ନନ୍ଦିଘୋଷ ବ୍ୟୁରୋ: ଆଇପିଏଲ୍ ୨୦୨୭ ସିଜିନ ପୂର୍ବରୁ ଏକ ବଡ଼ ଧରଣର ଖେଳାଳି ଅଦଳବଦଳ ହୋଇଛି। ହାର୍ଦ୍ଦିକ ପାଣ୍ଡ୍ୟା ମୁମ୍ବାଇ ଇଣ୍ଡିଆନ୍ସ ଛାଡ଼ି ପଞ୍ଜାବ କିଙ୍ଗ୍ସରେ ଯୋଗ ଦେଇଛନ୍ତି। ଅନ୍ୟପଟେ ଭାରତୀୟ ଦ୍ରୁତ ବୋଲର ଅର୍ଶଦୀପ ସିଂହ ପଞ୍ଜାବ କିଙ୍ଗ୍ସ ଛାଡ଼ି ମୁମ୍ବାଇ ଇଣ୍ଡିଆନ୍ସ ଦଳରେ ସାମିଲ ହୋଇଛନ୍ତି।
ମୁମ୍ବାଇ ଇଣ୍ଡିଆନ୍ସର ଅଧିନାୟକ ଥିବା ହାର୍ଦ୍ଦିକ ଏବେ ପଞ୍ଜାବ କିଙ୍ଗ୍ସ ପକ୍ଷରୁ ଖେଳିବେ। ସେ ୧୮ କୋଟି ଟଙ୍କା ଫି’ରେ ପଞ୍ଜାବ ଦଳରେ ସାମିଲ ହୋଇଛନ୍ତି। ପୂର୍ବରୁ ମୁମ୍ବାଇରେ ତାଙ୍କର ଫି’ ୧୬.୩୫ କୋଟି ଟଙ୍କା ଥିଲା। ପଞ୍ଜାବ କିଙ୍ଗ୍ସକୁ ହାର୍ଦ୍ଦିକଙ୍କ ଭଳି ଜଣେ ଅଭିଜ୍ଞ ଅଲରାଉଣ୍ଡର ମିଳିଛନ୍ତି। ତେବେ ହାର୍ଦ୍ଦିକ ଯିବା ପରେ ମୁମ୍ବାଇର ନୂଆ ଅଧିନାୟକ କିଏ ହେବେ, ତାହା ଉପରେ ଏବେ ସମସ୍ତଙ୍କ ନଜର ରହିଛି । ହାର୍ଦ୍ଦିକ ୨୦୧୫ ମସିହାରେ ମୁମ୍ବାଇ ଇଣ୍ଡିଆନ୍ସରେ ଯୋଗ ଦେଇଥିଲେ। ଏହି ସମୟ ମଧ୍ୟରେ ମୁମ୍ବାଇ ୪ ଥର ଟାଇଟଲ୍ ଜିତିଥିଲା। ଏହା ପରେ ୨୦୨୨ ସେ ଗୁଜରାଟ ଟାଇଟାନ୍ସ ପାଇଁ ଖେଳିଥିଲେ । ଯେଉଁଠାରେ ସେ ଅଧିନାୟକ ଭାବେ ତାଙ୍କର ପ୍ରଥମ ସିଜିନରେ ହିଁ ଟାଇଟଲ୍ ଜିତିଥିଲେ। ପରେ ହାର୍ଦ୍ଦିକ IPL ୨୦୨୪ ମସିହାରେ ପୁଣି ଥରେ ଅଧିନାୟକ ଭାବେ ମୁମ୍ବାଇକୁ ଫେରିଥିଲେ, କିନ୍ତୁ ଏଥରକ ମୁମ୍ବାଇକୁ ହାର୍ଦ୍ଦିକଙ୍କ କମବ୍ୟାକ୍ ବିଶେଷ ପ୍ରଭାବ ପକାଇପାରିନଥିଲା । ପାଣ୍ଡ୍ୟାଙ୍କ ଅଧିନାୟକତ୍ୱରେ, ମୁମ୍ବାଇ ତିନୋଟି ସିଜିନ୍ ଖେଳିଥିଲା ବେଳେ କେବଳ ଥରେ ଯୋଗ୍ୟତା ପର୍ଯ୍ୟାୟରେ ପହଞ୍ଚିଥିଲା। ଏବେ ପଞ୍ଜାବର ଅଧିନାୟକ ପଦ ଶ୍ରେୟସ ଆୟରଙ୍କ ହାତରେ ରହିଛି । ତାଙ୍କ ଅଧିନାୟକତ୍ୱରେ ଦଳ ୨୦୨୫ରେ ଫାଇନାଲ ଖେଳିଥିଲା। ତେବେ ଶ୍ରେୟସ PBKSର ଅଧିନାୟକ ପଦ ବଜାଇ ରଖିବେ। ଗଣମାଧ୍ୟମ ରିପୋର୍ଟ ଅନୁଯାୟୀ, ପାଣ୍ଡ୍ୟା ଆୟରଙ୍କ ଅଧିନାୟକତ୍ୱରେ ଖେଳିବାକୁ ପ୍ରସ୍ତୁତ ଥିବା କୁହାଯାଉଛି।
ସେପଟେ ୨୦୧୯ ମସିହାରେ ଆଇପିଏଲରେ ଡେବ୍ୟୁ କରିଥିଲେ ଅର୍ଶଦୀପ ସିଂହ । ସେବେଠାରୁ ପଞ୍ଜାବ କିଙ୍ଗ୍ସ ପାଇଁ ଖେଳି ଆସୁଥିବା ବାମହାତୀ ଦ୍ରୁତ ବୋଲର ଅର୍ଶଦୀପ ସିଂହ ଏବେ ମୁମ୍ବାଇ ଇଣ୍ଡିଆନ୍ସ ଜର୍ସିରେ ନଜର ଆସିବେ। ସେ ତାଙ୍କର ପୂର୍ବ ନିର୍ଦ୍ଧାରିତ ୧୮ କୋଟି ଟଙ୍କା ଫି’ରେ ମୁମ୍ବାଇରେ ଯୋଗ ଦେଇଛନ୍ତି। ମୁମ୍ବାଇ ଇଣ୍ଡିଆନ୍ସରେ ଅର୍ଶଦୀପ ସିଂହ ଓ ଯଶପ୍ରୀତ ବୁମରାଙ୍କ ଯୋଡ଼ି ବୋଲିଂ ବିଭାଗକୁ ବେଶ୍ ମଜବୁତ କରିବ।
