ଭୁବନେଶ୍ବର: ଆଜି ବିଧାନସଭାର ବଜେଟ ଅଧିବେଶନରେ ଯୋଗ ଦେବା ନିମନ୍ତେ ବିଧାନସଭାରେ ପହଞ୍ଚିଥିଲେ ବିରୋଧୀ ଦଳ ନେତା ନବୀନ ପଟ୍ଟନାୟକ । ତେବେ ବିଧାନସଭାରେ ପାଦ ଦେଉ ଦେଉ ଚମ୍ପୁଆ ବିଜେଡି ବିଧାୟକ ସନା ମହାକୁଡ଼ଙ୍କୁ ତାଗିଦ କଲେ ବିରୋଧୀ ଦଳ ନେତା ନବୀନ ପଟ୍ଟନାୟକ । ବିଧାୟକ ସନାତନ ମହାକୁଡ଼ଙ୍କୁ ନବୀନ ପଟ୍ଟନାୟକଙ୍କ ଜବାବ ତଲବ । ଗତକାଲି ବିଜେଡି ବିଧାୟକ ଦଳ ବୈଠକକୁ କାହିଁକି ଆସି ନଥିଲେ ବୋଲି ପ୍ରଶ୍ନ କରିଥିଲେ ନବୀନ । ଉତ୍ତରରେ ସନାତନ ଅସୁସ୍ଥତା କାରଣ ଦର୍ଶାଇଥିଲେ ମଧ୍ୟ ସେ ବିଜେପି ଆଡ଼କୁ ଯାଉଛନ୍ତି କି ବୋଲି କହି ତେରଛା ବାଣ ମାରିଥିଲେ ନବୀନ । ନବୀନଙ୍କୁ ସ୍ଵାଗତ ପାଇଁ ବିଜେଡି ବିଧାୟକମାନେ ବିଧାନସଭାରେ ଅପେକ୍ଷା କରିଥିବାବେଳେ ଏଭଳି ଦୃଶ୍ୟ ଦେଖିବାକୁ ମିଳିଥିଲା ।
ଉଦ୍ଧବ ଠାକରେଙ୍କୁ ସିନ୍ଦେଙ୍କ ଆଉ ଏକ ଝଟକା, ସିନ୍ଦେଙ୍କ ହାତ ଧରିବେ ରାଜନ ସାଲଭି
ନନ୍ଦିଘୋଷ ବ୍ୟୁରୋ : ମହାରାଷ୍ଟ୍ର ବିଧାନସଭା ନିର୍ବାଚନର ଫଳାଫଳ ପରେ, ଉଦ୍ଧବ ଠାକରେଙ୍କ ଗୋଷ୍ଠୀରେ ଫାଟ ଦେଖାଦେବା ଆରମ୍ଭ ହୋଇଛି। ଏକନାଥ ସିନ୍ଦେ ଉଦ୍ଧବ ଠାକରେଙ୍କୁ ଲଗାତାର ଝଟକା ଦେଉଛନ୍ତି । ପ୍ରଥମେ ଦଳ ଭାଙ୍ଗିଲା, ସିନ୍ଦେ ଅସଲି ଶିବସେନାକୁ ଅକ୍ତିଆରରେ ରଖିଲେ ତା’ପରେ ମୁଖ୍ୟମନ୍ତ୍ରୀ ଏବଂ ପରେ ଉପମୁଖ୍ୟମନ୍ତ୍ରୀ ହେଲେ । ତଥାପି ମଧ୍ୟ ମନ ଶାନ୍ତି ହେଇନାହିଁ ଏକନାଥ ସିନ୍ଦେଙ୍କର । ଲଗାତାରସେ ଉଦ୍ଧବ ଗୋଷ୍ଠୀକୁ ଦୁର୍ବଳ କରିବା ପାଇଁ ରଣନୀତି ଉପରେ ନିରନ୍ତର କାମ କରୁଛନ୍ତି । ଶୁଣିବାକୁ ମିଳିଛି ଠାକରେଙ୍କ ଗୋଷ୍ଠୀର ଅନେକ ନେତା, ବର୍ତ୍ତମାନ ଏକନାଥ ସିନ୍ଦେଙ୍କ ଗୋଷ୍ଠୀରେ ଯୋଗ ଦେବାକୁ ଯାଉଛନ୍ତି । ଏହା ମଧ୍ୟ ଆଲୋଚନା ହେଉଛି ଯେ ଏକନାଥ ସିନ୍ଦେ ଠାକରେଙ୍କୁ ଦମନ କରିବା ପାଇଁ ଅପରେସନ ଟାଇଗର ଚଲାଉଛନ୍ତି । ତେବେ ଏହାରି ଭିତରେ ସିନ୍ଦେ ଉଦ୍ଧବଙ୍କ ଶିବସେନାକୁ ଆଉ ଏକ ବଡ ଝଟକା ଦେଇଛନ୍ତି, କୋଙ୍କଣର ପୂର୍ବତନ ବିଧାୟକ ରାଜନ ସାଲଭି ଉଦ୍ଧବ ସେନାରୁ ଇସ୍ତଫା ଦେଇଛନ୍ତି ।
