ଭୁବନେଶ୍ବର : ରାଜଧାନୀରେ ବର୍ବରକାଣ୍ଡ । ଲୁଟ୍ କରିବାକୁ ଆସି ମହିଳାଙ୍କ ସହ ଗଣଦୁଷ୍କର୍ମ ଅଭିଯୋଗ । ଏନେଇ ଗତକାଲି ଚାଞ୍ଚଲ୍ଯ ଖେଳିବା ପରେ ୨ ଅଭିଯୁକ୍ତଙ୍କୁ ଅଟକ ରଖିଛି ମୈତ୍ରୀବିହାର ଥାନା ପୋଲିସ । ପୀଡ଼ିତା ଥାନାରେ ଅଭିଯୋଗ କରିବାପରେ ବିଭିନ୍ନ ସ୍ଥାନରେ ରେଡ୍ କରି ପୋଲିସ ଦୁଇ ଅଭିଯୁକ୍ତଙ୍କୁ ଅଟକ ରଖିଛି । ଗତ ରବିବାର ବିଳମ୍ବିତ ରାତିରେ ରାଜଧାନୀର ଛାତି ଉପରେ ଘଟିଥିଲା ଛାତିଥରା ଘଟଣା । ରାତି ପ୍ରାୟ ୨ଟା ବେଳେ ଦୁଇ ଜଣ ଲୁଟେରା ଲୁଟ୍ କରିବାକୁ ଆପାର୍ଟମେଣ୍ଟରେ ପଶିଥିଲେ । ଏକ ଘରର ବାଲକୋନି ଖୋଲାଥିବା ଦେଖି ସେହି ଘରେ ପଶିଥିଲେ । ସେହି ଘରେ ୨ ବର୍ଷର ଝିଅ ସହ ରହୁଥିଲେ ମହିଳା । କେହି ନଥିବାରୁ ସୁୟୋଗ ନେଇ ଶିଶୁକନ୍ଯାକୁ ଭୁଜାଲିରେ ହାଣିଦେବାର ଭୟ ଦେଖାଇ ମହିଳାଙ୍କୁ ଦୁଷ୍କର୍ମ କରିଥିଲେ ଅଭିଯୁକ୍ତ । ଏହାପରେ ଗହଣା ଲୁଟି ଫେରାର ହୋଇଯାଇଥିଲେ । ଏଭଳି ଭୟଙ୍କର ଘଟଣା ରାଜଧାନୀରେ ଆତଙ୍କ ଖେଳାଇଦେଇଥିବାବେଳେ କମିଶନରେଟ ପୋଲିସ ପାଇଁ ଚ୍ଯାଲେଞ୍ଜ ସୃଷ୍ଟି ହୋଇଛି । ଏନେଇ ଜାତୀୟ ମାନବାଧିକାର କମିଶନଙ୍କ ନିକଟରେ ମାମଲା ରୁଜୁ ହୋଇଛି । ମାନବାଧିକାର କର୍ମୀ ଜୟନ୍ତ ଦାସ ମାମଲା ରୁଜୁ କରିଛନ୍ତି । ପୋଲିସ ଅଭିଯୁକ୍ତଙ୍କୁ ଅଟକ ରଖି ଘଟଣାର ତଦନ୍ତ ଜାରି ରଖିଛି ।
ଜେଲରୁ ବାହାରିଲେ ରାମ ରହିମ, ବାଗପତ ଆଶ୍ରମରେ ୨୦ ଦିନ ବିତାଇବେ
ରୋହତକ : ଦୁଷ୍କର୍ମ ମାମଲାରେ ଦଣ୍ଡ ଭୋଗୁଥିବା ଡେରା ସଚ୍ଚା ସୌଦା ମୁଖ୍ୟ ଗୁରୁମିତ ରାମ ରହିମ ୨୦ ଦିନ ପାରୋଲ ମିଳିବା ପରେ ଜେଲରୁ ବାହାରିଛନ୍ତି। ସେ ବୁଧବାର ସକାଳେ ରୋହତକଙ୍କ ସୁନାରିଆ ଜେଲରୁ ବାହାରି ଉତ୍ତର ପ୍ରଦେଶର ବାଗପତସ୍ଥିତ ବର୍ଣ୍ଣୱା ଆଶ୍ରମକୁ ଯାଇଥିଲେ । ଗତ ଚାରି ବର୍ଷ ମଧ୍ୟରେ ରାମ ରହିମ ୧୫ ତମ ଥର ପାରୋଲରେ ଜେଲରୁ ବାହାରିଛନ୍ତି ।
