ନନ୍ଦିଘୋଷ ବ୍ୟୁରୋ: ପୁରୀ କଣାସ ସ୍ଥିତି ନେଇ ଉଦବେଗ ପ୍ରକାଶ କରିଛନ୍ତି ବିଜେଡି ସୁପ୍ରିମୋ ନବୀନ ପଟ୍ଟନାୟକ। ସୋସିଆଲ ମିଡିଆ ଏକ୍ସ ରେ ସେ ଲେଖିଛନ୍ତି, ପୁରୀ ଜିଲ୍ଲା କଣାସ ବ୍ଲକରେ ହଇଜା ଭୟାନକ ପରିସ୍ଥିତି ସୃଷ୍ଟି କରିଛି। ଝାଡ଼ାବାନ୍ତିରେ ଲୋକଙ୍କ ପ୍ରାଣହାନୀ ହେବା ସହ ଧନଜୀବନ ସୁରକ୍ଷା ପ୍ରତି ବିପଦ ଉପୁଜୁଛି। ରାଜ୍ୟ ସରକାର ତୁରନ୍ତ ଏଥିପ୍ରତି ଦୃଷ୍ଟି ଦିଅନ୍ତୁ ବୋଲି ନବୀନ ପଟ୍ଟନାୟକ ଦାବି କରିଛନ୍ତି। ସେ କହିଛନ୍ତି, ସ୍ୱତନ୍ତ୍ର ଡାକ୍ତରୀ ଦଳ ପଠାଇ ଏହାର ମୁକାବିଲା ପାଇଁ ପଦକ୍ଷେପ ଗ୍ରହଣ କରନ୍ତୁ। ଘରେ ଘରେ ସଚେତନତା କାର୍ଯ୍ୟକ୍ରମକୁ ବ୍ୟାପକ କରାଯାଇ ଲୋକଙ୍କୁ ସଜାଗ କରାଯାଉ। ପ୍ରତିଟି ଜୀବନ ମୂଲ୍ୟବାନ। ଏହାର ସୁରକ୍ଷା ପାଇଁ ସମସ୍ତେ ଆଗେଇ ଆସନ୍ତୁ। ପ୍ରଶାସନକୁ ସହଯୋଗ କରନ୍ତୁ ବୋଲି କହିଛନ୍ତି ନବୀନ ପଟ୍ଟନାୟକ ।
ଭିତରକନିକା ବନ୍ଦ ସମୟରେ ବୁଲିଲେ VIP ପର୍ଯ୍ୟଟକ
ନନ୍ଦିଘୋଷ ବ୍ୟୁରୋ: ଭିତରକନିକା ବନ୍ଦ ସମୟରେ ବୁଲିଲେ VIP ପର୍ଯ୍ୟଟକ। କୁମ୍ଭୀର ଗଣନା ଯୋଗୁ ସାଧାରଣ ପର୍ଯ୍ୟଟକଙ୍କ ପାଇଁ ଭିତରକନିକା ୯ ଦିନ ବନ୍ଦ ଥିବାବେଳେ କିପରି VIP ପର୍ଯ୍ୟଟକ ବୁଲୁଛନ୍ତି ଭିତରକନିକା ତାହା ପ୍ରଶ୍ନବାଚୀ ସୃଷ୍ଟି କରିଛି। ସାଧାରଣ ପର୍ଯ୍ୟଟକ ମାନଙ୍କ ପାଇଁ ଭିତରକନିକା ଗେଟ ବନ୍ଦ ଥିବା ବେଳେ ଇକୋ ରିଟ୍ରିଟ ପର୍ଯ୍ୟଟକ ମାନଙ୍କ ପାଇଁ କାହିଁକି ଓ କିପରି ପରିସ୍ଥିତି ରେ ଭିତରକନିକା କୁ ଖୋଲି ଦିଆଗଲା ସେନେଇ ପ୍ରଶ୍ନ ଉଠିଛି। କୁମ୍ଭୀର ଗଣନା ସମୟରେ ଯନ୍ତ୍ର ଚାଳିତ ବୋଟ ଚାଲିଲେ କୁମ୍ଭୀର ମାନେ ଭୟଭୀତ ହୋଇ ପାଣି ଭିତରକୁ ଚାଲି ଯାଆନ୍ତି ଏହାକୁ ଦୃଷ୍ଟିରେ ରଖି ଭିତରକନିକା ନଦୀ ନାଳରେ ବୋଟ୍ ଚଳାଚଳ ସଂପୂର୍ଣ୍ଣ ବନ୍ଦ କରାଯାଇଥାଏ। ଇକୋ ରିଟ୍ରିଟର ପର୍ଯ୍ୟଟକ ମାନଙ୍କୁ ବନବିଭାଗ ନିୟମକୁ ଉଲଂଘନ କରି କିପରି ଯନ୍ତ୍ର ଚାଳିତ ବୋଟରେ ପର୍ଯ୍ୟଟକଙ୍କୁ ବୁଲାଉଛନ୍ତି ତାହା ପରିବେଶବିତ୍ ମାନଙ୍କ ମଧ୍ୟରେ ତିବ୍ର ପ୍ରତିକ୍ରିୟା ସୃଷ୍ଟି କରିଛି ।
