spot_img
Home Blog Page 1442

ପଶ୍ଚିମବଙ୍ଗ ସରକାରଙ୍କୁ ଡେଡଲାଇନ ଦେଲେ ଆନ୍ଦୋଳନରତ ଡାକ୍ତର

କୋଲକାତା : ପଶ୍ଚିମବଙ୍ଗ ସରକାରଙ୍କୁ ପୁଣି ଡେଡଲାଇନ ଦେଲେ ଆନ୍ଦୋଳନରତ ଡାକ୍ତର। ଆଜି ସୁଦ୍ଧା ଦାବି ପୂରଣ ନହେଲେ ଆସନ୍ତାକାଲି ଠାରୁ ରାଜ୍ଯବ୍ଯାପୀ ଧର୍ମଘଟ କରାଯିବ ବୋଲି ଧମକ ଦେଇଛନ୍ତି ଡାକ୍ତର। ସେପଟେ ଆଜି ଆନ୍ଦୋଳନରତ ଡାକ୍ତରଙ୍କ ସହ ମୁଖ୍ଯମନ୍ତ୍ରୀ ଆଲୋଚନା କରିବେ ବୋଲି ଜଣାଯାଇଛି। ଆରଜି କର ମେଡିକାଲ କଲେଜ ଓ ହସ୍ପିଟାଲ ଦୁଷ୍କର୍ମ ଓ ହତ୍ଯା ଘଟଣା ପରଠାରୁ ଦୁଇମାସ ଧରି ଚାଲିଥିବା ଆନ୍ଦୋଳନ ଥମିବାର ନାଁ ନେଉନାହିଁ।  ଦୁଷ୍କର୍ମ ଓ ହତ୍ଯାରେ ଶିକାର ହୋଇଥିବା ଡାକ୍ତରଙ୍କୁ ନ୍ୟାୟ ଦେବା, ରାଜ୍ଯ ସ୍ବାସ୍ଥ୍ୟ ସଚିବ ଏନଏସ ନିଗମଙ୍କୁ ବାହାର କରିବା, କର୍ମକ୍ଷେତ୍ରରେ ଡାକ୍ତରଙ୍କୁ ନିରାପତ୍ତା, କେନ୍ଦ୍ରୀୟ ରେଫରାଲ ବ୍ଯବସ୍ଥା, ସ୍ବାସ୍ଥ୍ଯସେବା ଭିତ୍ତିଭୂମିର ସଂସ୍କାର, ପର୍ଯ୍ୟାପ୍ତ ସିସିଟିଭି ବ୍ଯବସ୍ଥା ଆଦି ଦାବିରେ ଅଟଳ ରହିଛନ୍ତି ଡାକ୍ତର। ଆନ୍ଦୋଳନରତ ଡାକ୍ତର କହିଛନ୍ତି- ସମସ୍ତ ଦାବି ପୂରଣ ନେଇ ଆଲୋଚନା ସକାଶେ ମୁଖ୍ଯମନ୍ତ୍ରୀ ମମତା ବାନାର୍ଜୀଙ୍କୁ ଛାତ୍ରମାନେ ଆହ୍ବାନ ଦେଇଛନ୍ତି। ମାତ୍ର ସରକାର ତାହା ଶୁଣୁନାହାନ୍ତି। ଯଦି ସରକାର ଦାବି ନ ଶୁଣିଲେ ତେବେ ଆସନ୍ତାକାଲିଠାରୁ ଉଭୟ ସରକାରୀ ଓ ଘରୋଇ ମେଡିକାଲ କଲେଜ ପ୍ରତିଷ୍ଠାନର ଡାକ୍ତରମାନେ ରାଜ୍ଯବ୍ଯାପୀ ଆନ୍ଦୋଳନକୁ ଓହ୍ଲାଇବେ ।

ଦାନା ବାନ୍ଧୁଛି ବାତ୍ଯା, ୨୩ରୁ ୨୫ ପର୍ଯ୍ୟନ୍ତ ପ୍ରବଳରୁ ଅତି ପ୍ରବଳ ବର୍ଷିବ !

ଭୁବନେଶ୍ବର : ଦାନା ବାନ୍ଧୁଛି ବାତ୍ଯା ଦାନା । ଉତ୍ତର କେନ୍ଦ୍ରୀୟ ଆଣ୍ଡାମାନ ସାଗରରେ ସୃଷ୍ଟି ହୋଇଥିବା ଘୂର୍ଣ୍ଣିବଳୟ  ଆସନ୍ତା ୧୨ ଘଣ୍ଟା ମଧ୍ୟରେ ପୂର୍ବ କେନ୍ଦ୍ରୀୟ ବଙ୍ଗୋପସାଗର ପାର୍ଶ୍ଵବର୍ତ୍ତୀ ଉତ୍ତର ଆଣ୍ଡାମାନ ସାଗର ଅଞ୍ଚଳରେ ଲଘୁଚାପ ରୂପ ନେବ । ଏହା ଆହୁରି ଘନୀଭୂତ ହୋଇ କାଲି ସକାଳ ବେଳକୁ ଏକ ଅବପାତ ଏବଂ ୨୩ ତାରିଖ ବେଳକୁ ପୂର୍ବ କେନ୍ଦ୍ରୀୟ ବଙ୍ଗୋପସାଗର ଅଂଚଳରେ ଏକ ବାତ୍ୟାର ରୂପ ନେବା ସମ୍ଭାବନା ରହିଛି । ପରେ ଆହୁରି ଘନୀଭୁତ ହୋଇ ଏକ ଭୀଷଣ ବାତ୍ୟାର ପରିଣତ ହେବ । ୨୪ ତାରିଖରେ ପଶ୍ଚିମବଙ୍ଗ ଏବଂ ଓଡ଼ିଶା ଉପକୂଳରେ ସ୍ଥଳଭାଗ ଛୁଇଁବ । ବାତ୍ୟା କେଉଁଠି ସ୍ଥଳଭାଗ ଛୁଇଁବ, ସେ ନେଇ ଏ ପର୍ଯ୍ୟନ୍ତ ସଠିକ୍ ଆକଳନ କରାଯାଇ ନ ଥିଲେ ମଧ୍ୟ ଓଡ଼ିଶା ଉପକୂଳକୁ ବିପଦ ରହିଥିବାରୁ ଭାରତୀୟ ପାଣିପାଗ ବିଭାଗ ରେଡ୍ ୱାର୍ଣ୍ଣିଂ ଜାରି କରିଛି । ୨୩ ତାରିଖ ସନ୍ଧ୍ୟାଠାରୁ ଉପକୂଳ ଓଡ଼ିଶାର ପାଗରେ ପରିବର୍ତ୍ତନ ଆସିବ। ୨୪ ତାରିଖ ବେଳକୁ ଜଗତସିଂହପୁର, ପୁରୀ, ଖୋର୍ଦ୍ଧା ଏବଂ ଗଞ୍ଜାମ ଜିଲ୍ଲାରେ ପ୍ରବଳ ବର୍ଷା ଆଶଙ୍କା ରହିଛି । କେନ୍ଦ୍ରାପଡା, କଟକ, ନୟାଗଡ, କନ୍ଧମାଳ ଏବଂ ଗଜପତି ଜିଲ୍ଲାରେ ବି ତାଣ୍ଡବ ରଚିପାରେ ବର୍ଷା । ବଡ଼ ବଡ଼ ଗଛ  ଭାଙ୍ଗିବାର, ବିଦ୍ୟୁତ ଖୁଣ୍ଟ ଉପୁଡ଼ିବାର ସମ୍ଭାବନା ରହିଛି। ବନ୍ଦର ଓ ଜାହାଜ ଚଳାଚଳ ନେଇ ମଧ୍ୟ  ସତର୍କତା ଜାରି କରାଯାଇଛି। ବର୍ଷା ପବନରେ କ୍ଷତିଗ୍ରସ୍ତ ହୋଇପାରେ ପାଚିଲା ଧାନ। ସମୁଦ୍ରରେ ବଡ଼ ବଡ଼ ଜୁଆର ଆସିବାର ଆଶଙ୍କା ଥିବାରୁ ମତ୍ସ୍ୟଜୀବୀଙ୍କୁ ସତର୍କ କରାଯାଇଛି।

