ୍ରାମର ବୃଦ୍ଧା ବୈଦେହୀ ନାଏକ କିଛି ଦିନ ହେବ ଅସୁସ୍ଥ ଥିଲେ। ପୁଅ ଟିକନ୍ ନାଏକ ତାଙ୍କର ଚିକିତ୍ସା କରିବା ବଦଳରେ ଘରୁ ୭ କିଲୋମିଟର ଦୂରରେ ଥିବା ଘଞ୍ଚ ଜଙ୍ଗଲରେ ଛାଡ଼ି ପଳାଇଥିବା ବୃଦ୍ଧା ଜଣକ କହିଛନ୍ତି। ଟୋଲକ ବେଡ଼ା ଗାଁର କିଛି ମହିଳା ଜଙ୍ଗଲକୁ କାଠ ସଂଗ୍ରହ କରିବାକୁ ଯାଇଥିବା ବେଳେ ସେହି ବୃଦ୍ଧାଙ୍କୁ ଦେଖିଥିଲେ। ଏହା ପରେ ସେମାନେ ତାଙ୍କୁ ଉଦ୍ଧାର କରି ଗାଁକୁ ଆଣିଛନ୍ତି।
ଜଳେଶ୍ବରରେ ପୋଲିସ ଉପରକୁ ଆକ୍ରମଣ, ୪ ଗିରଫ
ବାଲେଶ୍ୱର: ଜଳେଶ୍ବରରେ ପୋଲିସ ଉପରକୁ ଆକ୍ରମଣ। ଜଳେଶ୍ୱର ଥାନା SI ଓ ମହିଳା କନଷ୍ଟେବଳଙ୍କୁ ଆକ୍ରମଣ କଲେ ବେଆଇନ ଚାନ୍ଦା ଆଦାୟକାରୀ। NH -୬୦ ଶାନ୍ତିଆ ନିକଟରେ ବେଆଇନ ଚାନ୍ଦା ଆଦାୟ ହେଉଥିବା ନେଇ ଅଭିଯୋଗ ହୋଇଥିଲା।
ସୂଚନା ଅନୁଯାୟୀ, ଜଣେ ଟ୍ରକ ଡ୍ରାଇଭର ଗାଡ଼ି ରଖି ଚା ପିଇବାକୁ ଯାଇଥିବାବେଳେ କିଛି ଯୁବକ ଟ୍ରକ ହେଲ୍ପର ଓ ଡ୍ରାଇଭରଙ୍କୁ ଘେରି ଦାଦାବଟି ମାଗୁଥିଲେ। ଟଙ୍କା ନଦେବାରୁ ଡ୍ରାଇଭରଙ୍କୁ ନିସ୍ତୁକ ମାଡ଼ ମାରିଥିଲେ । ଏନେଇ ଡ୍ରାଇଭର ଜଣକ ପୋଲିସକୁ ଖବର ଦେବା ପରେ ଘଟଣାସ୍ଥଳରେ ଜଳେଶ୍ବର ଥାନା SI ସୃଷ୍ଟିଧର ବେହେରା ଓ ଜଣେ ମହିଳା କନଷ୍ଟେବଳ ପହଞ୍ଚିଥିଲେ। ସେଠାରେ ଉଭୟଙ୍କୁ ଆକ୍ରମଣ କରିଥିଲେ ବେଆଇନ ଚାନ୍ଦା ଆଦାୟକାରୀ। ଘଟଣାରେ ୪ ଜଣଙ୍କୁ ଗିରଫ କରିଛି ଜଳେଶ୍ବର ପୋଲିସ। ଟ୍ରକ ଡ୍ରାଇଭର ଓ ମହିଳା କନଷ୍ଟେବଳଙ୍କ ଅଭିଯୋଗ ପରେ ଘଟଣାର ଅଧିକ ତଦନ୍ତ କରୁଛି ପୋଲିସ।
