ନନ୍ଦିଘୋଷ ବ୍ୟୁରୋ: ନବରଂଗପୁର ଜିଲ୍ଲା ତେନ୍ତୁଳିଖୁଣ୍ଟି ବ୍ଲକ କଣ୍ଟାଗାଁ ସଦର ପଂଚାୟତ ସରକାରୀ ଉଚ୍ଚବିଦ୍ୟାଳୟ ନିକଟସ୍ଥ ଏକ ଟାୱାର ପାଚେରି ପାର୍ଶ୍ୱରୁ ୧୦ ବର୍ଷୀୟା ନାବାଳିକାର ମୃତଦେହ ଉଦ୍ଧାର। ନାବାଳିକା ଜଣଙ୍କ ଗତକାଲି ଦିନ ପ୍ରାୟ ଗୋଟାଏ ସମୟରେ ଶୌଚ ପାଇଁ ଯାଉଛି କହି ଘରୁ ବାହାରିଥିଲେ । ବହୁ ସମୟ ଧରି ଝିଅ ଘରକୁ ଫେରିନଥିବାରୁ ଘର ଲୋକ ଚିନ୍ତାରେ ପଡ଼ିଥିଲେ । ପରିବାର ଲୋକେ ବିଭିନ୍ନ ସ୍ଥାନରେ ଖୋଜାଖୋଜି କରିଥିଲେ ବି ଝିଅର ସନ୍ଧାନ ପାଇ ନଥିଲେ। ପରେ ରାତିରେ ଗ୍ରାମର ଟାୱାର ପାଚେରି ପାର୍ଶ୍ୱରୁ ଝିଅର ମୃତ ଶରୀର ପଡିଥିବା ଦେଖିବାକୁ ପାଇଥିଲେ । ପାରିପାର୍ଶ୍ଵିକ ସ୍ଥିତିରୁ ଏହା ଦୁଷ୍କର୍ମ ପରେ ହତ୍ୟା କରାଯାଇଥିବା ସନ୍ଦେହ କରାଯାଉଛି । ତେନ୍ତୁଳିଖୁଣ୍ଟି ଥାନା ପୋଲିସ ଘଟଣାସ୍ଥଳରେ ପହଞ୍ଚି ପ୍ରାଥମିକ ତଦନ୍ତ ଆରମ୍ଭ କରିଛି । ସାଇଣ୍ଟିଫିକ ଟିମ ଏବଂ ଡ଼ଗ ସ୍କ୍ୱାଡକୁ ନେଇ ଅଧିକ ତଦନ୍ତ ଆରମ୍ଭ ହୋଇଛି । ଦୋଷୀକୁ କଠୋର ଦଣ୍ଡ ଦେବା ପାଇଁ ଗ୍ରାମବାସୀ ଦାବି କରିଛନ୍ତି । ଏହାକୁ ନେଇ ଗ୍ରାମବାସୀ ରାସ୍ତାରୋକ କରିଛନ୍ତି।
ଆଜିଠୁ ଆରମ୍ଭ ହେଲା ପିତୃପକ୍ଷ
ନନ୍ଦିଘୋଷ ବ୍ୟୁରୋ: ଆରମ୍ଭ ହେଲା ପିତୃପକ୍ଷ । ଭାଦ୍ରବ ମାସ ପୂର୍ଣ୍ଣିମାରୁ ପିତୃପକ୍ଷ । ଆଶ୍ୱିନ ମାସ ଅମାବାସ୍ୟା ପର୍ଯ୍ୟନ୍ତ ପାଳନ ହୋଇଥାଏ ଅପରପକ୍ଷ । ୧୫ ଦିନ ପର୍ଯ୍ୟନ୍ତ ପିତୃପକ୍ଷଙ୍କୁ ସନ୍ତୁଷ୍ଟ କରିବା ପାଇଁ ପ୍ରୟାସ କରାଯାଇଥାଏ । ବିଶ୍ୱାସ ରହିଅଛି ଏହି ସମୟରେ ସମସ୍ତ ପିତୃପୁରୁଷ ଶ୍ରାଦ୍ଧ, ପିଣ୍ଡଦାନକୁ ଅପେକ୍ଷା କରିଥାନ୍ତି । ଏଣୁ ଶ୍ରଦ୍ଧାର ସହ ଏହି ସମୟରେ ରୀତିନୀତି ଅନୁସାରେ କରାଯାଇଥାଏ ଶ୍ରାଦ୍ଧ । ପିତୃ ପୁରୁଷମାନେ ସେମାନଙ୍କ ବଂଶଧର ମାନଙ୍କ ଦ୍ୱାରା କରାଯାଇଥିବା ତର୍ପଣ, ଶ୍ରାଦ୍ଧ ଏବଂ ପିଣ୍ଡ ଦାନ ଇତ୍ୟାଦିରେ ସନ୍ତୁଷ୍ଟ ହୋଇ ସେମାନେ ବଂଶ ବୃଦ୍ଧି, ସୁଖ ଏବଂ ସମୃଦ୍ଧତା ପାଇଁ ଆଶୀର୍ବାଦ କରିଥାନ୍ତି ।
ଭାଦ୍ରବ ମାସ ପୂର୍ଣ୍ଣିମାରୁ ପିତୃପକ୍ଷ । ଆଶ୍ୱିନ ମାସ ଅମାବାସ୍ୟା ପର୍ଯ୍ୟନ୍ତ ପାଳନ ହେବ ଅପରପକ୍ଷ । ୧୫ ଦିନ ପର୍ଯ୍ୟନ୍ତ ପିତୃପକ୍ଷଙ୍କୁ ସନ୍ତୁଷ୍ଟ କରିବା ପାଇଁ ପ୍ରୟାସ କରାଯାଇଥାଏ । ବିଶ୍ୱାସ ରହିଅଛି ଏହି ସମୟରେ ସମସ୍ତ ପିତୃପୁରୁଷ ଶ୍ରାଦ୍ଧ, ପିଣ୍ଡଦାନକୁ ଅପେକ୍ଷା କରିଥାନ୍ତି । ଏଣୁ ଶ୍ରଦ୍ଧାର ସହ ଏହି ସମୟରେ ରୀତିନୀତି ଅନୁସାରେ କରାଯାଇଥାଏ ଶ୍ରାଦ୍ଧ । ପିତୃ ପୁରୁଷମାନେ ସେମାନଙ୍କ ବଂଶଧର ମାନଙ୍କ ଦ୍ୱାରା କରାଯାଇଥିବା ତର୍ପଣ, ଶ୍ରାଦ୍ଧ ଏବଂ ପିଣ୍ଡ ଦାନ ଇତ୍ୟାଦିରେ ସନ୍ତୁଷ୍ଟ ହୋଇ ସେମାନେ ବଂଶ ବୃଦ୍ଧି, ସୁଖ ଏବଂ ସମୃଦ୍ଧତା ପାଇଁ ଆଶୀର୍ବାଦ କରିଥାନ୍ତି ।
