ଭୁବନେଶ୍ବର : ବଙ୍ଗୋମୁଣ୍ଡାରେ ଆଦିବାସୀ ମହିଳାଙ୍କୁ ଦୁଷ୍କର୍ମ ଉଦ୍ୟମ ଓ ବିଷ୍ଠା ଖୁଆଇବା ଘଟଣାର କଡ଼ା ସମାଲୋଚନା କରିଛି ବିଜେଡି । ଏକ ସାମ୍ବାଦିକ ସମ୍ମିଳନୀରେ ସରକାରଙ୍କ ଉପରେ ବର୍ଷିଛନ୍ତି ରାଜ୍ୟସଭା ସାଂସଦ ନିରଞ୍ଜନ ବିଶି । ସେ କହିଛନ୍ତି, ରାଜ୍ୟରେ ଏହା ପ୍ରଥମ ଘଟଣା । ୨୪ ବର୍ଷ ମଧ୍ୟରେ ଏଭଳି ଘଟଣା କେବେ ଘଟି ନଥିଲା । ଘଟଣାକୁ ୭ ଦିନ ବିତି ଯାଇଥିଲେ ମଧ୍ୟ ଅଭିଯୁକ୍ତକୁ ଗିରଫ କରିପାରି ନାହିଁ ପୋଲିସ । ମୁଖ୍ୟମନ୍ତ୍ରୀ ନିଜେ ଆଦିବାସୀ । ତା ପରେ ବି ସରକାର ଚୁପ,  ମୁଖ୍ୟମନ୍ତ୍ରୀ ବି ଚୁପ । ବିଜେପି ସରକାରରେ ଆଦିବାସୀ ସୁରକ୍ଷିତ ନୁହଁନ୍ତି । ଆଦିବାସୀଙ୍କୁ ନ୍ୟାୟ ମିଳୁନି । ଆଦିବାସୀଙ୍କ ପ୍ରତି ବିଜେପି ସରକାର ସମ୍ବେଦନହୀନ ବୋଲି କହିଛି ବିଜେଡି । ଆଦିବାସୀଙ୍କ ପ୍ରତି ଅତ୍ୟାଚାର ହେଉଥିବା ବେଳେ ମୁଖ୍ୟମନ୍ତ୍ରୀ ବିଦେଶରେ ବୁଲୁଛନ୍ତି । ଲାଗୁଛି ମୁଖ୍ୟମନ୍ତ୍ରୀ ନିଦରେ ଅଛନ୍ତି । ଖପ୍ରାଖୋଲରେ ଆଦିବାସୀ ଶିଶୁ ବିକ୍ରି ପ୍ରସଙ୍ଗରେ ମଧ୍ୟ ସରକାରଙ୍କୁ ଟାର୍ଗେଟ କରିଛି ବିଜେଡି । ଅଭାବ ଅନାଟନ ପାଇଁ ଆଦିବାସୀ ମାନେ ଶିଶୁକୁ ବିକ୍ରି କରୁଛନ୍ତି । ୨୨ ଦିନ ପରେ ବି ଶିଶୁକୁ ଉଦ୍ଧାର କରି ପାରିଲାନି ପ୍ରଶାସନ । ପୋଲିସ ବିଫଳ ହୋଇଛି । ଆଦିବାସୀଙ୍କୁ ଚାଉଳ ମଧ୍ୟ ଯୋଗାଇ ପାରିଲେନି ସରକାର । ଆଦିବାସୀମାନଙ୍କୁ ତୁରନ୍ତ ସୁରକ୍ଷା ଯୋଗାଇ ଦେବାକୁ ଦାବି କରିଛି ବିଜେଡି ।