ପୁରୀ: ମହାପ୍ରଭୁଙ୍କ ପ୍ରତି ଆସ୍ଥା ଓ ବିଶ୍ବାସ । ପ୍ରତିଦିନ ଦାନ କରିବାକୁ ଆଗେଇ ଆସୁଛନ୍ତି ଭକ୍ତ । ଆଜି ଶ୍ରୀଜୀଉଙ୍କୁ ୫ କୋଟି ଟଙ୍କା ଦାନ କରିଛନ୍ତି ଜଣେ ବଦାନ୍ଯ ବ୍ଯକ୍ତି । ପୁରୀ ଶ୍ରୀମନ୍ଦିର ପ୍ରଶାସନ ନିକଟରେ ଏହି ଦାନ ଅର୍ଥ ପ୍ରଦାନ କରିଛନ୍ତି ।
ମହାପ୍ରଭୁଙ୍କୁ ଅନେକ ସମୟରେ ପ୍ରତିଦିନ ବିଭିନ୍ନ ହୁଣ୍ଡିରୁ ଲକ୍ଷାଧିକ ଟଙ୍କା ସହ ସୁନା ରୁପା ଦାନ କରୁଛନ୍ତି ଶ୍ରଦ୍ଧାଳୁ । ପୂର୍ବ ଦିନମାନଙ୍କରେ ସୁନା ରୁପା ଅଳଙ୍କାର ସହ ଅର୍ଥଦାନ କରିଛନ୍ତି ଅନେକ ବଦାନ୍ଯ ବ୍ଯକ୍ତି । ତେବେ ୫ କୋଟି ଦାନ ଦେବା ଏକ ବିରଳ ଘଟଣା ।
କଳାହାଣ୍ଡି: ଉପାନ୍ତରେ ଅପହଞ୍ଚ ସୁଭଦ୍ରା ଯୋଜନା । ମୋହନ ସରକାରଙ୍କ ଦ୍ୱିତୀୟ ପାଳିରେ ବି ହିତାଧିକାରୀଙ୍କୁ ମିଳିନି ସୁଭଦ୍ରା ଟଙ୍କା । ବ୍ୟାଙ୍କ୍ ଓ ଜନସେବା କେନ୍ଦ୍ରକୁ ଦୌଡ଼ି ଦୌଡ଼ି ଖର୍ଚ୍ଚାନ୍ତ ହୋଇଥିଲେ ମହିଳା । କିନ୍ତୁ ଖାତାକୁ ଟଙ୍କା ନଆସିବାରୁ କ୍ଷୋଭ ପ୍ରକାଶ କରିଛନ୍ତି ମହିଳା । କଳାହାଣ୍ଡି ଜିଲ୍ଲା କୋକସରା ବ୍ଲକର ୨୨ଟି ପଞ୍ଚାୟତର ମହିଳା ଅବହେଳାର ଶିକାର ହୋଇଥିବା କରିଛନ୍ତି ଅଭିଯୋଗ ।
ଖର୍ଚ୍ଚାନ୍ତ କଲା ସୁଭଦ୍ରା କିନ୍ତୁ ଆକାଉଣ୍ଟକୁ ଆସିଲାନି ଟଙ୍କା । ମୋହନ ତଥା ଡବଲ ଇଞ୍ଜିନ ସରକାରଙ୍କ ଲଲିପପ୍ ସୁଭଦ୍ରା ଯୋଜନା, କାହା ପାଇଁ ପୂଷ ମାସ ତ ଆଉ କାହା ପାଇଁ ଅସନ୍ତୋଷ ସାଜିଛି l ଯୋଜନା ପାଇଁ ଖର୍ଚ୍ଚ ପରେ ଖର୍ଚ୍ଚ କରିବା ପରେ ବ୍ୟାଙ୍କ୍ ଖାତାରେ ବଲାନ୍ସ ଶୂନ ବୋଲି ଅଭିଯୋଗ କରିଛନ୍ତି ମହିଳା । କଳାହାଣ୍ଡିର ଉପାନ୍ତ ଅଞ୍ଚଳର ଅନେକ ମହିଳା ସୁଭଦ୍ରା ପାଇଁ ଆବେଦନ କରିଥିଲେ ବି ଆକାଉଣ୍ଟକୁ ଆସିଲାନି ଟଙ୍କା ।
ସୂଚନାଯୋଗ୍ୟ, କୋକସରା ବ୍ଲକରେ ରହିଛି ୨୨ଟି ପଞ୍ଚାୟତ l ସେଥିରୁ ଗୋତୋ ମୁଣ୍ଡା, ଅମ୍ବପାନି, ବରାଦଙ୍ଗା, ଦୁଡୁକା ଠେଙ୍ଗା, ପୋଡ଼ାଗୁଡା ପରି ଅନେକ ପଞ୍ଚାୟତର ପ୍ରାୟ ୧୦ ହଜାରରୁ ଊର୍ଦ୍ଧ୍ବ ମହିଳା ସୁଭଦ୍ରା ଆବେଦନ କରିଥିଲେ । ଏହି ମହିଳାମାନେ ଗରିବ ଶ୍ରେଣୀର । ଦ୍ୱିତୀୟ ପାଳିରେ ବି ଟଙ୍କା ପାଇ ନଥିବାରୁ ଅସନ୍ତୋଷ ପ୍ରକାଶ କରିଛନ୍ତି ।