ସୋମବାର ନିର୍ବାଚନ ଆୟୋଗ ଗୁରୁମିତ ରାମ ରହିମଙ୍କ ପାରୋଲ ଅନୁରୋଧକୁ ଅନୁମୋଦନ କରିଛନ୍ତି। ମୁଖ୍ୟ ନିର୍ବାଚନ ଅଧିକାରୀ ପଙ୍କଜ ଅଗ୍ରୱାଲ କହିଛନ୍ତି ଯେ ହରିୟାଣା ସରକାର ଡେରା ସଚ୍ଚା ସୌଦା ମୁଖ୍ୟ ଗୁରୁମିତ ରାମ ରହିମ ସିଂଙ୍କ ପାରୋଲକୁ ବିଚାର କରିପାରନ୍ତି। ଏଥିପାଇଁ ତାଙ୍କ ପାରୋଲ୍ ଆବେଦନରେ ଲେଖାଯାଇଥିବା ତଥ୍ୟ ସତ୍ୟ ହେବା ଉଚିତ୍ । ଆହୁରି ମଧ୍ୟ, ନିର୍ବାଚନ ପାଇଁ ମଡେଲ ଆଚରଣ ସଂହିତା ସମ୍ବନ୍ଧୀୟ ଅନ୍ୟାନ୍ୟ ସର୍ତ୍ତଗୁଡିକ ପୂରଣ ହେବା ଉଚିତ୍ ।
ନିର୍ବାଚନ ଆୟୋଗର ଅନୁମୋଦନ ପରେ ହରିୟାଣା ସରକାର ତୁରନ୍ତ ତାଙ୍କୁ ମୁକ୍ତ କରିବାକୁ ନିର୍ଦ୍ଦେଶ ଦେଇଛନ୍ତି । ଅକ୍ଟୋବରରେ ହେବାକୁ ଥିବା ହରିୟାଣା ବିଧାନସଭା ନିର୍ବାଚନ ପୂର୍ବରୁ ଡେରା ସଚ୍ଚା ସୌଦା ମୁଖ୍ୟଙ୍କ ମୁକ୍ତି ନିଷ୍ପତ୍ତି ନିଆଯାଇଥିଲା । ହରିୟାଣା ଏବଂ ପଞ୍ଜାବରେ ତାଙ୍କର ବହୁତ ପ୍ରଭାବ ଥିବା ପରି ବିବେଚନା କରାଯାଏ । ଗୁରୁମିତ ରାମ ରହିମ ୨୦ ଦିନ ପାଇଁ ପାରୋଲ ମାଗିଥିଲେ । ପାରୋଲ ଅବଧି ସମୟରେ ଉତ୍ତରପ୍ରଦେଶର ବାଗପତରେ ରହିବାକୁ ସେ ଦାବି କରିଥିଲେ। ପାରୋଲ ଅବଧିରେ ଗୁରୁମିତ ରାମ ରହିମଙ୍କୁ ହରିୟାଣା ପ୍ରବେଶ କରିବାକୁ ଅନୁମତି ନାହିଁ। ସେ ବ୍ୟକ୍ତିଗତ ଭାବରେ କିମ୍ବା ସୋସିଆଲ ମିଡିଆ ମାଧ୍ୟମରେ କୌଣସି ନିର୍ବାଚନ ସମ୍ବନ୍ଧୀୟ କାର୍ଯ୍ୟକଳାପରେ ଅଂଶଗ୍ରହଣ କରିପାରିବେ ନାହିଁ ।ଏହା ବ୍ୟତୀତ ତାଙ୍କ ଉପରେ ଅନେକ ପ୍ରତିବନ୍ଧକ ଲଗାଯାଇଛି । ରାମ ରହୀମ ତାଙ୍କର ଦୁଇ ଶିଷ୍ୟାଙ୍କୁ ଦୁଷ୍କର୍ମ କରିଥିବା ଅଭିଯୋଗରେ ୨୦ବର୍ଷ ଜେଲ ଦଣ୍ଡ ଭୋଗୁଛନ୍ତି ।
ଆଜି ଗାନ୍ଧୀ, ଶାସ୍ତ୍ରୀ ଜୟନ୍ତୀ : ଦୁଇ ମହାନାୟକଙ୍କୁ ମନେ ପକାଉଛନ୍ତି ଦେଶବାସୀ
ଭୁବନେଶ୍ବର : ଆଜି ଜାତିର ପିତା ମହାତ୍ମାଗାନ୍ଧୀଙ୍କ ଜନ୍ମ ଜୟନ୍ତୀ । ଅକ୍ଟୋବର ୨ ତାରିଖ ୧୮୬୯ ମସିହାରେ ଗୁଜୁରାଟର ପୋରବନ୍ଦରରେ ଜନ୍ମଗ୍ରହଣ କରିଥିଲେ ବାପୁ । ଦେଶକୁ ଇଂରେଜ ଶାସନରୁ ମୁକ୍ତ କରିଥିବା ମହାନ ଯୁଗପୁରୁଷ ହେଉଛନ୍ତି ମହାତ୍ମା ଗାନ୍ଧୀ । ଅହିଂସା ଉପାୟରେ ଦେଶରୁ ଇଂରେଜ ସରକାରଙ୍କୁ ତଡ଼ି ସ୍ବାଧୀନତା ଆଣିଥିବା ମହାନ ପୁରୁଷ ହେଉଛନ୍ତି ଜାତିର ଜନକ ମହାତ୍ମା ଗାନ୍ଧୀ । ତାଙ୍କ ନେତୃତ୍ୱରେ ହିଁ ଦେଶ ଇଂରେଜମାନଙ୍କ କବଳରୁ ମୁକ୍ତ ହୋଇପାରିଥିଲା । ସେହିପରି ଦେଶର ପୂର୍ବତନ ପ୍ରଧାନମନ୍ତ୍ରୀ ଲାଲ ବାହାଦୂର ଶାସ୍ତ୍ରୀ ଅକ୍ଟୋବର ୨ତାରିଖ ୧୯୦୪ ମସିହାରେ ଜନ୍ମଗ୍ରହଣ କରିଥିଲେ । ଶାସ୍ତ୍ରୀଜୀ ଦେଶର ପ୍ରଧାନମନ୍ତ୍ରୀ ଥିବା ସମୟରେ ପାକିସ୍ତାନ ସହ ଯୁଦ୍ଧଲଢ଼ି ନିଜର ପରାକ୍ରମ ଦେଖାଇପାରିଥିଲା ଭାରତ । ଏହି ଦୁଇ ମହାପୁରୁଷଙ୍କୁ ଜନ୍ମ ଜୟନ୍ତୀରେ ମନେପକାଇ ଶ୍ରଦ୍ଧାଞ୍ଜଳି ଜଣାଉଛି ଭାରତ ।
ମଧ୍ଯପ୍ରାଚ୍ଯରେ ବିସ୍ଫୋରକ ସ୍ଥିତି, ଇସ୍ରାଏଲ ଉପରେ ଇରାନର ବଡ଼ ଆକ୍ରମଣ
ନନ୍ଦିଘୋଷ ବ୍ୟୁରୋ : ମଧ୍ଯପ୍ରାଚ୍ଯରେ ବିସ୍ଫୋରକ ସ୍ଥିତି । ଇସ୍ରାଏଲ ଉପରେ ଇରାନର ବଡ଼ ଆକ୍ରମଣ । ଆରମ୍ଭ ହୋଇଛି ଇସ୍ରାଏଲ ଓ ଇରାନ ସିଧାସଳଖ ଯୁଦ୍ଧ । ଇସ୍ରାଏଲ ଉପରେ ଘନଘନ ମିସାଇଲ ଆକ୍ରମଣ କରିଛି ଇରାନ । ଗତକାଲି ରାତିରେ ୧୦ ମିନିଟ ମଧ୍ଯରେ ପ୍ରାୟ ୪୦୦ ବାଲିଷ୍ଟିକ ମିସାଇଲ ନିକ୍ଷେପ କରିଛି ଇରାନ । ଇସ୍ରାଏଲର ବାୟୁ ପ୍ରତିରକ୍ଷା ବ୍ୟବସ୍ଥା ଅଧିକାଂଶ କ୍ଷେପଣାସ୍ତ୍ରକୁ ଅଟକାଇବାରେ ସକ୍ଷମ ହୋଇଥିଲେ ମଧ୍ୟ ଭୟାନକ ସ୍ଥିତି ଉପୁଜିଛି। ସମସ୍ତ ନାଗରିକଙ୍କୁ ସୁରକ୍ଷିତ ଆଶ୍ରୟସ୍ଥଳୀକୁ ଯିବାକୁ ନିର୍ଦ୍ଦେଶ ଦିଆଯାଇଛି । ଇରାନ ପାଇଁ ଏହା ଭୟଙ୍କର ପରିଣାମ ଆଣିବ ବୋଲି ଇସ୍ରାଏଲ ଚେତାବନୀ ଦେଇଛି । ଆକ୍ରମଣକୁ ନେଇ ତୀବ୍ର ପ୍ରତିକ୍ରିୟା ପ୍ରକାଶ କରିଛି ଆମେରିକା । ଆମେରିକା ରାଷ୍ଟ୍ରପତି ଜୋ ବାଇଡେନ ଓ ଉପରାଷ୍ଟ୍ରପତି କମଳା ହାରିସ ଜାତୀୟ ସୁରକ୍ଷା ପରିଷଦର ଜରୁରୀ ବୈଠକ ଡାକି ଆଲୋଚନା କରିଛନ୍ତି । ଇରାନର ଆକ୍ରମଣକୁ ରୋକିବା ପାଇଁ ମଧ୍ୟପ୍ରାଚ୍ୟରେ ଆମେରିକା ତତ୍କାଳ ପଦକ୍ଷେପ ନେବ । ଇସ୍ରାଏଲ ଆଡ଼କୁ ଆସୁଥିବା ସମସ୍ତ କ୍ଷେପଣାସ୍ତ୍ରକୁ ଧ୍ବଂସ କରିବାକୁ ସେନାକୁ ନିର୍ଦ୍ଦେଶ ଦେଇଛି ଆମେରିକା । ଆକ୍ରମଣ ପାଇଁ ଇରାନକୁ ପସ୍ତାଇବାକୁ ପଡ଼ିବ ବୋଲି ଆମେରିକା ଚେତାବନୀ ଦେଇଛି । ଅନ୍ଯପଟେ ତୁର୍କୀ ସମେତ ଅନ୍ୟ କେତେକ ମୁସଲିମ ରାଷ୍ଟ୍ର ଲେବାନନରୁ ତୁରନ୍ତ ସୈନ୍ୟ ପ୍ରତ୍ୟାହାର ପାଇଁ ଇସ୍ରାଏଲକୁ ଧମକ ଦେଇଥିବା ବେଳେ ଇସ୍ରାଏଲ ଏଥିପ୍ରତି କର୍ଣ୍ଣପାତ କରିନାହିଁ । ଏପଟେ ଯୁଦ୍ଧ ବିରତି ପାଇଁ ମିଳିତ ଜାତିସଂଘ ସଚିବ ଅପିଲ କରିଛନ୍ତି । ଏହାକୁ ରୁତନ୍ତ ବନ୍ଦ କରିବାକୁ ସେ ଆହ୍ବାନ ଦେଇଛନ୍ତି । ଅନ୍ଯପଟେ ତେଲ ଆଭିବରେ ବଡ଼ଧରଣର ଆତଙ୍କବାଦୀ ଆକ୍ରମଣ ହୋଇଛି । ରାଜଧାନୀର ବିଭିନ୍ନ ଅଞ୍ଚଳରେ ବନ୍ଧୁକଧାରୀମାନେ ଆଖିବୁଜା ଗୁଳିଚାଳନା କରିଛନ୍ତି । ଏଥିରେ ଅନେକ ମୃତାହତ ହୋଇଛନ୍ତି । ଇସ୍ରାଏଲରେ ଥିବା ଭାରତୀୟଙ୍କ ପାଇଁ ଆଡଭାଇଜରୀ ଜାରି କରିଛି ଭାରତୀୟ ଦୂତାବାସ । ସୁରକ୍ଷା ନିୟମ ପାଳନ କରି ସେଫ୍ଟି ସେଲଟରରେ ରହିବାକୁ ସମସ୍ତଙ୍କୁ ପରାମର୍ଶ ଦିଆଯାଇଛି ।
୪ ଦିନ ପରେ ସ୍ବାଭାବିକ ହେଲା ଇଣ୍ଟରନେଟ ସେବା
ଭଦ୍ରକ : ଭଦ୍ରକକୁ ଫେରୁଛି ଶାନ୍ତି । ୪ ଦିନ ପରେ ସ୍ବାଭାବିକ ହେଲା ଇଣ୍ଟରନେଟ ସେବା । ଗତକାଲି ମଧ୍ଯରାତ୍ରୀରୁ ଇଣ୍ଟରନେଟ ସେବାକୁ ସ୍ବାଭାବିକ କରାଯାଇଛି । ସୋସିଆଲ ମିଡିଆରେ ଆପତ୍ତିଜନକ ମନ୍ତବ୍ଯକୁ ନେଇ ଅଶାନ୍ତ ପରିବେଶ ସୃଷ୍ଟି ହୋଇଥିଲା । ଭଦ୍ରକ ଚନ୍ଦନବଜାର, ସନ୍ଥିଆ, ପୁରୁଣାବଜାର ସମେତ ଧାମନଗର ଓ ଦୋବଲରେ ୨ ଗୋଷ୍ଠୀଙ୍କ ମଧ୍ଯରେ ବିବାଦ ଯୋଗୁ ହିଂସା ଦେଖାଦେଇଥିଲା । ଏବେ ବି କିଛି ସ୍ଥାନରେ ଚାପା ଉତ୍ତେଜନା ଲାଗି ରହିଥିବାରୁ ୨ଟି ରାପିଡ ଆକ୍ସନ ଫୋର୍ସ ମୁତୟନ ହୋଇଛନ୍ତି । ଏହାସହିତ ଘନଘନ ଫ୍ଲାଗମାର୍ଚ୍ଚ କରାଯାଉଛି । ଭଦ୍ରକର ସନ୍ଥିଆ, ଚନ୍ଦନବଜାର, ପୁରୁଣାବଜାର ଓ ଧାମନଗର, ଦୋବଲରେ ୧୬୩ ଧାରା ବଳବତ୍ତର ରହିଛି । ସୋମବାରଠୁ ଧାମନଗର ଓ ଦୋବଲରେ ୧୬୩ ଧାରା ସାମାନ୍ଯ କୋହଳ କରାଯାଇଛି । ସକାଳ ୬ଟାରୁ ରାତି ୮ଟା ଯାଏଁ ଦୋକାନ ବଜାର ଖୋଲିବାକୁ ଅନୁମତି ମିଳିଥିଲେ ବି ୨ରୁ ଅଧିକ ଲୋକ ଭିଡ ନକରିବାକୁ ନିର୍ଦ୍ଦେଶ ଦିଆଯାଇଛି । କୌଣସି ସଭା କିମ୍ବା ରାଲି ଉପରେ କଟକଣା ଲାଗିଛି । ବର୍ତ୍ତମାନ ସୁଦ୍ଧା ୩୩ ଜଣଙ୍କୁ ଗିରଫ କରାଯାଇଛି । ପୋଲସ ଡିଜି ୱାଇବି ଖୁରାନିଆ ଧାମନଗର ଓ ଭଦ୍ରକ ସ୍ଥିତି ସମୀକ୍ଷା କରିଛନ୍ତି । ସ୍ବାଭାବିକ ସ୍ଥିତି ଫେରିବାକୁ ଆଉ ଦିନେ ଦୁଇଦିନ ସମୟ ଲାଗିବ । ତେବେ ଗୁଜବକୁ ବିଶ୍ବାସ ନକରିବାକୁ ପରାମର୍ଶ ଦେଇଛନ୍ତି ଡିଜିପି ।
ଆଜି ପବିତ୍ର ମହାଳୟା, ପିତୃପୁରୁଷଙ୍କୁ ଶ୍ରାଦ୍ଧ ଦେବାର ଶେଷ ଦିନ
