ନନ୍ଦିଘୋଷ ବ୍ୟୁରୋ: ଆସାମରେ ଟ୍ରେନ୍ ଦୁର୍ଘଟଣା । କୋଲକାତା-ସେରାଙ୍ଗ ଏକ୍ସପ୍ରେସର ୭ଟି ବଗି ଓ ଇଞ୍ଜିନ୍ ଲାଇନଚ୍ୟୁତ୍ ହୋଇଛି। ମିଜୋରାମରୁ କୋଲକାତା ଯାଉଥିବା ଏହି ଯାତ୍ରୀବାହୀ ଟ୍ରେନ୍ ଟି ଦିଗାରୁ ନିକଟରେ ଦୁର୍ଘଟଣାଗ୍ରସ୍ତ ହୋଇଛି ।
ଏନେଇ ଉତ୍ତରପୂର୍ବ ସୀମାନ୍ତ ରେଳବାଇର CPRO କହିଛନ୍ତି,”ବୁଧବାର ସକାଳ ପ୍ରାୟ ୬:୫୪ ମିନିଟ୍ ରେ, ଆସାମରେ ଦିଗାରୁ ରେଳ ଷ୍ଟେସନରେ ଅନ୍ୟ ଏକ ଟ୍ରେନ୍ କୁ ରାସ୍ତା ଦେବା ପାଇଁ ଟ୍ରେନ ନମ୍ବର ୧୩୧୨୫ କୋଲକାତା- ସେରାଙ୍ଗ ଏକ୍ସପ୍ରେସକୁ ଅଟକାଯାଉଥିଲା। ଏହି ସମୟରେ, ଲୋକୋ ପାଇଲଟ୍ ଟ୍ରେନ୍ ର ଗତି ଉପରେ ନିୟନ୍ତ୍ରଣ ହରାଇଥିଲେ, ଯାହା ଫଳରେ ଏହି ଦୁର୍ଘଟଣା ଘଟିଥିଲା”। ଦୁର୍ଘଟଣାରେ ଟ୍ରେନ୍ ର ଇଞ୍ଜିନ୍ ଓ ୭ଟି ବଗି ଲାଇନଚ୍ୟୁତ୍ ହୋଇଛି। ଦୁର୍ଘଟଣାରେ ୭ ଜଣ ଯାତ୍ରୀ ଆହତ ହୋଇଛନ୍ତି । ସମସ୍ତଙ୍କୁ ନିକଟସ୍ଥ ହସ୍ପିଟାଲରେ ଭର୍ତ୍ତି କରାଯାଇଛି । ଉଦ୍ଧାରକାରୀ ଦଳ ଘଟଣାସ୍ଥଳରେ ପହଞ୍ଚି ଉଦ୍ଧାର କାର୍ଯ୍ୟ ଜାରି ରଖିଛନ୍ତି ।
ଦୁର୍ଘଟଣା ପରେ ଟ୍ରେନ୍ ରେ ଥିବା ଯାତ୍ରୀମାନେ ଚିତ୍କାର କରିଥିଲେ। ଅନେକ ଜୀବନ ବଞ୍ଚାଇବା ପାଇଁ କୋଚ୍ ରୁ ବାହାରିବାକୁ ଉଦ୍ୟମ କରିଥିଲେ। ଦୁର୍ଘଟଣା ଫଳରେ ଉତ୍ତର-ପୂର୍ବ ଭାରତରେ ରେଳ ସେବା ପ୍ରଭାବିତ ହୋଇଛି । ଉପର ଆସାମ ଅଭିମୁଖେ ଯାଉଥିବା ଟ୍ରେନ୍ ଗୁଡ଼ିକ ବାଧାପ୍ରାପ୍ତ ହୋଇଥିବା ବେଳେ ମିଜୋରାମ, ମଣିପୁର ଓ ତ୍ରିପୁରା ଅଭିମୁଖେ ଯାଉଥିବା ରେଳ ସେବା ପ୍ରଭାବିତ ହୋଇଛି । ଅନେକ ଟ୍ରେନ୍ ର ସମୟ ପରିବର୍ତ୍ତନ କରାଯାଇଛି। ଦୁର୍ଘଟଣାଗ୍ରସ୍ତ କୋଚ୍ ଗୁଡ଼ିକୁ ହଟାଇବା ଓ ଟ୍ରାକ୍ ମରାମତି ନେଇ କାମ ଚାଲିଛି।