ଆଜ୍ଞା ହଁ, ମଧ୍ୟରାତ୍ରିରେ ଏକନାଥ ସିନ୍ଦେଙ୍କୁ ଭେଟିବା ପରେ, ରାଜନ ସାଲଭି ଉଦ୍ଧବଙ୍କୁ ଏହି ଝଟକା ଦେଇଛନ୍ତି । ଦଳ ବିଭାଜନ ପରେ, କୋଙ୍କଣରେ ଠାକରେ ଗୋଷ୍ଠୀ ପାଇଁ ଲଢ଼ିଥିବା ନେତା ଏବେ ଉଦ୍ଧବଙ୍କ ହାତ ଛାଡିଦେଇଛନ୍ତି। ରାଜାପୁର ଲାଞ୍ଜା ବିଧାନସଭାର ପୂର୍ବତନ ବିଧାୟକ ରାଜନ ସାଲଭି ମଧ୍ୟରାତ୍ରିରେ ଉପମୁଖ୍ୟମନ୍ତ୍ରୀ ଏକନାଥ ସିନ୍ଦେଙ୍କୁ ଭେଟିଥିଲେ। ଏହି ବୈଠକ ପରେ, ରାଜନ ସାଲଭେ ପ୍ରତିକ୍ରିୟା ଦେଇ ସ୍ପଷ୍ଟ କରିଛନ୍ତି ଯେ ସେ ଆଜି ସିନ୍ଦେ ଗୋଷ୍ଠୀରେ ଯୋଗଦେବେ । ତେବେ ବିଧାନସଭା ନିର୍ବାଚନରେ ପରାଜୟ ଯୋଗୁଁ ରାଜନ ସାଲଭି ଉଦ୍ଧବ ଗୋଷ୍ଠୀ ଉପରେ କ୍ଷୁବ୍ଧ ଥିଲେ ।
ମଧ୍ୟରାତ୍ରରେ ଖେଳ କରିଦେଲେ ସିନ୍ଦେ
ପାଖାପାଖି ରାତି ପ୍ରାୟ ୨ଟାରେ, ରାଜନ ସାଲଭି ରାଜାପୁର ଲାଞ୍ଜା ବିଧାୟକ କିରଣ ସାମନ୍ତ ଏବଂ ରତ୍ନଗିରି ବିଧାୟକ ଉଦୟ ସାମନ୍ତଙ୍କ ଉପସ୍ଥିତିରେ ଏକନାଥ ସିନ୍ଦେଙ୍କୁ ଭେଟିଥିଲେ। ରାଜନ କହିଥିଲେ ଯେ ଏକନାଥ ସିନ୍ଦେ ଆରମ୍ଭରୁ ମୋର ଗୁରୁ ଥିଲେ। ଗତ ଥର ମୁଁ ସେମାନଙ୍କ ସହିତ ଯାଇପାରିନଥିଲି। କିନ୍ତୁ ଏବେ ମୋତେ ସୁଯୋଗ ମିଳିଯାଇଛି ସେଥିପାଇଁ ଏଠାକୁ ପଳେଇଆସିଲି । ରାଜନ ସାଲଭି ଅଭିଯୋଗ କରିଛନ୍ତି ଯେ ଉଦ୍ଧବ ଠାକରେ ଏବଂ ତାଙ୍କ ଦଳ ତାଙ୍କୁ ନିର୍ବାଚନରେ ସାହାଯ୍ୟ କରି ନଥିଲେ । ସେ ଆହୁରି ମଧ୍ୟ କହିଛନ୍ତି ଉଦୟ ସାମନ୍ତ, କିରଣ ସାମନ୍ତଙ୍କ ସହ ଏକ ବୈଠକ ହୋଇଥିଲା । ନିର୍ବାଚନମଣ୍ଡଳୀ ଜଡିତ ଗୁରୁତ୍ୱପୂର୍ଣ୍ଣ ବିଷୟଗୁଡ଼ିକ ଉପରେ ଆଲୋଚନା କରାଯାଇଥିଲା। ସାମନ୍ତ ବନ୍ଧୁ ଏବଂ ମୁଁ ମଧ୍ୟ ସନ୍ତୁଷ୍ଟ ଅଛୁ। ସାଲଭି ଏହା ମଧ୍ୟ କହିଛନ୍ତି ଯେ ମୁଁ ଗୁରୁବାର ସମସ୍ତଙ୍କ ଉପସ୍ଥିତିରେ ଏକନାଥ ସିନ୍ଦେଙ୍କ ଶିବସେନା ଦଳରେ ଯୋଗଦେବି । ତେବେ ରାଜନ ସାଲଭିଙ୍କ ସିନ୍ଦେ ଗୋଷ୍ଠୀରେ ଯୋଗଦେବା ନିଷ୍ପତ୍ତିକୁ କୋଙ୍କଣରେ ଠାକରେ ଗୋଷ୍ଠୀ ପାଇଁ ଏକ ବଡ଼ ଝଟକା ବୋଲି ବିବେଚନା କରାଯାଉଛି ।
ଆଜି ଯୋଗଦେବେ ରାଜନ ସାଲଭି
ରାଜନ ସାଲଭି ସିନ୍ଦେ ଗୋଷ୍ଠୀରେ ଯୋଗଦେବେ ବୋଲି କିଛିଦିନ ଧରି ଚର୍ଚ୍ଚା ଚାଲିଥିବା ବେଳେ ସାଲଭି ବାରମ୍ବାର ଏହାକୁ ଅସ୍ୱୀକାର କରିଆସୁଥିଲେ। କିନ୍ତୁ ଏବେ ଶେଷରେ ଏହା ନିଶ୍ଚିତ ହୋଇଛି ଯେ ରାଜନ ସାଲଭି ସିନ୍ଦେ ଗୋଷ୍ଠୀରେ ଯୋଗଦେବେ। ଗତକାଲି ସେ ଠାକରେ ଗୋଷ୍ଠୀର ଉପନେତା ପଦରୁ ମଧ୍ୟ ଇସ୍ତଫା ଦେଇଛନ୍ତି । ସେ କାଉନସିଲର, ମେୟର, ଜିଲ୍ଲା ମୁଖ୍ୟ, ତିନିଥର ବିଧାୟକ ଏବଂ ବର୍ତ୍ତମାନ ଉପନେତା ସମେତ ବିଭିନ୍ନ ପଦବୀରେ କାର୍ଯ୍ୟ କରିସାରିଛନ୍ତି। ତାଙ୍କୁ ବିଧାନପରିଷଦରେ କାର୍ଯ୍ୟ କରିବାରେ ସୁଯୋଗ ମିଳିପାରେ ବୋଲି ଆଲୋଚନା ହେଉଛି ଏବଂ ଏପରି ପ୍ରତିଶ୍ରୁତି ମଧ୍ୟ ତାଙ୍କୁ ଦିଆଯାଇଛି।