ସଂଜୟ ରାୟକୁ ମୃତ୍ୟୁ ଦଣ୍ଡାଦେଶ ଲାଗି କଲିକତା ହାଇକୋର୍ଟରେ ପଶ୍ଚିମବଙ୍ଗ ସରକାରଙ୍କ ଆବେଦନ
ନନ୍ଦିଘୋଷ ବ୍ୟୁରୋ: କୋଲକାତା ଦୁଷ୍କର୍ମ ଓ ହତ୍ୟା ମାମଲାରେ ଦୋଷୀ ସାବ୍ୟସ୍ତ ସଂଜୟ ରାୟକୁ ଆଜୀବନ କାରାଦଣ୍ଡାଦେଶ ଘଟଣା। ସଞ୍ଜୟକୁ ମୃତ୍ଯୁ ଦଣ୍ଡାଦେଶ ଲାଗି କଲିକତା ହାଇକୋର୍ଟରେ ଆବେଦନ କରିଛନ୍ତି ପଶ୍ଚିମବଙ୍ଗ ସରକାର। ଗତକାଲି ସଞ୍ଜୟକୁ ସିଆଲଦା ସେସନ୍ସ କୋର୍ଟ ଆଜୀବନ କାରାଦଣ୍ଡରେ ଦଣ୍ଡିତ କରିବା ସହ ୫୦ ହଜାର ଟଙ୍କାର ଜରିମାନା ଧାର୍ଯ୍ୟ କରିଥଇଲେ। ଗତକାଲିର ରାୟ ପ୍ରକାଶ ପରେ ପଶ୍ଚିମବଙ୍ଗ ମୁଖ୍ଯମନ୍ତ୍ରୀ ମମତା ବାନାର୍ଜୀ କହିଥିଲେ- ସଞ୍ଜୟକୁ ମୃତ୍ଯୁଦଣ୍ଡ ଦେବା ଲାଗି ତାଙ୍କ ସରକାର ଆବେଦନ କରିବେ। ପୀଡ଼ିତାଙ୍କ ପରିବାରକୁ ୧୭ ଲକ୍ଷ ଟଙ୍କା କ୍ଷତିପୂରଣ ଦେବାକୁ ମଧ୍ୟ କୋର୍ଟ ନିର୍ଦ୍ଦେଶ ଦେଇଥିଲେ। ୨୦୨୪ ଅଗଷ୍ଟ ୯ ତାରିଖରେ କୋଲକାତା ଆରଜି କର ମେଡିକାଲ କଲେଜର ଜୁନିଅର ଡାକ୍ତରଙ୍କୁ ଦୁଷ୍କର୍ମ ପରେ ହତ୍ୟା କରାଯାଇଥିଲା। ଏହି ଘଟଣାରେ ସିଭିକ ଭଲ୍ୟୁଣ୍ଟର ସଂଜୟ ରାୟକୁ ଗିରଫ କରାଯାଇଥିଲା। ତଥାପି ଏହାକୁ ନେଇ ଜୋରଦାର ଆନ୍ଦୋଳନ କରିଥିଲେ। ଡାକ୍ତରଙ୍କ ସହିତ ସାଧାରଣ ଲୋକେ ବି ଆନ୍ଦୋଳନରେ ସାମିଲ ହୋଇଥିଲେ। ଏହା ପରେ କୋଲକାତା ହାଇକୋର୍ଟ ସିବିଆଇ ତଦନ୍ତ ପାଇଁ ନିର୍ଦ୍ଦେଶ ଦେଇଥିଲେ। ସିବିଆଇ ତଦନ୍ତ କରି ଚାର୍ଜସିଟ୍ ଦାଖଲ କରିଥିଲା ଯେ, କେବଳ ସଂଜୟ ରାୟ ହିଁ ଏହି ଜଘନ୍ୟକାଣ୍ଡରେ ଜଡ଼ିତ। ଆଉ କେହି ସଂପୃକ୍ତ ନୁହନ୍ତି। ୫୭ ଦିନର ବିଚାର ପରେ ଗତ ଶନିବାର ସଂଜୟ ରାୟକୁ ସିଆଲଦା କୋର୍ଟ ଦୋଷୀ ସାବ୍ୟସ୍ତ କରିଥିଲେ। ଗତକାଲି ତାକୁ ଆଜୀବନ ଜେଲ୍ ଦଣ୍ଡାଦେଶ ଦିଆଯାଇଥିଲା।
ହ୍ୱାଇଟ ହାଉସ୍ ପ୍ରବେଶ ସହିତ କେଉଁ ଦୁଇ ଦେଶକୁ ଟ୍ରମ୍ପ ଦେଲେ ଗାଳି ?
