ବଲାଙ୍ଗୀର : ବଲାଙ୍ଗୀର ସହରରେ ଟ୍ରାଫିକ ସମସ୍ୟା । ଜବରଦଖଲ କରି ଗଢ଼ି ଉଠିଛି ଦୋକାନ ଓ ସପିଂ ମଲ୍ । ରାସ୍ତା ଉପରେ ପାର୍କିଂ ଯୋଗୁଁ ସୃଷ୍ଟି ହେଉଛି ସମସ୍ୟା । ଚେସ୍ ବୋର୍ଡର ସହର ବଲାଙ୍ଗୀରରେ ଟ୍ରାଫିକ ସମସ୍ୟା ପାଇଁ ଅସୁବିଧାର ସମ୍ମୁଖୀନ ହେଉଛନ୍ତି ସାଧାରଣ ଲୋକେ । ଦୋକାନ, ମଲ୍ ଗୁଡ଼ିକର ପାର୍କିଂ ବ୍ୟବସ୍ଥା ନଥିବାରୁ ରାସ୍ତା ଉପରେ ପାର୍କିଂ କରୁଛନ୍ତି ଗ୍ରାହକ  । ଅନେକ ବ୍ୟବସାୟୀ ଡ୍ରେନ୍ ଉପରେ ବ୍ୟବସାୟ କରୁଥିବାରୁ ରାସ୍ତା ଉପରେ ଗାଡ଼ି ପାର୍କିଂ ହେଉଛି  । ପୋଲିସ ଓ ପ୍ରଶାସନ ପକ୍ଷରୁ ବିଭିନ୍ନ ସମୟରେ ଏନଫୋର୍ସମେଣ୍ଟ କରାଯାଉଛି  । ତାପରେ ମଧ୍ୟ ପୁଣି ଅମାନିଆମାନେ ରାସ୍ତା ଉପରକୁ ଚାଲି ଆସୁଛନ୍ତି  । ରାସ୍ତା ସଂକିର୍ଣ୍ଣ ଯୋଗୁଁ ଟ୍ରାଫିକରେ ଫସି ହଇରାଣ ହରକତ ହେଉଛନ୍ତି ଲୋକେ  । ପିଲାମାନେ ସଠିକ ସମୟରେ ସ୍କୁଲରେ ପହଞ୍ଚପାରୁନାହାନ୍ତି । ଅଫିସ ଯାଉଥିବା ଲୋକେ ବିଳମ୍ବରେ ପହଞ୍ଚୁଛନ୍ତି । ଗୁରୁତର ରୋଗୀଙ୍କୁ ନେଇ ହସ୍ପିଟାଲ ଯାଉଥିବା ଆମ୍ବୁଲାନ୍ସ ଓ ଅଗ୍ନିଶମ ବାହିନୀର ଗାଡ଼ି ଟ୍ରାଫିକରେ ଫସି ରହୁଛି  । ଅବ୍ୟବସ୍ଥିତ ଟ୍ରାଫିକ୍ ସମସ୍ୟା ସୃଷ୍ଟି ଯୋଗୁଁ ଲୋକଙ୍କ ମଧ୍ୟରେ ଅସନ୍ତୋଷ ବୃଦ୍ଧି ପାଉଛି  ।

ରାଜା ରାଜୁଡ଼ା ଅମଳରୁ ବଲାଙ୍ଗୀର ସହରରେ ରହିଥିବା ରାସ୍ତା ଏବେ ବ୍ୟସ୍ତବହୁଳ ହୋଇପଡ଼ିଛି  । ନିୟମକୁ ଖୋଲାଖୋଲି ଉଲ୍ଲଘଂନ କରି ରାସ୍ତା ଉପରେ ପାର୍କିଂ କରାଯାଉଥିବାରୁ ଟ୍ରାଫିକ ସମସ୍ଯା ସୃଷ୍ଟି ହେଉଛି  । ନିଜସ୍ଵ ପାର୍କିଂ ବ୍ଯବସ୍ଥା ନଥିବା ସ୍ଥଳେ କିଛି ସପିଂ ମଲ୍ ଗୁଡ଼ିକୁ କିଭଳି ଭାବେ ଅନୁମତି ପ୍ରଦାନ କରାଗଲା ବୋଲି ପ୍ରଶ୍ନ ଉଠିଛି । ଆଉ କିଛି ମଲ୍ ଓ ଦୋକାନୀଙ୍କ ପାର୍କିଂ ସ୍ଥଳକୁ ଗୋଦାମ ଭାବେ ବ୍ଯବହାର କରୁଛନ୍ତି । ବଡ଼ବଡ଼ିଆଙ୍କ ଚାପରେ ପୋଲିସ ପ୍ରଶାସନ ନୀରବଦ୍ରଷ୍ଟା ସାଜିଥିବା ଅଭିଯୋଗ ହୋଇଛି  । ରାସ୍ତା ଜବରଦଖଲ ହଟାଇ ପାର୍କିଂ ବ୍ୟବସ୍ଥାକୁ ସୁନିଶ୍ଚିତ କରିବା ପାଇଁ ଲୋକେ ଦାବି କରିଛନ୍ତି । ସେପଟେ ମ୍ୟୁନିସପାଲିଟି ପକ୍ଷରୁ ଡ୍ରାଇଭ ଆରମ୍ଭ କରାଯାଉଥିବା କହିଛନ୍ତି ବଲାଙ୍ଗୀର ପୌର ନିର୍ବାହୀ ଅଧିକାରୀ । ବଲାଙ୍ଗୀର ସହରରେ ଟ୍ରାଫିକ ସମସ୍ୟାକୁ ସୁଧାରିବା ପାଇଁ ଜବର ଦଖଲ ଉଚ୍ଛେଦ ସହିତ ରାସ୍ତା ପ୍ରଶସ୍ତିକରଣର ଆବଶ୍ୟକତା ରହିଛି । ଏହା ସହିତ ଜିଲ୍ଲା ପ୍ରଶାସନ ଓ ମୁନିସିପାଲିଟି ପକ୍ଷରୁ ବ୍ୟବସାୟ ସ୍ଥଳି ଓ ପାର୍କିଂ ବ୍ୟବସ୍ଥା ସୁନିଶ୍ଚିତ କରିବା ଜରୁରୀ ହୋଇପଡ଼ିଛି ।