ପଡ଼ିଛି ଅଜଣା ବ୍ୟାଗ, ଅଛି କି ବୋମା ?

ସମ୍ବଲପୁର: ସମ୍ବଲପୁର ଅଇଁଠାପାଲିରେ ପଡ଼ିଛି ଅଜଣା ବ୍ୟାଗ । କେହି ଜଣେ ବ୍ୟାଗଟିକୁ ଫିଙ୍ଗି ଚାଲିଯାଇଥିବା ଅଭିଯୋଗ । ବ୍ୟାଗରେ ବୋମା ଥିବା ସନ୍ଦେହ କରାଯାଉଥିବା ବେଳେ ତାକୁ ନେଇ ପୂରା ସହରରେ ଆତଙ୍କ ଖେଳିଯାଇଛି । ଖବର ପାଇବା ପରେ ପୋଲିସ ଘଟଣା ସ୍ଥଳରେ ପହଞ୍ଚି ଯାଞ୍ଚ ଆରମ୍ଭ କରିଛି ।

ସ୍ପା ମାଲିକ ସାବଧାନ ! ଅନୈତିକ କାମ ଚାଲିଥିଲେ, ନାମ ନେବ

ଭୁବନେଶ୍ବର: ରାଜଧାନୀରେ ଥିବା ସ୍ପା ଓ ପାର୍ଲରରେ ହେବ ଚଢ଼ାଉ । ଅନୈତିକ କାମ କରୁଥିଲେ ହୋଇଯାନ୍ତୁ ସାବଧାନ । ସମସ୍ତ ଆଇଆଇସିଙ୍କୁ ରୁଟିନ ଚେକ ପାଇଁ ନିର୍ଦ୍ଦେଶ ଦେଲେ ଡିସିପି । ଦୀପାବଳି ଓ ନୂଆବର୍ଷ ପୂର୍ବରୁ ଆକ୍ସନ ମୋଡ଼ରେ ପୋଲିସ ।

ରାଜଧାନୀରେ ବଦଳୁଛି ଦେହ ବେପାରର ତରିକା । ବଡି ମସାଜ ସାଙ୍ଗକୁ ମିଳୁଛି ସ୍ପେଶାଲ ସର୍ଭିସ । ବଡ଼ଗଡ଼ ଥାନା ଅନ୍ତର୍ଗତ ରବି ଟକିଜ ଛକରେ ଥିବା ଡାଇମଣ୍ଡ ସେଲୁନ ଆଣ୍ଡ ସ୍ପାରୁ ଆସିଥିଲା ସାଙ୍ଘାତିକ ଅଭିଯୋଗ । ଚାକିରି ଦେବା ଆଳରେ ଯୁବତୀଙ୍କୁ ଆଣି ଅନୈତିକ କାରବାରରେ ଲିପ୍ତ କରୁଥିଲେ ସ୍ପା ମାଲିକ । ଚଢ଼ାଉ ବେଳେ ଅନେକ ଆପତ୍ତିଜନକ ଜିନିଷ ମଧ୍ୟ ଉଦ୍ଧାର ହୋଇଥିଲା । ତଦନ୍ତ ପରେ ସ୍ପାର ମାଳିକାଣୀଙ୍କ ସମେତ ଅନ୍ୟ ୨ ଜଣ ଗିରଫ ହୋଇଥିଲେ । ରାଜଧାନୀର ଅନେକ ସ୍ଥାନରେ ଏଭଳି ମସାଜ ପାର୍ଲର ଓ ସ୍ପା ଖୋଲି ଯୁବତୀଙ୍କୁ ଅନୈତିକ କାରବାରରେ ଲିପ୍ତ କରାଉଥିବା ଘଟଣା ସାମ୍ନାକୁ ଆସିବା ପରେ ନିଜ ନିଜ ଥାନା ଅଞ୍ଚଳରେ ଚଢ଼ାଉ କରିବା ପାଇଁ ଥାନା ଅଧିକାରୀଙ୍କୁ ନିର୍ଦ୍ଦେଶ ଦେଇଛନ୍ତି ଭୁବନେଶ୍ୱର ଡିସିପି ।

କିଛିଦିନ ତଳେ ଠିକ ସମାନ ଷ୍ଟାଇଲରେ ଖାରବେଳନଗର ଏକ ଆୟୁର୍ବେଦିକ ସେଣ୍ଟରରେ ଚଢ଼ାଉ କରି ସେକ୍ସ ରାକେଟ ଠାବ କରିଥିଲା ପୋଲିସ । ଗତ ୬ ବର୍ଷ ଭିତରେ ଏଭଳି ୭୯ଟି ସେକ୍ସ ରାକେଟ ଠାବ କରିଛି ପୋଲିସ । ୨୫୬ ଜଣ ଗରାଖ ଓ ୨୦୯ ଜଣ ରୂପଜିବୀଙ୍କୁ ସର୍ଟ ଷ୍ଟେ ହୋମକୁ ପଠାଯାଇଛି । ଡିଜିପି ୱାଇ.ବି. ଖୁରାନିଆ ଟୁଇନ ସିଟି ପୋଲିସ କମିଶନର ଥିବା ବେଳେ ରାଜଧାନୀରେ ଚାଲିଥିବା ସେକ୍ସ ରାକେଟ ଉପରେ ମାରାଥନ ରେଡ଼ ହୋଇଥିଲା । କୋର୍ଟରେ ଏସବୁ ପ୍ରମାଣିତ ହେବା ପରେ ସଂପୃକ୍ତ ଘରକୁ ବେଶ୍ୟାଳୟ ଘୋଷଣା ପାଇଁ ନିର୍ଦ୍ଦେଶ ଦିଆଯାଇଥିଲା । ଏପରିକି ବିଦେଶୀ ଯୁବତୀଙ୍କ ଭିସା ମଧ୍ୟ କଳା ତାଲିକାଭୁକ୍ତ କରିବାକୁ ଗୃହ ବିଭାଗକୁ ଚିଠି ଲେଖିଥିଲା ପୋଲିସ ।