ରାଜସ୍ଥାନରୁ ISI ଏଜେଣ୍ଟ ଗିରଫ; ପାକିସ୍ତାନୀ ପକ୍ଷରୁ ସେ ଗୁପ୍ତଚର ଥିଲା
ନନ୍ଦିଘୋଷ ବ୍ୟୁରୋ: ରାଜସ୍ଥାନରୁ ଜଣେ ISI ଏଜେଣ୍ଟକୁ ଗିରଫ କରାଯାଇଛି। ପାକିସ୍ତାନୀ ପକ୍ଷରୁ ସେ ଗୁପ୍ତଚର ଥିଲା। ଜୈସଲମେରରୁ ତାକୁ ଗିରଫ କରିଛି ପୋଲିସ। ଅଭିଯୁକ୍ତର ନାଁ ପଠାନ ଖାନ ବୋଲି ଜଣାପଡିଛି। କୁହାଯାଉଛି ଯେ ଅଭିଯୁକ୍ତ ପଠାଣ ଖାନଙ୍କୁ ଗୋଟିଏ ମାସ ପୂର୍ବରୁ ଅଟକ ରଖାଯାଇଥିଲା। ତାଙ୍କ ବିରୁଦ୍ଧରେ ଅଫିସିଆଲ୍ ସିକ୍ରେଟ୍ସ ଆକ୍ଟ, ୧୯୨୩ର ଧାରା ଅନୁଯାୟୀ ଏକ ମାମଲା ରୁଜୁ କରାଯାଇଥିଲା। ଆଜି ତାଙ୍କୁ ଆନୁଷ୍ଠାନିକ ଭାବରେ ଗିରଫ କରାଯାଇଛି। ପାକିସ୍ତାନକୁ ସାମରିକ ଗୁପ୍ତ ତଥ୍ୟ ଯୋଗାଉଥିଲା ପଠାନ।
ସୂଚନା ଅନୁଯାୟୀ, ୨୦୧୩ରେ ସେ ପାକିସ୍ତାନ ଯାଇଥିଲା। ସେଠାରେ ISI ର ଜାଲରେ ପଡ଼ିଥିଲା। ଟଙ୍କା ଲୋଭରେ ଅନେକ ଗୁପ୍ତତଥ୍ୟ ସେ ପାକିସ୍ତାନକୁ ଦେଇଥିବା ଜଣାପଡ଼ିଛି।
ଅଭିଯୁକ୍ତ ପଠାଣ ଖାନ ଜୈସଲମେରର ବାସିନ୍ଦା। ପାକିସ୍ତାନର ଗୁଇନ୍ଦା ସଂସ୍ଥାଗୁଡ଼ିକ ଦ୍ୱାରା ରାଜ୍ୟରେ ହେଉଥିବା ଯେକୌଣସି କାର୍ଯ୍ୟକଳାପ ଉପରେ ନଜର ରଖୁଥିବା ଜୟପୁରର ରାଜ୍ୟ ସ୍ୱତନ୍ତ୍ର ଶାଖା ପଠାଣ ଖାନଙ୍କ ଉପରେ ସନ୍ଦେହ କରିଥିଲା। ପଠାନ ଖାନଙ୍କ କାର୍ଯ୍ୟକଳାପ ସନ୍ଦେହଜନକ ହେବାରୁ ତାଙ୍କୁ ଗିରଫ କରାଯାଇଥିଲା।
ପଠାନ ଖାନଙ୍କ ଉପରେ ପାକିସ୍ତାନକୁ ସୂଚନା ପଠାଉଥିବା ଅଭିଯୋଗ ଥିବା ସ୍ଥାନଗୁଡ଼ିକୁ ଭାରତୀୟ ସେନା ପ୍ରାୟତଃ ପରିଦର୍ଶନ କରିଥାଏ। ସୀମାନ୍ତ ଅଞ୍ଚଳ ହୋଇଥିବାରୁ, ସେଠାରେ ଭାରତୀୟ ସେନାର ସୈନିକମାନେ ନିୟୋଜିତ ହୁଅନ୍ତି ଏବଂ ସାମରିକ ଅଭ୍ୟାସ କରିବା ପାଇଁ ନିରନ୍ତର ଅପରେସନ୍ କରାଯାଏ।
ଆଉ ଏକ ଘଟଣାରେ ଝାଡ଼ଖଣ୍ଡରୁ ଏକ ଆତଙ୍କବାଦୀକୁ ଗିରଫ କରଯାଇଛି। ସେ ହେଉଛି ହିଜ୍ ଉତ୍ ତାହିର୍ ର ସଦସ୍ୟ। ଆଗରୁ ସେ ଇଣ୍ଡିଆନ ମୁଜହିଦ୍ଦିନରେ କାମ କରୁଥିଲା। ଝାଡ଼ଖଣ୍ଡ ଏଟିଏସ୍ ତାକୁ ଗିରଫ କରିଛି। ଅଭିଯୁକ୍ତର ନାଁ ହେଲା ଅମର ୟଶର୍ । ଝାଡ଼ଖଣ୍ଡର ଧାନବାଦରୁ ତାକୁ ଗିରଫ କରାଯାଇଛି। ଆତଙ୍କବାଦୀଙ୍କୁ ସାହାଯ୍ୟ କରିବା ଅଭିଯୋଗରେ ତାକୁ ୧୦ ବର୍ଷ ଜେଲ୍ ହୋଇଥିଲା।
ଏତେ ସତ୍ତ୍ଵେ ମାନୁନି ପାକିସ୍ତାନ; ସୀମାରେ ପୁଣି ଅସ୍ତ୍ରବିରତି ଉଲ୍ଲଂଘନ
ନନ୍ଦିଘୋଷ ବ୍ୟୁରୋ: ସୀମାରେ ପାକିସ୍ତାନର ପୁଣି ଅସ୍ତ୍ରବିରତି ଉଲ୍ଲଂଘନ। ଗତ ରାତିରେ ଲାଇନ୍ ଅଫ୍ କଣ୍ଟ୍ରୋଲରେ ପାକିସ୍ତାନ ପକ୍ଷରୁ ଘନ ଘନ ଗୁଳିଗୋଳା ମାଡ଼ କରାଯାଇଛି। LOC ର କୁପୱାଡ଼ା, ବାରାମୁଲା, ପୁଞ୍ଚ, ନୌସେରା, ଅଖନୁର ସେକ୍ଟରରେ ସୀମା ଆରପଟୁ ଫାୟାରିଂ କରାଯାଇଥିଲା। ଏହାର କଡ଼ା ଜବାବ ଦେଇଛନ୍ତି ଭାରତର ସୁରକ୍ଷାକର୍ମୀ। ଗୁଳିର ଜବାବ ଗୁଳିରେ ଦିଆଯାଇଛି।
ପହଲଗାଁଓ ଆତଙ୍କବାଦୀ ଆକ୍ରମଣ ହେବା ପରଠୁ ସୀମାରେ ଉତ୍ତେଜନା ଲାଗି ରହିଛି। ପାକିସ୍ତାନ ପଟରୁ ବାରମ୍ଵାର ଗୁଳିଗୋଳା ବର୍ଷଣ ହେଉଛି। ଆତଙ୍କବାଦୀଙ୍କ ଅନୁପ୍ରବେଶରେ ସାହାଯ୍ୟ କରିବା ପାଇଁ ସେପଟୁ ବାରମ୍ବାର ବିନା କାରଣରେ ଫାୟାରିଂ କରାଯାଉଛି। ଭାରତର ସୁରକ୍ଷାକର୍ମୀ ମଧ୍ୟ ଏହାର ଜବାବ ଦେଉଛନ୍ତି।