ନନ୍ଦିଘୋଷ ବ୍ୟୁରୋ: ସୋମବାର ଆମେରିକାର ରାଷ୍ଟ୍ରପତି ଭାବେ ଶପଥ ଗ୍ରହଣ କରିଛନ୍ତି ଡୋଲାନ୍ଡ ଟ୍ରମ୍ପ । ତେବେ ହାଇଟ୍ ହାଉସରେ ପ୍ରବେଶ କରିା ସହ ଦୁଇ ଦେଶ ସମ୍ପର୍କରେ କିଛି ଏଭଳି କଥା କହିଛନ୍ତି ଯାହା ଦ୍ବାରା ଏବେ ଚର୍ଚ୍ଚା ଜୋର ଧରିଛି । କାନାଡ଼ା ଏବଂ ମେକ୍ସିକୋକୁ ନେଇ ଏକ ଗୁରୁତ୍ବପୂର୍ଣ୍ଣ କଥା କହିଛନ୍ତି ଟ୍ରମ୍ପ । ଏହାସହ ଟ୍ରମ୍ପ ଶପଥ ନେବା ପରେ ପରେ କହିଛନ୍ତି କି, ଆମେରିକାର ଅବନତିର ଯୁବ ଶେଷ, ଏଇଠୁ ଆମେରିକାର ବିକାଶର କାହାଣୀ ଆରମ୍ଭ । ଆମେରିକାକୁ ଆହୁରି ବିକଶିତ ଏବଂ ଧନୀ କରିବାକୁ ଚାହୁଁଛୁ । କାନାଡ଼ା ଏବଂ ମେକ୍ସିକୋ ଉପରେ ୨୫ ପ୍ରତିଶତ ଟ୍ୟାକ୍ସ ଲଗାଇବାକୁ କହିଛନ୍ତି । ଯାହାଦ୍ବାରା ବ୍ୟବସାୟ କ୍ଷେତ୍ରରେ ଅଧିକ ଲାଭ ହେବ । ତେବେ ଏହା ଫେବୃଆରୀ ୧୦ ପରେ କାର୍ଯ୍ୟକାରୀ ହେବ ।
ସେପଟେ ଟ୍ରମ୍ପ ଯଦି ଏହା ଆରମ୍ଭ କରନ୍ତି ତାହେଲେ ଦୁଇ ଦେଶ ମଧ୍ୟ ବାଣିଜ୍ୟ ଯୁଦ୍ଧ ଆରମ୍ଭ ହେବ । କାନାଡ଼ା ଏବଂ ମେକ୍ସିକୋ ଯଦି ସମାନ ପନ୍ଥା ଆପଣାନ୍ତି ତାହେଲେ ବାକି ଦେଶ ମାନଙ୍କ ଆଭିମୁଖ୍ୟ କଣ ହେବ ତାକୁ ନେଇ ମଧ୍ୟ ଚର୍ଚ୍ଚା ଆରମ୍ଭ ହୋଇଛି । ସେପଟେ ସୋମବାର ଟ୍ରମ୍ପ ଅନେକ କାର୍ଯ୍ୟ ନିର୍ବାହୀ ନିର୍ଦ୍ଦେଶରେ ଦସ୍ତଖତ କରି ସରକାରୀ ଏଜେନ୍ସି ଗୁଡ଼ିକୁ ଆମେରିକା ଭାଷାର ସ୍ବାଧିନତା ଉଲଙ୍ଘନ ନକରିବାକୁ ନିର୍ଦ୍ଦେଶ ଦେଇଛନ୍ତି ।
ଖାଲି ପଦବୀ ସମ୍ପର୍କରେ ସୂଚନା ଦେବାକୁ ବାଧ୍ୟ ଘରୋଇ କମ୍ପାନୀ, ନଦେଲେ ଏତିକି ଦେବାକୁ ହେବ ଜରିମାନା
