ନନ୍ଦିଘୋଷ ବ୍ୟୁରୋ: ଗଞ୍ଜାମ ଜିଲ୍ଲାରେ ହୋଇଥିବା ପ୍ରବଳ ବର୍ଷା ଓ ବନ୍ୟା ସ୍ଥିତି ନେଇ ଉଠିଥିବା ବିଭିନ୍ନ ପ୍ରଶ୍ନର ସ୍ପଷ୍ଟୀକରଣ ରଖିଛନ୍ତି ମୁଖ୍ୟ ଶାସନ ସଚିବ ଅନୁ ଗର୍ଗ। SRC କାର୍ଯ୍ୟାଳୟରେ ଏକ ସମୀକ୍ଷା ବୈଠକ ପରେ ସାମ୍ବାଦିକ ସମ୍ମିଳନୀକୁ ସମ୍ବୋଧନ କରିଥିଲେ ମୁଖ୍ୟ ଶାସନ ସଚିବ । ଏନେଇ ସେ କହିଛନ୍ତି ପାତ୍ରପୁରରେ ଗୋଟିଏ ଦିନରେ ୫୪୬ ମିଲିମିଟର ଓ କ୍ରମାଗତ ତିନି ଦିନ ଧରି ଅତ୍ୟଧିକ ବର୍ଷା ହୋଇଥିଲା। ଯାହାକି, ୨୦୧୩ ମସିହାର ବାତ୍ୟା ବର୍ଷାର ରେକର୍ଡକୁ ମଧ୍ୟ ଟପି ଯାଇଥିଲା।
ଜଳଭଣ୍ଡାର ଓ ଡ୍ୟାମ୍ ପରିଚାଳନା ନେଇ ସ୍ପଷ୍ଟ କରାଯାଇଛି ଯେ, କ୍ୟାଚମେଣ୍ଟ ଏରିଆର ମାତ୍ର ୧୦ ପ୍ରତିଶତ ପାଣି ଡ୍ୟାମ୍କୁ ଯାଇଥିବାବେଳେ ବାକି ୯୦ ପ୍ରତିଶତ ପାଣି ସିଧା ନଦୀ ଗୁଡ଼ିକ ଦେଇ ପ୍ରବାହିତ ହୋଇଥିଲା। ଡ୍ୟାମ୍ ସୁରକ୍ଷାକୁ ସର୍ବୋଚ୍ଚ ପ୍ରାଥମିକତା ଦେଇ ପ୍ରୋଟୋକଲ୍ ଅନୁଯାୟୀ ପର୍ଯ୍ୟାୟ କ୍ରମେ ଗେଟ୍ ଗୁଡ଼ିକ ଖୋଲାଯାଇଥିଲା। ଏହି ପ୍ରାକୃତିକ ବିପର୍ଯ୍ୟୟରେ କୌଣସି ଜୀବନହାନୀ ଘଟି ନଥିବାବେଳେ, ପ୍ରଭାବିତ ଅଞ୍ଚଳରେ ବିଜୁଳି ସରବରାହ, ପାନୀୟ ଜଳ ଓ ନଷ୍ଟ ହୋଇଥିବା ଭିତ୍ତିଭୂମିକୁ ଯୁଦ୍ଧକାଳୀନ ଭିତ୍ତିରେ ପୁନରୁଦ୍ଧାର କରାଯାଇଛି। ଲୋକଙ୍କୁ ସମ୍ଭାବ୍ୟ ସମସ୍ତ ସହାୟତା ଓ ରିଲିଫ୍ ଯୋଗାଇଦେବା ପାଇଁ ପ୍ରଶାସନ ପକ୍ଷରୁ ସ୍ୱତନ୍ତ୍ର ପଦକ୍ଷେପ ଜାରି ରହିଛି।
