ନୂଆଦିଲ୍ଲୀ : ପୂର୍ବତନ ବଲିଉଡ ଅଭିନେତ୍ରୀ ମମତା କୁଲକର୍ଣ୍ଣୀଙ୍କୁ ଝଟକା। କିନ୍ନର ଆଖଡାରୁ କୁଲକର୍ଣ୍ଣୀ ଓ ଆଚାର୍ଯ୍ୟ ମହାମଣ୍ଡଳେଶ୍ବର ଲକ୍ଷ୍ମୀ ନାରାୟଣ ତ୍ରିପାଠୀଙ୍କୁ ବହିଷ୍କାର କରିଛନ୍ତି ପ୍ରତିଷ୍ଠାତା ଋଷି ଅଜୟ ଦାସ। ମାତା ହେବାର ୭ ଦିନ ପରେ ମମତାଙ୍କଠୁ କାଢି ନିଆଗଲା ଉପାଧି । ଅତୀତର କେତେକ ବିବାଦୀୟ ଘଟଣାକୁ କେନ୍ଦ୍ର କରି ତାଙ୍କୁ ଆଖଡ଼ାରୁ ବହିଷ୍କାର କରାଯାଇଛି। ପ୍ରତିଷ୍ଠାତା ଅଜୟ ଦାସଙ୍କ ବିନା ସ୍ବୀକୃତି କ୍ରମେ ଲକ୍ଷ୍ମୀନାରାୟଣ ତ୍ରିପାଠୀ କୁଲକର୍ଣ୍ଣୀଙ୍କୁ ନିଯୁକ୍ତି ଦେଇଥିବା ଅଭିଯୋଗ ହୋଇଥିଲା। ଏକ ବିବୃତିରେ ଅଜୟ ଦାସ କହିଛନ୍ତି- ଆଚାର୍ଯ୍ୟ ମହାମଣ୍ଡେଳଶ୍ବରଙ୍କୁ ସଂଗଠନରୁ ଅବ୍ଯାହତି ଦିଆଯାଇଛି। ସେ ତାଙ୍କ ଦାୟିତ୍ବକୁ ସଠିକ୍ ତୁଲାଇ ନଥିବାରୁ ଏହି ପଦକ୍ଷେପ ନିଆଯାଇଛି। ଗତ ୨୦୧୯ରେ ଜୁନା ଆଖଡାରେ ଯୋଗଦେଇଥିଲେ ଲକ୍ଷ୍ମୀନାରାୟଣ। ଅଜୟ କହିଛନ୍ତି- ଅପରାଧିକ ରେକର୍ଡ ଥିବା ମମତା କୁଲକର୍ଣ୍ଣୀଙ୍କୁ ଆଖଡାରେ ସାମିଲ କରି କିନ୍ନର ଆଖଡାର ନୈତିକ ମୂଲ୍ଯବୋଧ କ୍ଷୁଣ୍ଣ କରିଛନ୍ତି ଲକ୍ଷ୍ମୀନାରାୟଣ। କୁଲକର୍ଣ୍ଣୀଙ୍କୁ ବହିଷ୍କାର ପଛରେ ରହିଛି ୫ କାରଣ। ମମତାଙ୍କୁ ସିଧାସଳଖ ମହାମଣ୍ଡଳେଶ୍ବର ଉପାଧି ଦିଆଯାଇଥିଲା। ପ୍ରଥମେ ସେ ସନ୍ନ୍ଯାସିନୀ ହେବା ଉଚିତ୍ ଥିଲା। ମାତ୍ର ତାହା ଘଟି ନଥିଲା। ସେ ଫିଲ୍ମ ଜଗତରେ ଅନେକ ଗୁଡିଏ ବୋଲ୍ଡ ସିନରେ ଅଭିନୟ କରିଥିଲେ।ସେ ଅଣ୍ଡରୱାଲ୍ଡ ଜଗତ ସହ ଜଡିତ ଥିବା ଅଭିଯୋଗ ହୋଇଥିଲା। ସେ ଦୁବାଇରେ ଜଣେ ଡ୍ରଗ୍ସ ମାଫିଆଙ୍କୁ ବିବାହ କରିଥିବା ଜଣାପଡିଥିଲା। ଏହା ସହ ଆଖଡ଼ାର ନିୟମ ଅନୁସାରେ ମହାମଣ୍ଡଳେଶ୍ବରଙ୍କୁ ମୁଣ୍ଡନ ହେବାର ଥିଲା। ବେକରେ ବୈଜୟନ୍ତୀ ମାଳା ନପିନ୍ଧି ରୁଦ୍ରାକ୍ଷ ମାଳ ପିନ୍ଧିବା ଉଚିତ୍ ଥିଲା। ମମତା କୁଲକର୍ଣ୍ଣି ହିନ୍ଦୀ ସିନେମାରେ ଅନେକ ସୁପରଷ୍ଟାରଙ୍କ ସହ କାମ କରିଛନ୍ତି, ଯେପରିକି ‘ଛୁପା ରୁସ୍ତମ’, ‘ସେନ୍ସର’, ‘ଜାନେ-ଜିଗର’, ‘ଚାଇନା ଗେଟ୍’, ‘କିଲା’, ‘କ୍ରାନ୍ତିକାରୀ’, ‘ଜୀବନ ଯୁଦ୍ଧ’, ‘ନସୀବ’, ‘ ସେ ଯେଉଁ ଚଳଚ୍ଚିତ୍ରଗୁଡ଼ିକରେ ମୁଖ୍ୟ ଭୂମିକାରେ କାମ କରିଥିଲେ, ସେଥିରେ ବେକାବୁ’, ‘ବାଜି’, ‘କରଣ ଅର୍ଜୁନ’, ‘ତିରଙ୍ଗା’ ଅନ୍ତର୍ଭୁକ୍ତ।
କଥା ଦେଇ ଜନତାଙ୍କୁ ଭଣ୍ଡାଇଲେ ସରକାର, ପ୍ରତିଶୃତି ଦେଇ ପାଳନ କରିନଥିବା ଅଭିଯୋଗ
