ନନ୍ଦିଘୋଷ ବ୍ୟୁରୋ: ମଣିପୁରରେ ଆଜି ବନ୍ଦ ରହିବ ସମସ୍ତ ଶିକ୍ଷାନୁଷ୍ଠାନ ଓ ବ୍ୟବସାୟ ପ୍ରତିଷ୍ଠାନ । ରାଜ୍ୟର ଜାତିଗତ ହିଂସା ଆରମ୍ଭର ଦ୍ବିତୀୟ ବାର୍ଷିକୀ ପାଳନ ଲାଗି ଦୁଇଟି କୁକି-ଜୋମି ଛାତ୍ର ସଂଗଠନ ପକ୍ଷରୁ ଆହ୍ବାନ ଦିଆଯାଇଛି । ଜୁମି ଛାତ୍ର ସଂଘ ବା ଜେଡଏସଏଫ ଓ କୁକି ଛାତ୍ର ସଂଗଠନ ବା କେଏସଓ ପକ୍ଷରୁ ଏହି ବନ୍ଦ ଡାକରା ଦିଆଯାଇଛି । ୨୦୨୩ ମେ ୩ରୁ ଆରମ୍ଭ ହୋଇଥିବା ଜାତିଗତ ହିଂସାରେ ବର୍ତ୍ତମାନ ସୁଦ୍ଧା ପ୍ରାଣ ହରାଇଲେଣି ୨୫୦ରୁ ଅଧିକ ଲୋକ । ମେଇତେଇ ଓ କୁକିଙ୍କ ମଧ୍ୟରେ ହୋଇଥିବା ଲୋମହର୍ଷକ ହିଂସା ଘଟଣାରେ ବାସଚ୍ୟୁତ ହେଲେଣି ଲକ୍ଷାଧିକ ନାଗରିକ । ହିଂସା କାରଣରୁ ମୁଖ୍ୟମନ୍ତ୍ରୀ ଏନ. ବୀରେନ ସିଂ ଇସ୍ତଫା ଦେଇଥିବାବେଳେ ରାଜ୍ୟରେ ଜାରି ହୋଇଥିଲା ରାଷ୍ଟ୍ରପତି ଶାସନ । ବନ୍ଦ ଅବସରରେ ବିଭିନ୍ନ ସ୍ଥାନରେ କଳାପତାକା ଉତ୍ତୋଳନ କରିବା ଲାଗି ଦୁଇ ସଂଗଠନ ପକ୍ଷରୁ ଡାକରା ଦିଆଯାଇଛି । ଚୁରାଚାନ୍ଦପୁର ଜିଲ୍ଲା ମୁଖ୍ୟାଳୟରେ ପ୍ରତିଷ୍ଠିତ ସହିଦ ସ୍ମାରକୀରେ ଏହି ଦୁଇ ସଂଗଠନ ପକ୍ଷରୁ ସମାବେଶ କରାଯିବ । ସେପଟେ ଇଣ୍ଡିଜେନସ ଟ୍ରାଇବାଲ ଲିଡର୍ସ ଫୋରମ ବା ITLF ପକ୍ଷରୁ ଘୋଷଣା କରାଯାଇଛି- ମେ ୩କୁ ସେପାରେସନ ଡେ ଭାବେ ପାଳନ କରାଯିବ ।
ହାଇଦ୍ରାବାଦ ବିପକ୍ଷ ମ୍ୟାଚରେ କାହିଁକି ରାଗିଲେ ଗିଲ୍ ? ୨ ଥର ଅମ୍ପାୟାରଙ୍କୁ..