ଆଗକୁ ଦୀପାବଳି ଓ ନୂଆବର୍ଷ । ତେଣୁ ଏଭଳି କାରବାର ଓ ମାନବ ଚାଲାଣ ରୋକିବା ପାଇଁ କମିଶନରେଟ ପୋଲିସ ପୂରା ପ୍ରସ୍ତୁତ ଥିବା କହିଛନ୍ତି ଡିସିପି ।

ରାଜ୍ୟରେ ସ୍ବାସ୍ଥ୍ୟସେବା ବିପର୍ଯ୍ୟସ୍ତ, ବାହାସ୍ପଟ ମାରିବାରେ ବ୍ୟସ୍ତ ସରକାର

ଭୁବନେଶ୍ବର: ରାଜ୍ୟରେ ସ୍ୱାସ୍ଥ୍ୟ ସେବାର ବିକଳ ଚିତ୍ର । ଖାଲି ପଡ଼ିଛି ରାଜ୍ୟର ୧୨ଟି ଜିଲ୍ଲାର ମୁଖ୍ୟ ଜିଲ୍ଲା ଚିକିତ୍ସାଧାରୀ ପଦ । ଗୋଟିଏ ପଟେ ଡାକ୍ତର, ପାରାମେଡ଼ିକାଲ ଷ୍ଟାଫଠାରୁ ଆରମ୍ଭ କରି ମୁରବି ଅଭାବରୁ ଚିକିତ୍ସା ବ୍ୟବସ୍ଥା ଅତ୍ୟନ୍ତ ବିପର୍ଯ୍ୟସ୍ତ ସ୍ଥିତିକୁ ଗଲାଣି । ହେଲେ ଏହା ଉପରେ ନାହିଁ ସ୍ୱାସ୍ଥ୍ୟ ବିଭାଗର ନିଘା । ଯାହାକୁ ନେଇ ସମସ୍ତ ମହଲରେ ଅସନ୍ତୋଷ ବ୍ୟାପକ ହେବାରେ ଲାଗିଛି । ଅନ୍ୟପକ୍ଷରେ ଶୀଘ୍ର ସମସ୍ୟା ଦୂର ହେବା ନେଇ ସୂଚନା ଦେଇଛନ୍ତି ସ୍ୱାସ୍ଥ୍ୟ ମନ୍ତ୍ରୀ ।

ରାଜ୍ୟରେ ବିପର୍ଯ୍ୟସ୍ତ ରୋଗୀ ଚିକିତ୍ସା । ବେଡଠୁ ପଦବୀ ଅଧାରୁ ଅଧିକ ଫାଙ୍କା । ହେଲେ ବାହାସ୍ପଟ ମାରିମାରେ ବ୍ୟସ୍ତ ରାଜ୍ୟ ସରକାର । ୧୨ ଜିଲ୍ଲାରେ ନାହାନ୍ତି ମୁଖ୍ୟ ଚିକିତ୍ସା ଅଧିକାରୀ, ବିଭିନ୍ନ ମେଡ଼ିକାଲ କଲେଜରେ କେଉଁଠି ଅଧିକ୍ଷକ ନାହାନ୍ତି ତ ଆଉ କେଉଁଠି ଖାଲି ପଡ଼ିଛି ଡିନ ପଦ । ଡାକ୍ତର ପଦଠୁ ଆରମ୍ଭ କରି ପାରା ମେଡ଼ିକାଲ ଓ ନର୍ସିଂ ପଦ ବି ଖାଲି ପଡ଼ିଛି ।

ଇଣ୍ଡିଆନ ପବ୍ଲିକ ହେଲଥ ଷ୍ଟାଣ୍ଡର୍ଡର ଗାଇଡ଼ଲାଇନ ଅନୁଯାୟୀ ପ୍ରତି ୧୦ ହଜାର ଜନସଂଖ୍ୟାରେ ୪ଟି ବେଡ଼ ରହିବା କଥା । କିନ୍ତୁ ରାଜ୍ୟର ସମସ୍ତ ସରକାରୀ ଓ ଘରୋଇ ହସ୍ପିଟାଲର ବେଡ଼ ସଂଖ୍ୟାକୁ ମିଶାଇ ମୋଟ ୩୨ ହଜାର ବେଡ଼ ରହିଛି । ଗାଇଡ଼ଲାଇନକୁ ଦେଖିଲେ ୨ ଲକ୍ଷ ୩୫ ହଜାର ବେଡ଼ ଆବଶ୍ୟକ । ସେହିପରି ପ୍ରତି ୧୦ ହଜାର ଜନସଂଖ୍ୟାରେ ଗୋଟିଏ ଡାଇଗ୍ନୋସିସ କେନ୍ଦ୍ର ରହିବା କଥା। କିନ୍ତୁ ରାଜ୍ୟରେ ମୋଟ ୪୫୦୦ ବଦଳରେ ଅଛି ମାତ୍ର ୨୭୭ କେନ୍ଦ୍ର । ସେହିପରି ୧୦୦୦ ଲୋକସଂଖ୍ୟାରେ ଜଣେ ଆଶା, ୨୦ ହଜାର ଲୋକରେ ଗୋଟିଏ ପ୍ରାଥମିକ ଚିକିତ୍ସା କେନ୍ଦ୍ର ରହିବା କଥା । କିନ୍ତୁ ଆବଶ୍ୟକତାଠାରୁ ଏହି ସବୁ ବହୁତ କମ ରହିଛି । ଓଡ଼ିଶାରେ ପଞ୍ଜିକୃତ ଡାକ୍ତର ସଂଖ୍ୟା ୨୬ ହଜାର ରହିଛି । କିନ୍ତୁ ସରକାର କାହିଁକି ସେହି ଡାକ୍ତରମାନଙ୍କୁ ନିଯୁକ୍ତ କରୁନାହାନ୍ତି ବୋଲି ପ୍ରଶ୍ନ ଉଠିଛି ।

ପୂର୍ବ ସରକାର ସମୟରେ ୩୪ଟି ନୂଆ ସ୍କିମ ହୋଇଥିଲା । ନିରାମୟ, ନିଦାନ, ସଂପୂର୍ଣା ଭଳି ଅନେକ ଯୋଜନା ହୋଇଥିଲା । ବିଜେପି ସରକାର ପୂର୍ବ ଯୋଜନା ବାବଦରେ କିଛି ସ୍ପଷ୍ଟ କରୁ ନାହାନ୍ତି ବୋଲି ଜନସ୍ୱାସ୍ଥ୍ୟ ମିଶନ ଅଭିଯୋଗ କରିଛି । ବିଜେପି ଡବଲ ଇଞ୍ଜିନର କଥା କହୁଛି । ଏପରିକି ବିଏସକେୱାଇକୁ ହଟାଇ ଆୟୁସମାନ ଯୋଜନା ଲାଗୁ କରିବାକୁ କହିଲେଣି । ଏହି ଦୁଇ ଯୋଜନା ମଧ୍ୟରେ ତାରତମ୍ୟ ବହୁତ ରହିଛି । ବିଏସକେୱାଇରେ ଲୋକେ ଅଧିକ ଲାଭ ପାଉଥିଲେ । ତେଣୁ ସରକାରଙ୍କ ଇଚ୍ଛାଶକ୍ତି ନାହିଁ ଓ ଆଗକୁ ଏହାର ବଡ଼ ପ୍ରଭାବ ପଡିବ । ଯାହାକୁ ସରକାର ସମ୍ଭାଳି ପାରିବେ ନାହିଁ ବୋଲି ଅଭିଯୋଗ ହେଉଛି ।

