କେନ୍ଦୁଝର ଜିତୁ ମୁଣ୍ଡାଙ୍କ କଙ୍କାଳ ବୋହିବା ପ୍ରସଙ୍ଗ । କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣଙ୍କୁ ଚିଠି ଲେଖିଲେ ବିରୋଧୀ ଦଳ ନେତା ତଥା ବିଜେଡି ସୁପ୍ରିମୋ ନବୀନ ପଟ୍ଟନାୟକ । ଘଟଣାକୁ ନେଇ ଗଭୀର ଉଦବେଗ ପ୍ରକାଶ କରିବା ସହ ବ୍ୟାଙ୍କ କର୍ତ୍ତୃପକ୍ଷଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ଦାବି କରିଛନ୍ତି । ନିଜ ଚିଠିରେ ଗଭୀର ଉଦବେଗ ପ୍ରକାଶ କରି ସେ ଲେଖିଛନ୍ତି ଯେ, ଗତ ଏପ୍ରିଲ ୨୭ ତାରିଖରେ କେନ୍ଦୁଝର ମଲ୍ଲିପୋସି ଓଡି଼ଶା ଗ୍ରାମ୍ୟ ବ୍ଯାଙ୍କ ଶାଖାରେ ଏପରି ଏକ ଅଭାବନୀୟ ଘଟଣା ଘଟିଛି । ନିଜ ଅର୍ଥ ଉଠାଣ ପାଇଁ ବ୍ୟାଙ୍କକୁ ପ୍ରମାଣ ଦେବା ଲାଗି ଆଦିବାସୀ ଜିତୁ ମୁଣ୍ଡା ନିଜ ଭଉଣୀଙ୍କ କଙ୍କାଳ ବୋହିଥିଲେ । ଏହି ଘଟଣାରେ ବ୍ୟାଙ୍କ କର୍ତ୍ତୃପକ୍ଷଙ୍କୁ ଜିତୁ ବାରମ୍ବାର ଗୁହାରି ପରେ ବି ଶୁଣି ନଥିଲେ କର୍ତ୍ତୃପକ୍ଷ । ଏପରିକି RBI ଗାଇଡଲାଇନ ଉଲ୍ଲଂଘନ କରି ଅମାନବିକ କାର୍ଯ୍ୟ କରିଛନ୍ତି । ଗଣତନ୍ତ୍ରରେ ନାଗରିକଙ୍କୁ ସଶକ୍ତ କରିବା ପାଇଁ ନିୟମ ଅଛି । କାହାରିକୁ ଅପମାନ କରିବା ପାଇଁ ଉଦ୍ଦିଷ୍ଟ ନୁହେଁ । ଏହିଭଳି ଘଟଣଆ ସାରା ଓଡି଼ଶାବାସୀଙ୍କୁ ଆନ୍ଦୋଳିତ କରିଛି । ଏହା ନ୍ୟୁୟର୍କ ପୋଷ୍ଟ ଓ ବିବିସି ଭଳି ଅନ୍ତର୍ଜାତୀୟ ଗଣମାଧ୍ୟମରେ ପ୍ରକାଶ ପାଇ ବିଶ୍ବର ଦୃଷ୍ଟି ଆକର୍ଷଣ କରିଛି । ଏଭଳି ଘଟଣାରେ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ନବୀନ ଦାବି କରିଛନ୍ତି । ଯାହା ନାଗରିକକୈନ୍ଦ୍ରିକ ସେବା କ୍ଷେତ୍ରରେ ବହୁ ପରିମାଣରେ ସହାୟକ ହେବ । ଯେଭଳି ଏଭଳି ଘଟଣାର ଦେଶର ଆଉ କୌଣସି ସ୍ଥାନରେ ପୁନରାବୃତ୍ତି ନହେବ ।

