ନନ୍ଦିଘୋଷ ବ୍ୟୁରୋ: ପଦାରେ ପଡିଲା ପ୍ରଶାସନର ବିଫଳତା । ବାତ୍ୟା ଦାନାକୁ ନେଇ କେନ୍ଦ୍ରୀୟ ଟିମ ଆଗରେ ପ୍ରଶାସନିକ ବିଫଳତା ବଖାଣିଲେ ବାଂଶଡା ପଞ୍ଚାୟତବାସୀ । ବାତ୍ୟା ପରିଚାଳନାରେ ପ୍ରଶାସନ ଫେଲ ମାରିଥିବାରୁ କେନ୍ଦ୍ରୀୟ ଟିମ ଆଗରେ ଅସନ୍ତୋଷ ପ୍ରକାଶ କଲେ ଚାନ୍ଦବାଲି ବ୍ଲକର ବାଂଶଡା ପଞ୍ଚାୟତର କ୍ଷତିଗ୍ରସ୍ତ । ପାଟିତୁଣ୍ଡ ଯୋଗୁଁ ଅଧାରୁ ବୈଠକ ସ୍ଥଳ ଛାଡି ଫେରିଲେ କେନ୍ଦ୍ରୀୟ ଟିମ । ଆଜି ବାତ୍ୟା ଦାନାର କ୍ଷୟକ୍ଷତି ଆକଳନ ପାଇଁ କେନ୍ଦ୍ରୀୟ ପ୍ରତିନିଧି ଦଳ ଚାନ୍ଦବାଲି ବ୍ଳକର ଧାମରା ଅଞ୍ଚଳରେ ପହଞ୍ଚି ବିଭିନ୍ନ ପଞ୍ଚାୟତ ବୁଲିଥିଲେ । ସନ୍ଧ୍ୟା ସମୟରେ ବାଂଶଡା ପଞ୍ଚାୟତ ଛେଡାକ ଗ୍ରାମର ଧାନଖଣି ସାହିରେ ପହଞ୍ଚିଥିଲେ । ସେଠାରେ ଥିବା ବାତ୍ୟା ଆଶ୍ରୟସ୍ଥଳୀରେ କେନ୍ଦ୍ରୀୟ ଟିମରେ ଦୁଇ ଅଧିକାରୀଙ୍କ ସମେତ ଭଦ୍ରକ ଜିଲ୍ଲାପାଳ, ଚାନ୍ଦବାଲି ବିଡିଓ, ତହସିଲଦାର ପ୍ରମୁଖ ପହଞ୍ଚି ଲୋକଙ୍କୁ ସମସ୍ଯା ସମ୍ପର୍କରେ ପଚାରିଥିଲେ । ରିଲିଫ ପରିଚାଳନାରେ ତ୍ରୁଟି , ସ୍ଥାନାନ୍ତରରେ ଅବ୍ୟବସ୍ଥା, ବାତ୍ୟା ପରେ କଚ୍ଚାଘର ଭାଙ୍ଗିଥିବା ହିତାଧିକାରୀଙ୍କୁ ଜରି ପାଲ ଦେବାରେ ଅନ୍ତରପାନ୍ତର ଆଦି ବିଷୟରେ ଅଭିଯୋଗ କରିଥିଲେ ଗ୍ରାମବାସୀ ।.
ଦେବଦୂତ ସାଜିଲେ ୧୦୮ ଆମ୍ଵୁଲାନ୍ସ କର୍ମଚାରୀ
ନନ୍ଦିଘୋଷ ବ୍ୟୁରୋ: ଦେବଦୂତ ସାଜିଲେ ୧୦୮ ଆମ୍ଵୁଲାନ୍ସ କର୍ମଚାରୀ l ମାନବିକତା ଦେଖାଇ ଗୁରୁତର ରୋଗୀଙ୍କୁ ଷ୍ଟ୍ରେଚରରେ ବୋହିନେଇ ମେଡିକାଲରେ ଭର୍ତ୍ତି କରିଛନ୍ତି l ବଣଜଙ୍ଗଲ, ଓ ନଦୀନାଳ ପାର କରି ରୋଗୀଙ୍କୁ ମେଡିକାଲ ପର୍ଯ୍ୟନ୍ତ ନେଇଛନ୍ତି । ଏପରି ଘଟଣା ଦେଖିବାକୁ ମିଳିଛି ଢେଙ୍କାନାଳ ଜିଲ୍ଲାର ଆଦିବାସୀ ଅଧ୍ୟୁଷିତ କଙ୍କଡାହାଡ଼ ବ୍ଲକର କାନ୍ତୋଲ ପଞ୍ଚାୟତର ଏକୁଲରେ ଗାଁରେ l ଦୁଲଣି ଦେହୁରୀଙ୍କ ସ୍ୱାସ୍ଥ୍ୟବସ୍ଥା ସଂକଟାପର୍ଣ୍ଣ ଥିବାରୁ ତାଙ୍କ ପୁଅ ଅଭୟ ଦେହୁରୀ ୧୦୮ ଆମ୍ବୁଲାନ୍ସକୁ ଯୋଗାଯୋଗ କରିଥିଲେ l କଙ୍କଡାହାଡ଼ ବ୍ଲକ ୧୦୮ ଆମ୍ବୁଲାନ୍ସ କର୍ମଚାରୀମାନେ ଏକୁଲ ଗାଁରେ ପହଞ୍ଚିଥିଲେ l ଗାଁକୁ ରାସ୍ତା ଅବସ୍ଥା ସୋଚନୀୟ ଥିବାରୁ ଗାଁଠାରୁ ପ୍ରାୟ ୨ କିଲୋମିଟର ଦୂରରେ ଅଟକିଥିଲା ଆମ୍ଵୁଲାନ୍ସ । ୧୦୮ ଆମ୍ବୁଲାନ୍ସ ର କର୍ମଚାରୀ ଲିପୁନ କୁମାର ଦାଶ, ଗାଡ଼ି ଚାଳକ ଶାନ୍ତନୁ କୁମାର ଦେହୁରୀ ଓ ଆଟେଣ୍ଟାଣ୍ଡ ଉତ୍ତମ ପାତ୍ର ଷ୍ଟ୍ରେଚର ମାଧ୍ୟମରେ ବଣଜଙ୍ଗଲ ଓ ନଦୀନାଳ ପାର କରି ରୋଗୀଙ୍କୁ ପ୍ରାୟ ୨ କିଲୋମିଟର ବୋହି କରି କାମାକ୍ଷାନଗର ମେଡିକାଲରେ ଭର୍ତ୍ତି କରାଇଛନ୍ତି l ୧୦୮ କର୍ମଚାରୀଙ୍କ ଏହି ମହନୀୟ କାର୍ଯ୍ୟ ସକାଶେ ଗୁରୁତର ରୋଗୀଙ୍କ ଚିକିତ୍ସା ହୋଇପାରିଲା ।
ବିଜେପିକୁ ଭୋଟ ନଦେବାରୁ ଗାଁରୁ ବାସନ୍ଦ ଅଭିଯୋଗ
ନନ୍ଦିଘୋଷ ବ୍ୟୁରୋ: ବିଜେପିକୁ ଭୋଟ ନଦେବାରୁ ଗାଁରୁ ବାସନ୍ଦ ଅଭିଯୋଗ । ପୁରୀ ଜିଲ୍ଲା ନିମାପଡ଼ା ବ୍ଲକ୍ ପାଳଶ୍ରୀ ଗାଁରେ ୪ ପରିବାରର ୨୦ରୁ ଉର୍ଦ୍ଧ୍ବ ସଦସ୍ୟଙ୍କୁ ଗାଁରୁ ବାସନ୍ଦ କରାଯାଇଥିବା ଅଭିଯୋଗ ହୋଇଛି । ଗତ ପଞ୍ଚାୟତ ନିର୍ବାଚନ ସମୟରେ ଗାଁର କିଛି ମୁଷ୍ଟିମୟ ବ୍ୟକ୍ତି ସେହି ଗାଁର ମନମୋହନ ପ୍ରଧାନଙ୍କ ସମେତ ଗାଁର ଅନ୍ୟ ୩ ପରିବାରକୁ ବିଜେପି ଦଳକୁ ଭୋଟ ଦେବା ନେଇ ଚାପ ପକାଇବା ସହ ବିଭିନ୍ନ ଧମକ ଚମକ୍ ଦେଇ ଆସୁଥିଲେ । କିନ୍ତୁ ସମସ୍ତେ ସେମାନଙ୍କ କଥାକୁ ଖାତିର ନକରି ନିଜ ପସନ୍ଦର ଦଳକୁ ଭୋଟ ଦେଇଥିଲେ । ପରେ ସେହି ଗାଁର କିଛି ଲୋକ ମିଶି ମନମୋହନଙ୍କ ସମେତ ଅନ୍ୟ ୩ ପରିବାରକୁ ଗାଁରୁ ବାସନ୍ଦ କରି ନିଆଁ, ପାଣି, ମନ୍ଦିର ବନ୍ଦ କରିବା ସହିତ ଘରକୁ ଅତ୍ୟାବଶ୍ୟକ ସାମଗ୍ରୀ ନେବା ପାଇଁ ବିରୋଧ କରିଆସୁଥିବା ଅଭିଯୋଗ ହୋଇଛି । ଏନେଇ ମନମୋହନ ଦୀର୍ଘ ଦିନ ତଳେ ପୁରୀ ଜିଲ୍ଲାପାଳଙ୍କୁ ଲିଖିତ ଅଭିଯୋଗ କରିଥିଲେ । ହେଲେ କୌଣସି କାର୍ଯ୍ୟାନୁଷ୍ଠାନ ନହେବାରୁ ଆଜି ମନମୋହନ ଅନ୍ୟ ପୀଡିତଙ୍କ ସହ ନିମାପଡ଼ା ତହସିଲ ସମ୍ମୁଖରେ ଧାରଣା ଦେଇଥିବା ଦେଖିବାକୁ ମିଳିଛି । ଧାରଣା ସ୍ଥଳକୁ ତହସିଲଦାର ଆସିବା ପରେ ତାଙ୍କ ଗୋଡ଼ତଳେ ପଡ଼ି ତାଙ୍କୁ ନ୍ୟାୟ ମାଗୁଥିବାର ଦୃଶ୍ୟ ଦେଖିବାକୁ ମିଳିଛି । ତେବେ ତହସିଲଦାର ଅଭିଯୋଗ ଗ୍ରହଣ କରିଥିବା ବେଳେ ଏହାର ତଦନ୍ତ କରାଯିବ ବୋଲି ପ୍ରତିଶୃତି ଦେଇଛନ୍ତି । ସେପଟେ ନ୍ୟାୟ ନମିଳିଲେ ତହସିଲ ସମ୍ମୁଖରେ ଆତ୍ମାହୁତି ଦେବାକୁ ଚେତାବନୀ ଦେଇଛନ୍ତି ମନମୋହନ।
ଅଳିଆ ପାଲଟିଲାଣି ସୋସିଆଲ ମିଡିଆ, ବହୁଳ ଅପବ୍ଯବହାର ନେଇ ଅଭିଯୋଗ
ନନ୍ଦିଘୋଷ ବ୍ୟୁରୋ: ଆଜିକାଲି ସୋସିଆଲ ମିଡିଆର ବହୁଳ ଅପବ୍ୟବହାର ହେଉଛି । ଏହି କଥା କହିଛନ୍ତି ସୁପ୍ରିମକୋର୍ଟର ପୂର୍ବତନ ପ୍ରଧାନ ବିଚାରପତି ଡି.ଓ୍ବାଇ ଚନ୍ଦ୍ରଚୂଡ଼ । କୋର୍ଟରେ ବିଚାରାଧୀନ ମାମଲାରେ ବିଚାରପତିଙ୍କ ଉପରେ ଟିକା ଟିପ୍ପଣୀ କରି ଚାପ ପ୍ରୟୋଗ କରିବାର ଅପଚେଷ୍ଟା କରାଯାଉଛି । ବାକ୍ ସ୍ବାଧୀନତାର ଦ୍ବାହି ଦେଇ ସମାଜର କିଛି ପ୍ରେସର ଗୃପ ଲୋକଙ୍କ ମନରେ ନ୍ୟାୟାଳୟ ପ୍ରତି ୨୦ ସେକେଣ୍ଡ ଭିତରେ ଏକ ଭୁଲ ଧାରଣା ସୃଷ୍ଟି କରିବାକୁ ଅପଚେଷ୍ଟା କରୁଛନ୍ତି । ଏଥିରେ କୋର୍ଟ ପ୍ରଭାବିତ ହେବା ଉଚିତ ନୁହଁ । ପୂର୍ବତନ ବିଚାରପତିଙ୍କ ମତ ସହିତ ଏକମତ ହୋଇଛନ୍ତି ଆଇନଜୀବୀ । ସରକାର ସୋସିଆଲ ମିଡିଆ କଣ୍ଟେଣ୍ଟ ନିୟନ୍ତ୍ରଣ ପାଇଁ ସ୍ବତନ୍ତ୍ର ଆଇନ ଆଣିବାକୁ ମତ ପ୍ରକାଶ ପାଇଛି ।
ଅଳିଆ ପାଲଟିଲାଣି ସୋସିଆଲ ମିଡିଆ । ୟୁ ଟ୍ୟୁବ୍ ହେଉ କି ଅନ୍ୟ ପ୍ଲାଟଫର୍ମ । ପ୍ରତି ପ୍ରସଙ୍ଗରେ ଦିଆଯାଉଛି ନିର୍ଦ୍ଦେଶ ଶୁଣାଯାଉଛି ନିଷ୍ପତ୍ତି । ୨୦ ସେକେଣ୍ଡରେ ବିଭ୍ରାନ୍ତ ହେଉଛନ୍ତି ଲୋକ । ଏପରିକି କୋର୍ଟରେ ବିଚାରାଧୀନ ମାମଲା ଉପରେ ସୋସିଆଲ ମିଡିଆରେ ଟିକା ଟିପ୍ପଣୀ ବଡ଼ ଚାଲେଞ୍ଜ ସୃଷ୍ଟି କଲାଣି । ସୁପ୍ରିମ୍କୋର୍ଟରୁ ନିକଟରେ ଅବସର ନେଇଥିବା ପ୍ରଧାନ ବିଚାରପତି ଜଷ୍ଟିସ ଡି.ଓ୍ବାଇ ଚନ୍ଦ୍ରଚୂଡ଼ଙ୍କ ଏପରି ମତ ଏବେ ନୂଆ ବିତର୍କ ସୃଷ୍ଟି କରିଛି । ଜଷ୍ଟିସ ଚନ୍ଦ୍ରଚୂଡ଼ଙ୍କ ଏପରି ଟିପ୍ପଣୀକୁ ଆଇନଜୀବୀ ମହଲ ସ୍ବାଗତ କରିଛି । କୌଣସି ମାମଲାରେ ଅନୁସନ୍ଧାନ ଚାଲିଥିବାବେଳେ ଗଣମାଧ୍ୟମ ହେଉକି ସୋସିଆଲ ମିଡିଆରେ ବ୍ୟାପକ ଚର୍ଚ୍ଚା ଆଲୋଚନା ହେଉଛି । ନିୟମ ଅଛି କୌଣସି ମାମଲା କୋର୍ଟକୁ ଗଲା ପରେ ତା ଉପରେ କୋର୍ଟ ବାହାରେ କୌଣସି ଟିପ୍ପଣୀ ଦେବା କଥା ନୁହଁ । କିନ୍ତୁ ବାକ୍ ସ୍ବାଧୀନତାର ବ୍ୟାପକ ଅପବ୍ୟବହାର ହେଉଥିବା ଦେଖିବାକୁ ମିଳୁଛି । ସାମାଜିକ ଗଣମାଧ୍ୟମରେ ବିଚାରପତିଙ୍କ ସମ୍ପର୍କରେ ମଧ୍ୟ ଟିକା ଟିପ୍ପଣୀ ଦେବାକୁ କିଛି ବ୍ୟକ୍ତି ଭୁଲୁନାହାନ୍ତି । ଜଷ୍ଟିସ୍ ଚନ୍ଦ୍ରଚୂଡ଼ ତାଙ୍କର ଦୀର୍ଘ ଅନୁଭୁତିରୁ ଏପରି କହିଛନ୍ତି । କିଛି ବ୍ୟକ୍ତି ଚାପ ପ୍ରୟୋଗ କଲାଭଳି ସାମାଜିକ ଗଣମାଧ୍ୟମକୁ ବ୍ୟବହାର କରି ଲୋକଙ୍କ ମନରେ ନ୍ୟାୟାଳୟ ପ୍ରତି ଭୁଲ ଧାରଣା ସୃଷ୍ଟି କରିବାକୁ ହୀନ ଉଦ୍ୟମ କରୁଛନ୍ତି ।
ଗଣତନ୍ତ୍ରରେ ବ୍ୟକ୍ତିଗତ ଅଭିବ୍ୟକ୍ତି ପ୍ରକାଶ କରିବାର ଅଧିକାର ସମସ୍ତଙ୍କର ରହିଛି । କିନ୍ତୁ ତାହା ଲକ୍ଷ୍ମଣରେଖା ଭିତରେ ରହିବା ଆବଶ୍ୟକ । ଯେହେତୁ ସୋସିଆଲ୍ ମିଡିଆ ଉପରେ ଅଙ୍କୁଶ ଲଗାଇବାକୁ କିଛି ଏସ୍ଓପି ଲାଗୁ ହେଉନି । ଏହାର ଫାଇଦା ଉଠାଉଛନ୍ତି କିଛି ଗୋଷ୍ଠୀ । ଜଷ୍ଟିସ୍ ଚନ୍ଦ୍ରଚୂଡ଼ଙ୍କ ଅନୁଶୀଳନ ଏବେ ନୂଆ ବିତର୍କ ସୃଷ୍ଟି କରିଛି । ବାକ୍ ସ୍ବାଧୀନତା କେତେ ପର୍ଯ୍ୟନ୍ତ କାହାକୁ ମିଳିବା ଦରକାର । ତା ଉପରେ ବିସ୍ତୃତ ତର୍ଜମା ହେବା ଦରକାର । ଖାଲି ସେତିକି ନୁହେଁ, ଅପରାଧର ଶିକାର ହୋଇଥିବା ପୀଡ଼ିତାର ମନୋବଳ ମଧ୍ୟ ମିଡିଆ ଟ୍ରାଏଲର ଶିକାର ହେଉଛି । କୋର୍ଟରେ ବୟାନ ରଖିବା ବେଳେ ମଧ୍ୟ ତାଳମେଳ ରହୁନି । ବୟାନ ବଦଳୁଥିବାରୁ ଅଭିଯୁକ୍ତ ମଧ୍ୟ ଅନେକ ମାମଲାରେ ଦଣ୍ଡିତ ହୋଇପାରୁନି । ଏବେ ସମୟ ଆସିଛି ସୋସିଆଲ ମିଡିଆକୁ ନିୟନ୍ତ୍ରଣ କରିବା ପାଇଁ ସରକାର ସ୍ବତନ୍ତ୍ର ଆଇନ ଆଣିବା ଦରକାର ।ଜଷ୍ଟିସ ଚନ୍ଦ୍ରଚୂଡ଼ଙ୍କ ଭାଷାରେ ନୀତି ନିର୍ଦ୍ଧାରଣ କରିବା ବ୍ୟବସ୍ଥାପିକା ସଭାର କାର୍ଯ୍ୟ । କିନ୍ତୁ ପାରିତ ହୋଇଥିବା ଆଇନଟି ସମ୍ବିଧାନ ସମ୍ମତ କି ନାହିଁ ତାକୁ ତର୍ଜମା କରିବା ଅଧିକାର ବିଚାରାଳୟର ରହିଛି ।
ଏହିସବୁ ଅଭିଜ୍ଞ ଖେଳାଳିଙ୍କୁ କିଣିବାକୁ ମନ ବଳାଇଲେନି ଫ୍ରାଞ୍ଚାଇଜ୍