ଏହି ଅପରପକ୍ଷ ବା ପିତୃ ପକ୍ଷ ସମୟରେ ଅନେକ ନିୟମ ନିଷ୍ଠା ରହିଛି । ପିତୃପକ୍ଷ ସମୟରେ ଖିଅର ହେବା ସମ୍ପୂର୍ଣ୍ଣ ନିଷିଦ୍ଧ ରହିଥିବା ବେଳେ ଏହି ସମୟରେ ନଖ ମଧ୍ୟ କଟାଯିବା ବାରଣ ରହିଛି । ଏପରିକି ଅପର ପାଗରେ ଅର୍ଥାତ ବାହାରେ ଭୋଜନ କରିବା ସମ୍ପୂର୍ଣ ନିଷିଦ୍ଧ ଅଟେ।ସେହିପରି ତିଳ ତର୍ପଣ ,ଶ୍ରାଦ୍ଧ ଓ ପିଣ୍ଡଦାନ କରିବା ସମୟରେ ସମ୍ପୂର୍ଣ୍ଣ ଶୁଦ୍ଧପୂତ ଭାବେ ରହିବାର ବିଧି ମଧ୍ୟ ରହିଛି ।
ଆଜି ପୁଣି ଖୋଲିବ ଶ୍ରୀମନ୍ଦିର ଭିତର ରତ୍ନଭଣ୍ଡାର
ନନ୍ଦିଘୋଷ ବ୍ୟୁରୋ: ଆଜି ପୁଣି ଖୋଲିବ ଶ୍ରୀମନ୍ଦିର ଭିତର ରତ୍ନଭଣ୍ଡାର l ଭାରତୀୟ ପ୍ରତ୍ନତାତ୍ତ୍ବିକ ସର୍ବେକ୍ଷଣ ସଂସ୍ଥା – ଏ.ଏସ.ଆଇ ପକ୍ଷରୁ ଶ୍ରୀମନ୍ଦିର ରତ୍ନଭଣ୍ଡାରର ପ୍ରାରମ୍ଭିକ ନିରୀକ୍ଷଣ କରାଯିବ । ରାଜ୍ୟ ସରକାରଙ୍କ ଅନୁମୋଦନ ପରେ ଏହି ପ୍ରାରମ୍ଭିକ ନିରୀକ୍ଷଣ ଏବଂ ବୈଷୟିକ ଯାଞ୍ଚ କରାଯିବ । ଏ.ଏସ୍.ଆଇର ଅତିରିକ୍ତ ମହାନିର୍ଦ୍ଦେଶକଙ୍କ ନେତୃତ୍ବରେ ନିରୀକ୍ଷଣ କାର୍ଯ୍ୟ କରାଯିବ l ରାଜ୍ୟ ସରକାରଙ୍କ ଅନୁମୋଦିତ ମାର୍ଗଦର୍ଶିକା ଅନୁସାରେ ଏହା ଅନୁଷ୍ଠିତ ହେବ। ଏନେଇ ରାତ୍ର ୨ ଟାରେ ଶ୍ରୀ ମନ୍ଦିର ଦ୍ୱାର ଫିଟା ନୀତି ଅନୁଷ୍ଠିତ ହେବ। ଏହାପରେ ଅନାନ୍ୟ ନୀତି କାନ୍ତି ଅନୁଷ୍ଠିତ ହୋଇ ଦୂତୀୟ ଭୋଗ ମଣ୍ଡପ ପରେ ରତ୍ନଭଣ୍ଡାର ନିରୀକ୍ଷଣ କାର୍ଯ୍ୟ କରାଯିବ l ଦିନ ଗୋଟାଏ ଠାରୁ ନିରୀକ୍ଷଣ କାର୍ଯ୍ୟ ଶେଷ ହେବା ପର୍ଯ୍ୟନ୍ତ ସର୍ବସାଧାରଣ ଦର୍ଶନ ବନ୍ଦ ରହିବ । ମହାପ୍ରସାଦ କିଣିବାକୁ ଥିବା ଇଚ୍ଛୁକ ଭକ୍ତ ସିଂହଦ୍ଵାର ପଟେ ବାଇଶି ପାହାଚ ଦେଇ ଆନନ୍ଦ ବଜାରରୁ ମହାପ୍ରସାଦ କିଣି ଉତ୍ତର ଦ୍ୱାର ପଟେ ପ୍ରସ୍ଥାନ କରିପାରିବେ ।
ବଦଳିଲେ ଭରତପୁର ଥାନା ଆଇଆଇସି ସମେତ ମହିଳା ASI ଓ ଜଣେ କନଷ୍ଟେବଳ