ନନ୍ଦିଘୋଷ ବ୍ୟୁରୋ: ନିଯୁକ୍ତି କ୍ଷେତ୍ରରେ ବଡ଼ ପଦକ୍ଷେପ ନେଉଛନ୍ତି ସରକାର । ଖାଲି ଥିବା ପଦବୀ ସମ୍ପର୍କରେ ଘରୋଇ କମ୍ପାନୀମାନେ ସୂଚନା ଦେବାକୁ ବାଧ୍ୟତାମୂଳକ । ନିଯୁକ୍ତି ଟେତ୍ରରେ ପରିବର୍ତ୍ତନ ଆଣିବା ପାଇଁ ଏଭଳି ପଦକ୍ଷେପ ନିଆଯାଉଛି । ଆକ୍ଟ ୧୯୫୯ରେ ନୂଆ ଯୋଜନା ଆଣିବାକୁ ଯାଉଛନ୍ତି । ମହାରାଷ୍ଟ୍ର ସରକାର ନିଯୁକ୍ତି କ୍ଷେତ୍ରରେ ଉନ୍ନତି ଆଣିବା ପାଇଁ ନୂଆ ଯୋଜନା କରିଥିବା ଜଣାପଡ଼ିଛି । ତେବେ ଖାଲି ପଦବୀ ସମ୍ପର୍କରେ ସୂଚନା ଦେବାକୁ ବାଧ୍ୟ ଘରୋଇ କମ୍ପାନୀ । ଯଦି କୌଣସି କମ୍ପାନୀ ସୂଚନା ନଦିଅନ୍ତି ତାହେଲେ ମୋଟା ଅଙ୍କର ଜରିମାନା ଦେବେ । ପୂର୍ବରୁ ଜରିମାନା ୧୦୦ ଟଙ୍କା ରହିଥିଲା । ମାତ୍ର ଏବେ ନିୟମ ନମାନିଲେ ୫୦ ହଜାର ଟଙ୍କା ଦେବାକୁ ନିୟମ କରାଯାଇଛି ।
ମହାରାଷ୍ଟ୍ରର ଦକ୍ଷତା ବିକାଶ ମନ୍ତ୍ରୀ ମଙ୍ଗଲ ପ୍ରଭାତ କହିଛନ୍ତି କି, ଆମର ରୋଜଗାର କାର୍ଯ୍ୟାଳୟ ରହିଛି କିନ୍ତୁ ଏମାନେ ନିଷ୍କ୍ରିୟ ହୋଇ ଯାଇଛନ୍ତି । ଆଇନରେ ପରିବର୍ତ୍ତନ ସହ ଏମାନଙ୍କ ସକ୍ରିୟ କରିବା ପାଇଁ ଏଭଳି ଯୋଜନା କରୁଛୁ । ଏଣୁ ଘରୋଇ କମ୍ପାନୀରେ ରହିଥିବା ଖାଲି ପଦବୀ ସମ୍ପର୍କରେ ସେମାନେ ସରକାରଙ୍କୁ ଜଣାଇବେ । ଯାହାଦ୍ବାରା ବେକାରୀ ସମସ୍ୟା ଦୂର ହେବ । ଏହାସହ ଯୁବପିଢ଼ୀମାନେ ସହଜରେ ଚାକିରୀ ପାଇ ପାରିବେ ବୋଲି କୁହାଯାଉଛି । ଗୋଟିଏ ପଟେ ଶିଳ୍ପ ପ୍ରତିଭା ଖୋଜୁଛି ଏବଂ ଅନ୍ୟ ପଟେ ବେକାରୀ ବୃଦ୍ଧି ପାଉଛି। ଏହା ଏକ ଭଲ ପଦକ୍ଷେପ | ପ୍ଲେସମେଣ୍ଟ ଏଜେନ୍ସିଗୁଡ଼ିକୁ ନିୟନ୍ତ୍ରଣ କରିବା ପାଇଁ କେନ୍ଦ୍ର ଏକ ଘରୋଇ ପ୍ଲେସମେଣ୍ଟ ଆକ୍ଟ ମଧ୍ୟ ପ୍ରସ୍ତୁତ କରୁଛି। ମିଜୋରାମ, ଛତିଶଗଡ ଏବଂ ଆସାମ ଭଳି ରାଜ୍ୟ ଏହି ବିଲ୍ ପାଇଁ ଇନପୁଟ୍ ଦେଇସାରିଛନ୍ତି। ମହାରାଷ୍ଟ୍ର ମଧ୍ୟ ଏଥିପାଇଁ ଏକ ଦାଖଲ କରିବାକୁ ଯୋଜନା କରୁଛି।
କାମ ଦେବ କି ଦାଦାଙ୍କ ଭବିଷ୍ୟବାଣୀ , ସତ ହେଲେ ଭାରତ..