ନନ୍ଦିଘୋଷ ବ୍ୟୁରୋ: ଚାଲିଛି ଆଇପିଏଲ ନିଲାମୀ । ଖେଳାଳିଙ୍କ ଉପରେ ହେଉଛି ଟଙ୍କା ବର୍ଷା । କିନ୍ତୁ ଏମିତି କିଛି ଅଭିଜ୍ଞ ଖେଳାଳି ରହିଛନ୍ତି ଯେଉଁମାନଙ୍କୁ କିଣିବାକୁ କୌଣସି ଫ୍ରାଞ୍ଚାଇଜ୍ ମନ ବଳାଇନାହାନ୍ତି । ବହୁ ଅଭିଜ୍ଞ ଖେଳାଳି ଏଥରକ ଅଲୋଡ଼ା ହୋଇଛନ୍ତି । ଯେଉଁମାନେ ପୂର୍ବରୁ ଆଇପିଏଲରେ ଅନେକ ରେକର୍ଡ କରିଥିଲେ ସୁଦ୍ଧା ଏଥରକ ଅଲୋଡ଼ା ହୋଇଛନ୍ତି । ତେବେ ଆସନ୍ତୁ ଏହି ଖେଳାଳିଙ୍କ ସମ୍ପର୍କରେ ଜାଣିବା । ରବିବାର କିଛି ଖେଳାଳି ଅନସୋଲ୍ଡ ରହିଥିବାବେଳେ ସୋମବାର ବହୁ ଆଗ ଧାଡ଼ିର ଆନ୍ତର୍ଜାତୀୟ କ୍ରିକେଟର ଅଭିଜ୍ଞତା ରଖିଥିବା ଖେଳାଳି ମଧ୍ୟ ଅଲୋଡ଼ା ହୋଇଛନ୍ତି । ଏହି ତାଲିକାରେ ରହିଛନ୍ତି ଆଜିଙ୍କ୍ୟା ରାହାଣେ , ମୟଙ୍କ ଅଗ୍ରଓ୍ବାଲ, ପୃଥୀ ଶ, ସାର୍ଦ୍ଧୁଲ ଠାକୁର, କେନ୍ ଓ୍ବିଲିୟମସନ, ଡାରେଲ ମିଚେଲ, ଗ୍ଲେନ୍ ଫିଲିପ୍ସ, ଉମେଶ ଯାଦବ, ନବୀନ ଉଲହକ, ମୁସ୍ତାଫିଜର ରହିମ, ଉମରାନ ମଲ୍ଲିକ, ମୋଇନ୍ ଅଲ୍ଲୀ, ବେନ୍ ଡକେଟ୍, ସାଇ ହୋପ, କେ.ଏସ ଭରତ ପ୍ରମୁଖ ।
ଆନ୍ଦୋଳନ ସ୍ଥଳକୁ କଣ ପାଇଁ ଯାଉଥିଲେ ଧର୍ମଶାଳା ବିଧାୟକ ହିମାଂଶୁ ସାହୁ ?
ନନ୍ଦିଘୋଷ ବ୍ୟୁରୋ: ଯାଜପୁର ଗଣ୍ଡଗୋଳ ଘଟଣାକୁ ନେଇ ପୋଲିସ ଡିଜିଙ୍କୁ ଭେଟିଛି ବିଜେଡି ପ୍ରତିନିଧି ଦଳ। ଗଣ୍ଡଗୋଳ କରିଥିବା ବିଜେପି କର୍ମୀଙ୍କୁ ଛାଡ଼ି ବିଜେଡି କର୍ମୀଙ୍କୁ ଗିରଫ କରୁଛି ପୋଲିସ। ପୋଲିସ ସାଜିଛି ଶାସକ ଦଳର ହାତବାରିସି। ଏଭଳି ଅଭିଯୋଗ ନେଇ ପୋଲିସ ଡିଜିଙ୍କୁ ଫେରାଦ ହୋଇଛି ବିଜେଡି। ମନ୍ଥର ଗତିରେ ଚାଲିଥିବା ବିରଜା ପ୍ରକଳ୍ପ କାର୍ଯ୍ୟକୁ ତ୍ବରାନ୍ବିତ କରିବା ଦାବିରେ ଯାଜପୁରରେ କିଛି ଲୋକ ଧାରଣା ଦେଇଥିଲେ। କିନ୍ତୁ ଧର୍ମଶାଳା ବିଧାୟକ ହିମାଂଶୁ ସାହୁ କଣ ପାଇଁ ଏହି ଆନ୍ଦୋଳନ ସ୍ଥଳକୁ ଯାଇଥିଲେ। ବିଧାୟକଙ୍କ ସାଙ୍ଗରେ କିଛି ଲୋକ ଠେଙ୍ଗା ବାଡି ନେଇ ଯାଜପୁରରେ ଗଣ୍ଡଗୋଳ କରିଥିଲେ। ହେଲେ ପୋଲିସ ସେମାନଙ୍କୁ ଗିରଫ ନକରି ୧୯ ଜଣ ବିଜେଡି କର୍ମୀଙ୍କୁ ବେଆଇନ ଭାବେ ଗିରଫ କଲା। ଯାହାକୁ ନିନ୍ଦା କରିଛି ବିଜେଡି। ଯଦି ଦମ ଅଛି ତେବେ ଠେଙ୍ଗା ନେଇ ଯାଇଥିବା ବିଧାୟକଙ୍କ ସମର୍ଥକଙ୍କୁ ପୋଲିସ ଗିରଫ କରୁ ବୋଲି ପ୍ରଶ୍ନ କରିଛି ବିଜେଡି। ହେଲେ ସରକାରଙ୍କ ଚାପରେ ପୋଲିସ ପୂରା ଚେପା ବୋଲି କହିଛି ଦଳ। ସେହିପରି ରାଜ୍ୟରେ ଆଇନ ଶୃଙ୍ଖଳା ବିଗୁଡୁ ଥିବା ବେଳେ, ପୋଲିସର ଦମନଲୀଳା ଚାଲିଛି। ଗତ ୫ ମାସରେ ୧୨୫୬ ଜଣ ମହିଳାଙ୍କ ଉପରେ ଅତ୍ୟାଚାର ହୋଇଛି। ଛିନ୍ତାଇରେ ଭୁବନେଶ୍ୱର ଓ ଡକାୟତିରେ ସମ୍ବଲପୁର ଏକ ନମ୍ବର ବୋଲି କହି ପୋଲିସର କାର୍ଯ୍ୟଦକ୍ଷତା ଉପରେ ପ୍ରଶ୍ନ ଉଠାଇଛି ବିଜେଡି।
ବେଆଇନ ଗଞ୍ଜେଇ ଚାଷ କରୁଥିଲେ ସାବଧାନ!
