ନନ୍ଦିଘୋଷ ବ୍ୟୁରୋ: ଆଜି ଗଞ୍ଜାମର ବନ୍ୟାଞ୍ଚଳ ପରିଦର୍ଶନ କରିବ ବିଜେଡି ପ୍ରତିନିଧି ଦଳ । ବିଜେଡି ସୁପ୍ରିମୋ ନବୀନ ପଟ୍ଟନାୟକଙ୍କ ନିର୍ଦ୍ଦେଶରେ ଟିମ ଆଜି ଜିଲ୍ଲାର ବିଭିନ୍ନ ସ୍ଥାନରେ ସ୍ଥିତି ଅନୁଧ୍ୟାନ କରିବା ସହ ଜିଲ୍ଲାପାଳଙ୍କ ସହ ଆଲୋଚନା କରିବେ । ରିଲିଫ ଓ ଉଦ୍ଧାର କାର୍ଯ୍ୟ ସମ୍ପର୍କରେ RDC ଓ ଜିଲ୍ଲାପାଳଙ୍କ ସହ ଆଲୋଚନା କରିବ ଟିମ୍ । ପରେ ପ୍ରତିନିଧି ଦଳ ବିରୋଧୀଦଳ ନେତା ନବୀନ ପଟ୍ଟନାୟକଙ୍କୁ ଭେଟି ଏକ ରିପୋର୍ଟ ଦେବ। ଏହି ଦୁର୍ଦ୍ଦିନରେ ଲୋକଙ୍କ ସହିତ ରହିବାକୁ ଓ ସେମାନଙ୍କ ସେବା କରିବାକୁ ବିଜେଡି କର୍ମୀଙ୍କୁ ପରାମର୍ଶ ଦେଇଛନ୍ତି ନବୀନ ପଟ୍ଟନାୟକ । ଆଜି ଟିମ ପ୍ରଥମେ ଚିକିଟିରେ ପହଞ୍ଚି ସ୍ଥିତି ଅନୁଧ୍ୟାନ କରିବାପରେ ୯ଟା ୩୦ରେ ପାଟପୁରରେ ସ୍ଥିତି ପରଖି ଥିବା ବେଳେ, ୧୨ଟାରେ ହିଞ୍ଜିଳି ଓ ଶେରଗଡ଼, ୨ଟା ୩୦ରେ ଆସିକା, ୪ଟା ୩୦ରେ ପୁରୁଷୋତ୍ତମପୁରରେ ସ୍ଥିତି ସମୀକ୍ଷା କରିବେ । ଏହାପରେ ୬ଟା ୩୦ରେ ଗଞ୍ଜାମ ଜିଲ୍ଲାପାଳଙ୍କୁ ଭେଟି ଆଲୋଚନା କରିବାର କାର୍ଯ୍ଯକ୍ରମ ରହିଛି । ବିରୋଧୀ ଦଳର ମୁଖ୍ୟ ସଚେତକ ପ୍ରମିଳା ମଲ୍ଲିକଙ୍କ ନେତୃତ୍ୱରେ ଏହି ପ୍ରତିନିଧି ଦଳ ଗଞ୍ଜାମ ଯାଇଛନ୍ତି । ଏହି ପ୍ରତିନିଧି ଦଳରେ ଅଛନ୍ତି ପ୍ରତାପ ଜେନା, ଟୁକୁନି ସାହୁ, ବିକ୍ରମ ପଣ୍ଡା, ରମେଶ ଚନ୍ଦ୍ର ଚ୍ୟାଉ ପଟ୍ଟନାୟକ, ଚନ୍ଦ୍ରଶେଖର ସାହୁ, ଭୃଗୁ ବକ୍ସିପାତ୍ର, ଚିନ୍ମୟ ସାହୁ, ରଂଜିତା ସାହୁ ଓ ସଂଘମିତ୍ରା ଦଳେଇ । ଏହି ପ୍ରତିନିଧି ଦଳ ଆଜି ଗଞ୍ଜାମ ଗସ୍ତ କରି ବିପନ୍ନଙ୍କୁ ଭେଟି କ୍ଷୟକ୍ଷତିର ଆକଳନ କରିବ । ଗତକାଲି ଜିଲ୍ଲାର ବନ୍ୟ। ସ୍ଥିତି ସମ୍ପର୍କରେ ଜିଲ୍ଲପାଳଙ୍କ ସହ କଥା ହୋଇଥିଲେ ବିରୋଧୀ ଦଳ ନେତା ତଥା ବିଜେଡି ସୁପ୍ରିମୋ ନବୀନ ପଟ୍ଟନାୟକ ।
ଆଜି ଇନ୍ଦିରା ଗାନ୍ଧୀଙ୍କ ୪୨ତମ ଶ୍ରାଦ୍ଧବାର୍ଷିକୀ, ମନେ ପକାଉଛି ସାରା ଦେଶ
ନନ୍ଦିଘୋଷ ବ୍ୟୁରୋ: ଆଜି ଅକ୍ଟୋବର ୩୧। ଦେଶ ମନେ ପକାଉଛି ଭାରତର ପ୍ରଥମ ମହିଳା ପ୍ରଧାନମନ୍ତ୍ରୀ ତଥା ପ୍ରଭାବଶାଳୀ ରାଜନୈତିକ ନେତ୍ରୀ ଇନ୍ଦିରା ଗାନ୍ଧୀଙ୍କୁ। ଆଜି ତାଙ୍କର ୪୨ତମ ଶ୍ରାଦ୍ଧବାର୍ଷିକୀ। ୧୯୮୪ ମସିହା ଅକ୍ଟୋବର ୩୧ ତାରିଖରେ ନୂଆଦିଲ୍ଲୀସ୍ଥିତ ନିଜ ବାସଭବନ ପରିସରରେ ସୁରକ୍ଷାକର୍ମୀଙ୍କ ଗୁଳିମାଡ଼ରେ ତାଙ୍କର ମୃତ୍ୟୁ ହୋଇଥିଲା। ଏହି ଘଟଣା ଦେଶର ରାଜନୈତିକ ଇତିହାସରେ ଏକ ବଡ଼ ଅଧ୍ୟାୟ ହୋଇ ରହିଛି।
୧୯୧୭ ମସିହା ନଭେମ୍ବର ୧୯ରେ ଆହ୍ଲାବାଦରେ ଜନ୍ମଗ୍ରହଣ କରିଥିଲେ ଇନ୍ଦିରା ଗାନ୍ଧୀ। ସେ ଥିଲେ ଭାରତର ପ୍ରଥମ ପ୍ରଧାନମନ୍ତ୍ରୀ ଜବାହରଲାଲ ନେହରୁଙ୍କ କନ୍ୟା। ୧୯୬୬ ମସିହାରେ ଦେଶର ଶାସନ ଭାର ଗ୍ରହଣ କରି ସେ ଭାରତର ପ୍ରଥମ ମହିଳା ପ୍ରଧାନମନ୍ତ୍ରୀ ହୋଇଥିଲେ। ୧୯୬୬ରୁ ୧୯୭୭ ଏବଂ ପୁଣି ୧୯୮୦ରୁ ୧୯୮୪ ପର୍ଯ୍ୟନ୍ତ ସେ ଏହି ପଦରେ ରହିଥିଲେ।