ଭୁବନେଶ୍ବର : ସରକାରକୁ ଆସିଲେ ଓବିସିଙ୍କୁ ନ୍ୟାୟ ଦେବା କଥା କହିଥିଲେ। ଏହାକୁ ପ୍ରଚାର ପ୍ରସାର କରି ଭୋଟ ନେବା ସହ ସରକାରକୁ ବି ଆସିଲେ। କିନ୍ତୁ ଅନ୍ୟ ପ୍ରସଙ୍ଗ ଭଳି ନିଯୁକ୍ତି କ୍ଷେତ୍ରରେ ଓବିସି ସଂରକ୍ଷଣ ପ୍ରସଙ୍ଗରେ ଓଡିଶାବାସୀଙ୍କୁ ପ୍ରତାରିତ କଲେ। ରାଜ୍ୟର ବିଜେପି ନେତୃତ୍ଵାଧୀନ ସରକାର ବିରୋଧରେ ଏଭଳି ଅଭିଯୋଗ ଆଣିଛି ଓବିସି ଫୋରମ।ରାଜ୍ୟ ଜନସଂଖ୍ୟାର ୫୨%ରୁ ଅଧିକ ପଛୁଆ ବର୍ଗର ଥିବାବେଳେ ଶିକ୍ଷା ଓ ନିଯୁକ୍ତି କ୍ଷେତ୍ରରେ ୨୭ ପ୍ରତିଶତ ସଂରକ୍ଷଣ ବ୍ୟବସ୍ଥା ରହିଛି। ଓଡ଼ିଶାରେ ସରକାରକୁ ଆସିଲେ ଏହା ଲାଗୁ କରାଯିବ ବୋଲି ପ୍ରତିଶୃତି ଦେଇଥିଲା ବିଜେପି।କିନ୍ତୁ ଏବେ ସରକାରକୁ ଆସିବା ପରେ ଖାଲିଥିବା ୬୫ ହଜାର ସରକାରୀ ପଦବୀ ପୂରଣ ପାଇଁ ପ୍ରକ୍ରିୟା ଆରମ୍ଭ କରିଥିଲେ ମଧ୍ୟ ଓବିସିଙ୍କ ପାଇଁ ୨୭%ର ବ୍ୟବସ୍ଥା ରଖାଯାଇ ନାହିଁ।ପୂର୍ବରୁ ବାର୍ଦ୍ଧକ୍ୟ ଭତ୍ତା, ମାଗଣା ବିଜୁଳି ତଥା ଅନେକ ପ୍ରତିଶୃତିର ଭଳି ଏହା ମଧ୍ୟ ଓବିସି ବର୍ଗ ପ୍ରତି ଏକ ବଡ଼ ଧୋକା ବୋଲି ଅଭିଯୋଗ ହୋଇଛି।ରାଜ୍ୟର ପଛୁଆ ବର୍ଗଙ୍କୁ ସେମାନଙ୍କ ହକରୁ ବଞ୍ଚିତ କଲେ ରାଜ୍ୟବ୍ୟାପୀ ଆନ୍ଦୋଳନର ଚେତାବନୀ ଦେଇଛି ଓବିସି ଫୋରମ ।
ବିରୋଧୀ ଦଳ ଗୁଡିକ ମଧ୍ୟ ବିଜେପିର ଆଭିମୁଖ୍ୟକୁ ତୀଵ୍ର ନିନ୍ଦା କରିଛନ୍ତି। ବିଜେପି ଯାହା କୁହେ ତାର ବିପରୀତ କାର୍ଯ୍ୟ କରେ। ଯାହାକି ସରକାର ଆସିବା ପରେ ପ୍ରତିଫଳିତ ହେଉଛି। କେବଳ ମିଛ କହି ସବୁ ବର୍ଗର ଲୋକଙ୍କୁ ପ୍ରତାରିତ କରାଯାଉଥିବା ବେଳେ ଏବେ ଓବିସି ବର୍ଗ ଏହାର ଶିକାର ହୋଇଛନ୍ତି।ଏପରିକି ଜାତିଭିତ୍ତିକ ଜଣଗଣନାରୁ ମଧ୍ୟ ବିଜେପି ଏଡାଇ ଯାଉଛି। ସରକାରଙ୍କ ଏଭଳି ଜନମାରଣ ନୀତି ପ୍ରତିବାଦରେ ରାଜ୍ୟରେ ବିଶାଳ ଜନଆନ୍ଦୋଳନର ଚେତାବନୀ ଦିଆଯାଇଛି। ବର୍ତ୍ତମାନ ରାଜ୍ୟରେ ୧୧.୨୫ ଓବିସି ସଂରକ୍ଷଣ କାର୍ଯ୍ୟକାରୀ ହେଉଛି। କିନ୍ତୁ ପ୍ରତିଶ୍ରୁତି ମୁତାବକ ୨୭ ପ୍ରତିଶତ ସଂରକ୍ଷଣ କାର୍ଯ୍ୟକାରୀ ନହେଲେ ୧୦ ହଜାର ଓବିସି ବର୍ଗର ଛାତ୍ରଛାତ୍ରୀ ସରକାରୀ ଚାକିରୀ ପାଇବାରୁ ବଞ୍ଚିତ ହେବେ।
ନୂଆ ରୂପ ନେଉଛି ବିଜେଡ଼ି ସଂଗଠନ, ଜିଲ୍ଲାସ୍ତରରୁ ନିଯୁକ୍ତ ହେଲେଣି ନିର୍ବାଚନୀ ଅଧିକାରୀ
ଭୁବନେଶ୍ବର : ନୂଆ ରୂପ ନେଉଛି ବିଜେଡ଼ି ସଂଗଠନ। ଜିଲ୍ଲାସ୍ତରରୁ ନିଯୁକ୍ତ ହେଲେଣି ନିର୍ବାଚନୀ ଅଧିକାରୀ । ୪ଟି ପର୍ଯ୍ୟାୟରେ ନିର୍ବାଚନ ପ୍ରକ୍ରିୟା । ଓ୍ବାର୍ଡସ୍ତରରୁ ରାଜ୍ୟ କାର୍ଯ୍ୟକାରିଣୀ ଯାଏ ନବକଳେବର। ଅଢେଇରୁ ୩ ମାସ ଭିତରେ ସରିବ ବିଜେଡ଼ିର ସାଂଗଠନିକ ନିର୍ବାଚନ ପର୍ବ । ଓ୍ବାର୍ଡସ୍ତରରୁ ରାଜ୍ୟ କାର୍ଯ୍ୟକାରିଣୀ ଯାଏ ନୂଆରୂପ ନେବ ସଂଗଠନ। ସାଂଗଠନିକ ନିର୍ବାଚନ ପ୍ରକ୍ରିୟା ଆଉପାଦେ ଆଗେଇଛି ଦଳ । ଜିଲ୍ଲାସ୍ତରରେ ନିର୍ବାଚନୀ ଅଧିକାରୀ ନିଯୁକ୍ତିକୁ ତ୍ବରାନ୍ବିତ କରିଛନ୍ତି ଦଳ। ତୃଣମୂଳସ୍ତରରୁ ସଂଗଠନ ଅଧିକ ଶକ୍ତିଶାଳୀ କରିବା ସହ ନିର୍ଦ୍ଦାରିତ ସମୟରେ ନିର୍ବାଚନ ପ୍ରକ୍ରିୟା ଶେଷ କରାଯିବ ବୋଲି ବରିଷ୍ଠ ବିଜେଡ଼ି ବିଧାୟକ ତଥା ନିର୍ବାଚନୀ ଅଧିକାରୀ ପ୍ରତାପ ଦେବ କହିଛନ୍ତି। ଓ୍ବାର୍ଡ, ପଂଚାୟତ, ବ୍ଲକ, ପୌର ପରେ ଜିଲ୍ଲା, ରାଜ୍ୟ ପରିଷଦ ଓ ରାଜ୍ୟ କାର୍ଯ୍ୟକାରିଣୀ ଗଠନ କରାଯିବ। ପ୍ରତ୍ୟେକ ନିର୍ବାଚନୀମଣ୍ଡଳିରୁ ଜଣେ ଲେଖାଏ ରାଜ୍ୟ ପରିଷଦକୁ ନିର୍ବାଚିତ ହେବେ। ରାଜ୍ୟ ପରିଷଦର ସଦସ୍ୟ ରାଜ୍ୟ କାର୍ଯ୍ୟକାରିଣୀକୁ ନିର୍ବାଚିତ କରିବେ। ରାଜ୍ୟ କାର୍ଯ୍ୟକାରିଣୀର ମୋଟ ୮୦ ନିର୍ବାଚିତ ସଦସ୍ୟ ସଭାପତି ଚୟନ କରିବେ। ସଭାପତି ଚୟନ ପରେ ବିଭିନ୍ନ ପଦ ପଦବୀ ନାଁ ଘୋଷଣା କରାଯିବ। ଏସବୁ ପ୍ରକ୍ରିୟା ପାଇଁ ଅଢେଇରୁ ୩ମାସ ସମୟ ଲାଗିବ ବୋଲି ବିଜେଡି ନିର୍ବାଚନୀ ଅଧିକାରୀ ବିଧାୟକ ପ୍ରତାପ ଦେବ କହିଛନ୍ତି ।
ଶାସନ କ୍ଷମତାରୁ ଗଲା ପରେ ବି ବିଜେଡ଼ି ତୃଣମୂଳସ୍ତରରେ ଅଧିକ ଶକ୍ତିଶାଳୀ ଭାବେ ଉଭା ହୋଇଛି । ୨୦୨୪ ନିର୍ବାଚନରେ ବିଜେଡ଼ି ସର୍ବାଧିକ ଭୋଟ ପାଇଁ ବିରୋଧୀ ଦଳ ଭୂମିକା ନିଭାଉଛି । ଦଳର ନିର୍ବାଚନ ପ୍ରକ୍ରିୟା ଜାରି ରହିଥିବାରୁ ନେତାମାନେ ନୂଆ ଟିମ ସହ ନୂଆ ଜୋଶରେ ସଂଗଠନକୁ ଆଗେଇ ନେବାକୁ ପ୍ରସ୍ତୁତ ହେଉଛନ୍ତି । ବିଜେଡ଼ି ବିଧାୟକ ମନୋହର ରନ୍ଧାରୀ କହିଛନ୍ତି ଯେ ପୂନର୍ବାର ନବୀନ ପଟ୍ଟନାୟକ ଦଳର ସଭାପତି ନିର୍ବାଚିତ ହେବେ । ନବୀନଙ୍କ ଲୋକପ୍ରିୟତା ଦିନକୁ ଦିନ ତୃଣମୂଳସ୍ତରୁ ବିଜେଡିକୁ ଅଧିକ ଶକ୍ତିଶାଳୀ କରୁଛି । ବିଜେଡ଼ି ସଂଗଠନକୁ ନୂଆରୂପ ଦେବାରେ ଲାଗିଛନ୍ତି ସୁପ୍ରିମୋ ନବୀନ ପଟ୍ଟନାୟକ । ସାଂଗଠନିକ ନିର୍ବାଚନ ପରେ ଦଳର ସବୁ ଛାମୁଆ ସଂଗଠନକୁ ମଧ୍ୟ ନୂଆରୂପ ଦେଇ ଦଳ ଓଡ଼ିଶାର ହକ ପାଇଁ ଲଢେଇ ଜାରି ରଖିବ ବୋଲି ଦଳୀୟ ନେତା କହିଛନ୍ତି । ତେବେ ନବୀନଙ୍କ ନୂଆ ଟିମର ରୂପରେଖକୁ ନେଇ ସସପେନ୍ସ ଜାରି ରହିଛି
ଆସନ୍ତା ୫ତାରିଖରୁ ୩ ଦିନିଆ ଓଡ଼ିଶା ଗସ୍ତରେ ଆସୁଛନ୍ତି ଷୋଡ଼ଶ ଅର୍ଥ କମିଶନ
ଭୁବନେଶ୍ବର : ଆସୁଛନ୍ତି ଷୋଡ଼ଶ ଅର୍ଥ କମିଶନ । କମିଶନ ପାଖରେ ଦାବି ରଖିବ ଓଡ଼ିଶା । ମିଳିବ କି ସ୍ବତନ୍ତ୍ର ଅନୁଦାନ, ବଢିବ କି ରାଜକୋଷ । ବିଜେଡି କହିଲା, କମିଶନ ପାଖରେ ସଠିକ ଦାବି ରଖନ୍ତୁ ସରକାର । ଆସନ୍ତା ୫ ତାରିଖରୁ ଷୋଡ଼ଶ ଅର୍ଥ କମିଶନ ୩ ଦିନିଆ ଓଡ଼ିଶା ଗସ୍ତରେ ଆସୁଛନ୍ତି । କେଉଁ କେଉଁ ପ୍ରସଙ୍ଗ ଉଠାଇ କମିଶନଙ୍କ ଧ୍ଯାନ ଆକର୍ଷଣ କରିବ ଓଡ଼ିଶା । ତାକୁ ନେଇ ଆରମ୍ଭ ହୋଇଛି ଚର୍ଚ୍ଚା । ପ୍ରତିବର୍ଷ ଓଡ଼ିଶା ପ୍ରାକୃତିକ ବିପର୍ଯ୍ୟୟର ସମ୍ମୁଖୀନ ହେଉଥିବାରୁ ଆର୍ଥିକ ମେରୁଦଣ୍ଡ ଦୋହଲିଯାଉଛି । ତେଣୁ ଓଡ଼ିଶାକୁ ସ୍ବତନ୍ତ୍ର ରାଜ୍ୟପାହ୍ୟା ନହେଲେ ସ୍ବତନ୍ତ୍ର ଅନୁଦାନ ଦେବା ପାଇଁ ବାରମ୍ବାର କେନ୍ଦ୍ର ପାଖରେ ଦାବି କରିଆସୁଛି ବିଜେଡି । ତେଣୁ ଷୋଡ଼ଶ ଅର୍ଥ କମିଶନ ପାଖରେ ରାଜ୍ୟ ସରକାର ଏହି ଦାବି ଉଠାଇବା ଦରକାର ବୋଲି ବିଜେଡି କହିଛି । କମିଶନଙ୍କ ଆସିବା ପୂର୍ବରୁ ରାଜ୍ୟ ସରକାର ବିରୋଧୀଙ୍କ ଠାରୁ ଗଠନମୂଳକ ପ୍ରସ୍ତାବ ନେଇଥିଲେ ଭଲ ହୋଇଥାନ୍ତା ବୋଲି ବିଜେଡି ବିଧାୟକ ପ୍ରତାପ ଦେବ କହିଛନ୍ତି । ଅନ୍ୟପଟେ କଂଗ୍ରେସ କହଛି ଡବଲ ଇଂଜିନ ସରକାର କମିଶନଙ୍କ ପାଖରେ କେଉଁ ଦାବି ରଖିବେ ତାହା ଉପରେ ଓଡ଼ିଶାବାସୀଙ୍କ ନଜର ରହିଛି । ବିହାର ଓ ଆନ୍ଧ୍ର ପ୍ରଦେଶ ପରି ଓଡ଼ିଶା କେନ୍ଦ୍ର ସରକାର ସ୍ବତନ୍ତ୍ର ଅନୁଦାନ ଦେବାକୁ ରାଜ୍ୟ ସରକାର କମିଶନଙ୍କ ପାଖରେ ଦାବି ରଖନ୍ତୁ ବୋଲି ବରିଷ୍ଠ କଂଗ୍ରେସ ନେତା ଜୟଦେବ ଜେନା କହିଛନ୍ତି ।
