ଛତିଶଗଡ଼ ବିଜାପୁରରେ ସୁରକ୍ଷା ବାହିନୀ ଏବଂ ନକ୍ସଲବାଦୀଙ୍କ ମଧ୍ୟରେ ଭୟଙ୍କର ଗୁଳି ବିନିମୟ । ପେଡ୍ଡାଗାଲୁରର ଘନ ଜଙ୍ଗଲରେ ଚାଲିଥିବା ଏହି ଏନକାଉଣ୍ଟରରେ ନକ୍ସଲବାଦୀମାନଙ୍କୁ ଏକ ବଡ଼ ବିପର୍ଯ୍ୟୟର ସାମ୍ନା କରିବାକୁ ପଡ଼ିଛି। ଏହି ଅପରେସନରେ କୁଖ୍ୟାତ ନକ୍ସଲବାଦୀ କମାଣ୍ଡର ଉଧମ ସିଂହ ନିହତ ହୋଇଛି । ଡିଆରଜି ଏବଂ ସିଆରପିଏଫର ସ୍ୱତନ୍ତ୍ର କୋବ୍ରା ବାଟାଲିୟନ ଏହି ଅଞ୍ଚଳରେ ଏକ ମିଳିତ ନକ୍ସଲ ବିରୋଧୀ ଅପରେସନ୍ କରୁଥିଲେ । ଏହି ସମୟରେ, ନକ୍ସଲବାଦୀମାନେ ସୁରକ୍ଷା ବାହିନୀ ଉପରେ ଗୁଳି ଚଳାଇଥିଲେ । ଯାହା ଫଳରେ ଉଭୟ ପାର୍ଶ୍ୱରୁ ପାଲଟା ଗୁଳି ଚାଳନା କରାଯାଇଥିଲା। ଏନକାଉଣ୍ଟର ସ୍ଥଳରୁ ଏକ AK-47 ରାଇଫଲ୍ ଏବଂ ଜଣେ ନକ୍ସଲଙ୍କ ମୃତଦେହ ଉଦ୍ଧାର କରାଯାଇଛି । ସମଗ୍ର ଅଞ୍ଚଳରେ ବର୍ତ୍ତମାନ ମଧ୍ୟ ସର୍ଚ୍ଚ ଅପରେସନ୍ ଚାଲିଛି । ସୁରକ୍ଷା ବାହିନୀ ଅଞ୍ଚଳକୁ ଘେରାବନ୍ଦୀ କରି ରଖିଛନ୍ତି ।
ଗୋଷ୍ଠୀ ସଂଘର୍ଷରେ ୩ ଜଣ ଗୁରୁତର
ପୁରୀ ଜିଲ୍ଲା କଣାସ ବ୍ଲକ ଗଡ଼ବଡପୁଟ ଗ୍ରାମରେ ଗୋଷ୍ଠୀ ସଂଘର୍ଷ । ପୂର୍ବ ଶତ୍ରୁତାକୁ କେନ୍ଦ୍ର କରି ଦୁଇ ପାରିବାର ମଧ୍ୟରେ ଗୋଷ୍ଠୀ ସଂଘର୍ଷ ହୋଇଛି । ଗୋଷ୍ଠୀ ସଂଘର୍ଷରେ ୩ ଜଣ ଗୁରୁତର ହୋଇଛନ୍ତି । ଗୁରୁତର ହେଲେ ପ୍ରକାଶ ବଳବନ୍ତରାୟ, ତାଙ୍କ ପୁତୁରା ଗୁଡୁ ବଳବନ୍ତରାୟ ଓ ପବିତ୍ର ବଳବନ୍ତରାୟ । ଆକ୍ରମଣକାରୀ ହେଲେ ସେହି ଗ୍ରାମର ବାଦଲ ବଳବନ୍ତରାୟ ଓ ତାଙ୍କ ସମ୍ପର୍କୀୟ । ଗୁରୁତର ମାନଙ୍କୁ ପ୍ରଥମେ ଖୋର୍ଦ୍ଧା ମେଡ଼ିକାଲ ପରେ ଏମ୍ସ ମେଡ଼ିକାଲକୁ ସ୍ଥାନାନ୍ତର କରାଯାଇଛି । ଗୁରୁତରଙ୍କ ମଧ୍ୟରେ ଜଣେ ଆଇସିୟୁରେ ଭର୍ତ୍ତି ହୋଇଛନ୍ତି । ଏନେଇ କଣାସ ଥାନାରେ ଅଭିଯୋଗ ହୋଇଛି । ପୋଲିସ ଘଟଣାର ଛାନବିନ ଆରମ୍ଭ କରିଛି । ଏହି ଘଟଣାରେ ନାଣ୍ଡୁ ନାମକ ଜଣେ ବ୍ୟକ୍ତି ଗିରଫ ହୋଇଥିବା ସୂଚନା ମିଳିଛି ।
ରାୟଗଡ଼ା ସହର ସ୍ଥିତ ସରକାରୀ ଆଇଟିଆଇର ଜଣେ ଛାତ୍ରଙ୍କୁ ଆଉ ଜଣେ ଛାତ୍ରଙ୍କ ମରଣାନ୍ତକ ଆକ୍ରମଣ
ରାୟଗଡ଼ା ସହର ସ୍ଥିତ ସରକାରୀ ଆଇଟିଆଇର ଜଣେ ଛାତ୍ରଙ୍କୁ ଆଉ ଜଣେ ଛାତ୍ରଙ୍କ ମରଣାନ୍ତକ ଆକ୍ରମଣ । ଲୁହା ଛଡ଼ରେ ପିଟି ରକ୍ତାକ୍ତ କରିଥିବା ନେଇ ରାୟଗଡ଼ା ଟାଉନ ଥାନାରେ ଲିଖିତ ଅଭିଯୋଗ ହୋଇଛି । ଆହତ ଛାତ୍ର ଜଣକ ହେଲେ କୋଲନରା ବ୍ଲକ ଥେରୁବାଲି ଡିପି କ୍ୟାମ୍ପ ଅଞ୍ଚଳର ସ୍ୱର୍ଗତ ଉଦ୍ଧବ ଗୌଡ଼ଙ୍କ ପୁଅ ମନୋଜ ଗୌଡ଼ । ମନୋଜ ସରକାରୀ ଆଇଟିଆଇରେ ୱେଲଡର ଟ୍ରେଡରେ ପଢ଼ୁଥିବା ବେଳେ ସେଠାରେ ପଢ଼ୁଥିବା ଅନ୍ୟ ଜଣେ ଛାତ୍ର ଭୁବନ ଲିମା ତାଙ୍କୁ ଏକ ଲୁହା ଛଡ଼ରେ ଆକ୍ରମଣ କରିଥିଲେ। ଫଳରେ ମନୋଜଙ୍କ ମୁଣ୍ଡରେ ଗଭୀର ଆଘାତ ଲାଗିଥିଲା। ତାଙ୍କୁ ସଙ୍ଗେ ସଙ୍ଗେ ରାୟଗଡ଼ା ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଥିଲା। ତେବେ ମୁଣ୍ଡ ଭିତରେ ଇଣ୍ଟରନାଲ ବ୍ଲିଡିଂ ହେଉଥିବାରୁ ତାଙ୍କ ଅବସ୍ଥା ସଙ୍କଟାପନ୍ନ ହୋଇଥିଲା । ଫଳରେ ତାଙ୍କୁ ଅଧିକ ଚିକିତ୍ସା ପାଇଁ ବ୍ରହ୍ମପୁର ବଡ଼ ମେଡିକାଲକୁ ସ୍ଥାନାନ୍ତର କରାଯାଇଛି । ମନୋଜଙ୍କ ବଡ଼ ବାପା କାମଦେବ ଗୌଡ଼ ଖବର ପାଇ ଗ୍ରାମବାସୀଙ୍କ ସହ ମେଡିକାଲରେ ପହଞ୍ଚିଥିଲେ । ସହପାଠୀଙ୍କ ଠାରୁ ସମସ୍ତ ବିଷୟ ବୁଝିବା ପରେ ଥାନାରେ ଏତଲା ଦେଇଛନ୍ତି । ଅଭିଯୋଗ ପାଇବା ପରେ ପୋଲିସ ଘଟଣାର ତଦନ୍ତ କରୁଛି ।