ବ୍ୟାନ ହଟାଇଲା RBI: ଏଣିକି କ୍ରେଡିଟ କାର୍ଡ ଜାରି କରିପାରିବ କୋଟକ ମହିନ୍ଦ୍ରା ବ୍ୟାଙ୍କ
ନୂଆଦିଲ୍ଲୀ: ପ୍ରାଇଭେଟ ସେକ୍ଟରର ଏକ ବଡ଼ ବ୍ୟାଙ୍କ କୋଟକ ମହିନ୍ଦ୍ରା ବ୍ୟାଙ୍କକୁ ମିଳିଛି ଏକ ବଡ଼ ଆଶ୍ବସ୍ତି । କୋଟକ ମହିନ୍ଦ୍ରା ବ୍ୟାଙ୍କ ଉପରୁ ଭାରତୀୟ ରିଜର୍ଭ ବ୍ୟାଙ୍କ କଟକଣା ଉଠାଇ ଦେଇଛି । । ଏହାଫଳରେ ବ୍ୟାଙ୍କକୁ ଏବେ ବହୁତ ଫାଇଦା ମିଳିବ । ୯ ମାସରୁ ଅଧିକ ସମୟ ଧରି ବ୍ୟାଙ୍କ ଉପରେ ବ୍ୟାନ ଲାଗିଥିଲା । ବ୍ୟାନ ଲାଗିବା କାରଣରୁ ପୂର୍ବରୁ ବ୍ୟାଙ୍କର କାରବାର ପ୍ରଭାବିତ ହେଉଥିଲା । ଏବେ କୋଟକ ମହିନ୍ଦ୍ରା ବ୍ୟାଙ୍କ କିଛି କାମ ସହଜରେ କରିପାରିବ । କୋଟକ ମହିନ୍ଦ୍ରା ବ୍ୟାଙ୍କ ଉପରେ ଟେକ୍ନୋଲୋଜି ସହ ଜଡ଼ିତ ସମସ୍ୟାକୁ ନେଇ ବ୍ୟାନ ଲଗାଇଥିଲା ଆରବିଆଇ । ଏହାଦ୍ବାରା ବ୍ୟାଙ୍କର ୮୧୧ ବ୍ୟାଙ୍କିଂ କାରବାର ସବୁଠାରୁ ବେଶି ପ୍ରଭାବିତ ହୋଇଥିଲା । ଏବେ ବ୍ୟାଙ୍କ ନିଜର କାରବାରକୁ ବିସ୍ତାର କରିପାରିବ ।
ଆରବିଆଇ କୋଟକ ମହିନ୍ଦ୍ରା ବ୍ୟାଙ୍କ ଉପରେ ବ୍ୟାନ ଲଗାଇବା ପରେ ସୁଧାରାତ୍ମକ କାମରେ ସନ୍ତୁଷ୍ଟ ହୋଇ ଉକ୍ତ ବ୍ୟାନ ହଟାଇ ଦେଇଛି । ଏହାପରେ ଏବେ କୋଟକ ମହିନ୍ଦ୍ରା ବ୍ୟାଙ୍କ ପୁଣି ଥରେ କ୍ରେଡିଟ କାର୍ଡ ଜାରି କରିପାରିବ । ନିଜର ଡିଜିଟାଲ ମୋବାଇଲ ପ୍ଲାଟଫର୍ମ ୮୧୧ ମାଧ୍ୟମରେ ନୂଆ ଗ୍ରାହକଙ୍କୁ ମଧ୍ୟ ଯୋଡ଼ି ପାରିବ । ଏଜେନ୍ସି ମୁତାବକ, ବ୍ୟାଙ୍କର ସୁଧାରାତ୍ମକ ଉପାୟରେ ସନ୍ତୁଷ୍ଟ ଥିବା ଆରବିଆଇ କହିଛି । ବ୍ୟାଙ୍କକୁ କ୍ରେଡିଟ କାର୍ଡ ଜାରି କରିବା ତଥା ଅନଲାଇନ ଓ ମୋବାଇଲ ବ୍ୟାଙ୍କିଂ ଚ୍ୟାନେଲ ମାଧ୍ୟମରେ ନୂଆ ଗ୍ରାହକଙ୍କୁ ଯୋଡ଼ିବାର ଅନୁମତି ଦିଆଯାଇଛି । କୋଟକ ମହିନ୍ଦ୍ରା ବ୍ୟାଙ୍କ ଏକ ବାହ୍ୟ ପରାମର୍ଶଦାତା ଠାରୁ ଥାର୍ଡ ପାର୍ଟି ଆଇଟି ଅଡିଟ କରୁଥିଲା । ଆରବିଆଇର ନିର୍ଦ୍ଦେଶ ଅନୁସାରେ ସୁଧାରାତ୍ମକ ପଦକ୍ଷେପ ମଧ୍ୟ ଗ୍ରହଣ କରାଯାଇଥିଲା । ଏହାପରେ ବ୍ୟାନ ଲାଗିଥିଲା । ଆରବିଆଇର ପୂର୍ବତନ ଗଭର୍ଣ୍ଣର ଶକ୍ତିକାନ୍ତ ଦାସଙ୍କ କାର୍ଯ୍ୟକାଳରେ କୋଟକ ମହିନ୍ଦ୍ରା ବ୍ୟାଙ୍କ ଉପରେ ବ୍ୟାନ ଲାଗିଥିଲା । ସେ ସମୟରେ ଆରବିଆଇ ସୁପରଭାଇଜିଂ ନିୟମ ଅନୁସାରେ ଅନ୍ୟ କିଛି ସଂସ୍ଥା ଉପରେ କମର୍ସିଆଲ ବ୍ୟାନ ଲାଗିଥିଲା । ସେଥିମଧ୍ୟରେ ୨୦୨୨ରେ ପ୍ରାଇଭେଟ ସେକ୍ଟରର ସବୁଠାରୁ ବଡ଼ ବ୍ୟାଙ୍କ ଏଚଡିଏଫସି ବ୍ୟାଙ୍କର ନାମ ସାମିଲ ରହିଥିଲା । ବ୍ୟାଙ୍କ ଉପରେର ୧୫ ମାସ ପର୍ଯ୍ୟନ୍ତ ବ୍ୟାନ ଲାଗିଥିଲା ।
ବଜେଟ ଅଧିବେଶନ ପାଇଁ ବିଧାନସଭାରେ ପହଞ୍ଚିଲେ ବିରୋଧୀ ଦଳ ନେତା ନବୀନ ପଟ୍ଟନାୟକ
ଭୁବନେଶ୍ବର: ଆଜିଠାରୁ ଆରମ୍ଭ ହୋଇଛି ରାଜ୍ୟ ବିଧାନସଭାର ବଜେଟ ଅଧିବେଶନ । ଏହା ମଧ୍ୟରେ ଦିନ ୧୧ଟାରୁ ରାଜ୍ୟପାଳଙ୍କ ଅଭିଭାଷଣରୁ ଗୃହକାର୍ଯ୍ୟ ଆରମ୍ଭ ହୋଇଛି । ତେବେ ବଜେଟ ଅଧିବେଶନରେ ସାମିଲ ହେବା ପାଇଁ ବିଧାନସଭାରେ ପହଞ୍ଚିଛନ୍ତି ବିରୋଧୀ ଦଳ ନେତା ନବୀନ ପଟ୍ଟନାୟକ । ଅଧିବେଶନ ପାଇଁ ତିନି ଦଳ ବିଜେପି, ବିଜେଡି ଓ କଂଗ୍ରେସ ବିଧାୟକ ଦଳ ବୈଠକରେ ରଣନୀତି ପ୍ରସ୍ତୁତ କରିଛନ୍ତି । ମୁଖ୍ୟ ବିରୋଧୀ ଦଳ ବିଜେଡି ଆଇନ ଶୃଙ୍ଖଳା ଓ ନାରୀ ନିର୍ଯାତନାକୁ ମୁଖ୍ୟ ପ୍ରସଙ୍ଗ କରିବ। ଏହାସହ ଚାଷୀ, ଧାନ ମଣ୍ଡି ଅବ୍ୟବସ୍ଥା ସହିତ କଟ ନି ଛଟନି ଆଦି ପ୍ରସଙ୍ଗକୁ ଉଠାଇ ଶାସକ ଦଳକୁ ଘେରିବ। ସେହିପରି କଂଗ୍ରେସ ଏସବୁ ପ୍ରସଙ୍ଗ ସହିତ ବାରବାଟୀ ଷ୍ଟାଡିୟମ ଅବ୍ୟବସ୍ଥା, ନିର୍ବାଚନୀ ପ୍ରତିଶ୍ରୁତି ଆଦିକୁ ଗୃହରେ ପ୍ରମୁଖ ପ୍ରସଙ୍ଗ କରିବ । ଶାସକ ବିଜେପି ୮ ମାସ ରେ ସରକାରଙ୍କ ସଫଳତା ସହିତ ବିକଶିତ ଓଡିଶା ଗଠନକୁ ଗୃହରେ ରଖିବ । ଦୁଇ ବିରୋଧୀଙ୍କ ସବୁ ଅଭିଯୋଗର ଆଲୋଚନା ମାଧ୍ୟମରେ ଜବାବ ଦେବାକୁ ଶାସକ ଦଳ ରଣନୀତି ପ୍ରସ୍ତୁତ କରିଛି । ଯାହାକୁ ନେଇ ଏଥର ବଜେଟ ଅଧିବେଶନ ସରଗରମ ହେବା ଆଶା କରାଯାଉଛି । ଦୁଇଟି ପର୍ଯ୍ୟାୟରେ ହେବାକୁ ଥିବା ବଜେଟ ଅଧିବେଶନରେ ମୋଟ ୨୮ଟି କାର୍ଯ୍ୟ ଦିବସ ରହିଛି । ୧୭ ତାରିଖ ଦିନ ୨୦୨୫-୨୬ ଆର୍ଥିକ ବର୍ଷର ବଜେଟକୁ ଗୃହରେ ଉପସ୍ଥାପନ କରିବେ ମୁଖ୍ୟମନ୍ତ୍ରୀ ତଥା ଅର୍ଥ ମନ୍ତ୍ରୀ ମୋହନ ମାଝୀ ।
ମୁଁ ଦୋଷୀ .. କାମ ବନ୍ଦ ହୋଇଯିବାରୁ ଭୋ ଭୋ ହୋଇ କାନ୍ଦିଲେ ରଣବୀର, ଭିଡିଓ ଭାଇରାଲ ..
