ରାଜ୍ୟରେ ସକ୍ରିୟ ମୌସୁମୀ : ଲାଗି ରହିଛି ଝିପିଝିପି ବର୍ଷା
ରାଜ୍ୟରେ ଅଧିକାଂଶ ଅଞ୍ଚଳରେ ଲାଗି ରହିଛି ଝିପିଝିପି ବର୍ଷା। ବିଶେଷ କରି କଟକ ଭୁବନେଶ୍ଵର ସମେତ ଉପକୂଳ ଅଞ୍ଚଳରେ ଆଜି ସକାଳୁ ବର୍ଷା ଲାଗି ରହିଛି। ମୌସୁମୀ ସକ୍ରିୟ ଥିବାରୁ ଏହି ବର୍ଷା ହେଉଛି। ତେବେ ଦିନକ ପରେ ବଙ୍ଗୋପ ସାଗରରେ ଏକ ଲଘୁଚାପ ହେବ ବୋଲି ପାଣିପାଗ ବିଭାଗ ପକ୍ଷରୁ ଅନୁମାନ କରାଯାଇଛି। ଲଘୁଚାପ ହେବା ପରେ ବର୍ଷାର ପରିମାଣ ବଢ଼ିବ।
ଆସନ୍ତା ୭ ଯାଏ ସାରା ରାଜ୍ୟରେ ଭଲ ବର୍ଷା ହେବ। ଆସନ୍ତା ୨୪ ଘଣ୍ଟାରେ ପ୍ରବଳ ବର୍ଷା ନେଇ ରାଜ୍ୟର ୧୧ ଜିଲ୍ଲାକୁ ୟେଲୋ ୱାର୍ଣ୍ଣିଂ ଜାରି କରାଯାଇଛି । ସେହି ଜିଲ୍ଲାଗୁଡିକ ହେଉଛି ମୟୂରଭଞ୍ଜ, କେନ୍ଦୁଝର, ଅନୁଗୁଳ, ଢେଙ୍କାନାଳ, କଟକ, କେନ୍ଦ୍ରାପଡା, ଜଗତସିଂହପୁର, ଯାଜପୁର, ଭଦ୍ରକ, ରାୟଗଡା ଓ କୋରାପୁଟ । ଏହି ଜିଲ୍ଲାରେ ପ୍ରବଳ ବର୍ଷା ହେବା ନେଇ ଆକଳନ କରାଯାଇଛି । ସେହିପରି ମୟୂରଭଞ୍ଜ ଓ କେନ୍ଦୁଝରରେ ପ୍ରବଳରୁ ଅତିପ୍ରବଳ ବର୍ଷା ନେଇ ଆକଳନ କରିଛି ପାଣିପାଗ ବିଜ୍ଞାନ କେନ୍ଦ୍ର । ଲଘୁଚାପ ସୃଷ୍ଟି ହେବା ପରେ ଏହା ପଶ୍ଚିମ -ଉତ୍ତର ପଶ୍ଚିମ ଦିଗକୁ ଗତି କରିବ । ଏହାର ପ୍ରଭାବରେ ରାଜ୍ୟରେ ପାଗରେ ପରିବର୍ତ୍ତନ ହେବ । ଉପକୂଳବର୍ତ୍ତୀ ଅଂଚଳରେ ପ୍ରବଳରୁ ଅତିପ୍ରବଳ ବର୍ଷା ହେବା ନେଇ ଆକଳନ କରିଛି ପାଣିପାଗ ବିଜ୍ଞାନ କେନ୍ଦ୍ର । ସେଥିଲାଗି ଜୁଲାଇ ୩ ଓ ୪ରେ ସମୁଦ୍ର ଭିତରକୁ ନ ଯିବାକୁ ମତ୍ସ୍ୟଜୀବୀଙ୍କୁ ବାରଣ କରାଯାଇଛି । …
କେତନ ଅଗ୍ରୱାଲ ମାମଲାରେ ବଡ଼ ଟ୍ୱିଷ୍ଟ: ଅଭିଯୁକ୍ତ ସିୟାଙ୍କ ଭାଇଙ୍କୁ ୧୦ କୋଟିର ନୋଟିସ ପଠାଇଲେ ଓକିଲ ଆଶୁତୋଷ, ଜାଣନ୍ତୁ କଣ ଥିଲା କାରଣ?
