ପୁରୀ : ଆଜି ବସୁଛି ଶ୍ରୀମନ୍ଦିର ଛତିଶା ନିଯୋଗ ବୈଠକ।ଶ୍ରୀମନ୍ଦିର ମୁଖ୍ୟ ପ୍ରଶାସକଙ୍କ ଅଧ୍ୟକ୍ଷତାରେ ଏହି ବୈଠକ ବସିବାକୁ ଥିବା ବେଳେ ଚଳିତ ମାସ ୧୪ ତାରିଖ ଠାରୁ ଆସନ୍ତା ମାସ ୧୫ ତାରିଖ ପର୍ଯ୍ୟନ୍ତ ହେବାକୁ ଥିବା କାର୍ତିକ ମାସ ବାଳଧୂପ ଭୋଗ ନୀତି ନିର୍ଘଣ୍ଟ ନେଇ ହେବ ଆଲୋଚନା।ସେହିପରି OBCC ଦ୍ୱାରା ଅବଢ଼ା ଯୋଜନାରେ ନାଟ ମଣ୍ଡପରେ AC ସ୍ଥାପନା ଓ ଶୃଙ୍ଖଳିତ ଦର୍ଶନ ବ୍ୟବସ୍ଥା ନେଇ କରାଯିବ ଆଲୋଚନା।ଅପରାହ୍ନରେ ବୈଠକ ହେବା ନେଇ ସ୍ଥିରୀକୃତ ହୋଇଥିବା ବେଳେ ବିଭିନ୍ନ ସେବାୟତ ନିଯୋଗର ପ୍ରତିନିଧି ମାନେ ଯୋଗଦାନ କରିବେ।
କାହା ବିରୋଧରେ କିଏ ଲଢୁଛନ୍ତି ଜାଣନ୍ତୁ…
ନନ୍ଦିଘୋଷ ବ୍ୟୁରୋ : ଆଜି ହରିୟାଣା ଓ ଜାମ୍ମୁ କାଶ୍ମୀର ବିଧାନସଭା ନିର୍ବାଚନର ଆସିବ ଫଳାଫଳ । ଗଣତି ପୂର୍ବରୁ ଜାଣନ୍ତୁ କେଉଁ ଆସନରୁ କିଏ ଲଢୁଛନ୍ତି ? ବହୁଚର୍ଚ୍ଚିତ ଗଡ଼ି-ସାମ୍ପଲା କିଲୋଇ ଆସନରେ କଂଗ୍ରେସରୁ ଲଢୁଛନ୍ତି ପୂର୍ବତନ ମୁଖ୍ଯମନ୍ତ୍ରୀ ଭୂପିନ୍ଦର ସିଂ ହୁଡ୍ଡା। ତାଙ୍କ ବିରୋଧରେ ପ୍ରାର୍ଥୀ ଅଛନ୍ତି ବିଜେପିର ମଞ୍ଜୁ ହୁଡ୍ଡା।
ତୋଷମ ଆସନରୁ ଲଢୁଛନ୍ତି କଂଗ୍ରେସର ଅନିରୁଦ୍ଧ ଚୌଧୁରୀ। ତାଙ୍କ ବିରୋଧରେ ପ୍ରାର୍ଥୀ ଅଛନ୍ତି ବିଜେପିର ଶ୍ରୁତି ଚୌଧୁରୀ। ପୂର୍ବତନ ମୁଖ୍ଯମନ୍ତ୍ରୀ ବଂଶୀଲାଲଙ୍କ ବଂଶଧର ଅନିରୁଦ୍ଧ ଓ ଶ୍ରୁତି। ବିସିସିଆଇର କୋଷାଧ୍ଯକ୍ଷ ଥିଲେ ଅନିରୁଦ୍ଧ।
ଅମ୍ବାଲା କାଣ୍ଟନମେଣ୍ଟ ଆସନରେ ଲଢୁଛନ୍ତି କଂଗ୍ରେସ ପରିବିନ୍ଦର ସିଂ ପରୀ। ତାଙ୍କ ବିରୋଧରେ ପ୍ରାର୍ଥୀ ଅଛନ୍ତି ମନ୍ତ୍ରୀ ତଥା ବିଜେପି ନେତା ଅନିଲ ଭିଜ। ୬ ଥରର ବିଧାୟକ ଅନିଲ ଭିଜ। ଲଡୱାରେ ଲଢୁଛନ୍ତି ମୁଖ୍ଯମନ୍ତ୍ରୀ ନାଏବ ସିଂ ସାଇନି। ତାଙ୍କ ବିରୋଧରେ ପ୍ରାର୍ଥୀ ଅଛନ୍ତି କଂଗ୍ରେସର ମେବା ସିଂ। ମନୋହର ଲାଲ ଖଟ୍ଟରଙ୍କ ଇସ୍ତଫା ପରେ ସାଇନି ହୋଇଥିଲେ ସିଏମ।
ବଦଲିରେ କଂଗ୍ରେସର ପ୍ରାର୍ଥୀ ହୋଇଛନ୍ତି କୁଳଦୀପ ଭାଟସ ତାଙ୍କ ବିରୋଧରେ ଲଢେଇ କରୁଛନ୍ତି ବିଜେପିର ଓ. ପି. ଧନକର। ହରିୟାଣାର ପୂର୍ବତନ ବିଜେପି ସଭାପତି ଧନକର। ହୋଡଲରୁ ପ୍ରାର୍ଥୀ ହୋଇଛନ୍ତି କଂଗ୍ରେସ ହେଭିୱେଟ ଉଦୟଭାନ। ହୋଡାଲ ଆସନରୁ ୪ ଥର ବିଜୟୀ ହୋଇଛନ୍ତି ଉଦୟ ଭାନ। ପିସିସି ସଭାପତି ଅଛନ୍ତି ଉଦୟ ଭାନ।
ହିସାରରେ କଂଗ୍ରେସର ରାମ ନିବାସ ରାଡ଼ା, ବିଜେପିର କମଲ ଗୁପ୍ତା ଓ ସ୍ବାଧୀନ ପ୍ରାର୍ଥୀ ସାବିତ୍ରୀ ଜିନ୍ଦଲଙ୍କ ମଧ୍ଯରେ ହେଉଛି ଲଢେଇ। ଭାରତର ସବୁଠାରୁ ଧନୀ ମହିଳା ସାବିତ୍ରୀ ଜିନ୍ଦଲ। ତାଙ୍କ ସ୍ବାମୀ ଓମ ପ୍ରକାଶ ଜିନ୍ଦଲ ହିସାରରୁ ଜିତିଥିଲେ ୩ ଥର