ଷୋଡ଼ଶ ଅର୍ଥ କମିଶନ ସହ ରାଜ୍ୟ ସରକାର ୬ ଓ ୭ ତାରିଖରେ ଆଲୋଚନା କରିବେ । ଜଳସେଚନ, ରେଳବାଇ , ରାସ୍ତାଘାଟ ଉନ୍ନତିକରଣ, ଗରିବ କଲ୍ୟାଣ ଯୋଜନା ସହ ପ୍ରାକୃତିକ ବିପର୍ଯ୍ୟୟ ମୁବାବିଲା ଉପରେ କମିଶନଙ୍କ ଦୃଷ୍ଟି ଆକର୍ଷଣ କରାଯିବ ବୋଲି ରାଜସ୍ବ ମନ୍ତ୍ରୀ କହିଛନ୍ତି । ଏସବୁ ପାଇଁ କେନ୍ଦ୍ର ସରକାରଙ୍କୁ ପ୍ରସ୍ତାବ ମଧ୍ୟ ଦିଆଯିବ । ସେପଟେ ବିଜେଡି ବିଧାୟକ ସାରଦା ଜେନା କହିଛନ୍ତି ଯେ ଓଡ଼ିଶା କିପରି ଅଧିକ ଅନୁଦାନ ପାଇବ ତାହା ଉପରେ ରାଜ୍ୟ ସରକାର ଗୁରୁତ୍ବ ଦିଅନ୍ତୁ । ଟିକସ ବାବଦରେ ରାଜ୍ୟ ଭାଗକୁ ବୃଦ୍ଧି କରିବାକୁ ଓଡ଼ିଶା ସରକାର ଦାବି କରନ୍ତୁ ବୋଲି ସେ ଦାବି କରିଛନ୍ତି । ଷୋଡ଼ଶ ଅର୍ଥ କମିଶନଙ୍କ ପାଖରେ ରାଜ୍ୟ କଣ ଦାବି କରୁଛି ଓ କେଉଁ କେଉଁ ପ୍ରସଙ୍ଗ ଉଠାଉଛି ତାହାକୁ ନେଇ ଚର୍ଚ୍ଚା ଆରମ୍ଭ ହୋଇଛି । ତେବେ ରାଜ୍ୟ ସରକାର କମିଶନଙ୍କ ପାଖରେ କେତେ ଦାବି କରୁଛନ୍ତି ଓ ଓଡ଼ିଶାକୁ କେତେ ମିଳୁଛି ତାହା ଉପରେ ସମସ୍ତଙ୍କ ନଜର ।
୨ ପ୍ରତିଶତ ତଳକୁ ଖସିଆସିବ ଦେଶର ଅଭିବୃଦ୍ଧି : ପି.ଚିଦାମ୍ବରମ୍
ନୂଆଦିଲ୍ଲୀ : ଦେଶର ଅଭିବୃଦ୍ଧି ଯାହା କେନ୍ଦ୍ର ସରକାର ଦର୍ଶାଉଛନ୍ତି ତାହା ୨ ପ୍ରତିଶତକୁ ଖସିଆସିବ । ଆସନ୍ତାକାଲି କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣ ୨୦୨୫-୨୬ ଆର୍ଥିକ ବର୍ଷ ବଜେଟ୍ ଆଗତ କରିବା ପୂର୍ବରୁ ଏପରି ଦାବି କରିଛନ୍ତି ପୂର୍ବତନ ଅର୍ଥମନ୍ତ୍ରୀ ତଥା ବରିଷ୍ଠ କଂଗ୍ରେସ ନେତା ପି.ଚିଦାମ୍ବରମ୍ । ଚିଦାମ୍ବରମ୍ କହିବା କଥା ଦେଶରେ ବେରୋଜଗାରୀ ବଢୁଛି । ଲୋକଙ୍କ କମିବ ସହ ଧନୀ ଗରିବ ତାରତମ୍ୟ ବଢିଚାଲିଛି । ଏ ନେଇ କଂଗ୍ରେସ ପକ୍ଷରୁ ଦେଶର ଅସଲ ଆର୍ଥିକ ସ୍ଥିତି ନେଇ ପୂର୍ବତନ ସାଂସଦ ରାଜୀବ ଗୌଡ଼ା ଏକ ରିପୋର୍ଟ ପ୍ରସ୍ତୁତ କରିଛନ୍ତି । ଯୁବ ବେରୋଜଗାରୀ ୪୦ ପ୍ରତିଶତ ବଢିଛି । ସରକାରୀ ଚାକିରିରେ ଖାଲି ପଡ଼ିଥିବା ପଦବୀ ପୂରଣ କରି କେନ୍ଦ୍ର ସରକାର କହୁଛନ୍ତି ନୂଆ ରୋଜଗାର ଦେଲେ । ଏହା ଅତ୍ୟନ୍ତ ଅବାସ୍ତବ କଥା । ଏହା କେବେ ବି ବେରୋଜଗାରୀ ଦୂର କରିବନି । ଦୁଇ ତିନି ବର୍ଷ ହେଲାଣି ଦେଶରେ ମୁଦ୍ରାସ୍ଫୀତି, ଖାଦ୍ୟ ସାମଗ୍ରୀ , ଶିକ୍ଷା ଓ ସ୍ବାସ୍ଥ୍ୟସେବା ମହଙ୍ଗା ହୋଇଛି । ଚିଦାମ୍ବରମ୍ଙ୍କ ସ୍ବରରେ ସ୍ବର ମିଳାଇଛି ରାଜ୍ୟ କଂଗ୍ରେସ । ସେପଟେ ଅର୍ଥନୀତି ବିଶେଷଜ୍ଞ ଆଶା ରଖିଛନ୍ତି ଯଦି ଆସନ୍ତା ବଜେଟ୍ରେ ପ୍ରତ୍ଯକ୍ଷ କର ଛାଡ଼ ସୀମାରେ ପରିବର୍ତ୍ତନ ନ ହୁଏ ତାହେଲେ ଲୋକଙ୍କ କ୍ରୟଶକ୍ତି ବଢିବନି ।
