spot_img

Latest Posts

ରାମାୟଣ ବକ୍ସ ଅଫିସରେ ରେକର୍ଡ ବର୍ଷା , ୧୬୦୦ କୋଟିରୁ ମାତ୍ର ୨୫ କୋଟି ଦୂରରେ ଫିଲ୍ମ

ନନ୍ଦିଘୋଷ ବ୍ୟୁରୋ : ରଣବୀର କପୁର ଓ ୟଶଙ୍କ ଅଭିନୀତ ଫିଲ୍ମ ‘ରାମାୟଣ’ ବକ୍ସ ଅଫିସ୍‌ରେ ନିଜର ଦବଦବା ଜାରି ରଖିଛି। ରିଲିଜ୍‌କୁ ୧୬ ଦିନ ବିତିଥିବା ବେଳେ ଫିଲ୍ମଟି ବିଶ୍ୱବ୍ୟାପୀ ବକ୍ସ ଅଫିସ୍‌ରେ ବଡ଼ ସଫଳତା ହାସଲ କରିଛି। ତେବେ ତୃତୀୟ ସପ୍ତାହରେ ଫିଲ୍ମର ଆୟରେ କିଛିଟା ହ୍ରାସ ଦେଖିବାକୁ ମିଳିଛି।

ରିଲିଜ୍‌ର ୧୬ତମ ଦିନ ଅର୍ଥାତ୍ ତୃତୀୟ ଶୁକ୍ରବାରରେ ଫିଲ୍ମଟି ଭାରତରେ ୧୬.୩୦ କୋଟି ଟଙ୍କାର ନେଟ୍ କଲେକ୍ସନ କରିଛି। ଗୁରୁବାର ତୁଳନାରେ ଏହାର ଆୟରେ ୧୫.୮ ପ୍ରତିଶତ ହ୍ରାସ ହୋଇଛି।

ଭାରତରେ ଫିଲ୍ମର ମୋଟ ନେଟ୍ କଲେକ୍ସନ ୮୮୦.୦୫ କୋଟି ଟଙ୍କାରେ ପହଞ୍ଚିଛି। ପ୍ରଥମ ସପ୍ତାହରେ ୫୬୪.୬୦ କୋଟି ଏବଂ ଦ୍ୱିତୀୟ ସପ୍ତାହରେ ୨୯୯.୧୫ କୋଟି ଟଙ୍କା ଆୟ କରିଥିଲା ଫିଲ୍ମ। ସେହିପରି ବିଦେଶରେ ପ୍ରାୟ ୫୨୩ କୋଟି ଟଙ୍କା ଆୟ ସହ ଏହାର ବିଶ୍ୱବ୍ୟାପୀ କଲେକ୍ସନ ୧୫୭୪.୬୦ କୋଟି ଟଙ୍କା ଅତିକ୍ରମ କରିଛି।

ଫିଲ୍ମର VFX ଏବଂ କଳାକାରଙ୍କ ଦମଦାର ଅଭିନୟ ଦର୍ଶକଙ୍କୁ ବେଶ୍ ଆକର୍ଷିତ କରିଛି। ରଣବୀର କପୁର, ସାଇ ପଲ୍ଲବୀ ଓ ୟଶଙ୍କ ଅଭିନୟକୁ ଦର୍ଶକଙ୍କ ସହ ସମାଲୋଚକମାନେ ମଧ୍ୟ ପ୍ରଶଂସା କରିଛନ୍ତି।

ଭାଷା ଅନୁସାରେ ଫିଲ୍ମର ଆୟକୁ ଦେଖିଲେ, ୧୬ତମ ଦିନରେ ହିନ୍ଦୀ ସଂସ୍କରଣ ସର୍ବାଧିକ ୧୨ କୋଟି ଟଙ୍କା ଆୟ କରିଛି। ମାଲାୟଲମ୍ ସଂସ୍କରଣରୁ ୧.୭୫ କୋଟି, ତାମିଲରୁ ୧.୧୦ କୋଟି ଏବଂ କନ୍ନଡ ସଂସ୍କରଣରୁ ୧ କୋଟି ଟଙ୍କା ଆୟ ହୋଇଛି।

ଏବେ ସମସ୍ତଙ୍କ ନଜର ଫିଲ୍ମର ୧୬୦୦ କୋଟି ଟଙ୍କାର ମାଇଲଖୁଣ୍ଟ ଉପରେ ରହିଛି। ବିଶ୍ୱବ୍ୟାପୀ ମୋଟ ୧୫୭୪.୬୦ କୋଟି ଟଙ୍କା ଆୟ କରିଥିବାରୁ ଏହି ରେକର୍ଡ ଛୁଇଁବାକୁ ଆଉ ମାତ୍ର ୨୫.୪୦ କୋଟି ଟଙ୍କା ଆବଶ୍ୟକ। ତୃତୀୟ ସପ୍ତାହାନ୍ତରେ ଏହି ଲକ୍ଷ୍ୟ ପୂରଣ ହେବ ବୋଲି ଆଶା କରାଯାଉଛି।

ତୃତୀୟ ସପ୍ତାହର ପ୍ରଥମ ଦିନରେ ଆୟ କମିଥିଲେ ମଧ୍ୟ ଶନିବାର ଓ ରବିବାର ଛୁଟିଦିନରେ ଦର୍ଶକଙ୍କ ଭିଡ଼ ବଢ଼ିବା ନେଇ ଆଶା ରହିଛି। ତେବେ ଏହି ସପ୍ତାହରେ ‘ରାମାୟଣ’ ୧୬୦୦ କୋଟିର ମ୍ୟାଜିକ୍ ନମ୍ବର ଛୁଇଁପାରୁଛି କି ନାହିଁ, ତାହା ଦେଖିବାକୁ ବାକି ରହିଲା।

Latest Posts

Don't Miss