କୈଥଲରେ ପ୍ରାର୍ଥୀ ଅଛନ୍ତି ଆଦିତ୍ଯ ସୂର୍ଯେୱାଲା, କଂଗ୍ରେସ ହେଭିୱେଟ ରଣଦୀପ ସୂର୍ଯେୱାଲାଙ୍କ ପୁଅ ଆଦିତ୍ଯ। ତାଙ୍କୁ ଟକ୍କର ଦେଉଛନ୍ତି ବିଜେପିର ଲୀଲା ରାମ। ବହୁଚର୍ଚ୍ଚିତ ଆସନ ଜୁଲାନାରୁ କଂଗ୍ରେସ ପ୍ରାର୍ଥୀ ହୋଇଛନ୍ତି ରେସଲର ଭିନେଶ ଫୋଗଟ। ତାଙ୍କ ବିରୋଧରେ ପ୍ରାର୍ଥୀ ହୋଇଛନ୍ତି ବିଜେପିର ପରମିନ୍ଦର ସିଂ ଗୁଲ। ରେସଲର ଭାବେ ଖ୍ଯାତି ଅର୍ଜନ କରିଛନ୍ତି ଭିନେଶ।
ଉଚାନାରେ କଂଗ୍ରେସର ବ୍ରିଜେନ୍ଦ୍ର ସିଂ, ବିଜେପିର ଦେବେନ୍ଦ୍ର ଅତ୍ରି, ଓ ଜେଜେପିର ଦୁଶ୍ଯନ୍ତ ଚୌଟାଲାଙ୍କ ମଧ୍ଯରେ ଲଢେଇ ହେଉଛି। ପୂର୍ବତନ ଉପମୁଖ୍ଯମନ୍ତ୍ରୀ ତଥା ଜେଜେପି ନେତା ଦୁଶ୍ଯନ୍ତ। ସିରସାରେ କଂଗ୍ରେସର ଗୋକୁଳ ସେଟିୟା, ଏଚଏଲପିର ଗୋପାଳ ଗୋୟଲ କାଣ୍ଡା ଓ ଆଇଏନଏଲଡିର ଅଭୟ ସିଂଙ୍କ ମଧ୍ଯରେ ହେଉଛି ଲଢେଇ। କର୍ଣ୍ଣଲରେ କଂଗ୍ରେସର ସୁମିତା ବିର୍କ, ବିଜେପିର ଜଗମୋହନ ଆନନ୍ଦଙ୍କ ମଧ୍ଯରେ ହେଉଛି ଟକ୍କର।
ଆଜି ହରିୟାଣା ଓ ଜାମ୍ମୁ କାଶ୍ମୀର ବିଧାନସଭା ନିର୍ବାଚନର ହେବ ଭୋଟ ଗଣତି
ନନ୍ଦିଘୋଷ ବ୍ୟୁରୋ : ଆଜି ରେଜଲ୍ଟ ଡେ। ହରିୟାଣା ଓ ଜାମ୍ମୁ କାଶ୍ମୀର ବିଧାନସଭା ନିର୍ବାଚନର ହେବ ଭୋଟ ଗଣତି। କାଉଣ୍ଟିଂ ଲାଗି ଦୁଇ ରାଜ୍ୟରେ ପ୍ରଶାସନ ପକ୍ଷରୁ ବ୍ଯାପକ ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି । ଭୋଟ ଗଣତି କେନ୍ଦ୍ରରେ ସୁରକ୍ଷା କଡାକଡ଼ି କରାଯାଇଛି। ସକାଳ ୮ଟାରୁ ଆରମ୍ଭ ହେବ ଭୋଟ ଗଣତି। ହରିୟାଣାରେ ଗୋଟିଏ ପର୍ଯ୍ୟାୟରେ ଗତ ଅକ୍ଟୋବର ପହିଲାରେ ଭୋଟଗ୍ରହଣ ଶେଷ ହୋଇଥିଲା । ହରିୟାଣା ବିଧାନସଭାର ମୋଟ ୯୦ ଆସନରେ ଭୋଟଗ୍ରହଣ ହୋଇଥିଲା। ସେହିପରି ଜାମ୍ମମୁ କାଶ୍ମୀର ବିଧାନସଭା ନିର୍ବାଚନ ଲାଗି ୩ଟି ପର୍ଯ୍ୟାୟରେ ଭୋଟ ଗ୍ରହଣ ହୋଇଥିଲା। ସେପ୍ଟେମ୍ବର ୧୮ରେ ପ୍ରଥମ, ସେପ୍ଟେମ୍ବର ୨୫ରେ ଦ୍ଵିତୀୟ ଏବଂ ଅକ୍ଟୋବର ୧ରେ ଶେଷ ପର୍ଯ୍ୟାୟ ଭୋଟ ଗ୍ରହଣ ଶେଷ ହୋଇଛି। ଜାମ୍ମୁ କାଶ୍ମୀରରେ ବିଧାନସଭାର ମୋଟ ୯୦ ଆସନରେ ଭୋଟଗ୍ରହଣ ଶେଷ ହୋଇଛି। ଜାମ୍ମୁ କାଶ୍ମୀରରେ ୨୦୧୪ରେ ଶେଷ ଥର ଲାଗି ନିର୍ବାଚନ ହୋଇଥିବାବେଳେ ୨୦୧୮ରେ ଲାଗୁ ହୋଇଥିଲା ରାଜ୍ଯପାଳ ଶାସନ। ୩୭୦ ଧାରା ଉଚ୍ଛେଦ ନେଇ ବେଶ ଚର୍ଚ୍ଚାର ଘେରକୁ ଆସିଥିଲା ଜାମ୍ମୁ କାଶ୍ମୀର। ୩୭୦ ଉଚ୍ଛେଦ ହେବା ପରେ ପ୍ରଥମଥର ଲାଗି ଜାମ୍ମୁ କାଶ୍ମୀରରେ ଭୋଟଗ୍ରହଣ ହୋଇଛି।