UPSC ନିୟମରେ ବଡ଼ ପରିବର୍ତ୍ତନ, ଆବେଦନ ପୂର୍ବରୁ ଏହା ଜାଣି ନିଅନ୍ତୁ
ସଂଘୀୟ ଲୋକସେବା ଆୟୋଗ (ୟୁପିଏସସି) ତରଫରୁ ସିଭିଲ ସର୍ଭିସ ପରୀକ୍ଷା (ସିଏସଇ)ର ନୋଟିଫିକେସନ ଜାରି ହୋଇଛି । ଏବେ କାର୍ଯ୍ୟରତ IAS/ IFS ଅଧିକାରୀ ପରୀକ୍ଷା ଦେଇ ପାରିବେ ନାହିଁ । ଏଥିସହିତ ଆଇପିଏସ ଦ୍ବିତୀୟ ଥର ଉକ୍ତ ପଦ ପାଇଁ ଆବେଦନ କରିପାରିବେ ନାହିଁ । ଆଇପିଏସ ପାଇଁ ନିୟମ ଅଧିକ ସ୍ପଷ୍ଟ ଓ କଠୋର କରାଯାଇଛି । ଚଳିତ ବର୍ଷ ଆୟୋଗ ତରଫରୁ ସର୍ଭିସ ଆଲୋକେସନ (ସେବା ଆବଣ୍ଟନ) ଓ ଡିଜିଟାଲ ସୁରକ୍ଷାକୁ ନେଇ କିଛି ଗୁରୁତ୍ବପୂର୍ଣ୍ଣ ଓ ବଡ଼ ପରିବର୍ତ୍ତନ କରାଯାଇଛି । ଯଦ କୌଣସି ପ୍ରାର୍ଥୀଙ୍କ ଚୟନ ପୂର୍ବରୁ ହିଁ ଆଇପିଏସ ପାଇଁ ହୋଇ ସାରିଥିବ, ତେବେ ସେ ସିଏସଇ ୨୦୨୬ରେ ଦ୍ବିତୀୟ ଥର ଆଇପିଏସ ବିକଳ୍ପ ବାଛି ପାରିବେ ନାହିଁ ।
ଯଦି ଆପଣ କାର୍ଯ୍ୟରଥ ଆଇଏସ ଓ ଆଇଏଫଏସ ଅଧିକାରୀ, ତେବେ ଏହି ପରୀକ୍ଷାରେ ବସି ପାରିବେ ନାହିଁ । ଯଦି ମୁଖ୍ୟ ପରୀକ୍ଷା ପୂର୍ବରୁ ପ୍ରାର୍ଥୀଙ୍କ କୌଣସି ନିଯୁକ୍ତି ଏହି ସେବାରେ ହୁଏ, ତେବେ ତାଙ୍କୁ ମୁଖ୍ୟ ପରୀକ୍ଷା ଦେବାର ଅନୁମତି ମିଳିବ ନାହିଁ । ଯେଉଁମାନେ ସିଏସଇ ୨୦୨୫ ବା ତା’ ପୂର୍ବରୁ କୌଣସି ସର୍ଭିସରେ ଆସିସାରିଛନ୍ତି, ତାଙ୍କୁ ନିଜର ବାକି ଥିବା ଆଟେମ୍ପଟର ଉପଯୋଗ କରିବା ପାଇଁ ୨୦୨୬ ବା ୨୦୨୭ରେ ଏକ ଅନ୍ତିମ ସୁଯୋଗ ଦିଆଯିବ ।
ବନ ବିଭାଗର ଚଢାଉ: ୨ଟି ହାତୀ ଦାନ୍ତ ଜବତ, ୪ ଜଣ ଗିରଫ