ସେପଟେ ସ୍ୱାସ୍ଥ୍ୟ ସେବା କ୍ଷେତ୍ରରେ ଉଲ୍ଲେଖନୀୟ ଅବଦାନ ପାଇଁ ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ମନେ ପକାଯାଇଛି ।  ନବୀନ ବାବୁଙ୍କ ବେଳେ ବହୁ ମେଡିକାଲ କଲେଜ ଖୋଲିଛି । ଡାକ୍ତରଙ୍କ ସଂଖ୍ୟା ମଧ୍ୟ ବଢିଛି । ତେଣୁ ଡାକ୍ତର ଅଭାବ ଦୂର ହୋଇଯିବା କଥା । କିନ୍ତୁ ଏବେ ଯେଉଁଠି ସିଡିଏମଓ ନାହାନ୍ତି ସେଠି ସ୍ୱାସ୍ଥ୍ୟ ସେବା ଚାଲିଛି କେମିତି ବୋଲି ପ୍ରଶ୍ନ କରିଛନ୍ତି ଡାକ୍ତର ସଙ୍ଘର ପୂର୍ବତନ ସଭାପତି ମଧୁସୂଦନ ମିଶ୍ର । ମେଡ଼ିକାଲରେ ଏବେ ଲିପ୍ ସର୍ଭିସ ଚାଲିଛି । ତେଣୁ ଭଲ ସ୍ୱାସ୍ଥ୍ୟ ସେବା କେମିତି ମିଳିବ ବୋଲି ପ୍ରଶ୍ନ କରିଛନ୍ତି ଓମସାର ପୂର୍ବତନ ସଭାପତି । ରାଜ୍ୟରେ ନବନିର୍ବାଚିତ ମୋହନ ମାଝୀଙ୍କ ସରକାରରେ ମୌଳିକ ପ୍ରସଙ୍ଗକୁ ଗୁରୁତ୍ୱ ଦିଆଯାଉନାହିଁ ବୋଲି ଜନ ସଂଗଠନଗୁଡ଼ିକ ଅଭିଯୋଗ କରିଛନ୍ତି ।

ରାଜ୍ୟରେ ନୂଆ ଡାକ୍ତର ନିଯୁକ୍ତି ପାଇଁ ପଲିସି ମଧ୍ୟ କରାଯାଇ ନାହିଁ । ଯାହା ସରକାର ପ୍ରାଥମିକତା ଭତ୍ତିରେ କରିବା କଥା । ଡାକ୍ତର ସଂଖ୍ୟା ନ ବଢ଼ାଇ ଅନ୍ୟ ଗାଇଡ଼ଲାଇନ ଆସୁଛି । ଡାକ୍ତର ନିଯୁକ୍ତି ପାଇଁ ସ୍ଵଚ୍ଛ ନିଯୁକ୍ତି ଓ ବଦଳି ପ୍ରକ୍ରିୟା ରହିବା ନିହାତି ଦରକାର ।

ଓରେରାର ସଂଶୋଧିତ ବିଜ୍ଞପ୍ତିରେ କ୍ରେତାଙ୍କ ସୁରକ୍ଷାକୁ ଗୁରୁତ୍ବ, ବିଲ୍ଡରଙ୍କ ସମସ୍ୟା ଉପରେ ବି ନଜର

ଭୁବନେଶ୍ବର: ଆପାର୍ଟମେଣ୍ଟ କ୍ରେତାଙ୍କ ସ୍ବାର୍ଥ ସୁରକ୍ଷା ପାଇ ଓରେରା କର୍ତ୍ତୃପକ୍ଷ ଜୁଲାଇ ମାସର ବିଜ୍ଞପ୍ତିରେ ସଂଶୋଧନ କରିଛନ୍ତି । ସଂଶୋଧିତ ବିଜ୍ଞପ୍ତିରେ କ୍ରେତା ସଂଘକୁ ଅଧିକ ସଶକ୍ତ କରାଯାଇଛି । କେତ୍ରାଙ୍କ ସୁରକ୍ଷା ପାଇଁ ଲଢେଇ କରୁଥିବା ସଙ୍ଗଠନ ଏହାକୁ ସ୍ବାଗତ କରିଛନ୍ତି । ଏଥିରେ ବିଲ୍ଡର ବା ପ୍ରମୋଟରମାନଙ୍କ ସମସ୍ୟାକୁ ନଜର ରଖାଯାଇଛି । ରେରାର ସଂଶୋଧିତ ବିଜ୍ଞପ୍ତିକୁ ଉଭୟ କ୍ରେତା ଓ ବିକ୍ରେତା ସ୍ବାଗତ କରିଛନ୍ତି ।

ଆପାର୍ଟମେଣ୍ଟ ପ୍ରକଳ୍ପର ଭାଗ୍ୟ କ୍ରେତାଙ୍କ ହାତରେ । କ୍ରେତା ସଂଘ ଦେବ ପ୍ରୋଜେକ୍ଟ କମ୍ପ୍ଲିସନ୍ ସାର୍ଟିଫିକେଟ । କ୍ରେତା ହେଲେ ଅଧିକ ସଶକ୍ତ, ବିକ୍ରେତାଙ୍କୁ ବି ମିଳିଲା ରିହାତି । ଓରେରା ପକ୍ଷରୁ ସଂଶୋଧିତ ବିଜ୍ଞପ୍ତି ଜାରି । କୌଣସି ଆପାର୍ଟମେଣ୍ଟର କାମ ସରିଗଲେ ପ୍ରମୋଟରମାନଙ୍କୁ ୬ଟି ସର୍ତ୍ତ ପୂରଣ କରିବାକୁ ପଡୁଥିଲା । କମ୍ପ୍ଲିସନ୍ ସାର୍ଟିଫିକେଟ, ଅକ୍ୟୁପାନ୍ସି ସାର୍ଟିଫିକେଟ, କ୍ରେତା ସଂଘ ଗଠନ, ଲେ-ଆଉଟ ପ୍ଲାନ ସହ କମନ ଏରିଆ ସଂଘକୁ ହସ୍ତାନ୍ତର ପାଇଁ ଡିଡ ଦାଖଲ । ସମସ୍ତ ସର୍ତ୍ତ ପୂର୍ବ ଭଳି ଥିବା ବେଳେ ଏଣିକି କ୍ରେତା ସଂଘକୁ ପ୍ରମୋଟର ତରଫରୁ ସବୁ ମିଳିସାରିଛି ବୋଲି ସଂଘ ସାର୍ଟିଫିକେଟ ଦେବା ପରେ ହିଁ ପ୍ରମୋଟରଙ୍କୁ ମିଳିବ କମ୍ପ୍ଲିସନ ସାର୍ଟିଫିକେଟ । ଏହାଦ୍ବାରା ସବୁବେଳେ ଅପାର୍ଟମେଣ୍ଟ ମାଲିକମାନେ କରୁଥିବା ଅଭିଯୋଗ ଆଉ ରହିବ ନାହିଁ । ମାଲିକ ସଂଘ ହିଁ ସବୁ କିଛି ନିୟନ୍ତ୍ରଣ କରିବ । ଏହାକୁ କ୍ରେତାମାନେ ସ୍ବାଗତ କରିଛନ୍ତି ।