ଭୁବନେଶ୍ବର : ଆଜି ପବିତ୍ର ମହାଳୟା । ପିତୃପକ୍ଷର ଅନ୍ତିମ ଦିବସ । ପିତୃପୁରୁଷଙ୍କ ମୋକ୍ଷ ପ୍ରାପ୍ତି ପାଇଁ ପିଣ୍ଡଦାନ କରୁଛନ୍ତି ଶ୍ରଦ୍ଧାଳୁ । ଏଥିପାଇଁ ପୁରୀ ଓ ଭୁବନେଶ୍ବର ବିନ୍ଦୁସାଗର କୂଳରେ ଭିଡ଼ ଜମିଛି । ପିତୃପୁରୁଷଙ୍କ ଉଦ୍ଦେଶ୍ଯରେ ପିଣ୍ଡ ଦାନ କରି ପୂଜାପାଠ କରାଯାଉଛି । ଆଶ୍ୱିନ କୃଷ୍ଣ ପ୍ରତିପଦାଠାରୁ ମହାଳୟା ଅମାବାସ୍ୟା ପର୍ଯ୍ୟନ୍ତ ଅନୁଷ୍ଠିତ ହୋଇଥାଏ ଶ୍ରାଦ୍ଧ ଓ ତିଳତର୍ପଣ । ଏହିଦିନ ନିଜ ପିତୃପୁରୁଷଙ୍କ ସହ ନିଜ ମାମୁଘର ଉଦ୍ଦେଶ୍ୟରେ ମଧ୍ୟ ଶ୍ରାଦ୍ଧ ପ୍ରଦାନ ଓ ପିଣ୍ଡଦାନ କରାଯାଇଥାଏ । ବିଶେଷ କରି ପିତା, ପିତାମହ, ପ୍ରପିତାମହ, ମାତା, ପିତାମୟୀ, ପ୍ରପିତାମୟୀ, ମାତାମହ, ପ୍ରମାତାମହ, ଆଦିଙ୍କ ଉଦ୍ଦେଶ୍ୟରେ ତର୍ପଣ ଓ ଶ୍ରାଦ୍ଧ ଆଦି କର୍ମ କରାଯାଇଥାଏ । ପୁରୀରେ ପିଣ୍ଡ ଦାନ କରିବା ସହ ମହାପ୍ରଭୁଙ୍କୁ ଦର୍ଶନ କରି ସାନିଧ୍ୟ ଲାଭ କରୁଛନ୍ତି ଭକ୍ତ । ଭୁବନେଶ୍ବର ବିନ୍ଦୁସାଗର କୂଳରେ ମଧ୍ୟ ମହାଳୟା ପାଇଁ ପ୍ରବଳ ଭିଡ଼ ଦେଖିବାକୁ ମିଳିଛି । ପବିତ୍ର ପୁଷ୍କରିଣୀ କୂଳରେ ଶ୍ରଦ୍ଧାଳୁମାନେ ନିଜର ପିତୃଲୋକଙ୍କ ଉଦ୍ଦେଶ୍ୟରେ ପିଣ୍ଡଦାନ କରୁଛନ୍ତି । କୁହାଯାଏ ଏହି ପିତୃପକ୍ଷରେ ପିତୃଲୋକ ମାନବ ଲୋକଙ୍କୁ ଆସିଥାନ୍ତି । ତେଣୁ ତାଙ୍କ ମୋକ୍ଷପ୍ରାପ୍ତି ପାଇଁ ପିଣ୍ଡଦାନ କରି ସନ୍ତୁଷ୍ଟ କରାଯାଇଥାଏ ।
ଗରମ ଗୁଳୁଗୁଳିରେ ଅସ୍ତବ୍ୟସ୍ତ ଉପକୂଳ ଓ ଉତ୍ତର ଓଡ଼ିଶା
ଭୁବନେଶ୍ବର : ପାର୍ବଣରେ ଟାଇଁ ଟାଇଁ ଖରା । ଗରମ ଗୁଳୁଗୁଳିରେ ଅସ୍ତବ୍ୟସ୍ତ ଉପକୂଳ ଓ ଉତ୍ତର ଓଡ଼ିଶା । ଆସନ୍ତା ସପ୍ତାହେ ପର୍ଯ୍ୟନ୍ତ ଜାରି ରହିବ ଏଭଳି ପାଗ । ତାପମାତ୍ରା ୩୬ ଡିଗ୍ରୀ ସହ ୭୦ରୁ ୯୦ ପ୍ରତିଶତ ରହିବ ଆର୍ଦ୍ରତା । ଗୁରୁଚାପ ବଳୟ ପାଇଁ ଅଧିକାଂଶ ଜିଲ୍ଲାରେ ଶୁଷ୍କ ପାଗ ରହିବ ବୋଲି ସୂଚନା ଦେଇଛି ଆଞ୍ଚଳିକ ପାଣିପାଗ କେନ୍ଦ୍ର ପୁରୀ, ଖୋର୍ଦ୍ଧା, କଟକ, ଜଗତସିଂହପୁର, ଯାଜପୁର, ନୟାଗଡ, ଅନୁଗୁଳ, ଢେଙ୍କାନାଳ ଭଳି ସହରରେ ତାପମାତ୍ରା ୩୫ ରୁ ୩୭ ଡିଗ୍ରୀ ରହୁଛି । ଫଳରେ ଏକ ଅସ୍ବାଭାବିକ ପାଗ ଅନୁଭବ କରୁଛନ୍ତି ଲୋକେ । ୫ ଦିନ ମଧ୍ୟରେ ଆହୁରି ୨ରୁ ୩ ଡିଗ୍ରୀ ତାପମାତ୍ରା ବୃଦ୍ଧି ପାଇବ ବୋଲି ଆକଳନ କରାଯାଇଛି । ପୂର୍ବାହ୍ନରେ ଟାଣ ଖରା ହେଲେ ବି ଅପରାହ୍ନରେ କିଛି ଜିଲ୍ଲାରେ ବଜ୍ରପାତ ଜନିତ ବର୍ଷା ହେଉଛି । ୫ ତାରିଖରୁ ବଢିପାରେ ବର୍ଷାର ପରିମାଣ ।
ଆଜିଠୁ ବିଜେଡିର ଜନସମ୍ପର୍କ ପଦଯାତ୍ରା, ପଦଯାତ୍ରାର ଶୁଭାରମ୍ଭ କରିବେ ନବୀନ
ଭୁବନେଶ୍ବର : ଆଜିଠୁ ବିଜେଡିର ଜନସମ୍ପର୍କ ପଦଯାତ୍ରା । ଏକାମ୍ର ନଗରୀରୁ ପଦଯାତ୍ରାର ଶୁଭାରମ୍ଭ କରିବେ ବିଜୁ ଜନତା ଦଳ ସଭାପତି ନବୀନ ପଟ୍ଟନାୟକ । ୫୭ ନମ୍ବର ଓ୍ବାର୍ଡ ବିଜୁ ଆଦର୍ଶ କଲୋନୀରେ ନିଜେ ଚାଲି ଚାଲି ଲୋକଙ୍କ ସହ ଆଲୋଚନା କରିବେ ନବୀନ । ଏହାପରେ ନେତାଜୀ ପଡ଼ିଆରେ ଉପସ୍ଥିତ ଜନତାଙ୍କୁ ଉଦବୋଧନ ଦେବେ । ଏଥର ଦୁଇଟି ପର୍ଯ୍ଯାୟରେ ୧୫ ଦିନ ଧରି ବିଜେଡି ପଦଯାତ୍ରା ହେଉଛି । ଆଜିଠୁ ୬ ତାରିଖ ପର୍ଯ୍ଯନ୍ତ ପ୍ରଥମ ଓ ଅକ୍ଟୋବର ୨୧ରୁ ୩୦ ତାରିଖ ପର୍ଯ୍ୟନ୍ତ ଦ୍ବିତୀୟ ପର୍ଯ୍ଯାୟ ପଦଯାତ୍ରା ହେବ । ସବୁ ନିର୍ବାଚନ ମଣ୍ଡଳିର ବ୍ଲକ ଓ ପୌରାଞ୍ଚଳରେ ପଦଯାତ୍ରା କରାଯିବ । ଓଡ଼ିଶାର ସ୍ବାର୍ଥ ପାଇଁ ପଦଯାତ୍ରାରେ ରଣହୁଙ୍କାର ଦେବ ଦଳ। ରାଜ୍ଯରେ ବିପର୍ଯ୍ୟସ୍ତ ଆଇନ ଶୃଙ୍ଖଳା, ଦରଦାମ ବୃଦ୍ଧି, ନାରୀ ନିର୍ଯାତନା ସମେତ ସୁଭଦ୍ରା ଓ ମାଗଣା ବିଜୁଳି ଭଳି ପ୍ରସଙ୍ଗରେ ବିଜେପି ସରକାରର ମିଛ ପ୍ରତିଶୃତି ଲୋକଙ୍କୁ ସଚେତନ କରାଯିବ । ପ୍ରଥମ ଥର ପାଇଁ ବିରୋଧୀ ଦଳରେ ଥାଇ ପଦଯାତ୍ରା କରୁଛି ବିଜେଡି । ଏଣୁ ନବୀନ ଆଜି କଣ ଅଭିଭାଷଣ ରଖୁଛନ୍ତି ତାହା ଉପରେ ସମସ୍ତଙ୍କର ନଜର ରହିଛି ।
ଅଙ୍ଗନବାଡି କର୍ମୀ ଓ ସହାୟିକାଙ୍କୁ ଗାଁ ଦାଣ୍ଡରେ ନିସ୍ତୁକ ମାଡ଼
ବୌଦ୍ଧ: ଶାଢୀ ଟାଣି ଅଙ୍ଗନବାଡି କର୍ମୀ ଓ ସହାୟିକାଙ୍କୁ ଗାଁ ଦାଣ୍ଡରେ ନିସ୍ତୁକ ମାଡ଼ ଅଭିଯୋଗ । ଏଭଳି ଅଭାବନୀୟ ଘଟଣା ଘଟିଛି ବୌଦ୍ଧ ଆଦର୍ଶ ଥାନା ଅନ୍ତର୍ଗତ ବିଜାପଦର ଗାଁରେ । ଗାଁ ଦାଣ୍ଡରେ ଅଙ୍ଗନବାଡ଼ି କର୍ମୀ ଓ ସହାୟିକାଙ୍କ ଶାଢୀ ଟାଣି ପିଟିଛନ୍ତି ଗୋଟିଏ ପରିବାରର ତିନି ଜଣ ସଦସ୍ଯ ।
