spot_img

Latest Posts

ଆସିଆନ୍ ସମ୍ମିଳନୀରେ ଯୋଗଦେବେ ମୋଦି, ଫିଲିପାଇନ୍ସରେ ଭବ୍ୟ ସ୍ୱାଗତ

ନନ୍ଦିଘୋଷ ବ୍ୟୁରୋ: ଆଜି ଆସିଆନ୍ ସମ୍ମିଳନୀରେ ଯୋଗ ଦେବେ ପ୍ରଧାନମନ୍ତ୍ରୀ ମୋଦି। ସେଥିପାଇଁ ସେ ଫିଲିପାଇନ୍ସ ଗସ୍ତରେ ଅଛନ୍ତି। ରାଜଧାନୀ ମାନିଲାରେ ଆୟୋଜିତ ଏକ ଭବ୍ୟ ରାତ୍ରିଭୋଜିରେ ଗତକାଲି ସେ ଯୋଗଦେଇଥିଲେ। ଆସିଆନ୍ ଶିଖର ସମ୍ମିଳନୀ ଓ ଅନ୍ୟାନ୍ୟ ବୈଠକରେ ଯୋଗଦେବାକୁ ଆସିଥିବା ବିଶ୍ୱ ନେତା ଓ ବିଶିଷ୍ଟ ଅତିଥିଙ୍କ ସମ୍ମାନରେ ଫିଲିପାଇନ୍ସ ରାଷ୍ଟ୍ରପତି ଫର୍ଡିନାଣ୍ଡ ଆର୍. ମାର୍କୋସ୍ ଜୁନିୟର ଏହି ରାତ୍ରିଭୋଜିର ଆୟୋଜନ କରିଥିଲେ। ମାନିଲାର ଫିଲିପାଇନ୍ସ ଇଣ୍ଟରନ୍ୟାସନାଲ କନଭେନସନ୍ ସେଣ୍ଟରରେ ଏହି କାର୍ଯ୍ୟକ୍ରମ ହୋଇଥିଲା। ଆଜି ହେବାକୁ ଥିବା ୨୩ତମ ଆସିଆନ୍-ଭାରତ ଶିଖର ସମ୍ମିଳନୀ ଏବଂ ୨୧ତମ ପୂର୍ବ ଏସିଆ ଶିଖର ସମ୍ମିଳନୀରେ ଯୋଗଦେବା ପାଇଁ ମୋଦୀ ମାନିଲା ଯାଇଛନ୍ତି। ଏଥିପାଇଁ ଫିଲିପାଇନ୍ସ ରାଷ୍ଟ୍ରପତି ମାର୍କୋସ ନିମନ୍ତ୍ରଣ କରିଥିଲେ।

ବିମାନବନ୍ଦରରେ ଫିଲିପାଇନ୍ସର ସୂଚନା ଓ ଯୋଗାଯୋଗ ପ୍ରଯୁକ୍ତି ବିଭାଗର ସଚିବ ରବର୍ଟ ଜୋସେଫ୍ ‘ଜେ’ ମୋଣ୍ଟେସ୍ ଡି କ୍ଲାରୋ ତାଙ୍କୁ ସ୍ୱାଗତ କରିଥିଲେ। ହୋଟେଲରେ ପହଞ୍ଚିବା ପରେ ଭାରତୀୟ ସମୁଦାୟ ପକ୍ଷରୁ ତାଙ୍କୁ ଭବ୍ୟ ସ୍ୱାଗତ କରାଯାଇଥିଲା। ମୋଦୀଙ୍କ ଗସ୍ତର ମୁଖ୍ୟ ଲକ୍ଷ୍ୟ ହେଲା ଆସିଆନ୍ ଦେଶଗୁଡ଼ିକ ସହ ଭାରତର ସମ୍ପର୍କକୁ ଆହୁରି ମଜଭୁତ କରିବା। ଏହା ‘ଆକ୍ଟ ଇଷ୍ଟ ପଲିସି’ର ମୁଖ୍ୟ ଆଧାର। ବାଣିଜ୍ୟ, ଯୋଗାଯୋଗ, ସାମୁଦ୍ରିକ ସୁରକ୍ଷା, ପ୍ରଯୁକ୍ତିବିଦ୍ୟା ଓ ଲୋକଙ୍କ ମଧ୍ୟରେ ସମ୍ପର୍କ ଦ୍ୱାରା ଏହି ସହଭାଗିତା ଆହୁରି ମଜଭୁତ କରାଯିବ। ସମସ୍ତ ନେତାଙ୍କ ସହ ମିଶି ଭାରତ-ଆସିଆନ୍ ବ୍ୟାପକ ରଣନୈତିକ ସହଭାଗିତାକୁ ଆଗକୁ ବଢ଼ାଇବା ସହ ଇଣ୍ଡୋ-ପାସିଫିକ୍ ଅଞ୍ଚଳରେ ଶାନ୍ତି, ସ୍ଥିରତା ଓ ସହଯୋଗ ବୃଦ୍ଧି ପାଇଁ ଆଲୋଚନା କରିବାକୁ ସେ ଆଶା ପ୍ରକାଶ କରିଛନ୍ତି।

Latest Posts

Don't Miss