ନନ୍ଦିଘୋଷ ବ୍ୟୁରୋ: ଶୁକ୍ରବାର ହାଇଦ୍ରାବାଦକୁ ଭେଟିଥିଲା ଗୁଜୁରାଟ ଟାଇଟନ୍ସ । ଏହି ହାଇସ୍କୋରିଂ ମ୍ୟାଚରେ ଗୁଜୁରାଟ ୩୮ ରନରେ ଜିତିଛି । ଗୁଜୁରାଟର ତିନି ପ୍ରାରମ୍ଭିକ ବ୍ୟାଟ୍ସମ୍ୟାନଙ୍କ ଦମଦାର ବ୍ୟାଟିଂ ଫଳରେ ଦଳ ୨୨୪ ରନ କରିଥିଲା । ତେବେ ଏହି ମ୍ୟାଚରେ ଅଧିନାୟକ ଶୁଭମନ ଗିଲ୍ ଆଗ୍ରେସିଭ୍ ମୁଡରେ ନଜର ଆସିଥିଲେ । ସେ ୨ ଥର ଅମ୍ପାୟାରଙ୍କ ଉପରେ ରାଗିଥିବା ନଜର ଆସିଥିଲେ । ପ୍ରଥମେ ଯେତେବେଳେ ରନଆଉଟ ହୋଇ ଗିଲ୍ ପାଭିଲିୟନ ଫେରୁଥିଲେ ସେତେବେଳେ ପ୍ରଥମେ ସେ ବିରକ୍ତ ଥିବା ଭଳି ଦେଖା ଦେଇଥିଲେ । ଏହା ୧୩ତମ ଓଭରରେ ଘଟିଥିଲା । ସେ ରନ ଆଉଟ୍ ହୋଇଥିବାବେଳେ ଏଭଳି ଲାଗୁଥିଲା କି, ପ୍ରଥମେ ଗ୍ଲୋବସ ବାଜିଛି । ପରେ ଟିଭ ଅମ୍ପାୟାର ଏହାକୁ ରନ ଆଉଟ୍ ଦେଇଥିଲେ । ଏହାପରେ ସେ ଶାନ୍ତ ହୋଇଥିଲେ । ସେପଟେ ଗୁଜୁରାଟ ବୋଲିଂ ସମୟରେ ମଧ୍ୟ ଗିଲ୍ ବିରକ୍ତିଭାବ ପ୍ରକାଶ କରିଥିଲେ । ପ୍ରସିଦ୍ଧ କ୍ରିଷ୍ଣାଙ୍କ ଏକ ଫୁଲଟସ୍ ବଲଟି ଅଭିଶେକ ଶର୍ମାଙ୍କ ପ୍ୟାଡରେ ବାଜିଥିଲା । ଆଉ ଅମ୍ପାୟାର ଏହାକୁ ଆଉଟ୍ ଦେଇନଥିଲେ । ଯାହାକୁ ନେଇ ରାଗି ଯାଇଥିଲେ ଗିଲ୍ । ସେ ଅମ୍ପାୟାରଙ୍କ ସହ ଯୁକ୍ତି କରିଥିବା ଦେଖିବାକୁ ମିଳିଥିଲା ।
ଭାରତ ସହ ଉତ୍ତେଜନା ଭିତରେ ବଢୁଛି ପାକିସ୍ତାନର ଆଣବିକ ଧମକ
ନନ୍ଦିଘୋଷ ବ୍ୟୁରୋ: ଭାରତ-ପାକିସ୍ତାନ ଉତ୍ତେଜନା ଭିତରେ ବଢୁଛି ପାକିସ୍ତାନର ଆଣବିକ ଧମକ । ଯଦି ପାକିସ୍ତାନର ସ୍ଥିତି ପ୍ରତି ବିପଦ ଆସେ ତେବେ ଆଣବିକ ଅସ୍ତ୍ର ପ୍ରୟୋଗ ଲାଗି ପଛଘୁଞ୍ଚା ଦିଆଯିବ ନାହିଁ ବୋଲି କହିସାରିଛନ୍ତି ପାକ୍ ମନ୍ତ୍ରୀ ହନିଫ ଆବାସି, ଆମେରିକା ଲାଗି ନିଯୁକ୍ତ ରାଷ୍ଟ୍ରଦୂତ ରିଜଓ୍ବାନ ଶେଖ ଓ ପ୍ରତିରକ୍ଷା ମନ୍ତ୍ରୀ ଖ୍ବାଜା ଆସିଫ । ଦୁଇ ଦେଶ ମଧ୍ୟରେ ସୃଷ୍ଟ ଉତ୍ତେଜନା ପ୍ରଶମିତ କରିବା ଲାଗି ଆମେରିକା ରାଷ୍ଟ୍ରପତି ଡୋନାଲଡ ଟ୍ରମ୍ପଙ୍କ ନିକଟରେ ଅନୁରୋଧ କରିଥିଲେ ରାଷ୍ଟ୍ରଦୂତ ଶେଖ୍ । ଏବେ ପ୍ରଶ୍ନ ଉଠୁଛି ସମ୍ଭାବ୍ୟ ଆଣବିକ ଟେନସନରେ ଆମେରିକାର ଭୂମିକା କଣ ରହିବ । ଅତୀତରେ ପୂର୍ବତନ ରାଷ୍ଟ୍ରପତି ବିଲ୍ କ୍ଲିଣ୍ଟନ ଓ ଜର୍ଜ ଡବ୍ଲୁ ବୁଶଙ୍କ ସମୟରେ ପାକିସ୍ତାନର ଆଣବିକ ଅସ୍ତ୍ରର ସୁରକ୍ଷା ଲାଗି ଆମେରିକା ପଦକ୍ଷେପ ନେଇଥିଲା ।
ତେଣେ ବେଲାରୁଷ ଓ ଚୀନ ସହାୟତାରେ ପାକିସ୍ତାନ ଲଙ୍ଗରେଞ୍ଜ ମିସାଇଲ ଓ ପେଲୋଡ ସାମର୍ଥ୍ୟ ବୃଦ୍ଧି କାର୍ଯ୍ୟକ୍ରମ ଜାରି ରଖିଛି । ଏହି ଯୋଜନା ବଳରେ କିଛି ବର୍ଷ ମଧ୍ୟରେ ପାକିସ୍ତାନ ୩ ହଜାର କିଲୋମିଟର ଦୂରକୁ ହିଟ୍ କରିପାରୁଥିବା କ୍ଷେପଣାସ୍ତ୍ରର ଅଧିକାରୀ ହେବ । ପାକିସ୍ତାନକୁ ଆଣବିକ ଯନ୍ତ୍ରାଂଶ ସହଯୋଗ କରୁଥିବାରୁ ଚୀନ ଓ ବେଲାରୁଷର କେତେକ ଫାର୍ମ ସମେତ ପାକିସ୍ତାନର କେତେକ ସରକାରୀ ସଂସ୍ଥା ବିରୋଧରେ ଆମେରିକା କଟକଣା ଜାରି କରିସାରିଛି । ୨୦୧୫ରେ ପ୍ରଥମେ ପାକିସ୍ତାନ ପରୀକ୍ଷା କରିଥିବା ସାହିନ-୩ ମିସାଇଲର କ୍ଷମତା ୨ ହଜାର ୭୫୦ କିଲୋମିଟର ଥିଲା । ଏହାର ଅର୍ଥ ଭାରତର ଯେ କୌଣସି ସ୍ଥାନକୁ ହିଟ୍ କରିବାର କ୍ଷମତା ପାକିସ୍ତାନ ନିକଟରେ ରହିଛି ।
ଆନ୍ତର୍ଜାତିକ ଚାପ ସତ୍ତ୍ବେ ଥମୁନି ପାକିସ୍ତାନ, ବାରମ୍ବାର କରୁଛି ଅସ୍ତ୍ରବିରତି ଉଲଙ୍ଘନ