ନନ୍ଦିଘୋଷ ବ୍ୟୁରୋ: ସମୟ ରୈନାଙ୍କ ଶୋ’ ଇଣ୍ଡିଆଜ୍ ଗଟ୍ ଲାଟେଣ୍ଟ୍ରେ ଏକ ଆପତ୍ତିଜନକ ମନ୍ତବ୍ୟ ଦେଇ ଅଡୁଆରେ ଛନ୍ଦି ହେଇ ପଡିଛନ୍ତି ୟୁଟ୍ୟୁବର ରଣବୀର ଆଲାହାବାଦିଆ । ତାଙ୍କ ନାଁରେ ଅନେକ ସ୍ଥାନରେ ମାମଲା ରୁଜୁ ହୋଇଛି ଏବଂ ମହାରାଷ୍ଟ୍ର ସାଇବର ପୋଲିସ ଏହି ମାମଲାରେ ଶୋ’ ସହିତ ଜଡିତ କିଛି ଲୋକଙ୍କୁ ପଚରାଉଚରା ମଧ୍ୟ କରିଛି। ଏହି ସମୟରେ, ରଣବୀରଙ୍କର ଏକ ଭିଡିଓ ଭାଇରାଲ ହେଉଛି, ଯେଉଁଥିରେ ସେ କାନ୍ଦୁଥିବାର ଦେଖାଯାଉଛି। ଭିଡିଓରେ, କାମ ବନ୍ଦ ହୋଇଯିବାରୁ ସେ ବିବ୍ରତ ଥିବା ଦେଖାଯାଉଛନ୍ତି । ଲୋକମାନେ ଏହାକୁ ବର୍ତ୍ତମାନର ଭିଡିଓ ବୋଲି ଦାବି କରି ସୋସିଆଲ ମିଡିଆରେ ସେୟାର କରୁଛନ୍ତି, କିନ୍ତୁ ବାସ୍ତବରେ ଏହା ବର୍ତ୍ତମାନର ଭିଡିଓ ନୁହଁ ବୋଲି ସ୍ପଷ୍ଯ ହୋଇଛି ।
ଭିଡିଓରେ, ରଣବୀର ଧଳା ଟି-ସାର୍ଟ ପିନ୍ଧି କ୍ୟାମେରା ସାମ୍ନାରେ ବସି କାନ୍ଦୁଥିବାର ଦେଖାଯାଉଛି । ସେ କହୁଛନ୍ତି, “ସବୁ କାମ ବନ୍ଦ ହୋଇଯାଇଥିବାରୁ ମୁଁ ଦୁଃଖିତ । ମୁଁ ନିଜକୁ ଦୋଷୀ ଭଳି ଅନୁଭବ କରୁଛି। ସମ୍ପୂର୍ଣ୍ଣ ଟିମ ଏଥିପାଇଁ ଏକ୍ସପୋଜ ହେଇଗଲା । ମୋ କାରଣରୁ ସମ୍ପୂର୍ଣ୍ଣ କାମ ବନ୍ଦ ହୋଇଗଲା । ମୁଁ ଆଉ ବ୍ଲଗ କରିବାକୁ ଚାହୁଁନାହିଁ। ଯଦି ବ୍ଲଗ ନକରେ, ତେବେ ଭିଡିଓଗୁଡ଼ିକ ଅପଲୋଡ୍ ହେଇପାରିବ ନାହିଁ।” ତେବେ ତାଙ୍କର ଏହି ଭିଡିଓଟି ସୋସିଆଲ ମିଡିଆରେ ଭାଇରାଲ ହେଉଛି ଏବଂ ସମସ୍ତ ଦାବି କରୁଛନ୍ତି ଯେ, ରଣବୀର ନିଜ ମନ୍ତବ୍ୟ ପାଇଁ ଅନୁତାପ କରି କାନ୍ଦୁଛନ୍ତି।
ଭିଡିଓର ସତ୍ୟତା
ପ୍ରକୃତରେ, ଆଲ୍ଲାହାବାଦିଆଙ୍କ କାନ୍ଦିବାର ଏହି ଭିଡିଓଟି ବହୁତ ପୁରୁଣା। ଏହି ଭିଡିଓଟି କରୋନା ମହାମାରୀ ସମୟର। ରଣବୀର ଆଲାହାବାଦିଆ ନିଜେ ଏହି ବ୍ଲଗ ତାଙ୍କ ୟୁଟ୍ୟୁବରେ ସେୟାର କରିଛନ୍ତି। ସେ ତିନି ବର୍ଷ ପୂର୍ବେ କରୋନାର ଦ୍ୱିତୀୟ ଲହରୀ ସମୟରେ ଭିଡିଓଟି ସେୟାର କରିଥିଲେ। ଭିଡିଓ ସେୟାର କରିବା ସମୟରେ ସେ ଲେଖିଛନ୍ତି, “ଏହା କ୍ଲିକବେଟ୍ ନୁହେଁ – କରୋନା ସହିତ ମୋର ଅଭିଜ୍ଞତା, ବ୍ଲଗ ନଂ ୨୪ । ସେହି ସମୟରେ, ରଣବୀରଙ୍କୁ କରୋନା ହୋଇଥିଲା ଏବଂ ଏହି କାରଣରୁ ତାଙ୍କର କାମ ବନ୍ଦ ହୋଇଯାଇଥିଲା। ୟୁଟ୍ୟୁବରେ ସେୟାର ହୋଇଥିବା ଭିଡିଓରେ ଦେଖିବାକୁ ମିଳିଥିଲା କି ରଣବୀରଙ୍କ କରୋନା ଟେଷ୍ଟ କରାଯାଇଛି । ପରେ ସେ କରୋନା ପଜିଟିଭ ହୋଇଥିବା ଜାଣିବା ପରେ ଭାଙ୍ଗିପଡିଛନ୍ତି । ଏବଂ ବ୍ଲଗରେ କାନ୍ଦୁଛନ୍ତି ।
ବିବାଦ କ’ଣ?