ନନ୍ଦିଘୋଷ ବ୍ୟୁରୋ: ଗଞ୍ଜେଇ ଚାଷ କରୁଥିଲେ ସାଵଧାନ । ନିଶା ମାଫିଆଙ୍କ ଜମି ଉପରେ ଉଡୁଛି ଡ୍ରୋନ । ନଷ୍ଟ ହେଉଛି ଶହ ଶହ ଏକର ଚାଷ । ମାସକ ମଧ୍ୟରେ ୨୩ ଶହ ୭୫ ଏକର ଜମିରୁ ଗଞ୍ଜେଇ ଚାଷ ନଷ୍ଟ ହୋଇଥିବା ବେଳେ ୨୮ ଲକ୍ଷରୁ ଅଧିକ ଗଞ୍ଜେଇ ଗଛ ନଷ୍ଟ କରାଗଲାଣି । ଆଗାମୀ ଦିନରେ ମଧ୍ଯ ଏହି ଅଭିଯାନ ଜାରି ରହିବ ବୋଲି ସୂଚନା ଦେଇଛନତି ଡିଜିପି ।
ଗଞ୍ଜେଇ ଚାଷ ଓ ଚାଷୀଙ୍କ ବିରୋଧରେ ପୋଲିସର ମିଶନ ଦମନ । ଡ୍ରୋନ ସାହାଯ୍ୟରେ ଚିହ୍ନଟ ପରେ କଟାଯାଉଛି ଗଞ୍ଜେଇ ଗଛ । ନିଶା ମାଫିଆଙ୍କ ବିରୋଧରେ ଖୁରାନିଆଙ୍କ ଜିରୋ ଟଲରାନ୍ସ । ଆନ୍ତଃ ରାଜ୍ୟଚାଲାଣ ରୋକିବାକୁ ଏସପି ମାନଙ୍କୁ ଟାସ୍କ ଦେଲେ ଡିଜିପି । ଡ୍ରୋନ ଦ୍ୱାରା କରାଯିବ ଗଞ୍ଜେଇ ଚାଷ ନଷ୍ଟ । ରାଜ୍ୟରୁ ଗଞ୍ଜେଇ ଚାଷକୁ ମୂଳପୋଛ କରିବା ଲକ୍ଷ୍ଯରେ ଓଡିଶା ପୋଲିସ । ୨୦୨୬ ସୁଦ୍ଧା ରାଜ୍ୟରେ ବେଆଇନ ନିଶା କାରବାର ବନ୍ଦ କରିବାକୁ ଟାର୍ଗେଟ ରଖିଥିବା ବେଳେ ଏବେ ପ୍ରତ୍ୟେକ ଦିନ ଏକର ଏକର ଗଞ୍ଜେଇ ଚାଷ ନଷ୍ଟ କରାଯାଉଛି । ରାଜ୍ୟ ପୋଲିସ୍, ଅବକାରୀ ବିଭାଗ, ରାଜସ୍ଵ ବିଭାଗ ପକ୍ଷରୁ ମିଳିତ ଭାବେ ଗଞ୍ଜେଇ ନଷ୍ଟ କରିବା ନେଇ ଗଠନ କରାଯାଇଛି ଯୁଗ୍ମ ଟାସ୍କଫୋର୍ସ । ରାଜ୍ୟର ୯ ଟି ଜିଲ୍ଲାରେ ବହୁଳ ମାତ୍ରାରେ ଗଞ୍ଜେଇ ଚାଷ କରାଯାଉଥିବା ରିପୋର୍ଟ କହୁଛି ।
ମାଲକାନଗିରି, କୋରାପୁଟ, ରାୟଗଡା, ଗଜପତି, କନ୍ଧମାଳ, ବୌଦ୍ଧ, ଗଞ୍ଜାମ, ନବରଙ୍ଗପୁର ଓ ମୟୁରଭଞ୍ଜ ଜିଲ୍ଲାରେ ବହୁଳ ପରିମାଣରେ ବେଆଇନ ଗଞ୍ଜେଇ ଚାଷ କରାଯାଉଥିବା ରାଜ୍ଯ ପୋଲିସ ଜାଣିବାକୁ ପାଇଛି । ତେଣୁ ନୂଆ ଟେକ୍ନୋଲୋଜି ସାହାଯ୍ୟରେ ଆରମ୍ଭ ହୋଇଛି ଗଞ୍ଜେଇ ଚାଷ ନଷ୍ଟ ଅଭିଯାନ । ଡ୍ରୋନ ସହ ସାଟେଲାଇଟ ଚିତ୍ର ସାହାଯ୍ୟରେ ଅଭିଯାନ ଆରମ୍ଭ କରିଛି ଓଡିଶା ପୋଲିସ ।
ନଭେମ୍ବର ୧ ତାରିଖରୁ ଆଜି ଭିତରେ ୨୩ ଶହ ୭୫ ଏକର ଜମିରୁ ଗଞ୍ଜେଇ ଚାଷ ନଷ୍ଟ ହୋଇଥିବା ବେଳେ ୨୮ ଲକ୍ଷରୁ ଅଧିକ ଗଞ୍ଜେଇ ଗଛ ନଷ୍ଟ କରାଯାଇଛି । ୫୪ ଟି NDPS ମାମଲାରେ ୫୩ ଶହ କେଜି ଗଞ୍ଜେଇ ଜବତ କରାଯାଇଛି । ବାହାରକୁ ଗଞ୍ଜେଇ ଚାଲାଣ ବେଳେ ୨୦ ଟି ଗାଡି ସହ ୧୫ ଲକ୍ଷ ନଗଦ ଟଙ୍କା ମଧ୍ୟ ଜବତ କରାଯାଇଛି । ଏପର୍ଯ୍ୟନ୍ତ ୮୦ ଜଣ ବେପାରୀଙ୍କୁ ମଧ୍ୟ ଗିରଫ କରାଯାଇଛି । ଓଡିଶା ଗଞ୍ଜେଇର ରାଜ୍ୟ ବାହାରେ ଚାହିଦା ଥିବାରୁ ପୂର୍ବ ଦିନ ମାନଙ୍କରେ ବିପୁଳ ନିଳଜହର ବାହାରକୁ ଚାଲାଣ ହେଉଥିଲା । ଏହି କାରବାରରେ ଜିରୋ ଟଲରାନ୍ସ ନୀତି ଆପଣାଇବାକୁ ବିଭିନ୍ନ ଜିଲ୍ଲାର SP ଙ୍କୁ କଡା ନିର୍ଦ୍ଦେଶ ଦେଇଛନ୍ତି ଡିଜିପି । ମାଓବାଦୀ ଓ ନକ୍ସଲ ମୁଖ୍ୟତଃ ଗଞ୍ଜେଇ କାରବାର ଉପରେ ନିର୍ଭରଶୀଳ । ତେଣୁ ନୀଳଜହରର ବିନାଶ ହେଲେ ଏହି ଆତଙ୍କୀ କାର୍ଯ୍ୟକଳାପ ମଧ୍ୟ କମିପାରିବ ବୋଲି ବରିଷ୍ଠ ଅଫିସର ମାନଙ୍କୁ ସୂଚନା ଦେଇଛନ୍ତି ଡିଜିପି ।