ଭାରତ ଭୟରେ ଥରୁଛି ପାକିସ୍ତାନ: କରାଚି ଏବଂ ଲାହୋରରେ ଏୟାରସ୍ପେସ ବନ୍ଦ କଲା ପାକିସ୍ତାନ
ଇସଲାମାବାଦ: ପାକିସ୍ତାନରେ ହାଇଆଲର୍ଟ। ସୁରକ୍ଷା ଦୃଷ୍ଟିରୁ ପାକିସ୍ତାନ ମେ ମାସରେ କରାଚୀ ଏବଂ ଲାହୋର ଆକାଶପଥର କିଛି ଅଂଶକୁ ପ୍ରତିଦିନ ଚାରି ଘଣ୍ଟା ପାଇଁ ବନ୍ଦ ରଖିବାକୁ ଘୋଷଣା କରିଛି ଏବଂ ଦେଶର ସମସ୍ତ ବିମାନବନ୍ଦରକୁ ‘ହାଇ ଆଲର୍ଟ’ରେ ରଖିଛି। ପହଲଗାମ ଆତଙ୍କବାଦୀ ଆକ୍ରମଣ ପରେ ପାକିସ୍ତାନ ଏବଂ ଭାରତ ମଧ୍ୟରେ ଉତ୍ତେଜନା ବୃଦ୍ଧି ପାଇବାରେ ଲାଗିଛି ।
ପାକିସ୍ତାନରେ ୨୯ ସହରରେ ସାଇରନ ଆଲର୍ଟର ବ୍ୟବସ୍ଥା କରାଯାଇଛି। କରାଚି, ଲାହୋରରେ ଆକ୍ରମଣ ଆଶଙ୍କା କରୁଛି ପାକିସ୍ତାନ। ଦୁଇଟି ଯାକ ବାଣିଜ୍ୟର କେନ୍ଦ୍ରସ୍ଥଳ ହୋଇଥିବାରୁ ଆକ୍ରମଣ ହୋଇପାରେ ବୋଲି ସେଠାକାର ସରକାର ଆଶଙ୍କା କରୁଛନ୍ତି। ତେଣୁ ଦୁଇ ସହରରେ ଏୟାରସ୍ପେସ ବନ୍ଦ କରିଛି ପାକିସ୍ତାନ।
ଭାରତୀୟ ବିମାନ ଲାଗି ଏୟାରସ୍ପେସ ବନ୍ଦ କରାଯାଇଛି। ସୁରକ୍ଷାର ଆଳ ଦେଖାଇ ଏହି ନିଷ୍ପତ୍ତି ନିଆଯାଇଛି। ଭୋର ୪ଟାରୁ ସକାଳ ୮ଟା ପର୍ଯ୍ୟନ୍ତ ଏୟାରସ୍ପେସ ବନ୍ଦ ରହିବ। ଏହି ସବୁ ସହରର ବିଭିନ୍ନ ସ୍ଥାନରେ ସାଇରନ ଲଗାଇବାକୁ ନିଷ୍ପତ୍ତି ହୋଇଛି। ଆସନ୍ତା ୩୧ ତାରିଖ ପର୍ଯ୍ୟନ୍ତ ଏୟାରସ୍ପେସ ବନ୍ଦ ନିଷ୍ପତ୍ତି ହୋଇଛି।
ଜାତୀୟ ରାଜଧାନୀ ଦିଲ୍ଲୀରେ ହାଇ ଆଲର୍ଟ
