ନନ୍ଦିଘୋଷବ୍ୟୁର: ସାଉଥ୍ ସୁପରଷ୍ଟାର ତଥା ଆନ୍ଧ୍ରପ୍ରଦେଶର ଉପମୁଖ୍ୟମନ୍ତ୍ରୀ ପବନ କଲ୍ୟାଣ ଓ ତାଙ୍କ ପତ୍ନୀ ଆନ୍ନା କୋନିଡେଲାଙ୍କ ମଧ୍ୟରେ ବିଚ୍ଛେଦ ଘୋଷଣା ହୋଇଛି। ବିବାହର ୧୩ ବର୍ଷ ପରେ ଉଭୟ ଅଲଗା ହେବାକୁ ନିଷ୍ପତ୍ତି ନେଇଛନ୍ତି। ପବନଙ୍କ ଇନଷ୍ଟାଗ୍ରାମ୍ ପେଜରେ ଏକ ମିଳିତ ବିବୃତି ଜରିଆରେ ଏହି ସୂଚନା ଦେଇଛନ୍ତି ଦମ୍ପତି।
ଉଭୟ କହିଛନ୍ତି ଯେ, ପାରସ୍ପରିକ ବୁଝାମଣା ଓ ସମ୍ମାନର ସହ ଏହି ନିଷ୍ପତ୍ତି ନିଆଯାଇଛି। ବୈବାହିକ ସମ୍ପର୍କ ଶେଷ ହୋଇଥିଲେ ମଧ୍ୟ ସେମାନେ ଭଲ ବନ୍ଧୁ ହୋଇ ରହିବେ। ପିଲାମାନଙ୍କ ଖୁସି ଓ ଭବିଷ୍ୟତ ସବୁବେଳେ ସେମାନଙ୍କ ପ୍ରାଥମିକତା ରହିବ ବୋଲି କହିଛନ୍ତି ଉଭୟ । ଏହି ବ୍ୟକ୍ତିଗତ ସମୟରେ ଗୋପନୀୟତାକୁ ସମ୍ମାନ ଦେବାକୁ ପ୍ରଶଂସକଙ୍କୁ ଅନୁରୋଧ କରିଛନ୍ତି ପବନ କଲ୍ୟାଣ ଓ ତାଙ୍କ ପତ୍ନୀ ଆନ୍ନା ।
ତେବେ ପବନ କଲ୍ୟାଣଙ୍କ ଏହା ତୃତୀୟ ବିବାହ ଥିଲା। ୧୯୯୭ରେ ସେ ନନ୍ଦିନୀଙ୍କୁ ବିବାହ କରିଥିଲେ। ପରେ ୨୦୦୯ରେ ଅଭିନେତ୍ରୀ ରେଣୁ ଦେଶାଇଙ୍କୁ ବିବାହ କରିଥିଲେ, ଏବଂ ୨୦୧୨ରେ ଉଭୟଙ୍କ ବିଚ୍ଛେଦ ହୋଇଥିଲା। ଏହାପରେ ୨୦୧୩ରେ ରୁଷିଆର ଆନ୍ନାଙ୍କୁ ବିବାହ କରିଥିଲେ। ଉଭୟଙ୍କର ଦୁଇଟି ସନ୍ତାନ ମଧ୍ୟ ଅଛନ୍ତି।
୧୯୯୬ରେ ଚଳଚ୍ଚିତ୍ର ‘ଆକ୍କଡା ଅମ୍ମାୟି ଇକ୍କଡା ଅବ୍ବାୟି’ ଜରିଆରେ ଅଭିନୟ ଜଗତରେ ପାଦ ଥାପିଥିଲେ ପବନ। ୨୦୧୪ରେ ଜନସେନା ପାର୍ଟି ଗଠନ କରି ରାଜନୀତିରେ ସକ୍ରିୟ ହୋଇଥିଲେ। ୨୦୨୪ ନିର୍ବାଚନରେ ଜନସେନା, ଟିଡିପି ଓ ବିଜେପି ମେଣ୍ଟର ବିଜୟ ପରେ ସେ ଜୁନ୍ ୧୪ରେ ଆନ୍ଧ୍ରପ୍ରଦେଶର ଉପମୁଖ୍ୟମନ୍ତ୍ରୀ ଭାବେ ଶପଥ ନେଇଥିଲେ।