ଆସନ୍ତାକାଲି ହରିୟାଣା ଓ ଜମ୍ମୁ କାଶ୍ମୀର ଭୋଟ ଗଣତି
ଭୁବନେଶ୍ବର: ଆସନ୍ତାକାଲି ରେଜଲ୍ଟ ଡେ’ । ହରିୟାଣା ଓ ଜାମ୍ମୁ କାଶ୍ମୀର ବିଧାନସଭା ନିର୍ବାଚନର ହେବ ଭୋଟ ଗଣତି । ଦୁଇ ରାଜ୍ୟରେ ପ୍ରଶାସନ ପକ୍ଷରୁ ବ୍ଯାପକ ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି । ଭୋଟ ଗଣତି କେନ୍ଦ୍ରରେ ସୁରକ୍ଷା କଡାକଡ଼ି କରାଯାଇଛି ।
ସକାଳ ୮ଟାରୁ ଆରମ୍ଭ ହେବ ଭୋଟ ଗଣତି । ଏଥିଲାଗି ପ୍ରସ୍ତୁତି ପ୍ରାୟ ଶେଷ ହୋଇଛି । ଭୋର ୫ଟାରୁ ଆସି ଭୋଟ ଗଣତି କେନ୍ଦ୍ରରେ ପହଞ୍ଚିବେ ଟିମ୍ । ଏହାପରେ ଭୋଟ ଗଣତି ଆରମ୍ଭ ହେବ । ହରିୟାଣାରେ ଗୋଟିଏ ପର୍ଯ୍ୟାୟରେ ଗତ ଅକ୍ଟୋବର ପହିଲାରେ ଭୋଟ ଗ୍ରହଣ ଶେଷ ହୋଇଛି । ହରିୟାଣା ବିଧାନସଭାର ମୋଟ ୯୦ ଆସନରେ ଭୋଟ ଗ୍ରହଣ ହୋଇଥିଲା ।
ସେହିପରି ଜାମ୍ମମୁ କାଶ୍ମୀର ବିଧାନସଭା ନିର୍ବାଚନରେ ୩ଟି ପର୍ଯ୍ୟାୟରେ ଭୋଟ ଗ୍ରହଣ ହୋଇଥିଲା । ସେପ୍ଟେମ୍ବର ୧୮, ୨୫ ଏବଂ ଅକ୍ଟୋବର ୧ରେ ଶେଷ ପର୍ଯ୍ୟାୟ ଭୋଟ ଗ୍ରହଣ ସରିଛି । ଜାମ୍ମୁ କାଶ୍ମୀରରେ ମଧ୍ୟ ମୋଟ ୯୦ ଆସନରେ ଭୋଟ ଗ୍ରହଣ ଶେଷ ହୋଇଛି । ଜାମ୍ମୁ କାଶ୍ମୀରରେ ୨୦୧୪ରେ ଶେଷ ଥର ଲାଗି ନିର୍ବାଚନ ହୋଇଥିବାବେଳେ ୨୦୧୮ରେ ଲାଗୁ ହୋଇଥିଲା ରାଜ୍ଯପାଳ ଶାସନ ।
ହିଂସା ଛାଡି ସମାଜର ମୁଖ୍ୟସ୍ରୋତରେ ସାମିଲ ହେବାକୁ ମାଓବାଦୀଙ୍କୁ ଅମିତ ଶାହଙ୍କ ଆହ୍ବାନ
ନୂଆଦିଲ୍ଲୀ: ହିଂସା ଛାଡ଼ି ସମାଜର ମୁଖ୍ୟସ୍ରୋତରେ ସାମିଲ ହେବାକୁ ଲାଲବାହିନୀକୁ ଆହ୍ଵାନ ଦେଇଛନ୍ତି କେନ୍ଦ୍ର ଗୃହ ମନ୍ତ୍ରୀ ଅମିତ ଶାହ । ବିଶେଷ କରି ଯୁବ କ୍ୟାଡରଙ୍କୁ ସେ ଏହି ଅନୁରୋଧ କରିଛନ୍ତି । ନକ୍ସଲ ସମସ୍ୟାକୁ ନେଇ ଦିଲ୍ଲୀରେ ହୋଇଥିବା ବୈଠକରେ ଅମିତ ଶାହା କହିଛନ୍ତି, ଯୁବ ପୀଢ଼ିଙ୍କୁ ବିଭ୍ରାନ୍ତ କରି ଲାଲବାହିନୀରେ ସାମିଲ କରାଯାଉଛି । ସେମାନେ ଅସ୍ତ୍ର ତ୍ୟାଗ କରି ସମାଜର ମୁଖ୍ୟସ୍ରୋତରେ ସାମିଲ ହେବା ଉଚିତ । ଐହି ଅବସରରେ ନକ୍ସଲ ବିରୋଧୀ ଅପରେସନରେ ସଫଳତା ପାଇଁ ସୁରକ୍ଷାକର୍ମୀଙ୍କୁ ଅଭିନନ୍ଦନ ଜଣାଇଛନ୍ତି ଶାହା ।
ସେ କହିଛନ୍ତି, ନକ୍ସଲ ହିଂସା ସଂଖ୍ୟା ୧୬ ହଜାର ୪୬୩ରୁ ୭ ହଜାର ୭୭୦କୁ ଖସିଛି । ଆସନ୍ତା ବର୍ଷ ଆହୁରି କମିବ । ସାଧାରଣ ଲୋକ ଓ ସୁରକ୍ଷାକର୍ମୀଙ୍କ ମୃତ୍ୟୁ ସଂଖ୍ୟା ବି ୭୦ ପ୍ରତିଶତ କମିଛି । ନକ୍ସଲ ପ୍ରଭାବିତ ଜିଲ୍ଲା ସଂଖ୍ୟା ୯୬ରୁ ୪୨କୁ ହ୍ରାସ ପାଇଛି । ସେହିପରି ଏବେ ମାତ୍ର ୧୨୦ଟି ଥାନା ଅଞ୍ଚଳରେ ନକ୍ସଲ ହିଂସା ଦେଖା ଦେଇଛି । ଏହି ସବୁ ଅଞ୍ଚଳରେ ବିକାଶ କାମ ଜାରି ରଖିବାକୁ ସେ ପ୍ରତିଶ୍ରୁତି ଦେଇଛନ୍ତି ।
