ନନ୍ଦିଘୋଷ ବ୍ୟୁରୋ: ଆନନ୍ଦପୁର ଅଞ୍ଚଳରେ ସ୍ପର୍ଶକାତର ଦୃଶ୍ୟ। ଆପଣାର ମଣିଷକୁ ହରାଇ ଶବକୁ ଜାବୁଡି ଧରି କାନ୍ଦୁଛି ମାଙ୍କଡ଼। ଏହି ହୃଦୟ ବିଦାରକ ଦୃଶ୍ୟ ହେଉଛି ଆନନ୍ଦପୁର ଉପଖଣ୍ଡ ଚିକିତ୍ସାଳୟର । ସୂଚନା ଅନୁଯାୟୀ ସୋସୋ ଥାନା ଢେଙ୍କା ଗ୍ରାମର ଠୁଳୁକୁ ରାମ ସୋରେନ ଅସୁସ୍ଥ ହୋଇଥିଲେ । ପରିବାର ଲୋକେ ତାଙ୍କୁ ଚିକିତ୍ସା ପାଇଁ ଆନନ୍ଦପୁର ଉପଖଣ୍ଡ ଚିକିତ୍ସାଳୟରେ ଭର୍ତ୍ତି କରିଥିଲେ। ଡାକ୍ତର ସେଠାରେ ତାଙ୍କୁ ମୃତ ଘୋଷଣା କରିଥିଲେ। ଠୁଳୁକୁଙ୍କ ଶବ ପାଖରେ ପରିବାର ଲୋକ ଜଗି ରହିଥିଲେ ଶବ ବ୍ୟବଚ୍ଛେଦ ପାଇଁ। ଅନ୍ୟପଟେ ଘସିପୁରା ଝାଡ଼େଶ୍ୱର ମନ୍ଦିର ନିକଟରେ ଦେଖା ଦେଇଥିଲା ଏକ ମାଙ୍କଡ଼। ଲାଗୁଥିଲା ସିଏ ଯେମିତି କାହାକୁ ଖୋଜୁଛି। ବାଟରେ ଯାଉଥିବା ଲୋକଙ୍କ ଗୋଡ଼ ଧରି ଅନୁରୋଧ କରୁଥିଲା ତାକୁ ନେଇଯିବାକୁ। ଏହି ସମୟରେ ଏକ ଆମ୍ବୁଲାନ୍ସକୁ ଦେଖି ଆମ୍ବୁଲାନ୍ସ ନିକଟକୁ ଆସିଥିଲା ମାଙ୍କଡ଼ । ଚାଳକ ବିଜୟ କୁମାର ସାହୁ ଆମ୍ବୁଲାନ୍ସ ଫାଟକ ଖୋଲିବାରୁ ଆମ୍ବୁଲାନ୍ସ ଭିତରକୁ ଆସି ଚାଳକଙ୍କ ନିକଟରେ ବସି ଆନନ୍ଦପୁର ଉପଖଣ୍ଡ ଚିକିତ୍ସାଳୟରେ ପହଞ୍ଚି ଗଲା ମାଙ୍କଡ଼। ପରେ ଆମ୍ବୁଲାନ୍ସରୁ ଓହ୍ଲାଇ କିଛି ଲୋକଙ୍କୁ ସେ ଖୋଜୁଥିବା ଦେଖାଯାଇଥିଲା। ଶେଷରେ ସେ ଠୁଳୁକୁଙ୍କ ଶବ ପାଖରେ ଯାଇ ପହଞ୍ଚିଥିଲା। ଏପରିକି ମୃତଦେହରେ ଘୋଡ଼ା ଯାଇଥିବା ଚାଦର ଖୋଲି ଦେଇ ଶବକୁ ଧରି କାନ୍ଦିବାକୁ ଲାଗିଥିଲା। ଏହା ଦେଖି ସମସ୍ତେ ଆଶ୍ଚର୍ଯ୍ୟ ହୋଇଥିଲେ। ଆଜିକାଲିର ସମାଜରେ ପୁଅ ଝିଅ ଯେତେବେଳେ ନିଜ ବୃଦ୍ଧ ବାପା ମାଆଙ୍କୁ ଅସୁସ୍ଥ ଅବସ୍ଥାରେ ଛାଡି ଦେଇ ଚାଲିଯାଉଛନ୍ତି, ଏପରିକି ମୃତ୍ୟୁ ପରେ ବି ଆଡ ଆଖିରେ ନଚାହିଁ ସେହି ଅବସ୍ଥାରେ ଛାଡି ଚାଲିଯାଇଥାନ୍ତି । କିନ୍ତୁ ଏହି ମାଙ୍କଡଟି ଆଜି ପଶୁ ହୋଇ ବି ମଣିଷପଣିଆ ଦେଖାଇଛି । ଯେଉଁ ସ୍ନେହ ମମତା ସେ ସେହି ବୃଦ୍ଧଙ୍କ ଠାରୁ ପାଇଥିଲା , ସେହି ସ୍ନେହ ମମତା ଓ ଭଲପାଇବା ଆଜି ତାକୁ ହସ୍ପିଟାଲକୁ ଟାଣି ଆଣିଛି । ବୃଦ୍ଧଙ୍କ ମରଶରୀର ପାଖରେ ବସି ସେ ଲୁହ ଝରାଇ ତାଙ୍କୁ ଅଶ୍ରୁଳ ଶ୍ରଦ୍ଧାଞ୍ଜଳି ଜଣାଇଛି ।