ବାଲେଶ୍ୱର ଜିଲ୍ଲା ସୋର ଥାନା ତଳନଗର ଗାଁରେ ଚଢାଉ । ବନ ବିଭାଗ ଚଢାଉ କରି ୨ଟି ହାତୀ ଦାନ୍ତ ଜବତ କରିଥିବା ବେଳେ ୪ ଜଣଙ୍କୁ ଗିରଫ କରିଛି । ଏହି ଗାଁର କିଛି ହାତୀ ଦାନ୍ତ ବେପାରୀ ୨ଟି ହାତୀ ଦାନ୍ତ ରଖି ପୂଜା କରୁଥିବା ନେଇ ବନ ବିଭାଗ ଖବର ପାଇଥିଲା l ପରେ ବନ ବିଭାଗ ଟିମ ଗରାଖ ହୋଇ ସେହି ସ୍ଥାନରେ ପହଞ୍ଚି ଅଚାନକ ରେଡ କରିଥିଲେ l ରେଡ ସମୟରେ ଭଦ୍ରକ ଓ ଇଞ୍ଚୁଡ଼ି ଅଂଚଳରୁ ୨ ଜଣ ଓ ତଳନଗର ଓ ସବିରା ଅଂଚଳରୁ ୨ ଜଣ ବେପାରିଙ୍କୁ ଗିରଫ କରାଯାଇଛି l ଏମାନେ ଦୀର୍ଘ ଦିନ ଧରି ହାତୀ ଦାନ୍ତ ବେପାର କରି ଆସୁଥିଲେ l ଗତକାଲି ହାତୀ ଦାନ୍ତକୁ ପୂଜା କରିବା ପରେ ବାହାର ରାଜ୍ୟକୁ ବିକ୍ରି କରିବାର ବ୍ୟବସ୍ଥା କରୁଥିବା ବେଳେ ବନ ବିଭାଗ ରେଡ କରିଥିଲା l ଏହି ହାତୀ ଦାନ୍ତର ଆନୁମାନିକ ମୂଲ୍ୟ ଲକ୍ଷାଧିକ ଟଙ୍କା ହେବା ନେଇ ସୂଚନା ମିଳିଛି l ଏହି ଚଢ଼ାଉରେ ବାଲେଶ୍ୱର ରେଞ୍ଜର, ସୋର ରେଞ୍ଜର, ପ୍ରମୁଖ ଉପସ୍ଥିତ ଥିଲେ l ଏହି ହାତୀ ଦାନ୍ତ ବେପାରରେ ଆହୁରି ଲୋକ ଥିବା ନେଇ ବନ ବିଭାଗ ପକ୍ଷରୁ ସୂଚନା ମିଳିଛି l
ଉଚ୍ଚ ବିଦ୍ୟାଳୟ ପରିସରରେ କାଟିଦେଲେ ବିରାଟକାୟ ଗଛ: ପ୍ରଶାସନର ଅଜାଣତରେ କଟାଯାଇଥିବା ଅଭିଯୋଗ
ପୁରୀ ଜିଲ୍ଲା କାକଟପୁର ପାଟପୁର ସ୍ଥିତ ବରୁଣେଇ ଉଚ୍ଚ ବିଦ୍ୟାଳୟ ପରିସରରେ କାଟିଦେଲେ ବିରାଟକାୟ ଗଛ । ସ୍ଥାନୀୟ ପ୍ରଶାସନର ଅଜାଣତରେ ଗଛକୁ କାଟି ଦେଇଥିବା ଅଭିଯୋଗ ହୋଇଛି । ପ୍ରଧାନ ଶିକ୍ଷକ ଲକ୍ଷାଧିକ ଟଙ୍କାରେ ଗଛକୁ ବିକ୍ରି କରିବାକୁ ମସୁଧା କରିଥିବା ଲୋକମାନେ ଅଭିଯୋଗ କରିଛନ୍ତି । ବିଦ୍ୟାଳୟରେ ବୃକ୍ଷ ରୋପଣ ବଦଳରେ ଗଛ କଟାକୁ ନାପସନ୍ଦ କରିଛନ୍ତି ବୁଦ୍ଧିଜୀବୀ । ସେପଟେ ବିଦ୍ୟାଳୟ ପ୍ରଧାନ ଶିକ୍ଷକ କହିଛନ୍ତି, ଗଛ କିଏ କାଟିଲା ବିଦ୍ୟାଳୟ କର୍ମଚାରୀ ଅବଗତ ନାହାନ୍ତି। କିନ୍ତୁ ଥାନାରେ ଅଭିଯୋଗ ହେବ।