ନୂଆଦିଲ୍ଲୀ: ପହଲଗାମ ଆକ୍ରମଣକୁ ନେଇ ହାଇ ଆଲର୍ଟରେ ଜାତୀୟ ରାଜଧାନୀ ଦିଲ୍ଲୀ। ଦିଲ୍ଲୀରେ ଯାନବାହାନର କଡ଼ା ଯାଞ୍ଚ କରାଯାଉଛି। ସାକେତ-କନଟ୍ ପ୍ଲେସରେ ପୋଲିସ ପାଟ୍ରୋଲିଂ ଜୋରଦାର କରାଯାଇଛି। ଭାରତ ଏବଂ ପାକିସ୍ତାନ ମଧ୍ୟରେ ବଢ଼ୁଥିବା ଉତ୍ତେଜନା ମଧ୍ୟରେ, ରାଜଧାନୀ ଦିଲ୍ଲୀରେ ମଧ୍ୟ ସୁରକ୍ଷା ବ୍ୟବସ୍ଥା କଡ଼ାକଡ଼ି କରାଯାଇଛି। ଦିଲ୍ଲୀ ପୋଲିସ ରାଜଧାନୀର ଦକ୍ଷିଣ ଏବଂ ଦକ୍ଷିଣ ପୂର୍ବ ଜିଲ୍ଲାଗୁଡ଼ିକରେ ସାଧାରଣ ପାଟ୍ରୋଲିଂ ଅଭିଯାନ ଜାରି ରଖିଛନ୍ତି। ଯେଉଁଥିରେ ପ୍ରାୟ ୧୩୦୦ ପୋଲିସ କର୍ମଚାରୀ ନିୟୋଜିତ ହୋଇଛନ୍ତି। ବସ୍ ଏବଂ ସାର୍ବଜନୀନ ସ୍ଥାନରେ କଡ଼ା ଯାଞ୍ଚ କରାଯାଉଛି। ସହରର ଅନେକ ପ୍ରମୁଖ ସ୍ଥାନରେ ବରିଷ୍ଠ ପୋଲିସ ଅଧିକାରୀ ରହି ଯାଞ୍ଚ କରୁଛନ୍ତି। ସୁରକ୍ଷା କାରଣରୁ ଅଧିକ ସଂଖ୍ୟକ ଫୋର୍ସ ମୁତୟନ କରାଯାଇଛି।
ଭିଡ଼ ସମୟରେ ସର୍ବାଧିକ ଯାଞ୍ଚ କରିବା ଏବଂ ସାଧାରଣ ଲୋକଙ୍କୁ ସୁରକ୍ଷାର ଆଶ୍ୱସ୍ତି ଦେବା ପୋଲିସର ମୁଖ୍ୟ କାର୍ଯ୍ୟ ବୋଲି ବରିଷ୍ଠ ପୋଲିସ ଅଧିକାରୀ କହିଛନ୍ତି। ଦିଲ୍ଲୀ ପୋଲିସ ପ୍ରତ୍ୟେକ ପରିସ୍ଥିତିର ମୁକାବିଲା କରିବାକୁ ପ୍ରସ୍ତୁତ। ନାଗରିକଙ୍କ ସୁରକ୍ଷା ଆମର ପ୍ରଥମ ପ୍ରାଥମିକତା ବୋଲି କହିଛି ପୋଲିସ।
ଆଜିଠୁ ଖୋଲିଲା କେଦାରନାଥ ମନ୍ଦିର
ଉତ୍ତରାଖଣ୍ଡ: ଆଜିଠୁ ଖୋଲିଛି ଦେବଭୂମି ଉତ୍ତରାଖଣ୍ଡର ପ୍ରସିଦ୍ଧ କେଦାରନାଥ ମନ୍ଦିର। କେଦାରନାଥ ବାବାଙ୍କ ମନ୍ଦିରର ମୁଖ୍ୟ ଫାଟକ ଭକ୍ତଙ୍କ ପାଇଁ ଖୋଲା ଯାଇଛି। ପୁରା ମନ୍ଦିରକୁ ଫୁଲରେ ସଜାଯାଇଛି। ଆକର୍ଷଣୀୟ ଭାବେ ଫୁଲରେ ମନ୍ଦିରକୁ ସଜା ଯାଇଛି । ଏହା ସହିତ ଚାରି ଧାମ ଯାତ୍ରା ପାଇଁ ଭକ୍ତଙ୍କ ଲାଗି ପୋର୍ଟାଲ ବି ଖୋଲା ଯାଇଛି। ଉତ୍ତରାଖଣ୍ଡର ମୁଖ୍ୟମନ୍ତ୍ରୀ ପୁଷ୍କର ସିଂହ ଧାମି ଏହି ପୋର୍ଟାଲ ଉନ୍ମୋଚନ କରିଛନ୍ତି।
