ଶିମିଳିପାଳ ଅଭୟାରଣ୍ୟ ଭିତରେ ବେଆଇନ ଅଫିମ ଚାଷ ଉପରେ ପୋଲିସର ମିଳିତ ଚଢ଼ାଉ। ଯଶିପୁର ଥାନା ଗୋପୀନାଥପୁର ଗାଁରେ ଚାଲିଥିଲା ବେଆଇନ ଅଫିମ ଚାଷ । ବିଶେଷ ସୂତ୍ରରୁ ଖବର ପାଇ ଯଶିପୁର ପୋଲିସ, ବନବିଭାଗ ଓ ଅବକାରୀ ବିଭାଗ ପକ୍ଷରୁ ମିଳିତ ଚଢ଼ାଉ କରାଯାଇଥିଲା। ଏକ ଏକରରୁ ଉର୍ଦ୍ଧ ଜାଗାରେ ହୋଇଥିବା ଦେଢ଼ କୋଟିରୁ ଅଧିକ ଟଙ୍କାର ଅଫିମ ଗଛକୁ ନଷ୍ଟ କରାଯାଇଛି । ପୂର୍ବରୁ ମଧ୍ୟ ଏଭଳି ଅଫିମ ଚାଷ ନଷ୍ଟ କରିଛି ପ୍ରଶାସନ l ଘଟଣାରେ ଯଶିପୁର ଥାନାରେ NDPS ଆଇନ ଧାରା ୧୮ ଅନୁଯାୟୀ ୧୧ ଓ ୧୨ ଦୁଇଟି ମାମଲା ରୁଜୁ କରାଯାଇଛି । ଘଟଣାର ତଦନ୍ତ ଜାରି ରହିଛି ଓ ଅବୈଧ ଅଫିମ ଚାଷ ସହିତ ଜଡିତ ଲୋକଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ନିଆଯିବ ବୋଲି କରଞ୍ଜିଆ SDPO ସୂଚନା ଦେଇଛନ୍ତି।
ବ୍ୟବସାୟୀ ବଳରାମ ସାହାଣୀ ନିଖୋଜ ଘଟଣା: ଦ୍ୱିତୀୟ ଦିନରେ ଗାର୍ଲଫ୍ରେଣ୍ଡକୁ ମାରାଥନ ଜେରା
ବ୍ୟବସାୟୀ ବଳରାମ ସାହାଣୀ ନିଖୋଜ ଘଟଣା। ଦ୍ୱିତୀୟ ଦିନରେ ଗାର୍ଲଫ୍ରେଣ୍ଡକୁ ମାରାଥନ ଜେରା। ପୋଲିସ ହାତରେ ବଡ଼ ସୁରାଗ। ଶେଷ ଦିନ ରିମାଣ୍ଡରେ ପ୍ରେମିକା ଦେଇଛି ଚାଞ୍ଚଲ୍ୟକର ସୁରାଗ। ନିଶା କାରବାରକୁ ନେଇ ଘଟିଛି ଅଘଟଣ। ସାତ ବର୍ଷ ତଳର ପ୍ରେମ ପ୍ରତାରଣାରୁ ଅପହରଣର ସଙ୍ଗୀନ କାହାଣୀ । ୨୦୧୯ରେ ବ୍ୟବସାୟୀ ବଳରାମ ସାହାଣି ଅପହରଣ ମାମଲାରେ ସାଙ୍ଘାତିକ ଟୁଇଷ୍ଟ। ଅପହରଣ ପଛରେ ସମ୍ପୃକ୍ତ ଥିବା ଗାର୍ଲଫ୍ରେଣ୍ଡ ରଶ୍ମିତା ସ୍ବାଇଁଙ୍କୁ ରିମାଣ୍ଡରେ ନେଇ ଝାଳବୁହା ଜେରା କରୁଛି ପୋଲିସ। ରିମାଣ୍ଡରେ ନେଇ ସାତ ବର୍ଷ ତଳର ଲଭ ଷ୍ଟୋରୀରୁ ହେଟ ଷ୍ଟୋରି ସତ କାଢିବାକୁ ଚେଷ୍ଟା କରୁଛି ପୋଲିସ୍। ସେପଟେ ତଦନ୍ତ ବେଳେ ବଳରାମ ସାହାଣୀ ସମ୍ପର୍କରେ ଅନେକ ସୂଚନା ମିଳିଛି। ବଳରାମ ବିବାହିତ ଥିଲେ।
