ନନ୍ଦିଘୋଷ ବ୍ୟୁରୋ: ବେଧଡ଼କ ଲୁଟ୍ ହେଉଛି ଲଘୁ ଖଣିଜ ସମ୍ପଦ
                         ବାଲିଘାଟରୁ ବାହାର ରାଜ୍ୟକୁ ଚାଲିଛି ଚୋରାଚାଲାଣ
                         ବିଜେଡି କହିଲା ଲୁଟରେ ଶାସକ ଦଳ ସାମିଲ
                         ତଦନ୍ତ ଦାବି କରି ସ୍ବର ମିଳାଇଲା କଂଗ୍ରେସ
                         ଜବାବ ରଖିଲେ ଖଣି ମନ୍ତ୍ରୀ
ଲୁଟ୍ ହେଉଛି ଖଣିଜ ସମ୍ପଦ, ଚୁପ ବସିଛନ୍ତି ସରକାର। ଲଘୁ ଖଣିଜ ସମ୍ପଦ ଲୁଟକୁ ନେଇ କମ୍ପିଲା ବିଧାନସଭା। ବାଲି ଲୁଟ ପ୍ରସଙ୍ଗକୁ ନେଇ ଶୂନ୍ୟକାଳରେ ରାଜ୍ୟ ସରକାରଙ୍କୁ ଘେରିଥିଲେ ବିଜେଡି ବିଧାୟକ। ରତ୍ନଗର୍ଭା ଓଡ଼ିଶାକୁ ଲୁଟ ଚାଲିଛି, ସାମିଲ ଅଛନ୍ତି ଶାସକ ଦଳର ସଦସ୍ୟ। ସରକାର ଖଣି ଲୁଟକୁ ସ୍ବୀକାର କରିବେ କି ବୋଲି ପ୍ରଶ୍ନ କରିଥିଲେ ଗଣେଶ୍ବର ବେହେରା। ଦୁର୍ନୀତିରେ ସରକାର ଶୂନ୍ୟ ସହନଶୀଳତା ବଦଳରେ ଆପଣାଇଛନ୍ତି ପୂର୍ଣ୍ଣ ସହନଶୀଳତା ନୀତି । ଲୁଟକୁ ରୋକିବା ପାଇଁ ତୁରନ୍ତ ଟାସ୍କଫୋର୍ସ ଗଠନ ସାଙ୍ଗକୁ ଗୃହରେ ବିଭାଗୀୟ ମନ୍ତ୍ରୀ ଉତ୍ତର ରଖନ୍ତୁ ବୋଲି ଦାବି କରିଛନ୍ତି ଗଣେଶ୍ବର । ସେହିପରି ବାଲି ଚୋରିକୁ କିଏ ରୋକିବ ବୋଲି କହିଥିଲେ ବରିଷ୍ଠ ବିଜେଡି ବିଧାୟକ ରଣେନ୍ଦ୍ର ପ୍ରତାପ ସ୍ବାଇଁ । ବିଭିନ୍ନ ରାଜ୍ୟକୁ ଚୋରାଚାଲାଣ ହେଉଛି ବାଲି। ପୂର୍ବରୁ ତହସିଲଦାରଙ୍କ ଅଧିନରେ ଥିଲା ବାଲି ଘାଟ। ହେଲେ ଏହାକୁ ଖଣି ବିଭାଗ ଅଧିନକୁ ଅଣାଯିବା ପରେ ରୋକା ଯାଇପାରୁନି ଚୋରାଚାଲାଣ। ଅନ୍ୟପଟେ ସୀମାରେ ରହିଛି ଢ଼ିଲା ସୁରକ୍ଷା ବ୍ୟବସ୍ଥା। ତେଣୁ ସରକାରଙ୍କ ଜାଣତରେ ସବୁ କିଛି ହେଉଛି ବୋଲି ଅଭିଯୋଗ କରିଛି ବିଜେଡି।