ଅଭିଯୋଗ ଅନୁସାରେ, ଧୀରେନ ସେଠୀଙ୍କ ଝିଅ ଅଙ୍ଗନବାଡିକୁ ଯାଇଥିଲା । ପାଠପଢା ସରିବା ପରେ ସହାୟିକା ଝିଅକୁ ଛାଡିବାକୁ ଧୀରେନଙ୍କ ଘରକୁ ଯାଇଥିଲେ । କାହିଁକି ଛାଡ଼ିବାରେ ବିଳମ୍ବ ହେଲା କହି ସହାୟିକାଙ୍କ ସହ ଯୁକ୍ତି କରିଥିଲେ ଧୀରେନ । ଅଙ୍ଗନବାଡି କର୍ମୀ ଘଟଣାସ୍ଥଳରେ ପହଞ୍ଚି ବୁଝାଶୁଝା କରିଥିଲେ ବି ଧୀରେନ, ତାଙ୍କ ସ୍ତ୍ରୀ ସୁନୀତା ଏବଂ ମାଆ ଜାହ୍ନବୀ ଉଭୟ ଅଙ୍ଗନବାଡି କର୍ମୀ ଓ ସହାୟିକାଙ୍କୁ ଗାଳିଗୁଲଜ କରିବା ସହ ମାଡ଼ ମାରିଥିଲେ ।
ଏନେଇ ଅଙ୍ଗନବାଡ଼ି କର୍ମୀ ଓ ସହାୟିକା ବଘିଆପଡ଼ା ଫାଣ୍ଡିର ଦ୍ବାରସ୍ଥ ହୋଇଥିଲେ ବି ପୋଲିସ ଫେରାଇ ଦେଇଥିଲା । ଫଳରେ ଉଭୟ ବୌଦ୍ଧ ଆଦର୍ଶ ଥାନାରେ ଅଭିଯୋଗ କରିଛନ୍ତି । ପୋଲିସ ଘଟଣାର ତଦନ୍ତ ଜାରି ରଖିଛି ।
ରାଜ୍ୟର ସବୁ ପରିବାରଙ୍କୁ ମିଳିବନି ଆୟୁଷ୍ମାନ ଭାରତ ସ୍ବାସ୍ଥ୍ୟବୀମା ଯୋଜନା
ଭୁବନେଶ୍ବର: ଶୀଘ୍ର ରାଜ୍ୟରେ ଲାଗୁ ହେବ ଆୟୁଷ୍ମାନ ଭାରତ ସ୍ବାସ୍ଥ୍ୟ ବୀମା ଯୋଜନା । ହେଲେ ସବୁ ପରିବାର ପାଇଁ ନୁହେଁ । ଏହି ଯୋଜନାରେ ସାମିଲ ହେବେ ମାତ୍ର ୬୭ ଲକ୍ଷ ପରିବାର । ବାକି ୩୩ ଲକ୍ଷ ପରିବାର ବିଏସକେଓ୍ବାଇରୁ ପରିବର୍ତ୍ତିତ ଯୋଜନା ଗୋପବନ୍ଧ ଜନ ଆରୋଗ୍ୟ ସ୍ବାସ୍ଥ୍ୟ ଯୋଜନାର ସୁବିଧା ପାଇବେ । ଏ ନେଇ ସୂଚନା ଦେଇଛନ୍ତି ସ୍ବାସ୍ଥ୍ୟମନ୍ତ୍ରୀ । ୧ କୋଟି ପରିବାରକୁ ସ୍ବାସ୍ଥ୍ୟ ସହାୟତା ସାମିଲ ପାଇଁ ସରକାର ଲକ୍ଷ୍ୟ ରଖିଛନ୍ତି । ସେପଟେ ଏଣିକି ଗରିବ ଲୋକଙ୍କ ଚିକିତ୍ସା ପାଇଁ ଜାରି ହେବ ୟୁନିକ୍ ଆଇଡି କାର୍ଡ । ଯେଉଁଥିରେ ରୋଗୀର ସମସ୍ତ ଚିକିତ୍ସା ଡାଟାବେସ୍ ଉପଲବ୍ଧ ହେବ ।
ନବୀନ ସରକାର ସମୟରେ ଥିଲା ବିଏସକେଓ୍ବାଇ । ସ୍ବାସ୍ଥ୍ୟ ସହାୟତା ପାଉଥିଲେ ପ୍ରାୟ ୯୫ ଲକ୍ଷ ପରିବାର । ଏଣିକି ରାଜ୍ୟରେ ଲାଗୁ ହେବ ଆୟୁଷ୍ମାନ ଭାରତ ଯୋଜନା । ହେଲେ ଏହି ସ୍ବାସ୍ଥ୍ୟ ବୀମା ଯୋଜନାରେ ସାମିଲ ହେବେ ମାତ୍ର ୬୭ ଲକ୍ଷ ପରିବାର । ବାକି ୩୩ ଲକ୍ଷ ପରିବାର ସାମିଲ ହେବେ ବିଏସକେଓ୍ବାଇରୁ ପରିବର୍ତ୍ତିତ ଯୋଜନା ଗୋପବନ୍ଧୁ ଜନ ଆରୋଗ୍ୟ ସ୍ବାସ୍ଥ୍ୟ ଯୋଜନାରେ । ଆଜି ଏ ନେଇ ସୂଚନା ଦେଇଛନ୍ତି ସ୍ବାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରୀ ମୁକେଶ ମହାଲିଙ୍ଗ ।
