ନନ୍ଦିଘୋଷ ବ୍ୟୁରୋ: ଅଯୋଧ୍ୟା ରାମ ମନ୍ଦିରରେ ଦାନ ଚୋରି ଅଭିଯୋଗକୁ ନେଇ ଚର୍ଚ୍ଚା ଚାଲିଥିବା ବେଳେ ଏବେ ଦେଶର ଅନ୍ୟତମ ପ୍ରତିଷ୍ଠିତ ତୀର୍ଥକ୍ଷେତ୍ର ବଦ୍ରୀନାଥ ଧାମରୁ ମଧ୍ୟ ସଦୃଶ ଅଭିଯୋଗ ସାମ୍ନାକୁ ଆସିଛି। ବଦ୍ରୀନାଥ ମନ୍ଦିରରେ ଶ୍ରଦ୍ଧାଳୁଙ୍କ ଦ୍ୱାରା ଦିଆଯାଉଥିବା ଚଢ଼ାଉ ଏବଂ ଦାନ-ପୁଣ୍ୟରେ ବ୍ୟାପକ ଅନିୟମିତତା ହୋଇଥିବା ନେଇ ସୋସିଆଲ ମିଡିଆରେ ଜୋରଦାର ଚର୍ଚ୍ଚା ଧରିଛି। ଏହି ସମ୍ବେଦନଶୀଳ ମାମଲାକୁ ଶ୍ରୀ ବଦ୍ରୀନାଥ-କେଦାରନାଥ ମନ୍ଦିର ସମିତି (BKTC) ଅତ୍ୟନ୍ତ ଗମ୍ଭୀରତାର ସହ ଗ୍ରହଣ କରିବା ସହ ତୁରନ୍ତ ଆକ୍ସନ ମୋଡ୍‌କୁ ଆସିଛି। ସମିତିର ଅଧ୍ୟକ୍ଷ ହେମନ୍ତ ଦ୍ୱିବେଦୀ ଏହି ଅଭିଯୋଗର ନିଷ୍ପକ୍ଷ ଓ ସ୍ୱଚ୍ଛ ଯାଞ୍ଚ ପାଇଁ ଏକ ଆଭ୍ୟନ୍ତରୀଣ ତଦନ୍ତ କମିଟି ଗଠନ କରିଛନ୍ତି। ଏହା ସହିତ ଅଭିଯୋଗର ଘେରରେ ଥିବା ସମ୍ପୃକ୍ତ କର୍ମଚାରୀମାନଙ୍କୁ ତଲବ କରାଯାଇ ସେମାନଙ୍କଠାରୁ ସ୍ପଷ୍ଟୀକରଣ ମଗାଯାଇଛି।

ଏହି ମାମଲା ସୋସିଆଲ ମିଡିଆରେ ଭାଇରାଲ ହେବା ପରେ ଜଣେ ଅଭିଯୁକ୍ତ କର୍ମଚାରୀଙ୍କୁ ମନ୍ଦିର ସମିତି ଅଧ୍ୟକ୍ଷଙ୍କ ‘ନିଜସ୍ୱ ସଚିବ’ ବୋଲି ଦାବି କରାଯାଉଥିଲା। ତେବେ ଅଧ୍ୟକ୍ଷ ହେମନ୍ତ ଦ୍ୱିବେଦୀ ଏହି ଦାବିକୁ ସମ୍ପୂର୍ଣ୍ଣ ରୂପେ ଖଣ୍ଡନ କରିବା ସହ ସ୍ପଷ୍ଟ କରିଛନ୍ତି ଯେ, ସମ୍ପୃକ୍ତ ବ୍ୟକ୍ତି ଜଣକ ତାଙ୍କର କୌଣସି ବ୍ୟକ୍ତିଗତ ସଚିବ ନୁହନ୍ତି, ବରଂ ସେ BKTC ର ଜଣେ ସାଧାରଣ ନିୟମିତ ସରକାରୀ କର୍ମଚାରୀ। ସେ ଆହୁରି ମଧ୍ୟ କହିଛନ୍ତି ଯେ, ଯଦି ତଦନ୍ତରେ ଅଭିଯୋଗ ସତ୍ୟ ପ୍ରମାଣିତ ହୁଏ, ତେବେ କୌଣସି ବି ଦୋଷୀଙ୍କୁ ଛଡ଼ାଯିବ ନାହିଁ ଏବଂ ସେମାନଙ୍କ ବିରୋଧରେ କଠୋର ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।

ମନ୍ଦିର ସମିତିର ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ସୋହନ ସିଂ ରାଙ୍ଗଡ଼ଙ୍କ ସୂଚନା ଅନୁଯାୟୀ, ଗତ ଜୁଲାଇ ୨ ତାରିଖରୁ ଭାଇରାଲ ହେଉଥିବା ଏହି ମାମଲାର ଅଭିଯୋଗ ମିଳିବା ପରେ ମନ୍ଦିରର ସିସିଟିଭି (CCTV) ଫୁଟେଜ୍‌ଗୁଡ଼ିକୁ ଯାଞ୍ଚ କରାଯାଉଛି। ଯଦିଓ ଫୁଟେଜ୍ ସମ୍ପୂର୍ଣ୍ଣ ସ୍ପଷ୍ଟ ଜଣାପଡ଼ୁନାହିଁ, ତଥାପି ସମସ୍ତ ପ୍ରମାଣ, ସିସିଟିଭି ରେକର୍ଡିଂ ଏବଂ ସମ୍ପୃକ୍ତ ବ୍ୟକ୍ତିଙ୍କ ବୟାନ ଆଧାରରେ ତଦନ୍ତ ଦଳ ରିପୋର୍ଟ ପ୍ରସ୍ତୁତ କରିବେ। ସେ ଚେତାବନୀ ଦେଇଛନ୍ତି ଯେ, କୌଣସି ପ୍ରକାରର ଆର୍ଥିକ ହେରଫେର ସାମ୍ନାକୁ ଆସିଲେ ‘ଶ୍ରୀ ବଦ୍ରୀନାଥ-କେଦାରନାଥ ମନ୍ଦିର ସମିତି ଅଧିନିୟମ, ୧୯୩୯’ ଏବଂ କର୍ମଚାରୀ ଆଚରଣ ସଂହିତା ଅନୁଯାୟୀ ଦୋଷୀଙ୍କ ବିରୋଧରେ ବିଭାଗୀୟ ତଥା କଡ଼ା ଆଇନଗତ କାର୍ଯ୍ୟାନୁଷ୍ଠାନ ହେବ। ଏହା ସହିତ ତଦନ୍ତ ପ୍ରକ୍ରିୟା ଶେଷ ହେବା ପର୍ଯ୍ୟନ୍ତ କୌଣସି ପ୍ରକାରର ଅପୁଷ୍ଟ କିମ୍ବା ଭ୍ରମାତ୍ମକ ଖବର ପ୍ରସାର ନକରିବା ପାଇଁ ସେ ଜନସାଧାରଣଙ୍କୁ ଅପିଲ୍ କରିଛନ୍ତି।