ପ୍ରକୃତରେ, କିଛି ଦିନ ପୂର୍ବରୁ, ରଣବୀର ଆଲାହାବାଦିଆ ଅନେକ ୟୁଟ୍ୟୁବରଙ୍କ ସହିତ ସମୟ ରୈନାଙ୍କ ଡାର୍କ କମେଡି ଶୋ ‘ଇଣ୍ଡିଆଜ୍ ଗଟ୍ ଲାଟେଣ୍ଟ’କୁ ଆସିଥିଲେ। ଏଠାରେ ସେ ପିତାମାତାଙ୍କ ଉପରେ ଏକ ଆପତ୍ତିଜନକ ମନ୍ତବ୍ୟ ଦେଇଥିଲେ, ଯାହା ହଙ୍ଗାମା ସୃଷ୍ଟି କରିଥିଲା। ଭିଡିଓଟି ସୋସିଆଲ ମିଡିଆରେ ଭାଇରାଲ ହେବା ମାତ୍ରେ ସମସ୍ତେ ରଣବୀର ଏବଂ ସମୟଙ୍କ ଶୋ’କୁ ସମାଲୋଚନା କରିବା ଆରମ୍ଭ ହୋଇଥିଲା । ନିଜର ଅସଭ୍ୟ ମନ୍ତବ୍ୟ ପାଇଁ ଅନେକ ସ୍ଥାନରେ ତାଙ୍କ ନାଁରେ ଅଭିଯୋଗ ହୋଇଥିଲା । ମହାରାଷ୍ଟ୍ର ସାଇବର ପୋଲିସ ଶୋ’ ସହିତ ଜଡିତ ପ୍ରାୟ ୩୦ଜଣଙ୍କ ବିରୋଧରେ ଏଫଆଇଆର ରୁଜୁ କରି ତଦନ୍ତ ଆରମ୍ଭ କରିଛି ।
ସାଇବର ପୋଲିସ ମଧ୍ୟ ୟୁଟ୍ୟୁବକୁ ଏକ ଚିଠି ଲେଖି ସମୟଙ୍କ ଶୋ’ର ସମସ୍ତ ଆପତ୍ତିଜନକ ଭିଡିଓ ହଟାଇବାକୁ ଏବଂ ଚ୍ୟାନେଲ ବିରୋଧରେ କାର୍ଯ୍ୟାନୁଷ୍ଠାନ ନେବାକୁ ଅନୁରୋଧ କରିଛି । YouTube କୌଣସି କାର୍ଯ୍ୟାନୁଷ୍ଠାନ ନେବା ପୂର୍ବରୁ, ସମୟ ଏକ ବିବୃତ୍ତି ଜାରି କରି କହିଥିଲେ ଯେ ସେମାନେ ସେମାନଙ୍କ ଚ୍ୟାନେଲରୁ ଇଣ୍ଡିଆଜ୍ ଗଟ୍ ଲାଟେଣ୍ଟର ସମସ୍ତ ଶୋ’କୁ ହଟାଇ ଦେଇଛନ୍ତି ।
ଉତ୍ପାତ ମଚାଉଛି ଗୋଠଛଡ଼ା ଦନ୍ତା: ହାତୀକୁ ଘଉଡ଼ାଇବା ପାଇଁ ବନବିଭାଗର ଉଦ୍ୟମ
କାମାକ୍ଷାନଗର: ଉତ୍ପାତ ମଚାଉଛି ଗୋଠଛଡା ଦନ୍ତା। କାମାକ୍ଷାନଗର ସହର ରାଜକୁଳା କାଟେଣୀ ଗ୍ରାମରେ ପଶି ଦନ୍ତାଟି ଉତ୍ପାତ ମଚାଉଛି। ଗାଁ ଭିତରେ ଦନ୍ତାଟି ପଶି ଏଣେତେଣେ ବୁଲୁଥିବାର ଦେଖି ଭୟଭୀତ ହୋଇ ଲୋକେ ବନବିଭାଗକୁ ଖବର ଦେଇଥିଲୋ। ଖବର ପାଇଁ ବନବିଭିଗ କର୍ମଚାରୀ ପହଞ୍ଚି ହାତୀକୁ ଘଉଡାଇବା ପାଇଁ ଉଦ୍ୟମ କରିଥିବାବେଳେ ହାତୀଟି ଜଙ୍ଗଲ ଭିତରକୁ ନଯାଇ କାମାକ୍ଷାଗର ଡ଼ୁବୁରୀ ୫୩ ନମ୍ବର ଜାତୀୟ ରାଜପଥରେ ଦୀର୍ଘ ସମୟ ଧରି ଠିଆ ହୋଇ ରହିଥିଲା। ଫଳରେ ରାଜପଥର ଉଭୟ ପାର୍ଶ୍ଵରେ ଯାତାୟାତ ଠପ ହେବା ସହ ହାତୀ ଥିବା କାରଣରୁ ବିଦ୍ୟୁତ ସେବା ବନ୍ଦ କରାଯାଇଥିଲା। ଅନେକ ପରିଶ୍ରମ ପରେ ବନବିଭାଗ ଦନ୍ତାଟିକୁ ଜାତୀୟ ରାଜପଥରୁ ଘଉଡ଼ାଇଥିବା ବେଳେ ଦନ୍ତାଟି ରାଜପଥ ପାର୍ଶ୍ଵରେ ଥିବା ୬ ଫୁଟର ବ୍ୟାରିକେଡ଼କୁ ଡେଇଁ ସ୍ଥାନୀୟ କନ୍ଦରସିଙ୍ଗା ଗ୍ରାମ ଅଭିମୁଖେ ଚାଲି ଯାଇଥିଲା । ତେବେ କିଛିଦିନର ବ୍ୟବଧାନ ପରେ କାମାକ୍ଷାନଗର ସହରରେ ଦନ୍ତା ଆତଙ୍କକୁ ଦେଇ ଅଞ୍ଚଳବାସୀ ଭୟଭୀତ ଅବସ୍ଥାରେ ରହିଛନ୍ତି।
