ଭୁବନେଶ୍ବର : ଆସନ୍ତା ଡିସେମ୍ବର ୨୬ ତାରିଖରେ ବିଜେଡିର ୨୭ତମ ପୂର୍ତ୍ତି ସହ ୨୮ତମ ପ୍ରତିଷ୍ଠା ଦିବସ ସବୁ ନିର୍ବାଚନ ମଣ୍ଡଳୀରେ ପାଳନ କରାଯିବ । ଏହି ଦିବସରେ ବିଜେଡିର ଛାମୁଆ ନେତା ତଥା ଶୁଭେଚ୍ଛୁ ମାନଙ୍କୁ ନେଇ ସଭା କରାଯିବ । ଏଥିରେ ରାଜ୍ଯ ଓ କେନ୍ଦ୍ର ସରକାରଙ୍କ ଜନବିରୋଧୀ କାର୍ଯ୍ୟକ୍ରମ ନେଇ ଆଲୋଚନା କରାଯିବ । ଦରଦାମ ବୃଦ୍ଧି ଠାରୁ ଆରମ୍ଭ କରି ବିଭିନ୍ନ ବର୍ଗର ଜନସାଧାରଣଙ୍କ ପ୍ରତି ପ୍ରତିଶୃତିର ଖିଲାପ ସମ୍ପର୍କରେ ଆଲୋଚନା କରାଯିବ । ଏହାସହ ଆଗକୁ ନୂଆ ପ୍ରତ୍ୟୟର ସହିତ ଲୋକଙ୍କ ସେବା କରିଚାଲିବାକୁ କର୍ମକର୍ତ୍ତାଙ୍କୁ ଆହ୍ବାନ ଦେଇଛନ୍ତି ନବୀନ । କିପରି ପ୍ରତିଷ୍ଠା ଦିବସ ପାଳନ ହେବ ସେ ନେଇ ଦଳୀୟ କର୍ମକର୍ତ୍ତାଙ୍କୁ ଆଜି ଚିଠି ଲେଖି ସୁପ୍ରିମୋ ନବୀନ ପଟ୍ଟନାୟକ ଏହି ଆହ୍ବାନ ଦେଇଛନ୍ତି । ରାଜ୍ୟ କର୍ମକର୍ତ୍ତା, ରାଜ୍ୟ କାର୍ଯ୍ୟକାରିଣୀ ସଭ୍ଯ/ସଭ୍ୟା, ଜିଲ୍ଲା ପର୍ଯ୍ୟବେକ୍ଷକ, ସାଂସଦ/ସାଂସଦ ପ୍ରାର୍ଥୀ, ବିଧାୟକ/ବିଧାୟିକା, ବିଧାୟକ/ବିଧାୟିକା ପ୍ରାର୍ଥୀ, ନିର୍ବାଚନ ମଣ୍ଡଳୀ ନେତୃବୃନ୍ଦ, ଜିଲ୍ଲା ସଭାପତି, ସାମୁଖ୍ୟ ସଂଗଠନ ମାନଙ୍କର ରାଜ୍ୟ ଓ ଜିଲ୍ଲା ସଭାପତି, ଜିଲ୍ଲା ପରିଷଦ ସଭାପତି,ଉପ-ସଭାପତି, ପୌରାଞ୍ଚଳର ମେୟର, ଡେପୁଟି ମେୟର, ଅଧ୍ଯକ୍ଷ, ଉପାଧ୍ଯକ୍ଷ, ବ୍ଲକ ଓ ନଗର ସଭାପତି ପ୍ରମୁଖଙ୍କୁ ନବୀନ ବିଜେଡି ପ୍ରତିଷ୍ଠା ଦିବସ ପାଳନ ନେଇ ଚିଠି ଲେଖିଛନ୍ତି । ଗତ ୨୭ ବର୍ଷ ଧରି ଉତ୍ସର୍ଗୀକୃତ ମନୋଭାବ ନେଇ ନିଷ୍ଠାପର ଭାବେ ଦଳ ଜନତାଙ୍କ ସେବା କରିଆସିଛି । ଏଥିପାଇଁ ବିଜେଡି ଆଞ୍ଚଳିକ ଦଳ ଭାବେ ସାରା ଦେଶରେ ଏକ ପ୍ରଶଂସନୀୟ ପରିଚିତି ଆଣିପାରିଛି । ବିଜେଡି ଆଜି ଏକ ସାମାଜିକ ଆନ୍ଦୋଳନରେ ପରିଣତ ହୋଇଛି । ବିଜୁ ବାବୁଙ୍କ ଆଦର୍ଶରେ ରାଜ୍ଯର ସବୁ କ୍ଷେତ୍ରରେ ଏବଂ ସବୁ ବର୍ଗର ଲୋକଙ୍କ ବିକାଶ ପାଇଁ ବିଜେଡିର ଆଭିମୁଖ୍ୟକୁ ଜନସାଧାରଣଙ୍କ ଅକୁଣ୍ଠ ସମର୍ଥନ, ଶୁଭେଚ୍ଛା ମିଳିଛି । ଆଗକୁ ମଧ୍ଯ ଲୋକଙ୍କ ପାଇଁ କାମ କରିଚାଲିବ ବିଜେଡି ବୋଲି ନବୀନ ଚିଠିରେ ଉଲ୍ଲେଖ କରିଛନ୍ତି ।
ରାଜ୍ୟସଭାରେ ସମ୍ବିଧାନ ଆଲୋଚନା ବେଳେ ଅମିତ ଶାହଙ୍କ ବିବାଦୀୟ ମନ୍ତବ୍ୟ !