ରେରାର ସଂଶୋଧିକ ବିଜ୍ଞପ୍ତିରେ ପ୍ରମୋଟରମାନଙ୍କ ଲାଗି ମଧ୍ୟ ସୁବିଧା ଦିଆଯାଇଛି । ରେରା ଆଇନ ଅନୁସାରେ ଘର କିଣିବା ପାଇଁ କ୍ରେତା ଦେଉଥିବା ଅର୍ଥର ୭୦ ପ୍ରତିଶତ ଏକ ଅଲଗା ଆକାଉଣ୍ଟରେ ରହୁଥିଲା । ଏହି ଆକାଉଣ୍ଟରୁ ପ୍ରମୋଟର ପ୍ରକଳ୍ପ ପାଇଁ ଖର୍ଚ୍ଚ କରୁଥିଲା । ପ୍ରକଳ୍ପ ସରିବା ପରେ ଏହି ଆକାଉଣ୍ଟରେ ଥିବା ବଳକା ରାଶି ୫ ବର୍ଷ ପର୍ଯ୍ୟନ୍ତ ପ୍ରକଳ୍ପର ମରାମତି ପାଇଁ ରହୁଥିଲା । ହେଲେ ଅଧିକାଂଶ ପ୍ରମୋଟର ସବୁ ଅର୍ଥ ଖର୍ଚ୍ଚ ହୋଇଛି କହି ଏଥିରେ କିଛି କମା ରଖୁ ନଥିଲେ । ଯାହା ଫଳରେ ପ୍ରକଳ୍ପର ମରାମତି କାମ ପାଇଁ ହଇରାଣ ହେଉଥିଲେ ଆପାର୍ଟମେଣ୍ଟ ମାଲିକ । ଏଥିରେ ପରିବର୍ତ୍ତନ କରିଛି ରେରା । ପ୍ରକଳ୍ପ ଅଟକଳର ୧ ପ୍ରତିଶତ ଅର୍ଥ ପ୍ରମୋଟର ୫ ବର୍ଷ ପର୍ଯ୍ୟନ୍ତ ପ୍ରକଳ୍ପର ଓ୍ବାରେଣ୍ଟି ବାବଦରେ ରଖିବେ । ଏହି ଅର୍ଥରୁ କ୍ରେତା ସଂଘ ପ୍ରକଳ୍ପର ମେଣ୍ଟେନାନ୍ସ କରିପାରିବେ । ଏହା ପ୍ରମୋଟରମାନଙ୍କୁ ଆଶ୍ବସ୍ତ କରିଛି ।

ଓଡ଼ିଶା ଦେଶର ପ୍ରଥମ ରାଜ୍ୟ ଭାବେ ୨୦୨୩ରେ ସ୍ବତନ୍ତ୍ର ଭାବେ ଆପାର୍ଟମେଣ୍ଟ ଓନରସିପ୍ ଆକ୍ଟ ଆଣିଥିଲେ । ନୂଆ ବିଜ୍ଞପ୍ତିରେ ରେରା ଓ ଆପାର୍ଟମେଣ୍ଟ ଓନରସିପ ଆଇନ ମଧ୍ୟରେ ଉତ୍ତମ ସମନ୍ବୟ ରହିପାରିବ । ଏହାଦ୍ବାରା କ୍ରେତାଙ୍କ ସ୍ବାର୍ଥ ସୁରକ୍ଷା ଅଧିକ ହୋଇପାରିବ ।

ଓଡ଼ିଶାରେ ମହାନଦୀକୁ ମାରିଦେବକୁ ଛତିଶଗଡ଼ର ଷଡଯନ୍ତ୍ର, ଦୁଇ ସପ୍ତାହରେ ୩ ଫୁଟ କମିଲାଣି ଜଳସ୍ତର

ଭୁବନେଶ୍ବର: ଶୁଖିବାକୁ ବସିଲାଣି ଓଡ଼ିଶାର ଜୀବନରେଖା ମହାନଦୀ । ଲଗାତାର ଉପରମୁଣ୍ଡରୁ ମହାନଦୀରେ ପାଣି ଆସୁ ନଥିବାରୁ ହୀରାକୁଦ ଜଳଭଣ୍ଡାରରେ ଦେଖାଦେଲାଣି ଉତ୍କଟ ଜଳ ସମସ୍ୟା । ଦୁଇ ସପ୍ତାହକ ମଧ୍ୟରେ ମୋଟ ଜଳସ୍ତର ୩ ଫୁଟ କମିଲାଣି । ବିଜୁଳିଶକ୍ତି ଉତ୍ପାଦନ ଲାଗି କମ ପାଣି ବ୍ୟବହାର କରିବା ପାଇଁ ଓଏଚପିସିକୁ ଚିଠି ଲେଖି ଜଣାଇଛି ହୀରାକୁଦ ବନ୍ଧ କର୍ତ୍ତୃପକ୍ଷ । ଯେତେବେଳେ ବର୍ଷା କମି ଯାଇଛି ସେତେବେଳେ କଲମା ବ୍ଯାରେଜର ୬୦ ଗେଟକୁ ବନ୍ଦ କରିଦେଇଛି ଛତିଶଗଡ । ଫଳରେ ଏବେ ପାଣି ପାଇଁ ଡହଳବିକଳ ଓଡ଼ିଶାବାସୀ ।

ମହାନଦୀକୁ ନେଇ ଛତିଶଗଡ଼ କରୁଛି ସାଂଘାତିକ ଷଡ଼ଯନ୍ତ୍ର । ଓଡ଼ିଶାର ଜୀବନରେଖା ଭାବେ ପରିଚିତ ମହାନଦୀରେ ଶୁଖିଗଲାଣି ପାଣି । ଉପର ମୁଣ୍ଡରେ ପାଣି କମ ଆସୁଥିବାରୁ ହୀରାକୁଦ ଜଳଭଣ୍ଡାରରେ ଜଳସ୍ତର କ୍ରମାଗତ ଭାବେ ହ୍ରାସ ପାଇବାରେ ଲାଗିଛି । ବର୍ତ୍ତମାନ ହୀରାକୁଦ ଜଳଭଣ୍ଡାରରେ ଜଳସ୍ତର ୧୨ ଦିନରେ ୩ ଫୁଟ କମିଛି । ଯାହାକୁ ନେଇ ଚିନ୍ତା ପ୍ରକଟ କଲେଣି ଓଡ଼ିଶାବାସୀ । କାରଣ, ଯଦି ମୌସୁମୀ ଯିବାର କିଛି ଦିନ ମଧ୍ୟରେ ଏଭଳି ଅବସ୍ଥା ତେବେ ଆଗକୁ ସ୍ଥିତି କ’ଣ ହେବ ? ଅକ୍ଟୋବର ପ୍ରଥମ ସପ୍ତାହରେ ଜଳସ୍ତର ୬୩୦ ଫୁଟ ଥିବାବେଳେ ବର୍ତ୍ତମାନ ୬୨୭ ଫୁଟକୁ ଖସି ଆସିଛି । ଜଳସ୍ତର ଖସିବା ପରେ ଓଏଚପିସିକୁ ଚିଠି ଲେଖିଛନ୍ତି ହୀରାକୁଦ ବନ୍ଧ କର୍ତ୍ତୃପକ୍ଷ ।