ଆୟ ବହିର୍ଭୂତ ସମ୍ପତ୍ତି ଠୁଳ ଅଭିଯୋଗ: କୋରାପୁଟ କୋଟପାଡ ବ୍ଲକ ବାଟସାନ ପଞ୍ଚାୟତ ଏଡିଇଓଙ୍କ ଘରେ ରେଡ
କୋରାପୁଟ: ଭିଜିଲାନ୍ସ ଜାଲରେ ଅଧିକାରୀ। ଆୟ ବହିର୍ଭୂତ ସମ୍ପତ୍ତି ଠୁଳ ଅଭିଯୋଗରେ କୋରାପୁଟ ଜିଲ୍ଲା କୋଟପାଡ ବ୍ଲକ ବାଟସାନ ପଞ୍ଚାୟତର ଆକାଉଣ୍ଟାଣ୍ଟ ତଥା ଡାଟା ଏଣ୍ଟ୍ରି ଅପରେଟର ଏସ. ପାର୍ଥ ସାରଥି ବିଷୋୟୀଙ୍କ ଘରେ ଭିଜିଲାନ୍ସ ରେଡ। ୭ଟି ସ୍ଥାନରେ ରେଡ କରିଛନ୍ତି ଭିଜିଲାନ୍ସର ଟିମ। ଟିମରେ ସାମିଲ ଅଛନ୍ତି ୨ ଜଣ ଅତିରିକ୍ତ ଏସପି, ୪ ଡିଏସପି, ୬ ଇନ୍ସପେକ୍ଟର, ୬ ଏଏସଆଇ। କୋରାପୁଟ ବୋରିଗୁମା ଚମ୍ପିଆସ୍ଥିତ ବାସଭବନ, ଭାଇଙ୍କ ଘର, ସମ୍ପର୍କୀୟଙ୍କ ଘର, ଚମ୍ପିଆସ୍ଥିତ ସାଇକ୍ରିଷ୍ଣା ଏଣ୍ଟରପ୍ରାଇଜେସ, ବୋରିଗୁମାସ୍ଥିତ ତିନି ମହଲା କୋଠା, କୋଟପାଡ ବ୍ଲକ ବାଟସାନସ୍ଥିତ ଅଫିସ ଆଦି ସ୍ଥାନରେ ରେଡ କରିଛି ଟିମି।
ବରିଷ୍ଠ କଂଗ୍ରେସ ନେତା ନିରଞ୍ଜନ ପଟ୍ଟନାୟକଙ୍କ ଘରୁ ଚୋରି ଘଟଣାରେ ଚୋର ଧରାପଡ଼ିଲା
ଭୁବନେଶ୍ବର: ବରିଷ୍ଠ କଂଗ୍ରେସ ନେତା ନିରଞ୍ଜନ ପଟ୍ଟନାୟକଙ୍କ ଘରୁ ଚୋରି ଘଟଣା । ବିଜୟୱାଡାରୁ ଚୋରକୁ ଧରିଲା ସ୍ପେଶାଲ ସ୍କ୍ବାଡ। ସପ୍ତାହେ କାଳ ରାଜ୍ୟ ବାହାରେ ଡେରା ପକାଇବା ପରେ ଧରାପଡ଼ିଲା ଚୋର । ଆଜି କୋର୍ଟରେ ଅଭିଯୁକ୍ତକୁ ହାଜର କରାଯିବ । ଟ୍ରାଞ୍ଜିଟ ରିମାଣ୍ଡରେ ଅଭିଯୁକ୍ତକୁ ଭୁବନେଶ୍ୱର ଅଣାଯାଉଛି । ତେବେ ଜବତ ଟଙ୍କା ଓ ସୁନା ହୀରା ଅଳଙ୍କାର ନେଇ କୌଣସି ସୂଚନା ମିଳିନାହିଁ । ଜାନୁଆରୀ ୨୫ ତାରିଖ ବିଳମ୍ବିତ ରାତିରେ ନିରଞ୍ଜନଙ୍କ ଭିଆଇପି କଲୋନୀ ସ୍ଥିତ ଘରୁ ହୋଇଥିଲା ଚୋରି। ସୁରକ୍ଷା କର୍ମୀଙ୍କୁ ମାତ୍ ଦେଇ ଚୋର ଦ୍ୱିତୀୟ ମହଲାକୁ ଯାଇ ନେଇଯାଇଥିଲା ୫୦ ଲକ୍ଷର ଅଳଙ୍କାର ଓ ନଗଦ ଦୁଇ ଲକ୍ଷରୁ ଊର୍ଦ୍ଧ୍ବ ଟଙ୍କା । ଚୋରକୁ ଧରିବା ପାଇଁ ସ୍ପେଶାଲ ଟିମ ଗଠନ ହୋଇଥିଲା । ନିଜେ ପୋଲିସ କମିଶନରଙ୍କ ସହ ଟୁଇନ ସିଟି ଡିସିପି ନିରଞ୍ଜନଙ୍କ ଘର ପରିଦର୍ଶନ କରିଥିଲେ ।