ନନ୍ଦିଘୋଷ ବ୍ୟୁରୋ: ଆନ୍ତର୍ଜାତିକ ଚାପ ସତ୍ତ୍ବେ ଥମୁନି ପାକିସ୍ତାନ। ବାରମ୍ବାର ଅସ୍ତ୍ରବିରତି କରୁଛି ଉଲ୍ଲଂଘନ। ପହଲଗାଓଁ ହମଲା ପରଠାରୁ ସୀମାରେ ପାକିସ୍ତାନ ଚଳାଇଛି ଦାଦାଗିରି। ଯଦିଓ ପାକ୍ ବାହିନୀକୁ ଭାରତୀୟ ସେନା ଜୋରଦାର ଟକ୍କର ଦେଉଛନ୍ତି ତଥାପି ଆତଙ୍କବାଦୀଙ୍କୁ ଧରିବା ବଦଳରେ ଭାରତୀୟ ଯବାନଙ୍କୁ ଟାଗେଟ କରୁଛି ପାକିସ୍ତାନ। ପାକ୍ ବାହିନୀଙ୍କୁ ଉପଯୁକ୍ତ ଜବାବ ଦେବାକୁ ଭାରତ ଚଳାଇଛି ରଣନୀତି। ବାୟୁ ସେନାକୁ ରଖାଯାଇଛି ପ୍ରସ୍ତୁତ। ଏୟାର ସୋ ଜରି ଦେଶ ଦେଖାଇଛି ଦମ। ତେଣେ ଦୁଇ ମାସର ରାସନ ଓ ଔଷଧ ଜମା କରି ରଖିବା ଲାଗି ପାକ୍ ଅଧିକୃତ କାଶ୍ମୀର ବାସିନ୍ଦାଙ୍କୁ ପାକ୍ ପ୍ରଧାନମନ୍ତ୍ରୀ ଦେଇଛନ୍ତି ନିର୍ଦ୍ଦେଶ। ଅନ୍ୟପଟେ ପଦାରେ ପଡୁଛି ଭାରତ ବିରୋଧରେ ବାଂଲାଦେଶର ଷଡ଼ଯନ୍ତ୍ର। ବାଂଲାଦେଶର ଅବସରପ୍ରାପ୍ତ ମେଜର ଜେନେରାଲ ଏଏଲଏମ ଫଜଲୁର ରହମାନଙ୍କ ବୟାନ ଚର୍ଚ୍ଚା ସୃଷ୍ଟି କରିଛି। ମୁଖ୍ଯ ପରାମର୍ଶଦାତା ମହମ୍ମଦ ୟୁନୁସଙ୍କ ଘନିଷ୍ଠ ଥିବା ରହମାନ କହିଛନ୍ତି ଯଦି ଭାରତ ପାକିସ୍ତାନ ଆକ୍ରମଣ କରେ ତେବେ ଭାରତର ଉତ୍ତର ପୂର୍ବାଞ୍ଚଳ ରାଜ୍ୟକୁ ଅଧିକାର କରୁ ବାଂଲାଦେଶ। ପହଲଗାଓଁ ଆକ୍ରମଣ ପ୍ରସଙ୍ଗରେ ସରକାରଙ୍କ ନୀତି ସ୍ପଷ୍ଟ ନାହିଁ ବୋଲି ସରକାରଙ୍କୁ କଂଗ୍ରେସ ଅଧ୍ୟକ୍ଷ ଖଡଗେ କରିଛନ୍ତି ସମାଲୋଚନା । ଘଟଣାରେ ସାରା ଦେଶ ଜବାବକୁ ଅପେକ୍ଷା କରି ରହିଥିବାବେଳେ ସରକାରଙ୍କ ନୀରବତା କାହିଁକି ବୋଲି ସେ ପ୍ରଶ୍ନ କରିଛନ୍ତି। ସେପଟେ ଆଜି ବି ପହଲଗାଓଁରେ ତଦନ୍ତ କରିବ ଏନଆଇଏ। ଦିନକୁ ଦିନ ପଦାକୁ ଆସୁଛି ଅନେକ ଚାଞ୍ଚଲ୍ଯକର ତଥ୍ୟ।
ପହଲଗାଓଁ ଆତଙ୍କୀ ଆକ୍ରମଣ ଘଟଣା: ଦଶମ ଦିନରେ ଏନଆଇଏର ତଦନ୍ତ ଜାରି