ଭୁବନେଶ୍ୱର ସାଲିଆସାହିରେ ପୁଣି ଉଚ୍ଛେଦ । ୨୦୦ ଫୁଟିଆ ପ୍ରଶସ୍ତ ରାସ୍ତା ନିର୍ମାଣ ପାଇଁ ଆଜି ଏକ ବଡ଼ ଧରଣର ଏନଫୋର୍ସମେଣ୍ଟ ପ୍ରକ୍ରିୟା ଆରମ୍ଭ ହୋଇଛି ।। ପୋଲିସ ଉପସ୍ଥିତିରେ BMC ଓ BDA ପକ୍ଷରୁ ମିଳିତ ଭାବେ ଏହି ଉଚ୍ଛେଦ କାର୍ଯ୍ୟ କରାଯାଉଛି । ଏକାମ୍ର କାନନ ନିକଟରେ ଥିବା ପ୍ରାୟ ୮୧ଟି ଘର ଆଜି ଭଙ୍ଗାଯିବାର ପ୍ଲାନ ରହିଛି । ଏହି ଅଞ୍ଚଳ ଦେଇ ଯାଇଥିବା ୨୦୦ ଫୁଟିଆ ମୁଖ୍ୟ ରାସ୍ତା ନିର୍ମାଣରେ ଏହି ଘରଗୁଡ଼ିକ ପ୍ରତିବନ୍ଧକ ସାଜିଥିଲେ । ପୂର୍ବରୁ ଏହି ପ୍ରକଳ୍ପ ପାଇଁ ବିଭିନ୍ନ ପର୍ଯ୍ୟାୟରେ ପ୍ରାୟ ୬୦୦ରୁ ଅଧିକ ଘର ଉଚ୍ଛେଦ କରାଯାଇ ସାରିଛି । ଆଇନ ଶୃଙ୍ଖଳା ପରିସ୍ଥିତିକୁ ଦୃଷ୍ଟିରେ ରଖି ୨୦୦ ରୁ ଅଧିକ କର୍ମଚାରୀ,୬ ପ୍ଲାଟୁନ ପୋଲିସ ଫୋର୍ସ ଉଚ୍ଛେଦ ପ୍ରକ୍ରିୟା ସାମିଲ ଅଛନ୍ତି । ଅନ୍ୟପଟେ ବୁଦ୍ଧ ବିହାରରେ ସରକାର ଯେଉଁ ଘର ଯୋଗାଇ ଦେଉଛନ୍ତି ତାହା ବହୁତ ଛୋଟ ତେଣୁ କେମିତି ପାଞ୍ଚ ପ୍ରାଣୀ କୁଟୁମ୍ବକୁ ନେଇ ଏତେ ଛୋଟ ଘରେ କେମିତି ରହିବୁ ବୋଲି ଲୋକ ପ୍ରଶ୍ନ କରିଛନ୍ତି ବସ୍ତିବାସିନ୍ଦା। ଭଙ୍ଗା ଯାଉଥିବା ବସ୍ତି ଲୋକମାନଙ୍କର ଆସବାବପତ୍ର ସ୍ଥାନାନ୍ତରିତ ପାଇଁ ବିଡିଏ ପକ୍ଷରୁ ଗାଡ଼ି ଯୋଗାଇବାକୁ ପ୍ରତିଶ୍ରୁତି ଦିଆଯାଇଥିଲା କିନ୍ତୁ ବର୍ତ୍ତମାନ ସୁଦ୍ଧା କେହି ସହଯୋଗ କରୁନଥିବା ଅଭିଯୋଗ କରିଛନ୍ତି ସାଲିଆ ସାହି ବସ୍ତି ଲୋକ ।

କଳାହାଣ୍ଡି ପରେ ବଲାଙ୍ଗୀରରେ ଭୂମିକମ୍ପ ଝଟକା । ଭୋର୍ ସକାଳ ୪ଟା ୪୦ ମିନିଟ୍ ସମୟରେ ମୃଦୁ ଭୂମିକମ୍ପ ଝଟକା ଲାଗିଛି । ଭୂମିକମ୍ପ ପରେ ଭୟର ବାତାବରଣ ଖେଳିଯାଇଛି । ପୂର୍ବରୁ ବଲାଙ୍ଗୀରରେ ଭୂମିକମ୍ପ ଝଟକା କେବେ ଅନୁଭବ ହୋଇନଥିବା ବେଳେ ଆଜି ସକାଳୁ ଭୂମିକମ୍ପ ଝଟକା ଅନୁଭବ ହେବାପରେ ଲୋକେ ଡରି ଯାଇଥିଲେ । ଗୋଟିଏରୁ ଦୁଇ ସେକେଣ୍ଡ ଧରି ଝଟକା ଅନୁଭବ ହୋଇଥିଲା । ବଲାଙ୍ଗୀର ସହର, ତୁଷୁରା ଓ ପାଟଣାଗଡ଼ ଅଞ୍ଚଳରେ ଭୂମିକମ୍ପ ଝଟକା ଅନୁଭୂତ ହୋଇଛି । ଖୋଦ୍ ବଲାଙ୍ଗୀର ଅତିରିକ୍ତ ଜିଲ୍ଲାପାଳ ରାଜସ୍ବ ପବିତ୍ର ବେହେରା ଭୋର୍ ସକାଳୁ ଭୂମିକମ୍ପ ଝଟକା ଅନୁଭବ କରିଥିବା କହିଛନ୍ତି ।

ବିଷାକ୍ତ ଦହିବରା ଖାଇ ୩୦ ଅଧିକ ଲୋକ ଅସୁସ୍ଥ। ଯାଜପୁର ଦଶରଥପୁର ବ୍ଲକ ଜୟନ୍ତରା ପଂଚାୟତ ପାଟପୁର ଗ୍ରାମରେ ଘଟିଛି ଘଟଣା। ଗତକାଲି ପାଟପୁର ଅଞ୍ଚଳରେ ଦହିବରା ଖାଇ ଅପରାହ୍ନରେ ଅସୁସ୍ଥ ହୋଇ ସମସ୍ତେ ଝାଡାବାନ୍ତିରେ ଆକ୍ରାନ୍ତ ହୋଇଥିଲେ। ପ୍ରଥମେ ସେମାନଙ୍କୁ ଦଶରଥପୁର ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରାଯାଇଥିଲା। ପରେ ସେମାନଙ୍କ ମଧ୍ୟରୁ ଗୁରୁତରମାନଙ୍କୁ ଯାଜପୁର ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି। ଆକ୍ରାନ୍ତଙ୍କ ମଧ୍ୟରୁ ୬ରୁ ଅଧିକ ଶିଶୁ ଅଛନ୍ତି।