ନନ୍ଦିଘୋଷ ବ୍ୟୁରୋ: ଚାମ୍ପିୟନ୍ସ ଟ୍ରଫିକୁ ଆଉ ମାତ୍ର ଅଳ୍ପ କିଛି ଦିନ ବାକି ରହିଛି । ଆଇସିସିର ଏହି ଟୁର୍ଣ୍ଣାମେଣ୍ଟ ଜିତିବା ଲାଗି ସମସ୍ତ ଦେଶ ନିଜର ରଣକୌଶଳ ପ୍ରସ୍ତୁତ କରିଛନ୍ତି । ତେବେ ଭାରତୀୟ ଦଳ ନିକଟରେ ଅଷ୍ଟ୍ରେଲିଆ ବିପକ୍ଷରେ ଟେଷ୍ଟରେ ଯେଭଳି ନୈରାଶ୍ୟ ଜନକ ପ୍ରଦର୍ଶନ କରିଥିଲା ତାହା ବେଶ ଚିନ୍ତାର ବିଷୟ ପାଲଟିଥିଲା । ଏଣୁ ଚାମ୍ପିୟନ୍ସ ଟ୍ରଫିର ଦଳର ପ୍ରଦର୍ଶନକୁ ନେଇ କ୍ରୀଡ଼ାପ୍ରେମୀଙ୍କ ମଧ୍ୟରେ ବିଭିନ୍ନ ଚର୍ଚ୍ଚା ହେଉଛି । କିନ୍ତୁ ଟିମ ଇଣ୍ଡିଆର ପୂର୍ବତନ ଅଧିନାୟକ ସୌରଭ ଗାଙ୍ଗୁଲି କହିଛନ୍ତି କି, ରୋହିତ ଶର୍ମା ଚାମ୍ପିୟନ୍ସ ଟ୍ରଫିରେ ଭଲ ପ୍ରଦର୍ଶନ କରିବେ । ଯଦି ଏହା ହୁଏ ତାହେଲେ ଭାରତ ପାଇଁ ବେଶ ଲାଭ ଦାୟକ ହେବ ।
ଦାଦା କହିଛନ୍ତି କି, ଧଳା ବଲରେ ଅର୍ଥାତ ଦିନିକିଆରେ ହିଟମ୍ୟାନଙ୍କ ରେକର୍ଡ ଭଲ ରହିଛି । ଏପରିକି ଦିନିକିଆରେ ସର୍ବାଧିକ ବଡ଼ ସ୍କୋର (୨୭୪)ର ରେକର୍ଡ ରହିଛି । ଯଦି ରୋହିତଙ୍କ ହାରାହାରି ସ୍କୋର ଉପରେ ନଜର ପକାଇବା ତାହେଲେ ସେ ୪୯.୧୬ ହାରରେ ଖେଳିଛନ୍ତି । ଯେଉଁଥିରୁ ତାଙ୍କର ରେକର୍ଡ ବେଶ ଭଲଭାବେ ସ୍ପଷ୍ଠ । ତେବେ ଚାମ୍ପିୟନ୍ସ ଟ୍ରଫିରେ ରୋହିତଙ୍କ ରେକର୍ଡ ମଧ୍ୟ ଭଲ ରହିଛି । ପାକିସ୍ତାନ ଏହି ଟୁର୍ଣ୍ଣାମେଣ୍ଟକୁ ଆୟୋଜନ କରୁଥିବାବେଳେ ଡାଇବ୍ରିଡ ମଡେଲରେ ଖେଳାଯାଉଛି । ଭାରତ ତାର ସମସ୍ତ ମ୍ୟାଚରେ ୟୁଏଇରେ ଖେଳିବ ।
ଶ୍ବଶୁରଙ୍କୁ ଛୁରାମାଡ଼, ବୋହୂ ହେଉଛନ୍ତି ଟ୍ରୋଲ!