ନନ୍ଦିଘୋଷ ଟିଭି ବ୍ୟୁରୋ: ବହୁଚର୍ଚ୍ଚିତ କେତନ ଅଗ୍ରୱାଲ ହତ୍ୟାକାଣ୍ଡ ମାମଲାରେ ଏକ ନୂଆ ଏବଂ ନାଟକୀୟ ମୋଡ଼ ସାମ୍ନାକୁ ଆସିଛି, ଯାହାକୁ ନେଇ କୋର୍ଟରୁମରେ ପ୍ରବଳ ହଙ୍ଗାମା ଦେଖିବାକୁ ମିଳିଛି। ମାମଲାର ମୁଖ୍ୟ ଅଭିଯୁକ୍ତ ସିୟା ଗୋୟଲଙ୍କ ପକ୍ଷରୁ କୋର୍ଟରେ କିଏ ପ୍ରତିନିଧିତ୍ୱ କରିବ, ସେ ନେଇ ଦୁଇଜଣ ଓକିଲଙ୍କ ମଧ୍ୟରେ ବିବାଦ ଉପୁଜିଥିଲା। ବାର୍ ଆଣ୍ଡ୍ ବେଞ୍ଚର ଏକ ରିପୋର୍ଟ ଅନୁଯାୟୀ, ଓକିଲ ଆଶୁତୋଷ ଶ୍ରୀବାସ୍ତବ ଅଦାଲତରେ ହାଜର ହୋଇ ଦାବି କରିଥିଲେ ଯେ ସେ ସିୟାଙ୍କ ଓକିଲ ଏବଂ ତାଙ୍କ ପାଖରେ ସିୟାଙ୍କ ଦ୍ୱାରା ସ୍ୱାକ୍ଷରିତ ବୈଧ ‘ବକାଲତନାମା’ ରହିଛି। ମାତ୍ର କୋର୍ଟରୁମରେ ସେତେବେଳେ ଚାଞ୍ଚଲ୍ୟ ଖେଳିଯାଇଥିଲା, ଯେତେବେଳେ ସିୟା ନିଜେ ସ୍ପଷ୍ଟ କରିଥିଲେ ଯେ ସେ କେବଳ ବିପୁଲ ଦୁଶିଙ୍ଗଙ୍କୁ ହିଁ ନିଜର ଓକିଲ ନିଯୁକ୍ତ କରିଛନ୍ତି। ସିୟାଙ୍କ ଏହି ବୟାନ ପରେ ଆଶୁତୋଷ ଶ୍ରୀବାସ୍ତବ ନିରୁପାୟ ହୋଇ କୋର୍ଟରୁମରୁ ଚାଲିଯାଇଥିଲେ।
ଅପରପକ୍ଷରେ, ସିୟାଙ୍କ ପରିବାର, ବିଶେଷ କରି ତାଙ୍କ ଭାଇ ସାହିଲ ଗୋୟଲ ଏବଂ ପୋଲିସ ମଧ୍ୟ ସ୍ପଷ୍ଟ କରିଛନ୍ତି ଯେ ଆଶୁତୋଷ ଶ୍ରୀବାସ୍ତବ କିମ୍ବା ତାଙ୍କ ଟିମକୁ ଏହି ମାମଲା ପାଇଁ କୌଣସି ଅନୁମତି ଦିଆଯାଇ ନାହିଁ ଏବଂ ବିପୁଲ ଦୁଶିଙ୍ଗ ହିଁ ସେମାନଙ୍କର ଅଫିସିଆଲ୍ ଓକିଲ। କୋର୍ଟରୁମରେ ହୋଇଥିବା ଏହି ଅପମାନଜନକ ପରିସ୍ଥିତି ପରେ ଓକିଲ ଆଶୁତୋଷ ଶ୍ରୀବାସ୍ତବ ଏକ ବଡ଼ ପଦକ୍ଷେପ ନେଇ ସିୟାଙ୍କ ଭାଇ ସାହିଲ ଗୋୟଲଙ୍କୁ ୧୦ କୋଟି ଟଙ୍କାର ମାନହାନି ନୋଟିସ ପଠାଇଛନ୍ତି। ଆଶୁତୋଷଙ୍କ ଅଭିଯୋଗ ଅନୁଯାୟୀ, ଗତ ଜୁନ୍ ୨୯ ତାରିଖରେ ସାହିଲ ଗଣମାଧ୍ୟମ ସାମ୍ନାରେ ସାର୍ବଜନୀନ ଭାବେ ମିଥ୍ୟା ଓ ଭ୍ରାମକ ବୟାନ ଦେଇଛନ୍ତି, ଯାହା ତାଙ୍କର ବୃତ୍ତିଗତ ପ୍ରତିଷ୍ଠାକୁ ଗମ୍ଭୀର ଭାବେ କ୍ଷତି ପହଞ୍ଚାଇଛି। ଏହି ନୋଟିସ ଜରିଆରେ ସେ ସାହିଲଙ୍କୁ ନିଜର ଆରୋପ ପ୍ରତ୍ୟାହାର କରିବା ସହ ସାର୍ବଜନୀନ ଭାବେ କ୍ଷମା ପ୍ରାର୍ଥନା କରିବାକୁ ଏବଂ କ୍ଷତିପୂରଣ ବାବଦକୁ ୧୦ କୋଟି ଟଙ୍କା ପ୍ରଦାନ କରିବାକୁ ଦାବି କରିଛନ୍ତି।
ମହାରାଷ୍ଟ୍ରର ସମସ୍ତ ସ୍କୁଲରେ ୧ମ ରୁ ୧୦ମ ଶ୍ରେଣୀ ଯାଏଁ ମରାଠୀ ଭାଷା ବାଧ୍ୟତାମୂଳକ, ନିୟମ ଉଲ୍ଲଂଘନ କଲେ ହେବ କଡ଼ା କାର୍ଯ୍ୟାନୁଷ୍ଠାନ