ଆସନ୍ତାକାଲି ବଜେଟ, ଆୟକର ଛାଡ ସୀମା ବୃଦ୍ଧି ନେଇ ଲୋକଙ୍କ ବଡ଼ ଆଶା
ଭୁବନେଶ୍ବର : ସଂସଦରେ ଆସିଲା ୨୦୨୪-୨୫ ଅର୍ଥନୈତିକ ସର୍ଭେ ରିପୋର୍ଟ । ରିପୋର୍ଟରେ ଦେଶର ଆର୍ଥିକ ଅବସ୍ଥା ବିଷୟରେ କମ୍, ବିଶ୍ବ ମାନ୍ଦାବସ୍ଥା କଥା ଅଧିକ କୁହାଯାଇଛି । ବର୍ଷସାରା ମହଙ୍ଗା ମାଡ଼ ଲୋକେ ଭୋଗିଲେ । ରୋଜଗାର ତୁଳନାରେ ବ୍ୟୟ ଅଧିକ । ବେରୋଜଗାରୀ ଚରମାସୀମାରେ । ଚାକିରିଆଠୁ ଆରମ୍ଭ କରି ମଧ୍ୟବିତ୍ତଙ୍କ ସଞ୍ଚୟ ଶୂନ । ତଥାପି କେନ୍ଦ୍ର ସରକାର କହୁଛନ୍ତି ଦେଶର ଆର୍ଥିକ ସ୍ଥିତି ଠିକ ଅଛି । ଦେଶର ବାସ୍ତବ ଅଭିବୃଦ୍ଧି ୬ ପ୍ରତିଶତ ରହିଛି । ରପ୍ତାନୀ କମ୍ ଆମଦାନୀ ଅଧିକ ଯୋଗୁ ବାଣିଜ୍ୟ ମନ୍ତ୍ରାଳୟ ମାସକ ତଳେ କହିଥିଲା ବାଣିଜ୍ଯିକ ନିଅଣ୍ଟ ଓ ଚଳନ୍ତି ଖାତା ଜମା କମୁଛି । କମୁଛି ବୈଦେଶିକ ମୁଦ୍ରା ଭଣ୍ଡାର । କିନ୍ତୁ କେନ୍ଦ୍ର ସରକାରଙ୍କ ଦାବି ଆମଦାନୀ ତୁଳନାରେ ରପ୍ତାନୀ ସନ୍ତୋଷଜନକ । ଏପରିକି ମଧ୍ୟପ୍ରାଚ୍ୟ ଯୁଦ୍ଧ, ଋଷ-ୟୁକ୍ରେନ୍ ଯୁଦ୍ଧ, ଇଉରୋପରେ ମୁଦ୍ରାସ୍ଫୀତିକୁ ଆଳ କରି ଦେଶରେ ଲୋକଙ୍କ ବାସ୍ତବ ସ୍ଥିତି ଭଲ ଥିବା ନେଇ ଏକ ପ୍ରକାର ଗୋଲାପି ଚିତ୍ର ଆଙ୍କିଛନ୍ତି କେନ୍ଦ୍ର ସରକାର । ଯାହାକୁ କଡ଼ା ସମାଲୋଚନା କରିଛନ୍ତି ବିରୋଧୀ । କେନ୍ଦ୍ର ସରକାରଙ୍କ ଅର୍ଥନୈତିକ ସର୍ଭେ ରିପୋର୍ଟ ଦେଶର ବାସ୍ତବ ଚିତ୍ରକୁ ଦର୍ଶାଉନି । ସରକାର ନିଜକୁ ସୁହାଇଲା ଭଳି ଆଧାର ବର୍ଷକୁ ବଦଳାଇ ଦେଶର ଅର୍ଥନୀତି ଆଗଉଥିବା ଦର୍ଶାଇଛନ୍ତି । ଚାଷୀକୁ ସୁହାଇଲାଭଳି କୃଷି ଉତ୍ପାଦର ଏମ୍ଏସ୍ପି ବୃଦ୍ଧି ପାଉନି । କିନ୍ତୁ ଗତବର୍ଷ କୃଷି କ୍ଷେତ୍ରର ସ୍ବାସ୍ଥ୍ୟ ଭଲ ଥିବା ସର୍ଭେ ରିପୋର୍ଟରେ ଦର୍ଶାଇବା ହାସ୍ୟାସ୍ପଦ ବୋଲି ବାମଦଳ ଅଭିଯୋଗ କରିଛି ।
ବିଶ୍ବ ମାନ୍ଦାବସ୍ଥା ପ୍ରଭାବରେ ଦେଶର ଉତ୍ପାଦନ ଶିଳ୍ପ ପ୍ରଭାବିତ ହୋଇଛି । କୋଭିଡ ପରଠୁ ଦେଶର ଅର୍ଥନୀତିରେ ସୁଧାର ଆସିଥିବା କେନ୍ଦ୍ର ସରକାର ରିପୋର୍ଟରେ ଦର୍ଶାଇଛନ୍ତି । ଅର୍ଥନୀତି ସମୀକ୍ଷକଙ୍କ ପ୍ରଶ୍ନ ଦେଶର ଅଭିବୃଦ୍ଧି ଲୋକଙ୍କ ଆର୍ଥିକ ସ୍ଥିତିକୁ ପ୍ରତିଫଳନ କରୁନାହିଁ । ନିତ୍ୟ ବ୍ୟବହାର୍ଯ୍ୟ, ଖାଦ୍ୟ ସାମଗ୍ରୀ ଦର ଏତେ ବୃଦ୍ଧି ପାଇଛି ଯେ, ପାଇକରୀ ଓ ଖୁଚୁରା ମୁଦ୍ରାସ୍ଫୀତିର ସବୁ ରେକର୍ଡ ଭାଙ୍ଗିଛି । ନୂଆ କରି ବ୍ୟାଙ୍କିଂ କ୍ଷେତ୍ରରେ ଆର୍ଟିଫିସିଆଲ ଇଣ୍ଟେଲିଜେନସ୍ ବ୍ୟବହାର ଯୋଗୁ ବ୍ୟାଙ୍କ କାର୍ଯ୍ୟ ଅଧିକ କ୍ରିୟାଶୀଳ ହୋଇଛି । ଏହା ଏକ ପ୍ରକାର ଭଲ ଅବସ୍ଥା । କିନ୍ତୁ ରାଷ୍ଟ୍ରାୟତ୍ତ ବ୍ୟାଙ୍କମାନଙ୍କ ଏନ୍ପିଏ ନେଇ କେନ୍ଦ୍ର ସରକାର ତାଙ୍କ ଅର୍ଥନୈତିକ ସର୍ଭେ ରିପୋର୍ଟରେ କିଛି ବି କହିନାହାନ୍ତି । ସବକା ସାଥ୍ ସବ୍କା ବିକାଶ । ଏହା ହେଉଛି କେନ୍ଦ୍ର ସରକାରଙ୍କ ନାରା । ଜାତୀୟ ସ୍ତରରେ ଲୋକଙ୍କ ମୁଣ୍ଡ ପିଛା ଆୟ ବଢୁନଥିବାବେଳେ କେନ୍ଦ୍ର ସରକାରଙ୍କ ଦାବି ବଜାର ଦର, ଉତ୍ପାଦନ ଓ ମାନ୍ଦାବସ୍ଥା ସତ୍ତ୍ବେ ଦେଶର ଆର୍ଥିକ ସ୍ଥିତିରେ ସ୍ଥିରତା ରହିବ । ଏମିତି ଏକ ଦ୍ବନ୍ଦ୍ବାତ୍ମକ ଆର୍ଥିକ ସ୍ଥିତି ଭିତରେ ଆସନ୍ତାକାଲି ବଜେଟରେ କେନ୍ଦ୍ର ଅର୍ଥମନ୍ତ୍ରୀ ଦେଶବାସୀଙ୍କୁ କଣ ଭେଟି ଦେଉଛନ୍ତି ତାକୁ ଅପେକ୍ଷା ରଖିଛନ୍ତି ସାଧାରଣ ଲୋକେ ।
ବିଜେପି ସରକାର ଉପରେ ବର୍ଷିଲା ଛାତ୍ର କଂଗ୍ରେସ
ଭୁବନେଶ୍ବର : ଗତକାଲି ଆରଏସଏସ ନେତା ମୋହନ ଭାଗବତଙ୍କ ଗସ୍ତ ବେଳେ କଳା ପତାକା ଦେଖାଇ ଗିରଫ ଛାତ୍ର କଂଗ୍ରେସ ନେତା । ଗଣତ୍ରାନ୍ତ୍ରିକ ପ୍ରକ୍ରିୟାରେ ବିରୋଧ ପ୍ରଦର୍ଶନ କରାଯାଇଥିଲେ ବି ପୋଲିସ ଅଗଣତାନ୍ତ୍ରିକ ଭାବରେ ମିଛ କେସ ରୁଜୁ କରି ଛାତ୍ର କଂଗ୍ରେସ ସଭାପତିଙ୍କୁ ଜେଲ ପଠାଇଛି । ଯାହାକୁ ବିରୋଧ କରି ବିଜେପି ସରକାର ଉପରେ ବର୍ଷିଛି ଛାତ୍ର କଂଗ୍ରେସ । ପୂର୍ବତନ ରାଜ୍ୟ ପାଳଙ୍କ ପୁଅ ଓଡ଼ିଆ ପୁଅଙ୍କୁ ମାଡ ମାରିଲେ ସେତେବେଳେ ନ୍ୟାୟିକ ପକ୍ରିୟା କୁଆଡେ ଯାଇଥିଲା ବୋଲି ପ୍ରଶ୍ନ କରିଛି ଛାତ୍ର କଂଗ୍ରେସ । ରାଜ୍ୟରେ ଦୁଇଟି ଆଇନ ଚାଲିବ ନାହିଁ । ଇଂରେଜମାନେ ଯେଉଁଭଳି ସ୍ୱାଧୀନତା ସଂଗ୍ରମୀଙ୍କୁ ଜେଲରେ ପୁରାଉଥିଲେ, ରାଜ୍ୟରେ ମଧ୍ୟ ପୋଲିସ ସେହିଭଳି କାଯ୍ୟ କରୁଛି l ବେଆଇନ ଗିରଫଦାରିକୁ ନେଇ ଆସନ୍ତା ଦୁଇ ଦିନ ପର୍ଯନ୍ତ ରାଜ୍ୟ ଯୁବ ଏବଂ ଛାତ୍ର କଂଗ୍ରେସ ସମସ୍ତ ଏସପି ଅଫିସ ଆଗରେ ବିରୋଧ ପଦର୍ଶନ କରିବ । ଆଗାମୀ ଦିନରେ ବିଜେପି ନେତା ଯେଉଁ ସ୍ଥାନକୁ ଜିବେ ସେଠାରେ ତାଙ୍କୁ କଳା ପତାକା ଦେଖାଯିବା ସହ ବିରୋଧ ପଦର୍ଶନ କରାଯିବ ବୋଲି ଚେତାବନୀ ଦେଇଛି ଯୁବ ଏବଂ ଛାତ୍ର କଂଗ୍ରେସ । ରାଜ୍ଯରେ ଆଉ ଗଣତନ୍ତ୍ର ନାହିଁ ବୋଲି କହିଛନ୍ତି ବରିଷ୍ଠ କଂଗ୍ରେସ ନେତା ନିରଞ୍ଜନ ପଟ୍ଟନାୟକ । କଳା ପତାକା ପ୍ରଦର୍ଶନର ଅଧିକାର ସମସ୍ତଙ୍କର ରହିଛି । ଗଣତନ୍ତ୍ରରେ ଏହା ଗ୍ରହଣୀୟ । କିନ୍ତୁ ବର୍ତ୍ତମାନର ସରକାର ଅସହିଷ୍ଣୁ ହୋଇପଡିଛି । ଯାହାକି ଅତ୍ୟନ୍ତ ନିନ୍ଦନୀୟ ବୋଲି କହିଛନ୍ତି ନିରଞ୍ଜନ। ଏଥିସହ ଆଜି ଛାତ୍ର ଓ ଯୁବ କଂଗ୍ରେସ କର୍ମୀ ମୁଖ୍ୟମନ୍ତ୍ରୀଙ୍କ ବାସଭବନ ଘରାଉ କରିଛନ୍ତି । ସେପଟେ କଂଗ୍ରେସର ଅଭିଯୋଗ ଉପରେ ଜବାବ ରଖିଛି ବିଜେପି । କାରକେଡ଼ ଆଗକୁ ଆସିକି ହିଂସା କରିବା କେଉଁ ଗଣତନ୍ତ୍ରରେ ଲେଖା ଯାଇଛି ବୋଲି ପ୍ରଶ୍ନ କରିଛନ୍ତି ବିଜେପି ମୁଖପାତ୍ର ଅନୀଲ ବିଶ୍ୱାଳ ।
‘ଟ୍ରିବ୍ୟୁନାଲରେ ଆଲୋଚନା ପରେବି ସମସ୍ତ ଗେଟ୍ ବନ୍ଦ୍ କଲା ଛତିଶଗଡ଼’