ତାଙ୍କ ଶାସନକାଳରେ ୧୯୭୧ ଭାରତ-ପାକିସ୍ତାନ ଯୁଦ୍ଧ, ବାଂଲାଦେଶର ସ୍ୱାଧୀନତା, ବ୍ୟାଙ୍କ ଜାତୀୟକରଣ ଏବଂ ସବୁଜ ବିପ୍ଳବ ଭଳି ଅନେକ ଐତିହାସିକ ଘଟଣା ଘଟିଥିଲା। ତେବେ ୧୯୭୫ରୁ ୧୯୭୭ ପର୍ଯ୍ୟନ୍ତ ଜରୁରୀକାଳୀନ ପରିସ୍ଥିତି ଘୋଷଣା ଏବଂ ନାଗରିକ ସ୍ୱାଧୀନତା ଉପରେ କଟକଣା ପାଇଁ ତାଙ୍କ ଶାସନକାଳ ବିବାଦୀୟ ମଧ୍ୟ ହୋଇଥିଲା।
ପ୍ରତିବର୍ଷ ଅକ୍ଟୋବର ୩୧ରେ ତାଙ୍କ ଶ୍ରାଦ୍ଧବାର୍ଷିକୀ ଅବସରରେ ଦେଶର ବିଭିନ୍ନ ସ୍ଥାନରେ ଶ୍ରଦ୍ଧାଞ୍ଜଳି ସଭା ଓ ସ୍ମୃତିଚାରଣ କାର୍ଯ୍ୟକ୍ରମ ଆୟୋଜନ କରାଯାଏ। ଦେଶର ରାଜନୈତିକ ଇତିହାସରେ ଇନ୍ଦିରା ଗାନ୍ଧୀଙ୍କ ଭୂମିକା ଆଜି ବି ଚର୍ଚ୍ଚାର ବିଷୟ ହୋଇ ରହିଛି।
ବାତ୍ୟା ‘ଅର୍ଣ୍ଣବ’ର ତାଣ୍ଡବ: କନ୍ଧମାଳ-ଗଞ୍ଜାମରେ ଭୂସ୍ଖଳନ
ନନ୍ଦିଘୋଷ ବ୍ୟୁରୋ: ବାତ୍ୟା ‘ଅର୍ଣ୍ଣବ’ ପ୍ରଭାବରେ କନ୍ଧମାଳ ଏବଂ ଗଞ୍ଜାମ ଜିଲ୍ଲାର ବିଭିନ୍ନ ଅଞ୍ଚଳରେ ଭୟଙ୍କର ଭୂସ୍ଖଳନ ଦେଖାଦେଇଛି। ଲଗାଣ ବର୍ଷା ଯୋଗୁଁ ପାହାଡ଼ ଧସି ବିଭିନ୍ନ ସ୍ଥାନରେ ବ୍ୟାପକ କ୍ଷତି ହୋଇଛି।
ଗଞ୍ଜାମ ଓ କନ୍ଧମାଳ ଜିଲ୍ଲା ସୀମାନ୍ତ ଭଞ୍ଜନଗର ବ୍ଲକ ବାଇବାଲି ପଞ୍ଚାୟତର ଗିଡ଼ିପାବାଲି ଗ୍ରାମ ଏହି ଭୂସ୍ଖଳନର ମୁଖ୍ୟ ଶିକାର ହୋଇଛି। ପାହାଡ଼ ଉପରୁ ପ୍ରବଳ ମାଟି, ବିରାଟକାୟ ପଥର, ଗଛ ଓ ବନ୍ୟାଜଳ ମାଡ଼ି ଆସିବାରୁ ସମ୍ପୂର୍ଣ୍ଣ ଗାଁଟି ଧ୍ୱଂସସ୍ତୂପରେ ପରିଣତ ହୋଇଛି।
ଘଟଣା ପରେ ୧୩ ଜଣ ଗ୍ରାମବାସୀ ନିଖୋଜ ଥିବା ନେଇ ଚିନ୍ତା ବଢ଼ିଥିଲା। ତେବେ ଜିଲ୍ଲାପାଳଙ୍କ ସୂଚନା ଅନୁସାରେ, ସେମାନଙ୍କ ମଧ୍ୟରୁ ୧୧ ଜଣ ଗୁରୁବାର ଅପରାହ୍ନ ପ୍ରାୟ ୨ଟା ସମୟରେ କତିଙ୍ଗିଆ ପଞ୍ଚାୟତର କିଲାପାଙ୍ଗା ପ୍ରାଥମିକ ବିଦ୍ୟାଳୟରେ ଖୋଲାଯାଇଥିବା ଅସ୍ଥାୟୀ ଆଶ୍ରୟସ୍ଥଳରେ ନିଜେ ପହଞ୍ଚି ଆଶ୍ରୟ ନେଇଛନ୍ତି।
ଅନ୍ୟପଟେ ନିଖୋଜ ଥିବା ଅନ୍ୟ ୨ ଜଣ ମହିଳାଙ୍କୁ ଉଦ୍ଧାରକାରୀ ଦଳ ସଫଳତାର ସହ ଉଦ୍ଧାର କରିଛନ୍ତି। ସେମାନଙ୍କ ସ୍ୱାସ୍ଥ୍ୟାବସ୍ଥା ଗୁରୁତର ଥିବାରୁ ତୁରନ୍ତ ଘୁ. ଉଦୟଗିରି ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇ ଚିକିତ୍ସା ଯୋଗାଇ ଦିଆଯାଉଛି। ଉଦ୍ଧାର କାର୍ଯ୍ୟ ଏବଂ ରିଲିଫ୍ ବଣ୍ଟନକୁ ଜିଲ୍ଲା ପ୍ରଶାସନ ପକ୍ଷରୁ ଜୋରଦାର କରାଯାଇଛି।
କୁହୁଡ଼ିର ଧଳା ଚାଦରରେ ଢାଙ୍କି ହେଲା ଟ୍ୱିନ୍ ସିଟି, ଯାତାୟାତ ପ୍ରଭାବିତ
ନନ୍ଦିଘୋଷ ବ୍ୟୁରୋ: ସକାଳୁ ସକାଳୁ ଘନ କୁହୁଡ଼ିରେ ଢାଙ୍କି ହୋଇଛି ଟ୍ୱିନ୍ ସିଟି। ଭୁବନେଶ୍ୱର ଓ କଟକରେ କୁହୁଡ଼ିର ମୋଟା ଆସ୍ତରଣ ଯୋଗୁଁ ଜନଜୀବନ ସହ ଯାତାୟାତ ମଧ୍ୟ ପ୍ରଭାବିତ ହୋଇଛି। ଚାରିଆଡ଼େ କେବଳ ଧଳା କୁହୁଡ଼ିର ଚାଦର ଦେଖିବାକୁ ମିଳିଛି ।