ନନ୍ଦିଘୋଷ ବ୍ୟୁରୋ : ବଲିଉଡ ଅଭିନେତା ସୈଫ ଅଲ୍ଲୀ ଖାନଙ୍କୁ ଛୁରାମାଡ଼ ହୋଇଥିବାବେଳେଏବେ ସେ ମେଡିକାଲରେ ଚିକିତ୍ସିତ ହେଉଛନ୍ତି । ମଙ୍ଗଳବାର ଘଟଣାର ରିକ୍ରିଏସନ ହୋଇଛି । ଏବେ ସୈଫ ମେଡିକାଲରେ ରହିଥିବାବେଳେ ଖୁବଶୀଘ୍ର ଡିସଚାର୍ଜ ହେବେ ବୋଲି କୁହାଯାଇଛି । ସୈଫଙ୍କ ସହ ପୁଅ ଇବ୍ରାହିମ ରହିଛନ୍ତି । ବାପାଙ୍କ ପାଖରେ ରହିଥିବାରୁ ନିଜର ଫିଲ୍ମ ସୁଟିଂକୁ ମଧ୍ୟ ବନ୍ଦ ରଖିଛନ୍ତି ଇବ୍ରାହିମ୍ । ତେବେ ଇବ୍ରାହିମଙ୍କ ସହ ଯୋଡ଼ି ହୋଇଥିବା ପଲକ ତିଓ୍ବାରୀଙ୍କୁ ଏବେ ଟ୍ରୋଲ କରାଯାଉଛି । ଇନଷ୍ଟାଗ୍ରାମରେ ବେଶ ସକ୍ରିୟ ରହୁଥିବା ପଲକ କିଛି ପୋଷ୍ଟ କରିନଥିବାବେଳେ ଏହାକୁ ନେଇ ୟୁଜର୍ସମାନେ ଟ୍ରୋଲ କରୁଛନ୍ତି । ତେବେ କହି ରଖୁଛୁ କି, ଶ୍ବେତା ତିଓ୍ବାରୀଙ୍କ ଝିଅ ହେଉଛନ୍ତି ପଲକ । ସେ କିସି କି ଭାଇ କିସି କି ଜାନ ଜରିଆରେ ବଲିଉଡରେ ଡେବ୍ୟୁ କରିସାରିଛନ୍ତି । ସେ ଇବ୍ରାହିମଙ୍କୁ ଡେଟ୍ କରୁଥିବା ବିଭିନ୍ନ ସମୟରେ ଗଣମାଧ୍ୟମରେ ଚର୍ଚ୍ଚାର ବିଷୟ ପାଲଟିଛି ।
ରାଜ୍ୟରେ କମିବ ଶୀତର ପ୍ରକୋପ
ନନ୍ଦିଘୋଷ ବ୍ୟୁରୋ: କମିବ ଶୀତ। ବଢିବ ତାପମାତ୍ରା । ଉଭୟ ଦିନ ଏବଂ ରାତିର ତାପମାତ୍ରା ବଢିବ ବୋଲି ପୂର୍ବାନୁମାନ କରିଛି ଆଞ୍ଚଳିକ ପାଣିପାଗ କେନ୍ଦ୍ର। ଆସନ୍ତା ଗୁରୁବାର ଠାରୁ ଉପକୂଳ ଓଡ଼ିଶା ସମେତ ଦକ୍ଷିଣ ଏବଂ ଆଭ୍ୟନ୍ତରୀଣ ଓଡ଼ିଶାରେ ତାପମାତ୍ରା ବଢିବ। ୨ ରୁ ୪ ଡିଗ୍ରୀ ପର୍ଯ୍ୟନ୍ତ ତାପମାତ୍ରା ବଢିବ ବୋଲି ଆକଳନ କରାଯାଇଛି। ଗତ ଦୁଇ ଦିନ ହେବ ରାଜ୍ୟରେ ଦିନର ତାପମାତ୍ରା ବୃଦ୍ଧି ହୋଇଥିବା ବେଳେ ଆସନ୍ତା ଦୁଇ ଦିନ ମଧ୍ୟରେ ରାତି ତାପମାତ୍ରା ବଢିବ। ଗତ ୨୪ ଘଣ୍ଟାରେ ନୂଆପଡା ଜିଲ୍ଲାରେ ସର୍ବାଧିକ ତାପମାତ୍ରା ୩୨.୪ ଡିଗ୍ରୀ ରେକର୍ଡ କରାଯାଇଛି । ତାପମାତ୍ରା ବୃଦ୍ଧି ସହ ଆସନ୍ତା ୨୩ ତାରିଖ ପର୍ଯ୍ୟନ୍ତ ରାଜ୍ୟରେ ଘନ କୁହୁଡି ନେଇ ସତର୍କତା ଜାରି କରିଛି ପାଣିପାଗ କେନ୍ଦ୍ର। ବିଶେଷ କରି ଉପକୂଳ ଓଡ଼ିଶାର ସବୁ ଜିଲ୍ଲାରେ ଦୃଶ୍ୟମାନ କ୍ଷମତା କମ୍ ରହିବ ।