ସମ୍ବଲପୁର : ସାମ୍ନାକୁ ଆସିଲା ଡବଲ ଇଞ୍ଜିନ ଡବଲ ଧୋକା । ଓଡ଼ିଶାର ଜୀବନ ରେଖା ମହାନଦୀକୁ ଶୁଖାଇବାକୁ ଛତିଶଗଡ଼ ସରକାରଙ୍କ ବଡ଼ ପ୍ଲାନ୍ । ମହାନଦୀ ଜଳ ବିବାଦ ଟ୍ରିବ୍ୟୁନାଲରେ ଆଲୋଚନା ପରେବି ସମସ୍ତ ଗେଟ୍ ବନ୍ଦ୍ କରିଦେଲେ ଛତିଶଗଡ଼ ସରକାର । ପୂର୍ବରୁ ଶିବରୀ ନାରାୟଣ ଵ୍ୟାରେଜ୍ ସହ ଉପର ମୁଣ୍ଡର ଅନେକ ବ୍ୟରେଜ୍ ବନ୍ଦ କରାଯାଇଥିଲା । କିଛି ଦିନ ହେଲା କଲମା ବ୍ୟରେଜର ବି ସମସ୍ତ ୬୬ ଫାଟକ ବନ୍ଦ୍ କରିଦେଇଛନ୍ତି ଛତିଶଗଡ଼ ସରକାର ।ଯାହାଫଳରେ ହୀରାକୁଦ ଜଳଭଣ୍ଡାରକୁ ମାତ୍ର ୩୭୮ ଘନଫୁଟ ଜଳ ପ୍ରବେଶ କରୁଥିବା ସୂଚନା ମିଳିଛି । ଯାହାକୁ ନେଇ ଦେଖାଦେଲାଣି ଉତ୍କଟ ଜଳାଭାବ ।କାରଣ ମହାନଦୀରେ ଏବେ ପାଣି ନାହିଁ। କିଛି ଦିନ ଭିତରେ ସମ୍ପୂର୍ଣ ଭାବେ ଶୁଖିଗଲାଣି ମହାନଦୀ । କିନ୍ତୁ ଏହି ସମୟରେ ବି ରାଜ୍ୟ ସରକାର କାହିଁକି ଚୁପ୍ ବୋଲି ରାଜ୍ୟବାସୀ ପ୍ରଶ୍ନ କରିଛନ୍ତି ।
ଚୋରଙ୍କ ଚତୁରତା ଆଗରେ ପୋଲିସର ପାରିବାପଣିଆ ଫେଲ୍, ଲୁଟେରାଙ୍କ ହଲ୍ଲାବୋଲକୁ ନେଇ ଚିନ୍ତାରେ ସହରବାସୀ
ଭୁବନେଶ୍ବର : ସାମ୍ନାକୁ ଆସୁଛି ଭୁବନେଶ୍ୱର ପୋଲିସିଂର ବିକଳ ଚିତ୍ର । ଆଉ କେତେ ହେଲେ ଚେତିବ କମିଶନରେଟ ପୋଲିସ୍ ? ଚୋରଙ୍କ ଚତୁରତା ଆଗରେ ପୋଲିସର ପାରିବାପଣିଆ ଫେଲ୍ । ଏଟିଏମ୍ ଲୁଟ୍, ଗଳିତ ମୃତଦେହ ଉଦ୍ଧାର ଘଟଣାରେ ଏବେ ବି ପୋଲିସ୍ ହାତ ଖାଲି । ସତ୍ୟନଗର ସ୍ଥିତ ଏହି ଘରୁ ମିଳିଛି ଦୁଇ ଯୁବକଙ୍କ ମୃତଦେହ । “ମୋ ପିଠା” ନାମକ ସୁଇଟ୍ ଭେଣ୍ଡର ପାଖେ କାମ କରୁଥିବା ବେଳେ ଦୁଇ ଯୁବକଙ୍କ ଘଟିଛି ଅସ୍ୱାଭାବିକ ମୃତ୍ୟୁ । ସାଇଣ୍ଟିଫିକ ଟିମ ଓ ଖାରବେଳ ନଗର ଥାନା ପୋଲିସ ପାରିପାର୍ଶ୍ବିକ ପରିସ୍ଥିତି ଯାଞ୍ଚ ସହ ସଂସ୍ଥା ମାଲିକଙ୍କୁ ଡାକି ଜେରା କରିଛି । ତେବେ ଏହି ଗୋଟିଏ ଘଟଣା ନୁହେଁ, ରାଜଧାନୀର ବିପର୍ଯ୍ୟସ୍ତ ଆଇନଶୃଙ୍ଖଳାକୁ ନେଇ ବ୍ୟାକଫୁଟରେ ପୋଲିସ । ୨୫ ତାରିଖ ରାତିରେ ନିରଞ୍ଜନ ପଟ୍ଟନାୟକଙ୍କ ଘରୁ ଲୁଟ ପରେ ଆଇନଶୃଙ୍ଖଳା ପରିସ୍ଥିତି ନେଇ ସେ ପୋଲିସ ଉପରେ ବର୍ଷିଛନ୍ତି । ଭରତପୁର ଥାନାରେ ମେଜର ଓ ତାଙ୍କ ବାନ୍ଧବୀଙ୍କୁ ଦୁର୍ବ୍ୟବହାର ଠାରୁ ଆରମ୍ଭ କରି ସହଦେବ ନାୟକଙ୍କୁ ବିଭତ୍ସ ହତ୍ୟା, ସାରା ରାଜ୍ୟରେ ମାରାଥନ ଲୁଟ ପୋଲିସର ଅସଲ ଚେହେରାକୁ ପଦାରେ ପକାଇଥିବା କହିଛନ୍ତି ନିରଞ୍ଜନ । ସାରା ଓଡିଶା ଏବେ ଅପରାଧୀଙ୍କ ଚରାଭୂଇଁ ପାଲଟିଥିବା ବେଳେ ଦକ୍ଷ ପୋଲିସ ଅଫିସରଙ୍କ ଆବଶ୍ୟକତା ଓ ତଦନ୍ତ ପ୍ରକ୍ରିୟାରେ ଜ୍ଞାନ କୌଶଳର ବ୍ୟବହାର ଉପରେ ଫୋକସ ଦେବାକୁ କହିଛନ୍ତି ନିରଞ୍ଜନ । ଅନ୍ୟପଟେ ନିରଞ୍ଜନଙ୍କ ଘରୁ ଲୁଟ ଘଟଣାରେ ତଦନ୍ତ ଚାଲିଥିବା କହିଛନ୍ତି ପୋଲିସ କମିଶନର ।