ବିଶେଷ କରି ସକାଳ ୫ଟାରୁ ୭ଟା ମଧ୍ୟରେ କୁହୁଡ଼ିର ପ୍ରକୋପ ଅଧିକ ରହିଥିଲା। ଫଳରେ ଦୃଶ୍ୟମାନତା ଯଥେଷ୍ଟ କମିଯାଇଥିଲା। ରାସ୍ତାରେ କିଛି ଦୂରରେ ଥିବା ଗାଡ଼ି ଓ ଅନ୍ୟାନ୍ୟ ବସ୍ତୁ ମଧ୍ୟ ସ୍ପଷ୍ଟ ଦେଖାଯାଉ ନଥିଲା। ଜାତୀୟ ରାଜପଥ-୧୬, କଟକ ରିଂ ରୋଡ୍, ନନ୍ଦନକାନନ ରୋଡ୍ ଓ ଉତ୍ତରା ଛକ ସମେତ ବିଭିନ୍ନ ଉପକଣ୍ଠ ଅଞ୍ଚଳରେ ଗାଡ଼ି ଚଳାଚଳ ମନ୍ଥର ହୋଇଥିଲା। ସମ୍ଭାବ୍ୟ ଦୁର୍ଘଟଣାକୁ ଏଡ଼ାଇବା ପାଇଁ ଗାଡ଼ିଚାଳକମାନେ ଫଗ୍ ଲାଇଟ୍ ଓ ହାଜାର୍ଡ ଲାଇଟ୍ ବ୍ୟବହାର କରି ଧୀରେ ଧୀରେ ଗାଡ଼ି ଚଳାଉଥିଲେ। ବାୟୁମଣ୍ଡଳରେ ଅଧିକ ଆର୍ଦ୍ରତା ଏବଂ ରାତିର ତାପମାତ୍ରା ହ୍ରାସ ଯୋଗୁଁ ଏଭଳି ଘନ କୁହୁଡ଼ି ସୃଷ୍ଟି ହୋଇଥିବା କୁହାଯାଉଛି।
ଟି-୨୦ ସିରିଜର ଚତୁର୍ଥ ମ୍ୟାଚ୍ ରେ ଭାରତର ଲଜ୍ଜାଜନକ ପରାଜୟ
ନନ୍ଦିଘୋଷ ବ୍ୟୁରୋ: ୮୭ ରନ୍ ରେ ହାରିଲା ଟିମ୍ ଇଣ୍ତିଆ । ନ୍ୟୁଜିଲାଣ୍ତ ବିପକ୍ଷ ୫ ମ୍ୟାଚ୍ ବିଶିଷ୍ଟ ଟି-୨୦ ସିରିଜର ଚତୁର୍ଥ ମ୍ୟାଚ୍ ରେ ଲଜ୍ଜାଜନକ ପରାଜୟ ବରଣ କରିଛି ଭାରତ । ଶୁକ୍ରବାର ଅକଲ୍ୟାଣ୍ତ ଇଡ଼େନ ପାର୍କରେ ଖେଳାଯାଇଥିବା ଏହି ମ୍ୟାଚ୍ ରେ ଟସ୍ ଜିତି ପ୍ରଥମେ ବୋଲିଂ ନିଷ୍ପତ୍ତି ନେଇଥିଲା ଭାରତ । ପ୍ରଥମେ ବ୍ୟାଟିଂ କରି ନ୍ୟୁଜିଲାଣ୍ତ ୨୫୯ ରନ୍ ର ବିଶାଳ ସ୍କୋର କରିଥିଲା । ତେବେ ଏହାର ଜବାବରେ ଭାରତ ୨୦ ଓଭରରେ ୯ ୱିକେଟ୍ ହରାଇ ମାତ୍ର ୧୭୧ ରନ୍ କରିବାକୁ ସକ୍ଷମ ହୋଇଥିଲା । ଏତେ ରନ୍ ବ୍ୟବଧାନରେ ହାରିବା ପରେ ବୋଲରଙ୍କ ଉପରେ ଅସନ୍ତୋଷ ପ୍ରକାଶ କରିଛନ୍ତି କ୍ୟାପ୍ଟେନ ଶ୍ରେୟସ ଆୟର। ଟିମ୍ ର ବୋଲିଂ ଆଶା ଅନୁରୂପ ହେଲା ନାହିଁ। ତେଣୁ ପାୱାର ପ୍ଲେରେ ମ୍ୟାଚ୍ ନ୍ୟୁଜିଲାଣ୍ଡ ପକ୍ଷକୁ ଚାଲିଯାଇିଲା ବୋଲି ସେ କହିଛନ୍ତି।
ଗଣମାଧ୍ୟମକୁ ପ୍ରତିକ୍ରିୟା ଦେଇ ଶ୍ରେସୟ କହିଛନ୍ତି, “ଆରମ୍ଭରୁ ଆମ ବୋଲିଂ ଟିକେ ଦୁର୍ବଳ ଥିଲା । ପାୱାର ପ୍ଲେରେ ଭାରତୀୟ ବୋଲମାନେ ଖେଳ ନିଜ ପକ୍ଷକୁ ନେବା ଲାଗି ଚେଷ୍ଟା କରିଥିଲେ ହେଲେ ଗ୍ଲେନ୍ ଫିଲିପ୍ସଙ୍କ ଇନିଂସ ଅସାଧାରଣ ରହିଥିଲା। ସେ ଏମିତି କିଛି ଶଟ୍ ମାରିଛନ୍ତି ଯାହାକୁ ଦେଖିଲେ ଖୁସି ଲାଗିବ। ତେଣୁ ତାର ପୂରା ଶ୍ରେୟ ତାଙ୍କୁ ଯାଉଛି। ସେ ପୂରା ସିରିଜରେ ନିରନ୍ତର ଭଲ ପ୍ରଦର୍ଶନ କରି ଆସୁଛନ୍ତି। ତେଣୁ ତାଙ୍କ ଠାରୁ ବହୁତ କିଛି ଶିଖିବାର ରହିଛି’ ।
ତେବେ ଶେଷ ମ୍ୟାଚ୍ ପାଇଁ କ’ଣ ରଣନୀତି ରହିବ ବୋଲି ପ୍ରଶ୍ନ କରାଯିବାରୁ ଶ୍ରେୟସ କହିଛନ୍ତି, ଆମେ କେଉଁ ଦିଗରେ ଭଲ କାମ କରିପାରୁଛୁ ପ୍ରଥମେ ତାହା ବୁଝିବା ଖୁବ ଗୁରୁତ୍ବପୂର୍ଣ୍ଣ । ଏହି ଗ୍ରାଉଣ୍ତ ଟିକେ ଅଲଗା ଥିଲା । କିଛି ଖେଳାଳି ପ୍ରଥମ ଥର ପାଇଁ ଏହି ପଡ଼ିଆରେ ଖେଳୁଥିଲେ । ପରିସ୍ଥିତି ସହ ଖାପଖୁଆଇବା ପାଇଁ ଟିକେ ସମୟ ଲାଗିବ । ସିରିଜରେ ପୂର୍ବରୁ ଖେଳାଯାଇଥିବା ୩ଟି ଯାକ ମ୍ୟାଚ୍ ରେ ଦଳ ଭଳ ପ୍ରଦର୍ଶନ କରିଥିଲା । ଏହା ଏକ ଶିକ୍ଷଣୀୟ ପ୍ରକ୍ରିୟା। ଆଶା କରୁଛୁ ଯେ ଆମେ ଆଗାମୀ ମ୍ୟାଚ୍ ରେ ଗୋଟେ ସକାରାତ୍ମକ ଚିନ୍ତାଧାରା ସହ ସିରିଜକୁ ପ୍ରତ୍ୟାବର୍ତ୍ତନ କରିବୁ” ।