ଆଗକୁ ସେ କହିଛନ୍ତି, ସୁରକ୍ଷା ପାଇଁ ଗତ ୧୦ ବର୍ଷରେ ୩ ହଜାର କୋଟି ଟଙ୍କା ଖର୍ଚ୍ଚ ହୋଇଛି । କେନ୍ଦ୍ରର ସ୍ଵତନ୍ତ୍ର ସହାୟତା ଯୋଜନାରେ ଖର୍ଚ୍ଚ ହୋଇଛି ପ୍ରାୟ ୪ ହଜାର କୋଟି । ୫୪୪ ଥାନାର ଆଧୁନିକୀକରଣ କରାଯାଇଥିବା ବେଳେ ନକ୍ସଲ ଅଞ୍ଚଳରେ ଗତ ୧୦ ବର୍ଷରେ ୧୧ ହଜାର ୫ ଶହ କିମି ରାସ୍ତା ତିଆରି ହୋଇଛି । ସେହିପରି ସ୍ଥାପନ କରାଯାଇଛି ୧୫ ହଜାର ୩୦୦ ମୋବାଇଲ ଟାୱାର । ୨୦୨୪ର ପ୍ରଥମ ୧୦ ମାସରେ ଛତିଶଗଡ଼ରେ ୧୯୪ ନକ୍ସଲ ନିହତ ହୋଇଥିବା ବେଳେ ୮ ଶହରୁ ଅଧିକ ଗିରଫ ହୋଇଛନ୍ତି । ସେହିପରି ୭୫୦ ନକ୍ସଲ ଆତ୍ମସମର୍ପଣ କରିଛନ୍ତି । ଯେଉଁମାନେ ଆତ୍ମସମର୍ପଣ କରିଛନ୍ତି, ସେମାନଙ୍କ ଥଇଥାନ ପାଇଁ ମଧ୍ୟ ବ୍ୟାପକ ବ୍ୟବସ୍ଥା କରାଯାଇଛି ।
ପାସପୋର୍ଟ ଅଫିସ ଭିତରକୁ ପ୍ରବେଶ ଅନୁମତି ନାହିଁ, ଗ୍ରାହକ ହତାଦର
ଭୁବନେଶ୍ବର: ନୟାପଲ୍ଲୀ ପାସପୋର୍ଟ ସେବା କେନ୍ଦ୍ରରେ ଗ୍ରାହକଙ୍କୁ ହତାଦର । ପାସପୋର୍ଟ ସମ୍ପର୍କରେ ବୁଝିବାକୁ ଆସିଲେ ନା ମିଳୁଛି ସଠିକ ଉତ୍ତର ନା ଅଫିସ ଭିତରକୁ ପ୍ରବେଶ ଅନୁମତି । ସୁରକ୍ଷାକର୍ମୀଙ୍କ ଦାଦାଗିରି ଅତିଷ୍ଠ କରୁଛି ପାସପୋର୍ଟ ସେବା ପାଇଁ ଆସିଥିବା ଲୋକଙ୍କୁ ବରିଷ୍ଠ ନାଗରିକଙ୍କଠାରୁ ଆରମ୍ଭ କରି ଶିଶୁ ଓ ମହିଳାଙ୍କୁ ଗେଟ ବାହାରେ ଖରାତରାରେ ଛିଡା ହେବାକୁ ପଡୁଛି । ୧୦ଟାରୁ ୨ଟା ଯାଏଁ ଇନକ୍ୟୁାରି ସମୟ ଥିଲେ ବି ଅଫିସ ପରିସରକୁ ଲୋକଙ୍କୁ ଛାଡୁ ନାହିଁ ସିକ୍ୟୁରିଟି । ଯେଉଁଥିପାଇଁ ଆଜି କାର୍ଯ୍ୟଳୟ ସାମ୍ନାରେ ଉତ୍ତେଜନା ସୃଷ୍ଟି ହୋଇଥିଲା ।
ସମସ୍ତଙ୍କ ଅଭିଯୋଗ, ଏଠି କିଛି ବ୍ୟବସ୍ଥା ନାହିଁ । କେହି କାହା କଥା ଶୁଣୁନାହାଁନ୍ତି । ସୁରକ୍ଷାକର୍ମୀଙ୍କ ଭରସାରେ ଚାଲିଛି ପାସପୋର୍ଟ ସେବା କେନ୍ଦ୍ର । ଗେଟ କାହିଁକି ବନ୍ଦ ଅଛି ତାହାର ବି ସ୍ପଷ୍ଟ ଉତ୍ତର କାହା ପାଖରେ ନାହିଁ । ବୟସ୍କ ଲୋକ ଖରା ତରାରେ ଠିଆ ହୋଇ ଫେରୁଛନ୍ତି, ହେଲେ କେହି କିଛି ଶୁଣିବାକୁ ନାରାଜ ।