୨୦୧୯ ମସିହା ବେଳକୁ ତାଙ୍କ ପତ୍ନୀ ଗର୍ଭବତୀ ଥିଲେ। ବାପା ଭରତପୁର ଅଞ୍ଚଳରେ ମାଛ ବ୍ୟବସାୟ କରୁଥିଲେ। ମା’ ବାପାଙ୍କୁ ବ୍ୟବସାୟରେ ସାହାଯ୍ୟ କରୁଥିଲେ। ବଳରାମ କେନ୍ଦ୍ରାପଡାର ହୋଇଥିବା ବେଳେ ସପରିବାର ଚନ୍ଦକା SOG କ୍ୟାମ୍ପ ନିକଟରେ ଭଡାରେ ରହୁଥିଲେ। ଠିକ ଏହି ସମୟରେ ରଶ୍ମିତାଙ୍କ ସହ ତାଙ୍କର ପରିଚୟ ହେଲା। ରଶ୍ମିତା ଭୁବନେଶ୍ୱର ଡେ଼ଲ୍ଟା ଛକ ନିକଟରେ ରହୁଥିଲେ। ଗଞ୍ଜେଇ ବେପାର କରୁଥିଲେ। ଧୀରେ ଧୀରେ ରଶ୍ମିତାଙ୍କ ସହ ତାଙ୍କର ନିବିଡ଼ତା ବଢିଥିଲା। ଯେଉଁଥିପାଇଁ ବିଭିନ୍ନ ବାହାନା କରି ବଳରାମ ରଶ୍ମିତାଙ୍କ ପାଖରେ ରାତି ବିତାଉଥିଲେ। କିନ୍ତୁ ହଠାତ ବଳରାମ ନିଖୋଜ ହେବା ପରେ ପରିବାର ୨୦୧୯ରେ ଚନ୍ଦକା ଥାନାରେ ଏକ ମାମଲା ରୁଜୁ କରିଥିଲା। ୭ ବର୍ଷ ପରେ ଭୁବନେଶ୍ୱର ଡିସିପି ଜଗମୋହନ ମୀନାଙ୍କ ନିର୍ଦ୍ଦେଶ ରେ ପୁଣି ରିଓପନ ହୋଇଛି କେସ। ଘଟଣାରେ ବଳରାମଙ୍କ ଗାର୍ଲଫ୍ରେଣ୍ଡକୁ ପନ୍ଦର ଦିନ ତଳେ ଗଞ୍ଜାମରୁ ଗିରଫ କରିଥିଲା ପୋଲିସ। ଏବେବି ନିଖୋଜ ବ୍ୟବସାୟୀଙ୍କର କୌଣସି ପତ୍ତା ମିଳିନି।
କୁଚିଣ୍ଡା ବ୍ଲକ ବିଜେଡି ପକ୍ଷରୁ ବ୍ଲକ ସ୍ତରୀୟ ସାଙ୍ଗଠନିକ ସମୀକ୍ଷା ବୈଠକ
ସମ୍ବଲପୁର ଜିଲ୍ଲା କୁଚିଣ୍ଡା ବ୍ଲକ ବିଜେଡି ପକ୍ଷରୁ ବ୍ଲକ ସ୍ତରୀୟ ସାଙ୍ଗଠନିକ ସମୀକ୍ଷା ବୈଠକ ଅନୁଷ୍ଠିତ ହୋଇଛି । ବୈଠକରେ ଜିଲ୍ଲା ସଭାପତି ରୋହିତ ପୂଝାରୀଙ୍କୁ ସମ୍ବର୍ଦ୍ଧନା ଜ୍ଞାପନ କରାଯାଇଥିଲା। ଜିଲ୍ଲା ପରିଷଦ ସଭାପତି କୁମୁଦିନୀ ନାୟକ, କୁଚିଣ୍ଡା ବ୍ଲକ ଅଧ୍ୟକ୍ଷ ଭୁବନେଶ୍ୱର କିସାନ, ପୂର୍ବତନ ବିଧାୟକ ରାଜେନ୍ଦ୍ର ଛତ୍ରିଆ, ଜ଼ିଲ୍ଲା ପରିଷଦ ସଭ୍ୟ କୃଷ୍ଣଚନ୍ଦ୍ର ଟପ୍ପୋ, ଅଜିତ ମହାପାତ୍ର,ବିଜେଡିର ବରିଷ୍ଟ ପଦାଧିକାରୀ ଓ ଦଳୀୟକର୍ମୀ ଉପସ୍ଥିତ ଥିଲେ। ସରକାରଙ୍କ ବିଭିନ୍ନ କାର୍ଯ୍ୟକ୍ରମ ଯୋଗୁଁ ଅସୁବିଧା ପାଉଥିବା ଲୋକଙ୍କୁ ନେଇ ବିଜେଡି ସଂଗଠିତ ହେଵା ସହିତ ଆନ୍ଦୋଳନ ମାଧ୍ୟମରେ କର୍ମୀଙ୍କୁ ଏକଜୁଟ କରିବା ଉପରେ ଗୁରୁତ୍ବ ଦିଆଯାଇଥିଲା। ଆଗାମୀ ପଂଚାୟତ ନିର୍ବାଚନ ପାଇଁ ପ୍ରସ୍ତୁତ ରହିବା ନେଇ ଆଲୋଚନା ହୋଇଥିଲା। ନିର୍ବାଚନ ସମୟରେ ବିଜେପି ଦେଇଥିବା ମିଥ୍ୟା ପ୍ରତିଶୃତି ଲୋକଲୋଚନକୁ ଆଣିବା ସହ ଆଗାମୀ ଦିନରେ ଦଳୀୟକର୍ମୀଙ୍କୁ ଏକତ୍ରିତ କରି ବିଜେଡିକୁ ଆହୁରି ମଜଭୁତ କରିବା ନେଇ ଆଲୋଚନା ହୋଇଥିଲା।
ଦିଲ୍ଲୀରେ ଘନ କୁହୁଡିକୁ ପ୍ରଦୂଷଣ କରୁଛି କଲବଲ ; ପୁଣି ବିଗିଡ଼ିଲା ଦିଲ୍ଲୀର ବାୟୁ ସ୍ତର
ନୂଆଦିଲ୍ଲୀ : ଜାତୀୟ ରାଜଧାନୀ ଦିଲ୍ଲୀରେ ଘନ କୁହୁଡି କରୁଛି କଲବଲ। ଆଜି ପୁଣି ବିଗିଡ଼ିଲା ଦିଲ୍ଲୀର ବାୟୁ । ଖରାପ ସ୍ତରକୁ ଖସିଛି ଦିଲ୍ଲୀ ପ୍ରଦୂଷଣ । ହାରାହାରି AQI ୪୧୮ ରେକର୍ଡ କରାଯାଇଛି । ୪ଶହ ତଳକୁ ଖସିଲେ ଏହା ଗମ୍ଭୀର ସ୍ତର ଭାବେ ପରିଗଣିତ ହେଉଛି । ପ୍ରଦୂଷଣକୁ ନେଇ ଆଜି ମଧ୍ୟ ଜାରି ରହିବ ଗ୍ରାପ୍ ୪ କଟକଣା । ବାୟୁ ଗୁଣବତ୍ତା ହ୍ରାସକୁ ଦୃଷ୍ଟିରେ ରଖି ଦିଲ୍ଲୀରେ ଗ୍ରେଡେଡ୍ ରେସପନ୍ସ ଆକ୍ସନ୍ ପ୍ଲାନ୍ GRAP-୪ ଅନୁଯାୟୀ ପ୍ରତିବନ୍ଧକ ଲାଗୁ କରାଯାଇଛି । ଏହି କଟକଣାଗୁଡ଼ିକ ମଧ୍ୟରେ ମାଟି କାମ, ପାଇଲିଂ, ଟ୍ରେଞ୍ଚିଂ ଏବଂ ରାସ୍ତା ନିର୍ମାଣ କାର୍ଯ୍ୟକଳାପ ଏବଂ ପ୍ରମୁଖ ମରାମତି ସମେତ ସମସ୍ତ ନିର୍ମାଣ ଏବଂ ଭଙ୍ଗା କାର୍ଯ୍ୟକଳାପ ଉପରେ ସମ୍ପୂର୍ଣ୍ଣ ନିଷେଧାଦେଶ ଜାରି କରାଯାଇଛି ।
ଦିଲ୍ଲୀ ବାହାରେ ପଞ୍ଜିକୃତ BS-4 ଡିଜେଲ ପରିଚାଳିତ ହାଲୁକା ବାଣିଜ୍ୟିକ ଯାନଗୁଡ଼ିକୁ ମଧ୍ୟ ଜାତୀୟ ରାଜଧାନୀରେ ପ୍ରବେଶ କରିବାକୁ ଅନୁମତି ନାହିଁ । କେବଳ ଅତ୍ୟାବଶ୍ୟକ ସାମଗ୍ରୀ ପରିବହନ କରୁଥିବା କିମ୍ବା ଅତ୍ୟାବଶ୍ୟକ ସେବା ପ୍ରଦାନ କରୁଥିବା ଯାନଗୁଡ଼ିକୁ ଅନୁମତି ରହିଛି । କୁହୁଡ଼ି ଯୋଗୁଁ ଦୃଶ୍ୟମାନତା କମ୍ ଥିବାରୁ ଇନ୍ଦିରା ଗାନ୍ଧୀ ଅନ୍ତର୍ଜାତୀୟ ବିମାନବନ୍ଦରରେ କିଛି ବିମାନ ଚଳାଚଳ ବିଳମ୍ବ ହୋଇଛି । ସର୍ବନିମ୍ନ ତାପମାତ୍ରା 7 ରୁ 9 ଡିଗ୍ରୀ ସେଲସିୟସ୍ ମଧ୍ୟରେ ରହିବାର ସମ୍ଭାବନା ଅଛି ।