ସୂଚନା ଅନୁଯାୟୀ, କେଦାରନାଥ ଧାମର ଦ୍ୱାର ଆଜି ସକାଳ ୭ଟାରେ ରୀତିନୀତି ସହିତ ଭକ୍ତମାନଙ୍କ ପାଇଁ ଖୋଲାଯାଇଥିଲା। ଏହି ସମୟରେ ଉତ୍ତରାଖଣ୍ଡ ମୁଖ୍ୟମନ୍ତ୍ରୀ ପୁଷ୍କର ସିଂହ ଧାମି ମଧ୍ୟ ଉପସ୍ଥିତ ଥିଲେ । ପୁରୋହିତଙ୍କ ଦ୍ୱାରା ବୈଦିକ ସ୍ତୁତିଗାନ ଏବଂ ଭକ୍ତଙ୍କ ଜୟଧ୍ୱନି ମଧ୍ୟରେ ଦ୍ୱାର ଖୋଲାଯାଇଥିଲା । ଏବଂ ଏହି ସମୟରେ, ହେଲିକପ୍ଟରରୁ ଭକ୍ତମାନଙ୍କ ଉପରେ ଫୁଲ ବର୍ଷା କରାଯାଇଥିଲା।
ଚାରିଧାମ ଓ କେଦାରନାଥ ଯାତ୍ରା ପାଇଁ ଏହି ପୋର୍ଟାଲରେ ପଂଜୀକରଣ କରିବାକୁ ପଡ଼ିବ। ସେହିପରି ବଦ୍ରିନାଥ ଧାମ ଖୋଲିବ ଆସନ୍ତା ୪ ତାରିଖରେ।
ଆଜି ପ୍ରକାଶ ପାଇବ ମାଟ୍ରିକ୍ ରେଜଲ୍ଟ
ଭୁବନେଶ୍ୱର: ଆଜି ପ୍ରକାଶ ପାଇବ ମାଟ୍ରିକ୍ ରେଜଲ୍ଟ । ଅପରାହ୍ନରେ ପ୍ରକାଶ ପାଇବ ମାଟ୍ରିକ ରେଜଲ୍ଟ। ରେଜଲ୍ଟ ପ୍ରକାଶ ନେଇ ବୋର୍ଡ ପକ୍ଷରୁ ପ୍ରସ୍ତୁତି ଚୂଡାନ୍ତ।
ସନ୍ଧ୍ୟା ୬ଟା ପରେ ଓ୍ୱେବସାଇଟରେ ଉପଲବ୍ଧ ହେବ ରେଜଲ୍ଟ। www.bseodisha.ac.inରେ ଉପଲବ୍ଧ ହେବ ଫଳାଫଳ। ଇଣ୍ଟରନେଟ ନଥିବା ଅଞ୍ଚଳରେ SMS ମାଧ୍ୟମରେ ମିଳିବ ରେଜଲ୍ଟ ।
ଚଳିତବର୍ଷ ପରୀକ୍ଷା ଦେଇଥିଲେ ୫ ଲକ୍ଷରୁ ଅଧିକ ପରୀକ୍ଷାର୍ଥୀ। ୩ ହଜାର ୧୩୩ଟି କେନ୍ଦ୍ରରେ ହୋଇଥିଲା ମାଟ୍ରିକ ପରୀକ୍ଷା। ୩୧୪ ନୋଡାଲ ସେଣ୍ଟର ସମେତ ୬ଶହ ସମ୍ବେଦନଶୀଳ ପରୀକ୍ଷା କେନ୍ଦ୍ରରେ ଲାଇଭ୍ ଭିଡିଓ ବ୍ୟବସ୍ଥା କରାଯାଇଥିଲା।