ନନ୍ଦିଘୋଷ ବ୍ୟୁରୋ: ଦଶମ ଦିନରେ ଏନଆଇଏର ତଦନ୍ତ ଜାରି । ଜାମ୍ମୁ କାଶ୍ମୀରର ପହଲଗାଓଁ ଆତଙ୍କୀ ଆକ୍ରମଣ ଘଟଣାରେ ବେସରନ ଘାଟିରେ ପୁଣିଥରେ ପହଞ୍ଚି ଏନଆଇଏ ଟିମ୍ ତଦନ୍ତ କରିଛି । ଅନେକ ଯାଞ୍ଚ ଉପକରଣ ସହିତ ପହଞ୍ଚି ଏନଆଇଏ ଟିମ୍ ବିଭିନ୍ନ ଦିଗକୁ ନେଇ ତଦନ୍ତ କରିଛି । ଜିଆଇଏସ ଅର୍ଥାତ ଜିଓ ଇନଫୋର୍ସମେଣ୍ଟ ସିଷ୍ଟମ ସହାୟତାରେ ତଦନ୍ତର ଭିଡିଓଗ୍ରାଫି କରାଯାଇଛି । ଏନଆଇଏ ଟିମ ସ୍ଥାନୀୟ ଅଞ୍ଚଳରେ ଥ୍ରୀଡି ମ୍ୟାପିଂ କରିଛନ୍ତି । ଏହି ଅବସରରେ ସେଠାରେ ଉପସ୍ଥିତ ଥିଲେ ଏନଆଇଏ ଡିଜି । ପରେ ଡିଜି ଶ୍ରୀନଗର ଯାଇ ତଦନ୍ତରେ ସଂପୃକ୍ତ ଅଧିକାରୀଙ୍କ ସହ ବୈଠକ କରି ସମୀକ୍ଷା କରିଛନ୍ତି ।
ଗତକାଲି ମଧ୍ୟ ସେ ବୈସରନ ଯାଇ ତିନି ଘଣ୍ଟା କାଳ ରହି ପୂରା ଅଞ୍ଚଳକୁ ବୁଲି ଦେଖିଥିଲେ ।
ଜଗନ୍ନାଥଙ୍କୁ ନେଇ କାର୍ଟୁନ ଏବେ ସୋସିଆଲ ମିଡିଆରେ ଭାଇରାଲ , ଅସନ୍ତୋଷ ପ୍ରକାଶ କଲେ ଜଗନ୍ନାଥ ପ୍ରେମୀ
ନନ୍ଦିଘୋଷ ବ୍ୟୁରୋ: ଦୀଘାରେ ମମତା ବାନାର୍ଜୀ ପ୍ରତିଷ୍ଠା କରିଥିବା ଜଗନ୍ନାଥ ମନ୍ଦିରକୁ ନେଇ ବିବାଦ । ଜଗନ୍ନାଥ ଧାମ ନାମିତ କରିବା ନେଇ ବିବାଦ ମଧ୍ୟରେ ପୁଣି ଏକ ନୂଆ ବିବାଦ ମୁଣ୍ଡ ଟେକିଛି । ଜଗନ୍ନାଥଙ୍କୁ ନେଇ ହୋଇଥିବା କାର୍ଟୁନ ଏବେ ସୋସିଆଲ ମିଡିଆରେ ଭାଇରାଲ ହେଉଛି । ଏହି କାର୍ଟୁନଟି କିଏ ଆଙ୍କିଛି ତାର ତଥ୍ୟ ଜଣାପଡ଼ିନାହିଁ । କାର୍ଟୁନରେ ବଙ୍ଗଳା ଭାଷାରେ ଲେଖାଯାଇଥିବାରୁ ପଶ୍ଚିମବଙ୍ଗର କେହି ଆଙ୍କିଥିବା ଅନୁମାନ କରାଯାଇଛି ।