ନନ୍ଦିଘୋଷ ବ୍ୟୁରୋ: ବଦଳିଲେ ଭରତପୁର ଥାନା ଆଇଆଇସି ସମେତ ମହିଳା ASI ଓ ଜଣେ କନଷ୍ଟେବଳ। ଭରତପୁର ଥାନା ଆଇଆଇସି ଦୀନକୃଷ୍ଣ ମିଶ୍ରଙ୍କୁ ଡିସିପି ହେଡକ୍ୱାର୍ଟର୍ସକୁ ବଦଳି କଲେ ପୋଲିସ କମିଶନର । ଭରତପୁର ଥାନାରେ ସେନା ଅଧିକାରୀ ଓ ତାଙ୍କ ବାନ୍ଧବୀଙ୍କୁ ଦୁର୍ବ୍ୟବହାର ଘଟଣାର ନିରପେକ୍ଷ କ୍ରାଇମବ୍ରାଞ୍ଚ୍ ତଦନ୍ତ ପାଇଁ କରାଗଲା ବଦଳି । ସେହିପରି ଭରତପୁର ଥାନାରେ କାର୍ଯ୍ୟରତ ASI ସଲିଲମୟୀ ସାହୁଙ୍କୁ ମଧ୍ୟ ଡିସିପି ହେଡ କ୍ୱାର୍ଟର୍ସକୁ କରାଯାଇଛି ବଦଳି । ତା ସହିତ କନଷ୍ଟେବଳ ବଳରାମ ହାଂସଦାଙ୍କୁ ମଧ୍ୟ କରାଯାଇଛି ବଦଳି । ଓଡିଶା ଅବସରପ୍ରାପ୍ତ ସେନା ସଂଘର ଅଭିଯୋଗ ଅନୁସାରେ ଶନିବାର ବିଳମ୍ବିତ ରାତି ୧୨ଟା ୩୦ରେ ଦୁର୍ବୃତ୍ତଙ୍କ ଆକ୍ରମଣର ଶିକାର ହୋଇଥିଲେ ମେଜର ଗୁରବନ୍ତ ସିଂ ଓ ତାଙ୍କ ବାନ୍ଧବୀ । ମେଜର ଗୁରୁବନ୍ତ ଓ ତାଙ୍କ ବାନ୍ଧବୀ ଅଙ୍କିତା ପଟିଆର ଏକ ରେସ୍ତେରାଁରୁ ଆସୁଥିବା ବେଳେ ରାସ୍ତାରେ ଏକ କାରକୁ ଓଭରଟେକ କରିବାପରେ ପଛରୁ ଆସୁଥିବା ଗାଡ଼ିରୁ କିଛି ଯୁବକ ସେମାନଙ୍କୁ ଅଟକାଇ ଧକ୍କା ମାରିବା ସହ ଧମକ ଦେଇଥିଲେ । ଏନେଇ ମେଜର ଓ ତାଙ୍କ ବାନ୍ଧବୀ ଭରତପୁର ଥାନାକୁ ଅଭିଯୋଗ କରିବାକୁ ଯାଇଥିଲେ । ଜଣେ ମହିଳା ଅଫିସର ବିନା ୟୁନିଫର୍ମରେ ତାଙ୍କ ନିକଟକୁ ଆସିଥିଲେ । ଅଭିଯୋଗ ରଖିବାକୁ ତାଙ୍କୁ କହିବାପରେ ସେ ଶୁଣିନଥିଲେ । ଏନେଇ ଉଭୟଙ୍କ ମଧ୍ଯରେ ଯୁକ୍ତିତର୍କ ହେବା ପରେ ଗୁରୁବନ୍ତଙ୍କୁ ପ୍ଯାଣ୍ଟ ସାର୍ଟ ଖୋଲି ଥାନାରେ ବସାଇଦେଇଥିଲେ ।
ଆଜି ଜମ୍ମୁ-କାଶ୍ମୀରରେ ପ୍ରଥମ ପର୍ଯ୍ୟାୟ ଭୋଟ୍
ନନ୍ଦିଘୋଷ ବ୍ୟୁରୋ: ଜାମୁ କାଶ୍ମୀର ବିଧାନସଭା ନିର୍ବାଚନର ପ୍ରଥମ ପର୍ଯ୍ୟାୟ ଭୋଟ। ମୋଟ ୯୦ ଆସନ ମଧ୍ୟରୁ ୭ ଜିଲ୍ଲାର ୨୪ ଆସନରେ ହେବ ଭୋଟଗ୍ରହଣ। କାଶ୍ମୀର ଅଂଚଳର ୧୬ ଆସନ ଓ ଜାମ୍ମୁ ଅଂଚଳର ୮ ଆସନରେ ଭୋଟ। ୨୪ ଆସନରେ ବିଭିନ୍ନ ଦଳରୁ ପ୍ରତିନ୍ଦ୍ଵନ୍ଦ୍ବିତା କରୁଛନ୍ତି ୨୧୯ ପ୍ରାର୍ଥୀ। ପ୍ରଥମ ପର୍ଯ୍ୟାୟରେ ୨୩ ଲକ୍ଷରୁ ଭୋଟର ସେମାନଙ୍କର ମତ ସାବ୍ୟସ୍ତ କରିବେ। ଭୋଟରଙ୍କ ମଧ୍ୟରେ ୫ ଲକ୍ଷରୁ ଅଧିକ ଯୁବ ଭୋଟର ରହିଛନ୍ତି। ୧୦ ବର୍ଷ ପରେ ଭୋଟ ହେଉଥିବାରୁ ଭୋଟରଙ୍କ ମଧ୍ୟରେ ଅନେକ ଉତ୍ସାହ ରହିଛି। ପ୍ରଥମ ପର୍ଯ୍ୟାୟରେ ମୋଟ ୨୩ ଲକ୍ଷ ୨୭ ହଜାର ଭୋଟର ସେମାନଙ୍କ ମତ ସାବ୍ୟସ୍ତ କରିବେ। ଚଳିତ ନିର୍ବାଚନରେ କଂଗ୍ରେସ, ନ୍ଯାସନାଲ କନଫରେନ୍ସ, ବିଜେପି, ପିପୁଲ୍ସ ଡେମୋକ୍ରାଟିକ ପାର୍ଟି, ଆପନି ପାର୍ଟି, ସିପିଏମ, ଜେକେ ପିପୁଲ୍ସ କନଫରେନ୍ସ, ଡେମୋକ୍ରାଟିକ ପ୍ରୋଗ୍ରେସିଭ ଆଜାଦ ପାର୍ଟି, ଜେକେ ଆଓ୍ବାମି ଇତେହାଦ ପାର୍ଟିର