ନନ୍ଦିଘାେଷବ୍ୟୁରୋ: କୋଲକାତାର ନେତାଜୀ ସୁଭାଷ ଚନ୍ଦ୍ର ବୋଷ ଅନ୍ତର୍ଜାତୀୟ ବିମାନବନ୍ଦରରେ ବୁଧବାର ଅର୍ଥାତ ଆଜି ସକାଳେ ହାଇଜାକ୍ ଧମକକୁ ନେଇ ଆତଙ୍କ ଖେଳିଯାଇଛି । ମୁମ୍ବାଇ ଅଭିମୁଖେ ଯାତ୍ରା କରିବାକୁ ଥିବା ଏକ ଏୟାର ଇଣ୍ଡିଆ ବିମାନକୁ ହାଇଜାକ୍ କରିବା ନେଇ ଧମକ ମିଳିବା ପରେ ବିମାନବନ୍ଦରରେ ସୁରକ୍ଷା ବ୍ୟବସ୍ଥା କଡ଼ାକଡ଼ି କରାଯାଇଛି ।
ତେବେ ସୂଚନା ଅନୁଯାୟୀ, ବିମାନର ଶୌଚାଳୟରେ ଥିବା ଦର୍ପଣ ଉପରେ ହାଇଜାକ୍ ସମ୍ପର୍କିତ ଏକ ଧମକପୂର୍ଣ୍ଣ ବାର୍ତ୍ତା ଲେଖାଯାଇଥିବା ଦେଖିବାକୁ ମିଳିଥିଲା । ବିମାନଟି ଉଡ଼ାଣ ପାଇଁ ପ୍ରସ୍ତୁତ ହେଉଥିବା ସମୟରେ ଏହି ଧମକପୂର୍ଣ୍ଣ ବାର୍ତ୍ତା ନଜରକୁ ଆସିଥିଲା । ଏହା ଦେଖିବା ପରେ ପାଇଲଟ୍ ତୁରନ୍ତ ଏୟାର ଟ୍ରାଫିକ୍ କଣ୍ଟ୍ରୋଲ୍ କୁ ଘଟଣା ସମ୍ପର୍କରେ ସୂଚନା ଦେଇଥିଲେ । ଯାହାପରେ ତୁରନ୍ତ ବିମାନଟିକୁ ମୁଖ୍ୟ ରନୱେରୁ ହଟାଇ ଏକ ନିର୍ଦ୍ଦିଷ୍ଟ ଆଇସୋଲେସନ୍ ବେ’କୁ ନିଆଯାଇଥିଲା । ସେଠାରେ କେନ୍ଦ୍ରୀୟ ଶିଳ୍ପ ସୁରକ୍ଷା ବଳ (CISF) ଏବଂ ବିମାନବନ୍ଦରର ସ୍ୱତନ୍ତ୍ର ସୁରକ୍ଷା କର୍ମଚାରୀମାନେ ତନ୍ନତନ୍ନ କରି ଯାଞ୍ଚ ଆରମ୍ଭ କରିଛନ୍ତି । ବିମାନର ପ୍ରତ୍ୟେକ ଅଂଶକୁ ଯାଞ୍ଚ କରାଯିବା ସହ କୌଣସି ସନ୍ଦିଗ୍ଧ ବସ୍ତୁ ରହିଛି କି ନାହିଁ, ସେନେଇ ଖୋଳତାଡ଼ ଚାଲିଛି ।
ତେବେ ଅନ୍ୟପଟେ ଏହି ଧମକପୂର୍ଣ୍ଣ ବାର୍ତ୍ତା କିଏ ଲେଖିଥିଲେ ଏବଂ ଏହା ପଛରେ କାହାର ହାତ ରହିଛି, ତାହା ଜାଣିବା ପାଇଁ ପୋଲିସ ଓ ବିଭିନ୍ନ ସୁରକ୍ଷା ଏଜେନ୍ସି ପକ୍ଷରୁ ତଦନ୍ତ ଆରମ୍ଭ ହୋଇଛି । ବିମାନରେ ଥିବା ଯାତ୍ରୀ, କର୍ମଚାରୀ ଏବଂ ଅନ୍ୟ ସମ୍ପୃକ୍ତ ବ୍ୟକ୍ତିଙ୍କ ସରମ୍ପର୍କରେ ମଧ୍ୟ ଆବଶ୍ୟକ ତଥ୍ୟ ଯାଞ୍ଚ କରାଯାଉଛି । ତେବେ ଯାଞ୍ଚ ପରେ ହିଁ ଏହି ଧମକର ପ୍ରକୃତ କାରଣ ଓ ଏହା ପଛରେ ଥିବା ବ୍ୟକ୍ତିଙ୍କ ସମ୍ପର୍କରେ ସ୍ପଷ୍ଟ ସୂଚନା ମିଳିବ ।