୨୨ ତାରିଖ ପର୍ଯ୍ୟନ୍ତ ଘନ କୁହୁଡି ନେଇ କେନ୍ଦ୍ରାପଡା, ଜଗତସିଂହପୁର, କଟକ ଏବଂ କନ୍ଧମାଳକୁ ୟେଲୋ ଆଲର୍ଟ ଜାରି କରାଯାଇଛି। ସେହିଭଳି ୨୩ ତାରିଖରେ ବାଲେଶ୍ବର, ଭଦ୍ରକ, ଯାଜପୁର, କେନ୍ଦ୍ରାପଡା, ଜଗତସିଂହପୁର, କଟକ, ପୁରୀ, ଖୋର୍ଦ୍ଧା, ନୟାଗଡ, ଗଞ୍ଜାମ ଏବଂ ଗଜପତି ଜିଲ୍ଲାରେ ଘନ କୁହୁଡି ପାଇଁ ୟେଲୋ ଆଲର୍ଟ ଜାରି କରାଯାଇଛି। ଏହି ସବୁ ଜିଲ୍ଲାରେ ୫୦ ମିଟର ତଳକୁ ଖସି ଆସିବ ଦୃଶ୍ୟମାନ କ୍ଷମତା। କିଛି ସ୍ଥାନରେ ଜିରୋ ଭିଜିବିଲିଟି ଅନୁଭୁତ ହେବା ନେଇ ସତର୍କତା ଜାରି କରାଯାଇଛି। ଏହାସହ କନ୍ଧମାଳ, କଳାହାଣ୍ଡି, କୋରାପୁଟ, କେନ୍ଦୁଝର, ମୟୁରଭଞ୍ଜ, ଅନୁଗୁଳ ଏବଂ ଢେଙ୍କାନାଳରେ ହାଲୁକାରୁ ମଧ୍ୟମ ଧରଣର କୁହୁଡି ଅନୁଭୁତ ହେବ। ଘନ କୁହୁଡି ସମ୍ଭାବନା ଥିବାରୁ ଘାଟି ରାସ୍ତା ଏବଂ ଦୁର୍ଘଟଣା ପ୍ରବଳ ଅଞ୍ଚଳରେ ଗାଡି ଚାଳନା ସମୟରେ ସତର୍କତା ଅବଲମ୍ବନ କରିବାକୁ ପରାମର୍ଶ ଦିଆଯାଇଛି। ତେବେ ଆସନ୍ତା ଦୁଇ ଦିନ ପର୍ଯ୍ୟନ୍ତ ରାଜ୍ୟର ଆଭ୍ୟନ୍ତରୀଣ ଜିଲ୍ଲା ଗୁଡିକରେ ହାଲୁକା ଶୀତ ଅନୁଭୁତ ହେବ। ବିଶେଷ କରି କନ୍ଧମାଳ, କଳାହାଣ୍ଡି, ସୁନ୍ଦରଗଡ, ଝାରସୁଗୁଡା, ସୋନପୁର, କୋରାପୁଟ, ନବରଙ୍ଗପୁରରେ ହାଲୁକା ଶୀତ ଅନୁଭୁତ ହେବ।
ଅର୍ପଣ କରିବେ ୫୧ ଲିଟର କ୍ଷୀର, କୁମ୍ଭମେଳାକୁ ଯିବେ ସୀମାଙ୍କ ଭାଇ