୧୧ଟି ଜିଲ୍ଲାର ୨୪ଟି ସ୍ଥାନର ଇଂରାଜୀ ନାମରେ ସଂଶୋଧନ କରାଯିବ, ରାଜସ୍ବ ବିଭାଗ ପକ୍ଷରୁ ବିଜ୍ଞପ୍ତି
ସଂଶୋଧନ ହେବ ବିଭିନ୍ନ ଜିଲ୍ଲା ଏବଂ ସ୍ଥାନର ନାଁର ଇଂରାଜୀ ବନାନ। ଏନେଇ ରାଜସ୍ବ ବିଭାଗ ପକ୍ଷରୁ ବିଜ୍ଞପ୍ତି ପ୍ରକାଶ ପାଇଛି। ଜିଲ୍ଲାର ଇଂରାଜୀ ନାମରେ ବନାନ ବଦଳିବ, ପୁରୁଣା ବନାନରେ ସଂଶୋଧନ କରାଯିବ। ଓଡ଼ିଆ ନାମ ଅନୁସାରେ ରହିବ ଇଂରାଜୀ ବନାନ। ଖୋର୍ଦ୍ଧ ଜିଲ୍ଲାକୁ ଏଣିକି ଓଡିଆ ନାମ ଅନୁସାରେ ଇଂରାଜୀରେ ମଧ୍ୟ ଖୋରଧା ଲେଖାଯିବ। ସେହିପରି ଦେବଗଡ଼ ଜିଲ୍ଲାକୁ ଇଂରାଜୀରେ ଯେଉଁ ଦେଓଗଡ଼ ବୋଲି ଲେଖାଯାଉଛି, ତାକୁ ସଂଶୋଧନ କରି ଇଂରାଜୀରେ ମଧ୍ୟ ଦେବଗଡ ବୋଲି ଲେଖାଯିବ। ଏପରି ୭ ଜିଲ୍ଲାର ନାଁ ବଦଳିବ। ଅନେକ ସ୍ଥାନରେ ଡ ପାଇଁ ଇଂରାଜୀରେ R ଲେଖାଯାଏ। କେନ୍ଦ୍ରାପଡ଼ାକୁ ଇଂରାଜୀରେ କେନ୍ଦ୍ରାପରା, ମହାକାଳପଡ଼ାକୁ ମହାକାଳପରା, ନୟାଗଡ଼କୁ ନୟାଗର ବୋଲି ଇଂରାଜୀରେ ଲେଖାଯାଇଥାଏ। ଏଥିରେ ସଂଶୋଧନ କରାଯିବ। ୧୧ଟି ଜିଲ୍ଲାର ୨୪ଟି ସ୍ଥାନର ଇଂରାଜୀ ନାମରେ ସଂଶୋଧନ କରାଯିବ। ଏନେଇ ରାଜସ୍ବ ବିଭାଗ ପକ୍ଷରୁ ବିଜ୍ଞପ୍ତି ପ୍ରକାଶ ପାଇଛି। ୧୫ ଦିନ ଭିତରେ ଅଭିଯୋଗ ଆପତ୍ତି ଥିଲେ ତଥ୍ୟ ସହ ଦେବାକୁ ବିଜ୍ଞପ୍ତିରେ କୁହାଯାଇଛି
ଭଦ୍ରକ ଜିଲ୍ଲା ବିଜେଡି ସଭାପତି ହେଲେ ଚାନ୍ଦବାଲି ବିଧାୟକ ବ୍ୟୋମକେଶ ରାୟ