ଏବେ ବର୍ଷା କମି ନଥିବା ବେଳେ ଛତିଶଗଡ଼ ଏଭଳି କାମ କଲାଣି । ଏମିତି ଯଦି ଚାଲେ  ଆଗକୁ ଓଡ଼ିଶା ଟିକିଏ ବି ପାଣି ପାଇବ ନାହିଁ, ତାହା ଏବେଠୁ ଜଳ ଜଳ ହୋଇ ଦିଶିଲାଣି । ଛତିଶଗଡ଼ର ଶେଷ ବ୍ଯାରେଜ କଲମାରେ ଏବେ କେବଳ ୬ଟି ଗେଟ୍ ଖୋଲା ଅଛି । ଯାହାକୁ ନେଇ ଓଡ଼ିଶାରେ ଅସନ୍ତୋଷ ପ୍ରକାଶ ପାଇଛି । କାରଣ ମହାନଦୀ ଟ୍ରିବ୍ୟୁନାଲ୍ ଯେତେବେଳେ ଛତିଶଗଡ ଯାଇଥିଲେ । ସେତେବେଳେ ଅକ୍ଟୋବର ମାସ ପର୍ଯ୍ୟନ୍ତ ପାଣି ଛାଡିବ ବୋଲି ନିଷ୍ପତ୍ତି ହୋଇଥିଲା । ହେଲେ ଛତିଶଗଡ଼ ଏବେଠାରୁ ପ୍ରାୟ ସମସ୍ତ ଗେଟ୍ ବନ୍ଦ କରି ଦେଇଥିବାରୁ ଏହାର ସିଧା ପ୍ରଭାବ ହୀରାକୁଦ ବନ୍ଧ ଉପରେ ପଡିଲାଣି ।

ବାତ୍ୟା ମୁକାବିଲା ପାଇଁ ରାଜ୍ୟ ସରକାରଙ୍କ ପ୍ରସ୍ତୁତି

ଭୁବନେଶ୍ବର: ଅକ୍ଟୋବରରେ ଓଡ଼ିଶାବାସୀକୁ ପୁଣି ଘାରିଛି ବାତ୍ୟା ଭୟ । ବଙ୍ଗୋପସାଗରରେ ଦାନା ବାନ୍ଧୁଛି ବାତ୍ୟା ‘ଦାନା’ । ଭାରତୀୟ ପାଣିପାଗ ବିଭାଗର ଆକଳନ ଅନୁସାରେ ଆଜି ରାତିରେ ଲଘୁଚାପ ସୃଷ୍ଟି ହୋଇ ୨୩ ତାରିଖ ସକାଳ ସୁଦ୍ଧା ପୂର୍ବ କେନ୍ଦ୍ରୀୟ ବଙ୍ଗୋପସାଗରରେ ନେବ ବାତ୍ୟାର ରୂପ । ୨୪ ତାରିଖରେ ସମ୍ଭାବ୍ୟ ବାତ୍ୟା ଓଡ଼ିଶା ଓ ପଶ୍ଚିମବଙ୍ଗ ଉପକୂଳ ଅତିକ୍ରମ କରିବାର ଆକଳନ କରିଛି ଆଇଏମଡି ।

ତେବେ ସାମ୍ଭାବ୍ୟ ବାତ୍ୟାର ମୁକାବିଲା ଲାଗି ରାଜ୍ୟ ସରକାର ପ୍ରସ୍ତୁତି ଆରମ୍ଭ କରି ଦେଇଛନ୍ତି । ରାଜୀବ ଭବନରେ ମୁଖ୍ୟ ଶାସନ ସଚିବଙ୍କ ଅଧ୍ୟକ୍ଷତାରେ ବୈଠକ ଅନୁଷ୍ଠିତ ହୋଇଛି । ଏସଆରସି ଦେଓରଞ୍ଜନ କୁମାର ସିଂ, ଉନ୍ନୟନ କମିଶନର ଅନୁ ଗର୍ଗ, କୃଷି ସଚିବ ଅରବିନ୍ଦ ପାଢ଼ୀ, ଫାୟାର ଡିଜି ସୁଧାଂଶୁ ଷଡ଼ଙ୍ଗୀ, ଲ ଆଣ୍ଡ ଅର୍ଡର୍ ଏଡିଜି ସଞ୍ଜୟ କୁମାର ଏବଂ ଭୁବନେଶ୍ବରରେ ପାଣିପାଗ କେନ୍ଦ୍ର ନିର୍ଦ୍ଦେଶକ ମନୋରମା ମହାନ୍ତିଙ୍କ ସମେତ ଅନ୍ୟାନ୍ୟ ବିଭାଗୀୟ ଅଧିକାରୀ ଯୋଗ ଦେଇଥିଲେ ।

ବୈଠକରେ ବାତ୍ଯା ନେଇ ସତର୍କତା ଜାରି କରାଯାଇଛି । ବାତ୍ୟା ମୁକାବିଲା ଲାଗି ପ୍ରସ୍ତୁତ ରହିବାକୁ ସବୁ ଜିଲ୍ଲାପାଳଙ୍କୁ ଏସଆରସି ନିର୍ଦ୍ଦେଶ ଦେଇଛନ୍ତି । ଯେକୌଣସି ସ୍ଥିତିର ମୁକାବିଲା ପାଇଁ ପ୍ରସ୍ତୁତ ରହିବାକୁ ନିର୍ଦ୍ଦେଶ ଦିଆଯାଇଛି । ତଳିଆ ଅଞ୍ଚଳରେ ଲଗାତାର ନଜର ରଖିବାକୁ କୁହାଯାଇଛି । ଏହାସହ ପ୍ରଭାବିତ ଅଞ୍ଚଳରେ ଅଯଥା ଚଳପ୍ରଚଳ ନକରିବାକୁ ପରାମର୍ଶ ଦିଆଯାଇଛି । ସହରାଞ୍ଚଳରେ ଜଳ ନିଷ୍କାସନ ଉପରେ ଗୁରୁତ୍ୱ ଦିଆଯାଇଛି । ସେହିପରି ଚାଷ ଜମିରେ ସାର ପ୍ରୟୋଗ ବନ୍ଦ ରଖିବା, ଗୋରୁଙ୍କୁ ସୁରକ୍ଷିତ ସ୍ଥାନରେ ରଖିବାକୁ ପରାମର୍ଶ ଦିଆଯାଇଛି ।