ମାଲକାନଗିରି: ମାଲକାନଗିରି ଜିଲ୍ଲା ସଦର ଚିକିତ୍ସାଳୟ ଭିତରେ ନର୍ସଙ୍କ ଦାଦାଗିରି । ରୋଗୀଙ୍କୁ ସେବା ଦେବା ବଦଳରେ କଚାଡି ଭାଙ୍ଗିଲେ ରୋଗୀଙ୍କ ସମ୍ପର୍କୀୟଙ୍କ ମୋବାଇଲ ଫୋନ । ଖାଲି ଏତିକିରେ କଥା ସରିଲାନି । ନର୍ସ ମହାଶୟା ନିଜ ସ୍ବାମୀଙ୍କୁ ଡକାଇ ରୋଗୀଙ୍କ ସମ୍ପର୍କୀୟଙ୍କୁ ଧକ୍କା ମରାଇ ଥିବା ମଧ୍ୟ ଅଭିଯୋଗ ହୋଇଛି ।
ଅଭିଯୋଗ ଅନୁସାରେ, ଆଜି ସକାଳେ ମାଲକାନଗିରି ମ୍ୟୁନିସିପାଲିଟି କଲୋନୀର ରାଜା ବାଘ ନାମକ ଜଣେ ଯୁବକ ନିଜ ଭଉଣୀ ଅଞ୍ଜୁଙ୍କୁ ନେଇ ଜିଲ୍ଲା ସଦର ଚିକିତ୍ସାଳୟକୁ ଯାଇଥିଲେ । ଅଞ୍ଜୁଙ୍କ ପେଟ ବ୍ଯଥା ହେଉଥିବାରୁ ଡାକ୍ତର ତୁରନ୍ତ ତାଙ୍କୁ ଚତୁର୍ଥ ମହଲାରେ ଥିବା ମେଡିସିନ୍ ୱାଡରେ ଭର୍ତ୍ତି ହେବା ଲାଗି ରେଫର କରିଥିଲେ । ରୋଗୀ ସେଠାରେ ପହଞ୍ଚିଲା ବେଳକୁ କୌଣସି ସ୍ଵାସ୍ଥ୍ଯ କର୍ମୀ ସେଠାରେ ଉପସ୍ଥିତ ନଥିଲେ । ନିକଟରେ ଥିବା ଅନ୍ଯ ଏକ ରୁମରୁ ମୁନମୁନ ବିଶ୍ବାସ ନାମକ ଜଣେ ନର୍ସଙ୍କୁ ଡାକିଥିଲେ ରୋଗୀଙ୍କ ପରିବାର ଲୋକେ । ହେଲେ ଦିଦି ଜଣକ ମୋବାଇଲ ଦେଖିବାରେ ଏତେ ବ୍ୟସ୍ତ ଥିଲେ ଯେ ମୋତେ ବିରକ୍ତ କାହିଁକି କରୁଛ ବୋଲି କହି ରୋଗୀଙ୍କ ସମ୍ପର୍କୀୟଙ୍କ ମୋବାଇଲ କଚାଡି ଭାଙ୍ଗି ଦେଇଥିଲେ । ଏହାପରେ ସ୍ବାମୀଙ୍କୁ ଡାକି ଡାକ୍ତରଖାନା ଭିତରେ ରୋଗୀଙ୍କ ସମ୍ପର୍କୀୟଙ୍କୁ ଧକ୍କା ମରାଇଥିଲେ ।
ଘଟଣା ସମ୍ପର୍କରେ ଜିଲ୍ଲା ମୁଖ୍ୟ ଚିକିତ୍ସାଧିକାରୀଙ୍କ ପାଖରେ ଅଭିଯୋଗ ହୋଇଛି । ଘଟଣାର ତଦନ୍ତ କରାଯାଇ କାର୍ଯ୍ୟାନୁଷ୍ଠାନ ନିଆଯିବ ବୋଲି ଜିଲ୍ଲା ମୁଖ୍ୟ ଚିକିତ୍ସାଧିକାରୀ କହିଛନ୍ତି ।
ଭୁବନେଶ୍ବର: ଅଭିନେତା ବୁଦ୍ଧାଦିତ୍ୟ ମହାନ୍ତିଙ୍କ ନାଁରେ କ୍ୟାପିଟାଲ ଥାନାରେ ଏତଲା ଦେଲା ଛାତ୍ର କଂଗ୍ରେସ । ଅଭିନେତା ବୁଦ୍ଧାଦିତ୍ୟ ମହାନ୍ତି ରାହୁଲ ଗାନ୍ଧୀଙ୍କୁ ସୋସିଆଲ ମିଡିଆରେ ଟାର୍ଗେଟ କରିଛନ୍ତି । ଯାହାର ପ୍ରତିବାଦରେ ଛାତ୍ର କଂଗ୍ରେସ ପକ୍ଷରୁ ତାଙ୍କ ନାଁରେ ଏତଲା ଦିଆଯାଇଛି ।
ନିଜ ଫେସବୁକ ପୋଷ୍ଟରେ ବୁଦ୍ଧାଦିତ୍ୟ ଲେଖିଥିଲେ ବିଷ୍ଣୋଇ, ବାବା ସିଦ୍ଧିକିଙ୍କୁ ମର୍ଡର କଲା ପରେ ଏବେ ଓଏସି ଓ ରାହୁଲ ଗାନ୍ଧୀଙ୍କ ପାଳି । ଏହି ପୋଷ୍ଟକୁ ନେଇ ସୋସିଆଲ ମିଡ଼ିଆରେ ମଧ୍ୟ ଚର୍ଚ୍ଚା ସୃଷ୍ଟି ହୋଇଥିଲା । ଏଭଳି ମନ୍ତବ୍ୟ ପାଇଁ ବୁଦ୍ଧାଦିତ୍ୟଙ୍କୁ ଗିରଫ ପାଇଁ ଛାତ୍ର କଂଗ୍ରେସ ଦାବି କରିଛି ।
କଟକ: ଭୁଶୁଡ଼ିଲା କଟକ ଖାନନଗର ତୋରଣ । ନେତାଜୀ ବସ୍ ଟର୍ମିନାଲ ନିକଟରେ ଦଶହରା ପାଇଁ କରାଯାଇଥିବା ଲାଇଟ ଗେଟଟି ଭୁଶୁଡ଼ି ପଡ଼ିଛି । ସୌଭାଗ୍ୟ ବଶତଃ ଏଥିରେ କାହାର ବିଶେଷ କ୍ଷତି ହୋଇ ନଥିବାବେଳେ ଅନେକ ଗାଡ଼ି ଚାପି ହୋଇଯାଇଛି ।
ସ୍ଥାନୀୟ ଲୋକଙ୍କ କହିବା ଅନୁସାରେ, ଦିନ ପ୍ରାୟ ସାଢେ ଗୋଟାଏରେ ଅଘଟଣ ଘଟିଥିଲା । ସାମାନ୍ଯ ପବନ ଯୋଗୁଁ ତୋରଣଟି ଭୁଶୁଡ଼ି ପଡ଼ିଥିଲା । ପୂଜା କମିଟିର କହିବା ଅନୁସାରେ କୌଣସି ଭାରିଯାନ ଗେଟକୁ ଧକ୍କା ଦେବା ଫଳରେ ଏପରି ଅଘଟଣ ଘଟିଛି । ତେବେ ଦଶହରାକୁ ୫ ଦିନ ବିତିଥିବା ବେଳେ ଏଯାଏଁ କାହିଁକି ତୋରଣକୁ ଖୋଲାଯାଇ ନଥିଲା ସେ ନେଇ ପ୍ରଶ୍ନ ଉଠିଛି ।
ଭୁବନେଶ୍ବର: ବଢିଲା ବାତ୍ଯା ଭୟ । ଧିରେ ଧିରେ ସ୍ପଷ୍ଟ ହେଉଛି ବାତ୍ଯା ଚିତ୍ର । ଓଡ଼ିଶା-ପଶ୍ଚିମବଙ୍ଗ-ବାଂଲାଦେଶରେ ସ୍ଥଳଭାଗ ଛୁଇଁପାରେ ସମ୍ଭାବ୍ଯ ବାତ୍ଯା । ଅନେକ ଆନ୍ତର୍ଜାତିକ ପାଣିପାଗ ମଡେଲ ଏନେଇ ଆକଳନ କରୁଛନ୍ତି । ଘୂର୍ଣ୍ଣିବଳୟ ସୃଷ୍ଟି ପରେ ବାତ୍ୟାର ଗତିପଥ ଏବଂ ତୀବ୍ରତା ସ୍ପଷ୍ଟ ହେବ । ଚଳିତମାସ ବାତ୍ଯା ପ୍ରବଣ ହୋଇଥିବା ବେଳେ ଆସନ୍ତା ୨୫ ଓ ୨୬ ତାରିଖରେ ପୁଣି ଏକ ବାତ୍ୟା ଓଡିଶା ମୁହାଁ ହେଉଥିବା ବିଭିନ୍ନ ମଡେଲର ଆକଳନରୁ ଜଣାପଡିଛି ।
ବର୍ତ୍ତମାନ ରାଜ୍ୟରେ ମେଘମୁକ୍ତ ଆକାଶ ରହିବା ସହ ରାତିର ତାପମାତ୍ରା ସ୍ବାଭାବିକଠାରୁ ୨ରୁ ୩ ଡିଗ୍ରୀ ଅଧିକ ରହୁଛି । ଏହାସହ ସମୁଦ୍ରର ତାପମାତ୍ରା ୩୦ରୁ ୩୨ ଡିଗ୍ରୀ ରହୁଛି । ଅନ୍ୟାନ୍ୟ ପାଣିପାଗ କାରକ ମଧ୍ୟ ବାତ୍ୟା ସୃଷ୍ଟି ନେଇ ଅନୁକୂଳ ରହିଛି । ତେବେ ବର୍ତ୍ତମାନ ସୁଦ୍ଧା ଆଇଏମଡି ବାତ୍ୟା ନେଇ କୌଣସି ଆକଳନ କରିନି ।