ଗରିବ ପରିବାରରୁ ଆଣି ଦେହ ବେପାରରେ ଲଗାଉଥିଲେ ଦଲାଲ, ଆକ୍ସନ ମୋଡ଼ରେ ଟୁଇନସିଟି ପୋଲିସ
ନନ୍ଦିଘୋଷ ବ୍ୟୁରୋ: କଟକ-ଭୁବନେଶ୍ବରରେ ବାଙ୍ଗଲାଦେଶୀ ନାବାଳିକା ଓ ଯୁବତୀଙ୍କୁ ଆଣି ଅନୈତିକ ଦେହ ବେପାରରେ ଲଗାଯିବା ଘଟଣା ପଦାକୁ ଆସିବା ପରେ ଆକ୍ସନ ମୋଡରେ ପୋଲିସ । କଟକରେ CWC ଆଗରରେ ଉଦ୍ଧାର ନାବାଳିକା ଦେଇଥିବା ବୟାନକୁ ଆଧାର କରି ସଦର ଗୋପାଳପୁରରୁ ଦମ୍ପତିଙ୍କୁ ଗିରଫ କରି କୋର୍ଟ ଚାଲାଣ କରିଛି ମଧୂପାଟଣା ପୋଲିସ । ନାବାଳିକଙ୍କ ସ୍ବାସ୍ଥ୍ଯ ପରୀକ୍ଷ ସହ ମାଜିଷ୍ଟ୍ରେଟଙ୍କ ଆଗରେ ବୟାନ ରେକର୍ଡ ହୋଇଛି । ତାଙ୍କ ପରିବାର ସହ ଯୋଗାଯୋଗ କରାଯାଇଛି । ନ୍ୟାୟିକ ପ୍ରକ୍ରିୟା ପରେ ନାବାଳିକାଙ୍କ ବାଂଲାଦେଶ ପଠାଇବା ପାଇଁ ହାଇ କମିଶନଙ୍କ ସହ ଯୋଗାଯୋଗ କରାଯିବ ବୋଲି କହିଛନ୍ତି CWC ଅଧ୍ଯକ୍ଷ । ସେପଟେ ଘଟଣାର ତଦନ୍ତ ଜାରି ରହିଛି ଜଳପଥରେ ଅନୁପ୍ରବେଶ ରୋକିବାକୁ ପଦକ୍ଷେପ ନିଆଯାଉଛି ବୋଲି କହିଛନ୍ତି ପୋଲିସ ଡିଜି । ଭୁବନେଶ୍ବରରେ ବିଭିନ୍ନ ସ୍ଥାନରେ ଚଢାଉ କରିଛଇ ସ୍ପେଶାଲ ଟିମ୍ ।
ଗରିବ ପରିବାରରୁ ଆଣି ଦେହ ବେପାରରେ ଲଗାଉଥିଲେ ଦଲାଲ । ଆକ୍ସନ ମୋଡ଼ରେ ଟୁଇନସିଟି ପୋଲିସ । ବାଂଲାଦେଶ ହାଇ କମିଶନଙ୍କ ସହ କରାଯିବ ଯୋଗାଯୋଗ । ଚାକିରି ଦେବାକୁ ମିଥ୍ଯା ପ୍ରତିଶ୍ରୁତି ଦେଇ ବାଂଲାଦେଶରୁ ଯୁବତୀଙ୍କୁ ଆଣି କଟକ ଭୁବନେଶ୍ବରରେ କୁତ୍ସିତ କାର୍ଯ୍ଯରେ ଲଗାଉଥିଲେ ଦଲାଲ । ନାବାଳିକାଙ୍କ ବୟାନ ଆଧାରରେ କଟକ ଗୋପାଳପୁରରୁ ଦମ୍ପତ୍ତିକୁ ଗିରଫ କରି କୋର୍ଟ ଚାଲାଣ କରିଛି ମଧୂପାଟଣା ପୋଲିସ । ଗିରଫ ଦମ୍ପତି ହେଲେ ଓମ ପ୍ରକାଶ ଚୌଧୁରୀ ଓ ଜାସ୍ମିନ ଚୌଧୁରୀ । ଗିରଫ ଦମ୍ପତି ନାବାଳିକାକୁ ଯୌନ କାର୍ଯ୍ୟରେ ନିୟୋଜିତ କରୁଥିଲେ ବୋଲି ପୋଲିସ ଜାଣିବାକୁ ପାଇଛି । ଘଟଣାରେ ଆଉ କିଛି ମାଷ୍ଟର ମାଇଣ୍ଡ ସଂପୃକ୍ତ ଥିବା ପୋଲିସ ଜାଣିବାକୁ ପାଇଛି । ସେମାନଙ୍କୁ ଧରିବାକୁ ପୋଲିସ ଏକ ସ୍ବତନ୍ତ୍ର ଟିମ ଗଠନ କରିଥିବା କହିଛନ୍ତି ଡିସିପି ।