ଚିଲିରେ ଭୟଙ୍କର ଜଙ୍ଗଲ ନିଆଁ ; ଅଗ୍ନିକାଣ୍ଡରେ ୧୬ ଜଣଙ୍କ ମୃତ୍ୟୁ ସୂଚନା
ନନ୍ଦିଘୋଷ ବ୍ୟୁରୋ: ଚିଲିରେ ଜଙ୍ଗଲ ନିଆଁ। ଦକ୍ଷିଣ ଚିଲି ଜଙ୍ଗଲରେ ଲାଗିଥିବା ନିଆଁ ନିୟନ୍ତ୍ରଣ ବାହାରକୁ ଚାଲିଯାଇଛି। ନିଆଁ ଲାଗି ୧୬ ଜଣ ଲୋକଙ୍କ ମୃତ୍ୟୁ ହୋଇଥିବା ସୂଚନା ମିଳିଛି। ହଜାର ହଜାର ଲୋକ ଘର ଛାଡ଼ି ପଳାୟନ କରିଛନ୍ତି। ଜଙ୍ଗଲ ନିଆଁ ଜନବସତି ଆଡକୁ ମାଡିଆସିଛି। ଶହ ଶହ ସଂଖ୍ୟାରେ ଘର ଜଳିଯାଇଛି।
ଚିଲି ରାଷ୍ଟ୍ରପତି ଗାବ୍ରିଏଲ୍ ବୋରିକ୍ ରାଜଧାନୀ ସାଣ୍ଟିଆଗୋଠାରୁ ପ୍ରାୟ ୫୦୦ କିଲୋମିଟର ଦକ୍ଷିଣରେ ଅବସ୍ଥିତ ନୁବଲେ ଅଞ୍ଚଳକୁ ବିପଦ ଅବସ୍ଥାରେ ଥିବା ଘୋଷଣା କରିଛନ୍ତି। ଦୁଇ ଦିନ ଧରି ଏଠାରେ ଲାଗିଛି ନିଆଁ। ଏହି ଦୁଇ ଅଞ୍ଚଳରେ ଅତି କମରେ ୧୪ଟି ଜଙ୍ଗଲରେ ଲାଗିଛି ନିଆଁ। ଅଧିକାଂଶ ମୃତ୍ୟୁ ଉପକୂଳବର୍ତ୍ତୀ ସହର ପେଙ୍କୋରେ ଘଟିଛି ବୋଲି ସ୍ଥାନୀୟ ମେୟର କହିଛନ୍ତି। ନିଆଁକୁ ଆୟତ୍ତ କରିବାକୁ ଅଗ୍ନୀଶମବାହିନୀ ଉଦ୍ୟମ ଜାରି ରଖିଛି।
ତାମିଲନାଡୁ କରୁର ଦଳାଚକଟା ଘଟଣା ; ଆଜି ପୁଣି ସିବିଆଇରେ ହାଜର ହେବେ ବିଜୟ ଥଲପତି
ନନ୍ଦିଘୋଷ ବ୍ୟୁରୋ: ତାମିଲନାଡୁ କରୁର ଦଳାଚକଟା ଘଟଣା। ଆଜି ପୁଣି ସିବିଆଇରେ ହାଜର ହେବେ ତାମିଲ ସୁପରଷ୍ଟାର ତଥା ଟିଭିକେ ମୁଖ୍ୟ ବିଜୟ ଥଲପତି। ଦିଲ୍ଲୀ ସ୍ଥିତ ସିବିଆଇ କାର୍ଯ୍ୟାଳୟରେ ହେବେ ହାଜର। ତଦନ୍ତର ଅଂଶ ସ୍ୱରୂପ ସିବିଆଇ ପୂର୍ବରୁ ଅନେକ ବରିଷ୍ଠ ଟିଭିକେ ପଦାଧିକାରୀଙ୍କୁ ପଚରାଉଚରା କରିସାରିଛି। ପଚରାଉଚରା କରାଯାଇଥିବା ଲୋକଙ୍କ ମଧ୍ୟରେ ଦଳର ସାଧାରଣ ସମ୍ପାଦକ ବୁସି ଆନନ୍ଦ, ନିର୍ବାଚନ ପରିଚାଳନା ବିଭାଗର ସାଧାରଣ ସମ୍ପାଦକ ଆଧବ ଅର୍ଜୁନ, ଯୁଗ୍ମ ସାଧାରଣ ସମ୍ପାଦକ ନିର୍ମଳ କୁମାର ଏବଂ କରୁର ଜିଲ୍ଲା ସମ୍ପାଦକ ମାଥିୟାଝାଗନ ଅନ୍ତର୍ଭୁକ୍ତ। ଗତ ମାସରେ ବୁସି ଆନନ୍ଦ ଏବଂ ଆଧବ ଅର୍ଜୁନ ବ୍ୟକ୍ତିଗତ ଭାବରେ ଦିଲ୍ଲୀ କାର୍ଯ୍ୟାଳୟରେ ସିବିଆଇ ଅଧିକାରୀଙ୍କ ସମ୍ମୁଖରେ ହାଜର ହୋଇ ନିଜ ପକ୍ଷ ରଖିଥିଲେ। ଏପର୍ଯ୍ୟନ୍ତ ସଂଗୃହୀତ ବୟାନ ଏବଂ ପ୍ରମାଣ ଆଧାରରେ କରୁର ଘଟଣା ସହିତ ଜଡିତ ବିଜୟଙ୍କ ଭୂମିକା ଏବଂ ଦାୟିତ୍ୱ ସମ୍ପର୍କରେ ସିଧାସଳଖ ପଚରାଉଚରା କରିବାକୁ ନିଷ୍ପତ୍ତି ନେଇଥିଲା।
ତେଣୁ ତାଙ୍କୁ ପୂର୍ବରୁ ଗତ ୧୨ ତାରିଖରେ ଦିଲ୍ଲୀସ୍ଥିତ ସିବିଆଇ କାର୍ଯ୍ୟାଳୟରେ ପଚରାଉଚରା କରାଯାଇଥିଲା। ଜେରା ସମୟରେ ସିବିଆଇ ଅଧିକାରୀମାନେ ଅନେକ ଗୁରୁତ୍ୱପୂର୍ଣ୍ଣ ପ୍ରଶ୍ନ ଉଠାଇଥିଲେ। ଯେଉଁଥିରେ କରୁର କାର୍ଯ୍ୟକ୍ରମ କିଏ ଆୟୋଜନ କରିଥିଲା, ବିଜୟଙ୍କୁ ବ୍ୟବସ୍ଥା ବିଷୟରେ ପୂର୍ବରୁ ସୂଚନା ଥିଲା କି ନାହିଁ, କାର୍ଯ୍ୟକ୍ରମରେ ତାଙ୍କର ବିଳମ୍ବର କାରଣ ଏବଂ ପ୍ରବଳ ଭିଡ଼କୁ ନିୟନ୍ତ୍ରଣ କରିବା ପାଇଁ କୌଣସି ପ୍ରୟାସ କରାଯାଇଥିଲା କି ନାହିଁ, ସ୍ଥାନୀୟ ପ୍ରଶାସନ ତାଙ୍କୁ ପୂର୍ବରୁ ସତର୍କ କରିଥିଲା କି ନାହିଁ, ପାନୀୟ ଜଳ, ସୁରକ୍ଷା ଏବଂ ସୁରକ୍ଷିତ ପ୍ରବେଶ ଏବଂ ପ୍ରସ୍ଥାନ ପଥ ପାଇଁ କ’ଣ ବ୍ୟବସ୍ଥା କରାଯାଇଥିଲା ଏସବୁ ପଚରାଉଚରା କରିଥିଲା। ବିଜୟ ସମସ୍ତ ପ୍ରଶ୍ନର ଉତ୍ତର ଦେଇଥିଲେ ଏବଂ ବିସ୍ତୃତ ଭାବେ ନିଜ ପକ୍ଷ ରଖିଥିବା ସୂଚନା ମିଳିଛି। ସିବିଆଇ ଆଜି ତାଙ୍କୁ ଦ୍ଵିତୀୟ ପର୍ଯ୍ୟାୟ ପଚରାଉଚରା ପାଇଁ ପୁଣି ସମନ କରିଛି। ତାମିଲନାଡୁ କରୁରରେ ଗତବର୍ଷ ସେପ୍ଟେମ୍ବର ୨୭ରେ ଘଟିଥିବା ଦଳାଚକଟା ଘଟଣାରେ ପ୍ରାଣ ହରାଇଥିଲେ ୪୧ଜଣ। ଏହି ଦଳା ଚକଟା ଘଟଣାର ତଦନ୍ତ ବର୍ତ୍ତମାନ ସିବିଆଇ କରୁଛି। ସୁପ୍ରିମକୋର୍ଟଙ୍କ ନିର୍ଦ୍ଦେଶ କ୍ରମେ ସ୍ବତନ୍ତ୍ର ତଦନ୍ତକାରୀ ଟିମ ହାତରୁ ଦାୟିତ୍ବ ନେଇଥିଲା ସିବିଆଇ।