ନୂଆଦିଳ୍ଲୀ : ବିଶିଷ୍ଟ ଜନନାୟକ ସମ୍ବିଧାନ ପ୍ରଣେତା ଡକ୍ଟର ଆମ୍ଵେଦକରଙ୍କୁ ନେଇ ଅମିତ ଶାହା ଯେଉଁ ମନ୍ତବ୍ୟ ଦେଇଥିଲେ, ତାକୁ ନେଇ ବଡ଼ ବିବାଦ। ଗତକାଲି ରାଜ୍ୟସଭାରେ ସମ୍ବିଧାନ ଆଲୋଚନା ବେଳେ କେନ୍ଦ୍ର ଗୃହ ମନ୍ତ୍ରୀ ଅମିତ ଶାହା ଏହି ବିବାଦୀୟ ମନ୍ତବ୍ୟ ଦେଇଥିବାର ବିରୋଧୀ ଅଭିଯୋଗ କରିଛନ୍ତି। ବିତର୍କରେ ଅମିତ ଶାହା କହିଥିଲେ, ଏବେ ଆମ୍ବେଦକରଙ୍କ ନାଁ ନେବା ଏକ ଫ୍ୟାସନ ହୋଇଗଲାଣି। ଖାଲି କହୁଛନ୍ତି ଆମ୍ଵେଦକର, ଆମ୍ଵେଦକର, ଆମ୍ଵେଦକର, ଆମ୍ଵେଦକର … ଯଦି ଏତେ ଥର ଭଗବାନଙ୍କ ନାଁ ନେଇଥାନ୍ତ, ତେବେ ସ୍ଵର୍ଗରେ ପହଞ୍ଚିଥାନ୍ତ। ତାଙ୍କର ଏହି ମନ୍ତବ୍ୟକୁ ନେଇ ବଡ଼ ବିବାଦ ସୃଷ୍ଟି ହୋଇଛି। ବିରୋଧୀ ଅଭିଯୋଗ କରିଛନ୍ତି, ଭାରତର ଗଣତନ୍ତ୍ରରେ ଆମ୍ବେଦକର ଭଗବାନଙ୍କଠାରୁ କମ୍ ନୁହନ୍ତି। ସେ ଦେଶର ସମ୍ବିଧାନ ପ୍ରଣୟନରେ ମୁଖ୍ୟ ଭୂମିକା ନେଇଥିଲେ। ତାଙ୍କୁ ବଡ଼ ଅପମାନ ଦେଇଛନ୍ତି ଅମିତ ଶାହା। ଦେଶର ସମ୍ବିଧାନର ପ୍ରଣେତାଙ୍କୁ ଏହି ଅପମାନ ବରଦାସ୍ତ କରାଯିବ ନୁହେଁ। ତେଣୁ ଆଜି ପାର୍ଲାମେଣ୍ଟ ପରିସରରେ ବିରୋଧୀ ଦଳର ସାଂସଦମାନେ ବିକ୍ଷୋଭ କରିଛନ୍ତି । ଆମ୍ବେଦକରଙ୍କ ପୋଷ୍ଟର ଧରି ପ୍ରତିବାଦ କରିଛନ୍ତି। ଅମିତ ଶାହା ନିଜ ମନ୍ତବ୍ୟ ପାଇଁ କ୍ଷମା ମାଗନ୍ତୁ ବୋଲି ଦାବି କରିଛନ୍ତି ବିରୋଧୀ । ସେପଟେ କେନ୍ଦ୍ର ସଂସଦୀୟ ବ୍ୟାପାର ମନ୍ତ୍ରୀ କିରଣ ରିଜିଜୁ କହିଛନ୍ତି, ଅମିତ ଶାହଙ୍କ ମନ୍ତବ୍ୟକୁ କଦର୍ଥ କରି ପ୍ରଚାର କରାଯାଉଛି। ଲୋକସଭାରେ ବାରମ୍ବାର ହଙ୍ଗାମା ପରେ ଗୃହକୁ ଆସନ୍ତାକାଲି ୧୧ଟା ଯାଏ ମୁଲତବୀ ରଖାଯାଇଛି।
ଏବେବି ଭେଣ୍ଟିଲେଟରରେ ପୁଷ୍ପା-୨ ସିନେମା ହଲ ଦଳାଚକଟାରେ ଆହତ ୯ ବର୍ଷର ବାଳକ
ଡିସେମ୍ବର ୪ରେ ମୁଭି ପୁଷ୍ପା ୨ର ପ୍ରିମିୟର୍ ଶୋ’ ପୂର୍ବରୁ ହାଇଦ୍ରାବାଦର ସାଉଥ ଥିଏଟରରେ ଦଳାଚକଟାରେ ଆହତ ହୋଇଥିବା ଶିଶୁ ଏବେ ଗୁରୁତର। ଏବେ ତାଙ୍କୁ ଭେଣ୍ଟିଲେଟର ସପୋର୍ଟରେ ରଖାଯାଇଛି ବୋଲି ସୂଚନା ମିଳିଛି।
ମଙ୍ଗଳବାର ହାଇଦ୍ରାବାଦର କିଏମଏସ କୁଡଲେସ ହସ୍ପିଟାଲ ଦ୍ୱାରା ପ୍ରକାଶିତ ଏକ ସ୍ବାସ୍ଥ୍ୟ ବୁଲେଟିନ ଅନୁଯାୟୀ ଆଠ ବର୍ଷ ବୟସ୍କା ଶ୍ରୀ ତେଜ ଗୁରୁତର ଅବସ୍ଥାରେ ଚିକିତ୍ସିତ ହେଉଛନ୍ତି କାରଣ ତାଙ୍କର ସ୍ନାୟୁଗତ ଅବସ୍ଥାରେ କୌଣସି ଉନ୍ନତି ହୋଇନାହିଁ।