ଉଦ୍ଧାର ପରେ ନାବାଳିକାଙ୍କ ସ୍ବାସ୍ଥ୍ୟ ପରୀକ୍ଷା କରାଯିବା ସହିତ ମାଜିଷ୍ଟ୍ରେଟଙ୍କ ଆଗରେ ବୟାନ ରେକର୍ଡ କରାଯାଇଛି । ଗତ ୧୦ ତାରିଖରୁ ନାବାଳିକା CWC ପାଖରେ ଥିବା ବେଳେ ତାଙ୍କର ସ୍ବାସ୍ଥ୍ୟବସ୍ଥା ଭଲ ଅଛି । ପରିବାର ସହ ଯୋଗାଯୋଗ ହୋଇଛି । ନାବାଳିକାଙ୍କ ପରିବାର ଅତି ଗରିବ । ତେଣୁ ନ୍ୟାୟିକ ପ୍ରକ୍ରିୟା ପରେ ତାଙ୍କୁ ବାଂଲାଦେଶ ହାଇ କମିଶନରଙ୍କ ସହ ଯୋଗାଯୋଗ କରାଯିବ ବୋଲି CWC ଅଧ୍ୟକ୍ଷ କହିଛନ୍ତି । ସେପଟେ ଏନେଇ ପ୍ରତିକ୍ରିୟା ରଖିଛନ୍ତି ଡିଜିପି । ଘଟଣାର ତଦନ୍ତ ଜାରି ରହିଛି ଆଗକୁ ମଧ୍ଯ ଧରପଗଡ଼ କରାଯିବ । ଏହାସହ ଜଳପଥରେ ଅନୁପ୍ରବେଶ ଉପରେ କଡାକଡି ନଜର ରଖାଯିବ । ଡ୍ରୋନ ଦ୍ୱାରା ପାଟ୍ରୋଲିଂ ବ୍ୟାପକ ହେବ । ଉପକୂଳରେ ଅଭିଜ୍ଞ ଅବସରପ୍ରାପ୍ତ ନୌସେନା ଅଧିକାରୀଙ୍କୁ ନିଯୁକ୍ତି ମିଳିବ । ରାଜ୍ୟରେ ୪୮୦ କିଲୋମିଟର ସମୁଦ୍ର ଉପକୂଳରେ ୧୮ ଟି ମେରାଇନ ଥାନା ରହିଛି । ବର୍ତ୍ତମାନ ପାଟ୍ରୋଲିଂ ପାଇଁ ୧୫ ଟି ବୋଟ ରହିଛି । ୧୦ ଟି ନୂଆ ଫିସିଂ କ୍ରାଫ୍ଟ ପାଇଁ ରାଜ୍ୟ ସରକାରଙ୍କ ସହ ଆଲୋଚନା ହୋଇଛି । ଖୁବଶୀଘ୍ର ଇଣ୍ଟରସେଫ୍ଟର ବୋଟ ମଧ୍ୟ ତଟରକ୍ଷା ପାଇଁ ବ୍ୟବହାର କରାଯିବ ବୋଲି ସୂଚନା ଦେଇଛନ୍ତି ଡିଜିପି ।
ଡବଲ ଇଞ୍ଜିନ ସରକାରରେ ଏବେ ଅଲୋଡ଼ା ହୋଇପଡ଼ିଛି ମାଣ୍ଡିଆ
ନନ୍ଦିଘୋଷ ବ୍ୟୁରୋ: ଡବଲ ଇଞ୍ଜିନ ତଥା ମୋହନ ମାଝୀ ସରକାରରେ ଏବେ ଅଲୋଡ଼ା ହୋଇପଡ଼ିଛି ମାଣ୍ଡିଆ । ପୂର୍ବ ସରକାର ମାଣ୍ଡିଆ ଚାଷ ପାଇଁ ଗୁରୁତ୍ଵ ଦେଉଥିଲେ, ମିଲେଟ୍ ମିଶନ ପାଇଁ ଆଦିବାସୀ ଜିଲ୍ଲାରେ ମାଣ୍ଡିଆ ଚାଷ ପ୍ରତି ଚାଷୀଙ୍କ ମଧ୍ୟରେ ଉତ୍ସାହ ଦେଖିବାକୁ ମିଳିଥିଲା । ଏପରିକି ନବୀନ ସରକାର ସମୟରେ ପ୍ୟାରିସ୍ ଫୁଡ୍ ଫେଷ୍ଟିଭାଲରେ ମାଣ୍ଡିଆ ଜାତୀୟ ଖାଦ୍ୟ ସାମଗ୍ରୀ ସାମିଲ୍ ହୋଇ ଚର୍ଚ୍ଚାକୁ ଆସିଥିଲା । ରାଜ୍ୟ ସରକାରଙ୍କ ପାଇଁ ଏବେ ଅଲୋଡ଼ା ହୋଇପଡ଼ିଛି ମାଣ୍ଡିଆ ଚାଷ । ନାହିଁ ମାର୍କେଟ ସୁବିଧା । ତଥାପି କଳାହାଣ୍ଡିରେ ବଢୁଛି ନବୀନଙ୍କ ମାଣ୍ଡିଆ ଚାଷ । ମାଣ୍ଡିଆ ଚାଷ କରି ସ୍ଵାବଲମ୍ଵୀ ହେଉଛନ୍ତି କଳାହାଣ୍ଡିର ମାଣ୍ଡିଆ ଚାଷୀ ।
ଚାଲିଛି ମାଣ୍ଡିଆ ଉତ୍ପାଦନ । ଅମଳ ସମୟ ହୋଇଥିବାରୁ ଚାଷୀ କ୍ଷେତରୁ ମାଣ୍ଡିଆ କାଟିଆଣି ଖଳାରେ ଶୁଖାଉଛି । ଅପପୁଷ୍ଟିକୁ ଦୂର କରିବା ସହିତ ଲୋକଙ୍କୁ ପୃଷ୍ଟିକର ଖାଦ୍ୟ ଯୋଗାଇବା ଉଦ୍ଦେଶ୍ୟରେ ମାଣ୍ଡିଆ ଚାଷକୁ ଗୁରୁତ୍ଵ ଦେଇ ମିଲେଟ୍ ମିଶନ ଆରମ୍ଭ କରିଥିଲେ ନବୀନ ସରକାର । ମିଶନ ଶକ୍ତି ମାଆ ମାନଙ୍କୁ ମାଣ୍ଡିଆ ଫସଲ ସହିତ ଯୋଡ଼ାଯାଇଥିଲା । ଯେଉଁଥି ପାଇଁ ବଣ ପାହାଡ଼ ଘେରା ଆଦିବାସୀ ଅଧ୍ୟୁଷିତ କଳାହାଣ୍ଡି ଜିଲ୍ଲାରେ ମାଣ୍ଡିଆ ଚାଷର ଚାହିଦା ବଢ଼ିଛି । ଧାନ କପା ମକା ପରେ ଏବେ କଳାହାଣ୍ଡି ମିଲେଟ୍ ହବ ହେବାକୁ ଯାଉଛି । ଚଳିତ ବର୍ଷ ଫସଲ ଭଲ ହୋଇଥିବାରୁ ଅମଳ ଅଧିକ ହେବ ବୋଲି ଆଶା ରଖିଛନ୍ତି ଚାଷୀ ।