୨୦ ତାରିଖରେ ଉତ୍ତର ଆଣ୍ଡମାନ ସାଗରରେ ସୃଷ୍ଟି ହେବ ଏକ ଘୃର୍ଣ୍ଣିବଳୟ । ପ୍ରଭାବରେ ୨୨ ତାରିଖ ବେଳକୁ କେନ୍ଦ୍ରୀୟ ବଙ୍ଗୋପସାଗରରେ ଲଘୁଚାପ ସୃଷ୍ଟି ହେବାର ସମ୍ଭାବନା ରହିଛି । ଯାହାକି ପରବର୍ତ୍ତୀ ପର୍ଯ୍ୟାୟରେ ଉତ୍ତର ପଶ୍ଚିମ ଦିଗକୁ ଗତି କରି ୨୪ ତାରିଖରେ ଏକ ଅବପାତରେ ପରିଣତ ହେବାର ସମ୍ଭାବନା ରହିଛି । ପରବର୍ତ୍ତୀ ସମୟରେ ଏହା ଆହୁରି ଅଧିକ ଘନୀଭୂତ ହେବା ନେଇ ପାଗ ଅନୁକୂଳ ରହିଛି । ଯାହାର ପ୍ରଭାବରେ ୨୩ ତାରିଖରୁ ରାଜ୍ୟରେ ବର୍ଷା ଆରମ୍ଭ ହେବ । ଉପକୂଳ ଓଡ଼ିଶା ସମେତ ଆଭ୍ୟନ୍ତରୀଣ ଓଡିଶାରେ ହେବ ପ୍ରବଳ ବର୍ଷା । ପାଣିପାଗ ବିଭାଗ ସିଷ୍ଟମ ଉପରେ ନଜର ରଖିଛି ।
କନ୍ଧମାଳ: କଟକରେ ଅଙ୍ଗ ତସ୍କରୀ । ଏକ ଘରୋଇ ହସ୍ପିଟାଲ ବିରୋଧରେ କନ୍ଧମାଳ ଜିଲ୍ଲା ବାଲିଗୁଡ଼ା ଅଞ୍ଚଳରୁ ଆସିଛି ଏଭଳି ଅଭିଯୋଗ । ଦୁର୍ଘଟଣାରେ ଗୁରୁତର ଜଣେ ରୋଗୀ କଟକର ଏକ ଘରୋଇ ହସ୍ପିଟାଲରେ ଭର୍ତ୍ତି ହୋଇଥିଲେ । ତାଙ୍କ ମୁଣ୍ଡ ଅପରେସନ ହେବାର ଥିଲା । ହେଲେ ତାଙ୍କ ମୁଣ୍ଡ ବଦଳରେ ପେଟ ଅପରେସନ କରାଯାଇଛି । ଏପରିକି ଅପରେସନ ପରେ ବ୍ୟକ୍ତି ଜଣଙ୍କର ମୃତ୍ୟୁ ଘଟିଥିଲା । ଏହାକୁ ନେଇ ଅଙ୍ଗ ତସ୍କରୀ ଅଭିଯୋଗ ପରେ ପୋଲିସ ସମାଧିରୁ ମୃତକଙ୍କ ଶବ ଜବତ କରି ପୋଲିସ ଘଟଣାର ତଦନ୍ତ ଆରମ୍ଭ କରିଛି ।
ଅଭିଯୋଗ ଅନୁସାରେ, ମୃତକ ହେଲେ କନ୍ଧମାଳ ଜିଲ୍ଲା ବାଲିଗୁଡ଼ା ଥାନା ସୁଦ୍ଧା ପଞ୍ଚାୟତ ଟିକରବାଜୁ ଗାଁର ବାବୁଲା ଦିଗାଲ । ଗତ ୧୩ ତାରିଖ ଦିନ କୌଣସି କାମରେ ବାବୁଲା କଳାହାଣ୍ଡିର ମଦନପୁର-ରାମପୁର ଯିବା ବେଳେ ତୁମୁଡ଼ିବନ୍ଧ ଡଡ଼ଙ୍ଗ ଗାଁ ନିକଟରେ ଦୁର୍ଘଟଣାର ଶିକାର ହୋଇଥିଲେ । ଗୁରୁତର ଅବସ୍ଥାରେ ତାଙ୍କୁ ପ୍ରଥମେ ତୁମୁଡ଼ିବନ୍ଧ ଡାକ୍ତରଖାନା ଓ ଜିଲ୍ଲା ଚିକିତ୍ସାଳୟକୁ ସ୍ଥାନାନ୍ତର କରାଯାଇଥିଲା । ସେଠାରେ ସ୍ବାସ୍ଥ୍ୟାବସ୍ଥା ଗୁରୁତର ହେବାରୁ ଫୁଲବାଣୀରୁ ବ୍ରହ୍ମପୁର ସ୍ଥାନାନ୍ତର କରିଥିଲେ ଡାକ୍ତର । ବାବୁଲାଙ୍କ ମୁଣ୍ଡରେ ଗୁରୁତର ଆଘାତ ଲାଗିଥିବା କାରଣରୁ ବ୍ରହ୍ମପୁରରୁ ତାଙ୍କୁ ପୁଣି କଟକ ସ୍ଥାନାନ୍ତର କରାଯାଇଥିଲା ।