ବାତ୍ୟାକୁ ନେଇ ମତ୍ସ୍ୟଜୀବୀଙ୍କ ପାଇଁ ପରାମର୍ଶ ଜାରି କରାଯାଇଛି । ଏହି ସମୟରେ ସମୁଦ୍ର ଅଶାନ୍ତ ରହିବ । ଏଥିପାଇଁ ମତ୍ସ୍ୟଜୀବୀମାନଙ୍କୁ ସମୁଦ୍ର ଭିତରକୁ ନଯିବାକୁ ପରାମର୍ଶ ଦିଆଯାଇଛି । ସେହିପରି ସମୁଦ୍ରକୁ ଯାଇଥିବା ମତ୍ସ୍ୟଜୀବୀମାନେ କୂଳକୁ ଫେରି ଆସିବାକୁ ପରାମର୍ଶ ଦେଇଛନ୍ତି ।

ସେହିପରି ବାତ୍ୟା ଆଶଙ୍କାକୁ ନେଇ ଯୋଗାଣ ଓ ଖାଉଟି କଲ୍ୟାଣ ମନ୍ତ୍ରୀଙ୍କ ପ୍ରତିକ୍ରିୟା ଆସିଛି । କେହି ବି ଅତ୍ୟାବଶ୍ୟକ ସାମଗ୍ରୀର କଳାବଜାରୀ କରିବେ ନାହିଁ ବୋଲି ମନ୍ତ୍ରୀ କହିବା ସହ ବ୍ୟବସାୟୀଙ୍କୁ ସତର୍କ କରାଇଛନ୍ତି । ବିଭାଗୀୟ ଅଧିକାରୀଙ୍କୁ ସଜାଗ ରହିବାକୁ ନିର୍ଦ୍ଦେଶ ଦିଆଯାଇଛି । ଆବଶ୍ୟକ ପଡ଼ିଲେ ଚଢ଼ାଉ କରାଯିବ ବୋଲି ମନ୍ତ୍ରୀ କହିଛନ୍ତି ।

ମାଡ଼ି ଆସୁଛି ବାତ୍ୟା ‘ଦାନା’: କେଉଁଠି କରିବ ଲ୍ୟାଣ୍ଡଫଲ୍, କେତେ ରଚିବ ବିନାଶ ?

ଭୁବନେଶ୍ବର: ପୁଣି ଆସିଛି ଅକ୍ଟୋବର । ଆଉ ପୁଣି ଓଡ଼ିଶାବାସୀଙ୍କୁ ଘାରିଛି ବାତ୍ୟା ଭୟ । ବଙ୍ଗୋପସାଗରରେ ଦାନା ବାନ୍ଧୁଛି ବାତ୍ୟା ‘ଦାନା’ । ଭାରତୀୟ ପାଣିପାଗ ବିଭାଗର ଆକଳନ ଅନୁସାରେ ଆଜି ରାତିରେ ଲଘୁଚାପ ସୃଷ୍ଟି ହୋଇ ୨୩ ତାରିଖ ସକାଳ ସୁଦ୍ଧା ପୂର୍ବ କେନ୍ଦ୍ରୀୟ ବଙ୍ଗୋପସାଗରରେ ନେବ ବାତ୍ୟାର ରୂପ । ୨୪ ତାରିଖରେ ସମ୍ଭାବ୍ୟ ବାତ୍ୟା ଓଡ଼ିଶା ଓ ପଶ୍ଚିମବଙ୍ଗ ଉପକୂଳ ଅତିକ୍ରମ କରିବାର ଆକଳନ କରିଛି ଆଇଏମଡି । ଏହାର ପ୍ରଭାବରେ ପ୍ରବଳ ବର୍ଷା ଓ ଅଣଚାଷ ପବନ ହେବାର ପୂର୍ବାନୁମାନ କରାଯାଇଛି ।

ମାଡ଼ି ଆସୁଛି ବାତ୍ୟା ‘ଦାନା’ । ୨୩ରୁ ୨୭ ତାରିଖ ଯାଏଁ ନିର୍ଧୁମ୍ ବର୍ଷା । ଘଣ୍ଟାପ୍ରତି ୧୦୦ରୁ ୧୨୦ କି.ମି. ବେଗରେ ବହିବ ପବନ । ରେଡ୍ ଆଲର୍ଟରେ ୪ ଜିଲ୍ଲା । ୫ ଜିଲ୍ଲାକୁ ଅରେଞ୍ଜ ଆଲର୍ଟ । ଓଡ଼ିଶା-ପଶ୍ଚିମବଙ୍ଗ ଉପକୂଳରେ ହୋଇପାରେ ଲ୍ୟାଣ୍ଡଫଲ । ଆଜି ଏ ନେଇ ସ୍ପଷ୍ଟ କରିଛି ଭାରତୀୟ ପାଣିପାଗ ବିଭାଗ । ଆଇଏମଡିର ଆକଳନ ଅନୁସାରେ ଗତକାଲି ଆଣ୍ଡାମାନ ସାଗରରେ ସୃଷ୍ଟି ହୋଇଥିବା ଘୂର୍ଣ୍ଣିବଳୟ ଆଜି ରାତି ମଧ୍ୟରେ ଲଘୁଚାପର ରୂପ ନେବ । ୨୨ ତାରିଖ ସକାଳେ ଏହା ଅବପାତର ରୂପ ନେଇ ପଶ୍ଚିମ-ଉତ୍ତର-ପଶ୍ଚିମ ଦିଗରେ ଗତି କରିବ । ୨୩ ତାରିଖ ସକାଳେ ପୂର୍ବ କେନ୍ଦ୍ରୀୟ ବଙ୍ଗୋପସାଗରରେ ବାତ୍ୟାର ରୂପ ନେଇ ଉତ୍ତର-ପଶ୍ଚିମ ଦିଗରେ ଗତି କରିବ । ପରେ ଆହୁରି ଘନୀଭୁତ ହୋଇ ଏକ ଭୀଷଣ ବାତ୍ୟାର ରୂପ ନେଇ ପଶ୍ଚିମବଙ୍ଗ ଓ ଓଡ଼ିଶା ଉପକୂଳରେ ସ୍ଥଳଭାଗ ଛୁଇଁବ ବୋଲି ପୂର୍ବାନୁମାନ କରିଛି ଆଇଏମଡି ।