ବୁର୍ଲା ଭିମସାରରେ ବଡ଼ ବିଭ୍ରାଟ: କିଟି କିଟି ଅନ୍ଧାରରେ ଚାଲିଛି କ୍ୟାନ୍ସର ଚିକିତ୍ସା
ବୁର୍ଲା: କିଟି କିଟି ଅନ୍ଧାରରେ ଚାଲିଛି କ୍ୟାନ୍ସର ଚିକିତ୍ସା। ମୋବାଇଲ ଫ୍ଲାସ୍ ଲାଇଟ ସାଜିଛି ସାହାରା। ।ଏ ଦୃଶ୍ୟ ହେଉଛି ବୁର୍ଲା ଭିମସାର ମେଡିକାଲର। ଗତକାଲି ଗୁରୁତ୍ବପୂର୍ଣ୍ଣ ବିଭାଗରେ ପ୍ରାୟ ୩ ଘଣ୍ଟା ବିଦ୍ୟୁତ କଟିଯିବା ଫଳରେ ମୋବାଇଲ ଫ୍ଲାସ ଲାଇଟରେ ଚାଲିଥିଲା କ୍ୟାନ୍ସର ଚିକିତ୍ସା। ଜେନେରେଟର ଥାଇ ସୁଦ୍ଧା କାହିଁକି ବ୍ୟବହାର ହେଲାନି ସେନେଇ ଉଠିଛି ବଡ ପ୍ରଶ୍ନ। ସେପଟେ ତୁରନ୍ତ ଦୋଷୀଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କହିଛନ୍ତି ମେଡିକାଲ ଅଧୀକ୍ଷକ।
ଦୁଇ ଦିନ ସାମାନ୍ୟ ଗରମ ପରେ ପୁଣି ବଢ଼ିବ ଥଣ୍ଡା: ତାପମାତ୍ରା କମିବା ନେଇ ପାଣିପାଗ ବିଭାଗର ପୂର୍ବାନୁମାନ
ଭୁବନେଶ୍ବର: ଦୁଇ ଦିନ ସାମାନ୍ୟ ଗରମ ପରେ ପୁଣି ବଢିବ ଥଣ୍ଡା । ଅସନ୍ତା ଶନିବାର ଠାରୁ ପୁଣି ତାପମାତ୍ରା କମିବା ନେଇ ର୍ପୂବାନୁମାନ କରିଛି ପାଣିପାଗ କେନ୍ଦ୍ର । ୨ରୁ ୪ ଡିଗ୍ରୀ ପର୍ଯ୍ୟନ୍ତ ହ୍ରାସ ପାଇପାରେ ପାରଦ । ଆସନ୍ତା ଦୁଇ ଦିନ ମଧ୍ୟରେ ସର୍ବନିମ୍ନ ତାପମାତ୍ରାରେ କୌଣସି ପରିବର୍ତ୍ତନ ହେବ ନାହିଁ। ଏହାପରେ ଥଣ୍ଡା ଅନୁଭବ ହେବ ବୋଲି ପୂର୍ବାନୁମାନ କରାଯାଇଛି । ସେପଟେ ଆସନ୍ତା ୩ ଦିନ ପର୍ଯ୍ୟନ୍ତ ଉପକୂଳ ଓଡ଼ିଶା ସମେତ ମୟୂରଭଞ୍ଜ, ମାଲକାନଗିରି ଓ କୋରାପୁଟ ଜିଲ୍ଲାରେ ହାଲୁକାରୁ ମଧ୍ୟମ ଧରଣର କୁହୁଡ଼ି ଅନୁଭୂତ ହେବ। ଗୁରୁଚାପ ବଳୟର ଉପସ୍ଥିତି ତଥା ପଶ୍ଚିମାଝଡ଼ର ଆଗମନ ହେତୁ ଉପକୂଳ ଓଡ଼ିଶା ତଥା ପାର୍ଶ୍ବବର୍ତ୍ତୀ ଜିଲ୍ଲାଗୁଡ଼ିକରେ ଘନକୁହୁଡ଼ି ଦୃଶ୍ୟମାନ ହେବ । ତେବେ ଗତ ୨୪ ମଧ୍ୟରେ ଝାରସୁଗୁଡ଼ାରେ ରାଜ୍ୟର ସର୍ବୋଚ୍ଚ ତାପମାତ୍ରା ୩୬.୬ ଡିଗ୍ରୀ ଥିବା ବେଳେ ବଲାଙ୍ଗୀର ଓ ଅନୁଗୁଳରେ ୩୫.୭, ସମ୍ବଲପୁରରେ ୩୫.୩, ଭବାନୀପାଟଣା, ଭଦ୍ରକ ଓ ସୋନପୁରରେ ୩୫.୨, ମାଲକାନଗିରିରେ ୩୫.୧ ଡିଗ୍ରୀ ରହିଥିଲା। ପାରାଦୀପ ଓ ଦାରିଙ୍ଗବାଡ଼ି ବ୍ୟତୀତ ଅନ୍ୟ ସମସ୍ତ ସହରରେ ସର୍ବୋଚ୍ଚ ତାପମାତ୍ରା ୩୦ ଡିଗ୍ରି ଉପରେ ରହିଥିଲା ।