ଲୋକଙ୍କ ଅଭିଯୋଗ ଶୁଣିବା ପରେ, ସୁରକ୍ଷା କର୍ମୀ ଏବଂ କାର୍ଯ୍ୟାଳୟର କର୍ମଚାରୀଙ୍କ ସହ ନନ୍ଦିଘୋଷ ଟିମ କଥା ହେବା ପରେ ନିଜର ତ୍ରୁଟି ସୁଧାରିଥିଲେ କର୍ମଚାରୀ । ବହୁ ବାଦବିବାଦ ପରେ ଦୂରଦୁରାନ୍ତରୁ ଆସିଥିବା ଲୋକଙ୍କୁ ଅଫିସ ଭିତରକୁ ଛଡ଼ାଯାଇଥିଲା । ସାମୟିକ ଭାବେ ସ୍ଥିତି ନିୟନ୍ତ୍ରଣକୁ ଆସିଥିଲେ ବି ଏହା ଏକ ନିତିଦିନିଆ ସମସ୍ୟା ହୋଇଥିବାରୁ କର୍ତ୍ତୃପକ୍ଷ ଏଥିପ୍ରତି ନଜର ଦେବା କଥା । ପାସପୋର୍ଟ ସେବା ନାଁରେ କେତେବେଳେ ଦଲାଲ ଲୋକଙ୍କୁ ଠକୁଛନ୍ତି ତ’, ଆଉ କେତେବେଳେ କାର୍ଯ୍ୟାଳୟ କର୍ମଚାରୀମାନେ ଲୋକଙ୍କୁ ଦୁର୍ବ୍ୟବହାର କରିବାର ଅଭିଯୋଗ ଆସୁଛି ।
ପୁଣି ରଙ୍ଗ ବଦଳାଇଲା ମୋହନ ସରକାର, ଗେରୁଆ ହେବ ସରକାରୀ କୋଠା
ଭୁବନେଶ୍ବର: ସରକାର ଗଠନ ପରଠାରୁ ବିଜେପି କିଛି କରୁ ବା ନକରୁ ରଙ୍ଗ ବଦଳାଇବାରେ ଲାଗିଛି । ଏବେ ସରକାରୀ କୋଠାର ପାଳି । ଗେରୁଆ ହେବ ସରକାରୀ କୋଠା । ରାଜ୍ୟର ସବୁ ସରକାରୀ କୋଠାର ରଙ୍ଗ ବଦଳିବ । ପୂର୍ତ୍ତ ବିଭାଗର ସ୍ୱତନ୍ତ୍ର ସଚିବ ଏନେଇ ପୂର୍ତ୍ତ ବିଭାଗ ଅଧୀନରେ ଥିବା ସବୁ ସର୍ବୋଚ୍ଚ ଯନ୍ତ୍ରୀଙ୍କୁ ଚିଠି ଲେଖିଛନ୍ତି ।
ତଦନୁଯାୟୀ ସରକାରୀ ବିଲ୍ଡିଂର ବାହାର କାନ୍ଥ ହେବ ଗେରୁଆ ରଙ୍ଗ ଓ କାନ୍ଥର ଧଡିକୁ ଲାଲ ରଙ୍ଗ କରାଯିବ । କିଭଳି ରଙ୍ଗ ହେବ ତାର ନମୁନା ମଧ୍ୟ ବିଭାଗ ପକ୍ଷରୁ ଏହି ଚିଠିରେ ନମୂନା ଦିଆଯାଇଛି । ଏହାକୁ ନେଇ ବିଭିନ୍ନ ମହଲରେ ପ୍ରତିକ୍ରିୟା ସୃଷ୍ଟି ହୋଇଥିବା ବେଳେ ପୂର୍ତ୍ତମନ୍ତ୍ରୀ ପୃଥ୍ବୀରାଜ ହରିଚନ୍ଦନ କହିଛନ୍ତି ଯେ, ସବୁ ବିଭାଗ ସହ ଆଲୋଚନା ପରେ ସରକାର ଏହି ନିଷ୍ପତ୍ତି ନେଇଛନ୍ତି ।
ଜନସମ୍ପର୍କ ପଦଯାତ୍ରାରୁ ମିଳିଛି ଭଲ ଫିଡବ୍ଯାକ୍, ଡବଲ ଇଞ୍ଜିନ ସରକାରର ବିଫଳତାକୁ କରାଯିବ ଅସ୍ତ୍ର
ଭୁବନେଶ୍ବର: ସଂଗଠନକୁ ଆହୁରି ମଜଭୁତ କରିବାକୁ ବିଜେଡି ଘନ ଘନ ବୈଠକ । ଆଗାମୀ କାର୍ଯ୍ୟ ଖସଡ଼ାର ରୋଡମ୍ୟାପ୍ ପ୍ରସ୍ତୁତ ହେବା ସହ ବିଭିନ୍ନ କାର୍ଯ୍ୟକ୍ରମର ଫିଡବ୍ୟାକ ନେଉଛନ୍ତି ଦଳୀୟ ସଭାପତି ନବୀନ ପଟ୍ଟନାୟକ । ଗତକାଲି ବିଜେଡିର ବରିଷ୍ଠ ନେତାଙ୍କୁ ନେଇ ପରାମର୍ଶଦାତା କମିଟି ବୈଠକ ବସିଥିଲା । ଯେଉଁଥିରେ ପଦଯାତ୍ରା, ସଭ୍ୟ ସଂଗ୍ରହ ଓ ଡବଲ ଇଞ୍ଜିନ ସରକାରର ବିଫଳତା ବିରୋଧରେ ଜନ ସଚେତନତା ପାଇଁ ମିଳିଛି ନବୀନଙ୍କ ଅନୁମୋଦନ । ଅକ୍ଟୋବର ୯ରେ ଆରମ୍ଭ ହେବାକୁ ଥିବା ସଦସ୍ୟ ସଂଗ୍ରହ ଅଭିଯାନ ସମସ୍ତ ସାଂଗଠନିକ ଜିଲ୍ଲାରେ ଭର୍ଚୁଆଲ୍ ମୋଡରେ ହେବ ।