ପ୍ରକାଶଥାଉ କି, ନ୍ୟୁଜିଲାଣ୍ଡ ବିପକ୍ଷ ଟି-୨୦ରେ ଏହା ଭାରତର ସବୁଠାରୁ ବଡ଼ ପରାଜୟ। ଏହା ପୂର୍ବରୁ ୨୦୧୯ରେ ୱେଲିଂଟନରେ ଭାରତ ନ୍ୟୁଜିଲାଣ୍ଡ ଠାରୁ ୮୦ ରନ୍ ରେ ପରାସ୍ତ ହୋଇଥିଲା।
ଜ୍ଞାନେଶ କୁମାରଙ୍କ ବିରୋଧରେ ଶନିବାର ଆସିବ ପ୍ରତୀକାତ୍ମକ ମହାଭିଯୋଗ ପ୍ରସ୍ତାବ
ନନ୍ଦିଘୋଷ ବ୍ୟୁରୋ: ସିଇସି ଜ୍ଞାନେଶ କୁମାରଙ୍କ ବିରୋଧରେ ଆସନ୍ତାକାଲି ଆସିବ ପ୍ରତୀକାତ୍ମକ ମହାଭିଯୋଗ ପ୍ରସ୍ତାବ। ଆଜି ତାଙ୍କ ବିରୋଧରେ ଯେଉଁ ପ୍ରତୀକାତ୍ମକ ମହାଭିଯୋଗ ଆସିଥିବାର ଥିଲା, ତାକୁ ବର୍ଷା ଯୋଗୁଁ ଘୁଞ୍ଚେଇ ଦେଇଛି ଇଣ୍ଡି ମେଣ୍ଟ। ଆସନ୍ତାକାଲି ଅପରାହ୍ନ ୪ଟାରେ ମଲ୍ଲିକାର୍ଜୁନ ଖଡଗେ ଜ୍ଞାନେଶ କୁମାରଙ୍କ ବିରୋଧରେ ମହାଭିଯୋଗ ପ୍ରସ୍ତାବ ଆଗତ କରିବେ, ଶେଷରେ ମତ ରଖିବେ ରାହୁଲ ଗାନ୍ଧି।
ଆଜି ଅପରାହ୍ନରେ ନୂଆଦିଲ୍ଲୀ ରାଜାଜୀ ମାର୍ଗରେ ଥିବା କଂଗ୍ରେସ ସଭାପତି ମଲ୍ଲିକାର୍ଜୁନ ଖଡଗେଙ୍କ ସରକାରୀ ବାସଭବନ ପରିସରରେ ଏହି କାର୍ଯ୍ୟକ୍ରମ ହେବାର ଥିଲା। କିନ୍ତୁ ଶୁକ୍ରବାର ସକାଳୁ ଲଗାଣ ବର୍ଷା ଜାରି ରହିବାରୁ ଏହାକୁ ଶନିବାରକୁ ଘୁଞ୍ଚାଇ ଦିଆଯାଇଛି। ଲୋକସଭାର ବିରୋଧୀ ଦଳ ନେତା ରାହୁଲ ଗାନ୍ଧୀ କହିଛନ୍ତି, ସମସ୍ତେ ମିଳିତ ଭାବେ ‘ଜନ ମହାଭିଯୋଗ’ କାର୍ଯ୍ୟକ୍ରମକୁ ଶନିବାର ଅପରାହ୍ନ ୪ଟାକୁ ଘୁଞ୍ଚାଇବାକୁ ନିଷ୍ପତ୍ତି ନେଇଛନ୍ତି। ପୂର୍ବତନ ଲୋକସଭା ବାଚସ୍ପତି ମୀରା କୁମାର ଏହି କାର୍ଯ୍ୟକ୍ରମର ଅଧ୍ୟକ୍ଷତା କରିବେ। ମଲ୍ଲିକାର୍ଜୁନ ଖଡଗେ ଗ୍ୟାନେଶ କୁମାରଙ୍କ ବିରୋଧରେ ପ୍ରସ୍ତାବ ଆଗତ କରିବେ ଓ ରାହୁଲ ଗାନ୍ଧୀ ଶେଷରେ ନିଜର ମତ ରଖିବେ। ଏହାବ୍ୟତୀତ INDIA ବ୍ଲକ୍ର ପ୍ରତ୍ୟେକ ସହଯୋଗୀ ଦଳରୁ ଜଣେ ଲେଖାଏଁ ପ୍ରତିନିଧି ମଧ୍ୟ ସମ୍ବୋଧନ କରିବାର ସମ୍ଭାବନା ରହିଛି। ଏଥିପାଇଁ ଗତକାଲି ପ୍ରସ୍ତୁତ ହୋଇଥିଲା ରଣନୀତି।
INDIA ବ୍ଲକର ସବୁ ନେତାଙ୍କ ବୈଠକ ହୋଇଥିଲା। ଭୋଟ୍ ଚୋରି’ ପ୍ରସଙ୍ଗରେ ପ୍ରତିବାଦର ଏକ ପ୍ରତୀକାତ୍ମକ ରୂପ ଭାବେ ବିରୋଧୀ ଦଳଗୁଡ଼ିକ ଏହି ‘ଜନ ମହାଭିଯୋଗ’ କାର୍ଯ୍ୟକ୍ରମ ଆୟୋଜନ କରୁଛନ୍ତି। ସ୍ପେଶାଲ୍ ଇଣ୍ଟେନ୍ସିଭ୍ ରିଭିଜନ୍ (SIR) ଜରିଆରେ ଭୋଟର ତାଲିକା ସଂଶୋଧନରେ ଅନିୟମିତତା ହୋଇଥିବା ଅଭିଯୋଗ କରି INDIA ବ୍ଲକ୍ର ଦଳଗୁଡ଼ିକ ମୁଖ୍ୟ ନିର୍ବାଚନ କମିଶନର ଗ୍ୟାନେଶ କୁମାରଙ୍କ ଇସ୍ତଫା ଦାବି କରୁଛନ୍ତି। ଏହି ପ୍ରସଙ୍ଗରେ ନଭେମ୍ବର ୧ରେ ଦିଲ୍ଲୀର ରାମଲୀଳା ମୈଦାନରେ ଏକ ବିଶାଳ ପ୍ରତିବାଦ ସଭା କରାଯିବ।
ଇସ୍ରାଏଲରେ କିଏ କରିବେ ସରକାର ? ଦେଶରେ ଏକ ଜାତୀୟ ସରକାର ପ୍ରତିଷ୍ଠା ସମ୍ଭାବନା ଅଧିକ
ନନ୍ଦିଘୋଷ ବ୍ୟୁରୋ: ଇସ୍ରାଏଲରେ କିଏ କରିବେ ସରକାର ତାହାକୁ ନେଇ ଜାରି ରହିଛି ସସପେନ୍ସ୍ । ଦେଶରେ ଏକ ଜାତୀୟ ସରକାର ପ୍ରତିଷ୍ଠା ସମ୍ଭାବନା ଅଧିକ ହେବାରେ ଲାଗିଛି। ବିରୋଧୀ ଦଳ ନେତା ଗାଦି ଏସେନକୋଟଙ୍କ ସହ ପ୍ରଧାନମନ୍ତ୍ରୀ ବେଞ୍ଜାମିନ୍ ନେତନ୍ୟାହୁ ଏକ ଜାତୀୟ ସରକାର ଗଠନ କରିପାରନ୍ତି ବୋଲି ଚର୍ଚ୍ଚା ହେଉଛି।
ନେସେଟର ୧୨୦ ଆସନରୁ ନେତନ୍ୟାହୁଙ୍କ ମେଣ୍ଟ ୫୩ ଆସନ ଲାଭ କରିଥିବବେଳେ ଏସନକୋଟଙ୍କ ମେଣ୍ଟକୁ ୪୮ ଆସନ ମିଳିଛି। ବିଭିନ୍ନ ଆରବ ପାର୍ଟିଙ୍କୁ ୧୯ ଆସନ ମିଳିଥିବାବେଳେ ଏହି ମେଣ୍ଟ ଏସନକୋଟଙ୍କୁ ସମର୍ଥନ କରିବା ସମ୍ଭାବନା ଦେଖାଦେଇଛି। ନେସେଟରେ ମ୍ୟାଜିକ ନମ୍ବର ହେଉଛି ୬୧। ତେବେ ନେତନ୍ୟାହୁଙ୍କ ଅଧୀନରେ ଏସେନକୋଟ କାମ କରିବେ ନାହିଁ ସୂଚନା ମିଳିଛି । ତେବେ ଦୁଇ ନେତାଙ୍କ ନିକଟରେ ଗୋଟିଏ ବିକଳ୍ପ ରହିଛି । ତାହା ହେଲା ପ୍ରଥମ ୨ ବର୍ଷ ନେତନ୍ୟାହୁ ଓ ଅବଶିଷ୍ଟ ୨ ବର୍ଷ ଏସନକୋଟ ପ୍ରଧାନମନ୍ତ୍ରୀ ହେବେ। ଦ୍ବିତୀୟ ପ୍ରସ୍ତାବ ଅନୁସାରେ ପ୍ରଧାନମନ୍ତ୍ରୀ ଭାବେ ନେତନ୍ୟାହୁ ରହିବେ ଓଏନସକୋଟଙ୍କୁ ବରିଷ୍ଠ ମନ୍ତ୍ରୀ ପଦ ମିଳିପାରେ। ଯଦି ମିଳିତ ସରକାର ହେବ ତେବେ ଇତାମାର ବେନ ଗିଭିର ଓ ବେଜାଲେଲ ସ୍ମୁଟ୍ରିକଙ୍କ ପରି ଦକ୍ଷିଣପନ୍ଥୀ ନେତାଙ୍କୁ ମନ୍ତ୍ରୀପଦ ମିଳିପାରେ। ତେଣେ ସରକାର ଗଠନ ନେଇ ରାଷ୍ଟ୍ରପତି ଆଇଜାକ ହେର୍ଜୋଗ ବିଭିନ୍ନ ଦଳ ସହ ଆଲୋଚନା ଜାରି ରଖିଛନ୍ତି।
ସର୍ବଶେଷରେ ଯଦି ସରକାର ଗଠନ ହୋଇପାରିବ ନାହିଁ ତେବେ ପୁଣି ଥରେ ଦେଶରେ ନିର୍ବାଚନ ହେବା ସମ୍ଭାବନା ରହିଛି। ୨୦୨୧ରେ ୟାମିନା ନେତା ନାଫତାଲି ବେନେଟ୍ଟଙ୍କ ନେତୃତ୍ବରେ ରାଜନୈତିକ ଝଡ଼ ସୃଷ୍ଟି ହୋଇଥିଲା ପରେ ନେତନ୍ୟାହୁ ପ୍ରଧାନମନ୍ତ୍ରୀ ପଦରୁ ପଦଚ୍ୟୁତ୍ ହୋଇଥିଲେ। ନାଫତାଲିଙ୍କୁ ସମର୍ଥନ କରିଥିଲେ ଆରବ ପାର୍ଟି। ଦେଶର ଆରବ ପାର୍ଟିଗୁଡିକ ହେଉଛନ୍ତି ରାମ, ହାଦାସ, ତାଲ, ବାଲାଦ, ଜଏଣ୍ଟ ଲିଷ୍ଟ । ରାମ ଦଳକୁ ୮ ଆସନ ମିଳିଥିବାବେଳେ ଜଏଣ୍ଟ ଲିଷ୍ଟକୁ ମିଳିଛି ୧୧ ଆସନ।
ବାତ୍ୟା ପାଇଁ ପ୍ରସ୍ତୁତ ଥିଲେ ରାଜ୍ୟ ସରକାର, ହେଲେ ବନ୍ୟା ହୋଇଗଲା
ନନ୍ଦିଘୋଷ ବ୍ୟୁରୋ: ବାତ୍ୟା ପାଇଁ ପ୍ରସ୍ତୁତ ହୋଇଥିଲେ ରାଜ୍ୟ ସରକାର, ହେଲେ ବନ୍ୟା ହୋଇଗଲା । ମାଲକାନଗିରି, ନୂଆପଡ଼ାକୁ ଜିଲ୍ଲାକୁ ଗୁରୁତ୍ବ ଦିଆଯାଇଥିଲା, ହେଲେ ବନ୍ୟାରେ ବୁଡ଼ିଲା ଗଞ୍ଜାମ । ମହାନଦୀ ଅବବାହିକା ଉପରେ ଧ୍ୟାନ ଦେଇଥିଲେ ସରକାର, ହେଲେ ବୁଡ଼ାଇ ଦେଲା ଋଷିକୂଲ୍ୟା।