ହେଲେ କିଛି ଦଲାଲଙ୍କ କଥାରେ ପଡ଼ି ପରିବାର ଲୋକେ ବାବୁଲାଙ୍କୁ ରୁଦ୍ର ନାମକ ଏକ ଘରୋଇ ମେଡିକାଲରେ ଭର୍ତ୍ତି କରାଇଥିଲେ । ସେଠାରେ ଅପରେସନ ପରେ ବାବୁଲାଙ୍କ ଅପରେସନ ସଫଳ ହୋଇଛି କହିଥିଲେ ଡାକ୍ତର । ଅପରେସନ ବାବଦକୁ ନିର୍ଦ୍ଧାରିତ ଟଙ୍କା ଜମା କରିବାର କିଛି ସମୟ ପରେ ବାବୁଲାଙ୍କୁ ମୃତ ଘୋଷଣା କରାଯାଇଥିଲା । ସେଠାରୁ ପରିବାର ଲୋକେ ଏକ ଆମ୍ବୁଲାନ୍ସରେ ଶବ ନିଜ ଗାଁ ଟିକରବାଜୁକୁ ଆଣିବା ପରେ ବାବୁଲାଙ୍କ ପେଟ ଅପରେସନ କରି ସିଲେଇ କରାଯାଇଥିବା ଦେଖିବାକୁ ମିଳିଥିଲା । ତେବେ ମୁଣ୍ଡ ଅପରେସନ କରିବା କଥା କହି ପେଟ କ’ଣ ପାଇଁ ଅପରେସନ କରାଯାଇଛି ବୋଲି ପରିବାର ଲୋକଙ୍କ ମନରେ ସନ୍ଦେହ ସୃଷ୍ଟି ହୋଇଥିଲା । ବାବୁଲାଙ୍କ ମରଶରୀରକୁ ସମାଧି ଦେବା ପରେ ଗତକାଲି ପରିବାର ଲୋକ ବାଲିଗୁଡ଼ା ଥାନାରେ ଲିଖିତ ଅଭିଯୋଗ କରିଥିଲେ ।
ଅଭିଯୋଗ ପରେ ବାଲିଗୁଡ଼ା ଥାନା ଅଧିକାରୀ ଅନ୍ୟ ପୋଲିସ୍ ଅଧିକାରୀଙ୍କ ସହ ଘଟଣାସ୍ଥଳରେ ପହଁଚି କାର୍ଯ୍ୟନିର୍ବାହୀ ମାଜିଷ୍ଟ୍ରେଟଙ୍କ ଉପସ୍ଥିତିରେ ଶବ ଉଦ୍ଧାର କରିଥିଲେ । ଉଦ୍ଧାର ଶବକୁ ବ୍ୟବଚ୍ଛେଦ ନିମନ୍ତେ ବାଲିଗୁଡ଼ା ଉପଖଣ୍ଡ ଚିକିତ୍ସାଳୟକୁ ପଠାଇଛି ପୋଲିସ୍ । ସେପଟେ ଶବ ବ୍ୟବଚ୍ଛଦ ରିପୋର୍ଟ ଆସିବା ପରେ ପ୍ରକୃତ ଘଟଣା ଜଣାପଡିବ ବୋଲି କହିଛନ୍ତି ବାଲିଗୁଡ଼ା ଥାନା ଅଧିକାରୀ ସୁଶାନ୍ତ କୁମାର ସାହୁ ।
ସେପଟେ ଅଭିଯୋଗକୁ ଭିତ୍ତିହୀନ କହିଛନ୍ତି ରୁଦ୍ର ହସ୍ପିଟାଲର ମ୍ୟାନେଜର ସୁଶାନ୍ତ ବେହେରା । ସେ କହିଛନ୍ତି, ଗତ ୧୫ ତାରିଖରେ କନ୍ଧମାଳ ଜିଲ୍ଲା ଟିକରବାଲୁ ଅଞ୍ଚଳର ବାବୁଲା ଡିଗଲ ଆଡମିଶନ ହୋଇଥିଲେ । ତାଙ୍କର ବ୍ରେନ ଅପରେସନ ହୋଇଥିଲା । ଅପରେସନ ସମୟରେ ମୁଣ୍ଡର ଏକ ହାଡ ପେଟ ଭିତରେ ରଖାଯାଇଥିଲା । ମୁଣ୍ଡର ସ୍କଲ ନଷ୍ଟ ନ ହେବା ପାଇଁ ପେଟରେ ରଖା ଯାଇଥିଲା । ହେଲେ ୧୬ ତାରିଖରେ ତାଙ୍କର ମୃତ୍ୟୁ ଘଟିଥିଲା । ହେଲେ ଶବ ବ୍ୟବଚ୍ଛେଦ ପାଇଁ ପରିବାର ଲୋକ ସହଯୋଗ ନକରିବାରୁ ଆମେ ତାଙ୍କୁ ଘରକୁ ପଠେଇ ଦେଇଥିଲୁ । ତାଙ୍କର କୌଣସି ଅଙ୍ଗ ତସ୍କରୀ ହୋଇନାହିଁ ।