ନନ୍ଦିଘୋଷ ବ୍ୟୁରୋ: ମହାରାଷ୍ଟ୍ର ସରକାର ରାଜ୍ୟର ସମସ୍ତ ଶିକ୍ଷା ବୋର୍ଡ (ଯେପରିକି CBSE, ICSE କିମ୍ବା ରାଜ୍ୟ ବୋର୍ଡ) ଏବଂ ସମସ୍ତ ମାଧ୍ୟମର ସ୍କୁଲଗୁଡ଼ିକରେ ପ୍ରଥମରୁ ଦଶମ ଶ୍ରେଣୀ ପର୍ଯ୍ୟନ୍ତ ମରାଠୀ ଭାଷା ଶିକ୍ଷାକୁ ବାଧ୍ୟତାମୂଳକ କରିବା ପାଇଁ ଏକ ବଡ଼ ନିଷ୍ପତ୍ତି ନେଇଛନ୍ତି। ବିଧାନସଭାରେ ବିଜେପି ବିଧାୟକ ଅତୁଲ ଭାତଖଲକର ଏବଂ ଅନ୍ୟ ସଦସ୍ୟଙ୍କ ପ୍ରଶ୍ନର ଉତ୍ତର ଦେଇ ରାଜ୍ୟ ସ୍କୁଲ ଶିକ୍ଷା ମନ୍ତ୍ରୀ ଦାଦା ଭୁସେ ଏହି ସୂଚନା ଦେଇଛନ୍ତି। ସେ ସ୍ପଷ୍ଟ କରିଛନ୍ତି ଯେ, ଏହି ଆଦେଶକୁ କଡ଼ାକଡ଼ି ଭାବେ ପାଳନ କରିବା ପାଇଁ ସାରା ରାଜ୍ୟରେ ଏକ ବିଶେଷ ଯାଞ୍ଚ ଅଭିଯାନ ଚଲାଯିବ। ଯଦି କୌଣସି ସ୍କୁଲରେ ମରାଠୀ ଭାଷା ବାଧ୍ୟତାମୂଳକ ଭାବେ ପଢ଼ାଯାଉ ନଥିବା ଜଣାପଡ଼େ, ତେବେ ସମ୍ପୃକ୍ତ ଅଧିକାରୀ ଓ ସ୍କୁଲ ପରିଚାଳନା କମିଟି ବିରୋଧରେ କଠୋର ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ସଦସ୍ୟମାନେ ପୂର୍ବରୁ ଲାଗୁ ହେଉଥିବା ଜରିମାନା ଅଧିକ ପ୍ରଭାବଶାଳୀ ନଥିବା ଅଭିଯୋଗ କରିବା ପରେ ସରକାର ଏହି କଡ଼ା ଆଭିମୁଖ୍ୟ ଆପଣାଇଛନ୍ତି।
ଏହା ସହିତ ମନ୍ତ୍ରୀ ବିଧାନସଭାରେ ଛତ୍ରପତି ଶିବାଜୀ ମହାରାଜଙ୍କ ଇତିହାସକୁ ନେଇ ମଧ୍ୟ ଏକ ଗୁରୁତ୍ୱପୂର୍ଣ୍ଣ ସୂଚନା ଦେଇଛନ୍ତି। ସେ କହିଛନ୍ତି ଯେ, ପୂର୍ବରୁ ଅନ୍ୟ କେତେକ ଶିକ୍ଷା ବୋର୍ଡର ପାଠ୍ୟପୁସ୍ତକରେ ଶିବାଜୀ ମହାରାଜଙ୍କ ଇତିହାସ ମାତ୍ର ଦେଢ଼ କଲମ୍ ମଧ୍ୟରେ ସୀମିତ ଥିଲା, କିନ୍ତୁ ଏବେ କେନ୍ଦ୍ର ସରକାରଙ୍କ ମଞ୍ଜୁରୀ ପରେ ଏହାକୁ ୨୨ ପୃଷ୍ଠା ପର୍ଯ୍ୟନ୍ତ ବିସ୍ତାର କରାଯାଇଛି। ଏହାଦ୍ୱାରା ଛାତ୍ରଛାତ୍ରୀମାନେ ତାଙ୍କ ଜୀବନ ଓ ଅବଦାନ ବିଷୟରେ ବିସ୍ତୃତ ଭାବେ ଜାଣିପାରିବେ। ରାଜ୍ୟ ସରକାରଙ୍କର ପ୍ରଧାନ ଉଦ୍ଦେଶ୍ୟ କେବଳ ମରାଠୀ ଭାଷାର ସଂରକ୍ଷଣ ଓ ପ୍ରସାର କରିବା ନୁହେଁ, ବରଂ ନୂଆ ପିଢ଼ିକୁ ଛତ୍ରପତି ଶିବାଜୀ ମହାରାଜଙ୍କ ଗୌରବଶାଳୀ ଇତିହାସ ଏବଂ ସାଂସ୍କୃତିକ ଐତିହ୍ୟ ସହ ଯୋଡ଼ିବା। ସରକାର କହିଛନ୍ତି ଯେ ଏହି ନିୟମାବଳୀ ପ୍ରତି କୌଣସି ପ୍ରକାରର ଅବହେଳା ବରଦାସ୍ତ କରାଯିବ ନାହିଁ
ବିମାନ ଦୁର୍ଘଟଣା: ୨ଟି ଦେଶ, ୨ଟି ଦୁର୍ଘଟଣା ଆଉ ୨୫ ଜୀବନ ଶେଷ!
ରବିବାର ଦିନ ବିଶ୍ୱର ଦୁଇଟି ଭିନ୍ନ ସ୍ଥାନରୁ ଆସିଲା ଦୁଃଖଦ ଖବର। ଫ୍ରାନ୍ସ ଏବଂ ସାଉଦି ଆରବରେ ଦୁଇଟି ବଡ଼ ବିମାନ ଦୁର୍ଘଟଣା ଘଟିଛି। ଏହି ଦୁଇଟି ଭୟଙ୍କର ଦୁର୍ଘଟଣାରେ ମୋଟ ୨୫ ରୁ ଅଧିକ ଲୋକ ନିଜର ପ୍ରାଣ ହରାଇଛନ୍ତି। ବର୍ତ୍ତମାନ ଉଭୟ ଘଟଣାର ତଦନ୍ତ ଜାରି ରହିଛି।