୨୦୧୮ରେ କେନ୍ଦ୍ର ସରକାର ଆୟୁଷ୍ମାନ ଭାରତ ଯୋଜନା ନେଇ ଘୋଷଣା କରିଥିଲେ । ହେଲେ ଏନଏଫଏସଏ ହିତାଧିକାରୀ ଅନ୍ତର୍ଗତ ମାତ୍ର ୬୭ ଲକ୍ଷ ପରିବାର ସାମିଲ ହେବେ ବୋଲି କହିଲେ । ତତ୍କାଳୀନ ସରକାର ଆୟୁଷ୍ମାନକୁ ଗ୍ରହଣ ନକରି ନିଜସ୍ବ ସମ୍ବଳରେ ଲାଗୁ କରିଥିଲେ ବିଜୁ ସ୍ବାସ୍ଥ୍ୟ କଲ୍ୟାଣ ସୁନିଶ୍ଚିତ ସହାୟତା ଯୋଜନା । ମହିଳାଙ୍କ ପାଇଁ ୧୦ ଲକ୍ଷ ଓ ପୁରୁଷଙ୍କ ପାଇଁ ଚିକିତ୍ସା ବାବଦରେ ୫ ଲକ୍ଷ ଟଙ୍କାର ସହାୟତା ମିଳିଲା । ଏବେ ଆୟୁଷ୍ମାନ ଭାରତ ଯୋଜନା ଲାଗୁ ହେଲେ ମାତ୍ର ୬୭ ଲକ୍ଷ ପରିବାର ମାତ୍ର ୫ ଲକ୍ଷ ଟଙ୍କା ଲେଖାଏଁ ସ୍ବାସ୍ଥ୍ୟ ବୀମାର ସୁବିଧା ପାଇବେ । ସେହି ପରିବାରର ମହିଳା ଆଉ ୫ ଲକ୍ଷ ଟଙ୍କାର ଅତିରିକ୍ତ ଆର୍ଥିକ ସହାୟତାରୁ ବଞ୍ଚିତ ହେବେ । ଏହା ରାଜ୍ୟବାସୀଙ୍କୁ ଡବଲ ଇଞ୍ଜିନ ସରକାରର ଆଉ ଏକ ଧୋକା ବୋଲି କହିଛନ୍ତି ପୂର୍ବତନ ସ୍ବାସ୍ଥ୍ୟମନ୍ତ୍ରୀ ତଥା ବିରୋଧୀ ଦଳ ଉପନେତା ପ୍ରସନ୍ନ ଆଚାର୍ଯ୍ୟ ।
ନ୍ୟାସନାଲ ଡିଜିଟାଲ ମିଶନ ଯୋଜନାରେ ଗରିବ ଲୋକଙ୍କ ଚିକିତ୍ସା ପାଇଁ ରାଜ୍ୟ ସରକାର ଜାରି କରିବେ ସ୍ବାସ୍ଥ୍ୟ ୟୁନିକ୍ ଆଇଡି କାର୍ଡ । ଯେଉଁଥିରେ ରୋଗୀ କେଉଁ ଡାକ୍ତରଖାନାକୁ କେତେଥର ଆସିଛି ଓ କି ଔଷଧ ତା ପାଇଁ ଡାକ୍ତର ଲେଖିଛନ୍ତି ସେ ସମ୍ବନ୍ଧୀୟ ସମସ୍ତ ତଥ୍ୟ ଡିଜିଟାଲି ଏନକୋଡ ରହିବ । ଫଳରେ ରୋଗୀଟି ଅଧିକ ଚିକିତ୍ସା ପାଇଁ ଭାରତର ଯେ କୌଣସି ଅଞ୍ଚଳର ଡାକ୍ତରଖାନାକୁ ଗଲେ ୟୁନିକ କାର୍ଡ ସ୍ବାଇପ କଲେ ତା’ର ଚିକିତ୍ସା ସମ୍ପର୍କିତ ସମସ୍ତ ତଥ୍ୟ ମିଳିପାରିବ । ଏହି କାର୍ଡକୁ ଭାରତର ୨୭ ହଜାର ଡାକ୍ତରଖାନାରେ ଅନୁବନ୍ଧିତ କରାଯିବ ।
ଗରିବଙ୍କୁ ବିଏସକେଓ୍ବାଇ ଯୋଜନାରେ ଚିକିତ୍ସା ସୁବିଧା ଯୋଗାଇବା ପାଇଁ ପୂର୍ବ ନବୀନ ସରକାର ରାଜ୍ୟ ଭିତରେ ଓ ବାହାରେ ୯୫୦ ଡାକ୍ତରଖାନା ସହିତ ଅନୁବନ୍ଧିତ କରିଥିଲେ । ଯାହାଦ୍ବାରା ରାଜ୍ୟ ବାହାରେ ମଧ୍ୟ ଗରିବ ଗୁରୁବା ସମ୍ପୂର୍ଣ୍ଣ ମାଗଣାରେ ଉନ୍ନତ ସ୍ବାସ୍ଥ୍ୟସେବା ପାଉଥିଲେ ।