ଚିଲିକାରେ ଆସନ୍ତାକାଲି ଡ଼ଲଫିନ ଗଣନା ; ୩ଦିନ ଧରି ଚାଲିବ ଏହି କାର୍ଯ୍ୟକ୍ରମ
ନନ୍ଦିଘୋଷ ବ୍ୟୁରୋ: ଆସନ୍ତାକାଲି ଚିଲିକାରେ ହେବ ଡ଼ଲଫିନ ଗଣନା । ବାଲୁଗାଁ ସ୍ଥିତ ଚିଲିକା ବନ୍ୟପ୍ରାଣୀ କାର୍ଯ୍ୟାଳୟ ସଭାଗୃହରେ ଚିଲିକା ବନ୍ୟପ୍ରାଣୀ ବନଖଣ୍ଡ ବିଭାଗ ପକ୍ଷରୁ ସୂଚନା ଦିଆଯାଇଛି। ଏହି ଗଣନା ୩ ଦିନ ଧରି ୨୨ ତାରିଖ ପର୍ଯ୍ୟନ୍ତ ଚାଲିବ। ଏଥିପାଇଁ ଆଜି ଡ଼ଲଫିନ ଅଭୟାରଣ୍ୟ ସାତପଡ଼ା ଓ ବାଲୁଗାଁ ଠାରେ ଗଣନାକାରୀଙ୍କୁ ତାଲିମ ପ୍ରଦାନ କରାଯିବ। ଡ଼ଲଫିନ ଗଣନା ପାଇଁ ୨ଟି ରେଂଜ ର ୩ ସେକ୍ଟରରେ ରହିବେ ୧୮ ଟିମ। ସାତପଡ଼ାରେ ୮ଟି ଓ ବାଲୁଗାଁରେ ୧୦ଟି ଟିମ ଗଣନା କାର୍ଯ୍ୟରେ ନିୟୋଜିତ ହୋଇଥିବା ବେଳେ ପ୍ରତି ଟିମରେ ୫ରୁ ୬ଜଣଙ୍କ ସମେତ ଦୁଇ ଜଣ ଡଙ୍ଗା ଚାଳକ ରହିବେ।
ଏହି ଗଣନାରେ ୧୩୦ ରୁ ଉର୍ଦ୍ଧ ବିଭାଗୀୟ କର୍ମଚାରୀ,ସ୍ବେଛାସେବୀ,ବମ୍ବେ ନାଚୁରାଲ ହିଷ୍ଟ୍ରି ଅଫ ସୋସାଇଟି,ଓଡିଶା ବନ୍ୟପ୍ରାଣୀ ବିଭାଗ କର୍ମଚାରୀ,ସିଡିଏ କର୍ମଚାରୀ,ଓୟୁଏଟି ଛାତ୍ରଛାତ୍ରୀ ଅଣସରକାରୀ ସଂସ୍ଥା କର୍ମଚାରୀ ମାନେ ସାମିଲ ହେବେ। ଏଥିସହିତ ସ୍ଥାନୀୟ ମସ୍ୟଜିବୀ ଓ ବିଭିନ୍ନ ଡଙ୍ଗା ଚାଳକ ସଂଘ ମାନେ ସହଯୋଗ କରିବେ। ମାନଚିତ୍ର, ଜିପିଏସ,ବାଇନାକୁଲାର,ସ୍ପୋଟିଂ ସ୍କୋପ,ୱାକିଟକି,ନୋଟ ବୁକ ବ୍ୟବହାର କରାଯିବ। ଗଣନା ସମୟରେ ଚିଲିକାରେ ମସ୍ୟଜୀବୀ ଓ ଯାତ୍ରୀବାହୀ ଡଙ୍ଗା ଚଳାଚଳ ସମ୍ପୂର୍ଣ୍ଣ ନିଷେଦ୍ଧ ରହିବ l
ସ୍ପେନରେ ଭୟଙ୍କର ଟ୍ରେନ ଦୁର୍ଘଟଣା ; ୨୧ ଯାତ୍ରୀ ମୃତ, ଶତାଧିକ ଆହତ
ନନ୍ଦିଘୋଷ ବ୍ୟୁରୋ: ସ୍ପେନରେ ଭୟଙ୍କର ଟ୍ରେନ ଦୁର୍ଘଟଣା। ଦୁଇ ଯାତ୍ରୀବାହୀ ଟ୍ରେନ ମଧ୍ୟରେ ଧକ୍କା। ଗୋଟିଏ ଟ୍ରେନ ଲାଇନଚ୍ୟୁତ୍ ହୋଇ ଅନ୍ୟ ଟ୍ରାକ୍ରେ ପଡିବା ପରେ ଧକ୍କା ଦେଲା ଅନ୍ୟ ଏକ ଟ୍ରେନ୍ । ଦୁର୍ଘଟଣାରେ ୨୧ ଯାତ୍ରୀଙ୍କ ମୃତ୍ୟୁ ହୋଇଥିବା ସୂଚନା। ଶତାଧିକ ଯାତ୍ରୀ ଆହତ ହୋଇଛନ୍ତି। ଦକ୍ଷିଣ ସ୍ପେନର ଆଡାମୁଜ୍ ନଗର ନିକଟରେ ଘଟିଛି ଦୁର୍ଘଟଣା। ମାଲାଗାରୁ ମାଡ୍ରିଡ୍ ଯାତ୍ରା କରୁଥିବା ଦ୍ରୁତ ବେଗର ଟ୍ରେନ୍ ଲାଇନଚ୍ୟୁତ ହୋଇ ପାଖ ଟ୍ରାକ୍ ଉପରେ ପଡ଼ିଯାଇଥିଲା । ଫଳରେ ବିପରୀତ ଦିଗରେ ଯାଉଥିବା ମାଡ୍ରିଡ୍ରୁ ହୁଏଲଭା ଯାତ୍ରା କରୁଥିବା ଦ୍ୱିତୀୟ ଟ୍ରେନ୍ ଧକ୍କା ଦେଇଥିଲା।
ସ୍ପେନ ପ୍ରଧାନମନ୍ତ୍ରୀ ପେଡ୍ରୋ ସାଞ୍ଚେଜ୍ ଘଟଣାକୁ ନେଇ ଦୁଖଃ ପ୍ରକାଶ କରିଛନ୍ତି। କ’ଣ ପାଇଁ ଟ୍ରେନ ଲାଇନଚ୍ୟୁତ ହେଲା ତା’ର କାରଣ ଏପର୍ଯ୍ୟନ୍ତ ଜଣାପଡ଼ିନାହିଁ। ଲୋକଙ୍କ ଉଦ୍ଧାର କରିବା ପାଇଁ ଉଦ୍ଧାରକାରୀ ଦଳକୁ ବହୁତ ଅସୁବିଧା ହେଉଛି । ରବିବାର ମାଲାଗାରୁ ସ୍ଥାନୀୟ ସମୟ ସନ୍ଧ୍ୟା ୬ଟା ୪୦ଟାରେ ଟ୍ରେନ୍ ଛାଡ଼ିବାର ପ୍ରାୟ ୧୦ ମିନିଟ୍ ପରେ ଘଟିଥିଲା। ଏହି ଟେନରେ ପ୍ରାୟ ୩୦୦ ଯାତ୍ରୀ ଥିଲେ ବୋଲି ସୂଚନା ମିଳିଛି ।
ଦିଲ୍ଲୀରେ ଭୂକମ୍ପ ଝଟକା ! ରିକ୍ଟର ସ୍କେଲରେ ୨.୮ ତୀବ୍ରତା ରେକର୍ଡ
ନନ୍ଦିଘୋଷ ବ୍ୟୁରୋ: ରାଜଧାନୀ ଦିଲ୍ଲୀରେ ଭୂକମ୍ପ ଝଟକା । ଦିଲ୍ଲୀର ଏନସିଆର ଅଞ୍ଚଳରେ ଭୂକମ୍ପ ଅନୁଭୂତ ହୋଇଛି । ସକାଳୁ ସକାଳୁ ଲୋକମାନେ ଭୂକମ୍ପର ଝଟକା ଅନୁଭବ କରିଛନ୍ତି । ଆଜି ସକାଳ ୮.୪୪ ରେ ଆସିଥିବା ଏହି ଭୂମିକମ୍ପର ତୀବ୍ରତା ରିକ୍ଟର ସ୍କେଲରେ ୨.୮ ମାପିଯାଇଥିଲା। ନ୍ୟାସନାଲ ସେଣ୍ଟର ଫର୍ ସିସମୋଲୋଜି (NCS) ଅନୁଯାୟୀ ଏହାର କେନ୍ଦ୍ରସ୍ଥଳ ଉତ୍ତର ଦିଲ୍ଲୀରେ ଅବସ୍ଥିତ। ଭୂମିକମ୍ପର ଗଭୀରତା ପ୍ରାୟ ୫ କିଲୋମିଟର ବୋଲି ଆକଳନ କରାଯାଇଛି।
ଭୂମିକମ୍ପ ମୃଦୁ ଥିଲା ତେଣୁ ଏଥିରେ କୌଣସି ବଡ଼ କ୍ଷୟକ୍ଷତିର ରିପୋର୍ଟ ମିଳିନାହିଁ। ତଥାପି ସକାଳେ ଭୂକମ୍ପ ଅନେକ ଅଞ୍ଚଳର ବାସିନ୍ଦାଙ୍କୁ ଭୟଭୀତ କରିଥିଲା। କେତେକ ଲୋକ ଚେୟାର ଏବଂ ପଙ୍ଖା ଥରିଥିବା ଅନୁଭବ କରିଥିବା ସୂଚନା ଦେଇଛନ୍ତି ଯେତେବେଳେ ଅନ୍ୟମାନେ ଘରୁ ବାହାରକୁ ଦୌଡ଼ି ପଳାଇ ଆସିଛନ୍ତି। ପ୍ରଶାସନ ଏପର୍ଯ୍ୟନ୍ତ କୌଣସି ମୃତାହତ କିମ୍ବା ସମ୍ପତ୍ତି କ୍ଷୟକ୍ଷତି ନିଶ୍ଚିତ କରିନାହିଁ। ବିପର୍ଯ୍ୟୟ ପରିଚାଳନା ସଂସ୍ଥାଗୁଡ଼ିକ ପରିସ୍ଥିତି ଉପରେ ନଜର ରଖିଛନ୍ତି।