ଫ୍ରାନ୍ସର ଟମ୍ବଲେନ୍ ସହର ନିକଟରେ ସ୍କାଇଡାଇଭରମାନଙ୍କୁ ନେଇ ଯାଉଥିବା ଏକ ବେସାମରିକ ବିମାନ ହଠାତ୍ ଦୁର୍ଘଟଣାଗ୍ରସ୍ତ ହୋଇଥିଲା। ସ୍ଥାନୀୟ ସମୟ ସକାଳ ପ୍ରାୟ ୧୧ଟାରେ ଘଟିଥିବା ଏହି ଦୁର୍ଘଟଣାରେ ବିମାନରେ ଥିବା ସମସ୍ତ ୧୧ ଜଣଙ୍କର ମୃତ୍ୟୁ ଘଟିଛି। ମୃତକଙ୍କ ମଧ୍ୟରେ ଜଣେ ପାଇଲଟ୍, ୫ ଜଣ ଟ୍ରେନି ସ୍କାଇଡାଇଭର ଏବଂ ୫ ଜଣ ଇନଷ୍ଟ୍ରକ୍ଟର ଥିଲେ।
ରିପୋର୍ଟ ଅନୁଯାୟୀ, ଦୁର୍ଘଟଣା ପରେ ବିମାନରେ ଏକ ବଡ଼ ଧରଣର ବିସ୍ଫୋରଣ ହେବାର ଆଶଙ୍କା ଦେଖାଦେଇଥିଲା। ଏହାକୁ ନଜରରେ ରଖି ସ୍ଥାନୀୟ ପୋଲିସ ସାଲଭାଡୋର ଆଲେନ୍ଦେ ଷ୍ଟ୍ରିଟ୍ ଆଖପାଖ ଅଞ୍ଚଳକୁ ସିଲ୍ କରିଦେଇଥିଲା ଏବଂ ଲୋକଙ୍କୁ ସେହି ସ୍ଥାନଠାରୁ ଦୂରେଇ ରହିବାକୁ ନିର୍ଦ୍ଦେଶ ଦେଇଥିଲା। ପ୍ରଶାସନ ପକ୍ଷରୁ ତୁରନ୍ତ ଉଦ୍ଧାର କାର୍ଯ୍ୟ ଆରମ୍ଭ କରାଯାଇଥିଲା।
ଅନ୍ୟପଟେ ସାଉଦି ଆରବର ରାସ୍ ତନୁରା ସହରରେ ଏକ ବଡ଼ ହେଲିକପ୍ଟର ଦୁର୍ଘଟଣାଗ୍ରସ୍ତ ହୋଇଛି। ବିଶ୍ୱର ସବୁଠାରୁ ବଡ଼ ତେଲ କମ୍ପାନୀ ‘ସାଉଦି ଆରାମକୋ’ର ଏହି ହେଲିକପ୍ଟରଟି କ୍ରାଶ୍ ହେବା ଫଳରେ ଅତିକମରେ ୧୪ ଜଣଙ୍କର ମୃତ୍ୟୁ ଘଟିଛି। ସରକାରୀ ସୂତ୍ର ଅନୁଯାୟୀ, ମୃତ୍ୟୁବରଣ କରିଥିବା ସମସ୍ତ ବ୍ୟକ୍ତି ସାଉଦି ଆରବର ନାଗରିକ ଥିଲେ।
ସାଉଦି ଆରବର ଶକ୍ତି ମନ୍ତ୍ରଣାଳୟ ଏହି ଦୁର୍ଘଟଣାକୁ ନେଇ ଗଭୀର ଶୋକ ପ୍ରକାଶ କରିବା ସହ ମୃତକଙ୍କ ପରିବାର ପ୍ରତି ସମବେଦନା ଜଣାଇଛି। ଏହି ହେଲିକପ୍ଟରଟି କେଉଁ କାରଣରୁ କ୍ରାଶ୍ ହେଲା, ତାହା ଏପର୍ଯ୍ୟନ୍ତ ଜଣାପଡ଼ିନାହିଁ। ବୈଷୟିକ ତ୍ରୁଟି କିମ୍ବା ଖରାପ ପାଗ ଯୋଗୁଁ ଏଭଳି ଘଟିଥାଇପାରେ ବୋଲି ଅନୁମାନ କରାଯାଉଛି, ଯାହାର ତଦନ୍ତ ଉଚ୍ଚସ୍ତରୀୟ ଅଧିକାରୀଙ୍କ ଦ୍ୱାରା କରାଯାଉଛି।
ହତାଶ ପ୍ରେମିକର ଉନ୍ମତ୍ତ କାଣ୍ଡ ; କଥାବାର୍ତ୍ତା ବନ୍ଦ କରିଦେବାରୁ ଯୁବତୀଙ୍କୁ ହତ୍ୟା ଉଦ୍ୟମ
ନନ୍ଦିଘୋଷ ବ୍ୟୁରୋ : ପୁରୁଷ ବନ୍ଧୁଙ୍କ ସହ କଥାବାର୍ତ୍ତା ନହେବାରୁ ଯୁବତୀଙ୍କ ଉପରେ ପେଟ୍ରୋଲ ଢାଳି ନିଆଁ ଲଗାଇଦେଲା ଯୁବକ । ଗୁରୁତର ଅବସ୍ଥାରେ ଯୁବତୀଙ୍କୁ ମେଡିକାଲରେ ଭର୍ତ୍ତି କରାଯାଇଥିବାବେଳେ ଅଭିଯୁକ୍ତ କିଞ୍ଜିରିକେଲାର ରଜତ କିରୋକୁ ଗିରଫ କରିଛି ପୋଲିସ । ଏପରି ଏକ ଅଭାବନୀୟ ଘଟଣା ଘଟିଛି ସୁନ୍ଦରଗଡ଼ ଜିଲ୍ଲା ବିଶ୍ରା ଥାନା ସନ୍ତୋଷପୁର ଜାରାଟୋଲି ବସ୍ତିରେ ।