ଡାକ୍ତରଙ୍କ କହିବାନୁସାରେ, ସେ ଅମ୍ଳଜାନ ଏବଂ ଚାପର ସର୍ବନିମ୍ନ ସମର୍ଥନ ସହିତ ଯାନ୍ତ୍ରିକ ଭେଣ୍ଟିଲେସନରେ ଥିଲେ। ଆହୁରି ମଧ୍ୟ ଏକ ଟ୍ରାକୋଷ୍ଟୋମି, ଏକ ପ୍ରକ୍ରିୟା ଯେଉଁଠାରେ ଶ୍ୱାସକ୍ରିୟାକୁ ସହଜ କରିବା ପାଇଁ ୱିଣ୍ଡପାଇପରେ ଏକ ପାଇପ ସର୍ଜିକାଲ ଭର୍ତ୍ତି କରାଯାଇଥାଏ, ତାଙ୍କୁ ଭେଣ୍ଟିଲେଟରରୁ ବାହାର କରିବା ପାଇଁ ବିବେଚନା କରାଯାଏ। ତାଙ୍କର ଜ୍ୱର ହ୍ରାସ ପାଉଛି ଏବଂ ସର୍ବନିମ୍ନ ଇନୋଟ୍ରୋପ ଉପରେ ତାଙ୍କର ଗୁରୁତ୍ୱପୂର୍ଣ୍ଣ ପାରାମିଟର ସ୍ଥିର ରହିଛି। ସେ ଫିଡ୍ସକୁ ଭଲଭାବେ ସହ୍ୟ କରୁଛନ୍ତି ବୋଲି ଡାକ୍ତରଖାନାର ଏକ ବିବୃତ୍ତିରେ କୁହାଯାଇଛି।
ହସ୍ପିଟାଲ ପକ୍ଷରୁ କୁହାଯାଇଛି କି ଡିସେମ୍ବର ୪ରେ ଶିଶୁକୁ କମ ଅମ୍ଳଜାନ ସାଚୁରେଶନ ଏବଂ ଅନିୟମିତ ଶ୍ୱାସକ୍ରିୟା ସହିତ ଅଣାଯାଇଥିଲା। ଡିସେମ୍ବର ୧୦ରେ ତାଙ୍କର ବ୍ରିଦିଙ୍ଗ ସପୋର୍ଟକୁ ବାହାର କରାଯାଇଥିଲା। ହେଲେ ଡିସେମ୍ବର ୧୨ରେ ତାଙ୍କୁ ପୁଣିଥରେ ବ୍ରିଦିଙ୍ଗ ସପୋର୍ଟ ଦିଆଯାଇଥିଲା।
ଏହାରି ଭିତରେ ହାଇଦ୍ରାବାଦ ନଗର ପୋଲିସ କମିଶନର ସି.ଭି ଆନନ୍ଦ ଡାକ୍ତରଖାନା ପରିଦର୍ଶନ କରିବା ପରେ କହିଛନ୍ତି ଯେ ଷ୍ଟାମ୍ପଡେଡ ସମୟରେ ନିଶ୍ୱାସ ପ୍ରଶ୍ୱାସ ଅଭାବରୁ ଶ୍ରୀ ତେଜଙ୍କର ମସ୍ତିଷ୍କ ମୃତ୍ୟୁ ବା ବ୍ରେନ ଡେଡ ଘଟିଛି ଏବଂ ସୁସ୍ଥ ହେବା ପାଇଁ ବହୁ ସମୟ ଲାଗିବ।
ପ୍ରଫେସର ବୈଷ୍ଣବ ଚରଣ ସାମଲଙ୍କୁ କେନ୍ଦ୍ର ସାହିତ୍ୟ ଏକାଡେମୀ ପୁରସ୍କାର
ନନ୍ଦିଘୋଷ ବ୍ୟୁରୋ: କେନ୍ଦ୍ର ସାହିତ୍ୟ ଏକାଡେମୀ ପୁରସ୍କାର ଘୋଷଣା । ପ୍ରଫେସର ବୈଷ୍ଣବ ଚରଣ ସାମଲଙ୍କୁ ମିଳିବ କେନ୍ଦ୍ର ସାହିତ୍ୟ ଏକାଡେମୀ ପୁରସ୍କାର । ଭୂତି ଭକ୍ତି ବିଭୂତି ପ୍ରବନ୍ଧ ପୁସ୍ତକ ପାଇଁ ମିଳିବ ପୁରସ୍କାର । ସେ ଏପର୍ଯ୍ୟନ୍ତ ୧୨୦ ଖଣ୍ଡ ବହି ଲେଖିଛନ୍ତି । ଓଡିଆ କ୍ଷୁଦ୍ରଗଳ୍ପର ସ୍ୱରୂପ ଓ ଇତିହାସ ସମ୍ପର୍କରେ ବ୍ୟାପକ ଅଧ୍ୟୟନ ତାଙ୍କୁ ବିଶେଷ ମର୍ଯ୍ୟାଦାର ଅଧିକାରୀ କରିପାରିଛି । ଏ କ୍ଷେତ୍ରରେ ତାଙ୍କର କୃତିତ୍ୱ ଅନନ୍ୟ ।
ରବିଚନ୍ଦ୍ରନ ଅଶ୍ୱିନଙ୍କ ୧୪ ବର୍ଷର କାହାଣୀ….