ଭୂମିକମ୍ପର ଝଟକାଗୁଡ଼ିକ ମନେନକାଇଦିଏ ଯେ ଦିଲ୍ଲୀ-ଏନସିଆର ଭୂକମ୍ପ ଦୃଷ୍ଟିରୁ ସମ୍ବେଦନଶୀଳ ଜୋନ୍ 4 ରେ ପଡ଼ିଥାଏ, ଏବଂ ଯେକୌଣସି ସମୟରେ ଏକ ବଡ଼ ଭୂମିକମ୍ପ ଆସିପାରେ। ବିଶେଷଜ୍ଞମାନେ କହିଛନ୍ତି ଯେ ଛୋଟ ଭୂମିକମ୍ପ ମଧ୍ୟ ଏକ ବଡ଼ ଭୂମିକମ୍ପର ସଙ୍କେତ ଦେଇପାରେ, ତେଣୁ ଲୋକମାନେ ପ୍ରସ୍ତୁତ ରହିବା ଉଚିତ। ଏପର୍ଯ୍ୟନ୍ତ କୌଣସି କ୍ଷୟକ୍ଷତିର ରିପୋର୍ଟ ମିଳି ନଥିଲେ ମଧ୍ୟ, ଆଜି ସକାଳେ ହୋଇଥିବା ଭୂମିକମ୍ପ ଲୋକମାନଙ୍କୁ ଭୟଭୀତ କରିଛି।
ପ୍ରାୟ ୫୦ ବର୍ଷ ପରେ ନାସାର ହେବ ମୁନ ମିସନ ; ଚନ୍ଦ୍ରକୁ ଯିବେ ମହାକାଶଚାରୀ
ନନ୍ଦିଘୋଷ ବ୍ୟୁରୋ: ପ୍ରାୟ ୫୦ ବର୍ଷ ପରେ ନାସାର ହେବ ମୁନ ମିସନ। ଫ୍ଲୋରିଡାର କେପ କାନାଭେରାଲରୁ ଯିବେ ଆଷ୍ଟ୍ରୋନଟ। ୯୮ ମିଟର ଦୀର୍ଘ ସ୍ପେସ ଲଞ୍ଚ ସିଷ୍ଟମ ଜରିଆରେ ଯିବେ ଯାତ୍ରୀ। ପ୍ରାୟ ୧୦ ଦିନ ଲାଗି ଆର୍ଟେମିସ-୨ ମିଶନରେ ଯିବେ ମହାକାଶଚାରୀ। ୪ ମହାକାଶଚାରୀ ହେଲେ ରେଡ ୱାଇଜମେନ, ଭିକ୍ଟର ଗ୍ଲୋଭର, ଖ୍ରୀଷ୍ଟିନା କୋଚ ଓ ଜେରେମି ହାନସେନ। ୧୯୭୨ ଡିସେମ୍ବରରେ ଶେଷ ଥର ଲାଗି ଆପୋଲୋ-୧୭ରେ ଚନ୍ଦ୍ରକୁ ଯାଇଥିଲେ ଯାତ୍ରୀ। ଏହି ଅଭିଯାନ ପରେ ୨୦୨୭ରେ ଆର୍ଟେମିସ ୩ ଅଭାଯାନ ହେବ।
ଚନ୍ଦ୍ର ପୃଷ୍ଠକୁ ଯିବା ପୂର୍ବରୁ ପୃଥିବୀର କକ୍ଷ ପଥରେ ଦୁଇଦିନ ଲାଗି ଘୂରିବ ଆର୍ଟେମିସ-୨। ଏହି ମିସନ ଲାଗି ୟୁରୋପିଆନ ସ୍ପେସ ଏଜେନ୍ସି ଯୋଗାଇଛି ୟୁରୋପିଆନ ସର୍ଭିସ ମଡ୍ୟୁଲ ଯାହାକି ଲାଇଫ ସପୋର୍ଟ ସିଷ୍ଟମ, ପାୱାର ଓ ପ୍ରପଲସନ ଲାଗି ସହାୟତା ହେବ। ଆସନ୍ତା ଫେବ୍ରୁଆରୀ ୬ରେ ଆରମ୍ଭ ହେବ ମିଶନ।