ହତାସ ପ୍ରେମିକର ଉନ୍ମତ୍ତ କାଣ୍ଡ । କଥା ନହେବାରୁ ଯୁବତୀଙ୍କୁ ହତ୍ୟା ଉଦ୍ୟମ । ଘରେ ପେଟ୍ରୋଲ ଢାଳି ନିଆଁ ଲଗାଇଦେଲା ଯୁବକ । ଗୁରୁତର ଯୁବତୀ ରାଉରକେଲା ଜୟପ୍ରକାଶ ହସ୍ପିଟାଲରେ ଭର୍ତ୍ତି । ସୁନ୍ଦରଗଡ଼ ଜିଲ୍ଲା ବିଶ୍ରା ଥାନା ସନ୍ତୋଷପୁ୍ର ଜାରା ଟୋଲି ବସ୍ତିରେ ପ୍ରେମରେ ବିଫଳ ହେବା ପରେ ଯୁବକଙ୍କ ଉନ୍ମତ୍ତ କାଣ୍ଡ । ଯୁବତୀ ଜଣଙ୍କ ପୁରୁଷ ବନ୍ଧୁ ସହି କଥା ନହେବାରୁ ଛୁରୀ ଧରି ମାରିବା ପାଇଁ ଉଦ୍ୟମ । ଏଥିରେ ବିଫଳ ହେବା ପରେ ରାତିରେ ଘର ଝରକା ପଟେ ପାଇପଯୋଗେ ପେଟ୍ରୋଲ ଢାଳି ଲଗାଇଦେଲା ନିଆଁ । ଘର ଜଳି ଯାଇଥିବାବେଳେ ଗୁରୁତର ଯୁବତୀଙ୍କୁ ହସ୍ପିଟାଲରେ ଭର୍ତ୍ତି କରାଯାଇଛି । ଯୁବତୀଙ୍କ ପରିବାର ଲୋକଙ୍କ ଅଭିଯୋଗ ପରେ ଅଭିଯୁକ୍ତ ପ୍ରେମିକ କିଞ୍ଜିରିକେଲାର ରଜତ କିରୋକୁ ଗିରଫ କରିଛି ବିଶ୍ରାଥାନା ପୋଲିସ ।
ନିଆଁରେ ପୋଡ଼ିହୋଇ ଯୁବତୀ ଜଣକ ରାଉରକେଲା ଜୟପ୍ରକାଶ ହସ୍ପିଟାଲରେ ଜୀବନ ସହ ସଂଗ୍ରାମ କରୁଛନ୍ତି । ସେପଟେ ପୋଲିସ ମାମଲା ରୁଜୁ କରି ସାଇଣ୍ଟିଫିକ ଟିମ ସହ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି । ପେଟ୍ରୋଲ ଆଣିଥିବା ଡବାକୁ ଜବତ କରିବା ସହ ଅଭିଯୁକ୍ତ ଯୁବକକୁ ଗିରଫ କରି କୋର୍ଟ ଚାଲାଣ କରିଛି ପୋଲିସ । ଏହି ଘଟଣା ପରେ ସ୍ଥାନୀୟ ଅଞ୍ଚଳରେ ଉତ୍ତେଜନା ଦେଖାଦେବା ସହ ସଂପୃକ୍ତ ଯୁବକଙ୍କ ବିରୋଧରେ କଠୋର କାର୍ଯ୍ଯାନୁଷ୍ଠାନ ନେବାକୁ ଦାବି ହୋଇଛି ।
କୂଳଲଙ୍ଘି ଗାଁ ଭିତରକୁ ମାଡ଼ି ଆସୁଛି ସମୁଦ୍ର ; ଭୟରେ ଗାଁ ଛାଡ଼ିଲେଣି ଲୋକେ
ନନ୍ଦିଘୋଷ ବ୍ୟୁରୋ : ସମୁଦ୍ରରେ ଲୀନ ହେବାକୁ ବସିଲାଣି ଗଞ୍ଜାମ ଜିଲ୍ଲାର ପୋଡ଼ମପେଟା । ଗୋଟିଏ ପରେ ଗୋଟିଏ ଘର, ମନ୍ଦିର ଓ ଜଙ୍ଗଲକୁ ଗିଳି ଚାଲିଛି ସମୁଦ୍ରର ଉଚ୍ଚ ଲହରୀ । ଲୁଣା ମାଡ଼ରେ ମାନଚିତ୍ରରୁ ଏହି ସମୁଦ୍ରକୂଳିଆ ଗାଁ ଲିଭିଯିବାକୁ ବସିଥିବାବେଳେ ବିପଦରେ ଆଉ ୧୨ଟି ଗାଁ । ବଢ଼ୁଥିବା କୂଳକ୍ଷୟ ସହ ବଢ଼ୁଛି ଲୋକଙ୍କ ଭୟ । ସ୍ଥାୟୀ ପ୍ରତିକାର ଦାବିରେ ସରକାରଙ୍କୁ ଗୁହାରି କରୁଛନ୍ତି ସ୍ଥାନୀୟ ବାସିନ୍ଦା ।
କୂଳ ଖାଉଛି ସମୁଦ୍ର । ଉଜୁଡୁଛି ଗାଁ । ସମୁଦ୍ରରେ ଲୀଲ ହେଲାଣି ଗୋଟିଏ ପରେ ଗୋଟିଏ ଘର । ଗାଁ ଭିତରେ ଲହଡ଼ି ମାରୁଛି ଲୁଣାଜଳ । ଜନଶୂନ୍ୟ ହେଲାଣି ଗଞ୍ଜାମ ଜିଲ୍ଲାର ପୋଡ଼ମପେଟା । ବଢ଼ୁଛି ବିପଦ ବଢ଼ୁଛି ଚିନ୍ତା । ଏବେ ସମୁଦ୍ର ଆଁରେ ଆହୁରି ଉପକୂଳ ୧୨ଟି ଗାଁ । ଇଏ ହେଉଛି ଗଞ୍ଜାମ ବ୍ଲକ ପାଳିବନ୍ଧ ପଞ୍ଚାୟତର ପୋଡ଼ମପେଟାର ଛାତିଥରା