ଭୁବନେଶ୍ବର: ରାଜଧାନୀ ଭୁବନେଶ୍ଵରର ନୟାପଲ୍ଲୀ ଅଞ୍ଚଳରେ କୋଷ୍ଟଗାର୍ଡ ଡିଆଇଜି ଓ ପତ୍ନୀଙ୍କୁ ଦୁର୍ବ୍ୟବହାର ଘଟଣାରେ ଦୁଇ ଅଭିଯୁକ୍ତ ଗିରଫ । ସେମାନେ ହେଲେ ସୁବାଶିଷ ମହାନ୍ତି ଏବଂ ବିକାଶ ମହାନ୍ତି । ସିସିଟିଭି ଫୁଟେଜ ଆଧାରରେ ସେମାନଙ୍କୁ ଗିରଫ କରାଯାଇଛି । ଉଭୟଙ୍କୁ କୋର୍ଟଚାଲାଣ କରାଯାଇଛି । ଘଟଣାରେ ବ୍ୟବହୃତ ସ୍କୁଟରକୁ ଜବତ କରିଛି କମିଶନରେଟ ପୋଲିସ । ଗତକାଲି ଘଟିଥିଲା ଏ ଘଟଣା । କୋଷ୍ଟଗାର୍ଡ ଡ଼ିଆଇଜି ଓ ତାଙ୍କ ପତ୍ନୀଙ୍କୁ ଦୁର୍ବ୍ୟବହାର କରିଥିଲେ ଦୁଇ ଅଭିଯୁକ୍ତ ।
କଳିଙ୍ଗ ଷ୍ଟାଡିୟମ ଛକ ନିକଟରେ ଗତକାଲି ରାତିରେ ଡିଆଇଜି ତାଙ୍କ ପତ୍ନୀଙ୍କ ସହ କାରରେ ବେହେରା ସାହି ପଟକୁ ଯାଉଥିବା ବେଳେ ଏକ ସ୍କୁଟରେ ଆସି କାର ଆଗରେ ଅଟକାଇଥିଲେ ଅଭିଯୁକ୍ତ । ଅତ୍ୟଧିକ ମଦ୍ୟପାନ କରିଥିବା ଦୁଇ ଯୁବକ କାରକୁ ଅଟକାଇବା ସହ ଡିଆଇଜି ଓ ତାଙ୍କ ପତ୍ନୀଙ୍କୁ ଦୁର୍ବ୍ୟବହାର ଓ ଅଶ୍ଳୀଳ ଇଙ୍ଗିତ ପ୍ରଦର୍ଶନ କରିଥିଲେ । ପରେ ଘଟଣାସ୍ଥଳରୁ ଫେରାର ହୋଇଯାଇଥିଲେ । ଏ ନେଇ ନୟାପଲ୍ଲୀ ଥାନାରେ ଡିଆଇଜିଙ୍କ ଅଭିଯୋଗ ପରେ ପୋଲିସ ଛାନଭିନ ଆରମ୍ଭ କରିଥିଲା । ପୋଲିସ କମିଶନର ଏହି ଖବର ପାଇ ବିଳମ୍ବିତ ରାତିରେ ଥାନାକୁ ଗସ୍ତ କରିବା ସହ ପୂରା ଘଟଣା ସମ୍ପର୍କରେ ପଚାରି ବୁଝିଥିଲେ ।
ଭୁବନେଶ୍ବର: ଭରତପୁର ଥାନାରେ ସେନା ଅଧିକାରୀ ଏବଂ ତାଙ୍କ ବାନ୍ଧବୀଙ୍କୁ ନିର୍ଯାତନା ମାମଲା । ଜଷ୍ଟିସ ଚିତ୍ତରଞ୍ଜନ ଦାସ କମିଶନଙ୍କ ଆଜି ଦ୍ୱିତୀୟ ବୈଠକ ଶେଷ ହୋଇଛି । ବୈଠକରେ ତଦନ୍ତର ଅଗ୍ରଗତି ନେଇ ସମୀକ୍ଷା କରିଛନ୍ତି କମିଶନ । କମିଶନଙ୍କୁ କ୍ରାଇମବ୍ରାଞ୍ଚ ତଦନ୍ତ ସମ୍ପର୍କରେ ଅବଗତ କରାଯାଇଛି ବୋଲି ବୈଠକ ପରେ ପ୍ରତିକ୍ରିୟା ରଖିଛନ୍ତି ଏଡିଜି ବିନୟତୋଷ ମିଶ୍ର ।
ଗୁଜୁରାଟ ଗାନ୍ଧୀନଗରରେ ସମସ୍ତ ପୋଲିସ ଅଧିକାରୀଙ୍କ ଲାଏ ଡିଟେକ୍ସନ୍ ଟେଷ୍ଟ ସରିଛି । ନିଲମ୍ବିତ ଥାନା ଅଧିକାରୀ ଦୀନକୃଷ୍ଣ ମିଶ୍ରଙ୍କ ଲାଏ ଡିଟେକ୍ସନ୍ ଟେଷ୍ଟ ସହ ବ୍ରେନ୍ ମ୍ଯାପିଂ ଓ ନାର୍କୋ ଟେଷ୍ଟ ମଧ୍ୟ ହୋଇଛି । ଏବେ ରିପୋର୍ଟକୁ ଅପେକ୍ଷା କରାଯାଇଛି ବୋଲି କହିଛନ୍ତି କ୍ରାଇମବ୍ରାଞ୍ଚ ଏଡିଜି ବିନୟତୋଷ ମିଶ୍ର ।
ସେପଟେ କମିଶନଙ୍କ ସଚିବ କହିଛନ୍ତି ଯେହେତୁ କ୍ରାଇମବ୍ରାଞ୍ଚ ଗୁଜୁରାଟରୁ ପଲିଗ୍ରାଫ ରିପୋର୍ଟ ଆଦି ପାଇନାହିଁ ସେଥିପାଇଁ ସେମାନେ କିଛି ତଥ୍ଯ ଦେଇପାରିନାହାଁନ୍ତି । ମ୍ଯାଜିଷ୍ଟ୍ରେଟଙ୍କ ପାଖରେ ପୀଡିତାଙ୍କ ବୟାନ ରେକର୍ଡ ସରିଛି । କୌଣସି ଅଭିଯୁକ୍ତ ପୋଲିସ ଅଧିକାରୀଙ୍କ ବୟାନ ରେକର୍ଡ ହୋଇନାହିଁ । ଅନ୍ଯପଟେ ଆହ୍ବାନ ପରେ କମିଶନଙ୍କ ନିକଟରେ ଅନେକ ସତ୍ଯପାଠ ଦାଖଲ ହୋଇଛି ।
ଆଜିର ବୈଠକରେ ଗୃହ ସଚିବ ସତ୍ୟବ୍ରତ ସାହୁ, ସ୍ଵତନ୍ତ୍ର ଗୃହ ସଚିବ ରାଧାକୃଷ୍ଣ ଶର୍ମା, ADG କ୍ରାଇମବ୍ରାଞ୍ଚ ବିନୟ ତୋଷ ମିଶ୍ର ଉପସ୍ଥିତ ଥିଲେ । ଏହାସହ ଦୁଇ ତଦନ୍ତକାରୀ ଅଧିକାରୀ DSP ନିଳିମା ପଣ୍ଡା ଓ DSP ନରେନ୍ଦ୍ର ବେହେରା ମଧ୍ଯ ଉପସ୍ଥିତ ଥିଲେ । ନିକଟରେ ପୂରା ଟିମ୍ ଗୁଜୁରାଟ ଗାନ୍ଧୀନଗର ଯାଇ ପୂର୍ବତନ ନିଲମ୍ବିତ ଆଇଆଇସି ଦୀନକୃଷ୍ଣ ମିଶ୍ରଙ୍କ ସମେତ ପାଞ୍ଚ ଅଧିକାରୀଙ୍କ ପଲିଗ୍ରାଫ ଟେଷ୍ଟ କରି ଫେରିଛି । ଦୀନକୃଷ୍ଣଙ୍କ ବ୍ରେନ୍ ମ୍ୟାପିଂ ଓ ନାର୍କୋ ଟେଷ୍ଟ ମଧ୍ଯ କରାଯାଇଥିଲା । ଆଜି କ୍ରାଇମବ୍ରାଞ୍ଚ ତଦନ୍ତର ଅଗ୍ରଗତି ନେଇ କମିଶନ ଦ୍ବିତୀୟ ବୈଠକ ଡକାଇଥିଲେ ।
ଗତ ସେପ୍ଟେମ୍ବର ୧୪ ତାରିଖ ରାତିରେ କ୍ଯାପଟେନ ଓ ତାଙ୍କ ବାନ୍ଧବୀ ଘରକୁ ଫେରୁଥିବା ବେଳେ ପଥର ଗାଡ଼ିଆ ଓ ଭରତପୁର ରାସ୍ତାରେ କିଛି ଯୁବକ ଏକ କାରରେ ଆସି ତାଙ୍କୁ ଦୁର୍ବ୍ୟବହାର ପ୍ରଦର୍ଶନ କରିଥିଲେ । ନିଶାସକ୍ତ ଅବସ୍ଥାରେ ଅଶ୍ଳୀଳ ଇଙ୍ଗିତ କରିବା ସହ ମାଡ଼ ମାରିବାକୁ ମଧ୍ୟ ଧମକ ଦେଇଥିଲେ । ଏ ନେଇ କ୍ଯାପଟେନ ଓ ତାଙ୍କ ବାନ୍ଧବୀ ଭରତପୁର ଥାନାକୁ ଅଭିଯୋଗ ପାଇଁ ଯିବା ପରେ ପୋଲିସ ତାଙ୍କୁ ଦୁର୍ବ୍ୟବହାର ସହ ମାଡ଼ ମାରିବା ଭଳି ଆସିଥିଲା ସାଙ୍ଘାତିକ ଅଭିଯୋଗ ।
ନନ୍ଦିଘୋଷ ବ୍ୟୁରୋ: ବିହାରରେ ବିଷାକ୍ତ ମଦ ପ୍ରାୟ ୪୮ଜଣଙ୍କ ଜୀବନ ନେଇଛି । ଏହା ବ୍ୟତୀତ ଅନେକ ଲୋକ ମଧ୍ୟ ନିଜର ଦୃଷ୍ଟିଶକ୍ତି ହରାଇଛନ୍ତି । ବିଷାକ୍ତ ମଦ ଦେଶରେ ପ୍ରତିଦିନ ଅନେକ ଲୋକଙ୍କ ଜୀବନ ନେଇଥାଏ। ଏପରି ପରିସ୍ଥିତିରେ, ଆସନ୍ତୁ ଜାଣିବା କିପରି ମଦ ବିଷାକ୍ତ ହୁଏ ଏବଂ କେଉଁ କାରଣରୁ ବିହାରର ଲୋକମାନେ ମୃତ୍ୟୁବରଣ କଲେ ?