ବିଜେଡି ସମନ୍ବୟ କମିଟି, ଉପଦେଷ୍ଟା କମିଟି, କାର୍ଯ୍ୟକ୍ରମ କାର୍ଯ୍ୟକାରିତା କମିଟି ଓ ସଦସ୍ୟ ସଂଗ୍ରହ କମିଟି ମିଳିତ ଭାବେ ଦଳୀୟ କାର୍ଯ୍ୟ ଖସଡ଼ା ପ୍ରସ୍ତୁତ କରୁଛନ୍ତି । ଯାହାକୁ ମିଳିଛି ଦଳୀୟ ସଭାପତି ନବୀନ ପଟ୍ଟନାୟକଙ୍କ ଅନୁମୋଦନ । ଉପଦେଷ୍ଟା କମିଟି, କାର୍ଯ୍ୟକ୍ରମ କାର୍ଯ୍ୟକାରିତା କମିଟି ଓ ସଦସ୍ୟ ସଂଗ୍ରହ କମିଟିକୁ ସହଯୋଗ କରିବାକୁ ସମନ୍ବୟ କମିଟିର ଗଠନ କରିଛନ୍ତି ନବୀନ । ଦଳର ବରିଷ୍ଠ ନେତାଙ୍କୁ ନେଇ ଉପଦେଷ୍ଟା କମିଟି ବୈଠକରେ ୩ଟି ଗୁରୁତ୍ବପୂର୍ଣ୍ଣ ନିଷ୍ପତ୍ତି ନିଆଯାଇଛି । ଯାହା ଅନ୍ୟ କମିଟି ଗୁଡ଼ିକୁ କାର୍ଯ୍ୟକାରୀ କରିବାକୁ ଅବଗତ କରାଯାଇଛି । ଜନସମ୍ପର୍କ ପଦଯାତ୍ରାର ପ୍ରଥମ ପର୍ଯ୍ୟାୟ କିଏ କେଉଁ ନିର୍ବାଚନ ମଣ୍ଡଳୀରେ କରିଛନ୍ତି ଓ ଲୋକଙ୍କ ଫିଡବ୍ୟାକ କ’ଣ ଥିଲା, ତାହା ସମୀକ୍ଷା କରାଯାଇଛି । ଦ୍ଵିତୀୟ ପର୍ଯ୍ୟାୟ ପଦଯାତ୍ରା ବଳକା ନିର୍ବାଚନ ମଣ୍ଡଳୀରେ କେମିତି ହେବ ତାକୁ ଗୁରୁତ୍ବ ଦିଆଯାଇଛି । ସେହିପରି ଅକ୍ଟୋବର ୯ ଗୋପବନ୍ଧୁ ଜୟନ୍ତୀରେ ସଭ୍ୟ ସଂଗ୍ରହ କାର୍ଯ୍ୟକ୍ରମ ତ୍ବରାନ୍ବିତ କରିବା ପାଇଁ ମଧ୍ୟ ନିଷ୍ପତ୍ତି ନିଆଯାଇଛି । ଶେଷ ନିଷ୍ପତ୍ତି ଅତ୍ୟନ୍ତ ଗୁରୁତ୍ବପୂର୍ଣ୍ଣ । କାରଣ ଏହା ଦଳଠାରୁ ଊର୍ଦ୍ଧ୍ବରେ ରହି ରାଜ୍ୟବାସୀଙ୍କ ସ୍ବାର୍ଥ ସମ୍ବଳିତ ନିଷ୍ପତ୍ତି । ଗତ ୧୦୦ ଦିନରେ ନୂଆ ସରକାର ବିଫଳ ହୋଇଥିବା ପୁଣି ଦୋହରାଇଛି ବିଜେଡି । ବିପର୍ଯ୍ୟସ୍ତ ଆଇନଶୃଙ୍ଖଳା ପରିସ୍ଥିତି, ନାରୀ ନିର୍ଯାତନା, ଦରଦାମ ବୃଦ୍ଧି ଓ ମିଛ ନିର୍ବାଚନୀ ପ୍ରତିଶ୍ରୁତି ସମ୍ପର୍କରେ ଲୋକଙ୍କୁ ବିଭିନ୍ନ ଫୋରମରେ ସଚେତନ କରିବେ ନବୀନ ବ୍ରିଗେଡ୍ ।
ଏଥର ନୂଆ ଢାଞ୍ଚାରେ ହେବ ସଦସ୍ୟ ସଂଗ୍ରହ ଅଭିଯାନର ଶୁଭାରମ୍ଭ । ଅକ୍ଟୋବର ୯ ଗୋପବନ୍ଧୁ ଜୟନ୍ତୀରେ ଦିନ ୧୧ଟାରେ ଶଙ୍ଖ ଭବନରେ ଶୁଭାରମ୍ଭ କରିବେ ବିଜେଡି ସଭାପତି ନବୀନ ପଟ୍ଟନାୟକ । ଏହି ସମୟରେ ସମସ୍ତ ସାଙ୍ଗଠନିକ ଜିଲ୍ଲାରେ ଭର୍ଚୁଆଲ ମାଧ୍ୟମରେ କାର୍ଯ୍ୟକ୍ରମ କରାଯାଇ ଲୋକଙ୍କୁ ଯୋଡ଼ିବାକୁ ନିର୍ଦ୍ଦେଶ ଦିଆଯାଇଛି । ଏଥିରେ ଜିଲ୍ଲାସ୍ତରୀୟ ନେତା ଓ କର୍ମୀ ସାମିଲ ହେବେ ।
ପ୍ରଥମ ପର୍ଯ୍ୟାୟ ପଦଯାତ୍ରାରେ ଗାଁରୁ ସହର ଯାଏଁ ଲୋକ ସାମିଲ ହୋଇଥିଲେ । ଲୋକଙ୍କ ଭିତରେ ନାହିଁ ନଥିବା ଉତ୍ସାହ ଦେବାକୁ ମିଳିଛି । ଯେଉଁ ପରିବର୍ତ୍ତନ କଥା କହି ବିଜେପି ସରକାରକୁ ଭୋଟ ଦେଇଥିଲେ ରାଜ୍ୟବାସୀ, ସରକାରୀ ବିଫଳତା ଯୋଗୁଁ ସରକାରଙ୍କଠାରୁ ଲୋକଙ୍କ ମୋହ ତୁଟିଛି । ବିଜେଡି ଜନସଂପର୍କ ପଦଯାତ୍ରାରୁ ଏହି ଫିଡବ୍ୟାକ୍ ସଂଗ୍ରହ କରି ଦଳୀୟ ସଭାପତିଙ୍କୁ ରିପୋର୍ଟ ଦେଇଛନ୍ତି ।