ଚିତ୍ର । ଦିନେ ଶହ ଶହ ମତ୍ସ୍ୟଜୀବୀ ପରିବାରଙ୍କ କୋଳାହଳରେ ଫାଟି ପଡୁଥିବା ଗାଁ ଏବେ ପ୍ରାୟ ଜନଶୂନ୍ୟ । ବାରମ୍ବାର ଲଘୁଚାପ, ବାତ୍ୟା ଓ ସମୁଦ୍ର କୂଳ ଲଙ୍ଘିବା ଯୋଗୁଁ ଗାଁର ଗୋଟିଏ ପରେ ଗୋଟିଏ ସାହି ସମୁଦ୍ର ଗର୍ଭରେ ଲୀନ ହୋଇଯାଇଛି । ଯେଉଁଠି ଏକଦା ୫ଶହ ରୁ ଅଧିକ ପରିବାର ବସବାସ କରୁଥିଲେ, ସେଠାରେ ଏବେ ହାତଗଣତି କେତେକ ପରିବାର ଭୟରେ ଜୀବନ ବିତାଉଛନ୍ତି । ଭଙ୍ଗା ଘର, ଖାଲି ପଡ଼ିଥିବା ବସ୍ତି ଓ ସମୁଦ୍ରର ଗର୍ଜନ କହୁଛି ପୋଡମପେଟାର ଦୁଃଖର କାହାଣୀ ।
ଏକଦା ପୋଡମପେଟା ଗାଁଠାରୁ ପ୍ରାୟ ଦୁଇ କିଲୋମିଟର ଦୂରରେ ଥିଲା ସମୁଦ୍ର। ହେଲେ ଏବେ କେବଳ ପୋଡମପେଟା ନୁହେଁ, ସମୁଦ୍ର କୂଳ କ୍ଷୟର ଭୟ କଣ୍ଟିଆଗଡ଼ ସମେତ ପାଳିବନ୍ଧ ପଞ୍ଚାୟତର ୧୨ଟି ଆଖପାଖ ଗାଁ ଉପରେ ପଡ଼ିଛି । ଗତ ୧୦ ଦିନ ମଧ୍ୟରେ ସମୁଦ୍ର ପ୍ରାୟ ୫୦ ମିଟର ଆଗକୁ ମାଡ଼ି ଆସିଥିବା ସ୍ଥାନୀୟ ଲୋକ କହୁଛନ୍ତି । ଉଚ୍ଚ ଜୁଆର ମାଡ଼ରେ ଗାଁର ମନ୍ଦିର ସମେତ ୨୦ରୁ ଅଧିକ ଘର ସମୁଦ୍ର ଗର୍ଭରେ ଲୀନ ହୋଇଯାଇଛି । ସ୍ଥାୟୀ ପ୍ରତିକାର ଓ ପଥର ବନ୍ଧ ନିର୍ମାଣ ପାଇଁ ସରକାରଙ୍କ ହସ୍ତକ୍ଷେପ ଦାବି କରିଛନ୍ତି ସ୍ଥାନୀୟ ବାସିନ୍ଦ । ତେବେ ସ୍ଥାୟୀ ସମାଧାନ ପାଇଁ ଜଳସମ୍ପଦ ବିଭାଗ ସହ ଆଲୋଚନା କରି ଆବଶ୍ୟକ ପଦକ୍ଷେପ ନିଆଯିବ ବୋଲି କହିଛନ୍ତି ଗଞ୍ଜାମ ଜିଲ୍ଲାପାଳ ।
ଦୁର୍ବଳ ମୌସୁମୀ ଯୋଗୁଁ ଆକାଶରୁ ମେଘ ଗାଏବ ; କରଜ କରି ଧାନ ବୁଣିବା ପରେ ଆକାଶକୁ ଚାହିଁ ରହିଛି ଚାଷୀ
ନନ୍ଦିଘୋଷ ବ୍ୟୁରୋ : ଗୋଟିଏ ପଟେ ଧାନକିଣା ଅବ୍ୟବସ୍ଥା, କଟନୀଛଟନୀ ଯୋଗୁଁ ଚାଷୀ ତଳିତଳାନ୍ତ ହେଉଥିବା ବେଳେ ଅନ୍ୟପଟେ ଦୁର୍ବଳ ମୌସୁମୀ ଚାଷୀଙ୍କୁ ଚିନ୍ତାରେ ପକାଇଛି I ଅକ୍ଷୟ ତୃତୀୟା ପରେ ଚାଷ ପାଇଁ ଅନୁକୂଳ ହୋଇଥାଏ I ଚାଷୀ କ୍ଷେତରେ ଧାନ ବୁଣି ବର୍ଷାକୁ ଚାହିଁ ରହିଛି । କିନ୍ତୁ ବର୍ଷା ଦୂରର କଥା ଆକାଶରୁ ମେଘ ହଜି ଯାଇଛି I ଜୁନ ମାସରେ ୧୮୯ ମିଲିମିଟର ସ୍ୱାଭାବିକ ବର୍ଷା ହେବା ବଦଳରେ ଏପର୍ଯ୍ୟନ୍ତ ମାତ୍ର ୨୫ ମିଲିମିଟର ବର୍ଷା ହୋଇଛି । ଫଳରେ ଗଜାମରୁଡି ଆଶଙ୍କାରେ ମୁଣ୍ଡରେ ହାତ ଦେଇ ଚିନ୍ତାରେ ଚାଷୀ I