ବାତ୍ୟା ପରିଚାଳନାରେ ସାବାସୀ ନେବାକୁ ସରକାର ଉଦ୍ୟମ କରିବା ବେଳେ ବନ୍ୟା ପରିଚାଳନାରେ ପୁରା ଫେଲ୍। ଋଷିକୂଲ୍ୟାର ପାଣିରେ ଗଞ୍ଜାମ ଓ ଗଜପତି ଜିଲ୍ଲା ଉବୁଟୁବୁ। ରାଜସ୍ବ ମନ୍ତ୍ରୀ ଅସହାୟ ସ୍ଥିତି ବୋଲି ସ୍ବୀକାର କରିଥିବା ବେଳେ ଜଳସମ୍ପଦ ଯନ୍ତ୍ରୀ କହିଛନ୍ତି, ଆମ ହାତରେ କିଛି ଉପାୟ ନଥିଲା । ଅର୍ଣ୍ଣବ ମୁକାବିଲା ପାଇଁ ଦିନରାତି ଏକ କରିଦେଲେ ସରକାର । ୭ ଦିନ ପୂର୍ବରୁ କରିଥିଲେ ପ୍ରସ୍ତୁତି । ବାତ୍ୟାର ପ୍ରକୋପ ଓଡ଼ିଶା ଉପରେ ତ ଏତେ ପଡ଼ିଲା ନାହିଁ । ହେଲେ ଏହାର ପ୍ରଭାବରେ ଜୋରଦାର ବର୍ଷା ହେଲା। ବାତ୍ୟା ପରିଚାଳନାର ସାବାସୀ ନେବାକୁ ସରକାର ଉଦ୍ୟମ କରିବା ବେଳେ ଫସେଇଦେଲା ଗଞ୍ଜାମ ଓ ଗଜପତିର ବନ୍ୟା । ଉପରମୁଣ୍ଡରେ ପ୍ରବଳ ବର୍ଷା ଯୋଗୁଁ ଋଷିକୂଲ୍ୟା, ଏହାର ଶାଖା ନଦୀ ଘୋଡ଼ାହାଡ଼ର ପାଣି କୂଳ ଲଂଘନ କରି ଗାଁ ଗାଁରେ ପଶିଛି। ବାହୁଦା ନଦୀ ବି ଦେଖାଇଛି ଭୟଙ୍କର ରୂପ। ବର୍ଷା ପରିମାଣ ଆକଳନରେ ଫେଲ୍ ମାରିଛି ପ୍ରଶାସନ । ଅର୍ଣ୍ଣବ ଓଡ଼ିଶା ଛାଡୁଛି ବୋଲି ଏସ୍ଆରସି କାର୍ଯ୍ୟାଳୟ ଆଶ୍ବସ୍ତ ହେଲା ବେଳକୁ ବନ୍ୟା ଘାଇଲା କରିଛି।
ରାଜସ୍ବ ମନ୍ତ୍ରୀ ଅସହାୟତା ଦେଖାଇବା ସହ ଋଷିକୂଲ୍ୟାରେ ଡ଼୍ୟାମ ନଥିବାରୁ ଏମିତି ସ୍ଥିତି ଉପୁଜିଲା ବୋଲି କହିଛନ୍ତି । ୨୫-୩୦ ବର୍ଷ ପରେ ଏମିତି ବନ୍ୟା ଦେଖିଛନ୍ତି ଗଂଜାମ ଓ ଗଜପତି। ଋଷିକୂଲ୍ୟାରେ ଡ୍ୟାମ୍ ନ ଥିବାରୁ ବନ୍ୟା ନିୟନ୍ତ୍ରଣ ହୋଇପାରିଲା ନାହିଁ ବୋଲି ରାଜସ୍ବ ମନ୍ତ୍ରୀ କହିଥିବା ବେଳେ ବାହୁଦା ନଦୀର ବାଘନଟିରେ ଥିବା ମଧ୍ୟମ ଡ଼୍ୟାମ୍ ବନ୍ୟା ନିୟନ୍ତ୍ରଣ ପାଇଁ ଉଦ୍ଦିଷ୍ଟ ନୁହଁ ବୋଲି ଜଳସମ୍ପଦ ସର୍ବୋଚ୍ଚ ଯନ୍ତ୍ରୀ କହିଛନ୍ତି । ବାଘନଟିରେ ଥିବା ବାହୁଦା ନଦୀ ଉପରେ ଡ଼୍ୟାମରେ ୬୦ ପ୍ରତିଶତ ପାଣି ରଖି ୨ ଦିନ ତଳୁ ପାଣି ଛଡ଼ାଯାଇଥିଲା । ବର୍ଷା ସମ୍ଭାବନା ଥିବାରୁ ଡ଼୍ୟାମ୍ ଖାଲି କରାଯାଇଥିଲା। ହଠାତ୍ ବର୍ଷା ପାଣି ଆସିବା ଯୋଗୁଁ ପାଣି ଛାଡ଼ିବାକୁ ବାଧ୍ୟ ହୋଇଥିଲୁ ବୋଲି ସେ କହିଛନ୍ତି।
ତେବେ ଡ୍ୟାମ୍ ପାଣି ଯୋଗୁଁ ବନ୍ୟା ହୋଇଥିବା ଅଭିଯୋଗକୁ ଖଣ୍ଡନ କରିଛନ୍ତି ସର୍ବୋଚ୍ଚ ଯନ୍ତ୍ରୀ । ବାତ୍ୟା ଅର୍ଣ୍ଣବ ଭୟଙ୍କର ହୋଇନଥିବାରୁ ରାଜ୍ୟ ସରକାର କଡ଼ା ପରୀକ୍ଷାର ସମ୍ମୁଖୀନ ହୋଇ ନାହାନ୍ତି। କିନ୍ତୁ ବନ୍ୟା ପରିଚାଳନାରେ ଯେ ପୁରା ଫେଲ୍, ଏହା ସତ। ଗଞ୍ଜାମର ବନ୍ୟା ସରକାରଙ୍କ ତଥାକଥିତ ପ୍ରସ୍ତୁତିର ପର୍ଦ୍ଦାଫାସ କରିଦେଇଛି। ଲୋକଙ୍କ ଆକ୍ରୋଶରୁ ବର୍ତ୍ତିବାକୁ ମୁଖ୍ୟମନ୍ତ୍ରୀ ଓ ରାଜସ୍ବ ମନ୍ତ୍ରୀ ବନ୍ୟାଞ୍ଚଳ ଗସ୍ତ କରିଥିବା ବେଳେ ପାଣି ଆସିବା ପୂର୍ବରୁ ଉପଯୁକ୍ତ ପଦକ୍ଷେପ ନେଇଥିଲେ ଏତେ କ୍ଷୟକ୍ଷତି ହୋଇନଥାନ୍ତା ବୋଲି କୁହାଯାଉଛି ।
ଭୂଟାନରେ ପ୍ରକୃତିର ତାଣ୍ଡବ: ଭାରତ ପାଇଁ ବଢିଲା ବିପଦ !