ରାଜ୍ୟରେ ୮ ମାସର ବିଜେପି ସରକାରରେ ଲଘୁ ଖଣିଜ ସମ୍ପଦ ଲୁଟକୁ ନେଇ ଉଠିଲା ପଡ଼ିଲା ଶୂନ୍ୟକାଳ। କିପରି ହେଉଛି ବାଲି ଚୋରା ଚାଲାଣ, ତାର ଅନୁଧ୍ୟାନ କରିଥିଲା ବିଧାନସଭା କମିଟି। ହେଲେ ଆଶ୍ଚର୍ଯ୍ୟର କଥା, ବିଧାନସଭା କମିଟି ସହ ବୁଲୁଛନ୍ତି ବାଲି ମାଫିଆ। ତେଣୁ ବାଲି ଚୋରି ରୋକିବାକୁ ଦାବି କରିଛନ୍ତି ବିଜେଡି ଓ କଂଗ୍ରେସ। ଅନ୍ୟପଟେ ସଫେଇ ଦେଇ ଖଣି ମନ୍ତ୍ରୀ କହିଛନ୍ତି ଯେ, ଚୋରା ଚାଲାଣ ରୋକିବାକୁ ପଦକ୍ଷେପ ନେଉଛନ୍ତି ସରକାର।

ରାଜ୍ୟରେ ଲଘୁ ଖଣିଜ ପଦାର୍ଥ ହରିଲୁଟ ନେଇ ବିଧାନସଭା ଭିତରେ ଓ ବାହାରେ ପ୍ରସଙ୍ଗ ଉଠାଇ ସରକାରଙ୍କୁ ଘେରିଛନ୍ତି ବିରୋଧୀ । ବାଲି ଚୋରା ଚାଲାଣ ସୀମା ଟପିଥିବା ବେଳେ, କେବେ ଭାଙ୍ଗିବ ସରକାରଙ୍କ ନିଦ ତାକୁ ନେଇ ଉଠିଛି ପ୍ରଶ୍ନ।

ନନ୍ଦିଘୋଷ ବ୍ୟୁରୋ:  ଖରା ଦିନେ ରାଜ୍ୟର ବୃହତ ପାନୀୟ ଜଳ ପ୍ରକଳ୍ପ କାମ ସାରିବାର ଆବଶ୍ୟକତା ରହିଛି । ହେଲେ ଏ ଯାଏଁ ଏହା ସରିନଥିବା ନେଇ ପ୍ରଶ୍ନୋତ୍ତର କାଳରେ ପ୍ରଶ୍ନ କରିଛନ୍ତି ବିଜେଡି ବିଧାୟକ ରମେଶ ବେହେରା । କାମ ମନ୍ଥର ଗତିରେ ହେଉଥିବା ନେଇ ଅଭିଯୋଗ କରି ସେ ସମୟସୀମା ବୃଦ୍ଧି କେବେ ଯାଏଁ ହୋଇଛି ବୋଲି ପ୍ରଶ୍ନ କରିଥିଲେ । ଉତ୍ତରରେ ପଂଚାୟତିରାଜ ମନ୍ତ୍ରୀ ରବି ନାୟକ କହିଥିଲେ, ଯେଉଁଠି ପ୍ରକଳ୍ପ କାମ ସରିନି, ସେଠି ସୌର ଚାଳିତ ବ୍ୟବସ୍ଥା, ନୂଆ ନଳକୂପ, ନଳକୂପ ମରାମତି, ପାଣି ଟ୍ୟାଙ୍କର, ଜିଲ୍ଲା ପରିମଳ ମିଶନ ପାଣ୍ଠି, ବସୁଧା ପାଣ୍ଠି ଓ ଟ୍ୟୁବୱେଲ ଯୋଗେ ପାଣି ମିଳୁଛି । କିନ୍ତୁ ଏହା ଉଦବେଗଜନକ । ତେବେ ଯାହା ସହ ଚୁକ୍ତି ହୋଇଥିଲା ସେମାନଙ୍କର ନୂଆ ସରକାର ସମୟରେ ସମୟସୀମା ସରିଥିଲା । ସେମାନଙ୍କୁ ଫାଇନ ପକାଯାଇଛି । ଆସନ୍ତା ୭ ଦିନ ଭିତରେ ସେମାନଙ୍କୁ ଡକାଯାଇ ତାଗିଦ କରାଯିବ । ଯଦି କାମ ନ କରନ୍ତି, ତେବେ କଳା ତାଲିକାଭୁକ୍ତ ହେବେ । ଧିମା କାମ ନେଇ କାର୍ଯ୍ୟାନୁଷ୍ଠାନ ନିଆଯିବ । ମାର୍ଚ୍ଚ ସୁଦ୍ଧା କାମ ସରିବାର ଥିଲା । ଏବେ ଯାଏଁ ୭୨ ରୁ ୫୨ ପ୍ରକଳ୍ପ ସରିଛି । ବାକି କାମ ଚଳିତ ଜୁନ ସୁଦ୍ଧା ସରିବ । ଏହା ପରେ ଆଉ ୪୦ ପ୍ରକଳ୍ପ କାମ ଡିସେମ୍ବର ୨୦୨୬ ସୁଦ୍ଧା ସରିବ । କାମର ସମୟସୀମା ଆଉ ବୃଦ୍ଧି ହେବନି । ଏତଲା ପଂଚାୟତିରାଜ ବିଭାଗ କରିବ ବୋଲି ଗୃହକୁ ଜଣାଇଛନ୍ତି ପଞ୍ଚାୟତିରାଜ ମନ୍ତ୍ରୀ ରବି ନାୟକ ।

ନନ୍ଦିଘୋଷ ବ୍ୟୁରୋ: ପୁଣି ପ୍ରଶ୍ନପତ୍ର ଲିକ । ପଦାରେ ପଡିଲା ବିଦ୍ୟାଳୟ ଓ ଗଣଶିକ୍ଷା ବିଭାଗର ଅପାରଗତା । ସୋସିଆଲ ମିଡ଼ିଆରେ ଘୁରି ବୁଲୁଛି ପ୍ରାଥମିକ ଓ ଉଚ୍ଚ ପ୍ରାଥମିକ ବିଦ୍ୟାଳୟର ବାର୍ଷିକ ପରୀକ୍ଷା ପ୍ରଶ୍ନପତ୍ର । ପରୀକ୍ଷାର 2ରୁ 3 ଦିନ ପୂର୍ବରୁ ୟୁଟ୍ୟୁବରେ ଅପଲୋଡ଼ ହେଉଛି ପ୍ରଶ୍ନ ପତ୍ର ସହିତ ଉତ୍ତର। ଯାହାକୁ ନେଇ ପୁଣି ରାଜ୍ୟ ବିଦ୍ୟାଳୟ ଗଣଶିକ୍ଷା ବିଭାଗର ଅପାରଗତା ପଦାରେ ପଡିଛି । ଭଦ୍ରକ ଜିଲ୍ଲାରେ ପ୍ରାଥମିକ ଓ ଉଚ୍ଚ ପ୍ରାଥମିକ ବିଦ୍ୟାଳୟ ର ବାର୍ଷିକ ପରୀକ୍ଷା ପୂର୍ବରୁ ପ୍ରଶ୍ନପତ୍ର ଓ ତାର ଉତ୍ତର 2 ରୁ 3 ଦିନ ପୂର୍ବରୁ ଆସି ଯାଉଛି ୟୁଟ୍ୟୁବ ଚ୍ୟାନେଲରେ । ଯାହା ଉଭୟ ଛାତ୍ରଛାତ୍ରୀ ଏବଂ ଶିକ୍ଷକ ଶିକ୍ଷୟିତ୍ରୀ ଓ ଅବିଭାବକଙ୍କୁ ଆଶ୍ଚର୍ଯ୍ୟ କରିଛି। ଛାତ୍ରଛାତ୍ରୀ ମାନେ ବର୍ଷ ତମାମ ଯାହା ପଢ଼ନ୍ତି ତାର ଉତ୍କର୍ଷତା ଦେଖାଇବା ପାଇଁ ବାର୍ଷିକ ପରୀକ୍ଷା କରାଯାଇଥାଏ। ସେଥିପାଇଁ ଛାତ୍ରଛାତ୍ରୀ ମାନେ ପରୀକ୍ଷା ପୂର୍ବରୁ ପ୍ରସ୍ତୁତ ହୋଇ ରହିଥାନ୍ତି। ତେବେ ଚଳିତ ବର୍ଷ ପିଲା ମାନଙ୍କୁ ଆଉ ପରିଶ୍ରମ କରିବାକୁ ପଡୁ ନାହିଁ । ଆଜିର ପରୀକ୍ଷାର ଉତ୍ତର ଗତ କାଲି ଠାରୁ ଗୋଟିଏ ନିର୍ଧିଷ୍ଟ ୟୁଟ୍ୟୁବ ଚ୍ୟାନେଲରେ ଆସି ଯାଉଛି । ଆଉ ପିଲା ତାହା ଦେଖି ଓ ଲେଖି ପରୀକ୍ଷା କେନ୍ଦ୍ର କୁ ଆସି ପରୀକ୍ଷା ସମୟ ଶେଷ ହେବା ପୂର୍ବରୁ ଉତ୍ତର ଲେଖି ପଳାଇ ଯାଉଛନ୍ତି।ଏମିତି ଘଟଣା ଗତ ତିନି ଦିନ ହେବ ଦେଖା ଯାଉ ଥିଲେ ମଧ୍ୟ କେହି ଏଥିପ୍ରତି ଦୃଷ୍ଟି ଦେଉ ନାହାନ୍ତି। ଆଜି ସପ୍ତମ ଶ୍ରେଣୀର ଗଣିତ ପରୀକ୍ଷା ଥିଲା। ଯାହା ପ୍ରଶ୍ନ ପଡିଥିଲା ତାର ଉତ୍ତର ଗତ 3 ଦିନ ପୂର୍ବରୁ ନଲେଜ୍ ଓ୍ବିଥ୍ ନିଲୁ ନାମକ ୟୁଟ୍ୟୁବ ଚ୍ୟାନେଲରେ ଆସିଥିଲା । ଯାହାକୁ ନେଇ ଅବିଭାବକଙ୍କ ମହଲରେ ଅସନ୍ତୋଷ ଦେଖାଦେଇଛି। ତେବେ ଏହି ପ୍ରଶ୍ନପତ୍ର ପରୀକ୍ଷାର ତିନି ଦିନ ପୂର୍ବରୁ ସଂପୃକ୍ତ ଚ୍ୟାନେଲ ହାତକୁ ଗଲା ତାହା ଏବେ ବଡ଼ ପ୍ରଶ୍ନ ପାଲଟିଛି।

ଯଦି ପ୍ରଶ୍ନ ପତ୍ର ଲିକ କରିବାର ଥିଲା ତେବେ ରାଜ୍ୟ ବିଦ୍ୟାଳୟ ଓ ଗଣ ଶିକ୍ଷା ବିଭାଗ କାହିଁକି ପରୀକ୍ଷା କରାଉଛି ତାହା ମଧ୍ୟ ପ୍ରଶ୍ନ ଉଠିଛି । କେବଳ ଅଙ୍କ ନୁହଁ ଆଗାମୀ ଦିନରେ ଥିବା ପ୍ରଥମରୁ ଅଷ୍ଟମ ଶ୍ରେଣୀ ପର୍ଯ୍ୟନ୍ତ ପରୀକ୍ଷା ପ୍ରଶ୍ନ ୟୁଟ୍ୟୁବ ଚାନେଲରେ ଅପଲୋଡ଼ ହୋଇଥିବା ବେଳେ ତାହା ବି ଚଳିତ ବର୍ଷର ପ୍ରଶ୍ନପତ୍ର ନୁହଁ ତ ବୋଲି ପ୍ରଶ୍ନ ଉଠିଛି । ଯାହାକୁ ନେଇ ରାଜ୍ୟ ସରକାର ତୁରନ୍ତ ଦୃଢ଼ ପଦକ୍ଷେପ ନେବାକୁ ଅବିଭାବକ ମହଲରେ ଦାବି ହୋଇଛି। ଅନ୍ୟପଟେ ଘଟଣା ସଂପର୍କରେ ଭଦ୍ରକ ଜିଲ୍ଲା ଶିକ୍ଷା ଅଧିକାରୀଙ୍କୁ ଘଟଣା ସଂପର୍କରେ ଅବଗତ କରାଯିବା ପରେ କ୍ୟାମେରା ଆଗରେ କିଛି ପ୍ରତିକ୍ରିୟା ଦେଇନାଥିଲେ ମଧ୍ୟ ଘଟଣା ସଂପର୍କରେ ଯାଞ୍ଚ କରାଯିବାର ପ୍ରତିଶୃତି ଦେଇଛନ୍ତି।