ଭଦ୍ରକ ଜିଲ୍ଲା ବିଜେଡି ସଭାପତି ହେଲେ ଚାନ୍ଦବାଲି ବିଧାୟକ ବ୍ୟୋମକେଶ ରାୟ । ସେ ଜିଲ୍ଲା ସଭାପତି ହେବା ପରେ ନେତା ଓ କର୍ମୀଙ୍କ ମଧ୍ୟରେ ଉତ୍ସାହ ଦେଖିବାକୁ ମିଳିଛି । ଏନେଇ ବିଜେଡି ସୁପ୍ରିମୋ ନବୀନ ପଟ୍ଟନାୟକଙ୍କୁ କୃତଜ୍ଞତା ଜଣାଇଛନ୍ତି ସ୍ଥାନୀୟ ନେତା ଓ କର୍ମୀ ନବୀନ ପଟ୍ଟନାୟକ ମୋ ଉପରେ ଯେଉଁ ଭରସା ଓ ବିଶ୍ୱାସ ରଖି ଭଦ୍ରକ ଜିଲ୍ଲାର ଦାୟୀତ୍ଵ ଦେଇଛନ୍ତି ମୁଁ ନିଶ୍ଚୟ ତାହା ପୂରଣ କରିବି । ତୃଣମୂଳ ସ୍ତରରୁ ଦଳକୁ ସଙ୍ଗଠିତ କରି ଆଗାମୀ ପଞ୍ଚାୟତ ନିର୍ବାଚନରେ ବିଜୁ ଜନତା ଦଳ ଭଲ ପ୍ରଦର୍ଶନ କରିବ ବୋଲି କହିଛନ୍ତି ବ୍ୟୋମକେଶ ରାୟ ।
ପ୍ରଥମ ଥର ପାଇଁ ଭାରତରେ ଆୟୋଜିତ ହେବ ବ୍ଲାକ୍ ସ୍ୱାନ୍ ସମ୍ମିଳନୀ
ପ୍ରଥମ ଥର ପାଇଁ ଭାରତରେ ଆୟୋଜିତ ହେଉଛି ବ୍ଲାକ୍ ସ୍ୱାନ୍ ସମ୍ମିଳନୀ। ଫେବୃଆରୀ ୫ ଓ ୬ ତାରିଖ ଦୁଇ ଦିନ ଧରି ଭୁବନେଶ୍ୱରରେ ଆୟୋଜିତ ହେବ ଏହି କାର୍ଯ୍ୟକ୍ରମ । ଏହି ସମ୍ମିଳନୀରେ ରାଷ୍ଟ୍ରପତି ଦୌପଦୀ ମୁର୍ମୁ, ମୁଖ୍ୟମନ୍ତ୍ରୀ ମୋହନ ଚରଣ ମାଝୀ, କେନ୍ଦ୍ର ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ପ୍ରମୁଖ ଯୋଗ ଦେବେ । ବ୍ଲାକ୍ ସ୍ୱାନ୍ ଶିଖର ସମ୍ମିଳନୀ ଜାତୀୟ ନୀତି ନିର୍ଦ୍ଧାରକମାନଙ୍କୁ ଆର୍ଥିକ ପ୍ରତିଷ୍ଠାନ, ପ୍ରଯୁକ୍ତି ବିଦ୍ୟା, ଷ୍ଟାର୍ଟଅପ୍, ନିବେଶକ ଏବଂ ଶିକ୍ଷାବିତଙ୍କ ମଧ୍ୟରେ କାର୍ଯ୍ୟାନ୍ୱୟନମୁଖୀ ଆଲୋଚନା ପାଇଁ ସୁଯୋଗ ସୃଷ୍ଟି କରିବ। ଡିଜିଟାଲ୍ ଅର୍ଥନୀତି କ୍ଷେତ୍ରରେ ଓଡିଶା ଆଗକୁ ବଢିବ । ଏହାସହ ଓଡ଼ିଆ ମେଧାବୀ ପିଲାମାନଙ୍କୁ ବିଶ୍ବ ସ୍ତରରେ ସୁଯୋଗ ମିଳିବ ।
ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ଆଜି ମୟୂରଭଞ୍ଜ ଜିଲ୍ଲା ଗସ୍ତର ଦ୍ୱିତୀୟ ଦିନ