କାର୍ଟୁନରେ ଦେଖାଯାଇଛି ମମତା ବାନାର୍ଜୀ ଶ୍ରୀଜଗନ୍ନାଥଙ୍କୁ ହାତ ଧରି ପୁରୀରୁ ଟାଣିଟାଣି ନେଇ ଯାଉଛନ୍ତି । କହୁଛନ୍ତି ‘ଚାଲ,ଏଖୁନୀ ଦିଘାୟ ଚାଲ୍’ ସେପଟେ ପ୍ରତ୍ୟୁତ୍ତରରେ ଶ୍ରୀଜଗନ୍ନାଥ କହୁଛନ୍ତି,’ ପ୍ଲିଜ୍ ଆମାକେ କ୍ଷମା କରେ ଦାଓ ପ୍ଲିଜ୍ । ସେହି କାର୍ଟୁନରେ ତଳେ ଲେଖାଯାଇଛି ‘ସାରା ଜୀବନ୍ ମାସିର୍ ବାଡି ତେଇ ଗେଲି, ଏବାର ପିସିର୍ ବାଡି ଥାକବି ଚଲ’ ଅର୍ଥାତ ସାରା ଜୀବନ କେବଳ ମାଉସୀ ଘରକୁ ଗଲ,ଏବେ ପିଉସୀ ଘରେ ରହିବ ଚାଲ । ସୋସିଆଲ ମିଡିଆରେ ଭାଇରାଲ ହେଉଥିବା ଏହି କାର୍ଟୁନକୁ ନେଇ ସାରା ଓଡ଼ିଶାରେ ଏବେ ପ୍ରତିକ୍ରିୟା ପ୍ରକାଶ ପାଇବା ସହ ଜଗନ୍ନାଥ ପ୍ରେମୀମାନେ ଅସନ୍ତୋଷ ପ୍ରକାଶ କରିଛନ୍ତି ।
ଘରେ ପଶି ଯୁବତୀଙ୍କୁ ଛୁରା ମାଡ଼, ବ୍ରହ୍ମପୁର ମେଡିକାଲରେ ଭର୍ତ୍ତି
ଗଞ୍ଜାମ: ଗଞ୍ଜାମରେ ଆଇନ ଶୃଙ୍ଖଳା ବିପର୍ଯ୍ୟସ୍ତ। କଥା କଥାକେ ବୁଲୁଛି ଖଣ୍ଡା। ଫୁଟୁଛି ଗୁଳି। ନିମଖଣ୍ଡି ଥାନା ବ୍ୟାଙ୍କ କଲୋନିରେ ଜଣେ ଯୁବତୀଙ୍କୁ ଛୁରା ମାଡ଼ ହୋଇଥିବା ଅଭିଯୋଗ ହୋଇଛି। ଯୁବତୀ ଜଣକ ହେଲେ ଅଳକା ମହାକୁଡ଼। ଘରେ ପଶି ତାଙ୍କ ଉପରେ ଆକ୍ରମଣ ହୋଇଛି । ଅଭିଯୁକ୍ତକୁ ଗିରଫ କରାଯାଇଛି।
ଗତକାଲି କରାପଲ୍ଲୀରେ ନାବାଳିକାକୁ ହତ୍ୟା ହୋଇଥିବା ବେଳେ ଆଜି ଜଣେ ଯୁବତୀଙ୍କୁ ହତ୍ୟା ଉଦ୍ୟମ ହୋଇଛି। ତାଙ୍କୁ ଗୁରୁତର ଅବସ୍ଥାରେ ବ୍ରହ୍ମପୁର ଏମକେସିଜି ମେଡ଼ିକାଲରେ ଭର୍ତ୍ତି କରାଯାଇଛି।
ଉଠା ଦୋକାନରେ ଚାଲିଲା ବୁଲଡୋଜର, ୨୦ରୁ ଅଧିକ ଦୋକାନୀ ବେସାହାରା
ଭୁବନେଶ୍ଵର: ଭୁବନେଶ୍ଵର ଚନ୍ଦ୍ରଶେଖରପୁର ଶ୍ରୀବିହାରର ରାସ୍ତା କଡରେ ଦୀର୍ଘ ବର୍ଷ ଧରି ଥିବା ଉଠା ଦୋକାନ ଉଚ୍ଛେଦ। ଗେଲ ଇଣ୍ଡିଆକୁ ଜାଗା ଦେବା ପାଇଁ ବିଡିଏ ବୁଲଡୋଜର ଲଗାଇ ଭାଙ୍ଗିଦେଲା ବୋଲି ଅଭିଯୋଗ ହୋଇଛି। ପୂର୍ବରୁ ବିଏମସି ତରଫରୁ ଦୋକାନୀମାନଙ୍କୁ ଅନ୍ୟତ୍ର ଜାଗା ଦେବା ପାଇଁ ଲିଖିତ ପତିଶ୍ରୁତି ମିଳିଥିଲା। ହେଲେ ବିଡିଏ କିଛି ନ ଶୁଣି ଦୋକାନ ଭାଙ୍ଗି ଦେଇଛି ବୋଲି ଅଭିଯୋଗ କରିଛନ୍ତି ଦୋକାନୀମାନେ । ବହୁ ବର୍ଷ ଧରି ଚନ୍ଦ୍ରଶେଖର ପୁର ଶ୍ରୀ ବିହାର ରାସ୍ତା କଡରେ ଦୋକାନ କରି ପରିବାର ଚଳାଉଥିଲେ ୨୦ରୁ ଉର୍ଦ୍ଧ ପରିବାର। ହେଲେ ବିଡିଏ ହଠାତ ଦୋକାନ ଭାଙ୍ଗି ଦେବା ଫଳରେ ବେସାହାରା ହୋଇ ରାସ୍ତାରେ ବସିଛନ୍ତି ଲୋକେ ।
ସାତ ଦିନର ଶିଶୁପୁତ୍ର ବିକ୍ରି ଅଭିଯୋଗ
ଫୁଲବାଣୀ: ୭ ଦିନର ଶିଶୁପୁତ୍ର ବିକ୍ରି ଅଭିଯୋଗ । ପୋଲିସ ସହୟତାରେ ବିକ୍ରି ଶିଶୁପୁତ୍ରକୁ ଉଦ୍ଧାର କଲା ଟାଇଲ୍ଡ ଲାଇନ । ଏଭଳି ଅଭିଯୋଗ ଆସିଛି ଜିଲ୍ଲା ମୁଖ୍ୟାଳୟ ଫୁଲବାଣୀ ଦଧିବାବନ ସାହିରୁ । ଜଣେ ମହିଳା ବିବାହର ୧୦ ବର୍ଷ ପରେ କୌଣସି ସନ୍ତାନ ନଥିବାରୁ ସେ ଅନ୍ୟଜଣେ ମହିଳାଙ୍କ ଠାରୁ ସାତ ମାସର ଶିଶୁପୁତ୍ରକୁ ନେଇଥିଲେ। ଏବେ ଶିଶୁପୁତ୍ରକୁ ବିକ୍ରି କରାଯାଇଥିବା ଅଭିଯୋଗ ହୋଇଛି। ନିଜ ଇଚ୍ଛାରେ ଶିଶୁକୁ ଟେକିଦେଇଥିବା ମହିଳା ଜଣଙ୍କ କହିଥିବା ବେଳେ ମହିଳାଙ୍କର ଅଙ୍ଗନବାଡି କିମ୍ବା ମେଡିକାଲରେ ପ୍ରସବର କୌଣସି ତଥ୍ୟ ନାହିଁ । ଶିଶୁଟି କାହାର ଏ ପର୍ଯ୍ୟନ୍ତ କିଛି ସଠିକ୍ ତଥ୍ୟ ମିଳିନାହିଁ । କଣ ପାଇଁ ମହିଳା ଶିଶୁପୁତ୍ରକୁ ଜଣେ ଅଜଣା ମହିଳାକୁ ଦେଇଥିଲେ । ତାହା ତଦନ୍ତ ପରେ ପ୍ରକୃତ ତଥ୍ୟ ଜଣାପଡ଼ିବ ।