ବିଜେପି ସରକାର କପି ପେଷ୍ଟରେ ମାଷ୍ଟର: ରୋହିତ
ଭୁବନେଶ୍ବର: ନୂଆ ସରକାର କପି ପେଷ୍ଟରେ ମାଷ୍ଟର । ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଯାହା କରିଥିଲେ ଏ ସରକାର ଖାଲି ସେଥିରେ ନୂଆ ରଙ୍ଗ ଲଗାଉଛନ୍ତି । ଏଭଳି କହି ରାଜ୍ୟ ସରକାରଙ୍କୁ ତୀବ୍ର ସମାଲୋଚନା କରିଛନ୍ତି ବିଜେଡି ନେତା ରୋହିତ ପୂଜାରୀ ।
ସେ କହିଛନ୍ତି, ମାଆ ସମଲେଇଙ୍କ ଯେତେ ଭକ୍ତ ଅଛନ୍ତି ସମସ୍ତେ ଜାଣିଛନ୍ତି ପୂର୍ବତନ ମୁଖ୍ୟମନ୍ତ୍ରୀ ଭକ୍ତଙ୍କ ସୁବିଧା ପାଇଁ ସମଲେଶ୍ବରୀଙ୍କ ବିକାଶ କରିଛନ୍ତି । କିନ୍ତୁ ବିଜେପି ସରକାର ସମଲେଇଙ୍କ ପ୍ରକଳ୍ପ ନିକଟରେ ବିଜେପିର ପୋଷ୍ଟର ଲଗାଇଛନ୍ତି । ସେହିପରି ନେଲସନ ମଣ୍ଡେଲା ଛକ ନିକଟରେ ଯେଉଁ ବ୍ରିଜ ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କରିଥିଲେ ସେଠି ମଧ୍ୟ ବିଜେପି ବ୍ୟାନର ଲଗାଯାଇଛି । ଲୋକଙ୍କୁ ଠକିବା ପାଇଁ ଯେଉଁ ଉଦ୍ୟମ କରୁଛନ୍ତି ଏହା ଦୁର୍ଭାଗ୍ୟଜନକ ଓ ହାସ୍ୟାସ୍ପଦ । ଯଦି ତାଙ୍କର ବିବେକ ଅଛି ଓଡିଶାବାସୀଙ୍କ ପାଇଁ ସମ୍ବଲପୁରବାସୀଙ୍କ ପାଇଁ କିଛି କରିକି ଦେଖାନ୍ତୁ ।
ନିର୍ବାଚନ ପୂର୍ବରୁ କେନ୍ଦ୍ରମନ୍ତ୍ରୀ କହିଥିଲେ ସମ୍ବଲପୁରରେ ହାଇକୋର୍ଟର ସ୍ଥାୟୀ ବେଞ୍ଚ ପ୍ରତିଷ୍ଠା ହେବ । କିନ୍ତୁ କାହିଁକି ସରକାର କରୁନାହାନ୍ତି ? ସମ୍ବଲପୁରୀ ଭାଷାକୁ ସମ୍ବିଧାନର ଅଷ୍ଟମ ଅନୁଚ୍ଛେଦରେ କେବେ ସାମିଲ କରିବେ ବୋଲି ରୋହିତ ମୋହନ ସରକାରଙ୍କୁ ପ୍ରଶ୍ନ କରିଛନ୍ତି ।
ଲୋକଙ୍କୁ ଠକିବା ପାଇଁ ହୀରାକୁଦ ଡ୍ୟାମ ନାଁରେ ୮୫୦ କୋଟି ଘୋଷଣା କରିଛନ୍ତି । ମହାନଦୀ ଉପରମୁଣ୍ଡର ଛତିଶଗଡ଼ରେ ବେଆଇନ ଭାବେ ଅନେକ ବ୍ଯାରେଜ୍ ନିର୍ମାଣ କରିଛନ୍ତି ସେଠାକାର ସରକାର । ଆଗ ଛତିଶଗଡ଼ରେ ହୋଇଥିବା ବ୍ଯାରେଜ୍ କେମିତି ଭାଙ୍ଗିବେ ଚିନ୍ତା କରନ୍ତୁ । ସମ୍ବଲପୁର ବିଶ୍ଵବିଦ୍ୟାଳୟକୁ କେନ୍ଦ୍ରୀୟ ବିଶ୍ଵବିଦ୍ୟାଳୟର କରନ୍ତୁ । ବୁର୍ଲା ଭିମସାରକୁ ଆଇଆଇଟି କାଟାଗୋରୀରେ ସାମିଲ କରନ୍ତୁ । ସରକାର ଲୋକଙ୍କୁ ମିଛ କହି ଭ୍ରମିତ କରି ବାହାବା ନେବାକୁ ଚାହୁଁଛନ୍ତି ବୋଲି କହି ବର୍ଷିଛନ୍ତି ରୋହିତ ପୂଜାରୀ ।
ଏଏସଓଙ୍କୁ ରାଜ୍ୟପାଳଙ୍କ ପୁଅ ମାଡ଼ ମାରିବା ଘଟଣା: ଗର୍ଜିଲା କଂଗ୍ରେସ, ମାରିଲା ଟମାଟୋ