ନନ୍ଦିଘୋଷ ବ୍ୟୁରୋ: ଆନ୍ତର୍ଜାତୀୟ କ୍ରିକେଟରୁ ରବିଚନ୍ଦ୍ରନ ଅଶ୍ବିନଙ୍କ ଅବସର ସାରା ଦେଶର କ୍ରିକେଟ ପ୍ରେମୀଙ୍କ ମନରେ ଚହଳ ସୃଷ୍ଠି କରିଛି । ଅଶ୍ବିନ ଅବସର ନେବା ସହିତ ଏକ ଯୁଗର ଅବସାନ ହୋଇଛି । ଗୋଟେ ଦୁଇ ବର୍ଷ ନୁହଁ ୧୪ ବର୍ଷ କ୍ରିକେଟ ନା ସହିତ ଜଡ଼ିତ ଥିଲା ଅଶ୍ବିନୀଙ୍କ ନାଁ । ୧୪ ବର୍ଷ ଇଣ୍ଟରନାସନାଲ କ୍ରିକେଟ ସହ ଜଡ଼ିତ ରହିବା ଏକ ଛୋଟ କଥା ନୁହଁ । ଆସନ୍ତୁ ଜାଣିବା ଅଶ୍ବିନଙ୍କର କଛି ଜଣା ଅଜଣା କଥା ।
ଟିମ୍ ଇଣ୍ଡିଆରେ କିଛି ଏପରି ଥିଲା ଅଶ୍ବିନଙ୍କ ୧୪ ବର୍ଷ
ଅଶ୍ବିନ ସେହି ଖେଳାଳି ଙ୍କ ଭିତରେ ସାମିଲ ଥିଲେ ଯିଏକି ଇଣ୍ଟରନାସନାଲ କ୍ରିକେଟ ରେ ଲଗାତାର ଦେଢ ଦଶନ୍ଧି ଅତିକ୍ରମ କରିବା ସହିତ ଦଳର ସବୁଠାରୁ ବଡ଼ ମ୍ୟାଚ ରେ ବିଜୟ ହାସଲ କରିଥିଲେ । ନିଜ ଜୀବନର ଅନ୍ୟ କିଛି ଦିଗ ବିଷୟରେ ବର୍ଣ୍ଣନା କରି କହିଛନ୍ତି ଯେ ଏକଦା ତାଙ୍କର ଏକ ଟେନିସ ବଲ ମ୍ୟାଚ ସମୟରେ ତାଙ୍କୁ କିଛି ଯୁବକ କିଡ଼ନାପ କରିନେଇଥିଲେ । ମ୍ୟାଚ ଦିନ ୪ ରୁ ୫ ଜଣ ବାଳକ ତାଙ୍କ ସହ କଥା ହେବାକୁ ଆସି ଅଶ୍ବିନ ଙ୍କୁ ଅପହରଣ କରିନେଇଥିଲେ । ସେମାନଙ୍କର କେବଳ ଗୋଟିଏ ଟାର୍ଗେଟ ଥିଲା କି କିପରି ସେ ଏହି ମ୍ୟାଚ କୁ ଖେଳିନପାରନ୍ତି ।
କଥାରେ ଅଛି ବିନା ଗୁରୁରେ ଶିଷ୍ୟ ର କିଛି ଅସ୍ଥିତ୍ବ ନାହିଁ । ସଫଳତାର ପାହାଚ ଜଣେ ଗୁରୁ ହିଁ ହାତ ଧରି ଚଲାଇଥାନ୍ତି । ଅଶ୍ବିନଙ୍କ ଜୀବନ ପରିବତ୍ତର୍ନ ରେ ମଧ୍ୟ ତାଙ୍କ ଗୁରୁଙ୍କ ଭୂମିକା ବେଶ୍ ଗୁରୁତ୍ବ ପୂର୍ଣ୍ଣ ଥିଲା । ଜଣେ ମଧ୍ଧମ ଧରଣ ର କ୍ରିକେଟ ଖେଳାଳିରୁ କିପରି ଅଫ ସ୍ପିନର ହୋଇଥିଲେ ସେହି ସଫଳତାର ଶ୍ରେୟ ସେ ତାଙ୍କ ପିଲାଦିନ ର ପ୍ରଶିକ୍ଷକ ସି. କେ ବିଜୟକୁମାରଙ୍କୁ ଦେଇଛନ୍ତି । ଏକାଦଶ ରେ ପଢୁଥିବା ସମୟରେ ଯେତେବେଳେ ଅଶ୍ବିନ ଫିଲ୍ଡ ରେ ଅଭ୍ୟାସ କରୁଥିଲେ ସତେବେଳେ ତାଙ୍କର ବୋଲିଂ ଭଲ ନଥିଲା । ଏବଂ ସେ ତାଙ୍କ କୋଚ ଙ୍କୁ ପଚାରିଥିଲେ ମୁଁ ଅଫସ୍ପିନ କରିପାରିବି ନା ନାହିଁ । ଅଶ୍ବିନ ଙ୍କ ଆାଖିରେ ଥିବା ଆଶା କୁ ଦେଖି ତାଙ୍କ କୋଚ ସାହାସ ଦେଇଥିଲେ ଯାହା ଫଳରେ ଆଜି ସେ ଏହି ସଫଳତା ପାଇପାରିଛନ୍ତି ।
ଯେପରି କ୍ରିକେଟର ଧୋନିଙ୍କୁ ଫୁଟବଲ ଗୋଲକିପରରୁ କ୍ରିକେଟ ଓ୍ବିକେଟ ପର୍ଯ୍ୟନ୍ତ ପରିବର୍ତ୍ତନ ର ଦିଗ ତାଙ୍କ ପ୍ରଶିକ୍ଷକ ଦେଇଥିଲେ । ସେହିଭଳି ଅଶ୍ବିନ ତାଙ୍କ ସ୍କୁଲ ପ୍ରଶିକ୍ଷକଙ୍କ ପରାମର୍ଶରେ ଅଫ୍ ସ୍ପିନର ହୋଇ କ୍ରିକେଟରେ ଆକାଶ କୁ ସ୍ପର୍ଶ କରିଥିଲେ । ୧୪ ବର୍ଷର ଆନ୍ତର୍ଜାତୀୟ କ୍ୟାରିୟରେର ସେ ୧୦୬ ଟି ଟେଷ୍ଟରେ ୫୩୭ ଓ୍ବିକେଟ ନେଇ ଭାରତ ର ଦ୍ବତୀୟ ସଫଳ ଟେଷ୍ଟ ବୋଲର ଭାବରେ ଉଭା ହାଇଥିଲେ । ତାଙ୍କ କ୍ୟାରିୟର ରେ ଇଂଲଣ୍ଡ ବିପକ୍ଷରେ ସେ ଅଧିକ ଓ୍ବିକେଟ ନେଇଛନ୍ତି । କେବଳ ବୋଲିଂ ନୁହଁ ବ୍ୟାଟିଂ ରେ ମଧ୍ୟ ଅଶ୍ବିନଙ୍କ ନାଁ ରେ ଅନେକ ରକର୍ଡ଼ ରହିଛି । ତେବେ ଆାଜି ସନ୍ୟାସ ନେବା ବେଳେ ସେ ଖୁବ ଭାବପ୍ରବଣ ହାଇଯାଇଥିଲେ ।
ରେଲୱେରେ ଚାକିରି କରାଇଦେବାକୁ କହି ୨ କୋଟିରୁ ଉର୍ଦ୍ଧ୍ବ ଟଙ୍କା ଠକେଇ
କଟକ: ରେଳବାଇ ଚାକିରି କରିଦେବାକୁ କହି ୨ କୋଟିରୁ ଉର୍ଦ୍ଧ୍ବ ଟଙ୍କା ଠକେଇ ଅଭିଯୋଗ। ଘଟଣାରେ ବିଡାନାସୀ ଥାନା ପୋଲିସ ଡାନିଏଲ ରାଜ୍ ନାମକ ଜଣେ ଯୁବକକୁ ଅଟକ ରଖି ପଚରାଉଚରା କରୁଛି। ଏହି ଘଟଣାରେ ଆଉ ତିନି ଜଣ ଫେରାର ଥିବା ଜଣାପଡିଛି। ଏହି ରାକେଟ ମୁଖ୍ୟତଃ ରେଳବାଇରେ ଷ୍ଟେସନ୍ ମାଷ୍ଟର, ଟିଟି, ସେକ୍ସନ ଅଫିସର ଚାକିରି କରାଇଦେବା ନାରେ ଠକିଥିବା ଜଣାପଡିଛି।
ଅନ୍ୟପଟେ ଠକାମିର ଶିକାର ହୋଇଥିବା ପ୍ରାୟ ୪୦ ଯୁବକ ଏବେ ବିଭିନ୍ନ ଥାନାରେ ଲିଖିତ ଅଭିଯୋଗ କରିଛନ୍ତି। ସବୁଠାର ଆଶ୍ଚର୍ଯ୍ୟ କଥା ହେଉଛି ପୁରା ଅବିକଳ ନକଲି ନିଯୁକ୍ତି ପତ୍ର ଦେଇ ଯୁବକ ମାନଙ୍କୁ ଠକିଥିବା ଦେଖିବାକୁ ମିଳିଛି। ସେହିଭଳି ପ୍ରିୟଙ୍କା ପ୍ରିୟଦର୍ଶିନୀ ତ୍ରିପାଠୀ ନିଜକୁ ଜଣେ IAS ଅଫିସର ବୋଲି କହିବା ସହ ପଞ୍ଚାୟତିରାଜ ବିଭାଗରେ ଚାକିରୀ କରିଥିବା କହୁଥିବା ବେଳେ କଟକ ବିଡାନାସୀ ଦମ୍ପତି ମଧ୍ୟ ମଧ୍ୟ ଏହି ଘଟଣାରେ ସଂପୃକ୍ତ ଥିବା ଜଣାପଡିଛି।
କାର ଡିଲରସିପ କରାଇଦେବାକୁ କହି ୪୦ ଲକ୍ଷ ଟଙ୍କା ଲୁଟିନେଲେ ସାଇବର ଠକ
କଟକ: କାର ଡିଲରସିପ କରାଇଦେବାକୁ କହି ଜଣେ ବ୍ୟବସାୟୀଙ୍କ ଠାରୁ ୪୦ ଲକ୍ଷ ଟଙ୍କା ଲୁଟି ନେଇଛନ୍ତି ସାଇବର ଠକ । ସିଡିଏ ସେକ୍ଟର ୯ ଅଞ୍ଚଳର ଜଣେ ବ୍ୟବସାୟୀ କିଆ କମ୍ପାନୀର କାର ଡିଲରସିପ୍ ସମ୍ବଲପୁରରେ କରିବାକୁ ଚାହୁଁଥିଲେ । ଏଥିପାଇଁ ସେ ‘କିଆ ର ଯୋଗାଯୋଗ ନମ୍ବର ଗୁଗୁଲରେ ଖୋଜିଥିଲେ। ଗୁଗୁଲରେ ନମ୍ବର ମିଳିବା ପରେ କମ୍ପାନି ସହିତ ଯୋଗାଯୋଗ କରିଥିଲେ। ଫୋନ୍ ଉଠାଇଥିବା ବ୍ୟକ୍ତି ନିଜକୁ ‘କିଆ ର ଅଧିକାରୀ ଭାବେ ପରିଚୟ ଦେଇଥିଲେ । ଡିଲରସିପ୍ ଖୋଲିବା ପାଇଁ ସିକ୍ୟୁରିଟି ଟଙ୍କା ବାବଦରେ ଦୁଇଟି ପର୍ଯ୍ୟାୟରେ ୪୦ ଲକ୍ଷ ଟଙ୍କା ଜମା କରିବାକୁ ସେ କହିଥିଲା। ଫଳରେ ବ୍ୟବସାୟୀ ଜଣକ ନଭେମ୍ବର ୨୯ ରେ ୨୫ ଲକ୍ଷ ଓ ଡିସେମ୍ବର ୧୦ ତାରିଖରେ ୧୫ ଲକ୍ଷ ଟଙ୍କା ଦୁଇଟି ଆକାଉଣ୍ଟରେ ଜମା କରିଥିଲେ । ପରବର୍ତ୍ତୀ ପର୍ଯ୍ୟାୟରେ ଡିସେମ୍ୱର ୧୬ ତାରିଖରେ ଠକମାନେ ଆହୁରି ୧୭ ଲକ୍ଷ ଟଙ୍କା ମାଗିବା ସହିତ ଅନ୍ୟ ଏକ ବ୍ୟାଙ୍କ ଆକାଉଣ୍ଟ ନମ୍ବରରେ ଜମା କରିବାକୁ କହିଥିଲେ । ଏଥିରେ ବ୍ୟବସାୟୀଙ୍କର ସନ୍ଦେହ ହେବାରୁ ସେ ଉକ୍ତ ଆକାଉଣ୍ଟ ଯାଞ୍ଚ କରିଥିଲେ। ଆକାଉଣ୍ଟଟି ଜଣେ ବ୍ୟକ୍ତିଙ୍କ ନାଁରେ ଥିବା ଜଣାପଡ଼ିଥିଲା। ଏହାପରେ ବ୍ୟବସ୍ୟାୟୀ ଜଣକ ଠକାମିର ଶିକାର ହୋଇଥିବା ଜାଣିବାକୁ ପାଇବା ପରେ ସାଇବର ଥାନାରେ ଏତଲା ଦେଇଛନ୍ତି। ଅଭିଯୋଗ ପରେ ପୋଲିସ ଘଟଣାର ତଦନ୍ତ ଆରମ୍ଭ କରିଥିବା ବେଳେ ମୋବାଇଲ ନମ୍ବରଟି ଗୁଜୁରାଟର ବୋଲି ଜଣାପଡିଛି ।
ରାଜ୍ୟରେ ଦରବୃଦ୍ଧିକୁ ନେଇ ସରକାରଙ୍କ ଉପରେ ବର୍ଷିଲା ବିଜେଡି
ଭୁବନେଶ୍ୱର: ରାଜ୍ୟରେ ଦରବୃଦ୍ଧିକୁ ନେଇ ସରକାରଙ୍କ ଉପରେ ବର୍ଷିଲା ବିଜେଡି । ସାମ୍ୱାଦିକ ସମ୍ମିଳନୀ କରି ସରକାରଙ୍କୁ ଘେରିଲା ବିଜେଡି । ବିଜେଡି କାର୍ଯ୍ୟକ୍ରମ କାର୍ଯ୍ୟକାରୀ କମିଟି ଆବାହକ ସଞ୍ଜୟ ଦାସ ବର୍ମା କହିଛନ୍ତି, ପ୍ରତି ବର୍ଷ ପରି ଚଳିତ ବର୍ଷ ଡିସେମ୍ବର ୨୬ରେ ବିଜେଡି ପ୍ରତିଷ୍ଠା ଦିବସ ସବୁ ନିର୍ବାଚନ ମଣ୍ଡଳୀରେ ପାଳନ କରିବ। ନବୀନ ପଟ୍ଟନାୟକଙ୍କ ନେତୃତ୍ୱରେ ଓଡ଼ିଶାବାସୀଙ୍କ ସ୍ୱାଭିମାନର ରକ୍ଷା କରାଯିବ। ଆସନ୍ତା ଜାନୁଆରୀ ୬ରେ ଦରଦାମ ବୃଦ୍ଧି ବିରୋଧରେ ଦଳ ଆନ୍ଦୋଳନକୁ ଓହ୍ଲାଇବ । ଦର ଦାମ ନିୟନ୍ତ୍ରଣ ନ ହେଲେ ସାରା ରାଜ୍ୟରେ ଆନ୍ଦୋଳନ ହେବ। ଲୋକସେବା ଭବନ ଆଗରେ ବିକ୍ଷୋଭ ହେବ। ସରକାର ଗଠନର ୬ ମାସରେ ଦରଦାମ ବଢ଼ି ଆକାଶଛୁଆଁ ହୋଇଛି । ୫୦ ହଜାର ସୁଭଦ୍ରା ଟଙ୍କା, ୩ଶହ ୟୁନିଟ ମାଗଣା ବିଜୁଳି, ୩୧ଶହ ଟଙ୍କା MSP, ଭତ୍ତା ବୃଦ୍ଧି ପ୍ରତିଶୃତିରେ ବିଫଳ ନୂଆ ସରକାର । ନିତ୍ୟ ବ୍ୟବହାର ଜିନିଷ, ଡିଜେଲ ପେଟ୍ରୋଲ ଓ ଗ୍ୟାସ ଦର ବୃଦ୍ଧି ଯୋଗୁଁ ଲୋକ ତ୍ରାହି ତ୍ରାହି ଡାକୁଛନ୍ତି । ସୁଭଦ୍ରାର ଏସଓପି ୯ ଥର ବଦଳିଲାଣି । ଆଳୁ ୬୦, ଡାଲି ୧୫୦ ଟଙ୍କା । ଏହା ପ୍ରଶାସନିକ ଓ ସରକାରୀ ବିଫଳତା ବୋଲି କହି ବର୍ଷିଛନ୍ତି ସଂଜୟ ।