ଘଟଣାକୁ ସ୍ଵିକାର କରିଛନ୍ତି ଜିଲ୍ଲା ଶିଶୁ ସୁରକ୍ଷା ଅଧିକାରୀ । ଚାଇଲ୍ଡ ହେଲ୍ପଲାଇନ ଓ ଫୁଲବାଣୀ ଟାଉନ ଥାନା ପୋଲିସ ଶିଶୁପୁତ୍ର ଉଦ୍ଧାର ପରେ ଶିଶୁ ମଙ୍ଗଳ ସମିତିକୁ ହସ୍ତାନ୍ତର କରିଛି । କେଉଁ ପରିସ୍ଥିତିରେ ଶିଶୁ ପୁତ୍ରକୁ ମହିଳା ଜଣଙ୍କ ଅଚିହ୍ନା ମହିଳାଙ୍କୁ ଦେଇଥିଲେ ତାହା ଉପରେ ପଚାର ଉଚରା ଜାରି ରହିଛି । ନାବାଳିକା ଗର୍ଭବତୀ କୁହନ୍ତୁ ବା ନାରୀ ନିର୍ଯାତନା କୁହନ୍ତୁ ଦିନକୁ ଦିନ ଏପରି ଘଟଣା ବଢ଼ିଚାଲିଛି । ଏଭଳି ଘଟଣା ଦେଖିବାକୁ ମିଳିଛି ଜିଲ୍ଲା ମୁଖ୍ୟାଳୟ ଫୁଲବାଣୀର ଦଧିବାବନ୍ ସାହିରେ ।
ଦୀଘା ଜଗନ୍ନାଥ ମନ୍ଦିର ବିବାଦ ପ୍ରସଙ୍ଗ: ପ୍ରତିକ୍ରିୟା ରଖିଲେ ଦଇତାପତି ନିଯୋଗର ସମ୍ପାଦକ ରାମକୃଷ୍ଣ ଦାସ ମହାପାତ୍ର
ପୁରୀ: ପଶ୍ଚିମବଙ୍ଗ ଦୀଘା ଜଗନ୍ନାଥ ମନ୍ଦିର ନାମକରଣ ବିବାଦରେ ମୁହଁ ଖୋଲିଛନ୍ତି ଦଇତାପତି ନିଯୋଗର ସମ୍ପାଦକ ରାମକୃଷ୍ଣ ଦାସ ମହାପାତ୍ର। ସେ କହିଛନ୍ତି, ପୁରୀ ହିଁ ଏକମାତ୍ର ଜଗନ୍ନାଥ ଧାମ। ଅନ୍ୟ ସ୍ଥାନରେ ଜଗନ୍ନାଥ ମନ୍ଦିର ହୋଇପାରିବ। କିନ୍ତୁ ଜଗନ୍ନାଥ ଧାମ କୁହାଯାଇପାରିବ ନାହିଁ। ନାଁ ବିବାଦକୁ ନେଇ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କୁ ଚିଠି ଲେଖିବେ ବୋଲି ସେ କହିଛନ୍ତି।
ଏହା ସହିତ ସେ ସ୍ପଷ୍ଟ କରିଛନ୍ତି, କେବଳ ପୁରୀରେ ଦାରୁବ୍ରହ୍ମଙ୍କର ବ୍ରହ୍ମ ସ୍ଥାପନା ହୁଏ। ଅନ୍ୟ କୌଣସି ସ୍ଥାନରେ ହୁଏ ନାହିଁ। ମହାପ୍ରଭୁଙ୍କ ରୀତି ନୀତିରେ କୌଣସି ତ୍ରୁଟି ବିଚ୍ୟୁତି ହେବାକୁ ଦିଆଯିବ ନାହିଁ ବୋଲି ସେ କହିଛନ୍ତି। ପଶ୍ଚିମବଙ୍ଗ ଦୀଘାରେ କିଛି ଦିନ ତଳେ ଏକ ଭବ୍ୟ ଜଗନ୍ନାଥ ମନ୍ଦିର ନିର୍ମିତ ହୋଇଛି। ଏହାକୁ ଜଗନ୍ନାଥ ଧାମ କୁହାଯିବାକୁ ନେଇ ବିବାଦ ସୃଷ୍ଟି ହୋଇଥିଲା। ପୁୁରୀର ସେବାୟତଙ୍କ ସମେତ ସାରା ରାଜ୍ୟରେ ଏହାକୁ ନେଇ ତୀବ୍ର ପ୍ରତିକ୍ରିୟା ସୃଷ୍ଟି ହୋଇଥିଲା।