ଧଉଳି ଥାନା ଲିଙ୍ଗିପୁର ମେଳଣ ପଡିଆ ନିକଟରୁ ମହିଳାଙ୍କ ଗଳିତ ମୃତଦେହ ଠାବ ଘଟଣାରେ ହତ୍ୟା ସନ୍ଦେହ କରିଛି ପୋଲିସ । ୧୦ ରୁ ୧୫ ଦିନ ପୂର୍ବରୁ ତାଙ୍କର ମୃତ୍ୟୁ ହୋଇଥିବାବେଳେ ମୃତଦେହ ସେଠାରେ ଆଣି ପକାଯାଇଥିବା ସନ୍ଦେହ କରାଯାଉଛି । ସେପଟେ ଲିଙ୍ଗରାଜ ଥାନା ସମନ୍ତରାପୁରର ଶ୍ରୀରାମନଗରରେ ଥିବା SBI ଏଟିଏମ ରେ ପଶି ୧୦ ଲକ୍ଷରୁ ଉର୍ଦ୍ଧ୍ବ ଟଙ୍କା ଲୁଟିନେଇଥିଲେ ଲୁଟେରା । କେବଳ ଟଙ୍କା ନୁହେଁ ATM କୁ ତାଡି ନେଇ ଗଙ୍ଗୁଆ ନାଳରେ ଫୋପାଡି ଦେଇଥିଲେ । ପୋଲିସ ଅଭିଯୁକ୍ତଙ୍କୁ ଏଯାଏ ଧରିପାରି ନାହିଁ । କେବଳ ଚୋରିରେ ବ୍ୟବହୃତ ଅଟୋକୁ ପାଇ ଚୁପ ବସିଛି । ସହର ବଢିବା ସାଙ୍ଗକୁ ଅପରାଧୀଙ୍କ ଅପରେସନର ଅନ୍ଦାଜ ପରିବର୍ତ୍ତନ ହେଉଥିବା ଦେଖି ଚିନ୍ତାପ୍ରକଟ କରିଛନ୍ତି ସ୍ଥାନୀୟ ବାସିନ୍ଦା ।
ସମ୍ବଲପୁର ସମର୍ଥରେ ନିର୍ଯାତନା ମାମଲା, ଅନ୍ତେବାସୀଙ୍କୁ ନେତାଜୀ ନଗରରୁ ବୈଜାମୁଣ୍ଡା ଆବାସ କେନ୍ଦ୍ରକୁ ସ୍ଥାନାନ୍ତର
ସମ୍ବଲପୁର : ଦୀର୍ଘଦିନର ଅତ୍ଯାଚାରରୁ ମିଳିଲା ମୁକ୍ତି । ସମର୍ଥରୁ ବାହାରି ବୈଜାମୁଣ୍ଡା ଆବାସ କେନ୍ଦ୍ର ଗଲେ ଅନ୍ତେବାସୀ । ସାମାଜିକ ସୁରକ୍ଷା କଲ୍ଯାଣ ଅଧିକାରୀଙ୍କୁ ନୋଟିସ୍ । ଖୁବଶୀଘ୍ର ରିମାଣ୍ଡରେ ଆସିବେ ଅଭିଯୁକ୍ତ । ସମ୍ବଲପୁର ମାନସିକ ଅନଗ୍ରସର କେନ୍ଦ୍ର ସମର୍ଥରେ ନିର୍ଯାତନା ଓ ଦୁଷ୍କର୍ମ ଅଭିଯୋଗ ପରେ ଅନ୍ତେବାସୀଙ୍କୁ ସ୍ଥାନାନ୍ତର କରିଛି ଜିଲ୍ଲା ପ୍ରଶାସନ । ନେତାଜୀ ନଗରରୁ ବୈଜାମୁଣ୍ଡା ଆବାସ କେନ୍ଦ୍ରକୁ ସମସ୍ତ ଅନ୍ତେବାସୀଙ୍କୁ ସ୍ଥାନାନ୍ତର କରାଯାଇଛି । ଖୋର୍ଦ୍ଧାର ଏକ ଅନୁଷ୍ଠାନ ସମସ୍ତଙ୍କ ଦାୟିତ୍ବ ନେବ । ସ୍ୱାସ୍ଥ୍ୟ ଠାରୁ ଖାଇବା ପର୍ଯ୍ୟନ୍ତ ସମସ୍ତ କଥା ବୁଝିବ ସଂସ୍ଥା l ଏହାକୁ ମନିଟରିଙ୍ଗ କରିବା ପାଇଁ ବିଭିନ୍ନ ଅଧିକାରୀଙ୍କୁ ନିୟୋଜିତ କରାଯାଇଛି l ଯେଉଁ ମାନଙ୍କ ସ୍ୱାସ୍ଥ୍ୟବ୍ୟବସ୍ଥାରେ ଉନ୍ନତି ଆସିଲା ସେମାଙ୍କୁ ତାଙ୍କ ପରିବାରକୁ ହସ୍ତାନ୍ତର କରାଯିବ l ଏହାସହ ମାମଲାରେ ବିଭାଗୀୟ ଅଧିକାରୀଙ୍କୁ କାରଣ ଦର୍ଶାଅ ନୋଟିସ ଜାରି କରିଛନ୍ତି ଜିଲ୍ଲାପାଳ । ଏପରି ସମ୍ବେଦନଶୀଳ ଘଟଣା କାହିଁକି ଓ କେଉଁ ପରିସ୍ଥିତିରେ ଘଟିଲା ? ଏହାକୁ ପୂର୍ବରୁ କିପରି ଅଧିକାରୀ ଜାଣି ପାରିଲେ ନାହିଁ ? ଅଧିକାରୀମାନେ ନିୟମ ଅନୁଯାୟୀ କେତେଥର ପରିଦର୍ଶନ କରିଛନ୍ତି ? ସେନେଇ ଉତ୍ତର ଦେବାକୁ କୁହାଯାଇଛି ।
ସ୍ଥାନାନ୍ତର କରିବା ବେଳେ ସଂସ୍ଥାର ଅତ୍ଯାଚାରର କାହାଣୀ ବଖାଣିଛନ୍ତି ଅନ୍ତେବାସୀ । କିପରି ବାନ୍ଧି ପଶୁପରି ମାଡ଼ ମରାଯାଉଥିଲା । ଖାଇବାକୁ ମାଗିଲେ କିପରି ନିର୍ଯାତନା ମିଳୁଥିଲା । ସେନେଇ କ୍ଯାମେରା ଆଗରେ କହିଛନ୍ତି ଦୁଃଖଭରା କାହାଣୀ । ତେବେ ଏମାନଙ୍କୁ ଯଦି ଉପଯୁକ୍ତ ଚିକିତ୍ସା, ଖାଦ୍ୟପେୟ ଓ ଔଷଧ ଦିଆଗରେ ଖୁବଶୀଘ୍ର ଭଲ ହୋଇ ଘରକୁ ଫେରିବେ ବୋଲି କହିଛନ୍ତି ସ୍ବେଚ୍ଛାସେବୀ । ସେପଟେ ମାମଲାର ଅଧିକ ତଦନ୍ତ ପାଇଁ ହରିଶ ଦାସକୁ ରିମାଣ୍ଡରେ ଆଣିବାକୁ ଯୋଜନା କରିଛି ପୋଲିସ ।