ସେହିପରି କେନ୍ଦ୍ର ଓ ରାଜ୍ୟ ସରକାରଙ୍କ ଉପରେ ବର୍ଷିଛନ୍ତି ଯୁବ ବିଜେଡି ସଭାପତି ବ୍ଯୋମକେଶ ରାୟ । ସେ କହିଛନ୍ତି, ଅଚ୍ଛେ ଦିନ ଆଣିବା କଥା କହି ସରକାରକୁ ଆସିଥିଲା ବିଜେପି । ହେଲେ ଏହା କେବଳ କଥାରେ ରହି ଯାଇଛି । ମୁଦ୍ରାସ୍ଫୀତି ସାରା ଦେଶରେ ବଢ଼ି ଚାଲିଛି । ଦେଶର ଷ୍ଟାଟିଷ୍ଟିକ୍ସ ରିପୋର୍ଟ ଅନୁସାରେ, ଓଡ଼ିଶାରେ ମୁଦ୍ରାସ୍ଫୀତି ୭.୩ ପ୍ରତିଶତ ରହିଛି । ଗାଁରେ ଏହା ୮ ପ୍ରତିଶତ ଟପିଲାଣି । ପଡୋଶୀ ରାଜ୍ୟରେ ମୁଦ୍ରାସ୍ଫୀତି ଓଡ଼ିଶାଠାରୁ କମ ରହିଛି । ହେଲେ ହଠାତ ଏହି ଛଅ ମାସରେ କଣ ହେଲା ଯେ ଏହା ଏତେ ବଢିଗଲା ବୋଲି ପ୍ରଶ୍ନ କରିଛନ୍ତି ବ୍ଯୋମକେଶ । ଦର ବୃଦ୍ଧିରେ ଏବେ ଓଡ଼ିଶା ଦ୍ଵିତୀୟ ସ୍ଥାନରେ ରହିଛି । ଏହା ଚିନ୍ତାଜନକ କଥା। ହେଲେ ସରକାର ବେଫିକର ହୋଇ ବସିଛନ୍ତି । ବିଜେଡିରେ ଛାମୁଆ ସଂଗଠନ ଏହା ବିରୋଧରେ ଆନ୍ଦୋଳନ କରି ସରକାରଙ୍କ ନିଦ ଭାଙ୍ଗିବ । ସାରା ରାଜ୍ୟରେ ଆନ୍ଦୋଳନ ବ୍ୟାପକ କରାଯିବ ବୋଲି ଚେତାବନୀ ଦେଇଛନ୍ତି ବ୍ଯୋମକେଶ ।
ସ୍ୱାମୀ ଆୟରେ ଗୃହିଣୀ ଘର ଚଳାଏ । ହେଲେ ଅହେତୁକ ଦର ବୃଦ୍ଧି ଯୋଗୁଁ ହାଣ୍ଡିଶାଳରେ ଚଡକ ପଡିଛି । ଡବଲ ଇଂଜିନ ସରକାର ବିକାଶ ନାରା ଦେଇ ସରକାର ଗଢିବାକୁ ସମର୍ଥ ହୋଇଥିଲେ । ହେଲେ ଅର୍ଥନୀତି ପରିଚାଳନାରେ ବିଫଳ ହୋଇଛନ୍ତି ବିଜେପି ସରକାର । ଏପରି କହି ରାଜ୍ଯ ଓ କେନ୍ଦ୍ର ସରକାରଙ୍କ ଉପରେ ବର୍ଷିଛନ୍ତି ବିଜେଡି ମହିଳା ସଭାନେତ୍ରୀ ସ୍ନେହାଙ୍ଗିନୀ ଛୁରିଆ ।
୨୦୧୪ରୁ ଏନଡିଏ ଆସିବାପରଠାରୁ ଦେଶରେ ଦର ବୃଦ୍ଧି ହୋଇ ଚାଲିଛି । ମଧ୍ୟବିତ୍ତ ଓ ଉଚ୍ଚ ମଧ୍ୟବିତ୍ତ ଭୀଷଣ କ୍ଷତି ସହୁଛନ୍ତି । ବିନା କଟନି ଛଟନିରେ ଧାନ କିଣିବା ସହ ୩୧ଶହ ଟଙ୍କା MSP ପ୍ରତିଶୃତି ଦେଇଥିଲେ ପ୍ରଧାନମନ୍ତ୍ରୀ । ଏପର୍ଯ୍ୟନ୍ତ ଟୋକନ ଆସିନି । ରାଜ୍ୟ ସ୍ୱାର୍ଥ ପାଇଁ ବିଜେଡି ଆନ୍ଦୋଳନ ଜାରି ବୋଲି କହିଛନ୍ତି ସ୍ନେହାଙ୍ଗିନୀ ଛୁରିଆ ।