ନନ୍ଦିଘୋଷ ବ୍ୟୁରୋ:ପାହାଡରୁ ପୁଣିଥରେ ବାଜିଲାଣି ବିପଦର ଘଣ୍ଟି । ନେପାଳ ଭଳି ଭୁଟାନରେ ଏବେ ମୁଣ୍ଡ ଟେକିଛି ବଡ ବିପଦ । ଭାରତ ପାଇଁ ଜାରି ହେଲା ଆଲର୍ଟ ! ନେପାଳର ଜଳପ୍ରଳୟ ମନରୁ ଲିଭୁଣୁ ବର୍ତ୍ତମାନ ଭୁଟାନର ଉଚ୍ଚ ହିମାଳୟ ଉପତ୍ୟକାରେ ଏକ ବଡ ଗ୍ଲାସିୟର ହ୍ରଦ ଧସିଯାଇଛି । ଯାହାଫଳରେ ତଳମୁ୍ଣ୍ଡରେ ପ୍ରବାହିତ ହେଉଥିବା ନଦୀଗୁଡିକ ଏବେ ଉଗ୍ର ରୂପ ଧାରଣ କରିଛନ୍ତି । ଏହି ବିସ୍ଫୋରଣ ଏବେ ଆମ ଦେଶ ଭାରତ ପାଇଁ ବଡ ବିପଦ ସୃଷ୍ଟି କରିଛି । ଯେଉଁଥିପାଇଁ ଆସାମ ଏବଂ ପଶ୍ଚିମବଙ୍ଗର ସୀମାନ୍ତ ଜିଲ୍ଲାଗୁଡିକରେ ହାଇ ଆଲର୍ଟ ଜାରି କରାଯାଇଛି । ଗତ ଏକ ମାସ ପୂର୍ବରୁ ନେପାଳରେ ଦେଖାଦେଇଥିବା ଭୟଙ୍କର ବିପର୍ଯ୍ୟୟ ପରେ ଏବେ ଏହି ନୂତନ ସଙ୍କଟ ଭାରତ ଏବଂ ଭୂଟାନ ପାଇଁ ଚିନ୍ତାର କାରଣ ପାଲଟିଛି । ସତେ ଯେପରି ସମଗ୍ର ପୂର୍ବ ହିମାଳୟ ଗୋଟେ ପରେ ଗୋଟେ ନିଜର ରାଗ ଦେଖାଉଛନ୍ତି ।
ଚଳିତ ବର୍ଷ ଅଗଷ୍ଟ ମାସରେ ନେପାଳ-ତିବ୍ଦତ ସୀମାରେ ଡ୍ୟାମ୍ ଭାଙ୍ଗିବା କାରଣରୁ ଗ୍ଲାସିୟର ହ୍ରଦ ଧସିଯାଇଥିଲା । ଫଳରେ ଭଗ୍ନାବଶେଷ ଏବଂ ପାଣିର ଭୟଙ୍କର ବନ୍ୟା ନେପାଳକୁ ପୂରା ଛାରଖାର କରିଦେଇଥିଲା । ରାସ୍ତାଘାଟ, ପୋଲ ଏବଂ ସୀମାବର୍ତ୍ତୀ ଅଞ୍ଚଳଗୁଡିକ ସମ୍ପୂର୍ଣ୍ଣ ଧ୍ବଂସବିଧ୍ବସ୍ତ ହୋଇଯାଇଥିଲା । ଆଉ ଏବେ ଭୁଟାନରେ ସମାନ କାହାଣୀର ପୁନରାବୃତ୍ତି ହେଉଛି । ଭୁଟାନର ଉଚ୍ଚ ଇଲାକାରେ ଥିବା ବରଫ ହ୍ରଦଗୁଡିକରେ ଦୀର୍ଘ ସମୟ ଧରି ଅସ୍ଥିରତା ଲାଗି ରହିଛି । ବର୍ଦ୍ଧିତ ତାପମାତ୍ରା ଯୋଗୁଁ ବରଫ ତରଳିବାରେ ଲାଗିଛି ଏବଂ ବନ୍ଧଗୁଡିକ ଦୁର୍ବଳ ହୋଇ ଭାଙ୍ଗିବାରେ ଲାଗିଛି । ଫଳସ୍ବରୂପ ଲକ୍ଷ ଲକ୍ଷ ଲିଟର ଜଳ ହଠାତ୍ ମାଡି ଆସିପାରେ । ଆଉ ଏହି ଜଳ ସିଧାସଳଖ ଆସାମର ବ୍ରହ୍ମପୁତ୍ର ଉପତ୍ୟକା ଏବଂ ପଶ୍ଚିମବଙ୍ଗର ଡୁଅର୍ସ ଅଞ୍ଚଳର ନଦୀଗୁଡିକୁ ପ୍ରବାହିତ ହେବ । ଯାହା ଭାରତ ପାଇଁ ସତର୍କ ଘଣ୍ଟି ବଜାଇଛି ।
ଉଚ୍ଚ ଇଲାକାରେ ବରଫ କାନ୍ଥ ଦ୍ବାରା ଗଠିତ ହ୍ରଦଗୁଡିକ ଏବେ ପ୍ରକୃତିର ଟାଇମ୍ ବମ୍ ପାଲଟିଛି । ତାପମାତ୍ରା ଯୋଗୁଁ ବରଫ ଦ୍ରୁତ ବେଗରେ ତରଳୁଛି ଏବଂ ହ୍ରଦର ଜଳସ୍ତର ବଢିଯାଉଛି । ଆଉ ଅଚାନକ ବନ୍ଧ ଭାଙ୍ଗିବା ଦ୍ବାରା ଭଗ୍ନାବଶେଷ ସହ ପାଣି ନିମ୍ନଗାମୀ ହେଉଛି । ଭୁଟାନରେ ମଧ୍ୟ ଏହା ହି ହୋଇଛି, ଯେତେବେଳେ ପଥର ଏବଂ କାଦୁଅ ମିଶା ବନ୍ୟା ପାଣି ସୀମାନ୍ତ ନଦୀ ଦେଇ ଭାରତର ସମତଳ ଅଞ୍ଚଳ ଆଡକୁ ଅଗ୍ରସର ହେଉଛି । ପ୍ରଭାବରେ ଆସାମର କୋକ୍ରାଝାର, ବକ୍ସା, ଚିରାଙ୍ଗ ଏବଂ ଧୁବ୍ରି ଜିଲ୍ଲାରେ ନଦୀର ଜଳସ୍ତର ଦ୍ରୁତ ଗତିରେ ବୃଦ୍ଧି ପାଉଛି । ସେହିପରି ଭୁଟାନ ସୀମାକୁ ଲାଗି ରହିଥିବା ପଶ୍ଚିମବଙ୍ଗର ଜଳପାଇଗୁଡି ଏବଂ ଆଲିପୁରଦ୍ବାରରେ ମଧ୍ୟ ସମାନ ପରିସ୍ଥିତି ରହିଛି । ଏହି ବିପର୍ଯ୍ୟୟ ଦ୍ବାରା ହଜାର ହଜାର ପରିବାର ପ୍ରଭାବିତ ହୋଇପାରନ୍ତି ଏବଂ କୃଷି ନିର୍ଭରଶୀଳ ଅଞ୍ଚଳର ଜୀବିକା ବିପଦରେ ପଡିପାରେ । ଏହାକୁ ଦୃଷ୍ଟିରେ ରଖି ଆସାମ ଏବଂ ପଶ୍ଚିମବଙ୍ଗ ଉଭୟ ନଦୀ କୂଳରେ ନିଜ ନିଜର ବିପର୍ଯ୍ୟୟ ଟିମ୍ କୁ ମୁତୟନ କରିଛନ୍ତି । ୨୪ ଘଣ୍ଟିଆ କଣ୍ଟ୍ରୋଲ ରୁମ ଆକ୍ଟିଭ ରହିଛି ଏବଂ ଜଳସ୍ତର ଉପରେ ଲଗାତତାର ଭାବେ ନଜର ରଖାଯାଇଛି ।
ପ୍ରକୃତିର ଏହି ପ୍ରକୋପ ଜଳବାୟୁ ପରିବର୍ତ୍ତନର ଏକ ଗମ୍ଭୀର ଚେତାବନୀ । ଯଦି ସମୟ ଥାଉ ଥାଉ କୌଣସି ବଡ ପଦକ୍ଷେପ ନିଆନଯାଏ । ତେବେ ହିମାଳୟର ଏହି ବରଫ ହ୍ରଦଗୁଡିକ ବାରମ୍ଭାର ବିପଦ ହୋଇ ଠିଆ ହେବ ।
ବନ୍ୟାଞ୍ଚଳ ସ୍ଥିତି ପରଖିଲେ ମୁଖ୍ୟମନ୍ତ୍ରୀ…
ନନ୍ଦିଘୋଷ ବ୍ୟୁରୋ: ଗଞ୍ଜାମ ଓ ଗଜପତିରେ ବନ୍ୟା ସ୍ଥିତି ଆକାଶ ମାର୍ଗରୁ ଅନୁଧ୍ୟାନ କରିଛନ୍ତି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ । ବାତ୍ୟା ଅର୍ଣ୍ଣବ ଏବଂ ଏହା ପ୍ରଭାବରେ ହୋଇଥିବା ପ୍ରବଳ ବର୍ଷା ଯୋଗୁଁ ସୃଷ୍ଟି ହୋଇଥିବା ବନ୍ୟା ପରିସ୍ଥିତିର ଆକାଶମାର୍ଗରୁ ମୁଖ୍ୟମନ୍ତ୍ରୀ ଅନୁଧ୍ୟାନ କରିଛନ୍ତି । ଏହି ସମୟରେ ରାଜସ୍ୱ ଓ ବିପର୍ଯ୍ୟୟ ପରିଚାଳନା ମନ୍ତ୍ରୀ ସୁରେଶ ପୂଜାରୀ ଓ ଏସଆରସି ରାଜେଶ ପ୍ରଭାକର ପାଟିଲ ମଧ୍ୟ ଉପସ୍ଥିତ ଥିଲେ । ତେବେ ଗଞ୍ଜାମ ଜିଲ୍ଲାର ୨୨ଟି ବ୍ଲକର ୨୦୮ଟି ଗ୍ରାମ ପଞ୍ଚାୟତ, ୨୯୯ଟି ଗାଁ ଏବଂ ୧୮ଟି ସହରାଞ୍ଚଳ ଏହି ବନ୍ୟାରେ ପ୍ରଭାବିତ ହୋଇଛନ୍ତି । । ଜଳାର୍ଣ୍ଣବ ଅନେକ ସହର । ଉଛୁଳିଛି ଋଷିକୂଲ୍ୟା, ବଡ଼ନଦୀ, ବଂଶଧାରା, ଘୋଡାହାଡ଼ ନଦୀ । ଫଳରେ ଅନେକ ଗାଁରେ ବନ୍ୟା ପାଣି ପସିଥିବାରୁ ଲୋକେ ସମସ୍ୟାରେ ପଡିଛନ୍ତି । ବାହ୍ୟ ଜଗତରୁ ଯୋଗାଯୋଗ ବିଛିନ୍ନ ହୋଇଛି । ଜତୀୟ ରାଜପଥରେ ପାଣି ଚାଲିବା ଯୋଗୁ ଦୁଇ ପଟରେ ଗାଡି ଘୋଡା ଅଟକି ରହିଛି । ମୋହନା ଠାରୁ ସଂଯୋଗ କରୁଥିବା ୩୨୬ ନମ୍ବର ଜାତୀୟ ରାଜପଥ ଧୋଇ ଯାଇଛି । ବିପର୍ଯ୍ୟୟକୁ ଆହୁରି ଭୟଙ୍କର କରିଛି ଭୂସ୍ଖଳନ । ମାଟି ଅତଡା ଖସି ରାସ୍ତାରେ ପଡିବା ଯୋଗୁ କନ୍ଧମାଳର କଳିଙ୍ଗା ଘାଟିରେ ଯାତାୟାତ ଠପ ହୋଇଛି । । ଗଜପତି ଜିଲ୍ଲା ଚିତ୍ରାଙ୍ଗ ନିକଟରେ ପାହାଡରୁ ଅତଡା ଖସି ଅବରୋଧ ହୋଇଛି ଗଙ୍ଗାବଡ଼-କାଇଁପୁର ରୋଡ୍ । ସେହିଭଳି ମୋହନା ବ୍ଲକର ବାଲିବାଡ଼ ରାସ୍ତାରୁ ମଧ୍ୟ ମାଟି ଅତଡା ଖସି ଅବରୋଧ ହୋଇଛି ଘାଟି ରାସ୍ତା ।
ସେପଟେ ମୋଟ ୪୨ ହଜାର ୫୦୦ରୁ ଅଧିକ ଲୋକ ପ୍ରଭାବିତ ହୋଇଥିବା ବେଳେ, ୧୧ ହଜାରରୁ ଅଧିକ ଲୋକଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରାଯାଇଛି। ବିଶେଷ କରି ସାନଖେମୁଣ୍ଡି, ଧରାକୋଟ, ସୋରଡ଼ା ଏବଂ ପୁରୁଷୋତ୍ତମପୁରର ପାଣ୍ଡିଆ ଅଞ୍ଚଳ ଗୁରୁତର ଭାବେ ପ୍ରଭାବିତ ହୋଇଛି ।