ନନ୍ଦିଘୋଷ ବ୍ୟୁରୋ: ପ୍ରୟାଗରାଜରେ ମହାଆଡ଼ମ୍ବରେ ଚାଲିଛି କୁମ୍ଭମେଳା । କୋଟି କୋଟି ଭକ୍ତଙ୍କ ସମାଗମ ହେଉଛି । ଏଠାରେ ଚାଲିଥିବା କୁମ୍ଭମେଳାକୁ ଯିବେ ପାକିସ୍ତାନରୁ ଆସି ଭାରତର ବୋହୂ ହୋଇଥିବା ମହିଳା ସୀମା ହାଇଦରଙ୍କ ଭାଇ । ଯିଏ କି ୫୧ ଲିଟରର କ୍ଷୀର ଚଢ଼ାଇବେ । ତେବେ କହି ରଖୁଛୁ କି, ଏନେଇ ମାନସିକ କରିଥିଲେ ସୀମା । କିନ୍ତୁ ଏବେ ସେ ଗର୍ଭବତୀ ଥିବା କାରଣରୁ ପ୍ରୟାଗରାଜ ଯାଇ ପାରୁନାହାନ୍ତି । ଏପରିକି ସଚିନ ତାଙ୍କ ଯତ୍ନ ନେଉଥିବାରୁ ଉଭୟ ଗ୍ରେଟର ନୋଏଡ଼ାରେ ରହିଛନ୍ତି । କିନ୍ତୁ ସେମାନଙ୍କ ପାଇଁ ଏହି କ୍ଷୀର ନେଇ ଯିବେ ସୀମାଙ୍କ ଭାଇ । ତେବେ ସୀମା ଭାଇଭାବେ ମାନିଥିବା ଆଇନଜୀବୀ ଏପି ସିଂ ଯିବେ । ମଙ୍ଗଳବାର ଏହୀ କ୍ଷୀର ଅର୍ପଣ କରାଯିବ ବୋଲି କୁହାଯାଇଛି ।
ତେବେ କହି ରଖୁଛୁ କି, ୨୦୨୩ ମହିହାରେ ନେପାଳ ଦେଇ ପାକିସ୍ତାନରୁ ଭାରତକୁ ଆସିଥିଲେ ସୀମା ହାଇଦର । ପବଜୀ ଖେଳରୁ ସେମାନଙ୍କ ପ୍ରେମ ହୋଇଥିବାବେଳେ ସୀମା ଡେଇଁ ଭାରତକୁ ପଳାଇ ଆସିଛନ୍ତି ସୀମା । ସୀମା ଡେଇଁ ଆସିଥିବା ସୀମା ଏବେ ନିଜର ଧର୍ମ ପରିବର୍ତ୍ତନ କରିଥିବାବେଳେ ସ୍ବାମୀଙ୍କ ସହ ବେଶ ଖୁସିରେ ରହିଛନ୍ତି ।
ଏ ସରକାରର ମାନିବକତା ନାହିଁ : ଉମା ସାମନ୍ତରାୟ
ନନ୍ଦିଘୋଷ ବ୍ୟୁରୋ: କଣାସରେ ଝାଡ଼ାବାନ୍ତିରେ ୪ ଜଣଙ୍କ ଜୀବନ ଯାଇଥିବା ଘଟଣାରେ ପ୍ରେସମିଟ କରି ବର୍ଷିଛି ବିଜେଡି । ସରକାରଙ୍କ ନିଷ୍କ୍ରିୟତାକୁ ନେଇ ବିଜେଡି ପ୍ରେସମିଟରେ ଉମା ସାମନ୍ତରାୟ ଟାର୍ଗେଟ କରିଛନ୍ତି । ଚାରି ଜଣଙ୍କ ମୃତ୍ୟୁ ଘଟିବା ପରେ ବି ପ୍ରଶାସନ ନୀରବ । ଗାଁରେ ରୋଗୀଙ୍କ ଲାଗି ଆମ୍ବୁଲାନ୍ସ ପହଞ୍ଚି ପାରୁନାହିଁ । ସ୍ବାସ୍ଥ୍ଯମନ୍ତ୍ରୀଙ୍କ ମାନବିକତା ଉଦୟ ହେଉନାହିଁ । ୧୦ ଦିନ ପରେ ବି ପ୍ରଶାସନ ପାଲଟିଛି ସ୍ଥାଣୁ ହରଚଣ୍ଡୀ ପିଏଚସିରେ ଚାବି ପଡି ରହିଛି । ସରକାର ଆସିବା ଦିନୁ ଅନେକ ମେଡିକାଲରେ ଷ୍ଟାଫ ନାହାନ୍ତି କହି ସମାଲୋଚନା କରିଛନ୍ତି ଉମା ସାମନ୍ତରାୟ ।