ସମ୍ଭାବ୍ୟ ବାତ୍ୟା ପ୍ରଭାବରେ ଆଜିଠାରୁ ରାଜ୍ୟର ପାଗ ପରିବର୍ତ୍ତନ ହେଲାଣି । ଆକାଶ ମେଘାଚ୍ଛନ୍ନ ରହିଛି । ୨୨ ତାରିଖରୁ କିଛି ଜିଲ୍ଲାରେ ଆରମ୍ଭ ହେବ ବର୍ଷା । ୨୩ରୁ ବଢିବ ବର୍ଷାର ପରିମାଣ । ପ୍ରବଳ ବର୍ଷା ହେବ ବୋଲି ୧୦ଟି ଜିଲ୍ଲାକୁ ୟେଲୋ ଆଲର୍ଟ ଜାରି କରାଯାଇଛି । ୨୪ ତାରିଖରେ ଜଗତସିଂହପୁର, ପୁରୀ, ଖୋର୍ଦ୍ଧା ଓ ଗଞ୍ଜାମ ଜିଲ୍ଲାରେ ଭୀଷଣ ବର୍ଷା ହୋଇପାରେ । ଏହି ସବୁ ଜିଲ୍ଲାକୁ ରେଡ ଆଲର୍ଟ ଜାରି କରାଯାଇଛି । ସେହିପରି ପ୍ରବଳରୁ ଅତି ପ୍ରବଳ ବର୍ଷା ନେଇ କେନ୍ଦ୍ରାପଡା, କଟକ, ନୟାଗଡ, କନ୍ଧମାଳ ଓ ଗଜପତି ଜିଲ୍ଲାକୁ ଅରେଞ୍ଜ ଆଲର୍ଟ ଜାରି କରିଛି ପାଣିପାଗ କେନ୍ଦ୍ର ।

ସମ୍ଭାବ୍ୟ ବାତ୍ୟା ‘ଦାନା’ ପ୍ରଭାବରେ ପାହାଡିଆ ଅଞ୍ଚଳରେ ଭୂସ୍ଖଳନ ହେବାର ଆଶଙ୍କା ଅଛି । ପ୍ରଭାବିତ ହୋଇପାରେ ରେଳ ଓ ସଡ଼କ ପରିବହନ । ବଡ଼ ବଡ଼ ଗଛ  ଭାଙ୍ଗିବାର, ବିଦ୍ୟୁତ ଖୁଣ୍ଟ ଉପୁଡ଼ିବାର ସମ୍ଭାବନା ରହିଛି । ବନ୍ଦର ଓ ଜାହାଜ ଚଳାଚଳ ନେଇ ମଧ୍ୟ ସତର୍କତା ଜାରି କରାଯାଇଛି । ପ୍ରବଳ ବର୍ଷା ହେବାର ଥିବାରୁ ତଳିଆ ଅଞ୍ଚଳରେ ସୃଷ୍ଟି ହୋଇପାରେ ଜଳବନ୍ଦୀ ପରିସ୍ଥିତି । ଏପରିକି ଗ୍ରାମାଞ୍ଚଳରେ ଉପୁଜି ପାରେ ବନ୍ୟା ସ୍ଥିତି । ସେହିପରି ବର୍ଷା ପବନରେ କ୍ଷତିଗ୍ରସ୍ତ ହେବ ପାଚିଲା ଧାନ । ସମୁଦ୍ରରେ ବଡ଼ ବଡ଼ ଜୁଆର ଆସିବାର ଆଶଙ୍କା ଥିବାରୁ ମତ୍ସ୍ୟଜୀବୀଙ୍କୁ ସତର୍କ କରାଯାଇଛି ।

୬ ବର୍ଷ ପରେ ଅକ୍ଟୋବର ମାସରେ ପୁଣି ଓଡ଼ିଶାକୁ ବାତ୍ୟା ହିଟ୍ କରିବାର ଆଶଙ୍କା ସୃଷ୍ଟି ହୋଇଛି । ବାତ୍ୟା ପାଇଁ ପାଗ ଅନୁକୂଳ ରହିଥିବାରୁ ଉପକୂଳ ଜିଲ୍ଲାଗୁଡିକ ଅଧିକ କ୍ଷତିଗ୍ରସ୍ତ ହୋଇପାରନ୍ତି ।

ସ୍କୁଲ ପାଚେରୀ ନିକଟରେ ବିସ୍ଫୋରଣ

ଦିଲ୍ଲୀ: ରୋହିଣୀ ପ୍ରଶାନ୍ତ ବିହାର ଅଞ୍ଚଳରେ ଥିବା ସିଆରପିଏଫ ସ୍କୁଲ ନିକଟରେ ବିସ୍ଫୋରଣ । ସ୍କୁଲର ପାଚେରୀ ନିକଟରେ ଘଟିଛି ବିସ୍ଫୋରଣ । ବିସ୍ଫୋରଣ ଖବର ପାଇବା ପରେ ପୋଲିସ ଓ ଏଫଏସଏଲର ଟିମ ଘଟଣା ସ୍ଥଳରେ ପହଞ୍ଚି ଥିବା ବେଳେ ତଦନ୍ତ ଆରମ୍ଭ ହୋଇଛି । ଡଗ୍ ସ୍କ୍ଵାଡ୍, ଆଣ୍ଟି ଟେରର ୟୁନିଟ ସହ ଏନଏସଜି କମାଣ୍ଡୋ ଆସି ଘଟଣାସ୍ଥଳରେ ପହଞ୍ଚି ତନାଘନା ଆରମ୍ଭ କରିଛନ୍ତି ।

ଆଶ୍ଵସ୍ତିର ଖବର ହେଉଛି ବିସ୍ଫୋରଣରେ କେହି ମୃତାହତ ହୋଇ ନଥିବା ଜଣାପଡ଼ିଛି । ରୋହିଣୀ ଡିସିପି ଘଟଣାସ୍ଥଳରେ ଉପସ୍ଥିତ ଅଛନ୍ତି । ଜଣେ ପ୍ରତକ୍ଷଦର୍ଶୀ ବିସ୍ଫୋରଣ ସମୟରେ ଭିଡିଓ ପୋଲିସକୁ ହସ୍ତାନ୍ତର କରିଛନ୍ତି । ବିସ୍ଫୋରଣର ତୀବ୍ର ଅତି ଉଚ୍ଚକ୍ଷମତା ସମ୍ପନ୍ନ ଥିବାରୁ ବୋମା ବିସ୍ଫୋରଣ ହୋଇଥିବା ସନ୍ଦେହ କରାଯାଉଛି । ପୋଲିସର ସ୍ପେଶାଲ ଟିମ ପହଞ୍ଚି ତଦନ୍ତ ଆରମ୍ଭ କରିଛନ୍ତି । ବିସ୍ଫୋରଣର ତୀବ୍ରତା ଏତେ ଜୋରଦାର ଥିଲା ଯେ ଆଖପାଖରେ ଥିବା ଗାଡିଗୁଡିକର କାଚ ଭାଙ୍ଗି ଯାଇଛି । ଅନେକ ଦୋକାନ କ୍ଷତିଗ୍ରସ୍ତ ହୋଇଛି । ସିଆରପିଏଫ୍ ସ୍କୁଲ ନିକଟରେ କିଛି ଦୋକାନ ଥିବାରୁ ଏଥିରୁ ସିଲିଣ୍ଡର ବ୍ଲାଷ୍ଟ ହୋଇଥିବା ମଧ୍ୟ ସନ୍ଦେହ କରାଯାଉଛି ।