ମଦ କାହିଁକି ବିଷାକ୍ତ ହୋଇଯାଏ ?
ପୂର୍ବରୁ ଦେଶୀ ମଦ ଗୁଡିକ ଡିଷ୍ଟିଲରି ପ୍ଲାଣ୍ଟରୁ ଯୋଗାଇ ଦିଆଯାଉଥିଲା । ଏହାକୁ ଏକ ନିର୍ଦ୍ଦିଷ୍ଟ ତାପମାତ୍ରାରେ ଡିଷ୍ଟିଲ୍ କରି ତିଆରି କରାଯାଇଥାଏ , ଯାହାଦ୍ୱାରା ଏଥିରେ କେବଳ ଇଥିଲ୍ ଆଲକୋହଲ୍ ( ଇଥାନଲ୍ ) ଥାଏ | ଏହି ପ୍ରକାର ମଦ ପିଇବା ଦ୍ବାରା କେବଳ ନିଶା ଚଢିଥାଏ କିନ୍ତୁ ନକଲି ମଦ ତିଆରି ପାଇଁ ଅନେକ ପ୍ରକାରର ବିପଜ୍ଜନକ ରାସାୟନିକ ପଦାର୍ଥ ବ୍ୟବହାର କରାଯାଉଥିବାରୁ ଏହାକୁ ପିଇଲେ ମୃତ୍ୟୁ ହୋଇଥାଏ ।
ବିଷାକ୍ତ ମଦ ତିଆରି ପାଇଁ ଅନେକ ପ୍ରକାରର ରାସାୟନିକ ପଦାର୍ଥ ବ୍ୟବହୃତ ହୁଏ । ବିଷାକ୍ତ ମଦ ତିଆରିରେ ବ୍ୟବହୃତ ହେଉଥିବା ମିଥାଇଲ୍ ଆଲକୋହଲ୍ ହେଉଛି ସବୁଠାରୁ ବିପଜ୍ଜନକ ପଦାର୍ଥ | ଏହା ଇଥିଲ ଆଲକୋହଲ ପରି ଦେଖାଯାଏ ଏବଂ ସ୍ୱାଦ ପ୍ରାୟ ସମାନ , କିନ୍ତୁ ଏହା ଅତ୍ୟଧିକ ବିଷାକ୍ତ । ଏହା ବ୍ୟତୀତ ଏହି ମଦ୍ୟପାନ ସଫେଇ କାର୍ଯ୍ୟ ଏବଂ ଅନ୍ୟାନ୍ୟ ଶିଳ୍ପ କାର୍ଯ୍ୟରେ ବ୍ୟବହୃତ ହୁଏ । ଏହାକୁ ପିଇବା ଦ୍ୱାରା ଦୃଷ୍ଟିଶକ୍ତି ହରେଇବା ଏବଂ ଅନ୍ୟାନ୍ୟ ଗୁରୁତର ସ୍ୱାସ୍ଥ୍ୟ ସମସ୍ୟା ହୋଇପାରେ । ଏବଂ ବେଳେବେଳେ ବିଷାକ୍ତ ମଦ ତିଆରିରେ କୀଟନାଶକ ଭଳି ଅନ୍ୟ ବିଷାକ୍ତ ପଦାର୍ଥ ମଧ୍ୟ ବ୍ୟବହୃତ ହୁଏ |
ମଣିଷ ଶରୀର ଉପରେ ମିଥାଇଲ ଆଲକୋହଲର ପ୍ରଭାବ ?
ଡାକ୍ତରଙ୍କ ଅନୁଯାୟୀ, ମିଥାଇଲ ଆଲକୋହଲ ମସ୍ତିଷ୍କ କୋଷଗୁଡ଼ିକୁ ନଷ୍ଟ କରିବା ପାଇଁ କାମ କରିଥାଏ । ଏହା ଶରୀରରେ ଅସ୍ଥିରତା ଏବଂ ଅନ୍ଧତ୍ୱର ସମସ୍ୟା ମଧ୍ୟ ସୃଷ୍ଟି କରେ । ଏହାକୁ ବହୁ ପରିମାଣରେ ବ୍ୟବହାର କରିବା ଏବଂ ଅଧିକ ସମୟ ପର୍ଯ୍ୟନ୍ତ ବ୍ୟବହାର କରିବା ଦ୍ୱାରା ଜଣେ ବ୍ୟକ୍ତିର ମୃତ୍ୟୁ ମଧ୍ୟ ହୋଇପାରେ । ଏହା ଶରୀରରେ ପ୍ରବେଶ କରିବା ମାତ୍ରେ ଯକୃତ ଏହାକୁ ମେଟାବୋଲିଜ କରିଥାଏ, ଯାହା ଫର୍ମାଲଡିହାଇଡ୍ ଉତ୍ପାଦନ କରିଥାଏ ଏବଂ ପରେ ଏହା ଶରୀର ପାଇଁ ବିପଦ ହୋଇଥାଏ |