ମହାମହିମ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ଆଜି ମୟୂରଭଞ୍ଜ ଜିଲ୍ଲା ଗସ୍ତର ଦ୍ୱିତୀୟ ଦିନ। ଗତକାଲି ରାଇରଙ୍ଗପୁର ଠାରେ ଥିବା ନିଜ ବାସଭବନରେ ରାତ୍ରି ଯାପନ କରିଥିଲେ । ଆଜି ସକାଳ ୮. ୫୫ ମିନିଟରେ ରାଇରଙ୍ଗପୁର ଛାଡ଼ି ୯.୪୦ ମିନିଟରେ ତାଙ୍କ ଶ୍ୱଶୁର ଘର ପାହାଡ଼ପୁର ଅଭିମୁଖେ ଯାଇ ମୁର୍ମୁ ଛକରେ ଥିବା ତାଙ୍କ ସ୍ୱାମୀ ସ୍ୱର୍ଗତ ଶାମଚରଣ ମୁର୍ମୁଙ୍କ ପ୍ରତିମୂର୍ତ୍ତିରେ ମାଲ୍ୟାର୍ପଣ କରିବେ । ନିକଟରେ ଥିବା ଜାହିରାରେ ପୂଜାର୍ଚ୍ଚନା କରିବେ। ପରେ ଏଲ ଆଣ୍ଡ ଟି କମ୍ପାନୀ ଦ୍ୱାରା ପରିଚାଳିତ ଆତ୍ମନିର୍ଭରଶୀଳ ତାଲିମ କେନ୍ଦ୍ର ପରିଦର୍ଶନ କରି ଛାତ୍ରଛାତ୍ରୀ ମାନଙ୍କ ସହିତ ମତ ବିନିମୟ କରିବେ । ସେଠାରେ ଥିବା ଏସଏଲସି ସ୍ମୃତି ବିଦ୍ୟାଳୟ ପରିସରରେ ଛାତ୍ରଛାତ୍ରୀ ମାନଙ୍କ ସହିତ କିଛି ସମୟ ବିତାଇବେ । ଦିନ ୧୨.୩୦ ମିନିଟରେ ପାହାଡ଼ପୁର ଛାଡ଼ି ଅପରାହ୍ନ ୧.୨୦ ମିନିଟରେ ରାଇରଙ୍ଗପୁର ଜଗନ୍ନାଥ ମନ୍ଦିର ଅଭିମୁଖେ ଆସିବେ । ସେଠାରେ ମହାପ୍ରଭୁଙ୍କୁ ଦର୍ଶନ କରିବା ପରେ ମହାପ୍ରଭୁଙ୍କ ପ୍ରସାଦ ସେବନର ବ୍ୟବସ୍ଥା କରାଯାଇଛି । ଏହାପରେ ନିଜ ରାଇରଙ୍ଗପୁର ବାସଭବନରେ କିଛି ସମୟ ବିଶ୍ରାମ ନେବା ପରେ ଅପରାହ୍ନ ୩ ଟାରେ ଘର ଛାଡ଼ିବେ । ଅପରାହ୍ନ ୩.୨୫ଦାଣ୍ଡ ବୋଷ ହେଲିପ୍ୟାଡରେ ପହଞ୍ଚି ଯଶିପୁର ଅଭିମୁଖେ ଯାତ୍ରା କରିବେ । ସେଠାରୁ ସଡ଼କ ପଥରେ ଶିମିଳିପାଳ ଅଭିମୁଖେ ଯିବେ। ଆଜି ରାତିରେ ଅଭୟାରଣ୍ୟ ଭିତରେ ଥିବା ଗୁଡୁଗୁଡିଆ ଠାରେ ଥିବା ଜଙ୍ଗଲ ବିଭାଗର ନେଚର କ୍ୟାମ୍ପରେ ରାତ୍ରିଯାପନ କରିବାର କାର୍ଯ୍ୟକ୍ରମ ରହିଛି।