ଭୁବନେଶ୍ୱର: ଆସି ପହଞ୍ଚିଛି ଆଶ୍ଵିନ। ନଦୀ ପଠାରେ ଆନମନା ହୋଇ ନାଚିଲାଣି କାଶତଣ୍ଡି। ପବନର ହାଲୁକା ହାଲୁକା ସ୍ପର୍ଶରେ ଖିଲ ଖିଲ ହୋଇ ହସୁଛି। ଧଳା ପୋଷାକ ପରିଧାନ କରି ମା’ ଦୁର୍ଗାଙ୍କୁ ସ୍ବାଗତ ପାଇଁ ଅନାଇ ବସିଛି। ବାସ୍ନା ନଥିଲେ ବି ନିଜ ରୂପରେ ସମସ୍ତଙ୍କୁ ଆକର୍ଷିତ କରୁଛି କାଶତଣ୍ଡି। କେବଳ କାଶତଣ୍ଡି ନୁହଁ ମା’ଙ୍କ ଆଗମନ ପାଇଁ ତତ୍ପର ହୋଇଉଠିଛି ପ୍ରକୃତି।
ସେପଟେ ମା’ଙ୍କ ପୂଜା ପାଇଁ ଏବେଠୁ ଆରମ୍ଭ ହୋଇଗଲାଣି ପ୍ରସ୍ତୁତି। ମୂର୍ତ୍ତି ନିର୍ମାଣ ଶେଷ ପର୍ଯ୍ୟାୟରେ ପହଞ୍ଚିଥିବା ବେଳେ ରଙ୍ଗକାମ ବାକି ରହିଛି। ବିଭିନ୍ନ ସୁଉଚ୍ଚ ତୋରଣ ମଧ୍ୟ ନିର୍ମାଣରେ ଲାଗିପଡିଛନ୍ତି କାରିଗର।