ପ୍ରାର୍ଥୀ ନିର୍ବାଚନକୁ ଓହ୍ଲାଇଛନ୍ତି। ଜାମୁ କାଶ୍ମୀର ନିର୍ବାଚନ ଲାଗି ପୋଲିସ ପକ୍ଷରୁ କଡ଼ା ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି। ଜାମ୍ମୁ ଓ କାଶ୍ମୀରରେ ଧାରା ୩୭୦ ଉଚ୍ଛେଦ ପ୍ରସଙ୍ଗ ନିର୍ବାଚନ ହୋଇଛି ମୁଖ୍ଯ ପ୍ରସଙ୍ଗ। ଗତ ୩୧ ଅକ୍ଟୋବର ୨୦୧୯ରେ ଜାମ୍ମୁ ଓ କାଶ୍ମୀରକୁ ଦୁଇଟି କେନ୍ଦ୍ରଶାସିତ ଅଞ୍ଚଳରେ ଭାଙ୍ଗି ଦିଆଯାଇଥିଲା। ସେଗୁଡିକ ହେଲା- ଜାମ୍ମୁ ଓ କାଶ୍ମୀର ଏବଂ ଲଦାଖ। ଧାରା ୩୭୦ ଉଚ୍ଛେଦକୁ ସମର୍ଥନ କରିଥିଲେ ବିଜେପି, ଆପ, ଏଆଇଏଡିଏମକେ, ଟିଡିପି, ଓ୍ବାଇଏସଆର କଂଗ୍ରେସ, ଶିବସେନା। ସେହିପରି ଉଚ୍ଛେଦକୁ ବିରୋଧ କରିଥିଲେ କଂଗ୍ରେସ, ଏନସି, ଜେକେପିଡିପି, ସିପିଏମ, ଟିଏମସି।
ପୋଲିସ ଅପାରଗତା ଆଇନଶୃଙ୍ଖଳକୁ ବିଗାଡ଼ି ଦେଇଛି: ବିଜେଡି
ଭୁବନେଶ୍ବର: ଭରତପୁର ଥାନାରେ ସେନା ଅଧିକାରୀ ଏବଂ ତାଙ୍କ ବାନ୍ଧବୀଙ୍କୁ ପୋଲିସ ଅତ୍ଯାଚାର ନେଇ ବିଜେଡିର ଗୁରୁତ୍ଵାରୋପ । ପ୍ରେସମିଟ୍ କରି ରାଜ୍ଯ ସରକାରଙ୍କ ଉପରେ ବର୍ଷିଛନ୍ତି ବିଜେଡି ମୁଖପାତ୍ର ଲେନିନ ମହାନ୍ତି । କହିଛନ୍ତି, ଯାହାକୁ ଆମେ ରକ୍ଷାକର୍ତ୍ତା ବୋଲି ବିଶ୍ଵାସ କରୁଛେ ସେମାନେ ଅତ୍ଯାଚାର କରୁଛନ୍ତି । ପୋଲିସର ଅପାରଗତା ଯୋଗୁଁ ଆଇନଶୃଙ୍ଖଳା ପରିସ୍ଥିତିର କଦର୍ଯ୍ଯ ଗତି ହୋଇଛି । ଲାଗୁଛି ରାଜ୍ଯରେ ସାଧାରଣ ଲୋକ ସୁରକ୍ଷିତ ନାହାନ୍ତି ।
ଆଗକୁ ସେ କହିଛନ୍ତି, ସେନାର ଅଧିକାରୀଙ୍କୁ ଗୋଡ଼ାଇ ଗୋଡ଼ାଇ ହଇରାଣ କରୁଛି ଓଡ଼ିଶା ପୋଲିସ । ପୋଲିସର ଦାୟିତ୍ଵ ଜନତାଙ୍କ ସୁରକ୍ଷା କରିବା । ହେଲେ ପୂରା ତଳସ୍ତରକୁ ଚାଲି ଯାଇଛି ପୋଲିସ । ସେନା ଅଧିକାରୀଙ୍କୁ ଥାନାରେ କରାଯାଇଥିଲା ଅସଦାଚରଣ । ଥାନାରେ ନଥିଲେ ଆଇଆଇସି । ମେଜରଙ୍କୁ ଅବାନ୍ତର ପ୍ରଶ୍ନ ପଚାରିଥିଲେ ଦାୟିତ୍ଵରେ ଥିବା ମହିଳା ଅଧିକାରୀ । ମହିଳା ପୋଲିସ ଅଧିକାରୀ ନାଇଟି ପିନ୍ଧି ଥାନାରେ ବସିଥିଲେ । ଥାନାର ମିଳୁନି ସେହି ସମୟର ସିସିଟିଭି ଭିଡିଓ । ଘଟଣା ନେଇ ସେନା କର୍ତ୍ତୃପକ୍ଷଙ୍କୁ ଖବର ଦିଆଯାଇ ନଥିଲା । ସେନା ଅଧିକାରୀଙ୍କ ବାନ୍ଧବୀଙ୍କୁ ଦୟନୀୟ ଭାବେ ମାଡ଼ ମରାଯାଇଛି । ମେଜରଙ୍କ ବାନ୍ଧବୀଙ୍କ ମାଢି ଭାଙ୍ଗି ଯାଇଛି । ଏପରି ଘଟଣା ଓଡ଼ିଶାରେ କେବେ ଦେଖାଯାଇ ନଥିଲା । ଥାନାରେ ସେହିଦିନ କାହିଁକି ବନ୍ଦ ଥିଲା ସିସିଟିଭି ବୋଲି ସେ ପ୍ରଶ୍ନ କରିଛନ୍ତି ।
ପୋଲିସ କର୍ତ୍ତୃପକ୍ଷ ଜାଣିଶୁଣି ସିସିଟିଭିକୁ ବନ୍ଦ କରିଛନ୍ତି ବୋଲି ଅଭିଯୋଗ କରିଛି ବିଜେଡି । ବରିଷ୍ଠ ପୋଲିସ କର୍ତ୍ତୃପକ୍ଷ କ’ଣ କାର୍ଯ୍ଯାନୁଷ୍ଠାନ ଗ୍ରହଣ କରିଛନ୍ତି ? ମାମଲାରେ ପୋଲିସ କର୍ମୀଙ୍କ ଉପରେ କାହିଁକି ହୋଇନି କାର୍ଯ୍ଯାନୁଷ୍ଠାନ ? ପୋଲିସ ଡିଜି ଥାନାର କର୍ମଚାରୀଙ୍କ ଉପରେ କ’ଣ ଆକ୍ସନ ନେଇଛନ୍ତି ବୋଲି ବିଜେଡି ପ୍ରଶ୍ନ କରିବା ସହ ପୋଲିସ ଡିଜି ତୁରନ୍ତ ଘଟଣାରେ କାର୍ଯ୍ୟାନୁଷ୍ଠାନ ଗ୍ରହଣ କରନ୍ତୁ ବୋଲି ଦାବି କରିଛି ।
ଜଳବାୟୁ ଅନୁକୂଳ କୃଷିରେ ପୂର୍ବ ନବୀନ ସରକାରଙ୍କ ଭୂମିକାକୁ ପ୍ରଶଂସା
ଭୁବନେଶ୍ବର: ନରଓ୍ବେ ସରକାରଙ୍କ ଅନୁଦାନରେ ୬ ବର୍ଷ ତଳେ ଗଞ୍ଜାମ ଜିଲ୍ଲାର ଦୁଇଟି ବ୍ଲକରେ ଆରମ୍ଭ ହୋଇଥିବା ଜଳବାୟୁ ଅନୁକୂଳ କୃଷି ଚାଷୀର ଆର୍ଥିକ ବିକାଶ କରିବା ସହିତ ଅନ୍ୟ ରାଜ୍ୟ ଓ ଦେଶ ପାଇଁ ନୂଆ ଉଦାହରଣ ସୃଷ୍ଟି କରିଛି । ଦୁର୍ବିପାକ ମୁକାବିଲା ସହିତ ନିରନ୍ତର ଖାଦ୍ୟ ସୁରକ୍ଷା ସୁନିଶ୍ଚିତ କରିବାରେ ପୂର୍ବ ବିଜେଡି ସରକାର ସମୟରେ ଆରମ୍ଭ ହୋଇଥିବା ଉଦ୍ୟମ ଆଜି ଓଡିଶାକୁ ବିଶ୍ବ ଦରବାରରେ ପରିଚିତ କରିପାରିଛି । ଜଳବାୟୁ ଅନୁକୂଳ କୃଷିରେ ପୂର୍ବ ନବୀନ ସରକାରଙ୍କ ଭୂମିକାକୁ ମିଳୁଛି ପ୍ରଶଂସା ।
ବାତ୍ୟା, ବନ୍ୟା, ମରୁଡ଼ି । ଓଡ଼ିଶାର ଚିର ସହଚର । ଦୁର୍ବିପାକରେ ରାଜ୍ୟର ଚାଷୀ ଯେପରି ତଳିତଳାନ୍ତ ନ ହୁଏ, ସେଥିପାଇଁ ପୂର୍ବ ନବୀନ ସରକାରଙ୍କ ସମୟରେ ଆରମ୍ଭ ହୋଇଥିବା ଜଳବାୟୁ ଅନୁକୂଳ କୃଷି ଯୋଜନା ଆଜି ବିଶ୍ବକୁ ନୂଆ ଦିଗ ଦେଖାଇଛି । ୨୦୧୮ ମସିହାରେ ନରଓ୍ବେ ସରକାରଙ୍କ ଆର୍ଥିକ ଅନୁଦାନରେ ଓଡ଼ିଶା କୃଷି ଓ ବୈଷୟିକ ବିଶ୍ବବିଦ୍ୟାଳୟର ବୈଜ୍ଞାନିକମାନେ ଗବେଷଣା କରି ଗଞ୍ଜାମ ଜିଲ୍ଲାରେ ପରୀକ୍ଷାମୂଳକ ଭାବେ ଦୁର୍ବିପାକ ନିରୋଧୀ ଚାଷ ଆରମ୍ଭ କରିଥିଲେ । ସୁରଡ଼ା ବ୍ଲକର ଲାଠିଗଦା, ସୋରିଷବିଲି ଓ ରଙ୍ଗେଇଲୁଣ୍ଡା ବ୍ଲକର ଚିକରଡ଼ା ଓ ଶାସନପଦର ଗ୍ରାମରେ ଏହି କାର୍ଯ୍ୟକ୍ରମ ସଫଳ ହୋଇଛି । ଆଗକୁ ରାଜ୍ୟର ନୟାଗଡ଼, କନ୍ଧମାଳ, କେନ୍ଦ୍ରାପଡ଼ା ଓ ଜଗତସିଂହପୁର ଜିଲ୍ଲାରେ ଜଳବାୟୁ ଅନୁକୂଳ ବିହନ ପ୍ରୟୋଗ କରି ଚାଷ କାର୍ଯ୍ୟ କରିବାକୁ ଯୋଜନା ରହିଛି ।
ଦୁର୍ବିପାକ ସମୟରେ ଚାଷୀର ଅଭୂତ କ୍ଷତି ହୋଇଥାଏ । ଏଥିପାଇଁ ରାଜ୍ୟ ସରକାରଙ୍କ ଇନପୁଟ ସହାୟତା, ବୀମା କ୍ଷତିପୂରଣ ଚାଷୀର ଆର୍ଥିକ ଓ ମାନସିକ ଆଘାତଜନିତ କ୍ଷତିକୁ ଭରଣା କରିପାରେନି । ଏ ନେଇ ପୂର୍ବ ସରକାର ସମୟରେ ଚାଷୀଙ୍କ ପାଇଁ ଧାନ ଫସଲ ସହିତ ବିଭିନ୍ନ ଅର୍ଥକାରୀ ଫସଲ ଉତ୍ପାଦନ ଉପରେ ଗୁରୁତ୍ବ ଦିଆଯାଇଥିଲା । ଏ ନେଇ ସମୃଦ୍ଧ କୃଷକ ନୀତିରେ ପନିପରିବାଠାରୁ ଆରମ୍ଭ କରି ବିଭିନ୍ନ ଜିଲ୍ଲାର କୃଷି ଜଳବାୟୁ ଉପଯୋଗୀ ଫସଲ ଉତ୍ପାଦନ ଉପରେ ପ୍ରୋତ୍ସାହନ ପ୍ରଦାନ ନେଇ ବ୍ୟବସ୍ଥା ହୋଇଥିଲା ।
ଜଳବାୟୁ ଅନୁକୂଳ କୃଷି ପାଇଁ ଭାରତ ସହିତ ମିଶି ନରଓ୍ବେ, ତାଞ୍ଜାନିଆ କାମ କରୁଛନ୍ତି । ପ୍ରତିବର୍ଷ ଓଡ଼ିଶା ପ୍ରାକୃତିକ ଦୁର୍ବିପାକର ସମ୍ମୁଖୀନ ହେଉଥିବାରୁ ଦୁର୍ବିପାକ ସହନଶୀଳ କୃଷିର ଗବେଷଣା ପାଇଁ ପ୍ରକୃଷ୍ଟ ସ୍ଥାନ ଭାବେ ଓଡ଼ିଶାକୁ ଚିହ୍ନଟ କରାଯାଇଛି ।
ଚୀନକୁ ହରାଇ ୫ମ ଥର ପାଇଁ ଏସିଆନ ଚାମ୍ପିଅନ୍ସ ଟ୍ରଫି ଜିତିଲା ଭାରତ, ନବୀନ ଜଣାଇଲେ ଅଭିନନ୍ଦନ
ନୂଆଦିଲ୍ଲୀ: ଏସିଆନ ହକି ଚାମ୍ପିଅନ୍ସ ଟ୍ରଫିରେ ଭାରତର ବାଜିମାତ । ରେକର୍ଡ ପଞ୍ଚମ ଥର ପାଇଁ ଏସୀୟ ଚାମ୍ପିଅନ୍ସ ଟ୍ରଫି ଟାଇଟଲ ଜିତିଛି ଭାରତୀୟ ପୁରୁଷ ହକି ଦଳ । ଫାଇନାଲରେ ଟିମ୍ ଇଣ୍ଡିଆ ଚୀନକୁ ୧-୦ ଗୋଲରେ ପରାସ୍ତ କରିଛି । ଭାରତ ପାଇଁ ଜୁଗରାଜ ଏକମାତ୍ର ଗୋଲ ସ୍କୋର କରିଛନ୍ତି । ସେ ଅଧିନାୟକ ହରମାନପ୍ରୀତଙ୍କ ପାସକୁ ଗୋଲରେ ପରିଣତ କରିଥିଲେ ।
ଚୀନ ମାଟିରେ ଇତିହାସ ରଚିଛି ଭାରତ । ଭାରତର ଏହି ବିଜୟ ନେଇ ଭାରତୀୟ ପୁରୁଷ ହକି ଟିମକୁ ବିଭିନ୍ନ ମହଲରୁ ଶୁଭେଚ୍ଛାର ସୁଅଛୁଟିଛି । ଚାମ୍ପିଅନ ଟିମକୁ ବିଜେଡି ସୁପ୍ରିମୋ ତଥା ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଅଭିନନ୍ଦନ ଜଣାଇଛନ୍ତି ।
ପୁରୁଷ ହକି ଟିମର ଏହି ବିଜୟ ଧାରା ଜାରି ରଖିବା ସହ ଦଳ ଆଗକୁ ଦେଶ ପାଇଁ ଗୌରବ ଅର୍ଜନ କରୁ ବୋଲି ଶୁଭେଚ୍ଛା ବାର୍ତ୍ତାରେ କହିଛନ୍ତି ନବୀନ। ଆଗାମୀ ଦିନରେ ଉନ୍ନତ ପ୍ରଦର୍ଶନ କରିବାକୁ ଭାରତୀୟ ପୁରୁଷ ହକି ଟିମକୁ ଶୁଭକାମନା ଜଣାଇଛନ୍ତି ନବୀନ ।
ତେଲରେ ଆମଦାନୀ ଶୁଳ୍କ ଲଗାଇ ଲୋକଙ୍କୁ ଲୁଟୁଛି କେନ୍ଦ୍ର, ଜେତିବାରେ ଲାଗିଛି ଅସନ୍ତୋଷ
ଭୁବନେଶ୍ବର: ତେଲ ଦରରେ ଲାଗିଛି ନିଆଁ । କେନ୍ଦ୍ର ସରକାର ଆମଦାନୀ ଶୁଳ୍କ ଲଗାଇଥିବାରୁ ତେଲ ଲିଟର ପିଛା ଏକାଥରେ ବଢ଼ିଛି ୨୦ ଟଙ୍କା । କେନ୍ଦ୍ର ସରକାରଙ୍କ ଏପରି ଜନ ବିରୋଧୀ ଆଭିମୁଖ୍ୟକୁ ନେଇ ବର୍ଷିଛନ୍ତି ବିରୋଧୀ । ତୁରନ୍ତ ଦରଦାମ ନିୟନ୍ତ୍ରଣ କରିବାକୁ ବିଜେଡ଼ି ଦାବି କରିଛି । ଖାଇବା ତେଲ ଦର ବୃଦ୍ଧି ନେଇ କଂଗ୍ରେସ କେନ୍ଦ୍ରକୁ ଟାର୍ଗେଟ କରିଛି । ଯାହାକୁ ନେଇ ଉଷ୍ମ ହୋଇଛି ରାଜ୍ୟ ରାଜନୀତି ।
