ଗଞ୍ଜାମ: ଜାଗା ସରକାରଙ୍କର । ମାଡି ବସି ଚାଷବାସ କରୁଥିଲେ ଜଣେ ମହିଳା । ତା’ ଉପରେ ପଡ଼ିଲା ତାଙ୍କ ଦେଢଶୁର ଓ ଦିଅରଙ୍କ ନଜର । ଉକ୍ତ ଜାଗାକୁ କବଜାକୁ ନେଇ ତିଆରି କରୁଥିଲେ ଘର । ପୂର୍ବରୁ ଜବରଦଖଲ କରିଥିବା ମହିଳା ବିରୋଧ କରିବାରୁ କଲେ ମରଣାନ୍ତକ ଆକ୍ରମଣ । ଏମିତି ଘଟଣା ଘଟିଛି ଗଞ୍ଜାମ ଜିଲ୍ଲା ସୋରଡ଼ା ଥାନା ପୁଷ୍ପନଗର ଗାଁରେ ।
ମହିଳାଙ୍କ ସ୍ବାସ୍ଥ୍ୟାବସ୍ଥା ଗୁରୁତର ଅଛି । ତାଙ୍କୁ ପ୍ରଥମେ ଆସିକା ମେଡିକାଲରେ ଭର୍ତ୍ତି କରାଯାଇଥିଲା । ସେଠାରେ ତାଙ୍କ ସ୍ବାସ୍ଥ୍ୟାବସ୍ଥା ଗୁରୁତର ହେବାରୁ ବ୍ରହ୍ମପୁର ମେଡିକାଲକୁ ସ୍ଥାନାନ୍ତର କରାଯାଇଛି ।
ଅଭିଯୋଗ ଅନୁସାରେ, ପୁଷ୍ପନଗର ଗାଁର ୩୨ ବର୍ଷୀୟା ମହିଳା ସୁନି ପାଢ଼ୀ ଏକ ସରକାରୀ ଜମିରେ ଚାଷ ବାସ କରୁଥିଲେ । ସେହି ଜାଗାରେ ମହିଳାଙ୍କ ଦେଢଶୁର ଓ ଦିଅର ଘର କରିବାରୁ ମହିଳା ବିରୋଧ କରିଥିଲେ । ଘଟଣାକୁ ନେଇ ଉଭୟଙ୍କ ମଧ୍ୟରେ ପାଟିତୁଣ୍ଡ ସହ ହାତାହାତି ହୋଇଥିଲେ । ମହିଳାଙ୍କ ଅଭିଯୋଗ ଅନୁସାରେ ତାଙ୍କ ଦିଅର ଓ ଦେଢ଼ଶୁର ସମେତ ୭ ଜଣ ମିଶି ତାଙ୍କ ଘରେ ପଶି କୁରାଢ଼ୀ, ଠେଙ୍ଗାବାଡି ଓ କୋଦାଳ ସାହାଯ୍ୟରେ ତାଙ୍କୁ ଆକ୍ରମଣ କରିଥିଲେ । ଏଥିରେ ମହିଳା ଜଣକ ଗୁରୁତର ଆହତ ହୋଇଥିଲେ ।