ଭୁବନେଶ୍ବର: ଓଡ଼ିଆ ସରକାରୀ ଅଧିକାରୀଙ୍କୁ ରାଜ୍ୟପାଳଙ୍କ ପୁଅ ମାଡ଼ ମାରିବା ଘଟଣାରେ ପ୍ରଦେଶ ଯୁବ କଂଗ୍ରେସର ରାଜଭବନ ଘେରାଉ । ଜଣେ ଓଡ଼ିଆ ଏଏସଓଙ୍କୁ ରାଜ୍ୟପାଳଙ୍କ ପୁଅ ମାଡ଼ ମାରିବାର ଦୀର୍ଘ ଦିନ ବିତିଯାଇଥିଲେ ମଧ୍ୟ ଏ ଯାଏଁ କାର୍ଯ୍ୟାନୁଷ୍ଠାନ ଶୂନ । ଯାହାକୁ ନେଇ ରାଜ୍ୟପାଳ ଓ ରାଜ୍ୟର ବିଜେପି ସରକାରକୁ ଟାର୍ଗେଟ କରିଛି କଂଗ୍ରେସ । ଏହାର ପ୍ରତିବାଦରେ ରାଜଭବନ ନିକଟକୁ ଏକ ବିଶାଳ ବିକ୍ଷୋଭ ଶୋଭାଯାତ୍ରାରେ ଯିବା ସହ ଟମାଟୋ ମାଡ଼ କରାଯାଇଛି । ଆଗକୁ ଏହି ପ୍ରତିବାଦ ଆହୁରି ଜୋରଦାର କରାଯିବ ବୋଲି ଚେତାବନୀ ଦେଇଛି ଯୁବ କଂଗ୍ରେସ ।
ଓଡ଼ିଶାରେ ଅସୁରକ୍ଷିତ ଓଡ଼ିଆ । ଏଏସଓଙ୍କୁ ରାଜ୍ୟପାଳଙ୍କ ପୁଅ ମାଡ ମାରିଲେ । ତଦନ୍ତ ପାଇଁ ରାଜ୍ୟ ସରକାର ପ୍ରତିଶ୍ରୁତି ଦେଲେ । ଘଟଣାକୁ ପୂରିଲାଣି ତିନି ମାସ । ହେଲେ ନା ତଦନ୍ତ ହେଉଛି ନା କାର୍ଯ୍ୟାନୁଷ୍ଠାନ ନିଆଯାଉଛି । ଓଡ଼ିଆ ଅସ୍ମିତା ନାଁରେ ବିଜେପିର ପ୍ରହସନ ବିରୋଧରେ କଂଗ୍ରେସର ହଲ୍ଲାବୋଲ । ରାଜଭବନ ଘେରିଲା, ସରକାର ବିରୋଧୀ ନାରା ଦେଇ ଟମାଟୋ ମାଡ଼ କଲା ଯୁବ କଂଗ୍ରେସ ।
ଘଟଣାରେ ଜିଲ୍ଲାପାଳଙ୍କ ତଦନ୍ତ ରିପୋର୍ଟ କୁଆଡେ ଗଲା ବୋଲି ପ୍ରଶ୍ନ କରିଛି ଯୁବ କଂଗ୍ରେସ । ରାଜ୍ୟପାଳଙ୍କ ପୁଅଙ୍କ ବିରୋଧରେ ତୁରନ୍ତ ଆଇନ ଅନୁଯାୟୀ କାର୍ଯ୍ୟାନୁଷ୍ଠାନ ନେବାକୁ ଦାବି ହୋଇଛି । ରାଜଭବନ ଆଡ଼କୁ ଶୋଭାଯାତ୍ରାରେ ମାଡି ଚାଲିବା ସମୟରେ ପୋଲିସ ସହ ଯୁବ କଂଗ୍ରେସ ନେତା ଓ କାର୍ଯ୍ୟକର୍ତ୍ତାଙ୍କ ହୋଇଛି ଧସ୍ତାଧସ୍ତି । ଏ ପ୍ରସଙ୍ଗରେ ଉପଯୁକ୍ତ କାର୍ଯ୍ୟାନୁଷ୍ଠାନ ଗ୍ରହଣ କରା ନଗଲେ ରାଜ୍ୟପାଳଙ୍କ ସମେତ ମନ୍ତ୍ରୀମାନଙ୍କୁ ସବୁଆଡେ ବିରୋଧ କରାଯିବ ବୋଲି ଚେତାବନୀ ଦେଇଛି ଯୁବ କଂଗ୍ରେସ ।
କଂଗ୍ରେସର ରାଜଭବନ ଘେରାଉ ପରେ ଏପ୍ରସଙ୍ଗକୁ ନେଇ ରାଜନୀତି ତୀବ୍ର ହୋଇଛି । କଂଗ୍ରେସର ରାଜଭବନ ଘେରାଉକୁ ବିଜେଡ଼ି ସମର୍ଥନ କରିଛି । ଓଡ଼ିଆ ଅସ୍ମିତା କଥା କହି ସରକାରକୁ ଆସିଥିବା ବିଜେପି ଓଡ଼ିଆଙ୍କୁ ସୁରକ୍ଷା ଦେବାରେ ବିଫଳ । ସାଧାରଣ ଭାବେ ମନକୁ ପ୍ରଶ୍ନ ଆସିବା ସ୍ୱାଭାବିକ ବୋଲି କୁହାଯାଇଛି । ସେପଟେ କଂଗ୍ରେସ ପାଖରେ କୌଣସି ପ୍ରସଙ୍ଗ ନାହିଁ । ଲୋକେ କଂଗ୍ରେସକୁ ଲିଗଲେଣି ବୋଲି କହିଛି ବିଜେପି ।
ଏହି ପ୍ରସଙ୍ଗକୁ ନେଇ କଂଗ୍ରେସ ଆଗକୁ ଆହୁରି ଜୋରଦାର ଆନ୍ଦୋଳନ ପାଇଁ ଯୋଜନା ପ୍ରସ୍ତୁତ କରିଛି । ଯେଉଁ ଓଡ଼ିଆ ଅସ୍ମିତା ପ୍ରସଙ୍ଗକୁ ପ୍ରଚାର କରି ବିଜେପି ଶାସନକୁ ଆସିଛି ସେହି ପ୍ରସଙ୍ଗକୁ ନେଇ କଂଗ୍ରେସ ବିଜେପିକୁ ରାଜ୍ୟବ୍ୟାପୀ ଘେରିବାକୁ ନିଷ୍ପତ୍ତି ନେଇଛି ।