ଡାଲି, ପିଆଜ, ରସୁଣ ପରେ ଖାଇବା ତେଲ ମହଙ୍ଗା । ଲିଟର ପିଛା ଏକାଥରକେ ୨୦ ଟଙ୍କା ବୃଦ୍ଧି । ହାଣ୍ତିଶାଳରେ ଚଡ଼କ, ଚିନ୍ତାରେ ଖାଉଟି । କେନ୍ଦ୍ର ସରକାର ଆମଦାନୀ ଶୁଳ୍କ ବଢାଇ ଗ୍ରାହକଙ୍କ ମୁଣ୍ଡରେ ବୋଝ ଲଦି ଦେଇଛନ୍ତି । ପାମୋଲିନ, ସୂର୍ଯ୍ୟମୁଖୀ ଓ ସୋୟାବିନ ତେଲ ଦର ଆକାଶ ଛୁଆଁ ହୋଇଛି । ହଠାତ ବଜାରରେ ଅତ୍ୟାବଶ୍ୟକ ସାମଗ୍ରୀ ଦର ଅହେତୁକ ଭାବେ ବୃଦ୍ଧି ପାଇବାରୁ କେନ୍ଦ୍ର ସରକାରଙ୍କୁ ଟାର୍ଗେଟ କରିଛନ୍ତି ବିରୋଧୀ । ବଡ଼ ବଡ଼ କମ୍ପାନୀ ପାଇଁ କେନ୍ଦ୍ରର ବିଜେପି ସରକାର ଗରିବଙ୍କ ପକେଟ ଖାଲି କରୁଛି ବୋଲି ବିଜେଡ଼ି ଅଭିଯୋଗ କରିଛି । କେନ୍ଦ୍ର ସରକାର ତୁରନ୍ତ ଗରିବ ମାରଣ ନୀତି ବନ୍ଦ କରି ଦରଦାମ ନିୟନ୍ତ୍ରଣ କରନ୍ତୁ ବୋଲି ବିଜେଡ଼ି ଦାବି କରିଛି ।
ଆମଦାନୀ ଶୁଳ୍କ ବୃଦ୍ଧି ପରେ ବଜାରରେ ବିଭିନ୍ନ ତେଲ ଦର ବଢିଛି । ସୋରିଷ ତେଲ ଲିଟର ୧୪୦ ଟଙ୍କାରୁ ୧୬୦ ଟଙ୍କା, ରିଫାଇନ ତେଲ ଲିଟର ପିଛା ୧୩୦ ଟଙ୍କା ହୋଇଛି । କର୍ପୋରେଟ ଜଗତ ଯୋଗୁଁ ଅତ୍ୟାବଶ୍ୟକ ସାମଗ୍ରୀ ଦର ଆକାଶ ଛୁଆଁ ହୋଇଛି । କେନ୍ଦ୍ର ସରକାର ଦରଦାମ ନିୟନ୍ତ୍ରଣ କରିବାରେ ସଫଳ ହୋଇପାରି ନଥିବାରୁ ବଜାର ଦର ନିୟନ୍ତ୍ରଣ ବାହାରକୁ ଯାଇଛି ବୋଲି ବ୍ୟବସାୟୀ ସଂଘ ସଭାପତି ସୁଧାକର ପଣ୍ଡା କହିଛନ୍ତି । ଦରଦାମ ନିୟନ୍ତ୍ରଣ ନକଲେ ପରିସ୍ଥିତି ବିଗିଡ଼ିଯିବ ବୋଲି ରାଜନୈତିକ ସମୀକ୍ଷକ କହିଛନ୍ତି ।
ପାବର୍ଣ ସମୟରେ ଖାଉଟିଙ୍କ ଉପରେ ଦରଦାମ ବୋଝ ଲଦି ଦେଇଛନ୍ତି ସରକାର । ତେଲ ଦର ବୃଦ୍ଧି ଜନ ବିରୋଧୀ ଆଭିମୁଖ୍ୟ ବୋଲି କହି କେନ୍ଦ୍ର ସରକାରଙ୍କୁ କଡ଼ା ସମାଲୋଚନା କରିଛନ୍ତି ବିରୋଧୀ । ଆଗକୁ ଦର ନିୟନ୍ତ୍ରଣ ନହେଲେ ଆନ୍ଦୋଳନ କରିବାକୁ ଖୋଲା ଚେତବାନୀ ଦେଇଛନ୍ତି ରାଜନେତାମାନେ ।
ଓଡ଼ିଶା ବିରୋଧରେ ଦିଲ୍ଲୀରେ ଷଡଯନ୍ତ୍ର, ହକ୍ ଦେବାକୁ ନାରାଜ କେନ୍ଦ୍ରର ବିଜେପି ସରକାର
ଭୁବନେଶ୍ବର: ନା ସ୍ଵତନ୍ତ୍ର ରାଜ୍ୟ ପାହ୍ୟା ଦେଉଛ ନାଁ କୋଇଲା ରୟାଲଟି ସଂଶୋଧନ କରୁଛ । ସବୁ ଆଡୁ ଅବହେଳା । ବାରମ୍ବାର ଅଭିଯୋଗ ସତ୍ତ୍ଵେ ଓଡ଼ିଶା ପ୍ରତି କେନ୍ଦ୍ରର ଅବହେଳା ଚରମସୀମାରେ ପହଞ୍ଚିଛି । ରାଜ୍ୟର କିଛି ବି ଦାବି ଶୁଣିବାକୁ ନାରାଜ କେନ୍ଦ୍ରର ବିଜେପି ସରକାର । ଓଡ଼ିଶା ପ୍ରତି ଦିଲ୍ଲୀ ଦରବାର ଷଡ଼ଯନ୍ତ୍ର କରୁଥିବା ଅଭିଯୋଗ କରି ଆଜି ବର୍ଷିଛି ବିଜେଡି ।