ଆଷାଢ଼ରେ ଢୁ ଢୁ ଖରା । ହଜିଯାଇଛି ମୌସୁମୀ । ବର୍ଷା ଦୂରର କଥା ମେଘ ବି ଗାଏବ । ଧାନ ବୁଣି ଆକାଶକୁ ଚାହିଁ ରହିଛି ଚାଷୀ । ନିଅଣ୍ଟିଆ ବର୍ଷା ଗଜା ମରୁଡ଼ି ଆଣିବା ଆଶଂକା । ଚଳିତ ବର୍ଷ ବର୍ଷାରେ ବିଳମ୍ବ ହେଉଥିାବାରୁ ବଲାଙ୍ଗୀରରେ ଖରିଫ ଚାଷ ପଛେଇ ଯାଇଛି I ଚାଷୀ ବିଲରେ ହଳ କରିବା ସହ ଧାନ ବୁଣି ବର୍ଷା ପାଇଁ ଆକାଶକୁ ଅନାଇ ରହିଛି I ପ୍ରତି ବର୍ଷ ଜୁନ୍ ପ୍ରଥମ ସପ୍ତାହରେ ମୌସୁମୀ ଜନିତ ବର୍ଷା ଆରମ୍ଭ ହୋଇଥାଏ I ହେଲେ ଜୁନ୍ ଶେଷ ହେଲାଣି I ବର୍ଷା ତ ଦୂର କଥା, ଆକାଶରେ ମେଘ ଦେଖୁବାକୁ ମିଳୁନାହିଁ I ଏଭଳି ପରିସ୍ଥିତିରେ ଜିଲ୍ଲାରେ ଖରିଫ ଚାଷ ପ୍ରଭାବିତ ହେବା ଆଶଂକା ଦେଖାଦେଇଛି । କରଜ କରି ଚାଷୀ ବିହନ ବୁଣି ମୁଣ୍ଡରେ ହାତ ଦେଇ ବସିଛି ଚାଷୀ I
ଜୁନ୍ ଆରମ୍ଭରୁ ଧାନବୁଣା ସହ ତଳି ପକାଯାଇ ଜୁଲାଇ ଦ୍ବିତୀୟ ସପ୍ତାହରେ ପଲ୍ଲା ରୁଆ ଆରମ୍ଭ ହୁଏ । କିନ୍ତୁ ଚଳିତ ବର୍ଷ ପାଣି ଅଭାବରୁ ବିଲରେ ବୁଣାଯାଇଥିବା ଧାନ ଗଜା ବି ଧରିନି । ଚଳିତ ବର୍ଷ ଜୁନ୍ରେ ୧୮୯ ମିଲିମିଟର ସ୍ଵାଭାବିକ ବର୍ଷା ହେବା କଥା I ତେବେ କୃଷି ବିଭାଗ ସୂଚନା ଅନୁସାରେ ଜୁନ୍ ୨୭ ପର୍ଯ୍ୟନ୍ତ ମାତ୍ର ୨୫ ମିଲିମିଟର ବର୍ଷା ହୋଇଥିବା ବଲାଙ୍ଗୀର ମୁଖ୍ୟ କୃଷି ଅଧିକାରୀ ସୂଚନା ଦେଇଛନ୍ତି I ୨୦୨୫ ଖରିଫ ଋତୁରେ ବଲାଙ୍ଗୀର ଜିଲ୍ଲାରେ ୧ ଲକ୍ଷ ୭୫ ହଜାର ୮୩୦ ହେକ୍ଟର ଧାନ ଚାଷ ପାଇଁ ଲକ୍ଷ୍ୟ ଧାର୍ଯ୍ୟ ହୋଇଥିଲା I ୧ ଲକ୍ଷ ୭୮ ହଜାର ୧୩୪ ହେକ୍ଟର ଧାନ ଚାଷ ହୋଇଥିଲା I ଚଳିତବର୍ଷ ବର୍ଷା ଅଭାବରୁ ଚାଷ ଆରମ୍ଭରେ ବିଳମ୍ବ ହୋଇଥିବା ବେଳେ ଜିଲ୍ଲା କୃଷି ବିଭାଗ ପକ୍ଷରୁ ଖରିଫ ଚାଷ ପାଇଁ ଲକ୍ଷ୍ୟ ଧାର୍ଯ୍ୟ ହୋଇ ପାରିନାହିଁ I ଜିଲ୍ଲାପାଳଙ୍କ ଅନୁମୋଦନ ପରେ ଆସନ୍ତା ୧୫ ଦିନ ଲକ୍ଷ୍ୟ ଧାର୍ଯ୍ୟ କରାଯିବ । ସେପଟେ କୃଷି ବିଭାଗ ପକ୍ଷରୁ ଚାଷୀଙ୍କୁ କୌଣସି ସହାୟତା ସହ ସଚେତନତା କରାଯାଉନଥିବା ଚାଷୀ ଅଭିଯୋଗ କରିଛନ୍ତି ।
ନାହିଁ ନାହିଁରେ ଚାଲିଛି ମିତ୍ରପୁର ସ୍ୱାସ୍ଥ୍ୟକେନ୍ଦ୍ର ; ରକ୍ଷଣାବେକ୍ଷଣ ଅଭାବର ଜରାଜୀର୍ଣ୍ଣପ୍ରାୟ
ନନ୍ଦିଘୋଷ ବ୍ୟୁରୋ : ନାହିଁ ନାହିଁରେ ଚାଲିଛି ମିତ୍ରପୁର ସ୍ୱାସ୍ଥ୍ୟକେନ୍ଦ୍ର। ରକ୍ଷଣାବେକ୍ଷଣ ଅଭାବର ଜରାଜୀର୍ଣ୍ଣପ୍ରାୟ। ଅଞ୍ଚଳବାସୀଙ୍କୁ ଉତ୍ତମ ସ୍ଵାସ୍ଥ୍ୟ ସେବା ଯୋଗାଇଦେବା ଉଦ୍ଦେଶ୍ୟରେ ୨୦୦୪ ରେ ଲୋକଙ୍କ ସହାୟତାରେ ତିଆରି ହୋଇଥିଲା ମେଡିକାଲ । ହେଲେ ଅନୁଦାନ ଅଭାବରୁ ଅବହେଳିତ ଅବସ୍ଥାରେ ପଡିରହିଛି । ସପ୍ତାହକୁ ମାତ୍ର ଥରେ ଆସୁଛନ୍ତି ଡାକ୍ତର । ଫଳରେ ହନ୍ତସନ୍ତ ହେଉଛନ୍ତି ରୋଗୀ ।