ଡିସେମ୍ୱର ୨୬ରେ ବିଜେଡି ପାଳିବ ପ୍ରତିଷ୍ଠା ଦିବସ
ଭୁବନେଶ୍ୱର: ଆସନ୍ତା ଡିସେମ୍ବର ୨୬ ତାରିିଖରେ ବିଜେଡି ତାର ୨୮ତମ ପ୍ରତିଷ୍ଠା ଦିବସ ପାଳନ କରିବ। ଏଥିପାଇଁ ଜୋରସୋରରେ ଚାଲିଛି ପ୍ରସ୍ତୁତି। ଦଳର ସମନ୍ଵୟ କମିଟିର ଅଧ୍ୟକ୍ଷ ଦେବୀପ୍ରସାଦ ମିଶ୍ର କହିଛନ୍ତି, ବିଜେଡି ନବୀନ ପଟ୍ଟନାୟକଙ୍କ ନେତୃତ୍ୱରେ ଶକ୍ତିଶାଳୀ ଆଞ୍ଚଳିକ ଦଳ ହୋଇଛି । ପ୍ରତି ବର୍ଷ ଭଳି ଏଥର ବି ଡିସେମ୍ବର ୨୬ ରେ ସବୁ ନିର୍ବାଚନ ମଣ୍ଡଳୀରେ ପ୍ରତିଷ୍ଠା ଦିବସ ପାଳନ ହେବ। ବିକାଶର ଅନ୍ୟ ନାଁ ହେଲା ବିଜେଡି। ଏହା ଲୋକଙ୍କୁ ପୁଣି ଜଣାଇବୁ ବୋଲି କହିଛନ୍ତି ଦେବୀ ମିଶ୍ର ।
ଆହୁରି ମଧ୍ୟ କହିଛନ୍ତି, ଜାନୁଆରୀ ୬ରେ ଦରଦାମ ବୃଦ୍ଧି ବିରୋଧରେ ବିଜେଡି ଆନ୍ଦୋଳନକୁ ଓହ୍ଲାଇବ । ବିଜେପି ନିଜର ପ୍ରତିଶୃତି ପାଳନ ନ କରିବା, ଦରଦାମ ବୃଦ୍ଧି କଥାକୁ ସମସ୍ତଙ୍କ ପାଖରେ ପହଞ୍ଚାଇବୁ। ଆସନ୍ତା ଜାନୁଆରୀ ୬ ତାରିଖରେ ଭୁବନେଶ୍ଵରରେ ବିରାଟ ଆନ୍ଦୋଳନ କରାଯିବ। ଦରଦାମରେ ଲୋକେ ଯେମିତି ଅତିଷ୍ଠ ହେଲେଣି, ତାକୁ ନେଇ ସଚେତନ କରାଯିବ ବୋଲି କହିଛନ୍ତି ଦେବୀ ମିଶ୍ର।
ଓସ୍କାର ରେସ୍ ରୁ ବାଦ୍ ପଡ଼ିଲା ଫିଲ୍ମ ‘ଲାପତା ଲେଡ଼ିଜ୍ ‘
ନନ୍ଦିଘୋଷ ବ୍ୟୁରୋ: ଭାରତୀୟ ସିନେ ପ୍ରେମୀଙ୍କୁ ଲାଗିଛି ଶକ୍ତ ଝଟକା । ଓସ୍କାର ରେସରୁ ବାଦ୍ ପଡ଼ିଲା ‘ଲାପତା ଲେଡିଜ୍’ । କିରଣ ରାଓଙ୍କ ନିର୍ଦ୍ଦେଶିତ ଏହି ଫିଲ୍ମଟିକୁ ଭାରତରେ ଖୁବ୍ ପସନ୍ଦ କରାଯାଇଥିଲା । ଏକ ଛୋଟ ବଜେଟରେ କରାଯାଇଥିବା ଏହି ଚଳଚ୍ଚିତ୍ରଟି ବକ୍ସ ଅଫିସରେ ବହୁତ ଭଲ ପ୍ରଦର୍ଶନ କରି ରୋଜଗାର ମଧ୍ୟ କରିଥିଲା । ତେବେ ଏହି ଫିଲ୍ମଟି ୯୭ତମ ଏକାଡ଼େମୀ ପୁରସ୍କାରରେ ଭାରତର ପ୍ରତିନିଧିତ୍ବ କରିବାକୁ ମନୋନୀତ ହୋଇଥିଲା । ମାତ୍ର ଏବେ ଫିଲ୍ମଟିକୁ ଓସ୍କାର ରେସରୁ ବାହାର କରିଦିଆାଯାଇଛି ।
ଭଲ ସଫଳତା ହାସଲ କରିଥିଲେ ମଧ୍ୟ ଫିଲ୍ମଟି ସେହି ବର୍ଗ ରେ ମନୋନୀତ ୧୫ ଟି ଚଳଚ୍ଚିତ୍ର ମଧ୍ଧରେ ନିଜ ସ୍ଥାନ ପାଇପାରିନାହିଁ । ଭାରତର ଭରସା ଭାଙ୍ଗିଯାଇଛି । Academy of Motion Picture Arts and Sciences ପକ୍ଷରୁ ପରବର୍ତ୍ତୀ ରାଉଣ୍ଡ ପାଇଁ ୧୫ ଫିଲ୍ମର ନାମ ଘୋଷଣା କରାଯାଇଥିଲା। ଯେଉଁଥିରେ ‘ଲାପତା ଲେଡିଜ୍’ ର ନାଁ ନାହିଁ ।