ସାମ୍ଵାଦିକ ସମ୍ମିଳନୀରେ ଦଳର ନେତା ସଞ୍ଜୟ ଦାସବର୍ମା ଅଭିଯୋଗ କରିଛନ୍ତି, ଓଡ଼ିଶା ବାରମ୍ବାର ପ୍ରାକୃତିକ ବିପର୍ଯ୍ୟୟର ସମ୍ମୁଖୀନ ହେଉଛି । ନବୀନ ପଟ୍ଟନାୟକ ବାରମ୍ବାର ସ୍ଵତନ୍ତ୍ର ରାଜ୍ୟ ପାହ୍ୟା ଦାବି କରି ଆସୁଛନ୍ତି, କିନ୍ତୁ କର୍ଣ୍ଣପାତ କରୁନି କେନ୍ଦ୍ର । ବିହାର ଓ ଆନ୍ଧ୍ରକୁ ଦେଲ ସ୍ଵତନ୍ତ୍ର ଆର୍ଥିକ ପ୍ୟାକେଜ, ହେଲେ ଓଡ଼ିଶାକୁ କାହିଁକି ଦିଆଗଲାନି ବୋଲି ପ୍ରଶ୍ନ କରିଛନ୍ତି ସଞ୍ଜୟ ।
ସେହିପରି ବହୁ ବର୍ଷ ହେଲା କୋଇଲା ରୟାଲଟି ସଂଶୋଧନ ହୋଇ ନଥିବାରୁ ରାଜ୍ୟ ହରାଉଛନ୍ତି ଶହ ଶହ କୋଟି ଟଙ୍କା । ନିକଟରେ ସୁପ୍ରିମକୋର୍ଟ ଦେଇଥିବା ରାୟ ଅନୁସାରେ ଓଡ଼ିଶା ଖଣିଜ ସମ୍ପଦରୁ ୨୦୦୫ରୁ ଏପର୍ଯ୍ୟନ୍ତ ୨ ଲକ୍ଷ କୋଟି ଟଙ୍କା ପାଇବ । କିନ୍ତୁ ସେହି ରାୟର ରିଭ୍ୟୁ ପିଟିସନ ଦାଖଲ କରିଛନ୍ତି କେନ୍ଦ୍ର ସରକାର । ଏହାଦ୍ଵାରା ଓଡ଼ିଶାର କ୍ଷତି ହେବ ବୋଲି କହିବା ସହ ଏଥିରୁ କ୍ଷାନ୍ତ ହେବାକୁ ଓଡ଼ିଶାର ୨୦ ବିଜେପି ସାଂସଦ ଦାବି କରନ୍ତୁ ବୋଲି ସେ ଆହ୍ଵାନ ଦେଇଛନ୍ତି । ପିଏମ୍ ଆବାସ ପ୍ରଦାନରେ ବି ଓଡ଼ିଶାକୁ କରାଯାଇଛି ଅବହେଳ । ଯେତେ ଦରକାର ତାଠୁ ବହୁତ କମ୍ ପକ୍କା ଘର ଦିଆଯାଇଛି ।
ଅନ୍ୟପକ୍ଷେ ସୁଭଦ୍ରା ଯୋଜନା ନେଇ ରାଜ୍ୟ ସରକାରଙ୍କୁ କଡ଼ା ଭର୍ତ୍ସନା କରିଛନ୍ତି ସ୍ନେହାଙ୍ଗିନୀ ଛୁରିଆ । ସେ ଅଭିଯୋଗ କରିଛନ୍ତି, ସବୁ ମହିଳାଙ୍କୁ ଦେବ ବୋଲି କହିଥିଲା ବିଜେପି । ରାଜ୍ୟରେ ପ୍ରାୟ ୨ କୋଟିରୁ ଅଧିକ ମହିଳା ଅଛନ୍ତି । କିନ୍ତୁ ୧ କୋଟି ମହିଳାଙ୍କୁ ଦେବ । ଏହି ପ୍ରତାରଣା କାହିଁକି ବୋଲି ସେ ବିଜେପିକୁ ପ୍ରଶ୍ନ କରିଛନ୍ତି । ତା’ଛଡ଼ା ଆଜି ଦେଲ ୫ ହଜାର, କିନ୍ତୁ ୫୦ ହଜାର କାହିଁକି ଲେଖିଛ ବୋଲି ପ୍ରଶ୍ନ କରିଛନ୍ତି ସ୍ନେହାଙ୍ଗିନୀ ।
ଆଗକୁ ସ୍ନେହାଙ୍ଗିନୀ କହିଛନ୍ତି, ସୁଭଦ୍ରା ଗାଇଡ୍ ଲାଇନ ବିଷୟରେ ମନ୍ତ୍ରୀଙ୍କୁ ବି ଜାଣିନାହାନ୍ତି । ଅଙ୍ଗନୱାଡ଼ି, ସିଆରପିଙ୍କୁ ଭୁଆଁ ବୁଲାଯାଉଛି । କେବଳ ସଭାକୁ ମହିଳା ବୋହି ଆଣିବାକୁ ସେମାନଙ୍କୁ ବ୍ୟବହାର କରାଯାଉଛି । ଦିନକୁ ମିଳୁଥିବା ୨୭ ଟଙ୍କାରେ ମହିଳାମାନେ କେଉଁ ଉଦ୍ୟୋଗ କରିବେ ବୋଲି ପ୍ରଶ୍ନ କରିଛନ୍ତି ସ୍ନେହାଙ୍ଗିନୀ ।