ଜରାଜୀର୍ଣ୍ଣ ଅବସ୍ଥାରେ ମିତ୍ରପୁର ସ୍ବାସ୍ଥ୍ୟକେନ୍ଦ୍ର । ଭିତ୍ତିଭୂମି ରହିଛି, ହେଲେ ହୋଇପାରୁନି ରକ୍ଷଣାବେକ୍ଷଣ । ମିଳିପାରୁନି ସରକାରୀ ଅନୁଦାନ । ଆସୁନାହାଁନ୍ତି ଡାକ୍ତର । ନାହିଁନଥିବା ସମସ୍ୟା ଭୋଗୁଛନ୍ତି ଅଞ୍ଚଳବାସୀ । ବାଲେଶ୍ବର ଜିଲ୍ଲା ନୀଳଗିରି ଓ ରେମୁଣା ବ୍ଳକରେ ସ୍ବାସ୍ଥ୍ୟସେବା ଯୋଗାଇଦେବା ଉଦ୍ଦେଶ୍ୟରେ ୨୦୦୪ରେ ସ୍ଥାନୀୟ ଲୋକଙ୍କ ସହାୟତାରେ ତିଆରି ହୋଇଥିଲା ମିତ୍ରପୁର ସ୍ୱାସ୍ଥ୍ୟକେନ୍ଦ୍ର । ୧୨ ପଞ୍ଚାୟତର ଲୋକେ ସହଜରେ ପାଇପାରୁଥିଲେ ସ୍ବାସ୍ଥ୍ୟସେବା। କିନ୍ତୁ ଏବେ ସରକାରୀ ଅନୁଦାନ ମିଳୁନଥିବାରୁ ସପ୍ତାହକୁ ଥରେ ମାତ୍ର ଆସୁଛନ୍ତି ଡାକ୍ତର । ଦୈନିକ ୨୦ରୁ ୩୦ ରୋଗୀ ସ୍ବାସ୍ଥ୍ୟକେନ୍ଦ୍ରକୁ ଆସୁଥିବାବେଳେ ଉପଯୁକ୍ତ ସେବାରୁ ହେଉଛନ୍ତି ବଞ୍ଚିତ ।
ଖଣି ଖାଦାନଭରା ଏହି ଅଞ୍ଚଳରେ ଯକ୍ଷ୍ମା, ମ୍ୟାଲେରିଆ, ଝାଡ଼ାବାନ୍ତି ଓ ଜ୍ବର ବ୍ୟାପିଲେ ଲୋକେ ଏହି ଡାକ୍ତରଖାନା ଉପରେ ନିର୍ଭର କରନ୍ତି। ମାତ୍ର ସ୍ବାସ୍ଥ୍ୟକେନ୍ଦ୍ରରେ ଅବ୍ୟବସ୍ଥା ଯୋଗୁଁ ଉପଯୁକ୍ତ ସ୍ୱାସ୍ଥ୍ୟସେବା ପାଇପାରୁ ନାହାନ୍ତି ରୋଗୀ। ମିତ୍ରପୁର ସ୍ଵାସ୍ଥ୍ୟକେନ୍ଦ୍ରକୁ ସରକାର ଦୃଷ୍ଟି ଦେବା ସହ ଅନୁଦାନ ଯୋଗାଇଦେଲେ ଉତ୍ତମ ସ୍ଵାସ୍ଥ୍ୟ ସେବା ପାଇପାରନ୍ତେ ବୋଲି ଅଞ୍ଚଳବାସୀ କହିଛନ୍ତି।
ମୌସୁମୀ ଖେଳୁଛି ଲୁଚକାଳି ; ବର୍ଷାକୁ ଚାତକ ପରି ଚାହିଁବସିଛି ଚଷାପୁଅ
ନନ୍ଦିଘୋଷ ବ୍ୟୁରୋ : ମୌସୁମୀ ଖେଳୁଛି ଲୁଚକାଳି। ବର୍ଷାକୁ ଚାତକ ପରି ଚାହିଁବସିଛି ଚଷାପୁଅ । ବର୍ଷକର ଚାଷକୁ ନେଇ ଚିନ୍ତାରେ କଳାହାଣ୍ଡି ଜିଲ୍ଲା ଧର୍ମଗଡ଼ର ଚାଷୀ। ଗୋଲାମୁଣ୍ଡା, ଧର୍ମଗଡ ବ୍ଲକର ଦଣ୍ଡପାଟ ଅଞ୍ଚଳ ଓ କୋକସରା ବ୍ଲକର ଅଣ ଜଳସେଚିତ ଅଞ୍ଚଳରେ ପ୍ରାୟ ୫୦ ହଜାର ହେକ୍ଟର ଜମିରେ ଧାନ ଚାଷ ହୋଇଥାଏ । ଜଳସେଚନ ସୁବିଧା ନ ଥିବାରୁ ଏଠାକାର ଚାଷୀ ମୌସୁମୀ ବର୍ଷା ଉପରେ ନିର୍ଭର କରିଥାନ୍ତି । ଆଷାଢ଼ ମାସରେ ମୁଷଳ ଧାରାରେ ବର୍ଷା ହେବା କଥା, କିନ୍ତୁ ଏଯାଏଁ ବର୍ଷାର ଦେଖାନାହିଁ। ଫଳରେ ଚାଷକାମ ଆଗେଇ ପାରୁ ନ ଥିବାରୁ ଚିନ୍ତାରେ ଚାଷୀକୁଳ ।
ସାଧାରଣତଃ ଆଷାଢ଼ ମାସ ବା ଜୁନ ଶେଷ ଆଡ଼କୁ ଚାଷୀ ଧାନ ବୁଣାବୁଣି ସାଙ୍ଗକୁ ତଳି ପକାଇ ରୁଆ ବେଉଷଣ ପାଇଁ ପ୍ରସ୍ତୁତ ହୋଇଥାଏ । ହେଲେ ଚଳିତ ବର୍ଷ ଧାନ ବୁଣାବୁଣି ତ ଦୂରର କଥା ଚାଷୀ ନିଜ ଜମିକୁ ବି ପ୍ରସ୍ତୁତ କରିପାରୁନାହିଁ l ମୌସୁମୀର ଲୁଚକାଳି ଯୋଗୁଁ ଆଶା ଆଶଙ୍କାରେ ଚାଷୀର ବର୍ଷକର ଚାଷ l କେବେ ବର୍ଷା ହେବ ଓ ଚାଷୀ ଚାଷ କାମ ଆଗେଇବ ତାକୁ ଅପେକ୍ଷ ।