କ୍ଷେତରେ ବର୍ଷକୁ ୩ଥର ମାଣ୍ଡିଆ ଚାଷ ହୋଇଥାଏ । ମାଣ୍ଡିଆ ଚାଷ ପାଇଁ କମ୍ ପାଣି ଆବଶ୍ୟକ ହୋଇଥିବା ବେଳେ ଧାନ ଓ ଅନ୍ୟ ଶଷ୍ୟଠାରୁ ଅଧିକ ଲାଭ ମିଳିଥାଏ । ଦିନେ ଭୋକ ମେଣ୍ଟାଇବା ପାଇଁ କାଆଁ ଭାଁ ଅଞ୍ଚଳରେ ଲୋକେ ମାଣ୍ଡିଆ ଚାଷ କରୁଥିଲେ । ହେଲେ ଆଜି କଳାହାଣ୍ଡି ଜିଲ୍ଳା ଧର୍ମଗଡ଼ କୃଷି ଜିଲ୍ଲାର ଗୋଲାମୁଣ୍ଡା ଓ କୋକସରା ବ୍ଲକରେ ପାଖାପାଖି ୧୨ଶହ ହେକ୍ଟର ଚାଷ ଜମିରେ ହେଉଛି । ଚଲିତ ବର୍ଷ ଏକର ପ୍ରତି ୫ କ୍ଵିଣ୍ଟାଲ ମାଣ୍ଡିଆ ଅମଳ ହେବାର ଲକ୍ଷ୍ୟ ରଖିଛି ଜିଲ୍ଲା କୃଷି ବିଭାଗ ।
ଗୁଗୁଲ୍ ମ୍ୟାପ୍ ଦେଖାଇଦେଲା ଭୁଲ୍ ବାଟ: ପୋଲ ତଳକୁ ଖସି ୩ ମୃତ
ନନ୍ଦିଘୋଷ ବ୍ୟୁରୋ: ଉତ୍ତର ପ୍ରଦେଶର ବରେଲି ଜିଲ୍ଲାରେ ଘଟିଯାଇଛି ଏକ ଅଭାବନୀୟ ଘଟଣା। ଗୁଗୁଲ୍ ମ୍ୟାପ୍କୁ ବିଶ୍ବାସ କରି ଚାଲିଯାଇଛି ୩ ଜଣଙ୍କ ଜୀବନ। ସେମାନେ ଗାଡ଼ିରେ ଯାଉଥିବା ବେଳେ ସେମାନଙ୍କ ଗୁଗୁଲ୍ ମ୍ୟାପ୍ ତାଙ୍କୁ ଏକ ନିର୍ମାଣାଧୀନ ପୋଲ ଉପରେ ରାସ୍ତା ଦେଖାଇଥିଲା।
ଉତ୍ତର ପ୍ରଦେଶର ବରେଲି ଜିଲ୍ଲାରେ ଘଟିଯାଇଛି ଏକ ଅଭାବନୀୟ ଘଟଣା। ଗୁଗୁଲ୍ ମ୍ୟାପ୍କୁ ବିଶ୍ବାସ କରି ଚାଲିଯାଇଛି ୩ ଜଣଙ୍କ ଜୀବନ। ସେମାନେ ଗାଡ଼ିରେ ଯାଉଥିବା ବେଳେ ସେମାନଙ୍କ ଗୁଗୁଲ୍ ମ୍ୟାପ୍ ତାଙ୍କୁ ଏକ ନିର୍ମାଣାଧୀନ ପୋଲ ଉପରେ ରାସ୍ତା ଦେଖାଇଥିଲା। ସେମାନେ ସେଦହି ପଟରେ ଗାଡ଼ି ନେଇ ଯାଉଥିବା ବେଳେ ଶେଷରେ ସେହି ଅଧା ଖଣ୍ଡିଆ ପୋଲ ଉପରୁ ତଳକୁ ଖସି ପଡ଼ିଥିଲେ। ତେବେ ଏହି ଦୁର୍ଘଟଣାରେ ୩ ଜଣଙ୍କର ଘଟଣାସ୍ଥଳରେ ହିଁ ମୃତ୍ୟୁ ଘଟିଛି ବୋଲି ପୁଲିସ୍ କହିଛି।
ଏହି ଘଟଣା ହେଉଛି ଶନିବାର ଦିନର। ପୀଡିତଙ୍କ ମଧ୍ୟରୁ ଦୁଇଜଣ ବିବେକ ଏବଂ ଅମିତ ଗୁରୁଗ୍ରାମରୁ ଯାତ୍ରା ଆରମ୍ଭ କରି ଏକ ବିବାହ ଉତ୍ସବରେ ଯୋଗଦେବା ପାଇଁ ବରେଲି ଅଭିମୁଖେ ଯାଉଥିଲେ। ସେମାନେ ରାସ୍ତା ଜାଣିନଥିବାରୁ ଗୁଗୁଲ୍ ମ୍ୟାପ୍ ଉପରେ ନିର୍ଭର କରୁଥିଲେ। ଯେଉଁଠାରେ ସେମାନଙ୍କର ଜିପିଏସ୍ ସେମାନଙ୍କୁ ଏକ ଖଣ୍ଡିଆ ଫ୍ଲାଏଓଭରକୁ ନେଇଗଲା।
କାରଟି ବ୍ରିଜ ଉପରେ ଯାତ୍ରା କରୁଥିବା ବେଳେ ୫୦ ଫୁଟ ଉଚ୍ଚରୁ ରାମଗଙ୍ଗା, ଏକ ଗଭୀର ନଦୀକୁ ଖସି ପଡ଼ିଥିଲା। ପରଦିନ ସକାଳେ ସ୍ଥାନୀୟ ଲୋକମାନେ କ୍ଷତିଗ୍ରସ୍ତ କାର ଏବଂ ମୃତ ତିନି ଜଣଙ୍କୁ ପାଇଥିଲେ। ସେମାନେ ପୁଲିସକୁ ସୂଚନା ଦେଇଥିଲେ। ପୁଲିସ୍ ଘଟଣାସ୍ଥଳରେ ପହଞ୍ଚି ଶବକୁ ବ୍ୟବଚ୍ଛେଦ ପାଇଁ ପଠାଇଥିଲା। ସେମାନେ ଏକ ୱାଗନର୍ରେ ଯାତ୍ରା କରୁଥିଲେ। ଏବେ ସୁଦ୍ଧା ୨ ଜଣଙ୍କ ପରିଚୟ ଜଣାପଡ଼ିଥିବା ବେଳେ ତୃତୀୟ ଜଣଙ୍କ ପରିଚୟ ଜାଣିବା ପାଇଁ ପୁଲିସ୍ ଚେଷ୍ଟା କରୁଛି।